(1)

Le Cinneadh (AE) 2017/1324 ó Pharlaimint na hEorpa agus ón gComhairle (1) bunaíodh an Chomhpháirtíocht maidir le Taighde agus Nuálaíocht i Limistéar na Meánmhara (PRIMA) faoin gclár Fís 2020 – an Clár Réime um Thaighde agus um Nuálaíocht (2014-2020), arna bhunú le Rialachán (AE) Uimh. 1291/2013 ó Pharlaimint na hEorpa agus ón gComhairle (2), ar feadh tréimhse go dtí an 31 Nollaig 2028.

(2)

Tá Ríocht Mharacó (‘Maracó’) ar cheann de na 19 Stát Rannpháirteacha in PRIMA, tar éis di comhaontú a thabhairt i gcrích maidir le comhar eolaíochta agus teicneolaíochta lena leagtar amach na téarmaí agus na coinníollacha dá rannpháirtíocht sa chomhpháirtíocht (‘Comhaontú PRIMA’) (3). Is é is cuspóir do Chomhaontú PRIMA na téarmaí agus na coinníollacha maidir le rannpháirtíocht Mharacó in PRIMA a leagan amach. Tá Comhaontú PRIMA le fanacht i bhfeidhm fad atá Cinneadh (AE) 2017/1324 i bhfeidhm.

(3)

Le Cinneadh (AE) 2024/1167 ó Pharlaimint na hEorpa agus ón gComhairle (4) cuireadh síneadh le fad foriomlán PRIMA faoin gclár Fís Eorpach - an Clár Réime um Thaighde agus um Nuálaíocht (‘Fís Eorpach’), arna bhunú le Rialachán (AE) Uimh. 1291/2013 ó Pharlaimint na hEorpa agus ón gComhairle (5) go dtí an 31 Nollaig 2031. Déantar foráil ann freisin go leanfaidh Maracó de bheith rannpháirteach in PRIMA faoin gclár Fís Eorpach, faoi réir comhaontú a thabhairt i gcrích, i bhfoirm malartú litreacha, lena leasaítear agus lena bhforlíontar Comhaontú PRIMA.

(4)

Ós rud é gur chuir Maracó in iúl gur spéis léi leanúint de bheith rannpháirteach in PRIMA faoin gclár Fís Eorpach, ba cheart di glacadh go foirmiúil leis na téarmaí agus na coinníollacha nuashonraithe maidir le rannpháirtíocht den sórt sin.

(5)

Chuige sin, an 9 Samhain 2023, ghlac an Chomhairle Cinneadh (AE) 2023/2621 (6), lena n-údaraítear an Coimisiún comhaontú a chaibidliú, i bhfoirm malartú litreacha, lena leasaítear agus lena bhforlíontar Comhaontú PRIMA agus lena leagtar amach na téarmaí agus na coinníollacha maidir le rannpháirtíocht Mharacó in PRIMA faoin gclár Fís Eorpach (‘an Comhaontú’).

(6)

Tugadh an chaibidlíocht i gcrích go rathúil trí inisealacha a chur leis an gComhaontú an 8 Meán Fómhair 2025.

(7)

Dá bhrí sin, ba cheart an Comhaontú a shíniú.

(8)

Chun go mbeidh Maracó in ann leanúint dá rannpháirtíocht in PRIMA faoin gclár Fís Eorpach a luaithe is féidir, ba cheart an Comhaontú a chur i bhfeidhm ar bhonn sealadach, go dtí go dtiocfaidh sé i bhfeidhm,