BREITHIÚNAS NA CÚIRTE (an tOchtú Dlísheomra)
9 Deireadh Fómhair 2025 ( *1 )
(Tarchur chun réamhrialú – Comhar breithiúnach in ábhair shibhialta – Rialachán (AE) Uimh.o1215/2012 – An dara fleasc d’Airteagal 7(1)(b) – Dlínse speisialta in ábhair chonarthacha – An chúirt a bhfuil dlínse aici a chinneadh – Conradh aeriompair arna thabhairt i gcrích idir tomhaltóir agus trádálaí – Éileamh an phaisinéara ar chúiteamh a eascraíonn as eitilt ar cuireadh moill uirthi – Sannadh an éilimh seo do chuideachta bailithe fiachais – Caingean le haghaidh cúitimh arna tionscnamh ag sannaí i gcoinne an aeriompróra os comhair chúirteanna áit imeachta an aerárthaigh – Áit ina gcomhlíontar an oibleagáid i dtrácht – Áit i mBallstát ina ndearnadh, faoin gconradh iompair, na seirbhísí a sholáthar nó inar cheart iad a bheith soláthraithe)
I gCás C‑551/24,
IARRAIDH ar réamhrialú de bhun Airteagal 267 CFAE, ó Sąd Okręgowy w Krakowie (an Chúirt Réigiúnach, Kraków, an Pholainn), trí bhreith an 1 Lúnasa 2024, a fuarthas ag an gCúirt an 14 Lúnasa 2024, sna himeachtaí idir
Deutsche Lufthansa AG
v
AirHelp Germany GmbH,
tugann AN CHÚIRT (an tOchtú Dlísheomra),
agus í comhdhéanta mar a leanas: O. Spineanu-Matei (Rapóirtéir), Uachtarán Dlísheomra, S. Rodin agus N. Piçarra, Breithiúna,
Abhcóide Ginearálta: N. Emiliou,
Cláraitheoir: A. Calot Escobar,
ag féachaint don nós imeachta i scríbhinn,
tar éis breithniú a dhéanamh ar na barúlacha arna dtíolacadh thar ceann na bpáirtithe seo a leanas:
|
– |
Deutsche Lufthansa AG, ag M. Korcz, radca prawny, |
|
– |
AirHelp Germany GmbH, ag P. P. Gad agus K. Żbikowska, adwokaci, |
|
– |
Rialtas na Polainne, ag B. Majczyna, i gcáil Gníomhaire, |
|
– |
an Coimisiún Eorpach, ag J. Hottiaux agus S. Noë, i gcáil Gníomhairí, |
tar éis cinneadh a dhéanamh, i ndiaidh an tAbhcóide Ginearálta a éisteacht, breith a thabhairt ar an gcás gan Tuairim,
an Breithiúnas seo a leanas
Breithiúnas
|
1 |
Baineann an iarraidh ar réamhrialú le léiriú ar an dara fleasc d’Airteagal 7(1)(b) agus Airteagal 7(5) de Rialachán (AE) Uimh. 1215/2012 ó Pharlaimint na hEorpa agus ón gComhairle an 12 Nollaig 2012 maidir le dlínse agus le haithint agus forghníomhú breithiúnas in ábhair shibhialta agus thráchtála (IO 2012 L 351, lch. 1). |
|
2 |
Rinneadh an iarraidh seo in imeachtaí idir Deutsche Lufthansa AG (‘Lufthansa’) agus AirHelp Germany GmbH (‘AirHelp’), cuideachtaí a bhfuil a gceanncheathrúna sa Ghearmáin, maidir le hiarraidh ar shuim a aisíoc arna thabhairt ag an dara cuideachta, arb í sannaí éileamh paisinéara ar chúiteamh, tar éis moill ar eitilt, i gcoinne na chéad chuideachta os comhair cúirt Pholannach. |
An dlí
|
3 |
Leagtar amach an méid seo a leanas le haithrisí 15 agus 16 de Rialachán Uimh. 1215/2012:
|
|
4 |
Áirítear le Caibidil II den Rialachán sin, dar teideal ‘Dlínse’inter alia, Roinn I, dar teideal ‘Forálacha ginearálta’ agus Roinn II, dar teideal ‘Dlínse Speisialta’. Foráiltear mar a leanas le hAirteagal 4(1) den Rialachán sin, a leagtar amach faoi Roinn I: ‘Faoi réir an Rialacháin seo, déanfar an dlí a agairt ar dhaoine a bhfuil sainchónaí orthu i mBallstát, is cuma cén náisiúntacht atá acu, i gcúirteanna an Bhallstáit sin.’ |
|
5 |
Foráiltear mar a leanas le hAirteagal 5(1) den Rialachán céanna, a leagtar amach freisin faoi Roinn I: ‘Daoine a bhfuil sainchónaí orthu i mBallstát, ní fhéadfar an dlí a agairt orthu i gcúirteanna de chuid Ballstáit eile ach amháin de bhua na rialacha a leagtar amach i Roinn 2 go Roinn 7 den Chaibidil seo.’ |
|
6 |
Foráiltear mar a leanas le hAirteagal 7 de Rialachán Uimh. 1215/2012, a leagtar amach faoi Roinn 2 de Chaibidil II den Rialachán sin: ‘Duine a bhfuil sainchónaí air i mBallstát amháin, féadfar an dlí a agairt air i mBallstát eile:
[...]
