(1)

Skont l-Artikolu 61(1) tar-Regolament (UE) 2019/881 (l-Att dwar iċ-Ċibersigurtà), l-awtoritajiet nazzjonali taċ-ċertifikazzjoni taċ-ċibersigurtà (NCCAs) huma responsabbli biex jinnotifikaw lill-Kummissjoni dwar il-korpi ta’ valutazzjoni tal-konformità li jkunu ġew akkreditati u, fejn applikabbli, awtorizzati biex joħorġu ċertifikati Ewropej taċ-ċibersigurtà f’livelli ta’ assigurazzjoni speċifiċi, u jenħtieġ li jżommu n-notifika aġġornata. Barra minn hekk, skont l-Artikolu 61(2) tar-Regolament (UE) 2019/881, il-Kummissjoni hija meħtieġa tippubblika f’Il-Ġurnal Uffiċjali tal-Unjoni Ewropea lista tal-korpi ta’ valutazzjoni tal-konformità notifikati skont skema Ewropea taċ-ċertifikazzjoni taċ-ċibersigurtà sena wara li tidħol fis-seħħ l-iskema. Sabiex jiġi żgurat approċċ armonizzat għan-notifiki u jiġi ffaċilitat il-proċess tan-notifika għall-NCCAs, jenħtieġ li dan ir-Regolament jispeċifika aktar iċ-ċirkostanzi, il-formati u l-proċeduri għan-notifiki. Huwa importanti li dawk l-aspetti jiġu ċċarati bil-ħsieb tal-applikazzjoni tal-ewwel skema Ewropea ta’ ċertifikazzjoni taċ-ċibersigurtà bbażata fuq kriterji komuni (EUCC) stabbilita bir-Regolament ta’ Implimentazzjoni tal-Kummissjoni (UE) 2024/482 (2).

(2)

Dan ir-Regolament jirrikonoxxi s-sinerġiji bejn ir-Regolament (UE) 2019/881 u l-leġiżlazzjoni rilevanti tal-Unjoni dwar l-armonizzazzjoni, inkluż ir-Regolament (UE) 2024/2847 tal-Parlament Ewropew u tal-Kunsill (l-Att dwar ir-Reżiljenza Ċibernetika) (3). Għalhekk qed jiġi propost li l-NCCAs jinnotifikaw lill-Kummissjoni permezz tal-mezz elettroniku ta’ notifika, żviluppat u ġestit mill-Kummissjoni, imsemmi fid-Deċiżjoni 768/2008/KE tal-Parlament Ewropew u tal-Kunsill (4). Mingħajr ma jiġi affettwat l-obbligu tal-Kummissjoni li tippubblika l-lista tal-korpi ta’ valutazzjoni tal-konformità notifikati f’Il-Ġurnal Uffiċjali tal-Unjoni Ewropea, jenħtieġ li l-lista tkun disponibbli għall-pubbliku wkoll fuq il-mezz elettroniku ta’ notifika żviluppat u ġestit mill-Kummissjoni.

(3)

In-notifika tal-korpi ta’ valutazzjoni tal-konformità akkreditati u, fejn applikabbli, awtorizzati tfisser li dawn il-korpi jistgħu jiġu fdati fit-twettiq ta’ attivitajiet ta’ evalwazzjoni u ta’ ċertifikazzjoni f’konformità mar-Regolament (UE) 2019/881, li jikkontribwixxu għar-reputazzjoni ġenerali tal-iskemi Ewropej taċ-ċertifikazzjoni taċ-ċibersigurtà. Għalhekk huwa essenzjali li jiġi żgurat li l-korpi ta’ valutazzjoni tal-konformità li jkunu ġew notifikati, jissodisfaw ir-rekwiżiti tagħhom u jissodisfaw l-obbligi tagħhom maż-żmien. Il-lista ppubblikata tal-korpi ta’ valutazzjoni tal-konformità notifikati jenħtieġ li tkun akkurata u tinżamm aġġornata, filwaqt li tirrifletti l-konformità tagħhom mar-rekwiżiti stabbiliti fir-Regolament (UE) 2019/881 u, fejn applikabbli, mar-rekwiżiti speċifiċi jew addizzjonali skont skema Ewropea taċ-ċertifikazzjoni taċ-ċibersigurtà. Għal dak il-għan, huwa meħtieġ li l-NCCAs jinnotifikaw lill-Kummissjoni bi kwalunkwe bidla fin-notifika mingħajr dewmien żejjed, f’konformità mal-Artikolu 61(1) tar-Regolament (UE) 2019/881.

