European flag

Il-Ġurnal Uffiċjali
ta'l-Unjoni Ewropea

MT

Is-serje C


C/2025/2743

16.5.2025

Pubblikazzjoni ta’ komunikazzjoni tal-approvazzjoni ta’ emenda standard għall-ispeċifikazzjoni tal-prodott ta’ isem fis-settur tal-inbid kif imsemmi fl-Artikolu 5(4) tar-Regolament Delegat tal-Kummissjoni (UE) 2025/27 (1)

(C/2025/2743)

KOMUNIKAZZJONI TAL-APPROVAZZJONI TA’ EMENDA STANDARD

(Artikolu 24 tar-Regolament (UE) 2024/1143)

“Pessac-Léognan”

PDO-FR-A0162-AM02 — 10.3.2025

1.   Isem il-prodott

Pessac-Léognan

2.   Tip ta’ indikazzjoni ġeografika

☒

DOP

☐

IĠP

☐

IĠ

3.   Settur

☐

prodotti agrikoli

☒

inbejjed

☐

xarbiet spiritużi

4.   Pajjiż li għalih tappartjeni ż-żona ġeografika

Franza

5.   Isem tal-awtoritajiet ta’ pajjiż terz jew tal-grupp ta’ produtturi stabbilit jew residenti f’pajjiż terz li jikkomunika l-emenda standard lill-Kummissjoni

Ministère de l’Agriculture, de l’Alimentation, de la Pêche, de la Ruralité et de l’Aménagement du Territoire [Ministeru tal-Agrikoltura, l-Ikel, is-Sajd, l-Affarijiet Rurali u l-Ippjanar tal-Użu tal-Art]

6.   Kwalifika bħala emenda standard

L-emendi ta’ din l-ispeċifikazzjoni tal-prodott huma emendi standard, f’konformità mad-definizzjoni stabbilita fl-Artikolu 24(4) tar-Regolament (UE) 2024/1143.

Dawn l-emendi ma jitqisux bħala emendi tal-Unjoni skont it-tifsira tal-Artikolu 24(3) tar-Regolament (UE) 2024/1143. B’mod speċifiku, dawn:

a)

ma jinkludux bidla fl-isem jew fl-użu tal-isem, jew fil-kategorija ta’ prodott jew prodotti denominati mill-indikazzjoni ġeografika;

b)

ma jirriskjawx li jannullaw ir-rabta maż-żona ġeografika msemmija fid-dokument uniku;

c)

ma jinvolvux aktar restrizzjonijiet fuq il-kummerċjalizzazzjoni tal-prodott.

7.   Deskrizzjoni tal-emenda/i standard approvata/i

Tikkettar

Id-dispożizzjoni dwar l-unità ġeografika usa’ ġiet emendata biex tinkludi l-Vin de Bordeaux u l-Grand Vin de Bordeaux.

Din l-emenda taffettwa d-dokument uniku.

DOKUMENT UNIKU

1.   Isem/ismijiet

Pessac-Léognan

2.   Tip ta’ indikazzjoni ġeografika

DOP – Denominazzjoni ta’ Oriġini Protetta

3.   Kategoriji tal-prodotti tad-dielja kif elenkati fil-parti ii tal-anness vii tar-regolament (ue) nru 1308/2013

1.

Inbid

3.1.   Kodiċi tan-Nomenklatura Magħquda

—

22 — XARBIET, SPIRTI U ĦALL

2204 — inbid tal-għeneb frisk, inkluż l-inbejjed imqawwija; most tal-għeneb għajr dak tal-intestatura 2009

4.   Deskrizzjoni tal-inbid jew tal-inbejjed

1.   Inbejjed ħomor

DESKRIZZJONI QASIRA

L-inbejjed għandhom qawwa alkoħolika naturali minima skont il-volum ta’ 11 %. Wara l-arrikkiment, il-qawwa alkoħolika totali skont il-volum tal-inbejjed ħomor ma taqbiżx 13,5 %. Fl-istadju tal-imballaġġ, kull lott ta’ nbid aħmar ikollu kontenut ta’ aċidu maliku ta’ 0,3 grammi jew inqas għal kull litru. Fl-istadju tal-imballaġġ, il-kompożizzjoni tal-inbejjed ħomor tkun kif ġej:

—

kontenut ta’ zokkor fermentabbli (glukożju u fruttożju) ta’ 2 grammi jew inqas għal kull litru;

—

aċidità volatili ta’ mhux aktar minn 16,33 milliekwivalenti għal kull litru, jew 0,8 grammi għal kull litru espressi bħala H2SO4, jew 0,98 grammi għal kull litru espressi bħala aċidu aċetiku.

