AN COIMISIÚN EORPACH
An Bhruiséil,8.10.2026
COM(2026) 553 final
Moladh le haghaidh
MOLADH ÓN gCOMHAIRLE
Lena gceadaítear don Iodáil imeacht ó na huasrátaí fáis glanchaiteachais mar atá leagtha síos ag an gComhairle faoi Rialachán (AE) 2024/1263
(An clásal éalaithe náisiúnta a ghníomhachtú)
Moladh le haghaidh
MOLADH ÓN gCOMHAIRLE
Lena gceadaítear don Iodáil imeacht ó na huasrátaí fáis glanchaiteachais mar atá leagtha síos ag an gComhairle faoi Rialachán (AE) 2024/1263
(An clásal éalaithe náisiúnta a ghníomhachtú)
TÁ COMHAIRLE AN AONTAIS EORPAIGH,
Ag féachaint don Chonradh ar Fheidhmiú an Aontais Eorpaigh, agus go háirithe Airteagal 121 de,
Ag féachaint do Rialachán (AE) 2024/1263 ó Pharlaimint na hEorpa agus ón gComhairle maidir le beartais eacnamaíocha a chomhordú go héifeachtach agus maidir le faireachas buiséadach iltaobhach agus lena n‑aisghairtear Rialachán (CE) Uimh. 1466/97 ón gComhairle(), agus go háirithe Airteagal 26 de,
Ag féachaint don mholadh ón gCoimisiún Eorpach,
De bharr an mhéid seo a leanas:
(1)Rialachán (AE) 2024/1263, mar aon le Rialachán leasaithe (CE) Uimh. 1467/97(), agus le Treoir 2011/85/AE ón gComhairle() atá leasaithe, is croíghnéithe de chreat rialachais eacnamaíoch an Aontais iad. Is é is aidhm don chreat airgeadas poiblí atá fónta inbhuanaithe, mar aon le fás inbhuanaithe cuimsitheach agus athléimneacht, a chur chun cinn trí bhíthin athchóirithe agus infheistíochtaí, agus easnaimh iomarcacha rialtais a chosc. Leis an gcreat, cuirtear úinéireacht náisiúnta chun cinn agus dírítear ar an meántéarma agus, ina theannta sin, tá forfheidhmiú éifeachtach comhleanúnach na rialacha i gceist leis.
(2)Maidir leis na huasrátaí fáis glanchaiteachais a leagtar amach i moladh ón gComhairle i gcomhréir le hAirteagail 17(1), 19 nó 20 de Rialachán (AE) 2024/1263, is iad sin an táscaire oibriúcháin aonair le haghaidh an fhaireachais fhioscaigh bhliantúil a dhéantar ar gach Ballstát agus tá siad i gcroílár an chreata rialachais eacnamaíoch. Leis na huasrátaí fáis glanchaiteachais a leagtar amach sa Mholadh sin ón gComhairle, bunaítear srian buiséadach ar feadh 4 bliana nó 5 bliana, rud atá bunaithe ar thréimhse choigeartaithe 4 bliana ar féidir síneadh suas le 3 bliana breise a chur léi.
(3)Déantar foráil sa chreat maidir le solúbthacht i ndáil le cur i bhfeidhm na rialacha i gcás imthosca eisceachtúla nach bhfuil smacht ag na Ballstáit orthu agus a bhfuil tionchar mór acu ar an airgeadas poiblí, i gcomhréir le hAirteagal 26 de Rialachán (AE) 2024/1263 (‘clásail éalaithe náisiúnta’). Sa dara cás sin, arna iarraidh sin do Bhallstát agus ar mholadh ón gCoimisiún bunaithe ar a chuid anailíse, féadfaidh an Chomhairle, laistigh de 4 seachtaine ón moladh ón gCoimisiún, moladh a ghlacadh lena gceadófar do Bhallstát imeacht óna uasrátaí fáis glanchaiteachais arna leagan síos ag an gComhairle (i) i gcás imthosca eisceachtúla nach bhfuil smacht ag an mBallstát sin orthu, (ii) i gcás ina bhfuil tionchar mór ag na himthosca sin ar airgeadas poiblí an Bhallstáit lena mbaineann, agus (iii) ar choinníoll nach gcuirfear inbhuanaitheacht fhioscach i mbaol sa mheántéarma mar gheall ar an diall sin. Déanfaidh an Chomhairle teorainn ama a shonrú le haghaidh an diallta sin.