[...]’ |
An díospóid sna príomhimeachtaí agus na ceisteanna a tharchuirtear
|
7 |
Leanann sé ón gcomhad atá faoi bhráid na Cúirte Breithiúnais go ndearna AirHelp caingean a thionscnamh an 4 Aibreán 2023 os comhair an Sąd Rejonowy dla Krakowa – Krowodrzy w Krakowie (an Chúirt Dúiche, Kraków – Krowodrza, an Pholainn) i gcoinne Lufthansa d’fhonn ordú a fháil go n‑íocfadh sé suim EUR 250, móide ús reachtúil, atá comhfhreagrach leis an gcúiteamh a bhí dlite do phaisinéir mar gheall ar mhoill ar eitilt arna hoibriú ag an aerlíne sin ó Kraków. |
|
8 |
Thug Lufthansa freasúra i gcoinne an ordaithe íocaíochta arna eisiúint ag an gcúirt sin agus d’ardaigh sé pléadáil maidir le dlínse idirnáisiúnta na cúirte sin. |
|
9 |
Le hordú an 5 Nollaig 2023, dhiúltaigh an chúirt sin don phléadáil maidir le heaspa dlínse agus dhiúltaigh sí don fhreasúra chomh maith. |
|
10 |
Thug Lufthansa achomharc i gcoinne an ordaithe sin os comhair an Sąd Okręgowy w Krakowie (an Chúirt Réigiúnach, Kraków, an Pholainn), arb í an chúirt a rinne an tarchur. Mar thaca lena hachomharc, maíonn Lufthansa nach féidir leis an Sąd Rejonowy dla Krakowa – Krowodrzy w Krakowie (an Chúirt Dúiche, Kraków – Krowodrza) a dlínse idirnáisiúnta chun caingean le haghaidh cúitimh a bhunú ar an dara fleasc de mhír 1(b) ná ar Airteagal 7(5) de Rialachán Uimh. 1215/2012, ós rud é nach raibh na páirtithe sna príomhimeachtaí faoi cheangal ag conradh iompair. Tá éileamh Airhelp bunaithe ar chonradh maidir le héileamh a shannadh arna thabhairt i gcrích le paisinéir, nach bhfuil nasctha le Lufthansa ach amháin trí chonradh iompair. |
|
11 |
Dar le Lufthansa, is iad na cúirteanna Gearmánacha amháin atá inniúil chun caingean den chineál sin a éisteacht, i gcomhréir leis an riail maidir le dlínse ghinearálta dá bhforáiltear le hAirteagal 4(1) den Rialachán sin. |
|
12 |
Sonraíonn an chúirt a rinne an tarchur go gceanglaítear uirthi scrúdú a dhéanamh í féin, tráth ar bith le linn na n‑imeachtaí, ar an gceist faoina dlínse idirnáisiúnta. |
|
13 |
Chuige sin, iarrann an chúirt sin maidir le hinfheidhmeacht an dara fleasc d’Airteagal 7(1)(b) agus Airteagal 7(5) de Rialachán Uimh. 1215/2012 chun an chúirt, a bhfuil dlínse aici chun díospóid a éisteacht a bhaineann le haisghabháil fiacha a eascraíonn as conradh aeriompair agus a aistrítear chuig cuideachta bailithe fiachais, tar éis sannadh arna dhéanamh ag tomhaltóir is páirtí sa chonradh aeriompair sin, a chinneadh. |
|
14 |
Léiríonn an chúirt sin go léirítear dhá bhealach chun léiriú a dhéanamh ar na forálacha sin le cleachtas chúirteanna na Polainne. Meastar i gcuid den chásdlí, gan beann ar chineál an chonartha maidir le héileamh a shannadh i ndlí na Polainne, go gceadaítear leis na forálacha sin bunús a thabhairt do dhlínse chúirteanna na Polainne chun cás den chineál sin a éisteacht. Bheadh cuid eile den chásdlí bunaithe ar shaintréithe an chonartha sin i ndlí na Polainne chun a mheas go ndéantar dlínse na gcúirteanna sin a eisiamh leis na forálacha céanna. |
|
15 |
