Il-Ġurnal Uffiċjali
ta'l-Unjoni Ewropea
MT
Is-serje L
|
|
Il-Ġurnal Uffiċjali |
MT Is-serje L |
|
2025/960 |
20.5.2025 |
DEĊIŻJONI TAL-KUNSILL (PESK) 2025/960
tal-20 ta’ Mejju 2025
li temenda d-Deċiżjoni (PESK) 2018/1544 li tikkonċerna miżuri restrittivi kontra l-proliferazzjoni u l-użu ta’ armi kimiċi
IL-KUNSILL TAL-UNJONI EWROPEA,
Wara li kkunsidra t-Trattat dwar l-Unjoni Ewropea, u b’mod partikolari l-Artikolu 29 tiegħu,
Wara li kkunsidra l-proposta mir-Rappreżentant Għoli tal-Unjoni għall-Affarijiet Barranin u l-Politika ta’ Sigurtà,
Billi:
|
(1) |
Fil-15 ta’ Ottubru 2018, il-Kunsill adotta d-Deċiżjoni (PESK) 2018/1544 (1) li tikkonċerna miżuri restrittivi kontra l-proliferazzjoni u l-użu ta’ armi kimiċi. |
|
(2) |
Fit-18 ta’ Novembru 2024 u fl-14 ta’ Frar 2025, l-Organizzazzjoni għall-Projbizzjoni ta’ Armi Kimiċi (OPCW) ħarġet rapporti minn żewġ Żjarat ta’ Assistenza Teknika li jikkonfermaw il-preżenza tal-aġent għall-kontroll tal-irvellijiet CS u komposti relatati fil-kampjuni miġbura, li jindikaw tendenza ta’ użu għall-kontroll tal-irvellijiet bħala metodu ta’ gwerra fl-ewwel linji tal-ġlied fl-Ukrajna, li hija pprojbita skont l-Artikolu I, il-paragrafu 5, tal-Konvenzjoni dwar l-Armi Kimiċi. |
|
(3) |
F’dak il-kuntest, u fid-dawl tat-theddida kontinwa kkawżata mill-proliferazzjoni u l-użu ta’ armi kimiċi, jenħtieġ li tliet entitajiet jiġu inklużi fil-lista ta’ persuni fiżiċi u ġuridiċi, entitajiet u korpi soġġetti għal miżuri restrittivi li tinsab fl-Anness tad-Deċiżjoni (PESK) 2018/1544. |
|
(4) |
Għalhekk jenħtieġ li d-Deċiżjoni (PESK) 2018/1544 tiġi emendata skont dan, |
ADOTTA DIN ID-DEĊIŻJONI:
Artikolu 1
L-Anness tad-Deċiżjoni (PESK)2018/1544 huwa emendat f’konformità mal-Anness ta’ din id-Deċiżjoni.
Artikolu 2
Din id-Deċiżjoni għandha tidħol fis-seħħ fid-data tal-pubblikazzjoni tagħha f’Il-Ġurnal Uffiċjali tal-Unjoni Ewropea.
Magħmul fi Brussell, l-20 ta’ Mejju 2025.
Għall-Kunsill
Il-President
K. KALLAS
(1) Id-Deċiżjoni tal-Kunsill (PESK) 2018/1544 tal-15 ta’ Ottubru 2018 li tikkonċerna miżuri restrittivi kontra l-proliferazzjoni u l-użu ta’ armi kimiċi (ĠU L 259, 16.10.2018, p. 25, ELI: http://data.europa.eu/eli/dec/2018/1544/oj).