Il-kontenut totali ta’ aċidità u ta’ diossidu tal-kubrit huwa dak stabbilit fil-leġiżlazzjoni tal-UE. L-inbejjed ħomor huma prodotti prinċipalment mill-Cabernet Sauvignon N, il-varjetà tal-għeneb anċestrali tad-denominazzjonijiet ta’ oriġini protetta ta’ Bordeaux. Il-varjetà hija adattata perfettament għal din il-ħamrija biż-żrar li fiha tikseb sajran ottimali. Il-Cabernet Sauvignon N jipproduċi nbejjed ikkuluriti ħafna bi struttura tannika robusta, li huma kapaċi jitqaddmu għal bosta snin. L-inbejjed għandhom aromi kumplessi b’noti frekwenti ta’ ribes iswed li spiss, maż-żmien, jiżviluppaw noti affumikati u pikkanti ta’ ġilda u għanbaqar. Il-Cabernet Sauvignon N spiss jitħallat mal-Merlot N u l-Cabernet Franc N, varjetajiet li jġibu magħhom delikatezza u jżidu mal-eleganza tiegħu. Kultant jitħallat mal-Malbec, il-Petit Verdot N u l-Carmenère N, varjetajiet qodma ta’ Bordeaux li jżidu l-kumplessità tal-inbejjed.

Karatteristiċi analitiċi:

—

Qawwa alkoħolika totali massima (f’% tal-volum):

—

Qawwa alkoħolika effettiva minima (f’% tal-volum):

—

Aċidità totali minima: —

—

Aċidità volatili massima (f’milliekwivalenti għal kull litru): —

—

Total massimu ta’ diossidu tal-kubrit (f’milligrammi għal kull litru): —

2.   Inbejjed bojod

DESKRIZZJONI QASIRA

L-inbejjed għandhom qawwa alkoħolika naturali minima skont il-volum ta’ 11 %. Wara l-arrikkiment, il-qawwa alkoħolika totali skont il-volum tal-inbejjed bojod ma taqbiżx 13 %. Fl-istadju tal-imballaġġ, il-kompożizzjoni tal-inbejjed tkun kif ġej:

—

kontenut ta’ zokkor fermentabbli (glukożju u fruttożju) ta’ mhux aktar minn 4 grammi għal kull litru;

—

aċidità volatili ta’ mhux aktar minn 16,33 milliekwivalenti għal kull litru, jew 0,8 grammi għal kull litru espressi bħala H2SO4, jew 0,98 grammi għal kull litru espressi bħala aċidu aċetiku.

Il-kontenut totali ta’ aċidità u ta’ diossidu tal-kubrit huwa dak stabbilit fil-leġiżlazzjoni tal-UE. L-inbejjed bojod xotti jiġu prodotti prinċipalment mill-għeneb Sauvignon B u Semillon B. Meta jkunu għadhom ma mmaturawx, ġeneralment ikollhom kulur isfar lewn it-tiben u jkunu pjuttost ċari. It-togħma tagħhom hija ta’ frott, u huma vivaċi u vigorużi. L-inbejjed jitħalltu fi proporzjonijiet li jvarjaw mal-għeneb Sauvignon Gris G jew Muscadelle B, u għandhom fwieħa kumplessa. Maż-żmien jakkwistaw kulur dehbi sottili u jiżviluppaw aromi ta’ fjuri delikati ħafna, li kultant ifakkru fil-fjuri tal-lajm u fl-arbuxelli. Meta jimmaturaw kompletament, l-inbejjed bojod isiru aktar imlaħħma, rotondi u b’togħma persistenti.

Karatteristiċi analitiċi:

—

Qawwa alkoħolika totali massima (f’% tal-volum):

—

Qawwa alkoħolika effettiva minima (f’% tal-volum):

—

Aċidità totali minima: —

—

Aċidità volatili massima (f’milliekwivalenti għal kull litru): —

—

Total massimu ta’ diossidu tal-kubrit (f’milligrammi għal kull litru): —

5.   Prattiki tal-produzzjoni tal-inbid

a.   Prattiki enoloġiċi speċifiċi użati biex isir l-inbid jew biex isiru l-inbejjed, u r-restrizzjonijiet rilevanti għall-produzzjoni tagħhom

1.   