Cuireann an chúirt a rinne an tarchur in iúl go leagtar béim ar an dlúthnasc atá ann idir an conradh agus an chúirt ar tugadh na himeachtaí os a comhair, sa chásdlí atá i bhfabhar dhlínse chúirteanna na Polainne. Dá bhrí sin, níl dlínse na gcúirteanna sin bunaithe ar bhreithnithe suibiachtúla a bhaineann le stádas na bpáirtithe sna himeachtaí, ach ar ábhar na n‑imeachtaí sin, is é sin le rá, iarraidh chun fiach a aisghabháil a eascraíonn as conradh chun seirbhísí a sholáthar nó a bhaineann le gníomhaíocht brainse, gníomhaireachta nó bunaíochta eile. |
|
16 |
Sonraíonn an chúirt sin chomh maith gur léir ó chásdlí na Cúirte Breithiúnais, chun éileamh a eascraíonn as comhlíonadh conartha aeriompair a ghnóthú, go bhféadfaidh iarratasóir caingean a thabhairt os comhair na cúirte ina bhfuil sainchónaí ar an gcosantóir, i gcomhréir le hAirteagal 4(1) de Rialachán Uimh. 1215/2012, nó os comhair na cúirte don áit ar soláthraíodh nó ar cheart go soláthrófaí na seirbhísí, eadhon an chúirt a bhfuil dlínse aici maidir le háit imeachta nó teachta na heitilte lena mbaineann, i gcomhréir leis an dara fleasc d’Airteagal 7(1)(b) den Rialachán sin. Ar choinníoll go gcomhlíontar na coinníollacha maidir le cur i bhfeidhm na rialacha maidir le dlínse speisialta a leagtar síos i Roinn 2 de Chaibidil II den Rialachán sin, lena n‑áirítear an dara fleasc d’Airteagal 7(1)(b) agus Airteagal 7(5) den Rialachán sin, beidh feidhm ag na forálacha sin fiú i gcás díospóid idir na trádálaithe. |
|
17 |
Mar sin féin, measann an chúirt sin gur gá an coinníoll sin a léiriú agus tugann sí dá haire, i ndáil leis sin, faoi Airteagal 7(1) de Rialachán Uimh. 1215/2012, gurb í an chúirt a bhfuil dlínse aici díospóid a bhaineann le conradh a éisteacht an chúirt ina gcomhlíontar an oibleagáid ar a bhfuil an t‑éileamh bunaithe. I gcás ina sanntar fiach, is í an cheist a thagann chun cinn an mbaineann an díospóid le fiach a aisghabháil a eascraíonn as an gconradh maidir le sannadh nó as an gconradh chun seirbhísí a sholáthar, sa chás seo, conradh aeriompair. |
|
18 |
Sonraíonn an chúirt a rinne an tarchur, faoin dlí náisiúnta, go bhféadfaidh creidiúnaí, gan toiliú an fhéichiúnaí, a éileamh a shannadh do thríú páirtí, mura bhfuil sé contrártha leis an dlí, leis an gconradh nó le cineál na hoibleagáide. Is é cuspóir an tsannta sin ceart aonair an chreidiúnaí a cheangal ar an bhféichiúnaí a oibleagáid a chomhlíonadh, nach n‑áirítear cearta nós imeachta an chreidiúnaí leis, go háirithe an ceart chun agóidí a dhéanamh maidir le heaspa dlínse, teorann, fritháirimh, mura bhforáiltear amhlaidh sa chonradh maidir le sannadh. |
|
19 |
Sonraíonn an chúirt sin go leanann sé ón gconradh maidir le héileamh a shannadh atá i gceist sna príomhimeachtaí nach bhfuair AirHelp locus standi ach amháin chun oibleagáid an tsannóra cúiteamh a íoc a chomhlíonadh. Dá thoradh sin, ní féidir a mheas, de bhun an chonartha sin, go bhfuair AirHelp na cearta uile a eascraíonn as an gconradh aeriompair, lena n‑áirítear na cearta nós imeachta atá ag an sannóir sin mar thomhaltóir. |
|
20 |
