European flag

Iris Oifigiúil
an Aontais Eorpaigh

GA

Sraith L


2024/3181

20.12.2024

CINNEADH CUR CHUN FEIDHME (AE) 2024/3181 ÓN gCOIMISIÚN

an 19 Nollaig 2024

maidir le haitheantas a thabhairt don scéim dheonach ‘Programme for the Endorsement of Forest Certification -PEFC’ [An Clár um Dheimhniú Foraoise a Fhormhuiniú] as comhlíontacht a léiriú leis na ceanglais le haghaidh breoslaí bithmhaise a leagtar amach i dTreoir (AE) 2018/2001 ó Pharlaimint na hEorpa agus ón gComhairle

(Téacs atá ábhartha maidir le LEE)

TÁ AN COIMISIÚN EORPACH,

Ag féachaint don Chonradh ar Fheidhmiú an Aontais Eorpaigh,

Ag féachaint do Threoir (AE) 2018/2001 ó Pharlaimint na hEorpa agus ón gComhairle an 11 Nollaig 2018 maidir le húsáid fuinnimh ó fhoinsí in-athnuaite a chur chun cinn (1), agus go háirithe Airteagal 30(4) agus (5) di,

De bharr an mhéid seo a leanas:

(1)

Le Treoir (AE) 2018/2001, leagtar síos ceanglais le haghaidh breoslaí áirithe, mar atá bithbhreoslaí, bithleachtanna, breoslaí bithmhaise, breoslaí in-athnuaite de thionscnamh neamh-bhitheolaíoch agus breoslaí carbóin athchúrsáilte chun a áirithiú nach féidir iad a áireamh mar chuid de na spriocanna a leagtar amach sa Treoir sin ach amháin más rud é gur táirgeadh go hinbhuanaithe iad agus go sábháiltear leo líon mór astaíochtaí gás ceaptha teasa i gcomparáid le breoslaí iontaise. Le hAirteagal 29 de Threoir (AE) 2018/2001, leagtar síos critéir maidir le hinbhuanaitheacht agus laghdú ar astaíochtaí gás ceaptha teasa do bhithbhreoslaí, do bhithleachtanna agus do bhreoslaí bithmhaise.

(2)

Tá ról tábhachtach ag na scéimeanna deonacha maidir le fianaise a sholáthar ar chomhlíonadh na gcritéar inbhuanaitheachta agus na gcritéar maidir le hinbhuanaitheacht agus maidir le laghdú ar astaíochtaí gás ceaptha teasa do bhithbhreoslaí, do bhithleachtanna agus do bhreoslaí bithmhaise. Faoi Threoir (AE) 2018/2001, is féidir scéimeanna deonacha a úsáid chun a dheimhniú go gcomhlíonann na breoslaí ar fad a tháirgtear ó bhithmhais na critéir maidir le hinbhuanaitheacht a leagtar síos sa Treoir sin agus chun sonraí cruinne a sholáthar faoin laghdú ar astaíochtaí gás ceaptha teasa ó na breoslaí sin.

(3)

An 29 Meitheamh 2021 chuir an scéim dheonach ‘Programme for the Endorsement of Forest Certification – PEFC’ iarraidh faoi bhráid an Choimisiúin chun aitheantas a fháil de bhun Airteagal 30(4) de Threoir (AE) 2018/2001. Rinne an Coimisiún measúnú ar an scéim agus shainaithin roinnt saincheisteanna a raibh leasuithe ag teastáil ina leith.

(4)

Chuir an scéim dheonach ‘PEFC’ a hiarraidh isteach arís an 4 Deireadh Fómhair 2024, inar tugadh aghaidh ar na saincheisteanna a shainaithin an Coimisiún. San anailís a rinne an Coimisiún ar an iarraidh a cuireadh isteach arís, cinneadh go gcumhdaítear go leormhaith leis an scéim dheonach ‘PEFC’ na critéir maidir le hinbhuanaitheacht chun breoslaí bithmhaise a tháirgeadh ó bhithmhais foraoise. Cinneadh go gcumhdaítear leis an scéim go leormhaith na critéir maidir le laghdú ar astaíochtaí gas ceaptha teasa ó bhreoslaí bithmhaise freisin.

(5)

Cumhdaíonn an scéim dheonach ‘PEFC’ breoslaí bithmhaise a tháirgtear: (i) ó bhithmhais foraoise agus (ii) ó bhithmhais ó dhramhaíl agus iarmhair ó thionscail a bhaineann leis an bhforaoiseacht. Tá clúdach geografach domhanda aici agus cuimsítear léi an slabhra soláthair foraoise ar fad.

(6)

Agus measúnú á dhéanamh ag an gCoimisiún ar an scéim dheonach ‘PEFC’, chinn sé go gcumhdaítear léi go leormhaith na critéir maidir le hinbhuanaitheacht a leagtar síos in Airteagal 29(6) agus (7) de Threoir (AE) 2018/2001. Chinn an Coimisiún freisin go soláthraíonn an scéim sonraí cruinne faoi laghdú ar astaíochtaí gás ceaptha teasa chun críocha Airteagal 29(10) den Treoir sin agus go gcuirtear modheolaíocht maidir le cothromaíocht mhaise i bhfeidhm léi i gcomhréir le ceanglais Airteagal 30(1) agus (2) den Treoir sin.

