ANNESS

ITTRA LILL-PRESIDENT TAŻ-ŻIMBABWE

L-Unjoni Ewropea tagħti importanza kbira lid-dispożizzjonijiet tal-Artikolu 9 tal-Ftehim ta’ Sħubija AKP-KE. Bħala elementi essenzjali tal-Ftehim ta’ Sħubija, ir-rispett għad-drittijiet tal-bniedem, għall-istituzzjonijiet demokratiċi u għall-istat tad-dritt jiffurmaw il-bażi tar-relazzjonijiet tagħna.

Bl-ittra tad-19 ta’ Frar 2002, l-Unjoni Ewropea infurmatek bid-Deċiżjoni tagħha li tikkonkludi l-konsultazzjonijiet li saru skont l-Artikolu 96 tal-Ftehim ta’ Sħubija AKP-KE u li tieħu miżuri xierqa fis-sens tal-Artikolu 96(2)(c) ta’ dak il-Ftehim.

Bl-ittri tad-19 ta’ Frar 2003, tad-19 ta’ Frar 2004, tat-18 ta’ Frar 2005, tal-15 ta’ Frar 2006, tal-21 ta’ Frar 2007, tad-19 ta’ Frar 2008 u tal-20 ta’ Frar 2009 l-Unjoni Ewropea infurmatek bid-deċiżjonijiet tagħha li ma tirrevokax il-miżuri xierqa u li testendi l-perjodu ta’ applikazzjoni sal-20 ta’ Frar 2004, l-20 ta’ Frar 2005, l-20 ta’ Frar 2006, l-20 ta’ Frar 2007, l-20 ta’ Frar 2008, l-20 ta’ Frar 2009 u l-20 ta’ Frar 2010 rispettivament.

L-Unjoni Ewropea tilqa’ bi pjaċir il-formazzjoni tal-Gvern ta’ Għaqda Nazzjonali, imsejjes fuq il-Ftehim Politiku Globali (FPG), li nħoloq fit-13 ta’ Frar 2009. L-Unjoni Ewropea ttenni l-importanza kbira li tagħti lid-djalogu politiku kif previst fl-Artikolu 8 tal-Ftehim ta’ Sħubija AKP-KE, li nbeda uffiċjalment wara talba tal-Gvern taż-Żimbabwe waqt it-Trojka Ministerjali bejn l-Unjoni Ewropea u ż-Żimbabwe fit-18 u d-19 ta’ Ġunju 2009 fi Brussell u lill-ftehim milħuq dwar kif l-affarijiet għandhom jitmexxew ‘il quddiem. Dan jinkludi d-definizzjoni ta’ pjani direzzjonali komuni b’impenji reċiproċi. Dawn huma maħsubin biex jirriflettu, fuq in-naħa taż-Żimbabwe, l-implimentazzjoni effettiva tal-FPG u, fuq in-naħa tal-Unjoni Ewropea, it-tneħħija bil-mod il-mod tar-restrizzjonijiet ta’ bħalissa u n-normalizzazzjoni tar-relazzjonijiet bejn l-Unjoni Ewropea u ż-Żimbabwe.

L-Unjoni Ewropea tappoġġa l-isforzi li attwalment qegħdin isiru mill-Gvern taż-Żimbabwe biex jimplimenta l-FPG, u tilqa’ bi pjaċir id-diplomazija reġjonali intensifikata mmexxija mill-Afrika ta’ Isfel b’appoġġ għar-riforma fiż-Żimbabwe. Madankollu, l-Unjoni Ewropea jiddispjaċiha tara n-nuqqas ta’ progress fil-qafas tad-djalogu politiku kif previst fl-Artikolu 8 tal-Ftehim ta’ Sħubija AKP-KE. L-Unjoni Ewropea temmen li l-kisba ta’ progress sinifikattiv fl-implimentazzjoni tal-FPG mhijiex biss essenzjali iżda hija wkoll possibbli u tista’ ssir, kif enfasizzat fl-iskambji ta’ fehmiet bejnek u s-SADC.

Fid-dawl ta’ dan ta’ hawn fuq, l-Unjoni Ewropea waslet għall-konklużjoni li l-miżuri xierqa jistgħu jiġu kompletament revokati biss meta l-FPG jkun implimentat b’mod effettiv. Għaldaqstant, l-Unjoni Ewropea ddeċidiet li testendi l-perjodu ta’ applikazzjoni tal-miżuri xierqa disposti fid-Deċiżjoni tal-Kunsill 2002/148/KE sal-20 ta’ Frar 2011 u li tadatta l-miżuri xierqa biex jirriflettu l-implimentazzjoni tal-FPG minn Frar 2009 ‘l hawn, b’mod partikulari fl-isfera ekonomika. F’dan il-punt l-ebda sostenn finanzjarju m’għandu jiġi kanalizzat permezz tal-baġit tal-Gvern. L-Unjoni Ewropea ddeċidiet li taħdem biex titmexxa ‘l quddiem l-implimentazzjoni tal-FPA u li timmodifika l-inċiżi (b) u (c) kif ġej:

(b)	Is-sostenn finanzjarju għall-proġetti kollha huwa sospiż ħlief dawk immirati għas-sostenn tal-popolazzjoni, b’mod partikulari f’setturi soċjali u dawk immirati biex isostnu r-riformi msemmijin fil-FPG,

(c)	Il-finanzjament għandu jiġi orjentat mill-ġdid biex isostni lill-popolazzjoni, b’mod partikulari f’setturi soċjali u biex isostni l-proċess ta’ stabbilizzazzjoni tal-pajjiż, b’mod partikulari rigward id-demokratizzazzjoni, ir-rispett għad-drittijiet tal-bniedem u l-istat tad-dritt.

Il-miżuri l-oħrajn kollha elenkati fl-Anness mad-Deċiżjoni tal-Kunsill 2002/148/KE għandhom jibqgħu japplikaw mingħajr bidliet. Id-Deċiżjoni tal-Kunsill tista’ tiġi riveduta fi kwalunkwe mument qabel l-20 ta’ Frar 2011.

L-Unjoni Ewropea għalhekk se tkompli ssostni l-istabbilizzazzjoni tal-Gvern ta’ Għaqda Nazzjonali u l-programmi tiegħu ta’ riforma permezz tas-sostenn tranżizzjonali tagħha għall-biedja u s-sigurta tal-ikel, għas-setturi soċjali, inklużi s-saħħa u l-edukazzjoni, u għall-implimentazzjoni tal-FPG.

L-Unjoni Ewropea tixtieq terġa’ tisħaq fuq l-importanza li tagħti lill-koperazzjoni bejn l-Unjoni Ewropea u ż-Żimbabwe fil-ġejjieni u tikkonferma r-rieda tagħha li terġa’ tqajjem u tmexxi ‘l quddiem id-djalogu politiku kif previst fl-Artikolu 8 tal-Ftehim ta’ Sħubija AKP-KE. F’dak il-kuntest, nittamaw li fil-ġejjieni qrib isir biżżejjed progress min-naħa tal-Gvern taż-Żimbabwe fl-implimentazzjoni tal-FPG sabiex ikun possibbli li terġa tibda l-koperazzjoni sħiħa.

Għoddni tiegħek,