European flag

Iris Oifigiúil
an Aontais Eorpaigh

GA

Sraith L


2025/2558

16.12.2025

RIALACHÁN CUR CHUN FEIDHME (AE) 2025/2558 ÓN gCOMHAIRLE

an 15 Nollaig 2025

lena gcuirtear chun feidhme Rialachán (AE) 2017/1509 a bhaineann le bearta sriantacha i gcoinne Dhaon-Phoblacht Dhaonlathach na Cóiré

TÁ COMHAIRLE AN AONTAIS EORPAIGH,

Ag féachaint don Chonradh ar Fheidhmiú an Aontais Eorpaigh,

Ag féachaint do Rialachán (AE) 2017/1509 ón gComhairle an 30 Lúnasa 2017 a bhaineann le bearta sriantacha i gcoinne Dhaon-Phoblacht Dhaonlathach na Cóiré agus lena n-aisghairtear Rialachán (CE) Uimh. 329/2007 (1), agus go háirithe Airteagail 47 agus 47a de,

Ag féachaint don togra ó Ardionadaí an Aontais do Ghnóthaí Eachtracha agus don Bheartas Slándála,

De bharr an mhéid seo a leanas:

(1)

An 30 Lúnasa 2017, ghlac an Chomhairle Rialachán (AE) 2017/1509.

(2)

I gcomhréir le hAirteagal 47a(1) de Rialachán (AE) 2017/1509, rinne an Chomhairle athbhreithniú ar liostaí na ndaoine ainmnithe, na n-eintiteas ainmnithe, na gcomhlachtaí ainmnithe agus na soithí ainmnithe a leagtar amach in Iarscríbhinní XV, XVI, XVII agus XVIII a ghabhann leis an Rialachán sin.

(3)

Ba cheart na bearta sriantacha i gcoinne na ndaoine agus na n-eintiteas atá ar na liostaí a leagtar amach in Iarscríbhinní XV agus XVI a ghabhann le Rialachán (AE) 2017/1509 a choinneáil. Ba cheart na hiontrálacha le haghaidh duine amháin agus trí eintiteas sna hIarscríbhinní sin a thabhairt cothrom le dáta.

(4)

Dá bhrí sin, ba cheart Rialachán (AE) 2017/1509 a leasú dá réir sin,

TAR ÉIS AN RIALACHÁN SEO A GHLACADH:

Airteagal 1

Leasaítear Iarscríbhinní XV agus XVI a ghabhann le Rialachán (AE) 2017/1509 i gcomhréir leis an Iarscríbhinn a ghabhann leis an Rialachán seo.

Airteagal 2

Tiocfaidh an Rialachán seo i bhfeidhm an lá tar éis lá a fhoilsithe in Iris Oifigiúil an Aontais Eorpaigh.

Beidh an Rialachán seo ina cheangal go huile agus go hiomlán agus beidh sé infheidhme go díreach i ngach Ballstát.

Arna dhéanamh sa Bhruiséil, an 15 Nollaig 2025.

Thar ceann na Comhairle

An tUachtarán

K. KALLAS


(1)   IO L 224, 31.8.2017, lch. 1, ELI: http://data.europa.eu/eli/reg/2017/1509/oj.


IARSCRÍBHINN

Leasaítear Rialachán (AE) 2017/1509 mar a leanas:

(1)

Leasaítear Iarscríbhinn XV mar a leanas:

(a)

faoin gceannteideal ‘(a) Daoine nádúrtha arna n-ainmniú i gcomhréir le pointe (a) d’Airteagal 34(4)’, cuirtear an méid seo a leanas in ionad iontráil 10:

 

Ainm

Ailias

Faisnéis aitheantais

Dáta ainmniúcháin

Ráiteas ar Chúiseanna

‘10.

HONG Sung-Mu

홍승무

HONG Sung Mu

Dáta breithe: 1.1.1942

Inscne: fireann

20.5.2016

Leas-Stiúrthóir Roinn an Tionscail Muinisean (MID). Tá MID – a d’ainmnigh Comhairle Slándála na Náisiún Aontaithe an 2 Márta 2016 – rannpháirteach i ngnéithe lárnacha de chlár diúracán DPDC. Tá MID freagrach as maoirseacht a dhéanamh ar fhorbairt dhiúracáin bhailistíocha DPDC, lena n-áirítear cláir thaighde agus forbartha. Sa cháil sin dó, tá Hong freagrach as tacú le cláir DPDC a bhaineann le harmáin núicléacha, le diúracáin bhalaistíocha nó le harmáin ollscriosta eile nó as na cláir sin a chur chun cinn. Bhí sé i láthair ag lainseáil an diúracáin bhalaistíoch idir-ilchríochaigh Hwasong-15 an 28 Samhain 2017.

Ghlac sé páirt i gcruinniú de Choiste Lárnach Míleata Choimisiún Pháirtí Oibrithe na Cóiré i mí Iúil 2020, a bhí dírithe ar “dhíspreagadh cogaí”, sofhriotal a úsáidtear chun tagairt do chlár núicléach DPDC. Atoghadh ar Choiste Lárnach an Pháirtí i mí Eanáir 2021 é. I mí an Mhárta 2023, glacadh grianghraf de in éineacht le Kim Jong Un agus é ag déanamh iniúchadh ar shoic pléascáin núicléacha airbheartaithe a bhí réidh lena suiteáil ar dhiúracáin bhalaistíocha, agus i mí Mheán Fómhair 2024, glacadh grianghraf de in éineacht le Kim Jong Un agus é ag déanamh iniúchadh ar shaoráid saibhrithe úráiniam de chuid DPDC.’