 

Prattika enoloġika speċifika

It-tekniki sottrattivi ta’ arrikkiment huma permessi għall-inbejjed ħomor sa rata ta’ konċentrazzjoni ta’ 15 %. Wara l-arrikkiment, il-qawwa alkoħolika totali skont il-volum tal-inbejjed bojod ma taqbiżx 13 %. Wara l-arrikkiment, il-qawwa alkoħolika totali skont il-volum tal-inbejjed ħomor ma taqbiżx 13,5 %.

Minbarra d-dispożizzjoni ta’ hawn fuq, il-prattiki enoloġiċi segwiti jridu jissodisfaw ir-rekwiżiti stabbiliti fil-livell tal-UE u fil-Kodiċi Rurali u tas-Sajd Marittimu.

2.   

 

Prattiki tal-kultivazzjoni

Id-densità minima tat-tħawwil tad-dwieli hija ta’ 6 500 pjanta għal kull ettaru. Id-distanza bejn il-flanni ma taqbiżx 1,6 metru u d-distanza bejn il-pjanti fl-istess flann tkun mill-inqas 0,8 metri.

Id-dwieli jinżabru sa mhux aktar tard mill-istadju tal-ftuħ tal-weraq (l-istadju 9 ta’ Lorenz), b’massimu ta’ 12-il għajn għal kull dielja mqassma kif ġej:

—

Żbir “qasir” (jew tar-rimjiet) u żbir “twil” (jew taz-zokk prinċipali): iz-zkuk prinċipali għandhom massimu ta’ seba’ għejun għall-varjetajiet Cabernet Sauvignon N, Cot N, Merlot N, Muscadelle B, Petit Verdot N u Semillon B. Għal Cabernet Franc N, Carmenère N u Sauvignon B, il-massimu huwa ta’ tmien għejun. Hemm massimu ta’ żewġ rimjiet, miżbura għal zokk prinċipali wieħed.

—

Iż-żbir tar-rimjiet isir jew fuq żewġ cordons jew “éventail” fuq erba’ partijiet.

F’konformità mal-Kodiċi Rurali u tas-Sajd Marittimu, l-irrigazzjoni matul l-istaġun tat-tkabbir tad-dwieli hija permessa biss jekk nixfa persistenti tfixkel l-iżvilupp fiżjoloġiku xieraq tad-dwieli u s-sajran tal-għeneb.

b.   Rendimenti massimi għal kull ettaru:

1.   

 

60 ettolitru għal kull ettaru

6.   Definizzjoni taż-żona demarkata

L-għeneb jinħasad u l-inbejjed jiġu prodotti, immaturati u imballati fit-territorju tal-muniċipalitajiet li ġejjin tad-département ta’ Gironde, abbażi tal-Kodiċi Ġeografiku Uffiċjali fis-seħħ fis-26 ta’ Frar 2020: Cadaujac, Canéjan, Gradignan, Léognan, Martillac, Mérignac, Pessac, Saint-Médard-d’Eyrans, Talence u Villenave-d’Ornon.

7.   Indikazzjoni tal-varjetà jew tal-varjetajiet ta’ għeneb tal-inbid li minnhom jiġi prodott l-inbid jew jiġu prodotti l-inbejjed

Cabernet Franc N

Cabernet Sauvignon N

Carmenère N

Cot N – Malbec

Merlot N

Muscadelle B

Petit Verdot N

Sauvignon B – Sauvignon Blanc

Sauvignon Gris G – Fié Gris

Semillon B

8.   Definizzjoni qasira taż-żona ġeografika demarkata

Iż-żona ġeografika tkopri l-parti tat-Tramuntana taż-żona tad-denominazzjoni ta’ oriġini protetta Graves. Tmiss ma’ Bordeaux lejn il-Punent u n-Nofsinhar tal-belt, fuq ix-xatt tax-xellug tax-Xmara Garonne.

Il-ħamrija karatteristika hija evidenza tar-rotot preċedenti tal-Garonne, li nbidlu fi tmiem l-Era Terzjarja u matul l-Era Kwaternarja b’riżultat tat-tidwib suċċessiv tal-glaċieri tal-Pyrénées. F’dak iż-żmien inġarru kwantitajiet kbar ta’ materjali u, skont il-qawwa tal-kurrenti u d-densità tas-sedimenti, ġew iddepożitati fuq dak li kien qiegħ il-baħar magħmul mill-ġebla tal-ġir u minn ġebel sedimentarju bil-konkilji. Il-proċess ta’ erożjoni pproduċa l-ħamrija li ġejja:

—

ħamrija ffurmata fuq żrar mikul bl-ilma jew ċagħaq, li tilħaq fond ta’ 3 metri jew aktar;

—

ħamrija ffurmata fuq tafal kalkarju, ramli u bil-konkilji, li tistrieħ fuq sodda ta’ ġebel tal-ġir imkisser u poruż.