(4)Thug na Cinn Stáit nó Rialtais, nuair a tháinig siad le chéile in Versailles an 10 agus an 11 Márta 2022, gealltanas go ndéanfaí cumais chosanta Eorpacha a neartú i bhfianaise an fhogha mhíleata a thug an Rúis faoin Úcráin. Athdhearbhaíodh na haidhmeanna sin sa Chompás Straitéiseach um Shlándáil agus Cosaint. Sna Conclúidí ón gComhairle Eorpach maidir le cosaint Eorpach an 6 Márta 2025, chuir sí in iúl gur díol sásaimh di an rún atá ag an gCoimisiún a mholadh go ndéanfaí an clásal éalaithe náisiúnta faoin gComhshocrú Cobhsaíochta agus Fáis a ghníomhachtú, ar bhealach comhordaithe, mar bheart láithreach.
(5)Sa Teachtaireacht ón gCoimisiún an 19 Márta 2025(), d’iarr sé ar na Ballstáit uile úsáid a bhaint as an tsolúbthacht dá bhforáiltear leis an gclásal éalaithe náisiúnta ar bhealach comhordaithe d’fhonn an tionchar ar chumais chosanta an Aontais a uasmhéadú. Is é is aidhm don tsolúbthacht sin an t‑aistriú chuig leibhéil níos airde caiteachais ar chosaint a éascú ar choinníoll nach gcuirfí an inbhuanaitheacht fhioscach i mbaol sa mheántéarma. De réir na Teachtaireachta sin, dá ndéanfaí an clásal éalaithe náisiúnta a ghníomhachtú, cheadófaí do na Ballstáit imeacht ó na huasrátaí fáis glanchaiteachais arna leagan síos ag an gComhairle agus na pleananna fioscach-struchtúracha meántéarmacha á bhformhuiniú acu, nó, agus na conairí ceartaitheacha á mbunú acu faoin nós imeachta um easnamh iomarcach, a mhéid atá údar leis an diall sin mar gheall ar mhéadú ar chaiteachas cosanta i gcoibhneas leis an mbliain tagartha, agus a mhéid nach rachaidh an barrachas bliantúil le linn 2028 thar 1,5 % de OTI. Bheadh aon mhéadú thar an méid sin faoi réir na ngnáthmheasúnuithe ar chomhlíontacht. Tá gá leis an uasmhéid sin chun a áirithiú nach gcuirfear inbhuanaitheacht fhioscach i mbaol agus, an tráth céanna, chun go mbeidh na Ballstáit in ann tairbhiú den tsolúbthacht agus iad ag bogadh i dtreo leibhéal níos airde caiteachais cosanta. Cinnfear na méideanna beachta nuair a bheidh sonraí olltoraidh ar fáil, chun a áirithiú nach n‑úsáidfear an tsolúbthacht bhreise ach amháin chun na críche atá beartaithe di.
(6)Sa Teachtaireacht ón gCoimisiún an 3 Meitheamh 2026, d’fhógair an sé go bhféadfaí raon feidhme an chlásail éalaithe náisiúnta a leathnú chun freastal ar na bearta arna gcinneadh ag na Ballstáit tar éis an 28 Feabhra 2026 lena neartaítear athléimneacht struchtúrach chóras fuinnimh na hEorpa agus lena gcuirtear dlús leis an aistriú ó bhreoslaí iontaise (dá ngairtear ‘bearta slándála fuinnimh’ anseo feasta)(). An 18 Lúnasa 2026, d’fhoilsigh an Coimisiún Fógra ina raibh treoraíocht bhreise do na Ballstáit maidir le raon feidhme agus dearadh na solúbthachta breise le haghaidh bearta slándála fuinnimh (). Chun a áirithiú nach gcuirfear an inbhuanaitheacht fhioscach i mbaol, agus chun an méadú is gá ar an gcoigeartú fioscach a shrianadh i dtréimhsí ina dhiaidh sin, níl aon athrú ar an uasteorainn 1,5 % de OTI atá ann cheana agus tá feidhm aici maidir leis an tsolúbthacht a bhaineann le cosaint agus le fuinneamh araon. Thairis sin, níor cheart an tsolúbthacht a dheonaítear le haghaidh bearta slándála fuinnimh a bheith níos mó ná 0,3 % de OTI in aghaidh na bliana, agus níor cheart an tsolúbthacht charnach faoi dheireadh 2028 a bheith níos mó ná 0,6 % de OTI.
