1.

Din il-kawża toffri lill-Qorti tal-Ġustizzja l-ewwel okkażjoni sabiex tinterpreta d-dispożizzjonijiet tad-dritt tal-Unjoni dwar id-dettalji obbligatorji addizzjonali tal-ittikkettjar ta’ ikel għal skopijiet mediċi speċjali.

I.

Il-kuntest ġuridiku

A.

Ir-Regolament (UE) Nru 1169/2011

2.

Il-premessa 41 tar-Regolament (UE) Nru 1169/2011  ( 2 ) tistipula:

3.

L-Artikolu 9 ta’ dan ir-regolament, intitolat “Lista ta’ dettalji obbligatorji”, jipprevedi, fil-paragrafu 1 tiegħu:

4.

L-Artikolu 30 tal-imsemmi regolament, dwar il-kontenut tad-dikjarazzjoni dwar in-nutrizzjoni msemmija fl-imsemmi Artikolu 9(1)(l), fil-paragrafi 1 u 3 tiegħu jistipula:

5.

Taħt it-titolu “Espressjoni għal kull 100 g jew għal kull 100 ml”, l-Artikolu 32(2) tal-istess regolament jipprevedi:

6.

Skont l-Artikolu 33(1), (2) u (4) tar-Regolament Nru 1169/2011:

B.

Ir-Regolament (UE) Nru 609/2013

7.

Skont il-premessa 24 tar-Regolament (UE) Nru 609/2013  ( 3 ):

8.

L-Artikolu 2(2)(g) ta’ dan ir-regolament jipprevedi:

9.

L-Artikolu 9(5) u (6) tal-imsemmi regolament jipprevedi:

C.

Ir-Regolament Delegat (UE) 2016/128

10.

Il-premessi 13, 14, 15 tar-Regolament Delegat (UE) 2016/128  ( 4 ) huma fformulati kif ġej:

11.

Taħt it-titolu “Rekwiżiti speċifiċi għall-informazzjoni dwar l-ikel”, l-Artikolu 5(1) u (2)(g) ta’ dan ir-regolament delegat jipprovdi:

12.

Taħt it-titolu “Rekwiżiti speċifiċi għall-informazzjoni dwar in-nutrizzjoni”, l-Artikolu 6(2) tal-imsemmi regolament delegat jipprevedi:

II.

Il-fatti li wasslu għall-kawża, il-proċedura fil-kawża prinċipali, id-domandi preliminari u l-proċedura quddiem il-Qorti tal-Ġustizzja

13.

Nestlé Sverige AB (iktar ’il quddiem “Nestlé”) hija impriża fis-settur tal-ikel li tikkummerċjalizza diversi prodotti bħala prodotti tal-ikel intiżi għal skopijiet mediċi speċjali.

14.

Kif jirriżulta mit-talba għal deċiżjoni preliminari, dawn il-prodotti jinkludu, fuq in-naħa ta’ quddiem tal-imballaġġ, indikazzjonijiet dwar il-valur enerġetiku u l-kwantità ta’ nutrijenti differenti, bħax-xaħam, il-proteini u l-fibri alimentari, espressi mhux għal kull 100 g jew għal kull 100 ml, iżda għal kull porzjon jew għal kull unità ta’ konsum (iktar ’il quddiem l-“indikazzjonijiet kontenzjużi”).

15.

Il-Miljönämnden i Helsingborgs kommun (il-Kummissjoni għall-Ambjent tal-Muniċipalità ta’ Helsingborg, l-Isvezja) ordnat lil Nestlé tħassar dawn l-indikazzjonijiet kontenzjużi minħabba li dawn kienu jikkostitwixxu, bi ksur tal-Artikolu 6(2) tar-Regolament Delegat 2016/128, repetizzjoni tal-informazzjoni li tinsab fid-dikjarazzjoni obbligatorja dwar in-nutrizzjoni, skont l-Artikolu 30(1) tar-Regolament Nru 1169/2011, u li huma espressi, skont l-Artikolu 32(2) ta’ dan ir-regolament, għal 100 g jew 100 ml.

16.

Wara li pprovat, mingħajr suċċess, tikseb l-eżami mill-ġdid ta’ dik id-deċiżjoni, Nestlé ppreżentat rikors quddiem il-Förvaltningsrätten i Malmö (il-Qorti Amministrattiva sedenti f’Malmö, l-Isvezja) intiż għall-annullament tagħha. Fil-kuntest ta’ dan ir-rikors, Nestlé sostniet li l-indikazzjonijiet kontenzjużi ma kinux repetizzjoni ta’ dawk li jinsabu fid-dikjarazzjoni obbligatorja dwar in-nutrizzjoni, iżda li kellhom jitqiesu bħala indikazzjonijiet li jikkompletaw din id-dikjarazzjoni, skont l-Artikolu 5(2)(g) tar-Regolament Delegat 2016/128.

17.

L-imsemmi rikors ġie miċħud, minħabba li, minkejja li l-indikazzjonijiet kontenzjużi huma espressi għal kull porzjon jew għal kull unità ta’ konsum u mhux għal kull 100 g jew għal kull 100 ml, dawn jikkostitwixxu repetizzjoni tal-indikazzjonijiet tad-dikjarazzjoni obbligatorja dwar in-nutrizzjoni, ipprojbiti mill-Artikolu 6(2) ta’ dan ir-regolament delegat.

18.

Peress li l-Kammarrätten i Göteborg (il-Qorti Amministrattiva tal-Appell ta’ Göteborg, l-Isvezja) ċaħdet l-appell, li qieset li l-indikazzjonijiet kontenzjużi ma kinux jaqgħu taħt l-Artikolu 5(2)(g) tar-Regolament Delegat 2016/128, iżda kienu jikkostitwixxu repetizzjoni tal-indikazzjonijiet li jinsabu fid-dikjarazzjoni obbligatorja dwar in-nutrizzjoni, Nestlé ppreżentat appell ta’ kassazzjoni quddiem il-Högsta förvaltningsdomstolen (il-Qorti Amministrattiva Suprema, l-Isvezja), li hija l-qorti tar-rinviju.

