(1)

Ir-Regolament (KE) Nru 1831/2003 jistabbilixxi l-awtorizzazzjoni ta’ addittivi għall-użu fl-għalf tal-annimali u r-raġunijiet u l-proċeduri għall-għoti jew għar-rifjut ta’ din l-awtorizzazzjoni. L-Artikolu 10 tar-Regolament jistipula l-valutazzjoni mill-ġdid tal-addittivi awtorizzati skont id-Direttiva tal-Kunsill 70/524/KEE (2).

(2)

Is-sustanza 3-aċetil-2,5-dimetiltijofen kienet awtorizzata mingħajr limitu ta’ żmien skont id-Direttiva 70/524/KEE bħala addittiv fl-għalf għall-użu fl-ispeċi tal-annimali kollha bħala parti mill-grupp ‘sustanzi aromatizzanti u palatabbli — Il-prodotti kollha naturali u sintetiċi korrispondenti’. Dik is-sustanza ddaħħlet fir-Reġistru tal-Addittivi tal-Għalf tal-Unjoni Ewropea bħala prodott eżistenti, skont l-Artikolu 10(1) tar-Regolament (KE) Nru 1831/2003, b’numru CAS 2530-10-1 u numru Flavis 15.024.

(3)

Skont l-Artikolu 10(2) tar-Regolament (KE) Nru 1831/2003 flimkien mal-Artikolu 7 tiegħu, tressqet applikazzjoni għar-rievalwazzjoni ta’ din is-sustanza bħala addittiv fl-għalf għall-ispeċijiet tal-annimali kollha, bit-talba li l-addittiv jiġi kklassifikat fil-kategorija “addittivi sensorji” u fil-grupp funzjonali “komposti aromatiċi”. Dik l-applikazzjoni kienet akkumpanjata mill-partikolaritajiet u d-dokumenti meħtieġa skont l-Artikolu 7(3) tar-Regolament (KE) Nru 1831/2003.

(4)

Is-sustanza 3-aċetil-2,5-dimetiltijofen kienet ukoll inkluża fil-lista ta’ sustanzi aromatizzanti fil-Parti A tal-Anness I tar-Regolament (KE) Nru 1334/2008 tal-Parlament Ewropew u tal-Kunsill tas-16 ta’ Diċembru 2008 dwar aromatizzanti u ċerti ingredjenti tal-ikel bi proprjetajiet aromatizzanti għall-użu fl-ikel u fuq l-ikel u li jemenda r-Regolament tal-Kunsill (KEE) Nru 1601/91, ir-Regolament (KE) Nru 2232/96 u (KE) Nru 110/2008 u d-Direttiva 2000/13/KE (3), bħala sustanza aromatizzanti taħt evalwazzjoni li għaliha kella ġiet sottomessa dejta xjentifika addizzjonali. Din id-dejta ġiet sottomessa.

(5)

L-Awtorità Ewropea dwar is-Sigurtà fl-Ikel (“l-Awtorità”) ikkonkludiet fl-opinjoni tagħha tal-15 ta’ Mejju 2013 (4) dwar l-użu ta’ din is-sustanza bħala sustanza li tagħti t-togħma fl-ikel li din is-sustanza hija mutaġenika in vitro u in vivo u kkonkludiet li l-użu tagħha bħala sustanza li tagħti t-togħma fl-ikel tqajjem tħassib għas-sikurezza.

(6)

Din l-evalwazzjoni tindika li 3-aċetil-2,5-dimetiltijofen x’aktarx li hija mutaġenika wkoll għall-annimali li jikkunsmaw għalf li fih din is-sustanza bħala addittiva sensorja. Għaldaqstant, ma ġiex stabbilit li dik is-sustanza ma għandhiex effett negattiv fuq is-saħħa tal-annimali meta tintuża bħala addittiv tal-għalf skont il-kundizzjonijiet proposti tal-użu.

(7)

Għalhekk il-kundizzjonijiet għall-awtorizzazzjoni, kif stipulat fl-Artikolu 5 tar-Regolament (KE) Nru 1831/2003, mhux sodisfatti. Għalhekk, l-awtorizzazzjoni ta’ 3-aċetil-2,5-dimetiltijofen bħala addittiv fl-għalf għandhom jiġu rifjutati.

(8)

Peress li l-użu ulterjuri ta’ 3-aċetil-2,5-dimetiltijofen bħala addittiv fl-għalf jista’ jikkawża riskju għas-saħħa tal-annimali, għandu jitneħħa mis-suq mill-aktar fis possibbli.

(9)

B’kunsiderazzjoni tar-raġunijiet prattiċi, għandu jiġi stabbilit perjodu ta’ tranżizzjoni biex tiġi indirizzata s-sitwazzjoni ta’ ħażniet eżistenti ta’ għalf li fih is-sustanza aromatizzanti 3-aċetil-2,5-dimetiltijofen diġà fis-suq qabel id-dħul fis-seħħ ta’ dan ir-Regolament.

(10)

Il-miżuri stipulati f’dan ir-Regolament huma konformi mal-opinjoni tal-Kumitat Permanenti dwar il-Katina Alimentari u s-Saħħa tal-Annimali,