(1)

Il-prodotti derivati minn GA21xMON810 (MON-ØØØ21-9xMON-ØØ81Ø-6) qamħirrun ġew innotifikati bħala l-prodotti eżistenti minn Monsanto Europe S.A (minn issa ‘il quddiem “in-notifkant”) taħt l-Artikolu 8(1)(b) u l-Artikolu 20(1)(b) tar-Regolament (KE) Nru 1829/2003 (minn issa ‘il quddiem “ir-Regolament”) u tniżżlu fir-Reġistru Komunitarju dwar l-ikel u l-għalf modifikat ġenetikament. L-ambitu tan-notifika jkopri addittivi ta’ l-ikel, materjali ta’ l-għalf u addittivi ta’ l-għalf prodotti minn MON-ØØØ21-9xMON-ØØ81Ø-6 qamħirrun.

(2)

Ma ngħata l-ebda kunsens għat-tqegħid fis-suq ta’ żrieragħ minn MON-ØØØ21-9xMON-ØØ81Ø-6 qamħirrun fil-Komunità. In-notifikant ta’ MON-ØØØ21-9xMON-ØØ81Ø-6 qamħirrun, f’ittra lill-Kummissjoni ddatata l-1 ta’ Marzu 2007, indika li l-2005 kienet l-aħħar sena ta’ bejgħ kummerċjali approvat ta’ żrieragħ ta’ MON-ØØØ21-9xMON-ØØ81Ø-6 qamħirrun fuq bażi globali.

(3)

In-notifikant indika wkoll lill-Kummissjoni li ma għandu l-ebda intenzjoni li jibgħat applikazzjoni għat-tiġdid ta’ l-awtorizzazzjoni ta’ prodotti derivati minn MON-ØØØ21-9xMON-ØØ81Ø-6 qamħirrun taħt ir-Regolament skond it-tieni sottoparagrafu ta’ l-Artikolu 8(4), l-Artikolu 11, it-tieni sottoparagrafu ta’ l-Artikolu 20(4), u l-Artikolu 23 rispettivament. Għalhekk prodotti derivati minn MON-ØØØ21-9xMON-ØØ81Ø-6 qamħirrun ma jistgħux jitpoġġew fis-suq fil-Komunità wara t-18 ta’ April 2007.

(4)

Miżuri sabiex jiġi assigurat l-irtirar effettiv mis-suq ta’ żrieragħ ta’ MON-ØØØ21-9xMON-ØØ81Ø-6 qamħirrun mhumiex meħtieġa minħabba li dawn iż-żrieragħ ma jistgħu qatt jitpoġġew legalment fis-suq fil-Komunità. Minħabba li n-notifikant waqaf ibigħ iż-żrieragħ ta’ MON-ØØØ21-9xMON-ØØ81Ø-6 qamħirrun wara l-istaġun tat-tħawwil ta’ l-2005, ħażniet ta’ prodotti derivati minn MON-ØØØ21-9xMON-ØØ81Ø-6 qamħirrun intużaw u mhumiex mistennija li jkunu preżenti fis-suq wara t-18 ta’ April 2007. Madankollu, traċċi żgħar ta’ MON-ØØØ21-9xMON-ØØ81Ø-6 qamħirrun jistgħu jibqgħu preżenti fi prodotti ta’ l-ikel jew ta’ l-għalf għal ċertu perjodu ta’ żmien.

(5)

Għal raġunijiet ta’ ċertezza legali, huwa għalhekk meħtieġ li jkun hemm perjodu tranżitorju ta’ żmien li tulu prodotti ta’ l-ikel jew ta’ l-għalf jista’ jkollhom tali materjal mingħajr ma jiġu kkunsidrati li jiksru l-Artikolu 4(2) jew l-Artikolu 16(2) tar-Regolament fejn din il-preżenza hija aċċidentali jew teknikament inevitabbli.

(6)

Il-livell ittollerat u l-perjodu ta’ żmien għandhom jiġu stabbiliti waqt li jitqies iż-żmien meħtieġ sakemm in-nuqqas ta’ disponibbiltà taż-żrieragħ jipproduċi l-effetti tiegħu f’kull parti tal-katina ta’ l-ikel u ta’ l-għalf. Fi kwalunkwe każ, il-livell ittollerat għandu jibqa’ taħt il-limitu ta’ l-ittikkettjar u ta’ traċċabilità ta’ mhux aktar minn 0.9 % stipulat bir-Regolament għall-preżenza aċċidentali jew teknikament inevitabbli fil-materjal modifikat ġenetikament fl-ikel u fl-għalf.

(7)

L-iskrizzjonijiet fir-Reġistru Komunitarju dwar l-ikel u l-għalf modifikat ġenetikament, kif stipulat fl-Artikolu 28 tar-Regolament, fir-rigward ta’ MON-ØØØ21-9xMON-ØØ81Ø-6 qamħirrun għandhom jiġu mmodifikati sabiex iqisu din id-Deċiżjoni.

(8)

In-notifikant ġie kkonsultat dwar il-miżuri stipulati f’din id-Deċiżjoni.

(9)

Il-miżuri stipulati f’din id-Deċiżjoni huma skond l-opinjoni tal-Kumitat Permanenti dwar il-Katina Alimentari u s-Saħħa ta’ l-Annimali,

(a)

dan sakemm din il-preżenza tkun aċċidentali jew teknikament inevitabbli; kif ukoll

(b)

fi proporzjon ta’ mhux aktar minn 0.9 %.