19.

Sabiex jiġi ddeterminat jekk l-ittikkettjar tal-prodotti inkwistjoni huwiex konformi mar-Regolament Delegat 2016/128, il-qorti tar-rinviju tistaqsi, essenzjalment, jekk l-indikazzjonijiet kontenzjużi jikkostitwixxux deskrizzjoni addizzjonali tal-proprjetajiet u tal-karatteristiċi ta’ prodott, fis-sens tal-Artikolu 5(2)(g) ta’ dan ir-regolament delegat, jew jekk dawn l-indikazzjonijiet humiex biss repetizzjoni ta’ dawk li jinsabu fid-dikjarazzjoni obbligatorja dwar in-nutrizzjoni, repetizzjoni pprojbita mill-Artikolu 6(2) tal-imsemmi regolament delegat.

20.

Huwa f’dawn iċ-ċirkustanzi li l-Högsta förvaltningsdomstolen (il-Qorti Amministrattiva Suprema) iddeċidiet li tissospendi l-proċeduri quddiemha u li tagħmel lill-Qorti tal-Ġustizzja d-domandi preliminari li ġejjin:

21.

Id-deċiżjoni tar-rinviju, datata l‑25 ta’ April 2024, waslet fir-Reġistru tal-Qorti tal-Ġustizzja fid‑29 ta’ April 2024. Osservazzjonijiet bil-miktub ġew ippreżentati mir-rikorrenti fil-kawża prinċipali, mill-Gvern Ċek u mill-Kummissjoni Ewropea. Ir-rikorrenti, il-Miljönämnden i Helsingborgs kommun (il-Kummissjoni għall-Ambjent tal-Muniċipalità ta’ Helsingborg), konvenuta fil-kawża prinċipali, kif ukoll il-Gvern Ċek u l-Kummissjoni, ippreżentaw ukoll osservazzjonijiet orali waqt is-seduta li nżammet fit‑12 ta’ Frar 2025.

III.

Analiżi

A.

Osservazzjonijiet preliminari

22.

Hawnhekk nirrileva xi karatteristiċi speċifiċi inerenti għall-prodotti tal-ikel għal skopijiet mediċi speċjali u l-konsegwenzi tagħhom fuq il-kuntest ġuridiku applikabbli għall-ittikkettjar tagħhom, li l-komprensjoni tagħhom hija essenzjali sabiex jingħataw risposti utli għad-domandi magħmula lill-Qorti tal-Ġustizzja f’din il-kawża.

23.

Għandu jitfakkar li, fid-dritt tal-Unjoni, l-ittikkettjar tal-prodotti tal-ikel huwa rregolat mir-Regolament Nru 1169/2011. Dan ir-regolament jistabbilixxi r-rekwiżiti ġenerali fil-qasam, li jeħtieġu li tissemma informazzjoni obbligatorja fuq dawn il-prodotti tal-ikel  ( 5 ). L-imsemmi regolament jipprevedi wkoll il-possibbiltà li tiġi pprovduta ċerta informazzjoni fakultattiva  ( 6 ). Sa fejn il-prodotti tal-ikel għal skopijiet mediċi speċjali jikkostitwixxu, qabel kollox u minkejja l-karatteristiċi speċifiċi tagħhom, prodotti tal-ikel, dawn ir-rekwiżiti ġenerali japplikaw għal dawn l-ewwel prodotti  ( 7 ).

24.

Fir-rigward tal-karatteristiċi speċifiċi tal-prodotti tal-ikel ikkonċernati f’din il-kawża, skont id-definizzjoni legali, prodott tal-ikel għal skopijiet mediċi speċjali huwa, minn naħa, prodott tal-ikel speċifikament ittrattat jew ifformulat sabiex jissodisfa r-rekwiżiti nutrittivi tal-pazjenti u li ma jistax jintuża ħlief taħt superviżjoni medika  ( 8 ). Għalhekk, il-prodotti tal-ikel għal skopijiet mediċi speċjali huma kkaratterizzati mill-funzjoni nutrizzjonali partikolari tagħhom peress li huma “speċjalment ipproċessati jew ifformulati” sabiex jissodisfa ir-rekwiżiti nutrittivi partikolari tal-pazjenti  ( 9 ).

25.

Min-naħa l-oħra, dejjem skont id-definizzjoni legali, prodott tal-ikel intiż għal skopijiet mediċi speċjali huwa intiż sabiex jikkostitwixxi l-ikel esklużiv jew parzjali ta’ pazjenti li għandhom marda, disturb jew kundizzjoni medika partikolari  ( 10 ). Għalhekk, dawn il-prodotti tal-ikel għal skopijiet mediċi speċjali huma intiżi, min-natura tagħhom stess, sabiex jiġu inġeriti u sabiex iservu ta’ ikel għall-bniedem għal pazjenti li l-kapaċitajiet tagħhom ta’ assorbiment, ta’ diġestjoni, ta’ assimilazzjoni, ta’ metabolizzazzjoni jew ta’ eskrezzjoni tal-prodotti tal-ikel ordinarji jew ta’ ċerti ingredjenti jew metaboliti tagħhom huma mnaqqsa, limitati jew disturbati jew għal dawk li l-kundizzjoni medika tagħhom tiddetermina rekwiżiti nutrittivi partikolari oħra li ma jistgħux jiġu ssodisfatti permezz ta’ bidla fid-dieta normali biss  ( 11 ).

26.

