(1)

Tháinig an Comhaontú Eora–Mheánmhara lena mbunaítear comhlachas idir na Comhphobail Eorpacha agus a mBallstáit, de pháirt, agus Ríocht Mharacó, den pháirt eile (1) (‘an Comhaontú Comhlachais’) i bhfeidhm an 1 Márta 2000.

(2)

Ina breithiúnas i gCás C-104/16 P an 21 Nollaig 2016 (2), shoiléirigh Cúirt Bhreithiúnais an Aontais Eorpaigh (‘an Chúirt Bhreithiúnais’) go gcumhdaítear leis an gComhaontú Comhlachais críoch Ríocht Mharacó amháin, agus ní críoch an tSahára Thiar, ar críoch neamh-fhéinrialaitheach é atá éagsúil le Ríocht Mharacó.

(3)

Chun bunús dlí a bhunú chun na fabhair tharaife a leagtar síos sa Chomhaontú Comhlachais a dheonú d’earraí de thionscnamh an tSahára Thiar, thug an tAontas Eorpach agus Ríocht Mharacó Comhaontú i bhfoirm Malartú Litreacha maidir le leasuithe ar Phrótacail 1 agus 4 a ghabhann leis an gComhaontú Comhlachais (3) (‘an Comhaontú i bhfoirm malartú litreacha’) i gcrích, a síníodh an 25 Deireadh Fómhair 2018.

(4)

Ina breithiúnas an 4 Deireadh Fómhair 2024 i gCásanna Uamtha C-779/21 P agus C-799/21 P (4), rialaigh an Chúirt Bhreithiúnais nach mór toiliú phobal an tSahára Thiar le haon chomhaontú le Maracó maidir leis an Sahára Thiar a bheith faighte. Thairis sin, chinn an Chúirt gur féidir glacadh leis go bhfuil an toiliú sin ann ar choinníoll nach n-eascraíonn aon oibleagáid ar phobal an tSahára Thiar as an gcomhaontú atá i gceist agus go bhfaigheann an pobal sin tairbhe shonrach, inláimhsithe, shubstaintiúil agus infhíoraithe ó shaothrú acmhainní nádúrtha chríoch an tSahára Thiar, tairbhe a bheidh comhréireach le méid an tsaothraithe sin. Ní mór ráthaíochtaí a bheith ag gabháil leis an tairbhe go ndéanfar an saothrú sin faoi choinníollacha atá comhsheasmhach le prionsabal na forbartha inbhuanaithe.

(5)

Mar thoradh ar an mbreithiúnas ón gCúirt Bhreithiúnais i gCás C-779/21 P, tiocfaidh deireadh an 4 Deireadh Fómhair 2025 le Cinneadh (AE) 2019/217 ón gComhairle (5).

(6)

Tá sé tábhachtach a áirithiú nach gcuirfear isteach ar na sreafaí trádála atá tagtha chun cinn thar na blianta, agus go mbeidh feidhm ag na fabhair tharaife faoin gComhaontú Comhlachais maidir le hearraí de thionscnamh an tSahára Thiar, agus lánurraim á tabhairt san am céanna do na coinníollacha a leagtar amach sa bhreithiúnas ón gCúirt Bhreithiúnais i gCásanna Uamtha C-779/21 P agus C-799/21 P.

(7)

Tacaíonn an tAontas le hiarrachtaí na Náisiún Aontaithe teacht ar réiteach polaitiúil a bheadh inghlactha go frithpháirteach lena ndéanfaí foráil maidir le féinchinntiúchán mhuintir an tSahára Thiar i gcomhréir le prionsabail agus cuspóirí Chairt na Náisiún Aontaithe.

(8)

Ba cheart tús a chur leis an gcaibidlíocht d’fhonn Comhaontú i bhfoirm malartú litreacha maidir le leasú ar an gComhaontú i bhfoirm Malartú Litreacha a thabhairt i gcrích de réir na gcoinníollacha arna mbunú ag an gCúirt Bhreithiúnais ina breithiúnas i gCásanna Uamtha C-779/21 P agus C-799/21 P,