(b)

faoin gceannteideal ‘(b) Daoine dlítheanacha, eintitis agus comhlachtaí arna n-ainmniú i gcomhréir le pointe (a) d’Airteagal 34(4)’, cuirtear an méid seo a leanas in ionad iontráil 4:

 

Ainm

Ailias

Suíomh

Dáta ainmniúcháin

Faisnéis eile

‘4.

Yongbyon Nuclear Scientific Research Centre

녕변 원자력 연구소

영변 원자력 연구소

 

 

22.12.2009

Saoráidí atá in ann ábhar inscoilte a tháirgeadh le haghaidh úsáidí míleata, lena n-áirítear imoibreoir 5MW (e), saoráid athphróiseála plútóiniam (saotharlann raidió-cheimiceach), imoibreoir éadromuisce agus saoráid saibhrithe úráiniam a tuairiscíodh. Tá an láraonad á chothabháil ag an mBiúró Ginearálta um Fhuinneamh Adamhach (eintiteas a d’ainmnigh CSNA an 16.7.2009). I mí an Mheithimh 2024, dúirt an Ghníomhaireacht Idirnáisiúnta do Fhuinneamh Adamhach (IAEA) gur thug siad faoi deara an sceitheadh uaineach uisce ó chóras fuaraithe LWR in Yongbyon ó mhí na Nollag 2023, i gcomhréir le hoibriú an LWR. Bhraith IAEA freisin tásca leanúnacha maidir le hoibriú an imoibreora 5MW(e) agus na saoráide saibhrithe le lártheifneoirí a tuairiscíodh. Ina thuarascáil ó mhí an Mhárta 2024, bhraith Painéal Saineolaithe na Náisiún Aontaithe gníomhaíocht shuntasach leanúnach in Yongbyon freisin. Dearbhaíodh le híomhánna satailíte a tógadh i rith 2025 oibríochtaí leanúnacha agus gur cuireadh roinnt tionscadail tógála nua i gcrích.’

(2)

In Iarscríbhinn XVI, faoin gceannteideal ‘(b) Daoine dlítheanacha, eintitis agus comhlachtaí’, cuirtear an méid seo a leanas in ionad iontrálacha 3 agus 8:

 

Ainm (agus ainmneacha féideartha eile)

Faisnéis aitheantais

Dáta ainmniúcháin

Cúiseanna

‘3.

Maritime Administrative Bureau

ar a dtugtar freisin Maritime Administration of DPR Korea

ar a dtugtar freisin DPRK National Maritime Supervision Bureau

조선민주주의인민공화국 국가해사감독국

Seoladh: Ryonhwa-2Dong, Central District, Pyongyang, DPDC

PO Box 416

Teileafón: 850-2-18111 Ex 8059

Facs: 850 2 381 4410

R-phost: mab@silibank.net.kp

Suíomh gréasáin: www.ma.gov.kp

16.10.2017

Chuidigh an Maritime Administrative Bureau le smachtbhannaí arna bhforchur ag Comhairle Slándála na Náisiún Aontaithe a sheachaint, lena n-áirítear trí shócmhainní eintiteas ainmnithe a athainmniú agus a athchlárú agus trí dhoiciméadú bréagach a sholáthar do shoithí atá faoi réir smachtbhannaí na Náisiún Aontaithe.

8.

Korea Paekho Trading Corporation

(Ar a dtugtar freisin: Joson Paekho Muyok Hoesa)

조선백호무역회사

Seoladh: Chongryu 3-dong, Taedonggang District, Pyongyang, Daon-Phoblacht Dhaonlathach na Cóiré

21.4.2022

Is cuideachta ealaíne í Paekho Trading Corporation a bhfuil baint aici le dealbha a thógáil thar lear, dealbha saothair ealaíne arna dtáirgeadh ag Paekho Art Studio a onnmhairiú, agus éascaíonn sí saothar aindleathach agus rochtain ar chórais airgeadais idirnáisiúnta. Díríonn sí go sonrach ar dheontais agus iasachtaí forbartha, chomh maith le hinfheistíocht dhíreach choigríche atá curtha in áirithe do thionscadail bhardasacha. Dá bhrí sin, bíonn sí ag teacht timpeall ar smachtbhannaí agus tá sí freagrach as tacaíocht airgeadais a thabhairt do chláir núicléacha agus bhalaistíocha DPDC. I mí Iúil 2024, chonacthas go raibh Paekho Trading Corporation rannpháirteach in aonach trádála de tháirgí DPDC in Vladivostok na Rúise, agus i mí na Samhna 2024, chonacthas go raibh sí rannpháirteach sa 16ú Aonach Trádála Idirnáisiúnta Fómhair Pyongyang.’


ELI: http://data.europa.eu/eli/reg_impl/2025/2558/oj

ISSN 1977-0839 (electronic edition)