Mill-kunsiderazzjonijiet preċedenti jirriżulta li l-prodotti tal-ikel għal skopijiet mediċi speċjali għandhom żewġ differenzi prinċipali meta mqabbla mal-prodotti tal-ikel ordinarji: waħda tikkonċerna l-grupp tal-popolazzjoni li għalih huma indirizzati, u l-oħra tikkonċerna l-użu tagħhom. Tal-ewwel huma intiżi għal gruppi ta’ popolazzjoni vulnerabbli, magħmula minn pazjenti li jbatu minn marda, minn disturb jew minn kundizzjoni medika li jimponulhom dieta speċifika. It-tieni jikkonċernaw il-konsumaturi b’saħħithom jew, fi kliem ieħor, dawk li għandhom profil ġenerali.

27.

Dawn iż-żewġ tipi ta’ prodotti tal-ikel huma differenti fir-rigward tal-użu tagħhom. Jekk l-użu tal-prodotti tal-ikel ordinarji ma huwiex suġġett għal ebda kundizzjoni, dak tal-prodotti tal-ikel għal skopijiet mediċi speċjali jista’ jsir biss taħt superviżjoni medika. Għalhekk, din is-superviżjoni medika, li hija element essenzjali għall-kunċett ta’ “prodott tal-ikel għal skopijiet mediċi speċjali”, jimplika li l-użu ta’ dan il-prodott tal-ikel, li huwa partikolari peress li huwa adattat għar-rekwiżiti nutrittivi tal-pazjent, għandu jiġi rrakkomandat lill-pazjent minn professjonist tas-saħħa fid-dawl tar-rekwiżiti nutrittivi tiegħu. F’dan il-kuntest, is-“superviżjoni medika” tippreżumi li professjonist fil-kura tas-saħħa, kif imsemmi fil-premessi 3 u 15 tar-Regolament Delegat 2016/128, jiżgura li l-użu ta’ prodott tal-ikel għal skopijiet mediċi speċjali jkun adegwat għar-rekwiżiti nutrittivi speċifiċi ta’ dan il-pazjent  ( 12 ).

28.

Dawn il-partikolaritajiet jiġġustifikaw li l-ittikkettjar tal-prodotti tal-ikel għal skopijiet mediċi speċjali għandu josserva mhux biss ir-rekwiżiti applikabbli għall-prodotti tal-ikel ordinarji, iżda wkoll ir-rekwiżiti speċifiċi stabbiliti għal dawn il-prodotti tal-ikel speċjali. L-ittikkettjar tal-imsemmija prodotti għalhekk jaqa’ taħt sistema f’żewġ stadji  ( 13 ). Għalhekk, ir-Regolament Nru 609/2013 u r-Regolament Delegat 2016/128, li jirregolaw, b’mod partikolari, ir-rekwiżiti speċifiċi applikabbli għall-prodotti tal-ikel għal skopijiet mediċi speċjali għandhom jinftiehmu fid-dawl tar-Regolament Nru 1169/2011 li jiddetermina r-rekwiżiti ġenerali applikabbli għall-prodotti tal-ikel kollha.

29.

Fir-rigward ta’ dawn ir-rekwiżiti ġenerali, il-Kapitolu IV tar-Regolament Nru 1169/2011, bit-titolu “Informazzjoni obbligatorja dwar l-ikel”, jiddikjara, b’mod partikolari, id-dettall dwar id-dikjarazzjoni dwar in-nutrizzjoni  ( 14 ). Din id-dikjarazzjoni għandha tinkludi l-elementi dwar il-valur enerġetiku u l-ammonti ta’ xaħam, saturati, karboidrati, zokkor, proteini u melħ. Uħud minn dawn l-elementi, jiġifieri il-valur enerġetiku, kif ukoll l-ammonti ta’ xaħam, saturati, zokkor u melħ, jistgħu jiġu repetuti fuq l-ittikkettjar tal-prodotti tal-ikel ordinarji meta dan l-ittikkettjar ikun fih id-dikjarazzjoni obbligatorja dwar in-nutrizzjoni  ( 15 ).

30.

Madankollu, sabiex titqies in-natura speċifika ta’ prodotti tal-ikel għal skopijiet mediċi speċjali, ċerti supplimenti u ċerti derogi għal dawn ir-regoli tqiesu neċessarji mil-leġiżlatur tal-Unjoni. B’mod partikolari, ġie kkunsidrat li, sabiex jiġi żgurat l-użu tajjeb ta’ dawn il-prodotti tal-ikel, kien obbligatorju li jiġu ddettaljati l-proprjetajiet u l-karatteristiċi tal-imsemmija prodotti tal-ikel kif ukoll li tiġi żviluppata l-informazzjoni li tipprovdi d-dikjarazzjoni dwar in-nutrizzjoni ta’ dawn l-istess prodotti tal-ikel  ( 16 ).

31.

F’dan ir-rigward, wieħed mid-dettalji obbligatorji addizzjonali fir-rigward tar-rekwiżiti ġenerali applikabbli għall-prodotti tal-ikel kollha jipprevedi l-inklużjoni ta’ deskrizzjoni tal-proprjetajiet u tal-karatteristiċi li jippermettu l-prodott jissodisfa r-rekwiżiti nutrittivi fil-każ ta’ marda, ta’ disturb jew ta’ kundizzjoni medika li għaliha huwa maħsub, b’mod partikolari, skont il-każ, il-partikolaritajiet tal-ipproċessar tiegħu u tal-formulazzjoni speċjali tiegħu, in-nutrijenti li ġew miżjuda, imnaqqsa, eliminati jew immodifikati mod ieħor u r-raġunijiet li jiġġustifikaw l-użu tiegħu  ( 17 ).

32.

Fir-rigward tar-rekwiżiti speċifiċi dwar id-dikjarazzjoni dwar in-nutrizzjoni għall-prodotti tal-ikel għal skopijiet mediċi speċjali, b’deroga mir-regoli ġenerali, kif jirriżultaw mill-Artikolu 30(3) tar-Regolament Nru 1169/2011, l-informazzjoni inkluża fid-dikjarazzjoni obbligatorja dwar in-nutrizzjoni għall-prodotti tal-ikel għal skopijiet mediċi speċjali ma għandiex tiġi repetuta fuq l-ittikkettjar  ( 18 ). Madankollu, l-Artikoli 31 sa 35 ta’ dan ir-regolament għandhom japplikaw għan-nutrijenti kollha inklużi fid-dikjarazzjoni dwar in-nutrizzjoni għall-prodotti tal-ikel għal skopijiet mediċi speċjali  ( 19 ).