(7)Leis an Moladh ón gComhairle an 21 Eanáir 2025(), formhuiníodh conair ghlanchaiteachais na hIodáile. Ina theannta sin, leis an Moladh ón gComhairle an 21 Eanáir 2025(), bunaíodh conair cheartaitheach chaiteachais don Iodáil le haghaidh na mblianta go dtí 2026.
(8)An 11 Meán Fómhair 2026, chuir an Iodáil iarraidh faoi bhráid na Comhairle agus an Choimisiúin chun an clásal éalaithe náisiúnta a ghníomhachtú don chosaint agus do shlándáil fuinnimh.
(9)San iarraidh sin, cuireann an Iodáil i dtábhacht ar iarmhairtí chogadh foghach leanúnach na Rúise ar an Úcráin, lena n‑éilítear méadú mór ar chaiteachas cosanta. Is imthoisc eisceachtúil é sin nach bhfuil smacht ag na Ballstáit uirthi.
(10)San iarraidh sin, tuairiscíonn an Iodáil sonraí maidir le caiteachas cosanta iomlán go dtí 2026 (Tábla 1) agus tá sé beartaithe aici caiteachas cosanta breise suas le 0,9 pointe céatadáin de OTI a bheith ann faoi dheireadh 2028. Léireodh an méadú cláir infheistíochta ilbhliantúla nua agus caiteachas reatha breise araon, lena n‑áirítear costais phearsanra níos airde agus costais oibriúcháin eile. Dá bhrí sin, tá tionchar mór ag an méadú ar chaiteachas cosanta ar airgeadas poiblí na hIodáile agus cuireann sé le comhardú an rialtais a laghdú agus le fiachas rialtais a mhéadú.
Tábla 1: Caiteachas cosanta iomlán san Iodáil
|
|
2021 a
|
2022 a
|
2023 a
|
2024 a
|
2025 b
|
2026 b
|
|
Caiteachas cosanta iomlán rialtais ghinearálta (% de OTI)
|
1.4
|
1.2
|
1.2
|
1.3
|
1.3
|
1.3
|
Foinse: a: Eurostat. b: Faisnéis a thug an Iodáil don Chomhairle agus don Choimisiún.
(11)Déanann na húdaráis staidrimh náisiúnta agus Eurostat sonraí maidir le caiteachas cosanta rialtais ghinearálta a thiomsú agus a eisiúint, de réir Aicmiú Idirnáisiúnta Fheidhmeanna an Rialtais (COFOG) () faoi chuimsiú Chóras Eorpach na gCuntas Náisiúnta (CCE2010) (). Is iomchuí na sonraí sin a úsáid chun measúnú a dhéanamh ar thionchar an chaiteachais cosanta ar easnamh rialtais, ar fhiachas rialtais agus ar ghlanchaiteachas rialtais, agus ar choincheapa gaolmhara. Tá próiseas bailithe sonraí bunaithe ag Eurostat, i ndlúthchomhar leis na húdaráis staidrimh náisiúnta, atá ailínithe le ceanglais tuairiscithe a bhunaítear le Rialachán (CE) Uimh. 479/2009 ón gComhairle().
(12)Thairis sin, i gcás roinnt de na conarthaí le haghaidh trealamh míleata a shíneofar le linn thréimhse ghníomhachtaithe an chlásail éalaithe náisiúnta, d’fhéadfadh sé nach ndéanfaí an trealamh a sheachadadh go dtí céim níos déanaí, rud a d’fhágfadh nach n‑imreofaí tionchar ar an airgeadas poiblí go dtí go mbeidh tréimhse ghníomhachtaithe an chlásail caite. Chun an cás sin a chumhdach, ba cheart feidhm a bheith ag an tsolúbthacht a dheonaítear faoin gclásal éalaithe náisiúnta freisin maidir le caiteachas cosanta a bhaineann leis an seachadadh níos déanaí sin, ar choinníoll gur síníodh na conarthaí comhfhreagracha le linn thréimhse ghníomhachtaithe an chlásail agus go bhfanfaidh an caiteachas cosanta moillithe sin laistigh den uasteorainn fhoriomlán thuasluaite.
(13)Maidir leis an gcaiteachas a mhaoinítear le hiasachtaí arna soláthar faoi Rialachán (AE) 2025/1106 ón gComhairle an 27 Bealtaine 2025 lena mbunaítear an Ghníomhaíocht Slándála don Eoraip (SAFE) tríd an Ionstraim um an Tionscal Cosanta Eorpach a Atreisiú(), thairbheodh sé go huathoibríoch den tsolúbthacht thuasluaite. Chuige sin, maidir leis an gcaiteachas ar fad a bhaineann le cosaint a dhéanfaí faoi Ionstraim SAFE faoi na catagóirí ‘táirgí a bhaineann le cosaint’ agus ‘táirgí eile chun críoch cosanta’ mar a shainmhínítear i Rialachán (AE) 2025/1106, thuairisceodh na Ballstáit é sin do Eurostat.