Din il-kumplessità tal-ħamrija toħloq ambjent naturali rikk għad-denominazzjoni ta’ oriġini protetta.

F’pajsaġġ b’għoljiet baxxi, id-depożiti ta’ żrar jiffurmaw munzelli ddefiniti sew fil-pajsaġġ. L-għoljiet mhux weqfin ħafna jipprovdu skular naturali eċċellenti, megħjuna minn network kbir ta’ xmajjar żgħar li huma tributarji tal-Garonne.

Il-klima hija ġeneralment rappreżentattiva tal-Gironde, kiesħa u adattata għad-dwieli minħabba l-moderazzjoni tagħha u x-xita regolari. It-temperatura hija rregolata bis-saħħa tal-protezzjoni tal-parti tal-foresta ta’ Landes fid-département ta’ Gironde, fin-Nofsinhar, u fl-Oċean Atlantiku fil-Punent.

Iż-żona ġeografika għandha l-karatteristika partikolari li tinsab fil-periferija tal-belt ta’ Bordeaux, imdawra f’xi postijiet bl-iżviluppi urbani.

Waqt li bdiet tikber, il-belt bdiet tieħu xi art mill-vinji. Fiż-żona ġeografika unika li aktar tard saret iż-żona tad-denominazzjoni ta’ oriġini protetta Pessac-Léognan, bejn il-bidu tas-seklu 20 u s-snin 1970, intilfu aktar minn 3 000 ettaru ta’ vinji Graves, inklużi diversi mijiet ta’ kwalità “cru”. Sa dak iż-żmien kien għad fadal biss 550 ettaru.

Imbagħad, grupp ta’ vitikulturi żgħażagħ irnexxielhom jirreklamaw il-vinji u talbu li d-denominazzjoni ta’ oriġini kkontrollata Graves, kif kienet dak iż-żmien, tiġi ristrutturata. B’riżultat ta’ dan, bid-Digriet tad-9 ta’ Settembru 1987, id-denominazzjoni ta’ oriġini kkontrollata Pessac-Léognan ingħatat l-istess status bħad-denominazzjonijiet muniċipali ta’ Médoc. Dan irrikonoxxa l-karatteristiċi partikolari taż-żona ġeografika, li oriġinarjament kienet tappartjeni għat-terroir tad-denominazzjoni ta’ oriġini kkontrollata ta’ Graves u kienet parti integrali miż-żona ġeografika tiegħu.

Imkabbra fi klima marittima, mis-seklu 17 ’l hawn, id-dwieli kellhom bżonn jiġu appoġġati fuq il-bsaten. L-użu mifrux tal-kannizzati u l-metodu ta’ żbir strett biżżejjed irriżultaw fi ħsad distribwit sew u f’kopertura suffiċjenti għal fotosinteżi effettiva u sajran ottimali. B’mod simili, sabiex jiġi evitat rendiment eċċessiv fuq kull dielja u biex jiġu żgurati sajran u konċentrazzjoni ottimali fl-inbejjed, id-densità tat-tħawwil hija għolja.

Iż-żona demarkata għall-ħsad tal-għeneb tikkonsisti minn irqajja’ ta’ art ikkaratterizzati minn ħamrija biż-żrar sa ħamrija ramlija biż-żrar, iżda wkoll kultant ħamrija taflija bil-ġir. L-irqajja’ għandhom biżżejjed kapaċità ta’ skular jew minħabba l-permeabbiltà tagħhom jew inkella minħabba li jinsabu fuq l-għoljiet. L-irqajja’ li jinsabu fuq depożiti alluvjali reċenti, ramel jew sodda impermeabbli mhumiex eliġibbli.

Dawn l-irqajja’ ddefiniti bir-reqqa jippermettu l-iżvilupp ottimali tal-varjetajiet ta’ dwieli lokali li ġew magħżula maż-żmien għall-kwalitajiet ta’ preservazzjoni u tqaddim tagħhom. Dawn il-kwalitajiet jirriflettu l-fatt li, storikament, kien meħtieġ li l-inbejjed jiġu trasportati tul distanzi twal.

L-inbejjed ħomor jibbenefikaw minn żmien ta’ tqaddim twil, li huwa meħtieġ biex dawn jimmaturaw u jiksbu espressjoni ottimali qabel jitqiegħdu fis-suq għall-konsumaturi.