33.

F’dan ir-rigward, il-Gvern Ċek isostni, essenzjalment, li xejn fir-Regolament Delegat 2016/128 ma jipprekludi li informazzjoni dwar in-nutrizzjoni, espressa għal kull porzjon jew għal kull unità ta’ konsum, tissemma fuq il-prodotti tal-ikel għal skopijiet mediċi speċjali konformement mal-Artikolu 33 tar-Regolament Nru 1169/2011 li jirregola l-indikazzjoni ta’ din l-informazzjoni. Dan il-gvern iqis li l-Artikolu 6(2) tar-Regolament Delegat 2016/128 jipprevedi deroga mill-Artikolu 30 tar-Regolament Nru 1169/2011 iżda mhux mill-Artikolu 33 tiegħu. Skont l-imsemmi gvern, għandha tiġi analizzata biss it-tieni domanda preliminari  ( 20 ), li tirrigwarda dan l-Artikolu 6(2).

34.

Għaldaqstant, għandha tiġi eżaminata, f’dan ir-rigward, l-interazzjoni li għandhom id-diversi dispożizzjonijiet imsemmija mill-Gvern Ċek u l-eventwali konsegwenzi tagħha għat-trattament tad-domandi preliminari magħmula lill-Qorti tal-Ġustizzja f’din il-kawża.

35.

L-Artikolu 30(1) u (2) tar-Regolament Nru 1169/2011, intitolat “Kontenut”, jistabbilixxi, essenzjalment, ir-rekwiżiti marbuta mal-kontenut tad-dikjarazzjoni dwar in-nutrizzjoni tal-prodotti tal-ikel, jiġifieri, fost l-oħrajn, l-elementi obbligatorji li din għandha tinkludi kif ukoll dawk li jistgħu jissupplimentawha. Il-paragrafu 3 ta’ dan l-artikolu jipprevedi li ċerta informazzjoni, li taqa’ taħt id-dikjarazzjoni dwar in-nutrizzjoni u speċifikament imsemmija f’dan il-paragrafu, tista’, bil-kundizzjoni li l-prodott tal-ikel ippakkjat bil-lest ikun fih tali dikjarazzjoni, tiġi repetuta fuq l-ittikkettjar ta’ dan il-prodott tal-ikel. Għalhekk, din ir-repetizzjoni volontarja hija awtorizzata, fil-kamp ta’ viżjoni ewlieni, komunement magħrufa bħala l-quddiem tal-imballaġġ, sabiex il‑konsumaturi jiġu megħjuna jaraw faċilment l-informazzjoni essenzjali dwar in-nutrizzjoni meta jixtru l-prodotti tal-ikel  ( 21 ).

36.

L-artikoli li jsegwu din id-dispożizzjoni u, b’mod partikolari, l-Artikoli 32 u 33, intitolati, rispettivament, “Espressjoni għal kull 100 g jew għal kull 100 ml” u “Espressjoni abbażi ta’ kull porzjon jew kull unità ta’ konsum”, jipprevedu r-regoli dwar l-espressjoni tal-elementi li jifformaw il-kontenut tad-dikjarazzjoni dwar in-nutrizzjoni. Għalkemm ir-regola prinċipali, li tinsab f’dan l-Artikolu 32, tipprovdi li tali espressjoni għandha ssir għal 100 g jew 100 ml, l-imsemmi Artikolu 33 jipprevedi każijiet addizzjonali li fihom dawn l-elementi jistgħu, barra mill-forma ta’ espressjoni għal 100 g jew 100 ml, jiġu espressi għal kull porzjon u/jew għal kull unità ta’ konsum  ( 22 ).

37.

L-artikoli ċċitati iktar ’il fuq jaqgħu kollha taħt it-Taqsima 3, intitolata “Dikjarazzjoni dwar in-nutrizzjoni”, tal-Kapitolu IV (li jirrigwarda l-“Informazzjoni obbligatorja dwar l-ikel”) tar-Regolament Nru 1169/2011.

38.

Fil-fehma tiegħi, il-kunsiderazzjonijiet esposti fil-punti 35 sa 37 ta’ dawn il-konklużjonijiet jippermettu li l-Artikolu 30 tar-Regolament Nru 1169/2011 jinftiehem bħala dispożizzjoni ġenerali li tiddefinixxi l-kontenut tal-informazzjoni obbligatorja dwar in-nutrizzjoni li għandha tiġi inkluża fid-dikjarazzjoni dwar in-nutrizzjoni tal-prodotti tal-ikel. Dan l-artikolu jindika wkoll liema informazzjoni ta’ din id-dikjarazzjoni, strettament limitata, tista’ tiġi repetuta fuq l-ittikkettjar, jiġifieri fuq in-naħa ta’ quddiem tal-imballaġġ ta’ dawn il-prodott tal-ikel. Issa, mill-qari tal-Artikolu 6(2) tar-Regolament Delegat 2016/128 jirriżulta li dan jidderoga preċiżament minn din l-aħħar regola dwar il-kontenut tal-informazzjoni li tista’ tiġi repetuta fuq l-ittikkettjar.

39.