D’fhéadfaí a mhaíomh, mar sin, nach féidir le díoltóir nó soláthróir a fhaigheann éileamh a eascraíonn as conradh aeriompair, mar bhonn lena chaingean le haghaidh cúitimh arna tionscnamh i gcoinne an aeriompróra, brath go bailí ar an aon chonradh iompair lena gceanglaítear an sannóir leis an iompróir sin, ós rud é, gurb é bunús na caingne sin an conradh maidir le héileamh a shannadh óna bhfaigheann an trádálaí a sheasamh chun imeachtaí a thionscnamh.. A mhéid nach páirtí sa chonradh aeriompair an sannaí, gur idir an sannóir agus an sannaí a bheadh an gaol conarthach agus ní bheadh sé idir an sannaí agus an t‑aeriompróir a gceanglaítear air an t‑éileamh a eascraíonn as an gconradh iompair a íoc.. |
|
21 |
Sa chás seo, ní féidir le AirHelp leas a bhaint as an gcásdlí a bhaineann le dlínse maidir leis an gconradh aeriompair, trí bhrath ar an dara fleasc d’Airteagal 7(1)(b) de Rialachán Uimh. 1215/2012, mar a léiríodh i mbreithiúnas an 9 Iúil 2009, Rehder (C‑204/08, EU:C:2009:439), os rud é nach bhfuil na páirtithe sna príomhimeachtaí faoi cheangal ag conradh iompair. |
|
22 |
Mar sin féin, cuireann an chúirt a rinne an tarchur in iúl gur léir ó chásdlí na Cúirte Breithiúnais, go háirithe breithiúnais an 20 Bealtaine 2021, CNP, (C‑913/19, EU:C:2021:399), agus an 21 Deireadh Fómhair 2021, T.B. agus D (Dlínse in ábhair a bhaineann le hárachas) (C‑393/20, EU:C:2021:871), go bhféadfadh eintiteas a fuair éileamh, agus é ag gníomhú mar thrádálaí, ó pháirtí níos laige, brath ar Airteagal 7 de Rialachán Uimh. 1215/2012. I bhfianaise an chásdlí sin, d’fhéadfaí, mar sin, glacadh leis go bhfuil dlínse ag cúirteanna na Polainne caingean a éisteacht chun éileamh tomhaltóra a aisghabháil a eascraíonn as conradh aeriompair arna fháil ag trádálaí. |
|
23 |
Sna himthosca sin, chinn Sąd Okręgowy w Krakowie (an Chúirt Réigiúnach, Kraków) bac a chur ar na himeachtaí agus an cheist seo a leanas a tharchur chuig an gCúirt Bhreithiúnais le haghaidh réamhrialú: ‘An bhfuil cásanna maidir le forfheidhmiú éilimh arna fháil faoi [chonradh maidir le héileamh a shannadh] arna thabhairt i gcrích le tomhaltóir ag trádálaí a bhfuil a oifig chláraithe aige lasmuigh de Phoblacht na Polainne, lena sanntar an t‑éileamh atá dlite don tomhaltóir do thrádálaí eile a bhfuil a oifig chláraithe aige i mBallstát eile, de réir dhlínse náisiúnta na Polainne i gcomhréir leis an dara fleasc d’Airteagal 7[(1)](b) agus Airteagal 7(5) de Rialachán (AE) Uimh. 1215/2012 maidir le dlínse agus le haithint agus forghníomhú breithiúnas in ábhair shibhialta agus tráchtála?’ |
An cheist a tharchuirtear
Inghlacthacht na ceiste a bhaineann le léiriú Airteagal 7(5) de Rialachán Uimh. 1215/2012
|
24 |
D’ardaigh Lufthansa pléadáil maidir le do-ghlacthacht na ceiste a cuireadh a mhéid a bhaineann le léiriú ar Airteagal 7(5) de Rialachán Uimh. 1215/2012, i bhfianaise chineál hipitéiseach na ceiste sin, a mhéid nár líomhnaíodh, i gcomhthéacs na díospóide sna príomhimeachtaí, go raibh baint ar bith ag a bhunú sa Pholainn le tabhairt i gcrích an chonartha iompair as ar eascair an fiachas a d’éiligh AirHelp. |
|
25 |
