1.   

Fit-2 ta’ Settembru 2025, il-Kummissjoni rċeviet notifika ta’ konċentrazzjoni proposta skont l-Artikolu 4 u wara rinviju skont l-Artikolu 4(5) tar-Regolament tal-Kunsill (KE) Nru 139/2004 (1).

Din in-notifika tikkonċerna l-impriżi li ġejjin:

—	STRABAG AG (“STRABAG”, il-Ġermanja), ikkontrollata minn STRABAG SE (l-Awstrija),

—	WTE Wassertechnik GmbH (“WTE”, il-Ġermanja), ikkontrollata minn EVN AG (l-Awstrija).

STRABAG se takkwista, fis-sens tal-Artikolu 3(1)(b) tar-Regolament dwar l-Għaqdiet, il-kontroll esklużiv ta’ WTE kollha kemm hi.

Il-konċentrazzjoni titwettaq permezz tax-xiri ta’ ishma.

2.   

L-attivitajiet kummerċjali tal-impriżi kkonċernati huma li ġejjin:

—	STRABAG hija involuta fl-oqsma kollha tal-industrija tal-kostruzzjoni u l-katina tal-valur kollha tal-kostruzzjoni mill-ippjanar u d-disinn sal-kostruzzjoni, l-operat u l-ġestjoni tal-faċilitajiet sal-iżvilupp mill-ġdid jew it-twaqqigħ,

—	WTE hija involuta fin-negozju tal-ippjanar, l-inġinerija, l-akkwist u l-kostruzzjoni, kif ukoll l-operat u l-manutenzjoni u l-finanzjament ta’ impjanti għall-provvista tal-ilma, ir-rimi u t-trattament tal-ilma mormi, kif ukoll l-inċinerazzjoni u l-użu tal-ħama termali.

3.   

Wara eżami preliminari, il-Kummissjoni tqis li t-tranżazzjoni notifikata tista’ taqa’ fil-kamp ta’ applikazzjoni tar-Regolament dwar l-Għaqdiet. Madankollu, id-deċiżjoni finali dwar dan il-punt hija riżervata.

Skont l-Avviż tal-Kummissjoni dwar trattament issimplifikat għal ċerti konċentrazzjonijiet skont ir-Regolament tal-Kunsill (KE) Nru 139/2004 dwar il-kontroll ta’ konċentrazzjonijiet bejn l-impriżi (2) għandu jiġi nnutat li dan il-każ jista’ jiġi kkunsidrat għal trattament skont il-proċedura stabbilita fl-Avviż.

4.   

Il-Kummissjoni tistieden lil terzi persuni interessati biex jibagħtulha l-kummenti li jista’ jkollhom dwar il-konċentrazzjoni proposta.

Il-kummenti jridu jaslu għand il-Kummissjoni mhux aktar tard minn 10 ijiem wara d-data ta’ din il-pubblikazzjoni. Ir-referenza li ġejja għandha dejjem tiġi speċifikata:

M.12064 — STRABAG / WTE

Il-kummenti jistgħu jintbagħtu lill-Kummissjoni permezz tal-posta elettronika jew bil-posta. Uża d-dettalji ta’ kuntatt ta’ hawn taħt:

Email: COMP-MERGER-REGISTRY@ec.europa.eu

Indirizz Postali:

European Commission

Directorate-General for Competition

Merger Registry

1049 Bruxelles/Brussel

BELGIQUE/BELGIË