Għall-kuntrarju, jidhirli li l-Artikoli 32 u 33 tar-Regolament Nru 1169/2011 jippreċiżaw iktar ir-regoli ta’ forma tar-rekwiżiti relatati mal-preżentazzjoni tal-informazzjoni msemmija fl-imsemmi Artikolu 30. Dan l-Artikolu 32 jistabbilixxi r-regola ta’ forma “prinċipali” li tista’, jekk ikun il-każ, tiġi kkompletata minn dik iddefinita mill-imsemmi Artikolu 33. Dawn ir-regoli, stabbiliti f’dawn iż-żewġ artikoli, japplikaw għall-informazzjoni dwar in-nutrijenti li tinsab fid-dikjarazzjoni dwar in-nutrizzjoni. Għandu jiġi osservat li l-imsemmija regoli japplikaw ukoll għad-dikjarazzjoni dwar in-nutrizzjoni tal-prodotti tal-ikel għal skopijiet mediċi speċjali, sa fejn din għandha tinkludi informazzjoni espressa għal 100 g jew 100 ml u tista’ tiġi kkompletata mill-informazzjoni espressa għal kull porzjon jew unità ta’ konsum  ( 23 ).

40.

Għalhekk, id-dispożizzjonijiet imsemmija fl-Artikoli 32 u 33 tar-Regolament Nru 1169/2011, li jikkonċernaw l-espressjoni tal-elementi, inklużi fid-dikjarazzjoni dwar in-nutrizzjoni, b’riferiment għall-kwantità tagħhom għal 100 g jew 100 ml u, jekk ikun il-każ, għal kull porzjon u/jew unità ta’ konsum, ma għandhomx jitqiesu jekk dawn l-elementi u l-kwantità tagħhom ma jiġux inklużi fid-dikjarazzjoni dwar in-nutrizzjoni. Għalhekk, l-eżistenza stess tar-regoli stabbiliti f’dawn l-artikoli tiddependi mill-Artikolu 30, li huwa impost, fil-fehma tiegħi, bħala dispożizzjoni ċentrali tat-taqsima tar-Regolament Nru 1169/2011 dwar ir-rekwiżiti ġenerali relatati mad-dikjarazzjoni dwar in-nutrizzjoni fil-qasam tal-ittikkettjar.

41.

Dan premess, fil-fehma tiegħi, il-pożizzjoni tal-Gvern Ċek, imfakkra fil-punt 33 ta’ dawn il-konklużjonijiet u spjegata waqt is-seduta, iċċaħħad mis-sens tagħha d-deroga prevista fl-Artikolu 6(2) tar-Regolament Delegat 2016/128 li la tirreferi għall-Artikolu 32 u lanqas għall-Artikolu 33 tar-Regolament Nru 1169/2011. Issa, il-projbizzjoni tar-repetizzjoni tal-informazzjoni dwar in-nutrizzjoni, prevista f’dan l-Artikolu 6(2), ma ssemmi espliċitament la l-espressjoni tagħha għal 100 g jew 100 ml, u lanqas dik għal kull porzjon jew għal kull unità ta’ konsum. Għaldaqstant, id-deroga prevista fl-Artikolu 6(2) ta’ dan ir-regolament delegat għandha tinftiehem bħala deroga ġenerali li tapplika indipendentement mill-mod ta’ espressjoni tal-valur enerġetiku u tal-ammonti ta’ nutrijenti skont l-Artikolu 32 jew l-Artikolu 33 tar-Regolament Nru 1169/2011.

42.

Konsegwentement, il-formulazzjoni u, b’mod partikolari, il-kuntest tad-dispożizzjonijiet li jinsabu fl-Artikoli 30, 32 u 33 tar-Regolament Nru 1169/2011 u fl-Artikolu 6(2) tar-Regolament Delegat 2016/128 jipprekludu l-pożizzjoni mressqa mill-Gvern Ċek, li kienet intiża li teskludi minn din l-analiżi l-ewwel domanda magħmula mill-qorti tar-rinviju. Għaldaqstant, din l-ewwel domanda għandha tiġi ttrattata kif ġej.

B.

Fuq l-ewwel domanda preliminari

43.

Infakkar li, permezz tal-ewwel domanda tagħha, il-qorti tar-rinviju tistaqsi, essenzjalment, jekk il-valur enerġetiku tal-prodott u l-ammonti ta’ nutrijenti differenti li huma pprovduti xi mkien ieħor għajr fid-dikjarazzjoni dwar in-nutrizzjoni jistgħux jikkostitwixxu deskrizzjoni addizzjonali tal-proprjetajiet u tal-karatteristiċi tal-prodott fis-sens tal-Artikolu 5(2)(g) tar-Regolament Delegat 2016/128.

44.

Skont dan l-Artikolu 5(2)(g), “[m]inbarra d-dettalji obbligatorji msemmija fl-Artikolu 9(1) tar-[Regolament Nru 1169/2011], dawn li ġejjin huma dettalji obbligatorji addizzjonali għall-ikel għal skopijiet mediċi speċjali: […] deskrizzjoni tal-kwalitajiet u/jew il-karatteristiki li jagħmlu l-prodott utli [ ( 24 )], b’rabta mal-mard, id-disturbi jew il-kundizzjonijiet mediċi li għall-ġestjoni dijetetika tagħhom huwa maħsub il-prodott, b’mod partikolari, skont il-każ, fejn dan ikun relatat mal-ipproċessar u l-formulazzjoni speċjali, in-nutrijenti li ġew miżjuda, imnaqqsa, eliminati jew immodifikati mod ieħor, kif ukoll il-ġustifikazzjoni għall-użu tal-prodott”.

45.

Sabiex tingħata risposta għall-ewwel domanda preliminari, jidhirli li huwa neċessarju li jiġi interpretat il-kunċett ta’ “deskrizzjoni tal-proprjetajiet u tal-karatteristiċi” tal-prodott fis-sens tal-imsemmi Artikolu 5(2)(g) tar-Regolament Delegat 2016/128. Sabiex tingħata risposta utli għal din id-domanda, huwa wkoll neċessarju li jiġi interpretat, b’mod sekondarju, il-kunċett ta’ “dettalji obbligatorji addizzjonali” li dan l-istess artikolu jintroduċi, peress li din id-deskrizzjoni taqa’ taħtu  ( 25 ).