I ndáil leis sin, leanann sé ó chásdlí socair go gceanglaítear leis an ngá atá le léiriú ar dhlí an Aontais a bheidh úsáideach don chúirt a rinne an tarchur go saineofaí comhthéacs fíorasach agus reachtach na gceisteanna atá á gcur aici nó, ar a laghad, míniú a thabhairt ar na himthosca fíorasacha ar a bhfuil na ceisteanna sin bunaithe. Ina theannta sin, ní mór don chúirt sin na cúiseanna beachta a lua a thug uirthi fiosrú a dhéanamh maidir le léiriú dhlí an Aontais agus a mheas gur gá tarchur a dhéanamh chuig an gCúirt Bhreithiúnais le haghaidh réamhrialú (féach breithiúnais an 26 Eanáir 1993, Telemarsicabruzzo agus páirtithe eile, C‑320/90 go C‑322/90, EU:C:1993:26, mír 6; an 8 Meán Fómhair 2009, Liga Portuguesa de Futebol Profissional agus Bwin International, C‑42/07, EU:C:2009:519, mír 40, agus an 29 Iúil 2024, LivaNova, C‑713/22, EU:C:2024:642, mír 54). |
|
26 |
Mar a luaitear in Airteagal 94(a) agus (c) de Rialacha Nós Imeachta na Cúirte Breithiúnais, ní mór a bheith in iarraidh ar réamhrialú, inter alia, achoimre ar na fíorais ábhartha nó, ar a laghad, ráiteas ar na fíorais ar a bhfuil na ceisteanna bunaithe, chomh maith le ráiteas ar na cúiseanna a thug ar an gcúirt a rinne an tarchur fiosrú a dhéanamh maidir le léiriú nó bailíocht forálacha áirithe de dhlí an Aontais agus an nasc a bhunaítear léi idir na forálacha sin agus an reachtaíocht náisiúnta is infheidhme maidir leis an díospóid sna príomhimeachtaí. |
|
27 |
Sa chás seo, ní mór a mheabhrú go mbunaítear, le hAirteagal 7(5) de Rialachán Uimh. 1215/2012, a mhéid a bhaineann leis na hargóintí maidir le brainse, gníomhaireacht nó bunaíocht eile a fhoirceannadh, riail dlínse speisialta i bhfabhar na gcúirteanna san áit ina bhfuil siad. |
|
28 |
Ní mór a thabhairt faoi deara, in ainneoin go dtagraíonn an chúirt a rinne an tarchur d’Airteagal 7(5), i bhforas na hiarrata ar réamhrialú agus sa cheist a tarchuireadh chuig an gCúirt araon, nach luann an chúirt sin aon sonraí fíorasacha a bhaineann le feidhmiú bhrainse, ghníomhaireacht nó bhunaíocht eile Lufthansa sa Pholainn, ná le gealltanais a rinne siad thar ceann Lufthansa, amhail rannpháirtíocht fhéideartha na n‑eintiteas sin i dtabhairt i gcrích an chonartha aeriompair lena mbaineann an cás sna príomhimeachtaí. Cé go ndéanann an chúirt sin mionléiriú ar an gceist an é an conradh as a n‑eascraíonn an oibleagáid atá mar bhonn leis an éileamh, de réir bhrí Airteagal 7(1) den Rialachán sin, an conradh maidir le héileamh a shannadh nó an conradh iompair, ní luann sí na cúiseanna a thug uirthi machnamh a dhéanamh freisin ar léiriú Airteagal 7(5) den Rialachán sin. |
|
29 |
Ní dhéanann an chúirt a rinne an tarchur ach a shoiléiriú go gceanglaítear uirthi a dlínse idirnáisiúnta chun an chaingean a thugtar os a comhair a éisteacht a fhíorú í féin. Cé nach féidir a chur as an áireamh go bhféadfaí scrúdú ar an gceann dlínse dá bhforáiltear le hAirteagal 7(5) de Rialachán Uimh. 1215/2012 a bheith mar thoradh ar fhíorú den sórt sin, is amhlaidh fós gur cheart faisnéis leordhóthanach a bheith ag an gCúirt chun a áirithiú go mbaineann an léiriú atá á lorg ar dhlí an Aontais le fíricí iarbhír nó le cuspóir na príomhghníomhaíochta. |
|
30 |
Mar sin, sa chás seo, níl aon fhaisnéis den sórt sin ann. Dá thoradh sin, a mhéid a bhaineann an cheist a tharchuirtear le léiriú Airteagal 7(5) de Rialachán Uimh. 1215/2012, tá sí inghlactha. |
Substaint an cháis
|
31 |
