(1)

Fl-4 ta' Settembru 2014, il-Kummissjoni Ewropea (il-Kummissjoni) bdiet investigazzjoni ta' antidumping dwar l-importazzjonijiet ta' aċesulfam tal-potassju li joriġina mir-Repubblika Popolari taċ-Ċina (“il-pajjiż ikkonċernat” jew “ir-RPĊ”) kif ukoll ta' aċesulfam tal-potassju li joriġina mir-Repubblika Popolari taċ-Ċina li jinsab f'ċerti tħejjijiet u/jew taħlitiet. Il-Kummissjoni bdiet l-investigazzjoni fuq il-bażi tal-Artikolu 5 tar-Regolament tal-Kunsill (KE) Nru 1225/2009 (ir-Regolament bażiku) u ppubblikat Notifika ta' Bidu f'Il-Ġurnal Uffiċjali tal-Unjoni Ewropea (2) (in-Notifika ta' Bidu).

(2)

Il-Kummissjoni bdiet l-investigazzjoni wara lment ippreżentat fit-22 ta' Lulju 2014 minn Nutrinova Nutrition Specialties & Food Ingredients GmbH (l-ilmentatur) l-uniku produttur ta' aċesulfam tal-potassju (jew “Ace-K”) fl-Unjoni. L-ilmentatur b'hekk jirrappreżenta l-produzzjoni totali tal-Unjoni ta' Ace-K. L-ilment kien jinkludi evidenza ta' dumping u tad-dannu materjali li jirriżulta li kienet biżżejjed biex tiġġustifika l-bidu tal-investigazzjoni.

(3)

Fin-Notifika ta' Bidu, il-Kummissjoni stiednet lill-partijiet interessati jikkuntattjawha sabiex jipparteċipaw fl-investigazzjoni. Barra minn hekk, il-Kummissjoni speċifikament infurmat lill-ilmentatur, lill-produtturi esportaturi magħrufa u lill-awtoritajiet Ċinżi, lil importaturi, fornituri u utenti, negozjanti magħrufa, kif ukoll assoċjazzjonijiet magħrufa kkonċernati, dwar il-bidu tal-investigazzjoni, u stednithom jieħdu sehem.

(4)

Il-partijiet interessati kellhom l-opportunità li jikkummentaw dwar il-ftuħ tal-investigazzjoni u li jitolbu smigħ mal-Kummissjoni u/jew mal-Uffiċjal tas-Seduta fil-proċedimenti kummerċjali.

(5)

Fin-Notifika ta' Bidu, il-Kummissjoni infurmat lill-partijiet interessati li abbażi tal-informazzjoni fl-ilment, il-prodott ikkonċernat huwa magħruf li jiġi prodott biss fl-Unjoni u fir-RPĊ. Il-partijiet interessati ngħataw l-opportunità li jikkummentaw dwar dan. Ma sar l-ebda kumment.

(6)

Madankollu, il-Kummissjoni kkuntattjat lid-disa' pajjiżi terzi, li għalihom l-istatistika tal-Eurostat wriet li hemm esportazzjonijiet lejn l-Unjoni ta' prodotti li jaqgħu fl-istess kodiċijiet NM bħall-prodott ikkonċernat. Il-Kummissjoni talbet għall-assistenza tagħhom fl-identifikazzjoni ta' produtturi u/jew l-assoċjazzjonijiet tal-produtturi ta' Ace-K. L-ebda wieħed mill-pajjiżi terzi kkuntattjati ma seta' jidentifika l-produtturi ta' Ace-K. Għalhekk, l-ebda produzzjoni oħra għajr fl-Unjoni u fil-pajjiż ikkonċernat ma ġiet identifikata.

(7)

Fin-Notifika ta' Bidu, il-Kummissjoni indikat li hija tista' tieħu kampjuni mill-partijiet interessati skont l-Artikolu 17 tar-Regolament bażiku.

(8)

Biex tiddeċiedi jekk it-teħid ta' kampjuni kienx meħtieġ u, jekk iva, biex tagħżel kampjun, il-Kummissjoni talbet lill-importaturi mhux relatati biex jipprovdu l-informazzjoni speċifikata fin-Notifika ta' Bidu.

(9)

Minħabba l-għadd żgħir ta' tweġibiet, il-Kummissjoni ddeċidiet li l-kampjunar ma kienx meħtieġ.