46.

Għandu jitfakkar li l-interpretazzjoni tal-Artikolu 5(2)(g) tar-Regolament Delegat 2016/128 għandha tiġi mfittxija billi jittieħdu inkunsiderazzjoni mhux biss il-kliem tagħha, iżda wkoll il-kuntest tagħha u l-għan imfittex mil-leġiżlazzjoni inkwistjoni  ( 26 ).

47.

Fir-rigward, fl-ewwel lok, tal-formulazzjoni ta’ dan l-Artikolu 5(2)(g), għandu jiġi rrilevat li dan (u lanqas ir-Regolament Delegat innifsu) ma jiddefinixxix il-kunċett ta’ “deskrizzjoni tal-kwalitajiet u/jew il-karatteristiċi li jagħmlu l-prodott utli, b’rabta mal-mard, id-disturbi jew il-kundizzjonijiet mediċi li għall-ġestjoni dijetetika tagħhom huwa maħsub il-prodott”. F’dan ir-rigward, għandha tingħata interpretazzjoni tat-termini “proprjetajiet” u “karatteristiċi” fil-kuntest partikolari tal-prodotti tal-ikel għal skopijiet mediċi speċjali. Dawn it-termini għandhom jinftiehmu bħala li jirreferu għal kwalitajiet u għal ġabra ta’ elementi rikonoxxibbli li jippermettu li ssir distinzjoni  ( 27 ), f’dan il-każ, bejn dawn il-prodotti tal-ikel fir-rigward tal-kapaċità tagħhom li jissodisfaw ir-rekwiżiti nutrittivi jew li jkunu partikolarment utli  ( 28 ) fil-każ ta’ marda, ta’ disturb jew ta’ kundizzjoni medika li għaliha huma maħsuba.

48.

Din l-interpretazzjoni letterali tat-termini “proprjetajiet” u “karatteristiċi” hija kkorroborata mill-eżempji pprovduti fl-Artikolu 5(2)(g) tar-Regolament Delegat 2016/128, li fosthom hemm il-karatteristiċi partikolari tal-manifattura u tal-formula tal-prodott, il-bidliet li jikkonċernaw in-nutrijenti skont iż-żieda tagħhom, it-tnaqqis tagħhom, l-eliminazzjoni tagħhom jew il-modifika tagħhom, u r-raġunijiet li jiġġustifikaw l-użu ta’ dan il-prodott  ( 29 ).

49.

Madankollu, għandu jiġi rrilevat li l-formulazzjoni tal-Artikolu 5(2)(g) tar-Regolament Delegat 2016/128, dwar l-indikazzjoni tal-informazzjoni obbligatorja dwar il-prodotti tal-ikel speċifiċi li huma dawk intiżi għal skopijiet mediċi speċjali, tippreżenta differenzi meta mqabbla mal-formulazzjoni tal-Artikolu 9(1) tar-Regolament Nru 1169/2011 u ma’ dik tal-Artikolu 30(1) ta’ dan ir-regolament, dwar l-indikazzjoni tal-informazzjoni obbligatorja dwar il-prodotti tal-ikel kollha.

50.

Fil-fatt, ir-rekwiżiti ġenerali dwar l-ittikkettjar tal-prodotti tal-ikel ordinarji, kif jirriżultaw mill-Artikolu 9 u mill-Artikolu 30 tar-Regolament Nru 1169/2011, jirreferu għall-kliem “ingredjenti”  ( 30 ) jew “elementi” u għalhekk jindikaw is-sustanzi li jifformaw prodott u, b’mod iktar ġenerali, jirreferu għall-kontenut tagħhom. Issa, il-kliem użat fl-Artikolu 5(2)(g) tar-Regolament Delegat 2016/128 jirrigwarda l-kwalitajiet u l-karatteristiċi li jippermettu użu xieraq ta’ dan il-prodott, billi jiġi adattat għar-rekwiżiti nutrittivi speċifiċi ta’ marda, ta’ disturb jew ta’ kundizzjoni medika  ( 31 ). Għalhekk, id-differenza fil-kliem użat, fil-formulazzjoni ta’ dawn id-dispożizzjonijiet, jidhirli li tirriżulta mir-rieda tal-leġiżlatur tal-Unjoni li jintroduċi regola speċifika ta’ deskrizzjoni tal-kwalitajiet inerenti tal-prodotti tal-ikel għal skopijiet mediċi speċjali li tista’ titqabbel mar-regola ġenerali dwar l-indikazzjoni tal-kompożizzjoni tal-prodotti tal-ikel kollha.

51.

Barra minn hekk, mill-kliem tal-Artikolu 5(2)(g) tar-Regolament Delegat 2016/128 jirriżulta li dan jirrigwarda l-indikazzjoni tal-informazzjoni minbarra dik prevista fl-Artikolu 9(1) tar-Regolament Nru 1169/2011. Issa, jidhirli li din l-indikazzjoni għandha importanza partikolari ħafna f’dan il-każ sabiex jiġi konkluż li l-formulazzjoni tagħha tipprekludi li l-valur enerġetiku tal-prodott u l-kwantità tan-nutrijenti differenti jkunu jistgħu jaqgħu taħt id-deskrizzjoni tal-proprjetajiet u tal-karatteristiċi addizzjonali tal-prodott meta mqabbla ma’ dawk diġà meħtieġa għall-prodotti tal-ikel kollha.

52.

Din il-konklużjoni tapplika iktar u iktar fid-dawl tal-preċiżazzjoni magħmula fl-Artikolu 5(2)(g) tar-Regolament Delegat 2016/128, li jikklassifika tali informazzjoni bħala “obbligatorja”, li timplika li din għandha tidher fuq il-prodotti tal-ikel kollha intiżi għal skopijiet mediċi speċjali.

53.