(4)

L-NCCAs huma responsabbli biex jiżguraw li l-korpi ta’ valutazzjoni tal-konformità jikkonformaw mar-Regolament (UE) 2019/881 u mal-iskemi Ewropej taċ-ċertifikazzjoni taċ-ċibersigurtà u f’dan il-kuntest jiżguraw l-akkuratezza tan-notifiki. Dawn l-attivitajiet huma soġġetti għal rieżami bejn il-pari, li l-eżitu tiegħu jenħtieġ li jgħin tiġi ddeterminata kwalunkwe bidla meħtieġa bil-għan li tissaħħaħ l-effettività tagħhom. L-NCCAs jistgħu jivverifikaw li korp ta’ valutazzjoni tal-konformità ma jibqax jikkonforma mar-rekwiżiti rilevanti wara li jkun tqajmilhom tħassib dwar dan f’ċirkostanzi differenti. Fejn applikabbli, is-sejbiet tal-mekkaniżmi ta’ rieżami bejn il-pari jenħtieġ li jappoġġaw lill-NCCAs fil-monitoraġġ tal-kompetenza kontinwa tal-korpi ta’ valutazzjoni tal-konformità notifikati. Barra minn hekk, jista’ jitqajjem tħassib dwar il-kompetenza kontinwa ta’ korpi ta’ valutazzjoni tal-konformità notifikati lill-NCCA notifikanti minn NCCAs oħra, mill-Kummissjoni jew minn partijiet ikkonċernati.

(5)

Meta tiddeċiedi li tissospendi, tirrestrinġi jew tirtira n-notifika ta’ korp ta’ valutazzjoni tal-konformità, l-NCCA notifikanti trid tikkoopera mal-korp nazzjonali tal-akkreditazzjoni maħtur skont ir-Regolament (KE) Nru 765/2008 tal-Parlament Ewropew u tal-Kunsill (5). Dan huwa f’konformità mar-Regolament (UE) 2019/881 li jipprevedi li l-NCCAs jenħtieġ li jassistu, jappoġġaw u jikkooperaw b’mod attiv mal-korpi nazzjonali tal-akkreditazzjoni fl-attivitajiet ta’ monitoraġġ u ta’ superviżjoni tagħhom. Ir-restrizzjoni tan-notifika jenħtieġ li tirreferi għal każ fejn jitnaqqas il-kamp ta’ applikazzjoni tal-akkreditazzjoni jew, fejn applikabbli, il-kamp ta’ applikazzjoni tal-awtorizzazzjoni, u b’hekk il-kamp ta’ applikazzjoni tan-notifika.

(6)

Skont l-Artikolu 54(1)(n) tar-Regolament (UE) 2019/881, kull skema Ewropea taċ-ċertifikazzjoni taċ-ċibersigurtà trid tinkludi, fejn applikabbli, ir-regoli dwar iż-żamma ta’ rekords minn korpi ta’ valutazzjoni tal-konformità. Għalhekk huwa meħtieġ li fil-każ ta’ restrizzjoni, sospensjoni jew irtirar tan-notifika, jew fejn il-korp ta’ valutazzjoni tal-konformità notifikat jkun temm l-attività tiegħu, l-NCCA notifikanti tiżgura li r-rekords ta’ dak il-korp ta’ valutazzjoni tal-konformità jinħażnu b’mod sigur u jinżammu għall-perjodu meħtieġ, kif preskritt skont skema Ewropea taċ-ċertifikazzjoni taċ-ċibersigurtà.

(7)

Il-miżuri previsti f’dan ir-Regolament huma f’konformità mal-opinjoni tal-kumitat stabbilit bl-Artikolu 66 tar-Regolament (UE) 2019/881,