(10)

Sabiex tiddeċiedi jekk il-kampjunar kienx meħtieġ u, jekk iva, biex tagħżel kampjun, il-Kummissjoni talbet lill-produtturi esportaturi fir-RPĊ sabiex jipprovdu l-informazzjoni speċifikata fin-Notifika ta' Bidu. Barra minn hekk, il-Kummissjoni talbet lill-Missjoni Permanenti tar-RPĊ għall-Unjoni sabiex tidentifika u/jew tikkuntattja lil produtturi esportaturi oħrajn, jekk hemm, li jistgħu jkunu interessati sabiex jieħdu sehem fl-investigazzjoni.

(11)

Erba' produtturi esportaturi fil-pajjiż ikkonċernat ipprovdew l-informazzjoni mitluba u qablu li jiġu inklużi fil-kampjun. Wieħed minn dawn il-produtturi esportaturi ma kellux bejgħ lejn l-Unjoni matul il-perjodu tal-investigazzjoni. Għalhekk, ma setax jiġi investigat u b'riżultat ta' dan, l-għadd ta' kumpaniji li kkooperaw kien ta' tlieta. Dan kien jgħodd għall-importazzjonijiet kollha lejn l-Unjoni tal-prodott ikkonċernat matul il-perjodu ta' investigazzjoni. Fid-dawl tal-għadd baxx ta' partijiet involuti, il-Kummissjoni ddeċidiet li l-kampjunar ma kienx neċessarju.

(12)

Għall-finijiet tal-Artikolu 2(7)(b) tar-Regolament bażiku, il-Kummissjoni bagħtet formoli għat-talbiet għal TES lit-tliet produtturi esportaturi li kkooperaw fil-pajjiż ikkonċernat. L-ebda wieħed mit-tliet produtturi esportaturi li kkooperaw ma ressaq talba għal TES.

(13)

Il-Kummissjoni bagħtet kwestjonarji lill-produttur tal-Unjoni, lit-tliet produtturi esportaturi li kkooperaw fil-pajjiż ikkonċernat, u lill-importaturi mhux relatati u l-utenti kollha li esprimew interess fl-investigazzjoni.

(14)

Waslu tweġibiet għall-kwestjonarju mingħand il-produttur tal-Unjoni, it-tliet produtturi esportaturi li kkooperaw fil-pajjiż ikkonċernat, tliet importaturi mhux relatati u utent wieħed.

(15)

Il-Kummissjoni fittxet u vverifikat l-informazzjoni kollha li tqieset neċessarja għal determinazzjoni provviżorja ta' dumping, id-dannu li jirriżulta u l-interess tal-Unjoni. Iż-żjarat ta' verifika skont l-Artikolu 16 tar-Regolament bażiku saru fil-bini tal-kumpaniji li ġejjin:

Il-produttur tal-Unjoni

Importaturi

L-utenti

Il-produtturi esportaturi fil-pajjiż ikkonċernat

(16)

L-investigazzjoni tad-dumping u tad-dannu kopriet il-perjodu bejn l-1 ta' Lulju 2013 u t-30 ta' Ġunju 2014 (“il-perjodu tal-investigazzjoni”). L-analiżi tax-xejriet rilevanti għall-valutazzjoni tad-dannu kopriet il-perjodu bejn Jannar tal-2011 sa tmiem il-perjodu tal-investigazzjoni (“il-perjodu kkunsidrat”).

(17)

Il-prodott ikkonċernat huwa l-aċesulfam tal-potassju (melħ tal-potassju ta' 6-metil-1,2,3-oksatijażin-4(3H)-one-2,2-diossidu; CAS RN 55589-62-3) li joriġina mir-RPĊ, kif ukoll aċesulfam tal-potassju li joriġina mir-RPĊ li jinsab f'ċerti tħejjijiet u/jew taħlitiet li jinkludu wkoll dolċifikanti oħrajn u/jew ilma (il-prodott taħt investigazzjoni), li bħalissa jaqa' taħt il-kodiċi(jiet) NM ex 2106 90 92 , ex 2106 90 98 , ex 2934 99 90 (Kodiċi TARIC 2934 99 90 21), ex 3824 90 92 , ex 3824 90 93 u ex 3824 90 96 (il-prodott ikkonċernat). L-aċesulfam tal-potassju huwa komunement magħruf bħala Aċesulfam K jew Ace-K.