(7)

Chinn an Coimisiún go gcomhlíonann an scéim dheonach ‘PEFC’ go leormhaith na rialacha a áirítear i Rialachán Cur Chun Feidhme (AE) 2022/996 ón gCoimisiún (2).

(8)

Cinneadh go gcomhlíonann an scéim na rialacha a áirítear i Rialachán Cur Chun Feidhme (AE) 2022/2448 ón gCoimisiún (3).

(9)

Sa mheasúnú ar an scéim dheonach ‘PEFC’, chinn an Coimisiún go gcomhlíonann sí caighdeáin leordhóthanacha iontaofachta, trédhearcachta agus iniúchóireachta neamhspleáiche agus na ceanglais mhodheolaíocha a leagtar amach in Iarscríbhinn VI a ghabhann le Treoir (AE) 2018/2001.

(10)

Ba cheart an fhaisnéis gur tugadh aitheantas don scéim dheonach ‘PEFC’ a chur ar fáil sa roinn ar shuíomh gréasáin EUROPA an Choimisiúin atá dírithe ar scéimeanna deonacha.

(11)

Chun go bhféadfar na bearta dá bhforáiltear sa Chinneadh seo a chur i bhfeidhm go pras, ba cheart an Cinneadh seo a theacht i bhfeidhm an lá tar éis lá a fhoilsithe in Iris Oifigiúil an Aontais Eorpaigh.

(12)

Na bearta dá bhforáiltear sa Chinneadh seo, tá siad i gcomhréir leis an tuairim ón gCoiste um Inbhuanaitheacht Bithbhreoslaí, Bithleachtanna agus Breoslaí Bithmhaise,

TAR ÉIS AN CINNEADH SEO A GHLACADH:

Airteagal 1

An scéim dheonach ‘Programme for the Endorsement of Forest Certification – PEFC’, a cuireadh faoi bhráid an Choimisiúin an 4 Deireadh Fómhair 2024 chun aitheantas a fháil ina leith, léiríonn sí comhlíontacht na gcoinsíneachtaí de bhithbhreoslaí leis na critéir maidir le hinbhuanaitheacht a leagtar síos in Airteagal 29(6) agus (7) de Threoir (AE) 2018/2001.

Soláthraítear leis an scéim dheonach ‘PEFC’ freisin sonraí cruinne faoi laghdú ar astaíochtaí gás ceaptha teasa chun críoch Airteagal 29(10) de Threoir (AE) 2018/2001 sa mhéid go n-áirithítear léi go n-aistrítear an fhaisnéis ábhartha ar fad ó oibreoirí eacnamaíocha atá ar an leibhéal réamhtheachtach den líne chúraim chuig na hoibreoirí eacnamaíocha atá ar an leibhéal iartheachtach den líne chúraim.

Airteagal 2

I gcás ina ndéanfar athrú ar ábhar na scéime deonaí ‘PEFC’, mar a cuireadh faoi bhráid an Choimisiúin í an 4 Deireadh Fómhair 2024, arb athrú é a d’fhéadfadh difear a dhéanamh d’fhoras an Chinnidh seo, cuirfidh an scéim dheonach ‘PEFC’ an Coimisiún ar an eolas faoi na hathruithe sin gan mhoill.

Déanfaidh an Coimisiún measúnú ar na hathruithe faoina dtugtar fógra d’fhonn a shuí cé acu a chumhdaítear nó nach gcumhdaítear go leormhaith fós leis an scéim deonach‘PEFC’ na critéir maidir le hinbhuanaitheacht ar tugadh aitheantas di ina leith.

Airteagal 3

Tiocfaidh an Cinneadh seo i bhfeidhm an lá tar éis lá a fhoilsithe in Iris Oifigiúil an Aontais Eorpaigh.

Beidh feidhm aige go dtí an 21 Nollaig 2029.

Arna dhéanamh sa Bhruiséil, an 19 Nollaig 2024.

Thar ceann an Choimisiúin

An tUachtarán

Ursula VON DER LEYEN


(1)   IO L 328, 21.12.2018, lch. 82, ELI: http://data.europa.eu/eli/dir/2018/2001/oj.

(2)  Rialachán Cur Chun Feidhme (AE) 2022/996 ón gCoimisiún an 14 Meitheamh 2022 i ndáil le rialacha chun critéir maidir le hinbhuanaitheacht agus laghdú ar astaíochtaí gás ceaptha teasa agus critéir maidir le riosca íseal i ndáil le hathrú indíreach ar thalamhúsáid a fhíorú (IO L 168, 27.6.2022, lch. 1, ELI: http://data.europa.eu/eli/reg_impl/2022/996/oj).

(3)  Rialachán Cur Chun Feidhme (AE) 2022/2448 ón gCoimisiún an 13 Nollaig 2022 maidir le treoir oibríochtúil a bhunú i dtaca leis an bhfianaise lena léireofar gur comhlíonadh na critéir inbhuanaitheachta um bithmhais foraoise a leagtar síos in Airteagal 29 de Threoir (AE) 2018/2001 ó Pharlaimint na hEorpa agus ón gComhairle (IO L 320, 14.12.2022, lch. 4, ELI: http://data.europa.eu/eli/reg_impl/2022/2448/oj).


ELI: http://data.europa.eu/eli/dec_impl/2024/3181/oj

ISSN 1977-0839 (electronic edition)