Lena ceist, iarrann an chúirt a rinne an tarchur, go bunúsach, an bhfuil an dara fleasc d’Airteagal 7(1)(b) de Rialachán Uimh. 1215/2012 le léiriú sa chaoi go bhfuil dlínse ag Ballstát, i gcomhréir leis an bhforáil sin, cás maidir le caingean le haghaidh cúitimh arna tabhairt ag cuideachta ar sannadh éileamh paisinéara uirthi i gcoinne aeriompróir atá bunaithe ar chríoch Ballstáit eile a éisteacht, a eascraíonn as comhlíonadh conartha iompair arna thabhairt i gcrích leis an iompróir sin. |
|
32 |
Mar réamhbharúil, ní mór a mheabhrú, ar thaobh amháin, go bhféachtar le Rialachán Uimh. 1215/2012 na rialacha maidir le coinbhleacht dlínse in ábhair shibhialta agus thráchtála a aontú trí bhíthin rialacha dlínse atá an‑intuartha. Leis an rialachán sin, saothraítear, ar an gcaoi sin, cuspóir deimhneachta dlíthiúla arb é atá ann cosaint dhlíthiúil daoine atá bunaithe san Aontas Eorpach a neartú, trína chur ar chumas an iarratasóra an chúirt a bhféadfaidh sé caingean a thabhairt os a comhair a shainaithint go héasca agus trína chur ar chumas an chosantóra foráil a dhéanamh go réasúnach maidir leis an gcúirt a bhféadfar an dlí a agairt air os a comhair (breithiúnas an 11 Aibreán 2024, Credit Agricole Bank Polska, C‑183/23, EU:C:2024:297, mír 40 agus an cásdlí dá dtagraítear). |
|
33 |
Ar an taobh eile, tá an córas dlínse coiteann dá bhforáiltear i gCaibidil II de Rialachán Uimh. 1215/2012 bunaithe ar an riail ghinearálta, a leagtar amach in Airteagal 4(1) de, go bhféadfar an dlí a agairt ar dhaoine a bhfuil sainchónaí orthu i mBallstát i gcúirteanna an Bhallstáit sin, ar neamhchead do náisiúntacht na bpáirtithe. Is de mhaolú ar an riail ghinearálta sin amháin maidir le dlínse chúirteanna shainchónaí an chosantóra go bhforáiltear le Roinn 2 de Chaibidil II den Rialachán sin roinnt rialacha speisialta dlínse, lena n‑áirítear iad siúd a leagtar amach sa dara fleasc d’Airteagal 7(1)(b) den Rialachán sin (breithiúnas an 14 Meán Fómhair 2023, EXTÉRIA, C‑393/22, EU:C:2023:675, mír 27 agus an cásdlí dá dtagraítear). |
|
34 |
Faoi riail na dlínse speisialta a leagtar síos san fhoráil dheireanach sin, is ionann an chúirt a bhfuil dlínse aici éileamh a éisteacht bunaithe ar chonradh chun seirbhísí a sholáthair agus an chúirt don áit i mBallstát inar soláthraíodh, nó inar cheart, faoin gconradh, na seirbhísí a sholáthar. |
|
35 |
Leanann sé freisin ón gcásdlí go léirítear le riail na dlínse speisialta a leagtar síos sa dara fleasc d’Airteagal 7(1)(b) de Rialachán Uimh. 1215/2012 ábhar imní maidir le gaireacht, arb é is cúis leis go bhfuil dlúthnasc idir an conradh lena mbaineann agus an chúirt a n‑iarrtar uirthi rialú air (féach, chuige sin, breithiúnas an 14 Meán Fómhair 2023, EXTÉRIA, C‑393/22, EU:C:2023:675, mír 29 agus an cásdlí dá dtagraítear). |
|
36 |
Is i bhfianaise na mbreithnithe sin nach mór a chinneadh an bhfuil an fíoras gur aistrigh an tomhaltóir sin éileamh a eascraíonn as comhlíonadh conartha aeriompair arna thabhairt i gcrích idir tomhaltóir agus trádálaí chuig cuideachta a bhfuil sainchúram aici éilimh aerphaisinéirí a aisghabháil de chineál a chuirfeadh cosc ar chur i bhfeidhm an dara fleasc d’Airteagal 7(1)(b) de Rialachán Uimh. 1215/2912, chun an chúirt a chinneadh a bhfuil dlínse aici caingean le haghaidh damáistí arna tabhairt ag an gcuideachta ar sannadh éileamh paisinéara uirthi i gcoinne an aeriompróra a éisteacht. |
|
37 |