(14)San iarraidh uaithi an 11 Meán Fómhair 2026, cuireann an Iodáil i dtábhacht freisin iarmhairtí na gníomhaíochta míleata i Murascaill na Peirse, rud a chuireann slándáil fuinnimh fhadtéarmach na hEorpa i mbaol. Is imthoisc eisceachtúil é sin nach bhfuil smacht ag an mBallstát uirthi agus éilíonn sé méadú mór ar chaiteachas rialtais chun an spleáchas ar bhreoslaí iontaise allmhairithe agus na leochaileachtaí a bhaineann leo a laghdú agus, ar an gcaoi sin, cuireann méadú den sórt sin ar chaiteachas rialtais leis an tslándáil fuinnimh.
(15)San iarraidh sin, cuireann an Iodáil i láthair liosta earnálacha ina bhfuil bearta slándála fuinnimh a mhaoinítear go náisiúnta, a cinneadh tar éis an 28 Feabhra 2026, beartaithe a bhfuil tionchar buiséadach díreach acu, arb é is aidhm dóibh an spleáchas ar bhreoslaí iontaise allmhairithe a laghdú agus slándáil na hEorpa a neartú. Tacaíonn na bearta atá beartaithe le hinfheistíochtaí, e.g., i leictriú cónaithe, feabhas a chur ar fheidhmíocht fuinnimh foirgneamh príobháideach agus poiblí agus saoráidí príobháideacha agus poiblí, lena n‑áirítear scoileanna, ollscoileanna agus saoráidí cúraim sláinte, réitigh fuinnimh in-athnuaite a chur in úsáid, lena n‑áirítear córais fhótavoltacha, dreasachtaí airgeadais spriocdhírithe agus scéimeanna ráthaíochta poiblí chun dícharbónú gníomhaíochtaí táirgiúla a chur chun cinn, infheistíochtaí in iompar iarnróid, iompar poiblí agus soghluaisteacht uirbeach inbhuanaithe, chomh maith le méadú ar ghiniúint fuinnimh in-athnuaite, stóráil fuinnimh, solúbthacht an chórais fuinnimh agus bithbhreoslaí. Ar bhonn réamh-mheasúnaithe, d’fhéadfadh na bearta sin atá beartaithe teacht faoi raon feidhme na solúbthachta don tslándáil fuinnimh. Leis an measúnú tosaigh sin, ní dhéantar réamhbhreith ar mheasúnuithe incháilitheachta a dhéanfaidh an Coimisiún amach anseo. Ba cheart na bearta a bheith spriocdhírithe agus costéifeachtach agus deartha chun an tionchar is mó is féidir a bheith acu ó thaobh a mhéid a rannchuidíonn siad leis an dícharbónú agus/nó le coigilteas fuinnimh. Mar shampla, ba cheart an feabhas ar fheidhmíocht fuinnimh foirgneamh poiblí agus príobháideach agus saoráidí poiblí agus príobháideacha a bheith uaillmhianach go leor, e.g. chun coigilteas fuinnimh a bhaint amach i bhfoirgnimh a chomhfhreagraíonn d’athchóirithe meánmhéide nó doimhne. Le bearta bonneagair iompair agus bearta chun tacú le dícharbónú gníomhaíochtaí táirgiúla, ba cheart, go háirithe, dlús a chur le leictriú na n‑earnálacha sin.
(16)Déanfaidh an Coimisiún measúnú ar incháilitheacht i dtéarmaí raon feidhme, breisíochta, spriocdhírithe, cost-éifeachtúlachta beart coincréiteach, agus a dtionchair bhuiséadaigh, mar chuid dá fhaireachas fioscach tráthrialta. Déantar é sin chun an tsolúbthacht a chinneadh a eascraíonn as bearta slándála fuinnimh ar cheart iad a chur san áireamh agus an cuntas rialaithe don Iodáil á leagan amach agus measúnú á dhéanamh ar chomhlíontacht leis na huasrátaí fáis glanchaiteachais a mholtar.