ANNESS
Fl-Anness tad-Deċiżjoni (PESK) 2018/1544, taħt l-intestatura “B. Persuni ġuridiċi, entitajiet u korpi”, jiżdiedu l-entrati li ġejjin:
|
|
Isem |
Informazzjoni għall-identifikazzjoni |
Raġunijiet għad-deżinjazzjoni |
Data tal-elenkar |
|
“4. |
Truppi tad-Difiża Radjoloġika, Kimika u Bijoloġika tal-Ministeru għad-Difiża tal-Federazzjoni Russa (Войска радиационной, химической и биологической защиты Министерства обороны Российской Федерации) |
Indirizz: Corpus 2, Building 22, Frunze Embankment, 119160 Moscow, Russian Federation Sit Web: https://eng.mil.ru/en/structure/forces/ground/structure/rhbz.htm Numru ta’ reġistrazzjoni: 1037739635890 Numru Personali tal-Identifikazzjoni tal-Kontribwent (INN): 7704195013 |
It-Truppi tad-Difiża Radjoloġika, Kimika u Bijoloġika huma l-entità kompetenti fil-Forzi Armati Russi responsabbli għall-gwerra kimika u bijoloġika. F’din il-kapaċità, it-Truppi tad-Difiża Radjoloġika, Kimika u Bijoloġika huma involuti fl-użu ta’ armi kimiċi mill-Federazzjoni Russa. Dawn jinkludu aġenti għall-kontroll tal-irvellijiet, bħall-gass CS, li ntuża bħala metodu ta’ gwerra mill-forzi Russi fl-Ukrajna, bi ksur tal-Artikolu I, il-paragrafu 5, tal-Konvenzjoni dwar l-Armi Kimiċi, li r-Russja hija Stat Parti għaliha. L-użu tal-gass CS ġie kkonfermat minn rapporti ppubblikati f’Novembru 2024 u Frar 2025 mill-Organizzazzjoni għall-Projbizzjoni ta’ Armi Kimiċi (OPCW), wara Żjarat ta’ Assistenza Teknika li saru fl-Ukrajna. Għaldaqstant, it-Truppi tad-Difiża Radjoloġika, Kimika u Bijoloġika huma involuti fl-użu ta’ armi kimiċi. |
20.5.2025 |
|
5. |
Is-27 Ċentru Xjentifiku tal-Ministeru għad-Difiża tal-Federazzjoni Russa (27-й Центральный научно-исследовательский институт Министерства обороны Российской Федерации) |
Indirizz: 51 st Khoroshevsky Passage, 123007 Moscow, Russian Federation Telefown: + 7 (495) 945 76 96 Numru Personali tal-Identifikazzjoni tal-Kontribwent (INN): 7714676767 Sit Web: http://eng.mil.ru/en/science/sro/information.htm?id=10992@morfOrgScience Email: fin27cnii@mail.ru Entità assoċjata: Truppi tad-Difiża Radjoloġika, Kimika u Bijoloġika tal-Ministeru għad-Difiża tal-Federazzjoni Russa |
Is-27 Ċentru Xjentifiku tal-Ministeru għad-Difiża Russu huwa unità subordinata tat-Truppi tad-Difiża Radjoloġika, Kimika u Bijoloġika. Bħala entità ewlenija tar-riċerka fil-militar Russu, huwa jappartjeni għall-militar Russu u huwa assoċjat mal-iżvilupp u l-użu ta’ aġenti kimiċi. Għalhekk, is-27 Ċentru Xjentifiku tal-Ministeru għad-Difiża Russu huwa assoċjat mat-Truppi tad-Difiża Radjoloġika, Kimika u Bijoloġika. |
20.5.2025 |
|
6. |
It-33 Istitut Ċentrali tar-Riċerka u l-Ittestjar Xjentifiċi tal-Ministeru għad-Difiża tal-Federazzjoni Russa (33 Центральный научно-исследовательский испытательный институт Министерства обороны Российской Федерации) |
Indirizz: 1 Ulitsa Krasnoznamennaya, Volsk-18/Shikhany, Saratov Oblast, Russia; Krasnoznamennaya Street 1, Volsk-18, Saratov, 412918 Russian Federation Telefown: + 7 (343) 255 99 88 Numru Personali tal-Identifikazzjoni tal-Kontribwent (INN): 6441013942 / 644101001 Website: https://ens.mil.ru/science/SRI/information.htm?id=12027@morfOrgScience Email: 33cnii-fes@mil.ru Entità assoċjata: Truppi tad-Difiża Radjoloġika, Kimika u Bijoloġika tal-Ministeru għad-Difiża tal-Federazzjoni Russa |
It-33 Istitut Ċentrali tar-Riċerka u l-Ittestjar Xjentifiċi tal-Ministeru għad-Difiża huwa unità subordinata tat-Truppi tad-Difiża Radjoloġika, Bijoloġika u Kimika. Bħala entità ewlenija tar-riċerka u l-ittestjar fil-qasam tal-kimika fil-militar Russu, huwa jappartjeni għall-militar Russu u huwa assoċjat mal-iżvilupp u l-użu ta’ aġenti kimiċi. Għalhekk, it-33 Istitut Ċentrali tar-Riċerka u l-Ittestjar Xjentifiċi tal-Ministeru għad-Difiża huwa assoċjat mat-Truppi tad-Difiża Radjoloġika, Kimika u Bijoloġika. |
20.5.2025” |
ELI: http://data.europa.eu/eli/dec/2025/960/oj
ISSN 1977-074X (electronic edition)