I ndáil leis sin, mar is léir ó mhír 35 den bhreithiúnas seo, níl sé i gceist le riail na dlínse speisialta a leagtar síos sa dara fleasc d’Airteagal 7(1)(b) an páirtí is laige i gcaidreamh conarthach a chosaint, ós rud é nár bunaíodh an riail sin faoi threoir stádas na bpáirtithe conarthacha, ach go bhfuil sí bunaithe ar dhlúthnasc a bheith ann idir an chúirt ar tugadh na himeachtaí os a comhair agus an conradh lena mbaineann. Sna himthosca sin, níl aon tionchar ag éileamh an tomhaltóra ar chúiteamh a bheith aistrithe chuig trádálaí nó soláthróir ar chur i bhfeidhm na rialach sin. |
|
38 |
Mar a shoiléirigh an Chúirt i ndíospóid a bhaineann le héilimh in ábhair a bhaineann le tort, míghníomh nó samhail mhíghnímh, ní féidir le sannadh éilimh ag an gcreidiúnaí bunaidh, é féin, difear a dhéanamh don chinneadh faoin gcúirt a bhfuil dlínse aici (féach, i ndáil leis sin, breithiúnais an 18 Iúil 2013, ÖFAB, C‑147/12, EU:C:2013:490, mír 58, agus an 21 Bealtaine 2015, CDC Hydrogen Peroxide, C‑352/13, EU:C:2015:335, mír 35). |
|
39 |
Ar an gcaoi chéanna, tá dlúthbhaint fós ag díospóid maidir le haisghabháil fiachais a eascraíonn as comhlíonadh conartha chun seirbhísí a sholáthar le háit chomhlíonta na hoibleagáide ar a bhfuil an t‑éileamh bunaithe, is é sin an áit i mBallstát inar soláthraíodh nó inar cheart, faoin gconradh sin, na seirbhísí a sholáthar, de réir bhrí an dara fleasc d’Airteagal 7(1)(b), cé gur sannadh an t‑éileamh sin do thríú páirtí. |
|
40 |
Ceadaítear leis an léiriú sin deimhneacht dhlíthiúil agus intuarthacht a áirithiú, go háirithe don chosantóir, maidir le dlínse, lena léirítear na cuspóirí arna saothrú le Rialachán Uimh. 1215/2012, mar a leanann ó aithrisí 15 agus 16 den Rialachán sin, a mhéid a bhfuil an chúirt a bhfuil dlínse aici chun caingean den sórt sin a éisteacht i gcónaí mar chúirt na háite inar ghá na seirbhísí a sholáthar, gan beann ar shannadh éilimh a eascraíonn as an gconradh sin a bheith ann. |
|
41 |
Sa chás seo, is léir ón gcomhad atá os comhair na Cúirte Breithiúnais go bhfuair AirHelp éileamh a eascraíonn as comhlíonadh conartha aeriompair, arna thabhairt i gcrích idir tomhaltóir agus Lufthansa, mar thoradh ar mhoill ar eitilt arna hoibriú ag an aerlíne sin ó Kraków go Nice (an Fhrainc) le nasc i München (an Ghearmáin), atá le fíorú ag an gcúirt a rinne an tarchur. |
|
42 |
A mhéid a chomhfhreagraíonn áit imeachta na heitilte sin do cheann de phríomháiteanna soláthair na seirbhísí a chumhdaítear leis an gconradh sin agus, dá bhrí sin, go n‑áirithítear leis an dlúthnasc a cheanglaítear le rialacha dlínse speisialta a leagtar amach in Airteagal 7(1) de Rialachán Uimh. 1215/2012, idir an conradh sin agus an chúirt a bhfuil an áit sin suite ina dlínse, is cosúil go bhfuil dlínse ag cúirteanna na Polainne chun an chaingean sna príomhimeachtaí a éisteacht agus a chinneadh (féach, chuige sin, breithiúnas an 3 Feabhra 2022, LOT Polish Airlines, C‑20/21, EU:C:2022:71, mír 20). |
|
43 |
Níl saintréithe an chonartha maidir le héileamh a shannadh atá i gceist sna príomhimeachtaí ná easpa nasc conarthach idir na páirtithe sa díospóid de chineál a chuirfeadh an dlínse sin faoi cheist. |
|
44 |