(17)Chuige sin, ba cheart don Iodáil tuarascáil a chur faoi bhráid an Choimisiúin dhá uair sa bhliain maidir le liosta na mbeart coincréiteach slándála fuinnimh a mheasann sí a bheith incháilithe do sholúbthacht faoin gclásal éalaithe náisiúnta agus fianaise a sholáthar maidir lena n‑incháilitheacht agus lena dtionchar buiséadach. An tuairisciú tráthrialta sin ar na bearta slándála fuinnimh, beidh sé ina chuid den phróiseas faireachais fhioscaigh leathbhliantúil. Ba cheart a áireamh i dtuairisciú an earraigh bearta agus a gcostas buiséadach don bhliain roimhe sin agus a réamhaisnéis don bhliain reatha, agus ba cheart a áireamh i dtuairisciú an fhómhair bearta don bhliain reatha, chomh maith le bearta don bhliain dár gcionn a glacadh nó a fógraíodh go hinchreidte le mionsonraí leordhóthanacha. Cuirfidh sé sin ar a chumas don Choimisiún na bearta coincréiteacha chun feabhas a chur ar an tslándáil fuinnimh a chur san áireamh ina fhaireachas fioscach, laistigh de na huasteorainneacha bliantúla agus carnacha 0,3 agus 0,6 faoin gcéad de OTI, faoi seach.
(18)Agus gach ní eile mar a chéile, beidh fiachas rialtais níos airde agus easnamh níos airde faoi dheireadh na tréimhse a chumhdaítear leis an gclásal éalaithe náisiúnta mar thoradh ar an méadú ar ghlanchaiteachas i gcaitheamh na tréimhse sin. Le réamh-mheastacháin tháscacha arna ndéanamh ag an gCoimisiún agus ar bhonn na toimhde go gcuirfear an méadú iomlán ar chaiteachas rialtais a cheadaítear leis an moladh seo (i.e. úsáid iomlán na huasteorann 1,5 % de OTI) i bhfeidhm ar bhonn líneach faoi 2028, tugtar le fios go mbeadh an cóimheas idir easnamh agus OTI agus an cóimheas idir fiachas agus OTI in 2028 1,1 pointe céatadáin agus 1,3 pointe céatadáin níos airde, faoi seach, ná mar a bheidís dá bhfásfadh glanchaiteachas i gcomhréir leis an gconair a leagtar amach le Moladh C/2025/651 ón gComhairle. Chuige sin, is dócha go mbeadh gá le coigeartú fioscach breise tar éis thréimhse ghníomhachtaithe an chlásail éalaithe náisiúnta chun ceanglais an chreata fhioscaigh a chomhlíonadh, lena n‑áirítear é sin a dhéanamh chun a áirithiú go gcuirfear nó go bhfanfaidh an cóimheas fiachais ar chonair anuas inchreidte, nó go bhfanfaidh sé ar leibhéil stuama faoi bhun 60 % de OTI sa mheántéarma agus go bhfanfaidh an t‑easnamh faoi bhun 3 % de OTI nó go dtabharfar faoi bhun an chéatadáin sin é agus go gcoinneofar faoi bhun an luacha tagartha é sa mheántéarma. Aithníonn an Iodáil go bhféadfadh sé, amach anseo, go mbeadh gá le beartais chun inbhuanaitheacht fhioscach agus comhlíonadh na rialacha fioscacha a chaomhnú sa mheántéarma mar gheall ar chaiteachas cosanta agus slándála fuinnimh atá níos airde ó thaobh struchtúir de. Leis an méadú teoranta réamh-mheasta ar leibhéil easnaimh agus fiachais arb é an clásal éalaithe náisiúnta is cúis leis, mar aon le gealltanas na hIodáile an coigeartú is gá a chur chun feidhme chun ceanglais uile an chreata fhioscaigh a chomhlíonadh sa chéad phlean eile, áirithítear go gcaomhnófar an inbhuanaitheacht fhioscach sa mheántéarma.
(19)Ní mhodhnaítear leis an moladh seo na sainmhínithe ar easnamh rialtais, ar fhiachas rialtais agus ar ghlanchaiteachas rialtais, agus ar choincheapa gaolmhara. Déanfaidh an Iodáil sonraí bunaithe ar na coincheapa sin a thiomsú agus a thuairisciú i gcomhréir le Rialachán (AE) 2024/1263, Rialachán (CE) Uimh. 479/2009 ón gComhairle () agus Rialachán (AE) Uimh. 549/2013().
AG MOLADH LEIS SEO:
1.