Fit-tieni lok, din l-interpretazzjoni letterali hija sostnuta mill-kuntest li jagħmel parti minnu l-Artikolu 5(2)(g) tar-Regolament Delegat 2016/128 u mill-għanijiet imfittxija minn dan ir-regolament delegat.

54.

Fir-rigward, l-ewwel, tal-kuntest, għandu jitfakkar, qabelxejn, dak tal-adozzjoni tar-regola fil-qasam tal-ittikkettjar tal-prodotti tal-ikel intiżi għal skopijiet mediċi speċjali, prevista f’dan l-Artikolu 5(2)(g). Fil-fatt, din ir-regola tikkumplimenta lil dawk kollha diġà applikabbli għall-prodotti tal-ikel kollha, kif jikkonferma t-titolu tiegħu, ir-“[r]ekwiżiti speċifiċi għall-informazzjoni dwar l-ikel”.

55.

Sussegwentement, l-indikazzjonijiet kollha msemmija fl-Artikolu 5 tar-Regolament Delegat 2016/128, b’mod partikolari dawk dwar l-użu tal-prodotti tal-ikel għal skopijiet mediċi speċjali taħt superviżjoni medika  ( 32 ), dwar il-kategorija tal-età speċifika li għaliha huma intiżi dawn il-prodotti tal-ikel  ( 33 ) jew ukoll dwar il-prekawzjonijiet u l-kontraindikazzjonijiet xierqa  ( 34 ), imorru lil hinn mill-kuntest tal-kontenut nutrittiv ta’ prodott tal-ikel u huma intiżi li jipprovdu informazzjoni addizzjonali meta mqabbla ma’ dan tal-aħħar.

56.

Fl-aħħar mill-aħħar, f’dan il-kuntest, huwa partikolarment utli li jiġi rrilevat li l-Artikolu 6(2) tar-Regolament Delegat 2016/128 jipprevedi projbizzjoni speċifika li l-informazzjoni inkluża fid-dikjarazzjoni dwar in-nutrizzjoni tiġi repetuta fuq l-ittikkettjar tal-prodotti tal-ikel għal skopijiet mediċi speċjali  ( 35 ). F’dan ir-rigward, għandu jitfakkar li l-indikazzjonijiet kontenzjużi huma, fir-rigward tas-sustanza tagħhom stess, l-informazzjoni li taqa’ taħt id-dikjarazzjoni dwar in-nutrizzjoni, skont l-Artikolu 30(1) tar-Regolament Nru 1169/2011. Bħall-Kummissjoni, jiena tal-fehma li l-valur enerġetiku u l-ammont ta’ nutrijenti jibqgħu informazzjoni tal-istess natura irrispettivament mill-mod li bih jiġu espressi.

57.

Għalhekk, il-projbizzjoni, imsemmija f’dan l-Artikolu 6(2) jew l-obbligu, skont l-Artikolu 5(2)(g) ta’ dan ir-regolament delegat, it-tnejn jikkonċernaw l-indikazzjoni ta’ ċerti indikazzjonijiet fuq l-ittikkettjar tal-prodotti tal-ikel intiżi għal skopijiet mediċi speċjali ma tistax tvarja skont id-diversi modi ta’ espressjoni ta’ din l-istess informazzjoni, peress li din tal-aħħar ma tinbidilix, minħabba espressjoni differenti, fir-rigward tas-sustanza tagħha li hija l-unika ħaġa rilevanti għall-applikazzjoni tad-dispożizzjonijiet imsemmija iktar ’il fuq  ( 36 ). Issa, ammissjoni tal-kuntrarju, kif issostni, essenzjalment, Nestlé, tista’ tirriżulta, fil-fehma tiegħi, fl-evitar tal-projbizzjoni inkluża fl-Artikolu 6(2) tar-Regolament Delegat 2016/128.

58.

Għal dawn ir-raġunijiet, il-kuntest li fih jaqa’ l-Artikolu 5(2)(g) tar-Regolament Delegat 2016/128 jipprekludi, fil-fehma tiegħi, li l-indikazzjonijiet kontenzjużi jkunu jistgħu jaqgħu taħt indikazzjonijiet obbligatorji addizzjonali applikabbli biss għall-prodotti tal-ikel għal skopijiet mediċi speċjali. A fortiori, dawn ma jistgħux jaqgħu taħt id-“deskrizzjoni tal-kwalitajiet u/jew il-karatteristiki” imsemmija f’dan l-Artikolu 5(2)(g).

59.

It-tieni, il-konklużjoni preċedenti jidhirli li hija l-iktar waħda konformi mal-għanijiet tar-Regolament Delegat 2016/128.

60.

F’dan ir-rigward, għandu jitfakkar li r-Regolament Delegat 2016/128 jikkompleta r-Regolament Nru 609/2013 billi jiddefinixxi r-rekwiżiti speċifiċi dwar il-kompożizzjoni u l-informazzjoni applikabbli għall-prodotti tal-ikel għal skopijiet mediċi speċjali. Huma jikkompletaw ir-rekwiżiti ġenerali li japplikaw għall-prodotti tal-ikel kollha skont ir-Regolament Nru 1169/2011 u, konsegwentement, li japplikaw ukoll għall-prodotti tal-ikel speċifiċi kkonċernati f’dan il-każ.

61.

Ir-Regolament Delegat 2016/128 isemmi, billi jipprevedi dawn ir-rekwiżiti speċifiċi sabiex titqies in-natura speċifika ta’ dawn il-prodotti tal-ikel għal skopijiet mediċi speċjali  ( 37 ), sabiex ikun żgurat li dawn il-prodotti tal-ikel huma sikuri, ta’ benefiċċju u effettivi għall-persuni li għalihom huma maħsuba  ( 38 ). Għalhekk, billi jipprevedi rekwiżiti speċifiċi ta’ ttikkettjar ta’ ċerti prodotti tal-ikel għal skopijiet mediċi speċjali, il-leġiżlatur tal-Unjoni għandu l-għan li jistabbilixxi livell għoli ta’ protezzjoni għall-konsumaturi vulnerabbli sabiex jippermettilhom jidentifikaw preċiżament il-prodotti li jipprovdulhom sors parzjali jew ewlieni ta’ l-ikel tagħhom  ( 39 ).