Ar thaobh amháin, ós rud é, mar is léir ón ordú tarchuir, faoi théarmaí an chonartha maidir le héileamh a shannadh lena mbaineann, nach dtarchuireann an tomhaltóir, faoi dhlí na Polainne, a chearta nós imeachta chuig an díoltóir nó chuig an trádálaí ar sannadh éileamh air, níl sé ábhartha maidir le cur i bhfeidhm na rialach dlínse a leagtar síos sa dara fleasc d’Airteagal 7(1)(b) de Rialachán Uimh. 1215/2012. Go deimhin, bunaítear an riail sin ar an oibleagáid ar a bhfuil an t‑éileamh bunaithe, is é sin le rá, ábhar na díospóide, arna chinneadh ag ábhar an chonartha lena mbaineann, ós rud é nach dtugtar locus standi ach amháin don sannaí leis an gconradh maidir le héileamh a shannadh. |
|
45 |
Ar an taobh eile, maidir leis an bhfíoras nach bhfuil na páirtithe sna príomhimeachtaí faoi cheangal díreach ag conradh, dá ndéanann an chúirt a rinne an tarchur agus Lufthansa, ina barúlacha i scríbhinn, tagairt, ní mór a thabhairt faoi deara, a mhéid a thugtar leis an gconradh maidir le héileamh a shannadh chun na cearta atá ag an sannóir a aistriú i leith an iompróra agus, dá bhrí sin, an ceart chun imeachtaí a thionscnamh chun an t‑éileamh a eascraíonn as an gconradh aeriompair a aisghabháil, nach bhfuil an imthoisc sin de chineál ach oiread chun cosc a chur ar chur i bhfeidhm na rialach dlínse dá bhforáiltear san fhoráil sin. |
|
46 |
I bhfianaise na mbreithnithe uile roimhe seo, is é an freagra ar an gceist a tharchuirtear nach mór an dara fleasc d’Airteagal 7(1)(b) de Rialachán Uimh. 1215/2012 le léiriú sa chaoi go bhfuil dlínse ag cúirt Bhallstáit, i gcomhréir leis an bhforáil sin, cás maidir le caingean le haghaidh cúitimh arna tabhairt ag cuideachta ar sannadh éileamh paisinéara uirthi i gcoinne aeriompróir atá bunaithe ar chríoch Ballstáit eile a éisteacht, a eascraíonn as comhlíonadh conartha iompair arna thabhairt i gcrích leis an iompróir sin, ar choinníoll gurb ionann an chúirt sin agus an chúirt don áit inar soláthraíodh nó inar cheart na seirbhísí a sholáthar faoin gconradh sin. |
Costais
|
47 |
Os rud é, a mhéid a bhaineann sé leis na páirtithe sna príomhimeachtaí, go bhfuil na himeachtaí mar chéim sa chás os comhair na cúirte a rinne an tarchur, baineann ceist na gcostas leis an gcúirt sin. Níl na costais a tabhaíodh trí bharúlacha a chur faoi bhráid na Cúirte, seachas costais na bpáirtithe sin, inghnóthaithe. |
|
Ar na forais sin, rialaíonn an Chúirt (an tOchtú Dlísheomra) mar seo a leanas: |
|
Maidir leis an dara fleasc d’Airteagal 7(1)(b) de Rialachán (AE) Uimh. 1215/2012 ó Pharlaimint na hEorpa agus ón gComhairle an 12 Nollaig 2012 maidir le dlínse agus le haithint agus forghníomhú breithiúnas in ábhair shibhialta agus thráchtála, |
|
ní mór léiriú a dhéanamh air mar seo a leanas: |
|
tá dlínse ag Ballstáit, i gcomhréir leis an bhforáil sin, cás maidir le caingean le haghaidh cúitimh arna tabhairt ag cuideachta ar sannadh éileamh paisinéara uirthi i gcoinne aeriompróir atá bunaithe ar chríoch Ballstáit eile a éisteacht, a eascraíonn as comhlíonadh conartha iompair arna thabhairt i gcrích leis an iompróir sin, ar choinníoll gurb ionann an chúirt sin agus an chúirt don áit inar soláthraíodh nó inar cheart na seirbhísí a sholáthar faoin gconradh sin. |
|
Sínithe |
( *1 ) Teanga an cháis: an Pholainnis.