Go dtí 2028, ceadaítear don Iodáil imeacht ó na huasrátaí fáis glanchaiteachais a leagtar amach le Moladh C/2025/661 ón gComhairle(), mar aon leis na huasrátaí sin a shárú, a mhéid nach mó an glanchaiteachas atá de bhreis ar na huasrátaí fáis sin ná an méid seo a leanas:
(i)
suim na nithe seo a leanas:
(a)
an méadú ar an gcaiteachas cosanta mar chéatadán de OTI ó bhí 2024 ann (an bhliain tagartha);
(b)
costas buiséadach na mbeart incháilithe lena bhfeabhsaítear an tslándáil fuinnimh le linn na tréimhse 2026-2028, arna chaidhpeáil ag 0,3 faoin gcéad de OTI in aghaidh na bliana agus ag 0,6 faoin gcéad de OTI i dtéarmaí carnacha i gcaitheamh na tréimhse céanna;
(ii)
ar choinníoll nach mó an diall iomlán atá de bhreis ar na huasrátaí fáis glanchaiteachais ná 1,5 faoin gcéad de OTI.
2.
Sna blianta tar éis 2028, féadfaidh an Iodáil fós imeacht ó na huasrátaí fáis glanchaiteachais a leagtar amach le Moladh ón gComhairle i gcomhréir le hAirteagail 17, 19 nó 20 de Rialachán (AE) 2024/1263, mar aon leis na huasrátaí sin a shárú, a mhéid a bhaineann an glanchaiteachas atá de bhreis ar na huasrátaí fáis glanchaiteachais le seachadtaí trealaimh mhíleata ar síníodh conradh ina leith roimh dheireadh 2028 agus a mhéid a fhanann an glanchaiteachas sin laistigh den uasteorainn fhoriomlán thuasluaite.
3.
I gcomhréir le hAirteagal 22(7) de Rialachán (AE) 2024/1263, na dialltaí ó na huasrátaí fáis glanchaiteachais arna leagan síos ag an gComhairle agus a cheadaítear leis an Moladh seo, ní dhéanfar iad a thaifeadadh mar dhochair i gcuntas rialaithe na hIodáile.
4.
Chun a áirithiú go ndéanfar an caiteachas breise a thaifeadadh i gceart, áireoidh an Iodáil sonraí iarbhír agus sonraí beartaithe maidir le caiteachas cosanta iomlán (rannán 02 de COFOG), lena n‑áirítear maidir le hinfheistíocht chosanta (rannán 02 P.51 de COFOG)agus aon chaiteachas arna mhaoiniú le hiasachtaí SAFE nach gcumhdaítear in COFOG-02:
(a)
le haghaidh na mblianta 2021 go bliain t‑1 (agus bliain T mar an bhliain reatha) sa tuairisciú don Choimisiún (Eurostat) i gcomhréir le Rialachán (AE) Uimh. 479/2009 ón gComhairle;
(b)
le haghaidh na mblianta 2021 go bliain T (an bhliain reatha), i bpleananna fioscach-struchtúracha meántéarmacha náisiúnta agus i dtuarascálacha bliantúla ar dhul chun cinn i gcomhréir le hAirteagail 11(1) agus 15, agus 21(1) de Rialachán (AE) 2024/1263;
(c)
le haghaidh na mblianta T (an bhliain reatha) agus T+1, i ndréachtphleananna buiséadacha i gcomhréir le Rialachán (AE) Uimh. 473/2013 ó Pharlaimint na hEorpa agus ón gComhairle().
5.
Chun taifeadadh ceart a áirithiú, tá an Iodáil le bearta coincréiteacha lena bhfeabhsaítear an tslándáil fuinnimh a chur faoi bhráid an Choimisiúin chun críoch an mholta seo in 2026-2028. Agus na bearta coincréiteacha sin á dtuairisciú don Choimisiún, ba cheart an teimpléad tuairiscithe atá le soláthar ag an gCoimisiún a urramú, lena n‑áirítear faisnéis maidir le staid an chur chun feidhme, fianaise maidir lena n‑incháilitheacht, agus ba cheart an tuairisciú sin a chainníochtú ar bhealach trédhearcach agus stuama. Déanfar an tuairisciú dhá uair sa bhliain, san earrach faoin 15 Aibreán, agus san fhómhar, i gcomhthéacs dréachtphleananna buiséadacha, faoin 15 Deireadh Fómhair.
Is chuig Poblacht na hIodáile a dhírítear an moladh seo.
Arna dhéanamh sa Bhruiséil,
Thar ceann na Comhairle
An tUachtarán