L-inbejjed bojod xotti mkabbra fuq il-ħamrija aktar ramlija jew ibbażata fuq it-tafal huma rfinati b’mod eċċezzjonali b’noti ta’ fjuri u ta’ frott, iżda mhux mingħajr freskezza.

Fil-port ta’ Bordeaux ġie stabbilit negozju ta’ suċċess li jittrasporta dawn l-inbejjed madwar id-dinja. Il-prossimità taż-żona tad-denominazzjoni tal-oriġini protetta fissret li l-Pessac-Léognan malajr kisbet reputazzjoni dinjija, u bbenefikat minn tekniki innovattivi, inkoraġġiet lill-azjendi biex jiżviluppaw u b’hekk ippermettiethom jevolvu filwaqt li jżommu prattiki antiki.

Kważi l-produtturi kollha ta’ Pessac-Léognan jipparteċipaw fil-bejgħ “en primeur” fi Place de Bordeaux, tradizzjoni karatteristika tal-inbejjed kbar ta’ Bordeaux. Il-bejgħ isir fir-rebbiegħa ta’ wara l-ħsad, bis-sensara, magħrufin lokalment bħala “courtiers”, jaġixxu bħala intermedjarji bejn is-sidien u n-negozjanti tal-inbid. Wara t-tranżazzjoni, l-inbid jibqa’ għand il-bejjiegħ u jinħażen u jiġi mmaturat sakemm ikun lest biex jiġi imballat.

9.   Rekwiżiti oħra applikabbli

Qafas legali:

Leġiżlazzjoni nazzjonali

Tip ta’ rekwiżit addizzjonali:

Imballaġġ fiż-żona ġeografika demarkata

Deskrizzjoni tar-rekwiżit:

Sabiex jiġu ppreservati l-karatteristiċi essenzjali u l-awtentiċità tal-inbejjed, dawn jiġu imballati fiż-żona ġeografika. L-imballaġġ isir jew fi fliexken tal-ħġieġ jew f’pakketti tal-vakwu li ma jgħaddix arja minnhom sa 5 litri. Dan isir fil-post fejn l-għeneb ikun inħasad u magħmul fi nbid. L-inbejjed ħomor jiġu mmaturati mill-inqas sal-15 ta’ Settembru tas-sena ta’ wara s-sena tal-ħsad. L-inbejjed bojod jiġu mmaturati mill-inqas sal-15 ta’ Marzu tas-sena ta’ wara s-sena tal-ħsad.

Qafas legali:

Leġiżlazzjoni nazzjonali

Tip ta’ rekwiżit addizzjonali:

Dispożizzjonijiet addizzjonali dwar it-tikkettar

Deskrizzjoni tar-rekwiżit:

L-unità ġeografika usa’ Vin de Graves, Grand Vin de Graves jew Vin de Bordeaux jew Grand Vin de Bordeaux tista’ tidher fuq kwalunkwe riċevitur, tikketta jew fuljett. Id-daqs tal-ittri tal-unità ġeografika usa’ ma għandux ikun akbar, fl-għoli jew fil-wisa’, minn żewġ terzi tad-daqs tal-ittri li jiffurmaw l-isem tad-denominazzjoni ta’ oriġini protetta.

Il-klassifikazzjoni Cru Classé de Graves tista’ tidher minflok l-unità ġeografika usa’ Vin de Graves jew Grand Vin de Graves diment li jiġu rispettati l-istess rekwiżiti rigward il-preżentazzjoni u d-daqs tal-ittri.

Link għall-ispeċifikazzjoni tal-prodott

https://info.agriculture.gouv.fr/boagri/document_administratif-eafa5b1a-119b-4042-814b-a0a10646c996


(1)  Ir-Regolament Delegat tal-Kummissjoni (UE) 2025/27 tat-30 ta’ Ottubru 2024 li jissupplimenta r-Regolament (UE) 2024/1143 tal-Parlament Ewropew u tal-Kunsill b’regoli dwar ir-reġistrazzjoni u l-protezzjoni tal-indikazzjonijiet ġeografiċi, l-ispeċjalitajiet tradizzjonali garantiti u t-termini tal-kwalità mhux obbligatorji u li jħassar ir-Regolament Delegat (UE) Nru 664/2014 (ĠU L, 2025/27, 15.1.2025, ELI: http://data.europa.eu/eli/reg_del/2025/27/oj).


ELI: http://data.europa.eu/eli/C/2025/2743/oj

ISSN 1977-0987 (electronic edition)