(1)

Bid-Deċiżjoni 2002/648/KE (2), il-Kunsill approva l-konklużjoni tal-Ftehim għall-kooperazzjoni xjentifika u teknoloġika bejn il-Komunità Ewropea u l-Gvern tar-Repubblika tal-Indja (3). Dak il-Ftehim ġie ffirmat fi New Delhi, fit-23 ta' Novembru 2001 u daħal fis-seħħ fl-14 ta' Ottubru 2002. Bid-Deċiżjoni 2009/501/KE (4), il-Kunsill approva l-konklużjoni tal-Ftehim li jġedded il-Ftehim għall-kooperazzjoni xjentifika u teknoloġika bejn il-Komunità Ewropea u l-Gvern tar-Repubblika tal-Indja (5), li ġedded u mmodifika kemxejn il-Ftehim iffirmat fl-2001. Il-Ftehim ġie ffirmat fi New Delhi fit-30 ta' Novembru 2007 u daħal fis-seħħ fis-17 ta' Mejju 2010. Dak il-Ftehim flimkien mal-Ftehim iffirmat fl-2001 jissejħu “il-Ftehim”.

(2)

F'konformità mal-Artikolu 11, il-punt (b), tal-Ftehim, il-Ftehim ġie konkluż għal perjodu ta' ħames snin u jista' jiġġedded bi ftehim reċiproku bejn il-partijiet wara evalwazzjoni matul l-aħħar sena tal-perjodu msemmi qabel.

(3)

Bid-Deċiżjonijiet (UE) 2015/1788 (6) u (UE) 2020/789 (7) l-Kunsill approva t-tiġdid tal-Ftehim għal perjodu addizzjonali ta' ħames snin kull darba. Il-Ftehim kif imġedded l-aħħar ser jiskadi fis-17 ta' Mejju 2025.

(4)

L-evalwazzjoni mwettqa mill-Kummissjoni turi li l-Ftehim ikompli jipprovdi qafas importanti biex tiġi ffaċilitata l-kooperazzjoni bejn l-Unjoni u r-Repubblika tal-Indja f'oqsma prijoritarji komuni tax-Xjenza u t-Teknoloġija li twassal għal benefiċċji reċiproċi. Huwa għaldaqstant fl-interess tal-Unjoni li l-Ftehim jiġġedded għal perjodu addizzjonali ta' ħames snin.

(5)

Iż-żewġ partijiet ikkonfermaw l-intenzjoni tagħhom li jġeddu l-Ftehim għal perjodu addizzjonali ta' ħames snin mingħajr ebda emenda fil-Ftehim. Sabiex tkun żgurata l-kontinwità tal-Ftehim, jenħtieġ li t-tiġdid ikollu effett retroattiv mis-17 ta’ Mejju 2025.

(6)

Għaldaqstant jenħtieġ li it-tiġdid tal-Ftehim jiġi approvat f'isem l-Unjoni,