62.

Qabelxejn, l-interpretazzjoni tal-Artikolu 5(2)(g) tar-Regolament Delegat 2016/128 li jimponi obbligu li jiġi indikat fuq l-imballaġġi tal-prodotti tal-ikel għal skopijiet mediċi speċjali, bħala informazzjoni addizzjonali, l-informazzjoni obbligatorja applikabbli għall-prodotti tal-ikel kollha, bħal dak ikkonċernat f’dan il-każ, tmur kontra l-għan li jiġu stabbiliti rekwiżiti speċifiċi fil-qasam.

63.

Sussegwentement, il-garanzija tal-protezzjoni tal-konsumaturi vulnerabbli, li tippermetti li jiġu identifikati preċiżament il-prodotti li jikkostitwixxu s-sors parzjali jew ewlieni ta’ ikel tagħhom, tirriskja wkoll li tiġi kompromessa minn din l-interpretazzjoni. Fil-fatt, il-fatt li s-sempliċi indikazzjoni ta’ ċerta informazzjoni dwar in-nutrizzjoni fuq in-naħa ta’ quddiem tal-imballaġġ issir obbligatorja jista’ jħawwad lil dawn il-konsumaturi, jew saħansitra jqarraq bihom  ( 40 ).

64.

Fl-aħħar nett, kuntrarjament għal dak li tallega Nestlé, ma iniex konvint li, sabiex tiġi ġġustifikata l-interpretazzjoni tagħha, wieħed jista’ jitkellem dwar informazzjoni essenzjali  ( 41 ) tal-prodotti tal-ikel intiżi għal skopijiet mediċi speċjali bħalma huwa l-każ fir-rigward tal-prodotti tal-ikel ordinarji  ( 42 ) minħabba, b’mod partikolari, in-natura partikolari tagħhom deskritta fl-osservazzjonijiet preliminari. Fil-fatt, il-kompożizzjoni ta’ dawn il-prodotti tal-ikel intiżi għal skopijiet mediċi speċjali tista’ tvarja b’mod sostanzjali skont, fost affarijiet oħra, il-marda, id-disturb jew il-kundizzjoni medika speċifiċi li jwasslu għar-rekwiżiti nutrittivi li għalihom dawn il-prodotti tal-ikel ikunu maħsuba, l-età tal-pazjenti u l-post fejn huma jirċievu l-kura tas-saħħa, kif ukoll l-użu maħsub tal-imsemmija prodotti tal-ikel  ( 43 ).

65.

Għalhekk, l-interpretazzjoni tal-Artikolu 5(2)(g) tar-Regolament Delegat 2016/128 bħala li tippermetti li jiġi indikat il-valur enerġetiku tal-prodott u l-ammont ta’ nutrijenti differenti xi mkien ieħor għajr fid-dikjarazzjoni dwar in-nutrizzjoni u li tikkostitwixxi deskrizzjoni addizzjonali tal-proprjetajiet u tal-karatteristiċi tal-prodotti tal-ikel intiżi għal skopijiet mediċi speċjali ma tippermettix li jintlaħaq l-għan tar-Regolament Delegat 2016/128 dwar il-protezzjoni għolja tal-konsumaturi vulnerabbli. Fil-fatt, dan l-għan jeżiġi, fil-fehma tiegħi, li kemm il-professjonisti tas-saħħa li jintervjenu fil-monitoraġġ mediku tal-użu ta’ dawn il-prodotti tal-ikel kif ukoll il-konsumaturi vulnerabbli jagħmlu għażla informata bbażata fuq l-informazzjoni kollha dwar in-nutrizzjoni.

66.

Bħala konklużjoni, mill-kunsiderazzjonijiet preċedenti jirriżulta li, fil-fehma tiegħi, ir-risposta għall-ewwel domanda preliminari magħmula mill-qorti tar-rinviju għandha tkun li l-Artikolu 5(2)(g) tar-Regolament Delegat 2016/128 għandu jiġi interpretat fis-sens li l-indikazzjonijiet kontenzjużi ma jistgħux jikkostitwixxu d-deskrizzjoni addizzjonali tal-proprjetajiet u tal-karatteristiċi tal-prodott fis-sens ta’ dan l-artikolu.

C.

Fuq it-tieni domanda preliminari

67.

Peress li din id-domanda saret fil-każ ta’ risposta fl-affermattiv għall-ewwel domanda, jekk il-Qorti tal-Ġustizzja tinterpreta l-Artikolu 5(2)(b) tar-Regolament Delegat 2016/128 fis-sens li pproponejt fil-punt 66 ta’ dawn il-konklużjonijiet, ma hemmx lok li tingħata risposta għaliha.

68.

Fi kwalunkwe każ, għandu jitfakkar li, sabiex ma jitneħħiex is-sens tal-projbizzjoni prevista fl-Artikolu 6(2) tar-Regolament Delegat 2016/128, l-indikazzjonijiet kontenzjużi ma jistgħux jaħarbu minnha sempliċement minħabba l-forma tal-espressjoni tagħhom. Fil-fatt, din tal-aħħar bl-ebda mod ma tbiddel il-kontenut, li jibqa’, fil-fehma tiegħi, l-uniku kriterju rilevanti għall-applikazzjoni ta’ din il-projbizzjoni  ( 44 ).

IV.

Konklużjoni

69.

Fid-dawl tal-kunsiderazzjonijiet kollha preċedenti, nipproponi li l-Qorti tal-Ġustizzja tirrispondi kif ġej għad-domandi preliminari magħmula mill-Högsta förvaltningsdomstolen (il-Qorti Amministrattiva Suprema, l-Isvezja):