(18)

Ace-K jintuża bħala sustanza li tagħti l-ħlewwa sintetika f'firxa wiesgħa ta' applikazzjonijiet, pereżempju f'ikel, xorb, u prodotti farmaċewtiċi.

(19)

Ace-K prodott u mibjugħ fl-Unjoni mill-industrija tal-Unjoni, instab li għandu l-istess karatteristiċi fiżiċi u kimiċi bażiċi kif ukoll l-istess użi bażiċi bħala Ace-K prodott fil-pajjiż ikkonċernat u mibjugħ għall-esportazzjoni lejn l-Unjoni. Għalhekk jitqiesu simili skont it-tifsira tal-Artikolu 1(4) tar-Regolament bażiku.

(20)

Skont l-Artikolu 2(7)(b) ta' dak ir-Regolament, il-Kummissjoni tiddetermina l-valur normali skont l-Artikolu 2(1) sa (6) tar-Regolament bażiku għal produtturi esportaturi fir-RPĊ li jikkonformaw mal-kriterji fl-Artikolu 2(7)(c) tar-Regolament bażiku u li għalhekk jistgħu jingħataw TES.

(21)

Madankollu, l-ebda wieħed mill-produtturi esportaturi li kkooperaw ma applikaw għal TES kif intqal ukoll fil-premessa 12.

(22)

F'konformità mal-Artikolu 2(7)(a) tar-Regolament bażiku, il-valur normali kellu jiġi ddeterminat abbażi tal-prezzijiet f'ekonomija tas-suq xierqa ta' pajjiż terz (il-pajjiż analogu), jew il-prezz minn tali pajjiż terz għal pajjiżi oħra, inkluża l-Unjoni, jew, fejn dan ma kienx possibbli, fuq kwalunkwe bażi oħra raġonevoli, inkluż il-prezz imħallas realment jew li għandu jitħallas fl-Unjoni għall-prodott simili, aġġustat b'mod xieraq jekk meħtieġ biex jinkludi marġni ta' profitt raġonevoli.

(23)

Fin-nuqqas tat-tielet pajjiż analogu, kif spjegat fil-premessa 6, il-valur normali kien ibbażat fuq il-prezzijiet effettivament imħallsa jew pagabbli fl-Unjoni għall-prodott simili. Kien identifikat il-bejgħ mill-produttur tal-Unjoni ta' dawk it-tipi ta' prodotti li jaqblu ma' dawk mibjugħa fis-suq tal-Unjoni minn produtturi Ċiniżi li kkooperaw waqt il-perjodu tal-investigazzjoni. Il-bejgħ tal-produttur tal-Unjoni lil klijenti indipendenti nstab li kien rappreżentattiv meta espress bħala proporzjon tal-volum totali ta' esportazzjonijiet tal-prodott ikkonċernat kif ukoll għal kull tip ta' prodott. Il-bejgħ ta' dawn it-tipi ta' prodotti mill-produttur tal-Unjoni kien profittabbli. Il-prezzijiet medji tal-bejgħ tagħhom fl-Unjoni serva bħala l-valur normali.

(24)

Il-produtturi esportaturi li kkooperaw esportaw lejn l-Unjoni direttament lil klijenti indipendenti. Għalhekk, il-prezz tal-esportazzjoni kien il-prezz attwalment imħallas jew li jista' jitħallas għall-prodott ikkonċernat meta mibjugħ għall-esportazzjoni lejn l-Unjoni, skont l-Artikolu 2(8) tar-Regolament bażiku.

(25)

Il-Kummissjoni qabblet il-valur normali u l-prezz tal-esportazzjoni tal-produtturi esportaturi li kkooperaw fuq bażi ta' prezz mill-fabbrika.

(26)

Fejn dan kien iġġustifikat mill-ħtieġa li jiġi żgurat tqabbil ġust, il-Kummissjoni aġġustat il-valur normali u/jew il-prezz tal-esportazzjoni għad-differenzi li jaffettwaw il-prezzijiet u l-komparabilità tal-prezzijiet skont l-Artikolu 2(10) tar-Regolament bażiku.

(27)

B'mod partikolari, il-Kummissjoni għamlet aġġustament għal differenzi fil-livell ta' kummerċ kif ġie stabbilit li l-uniku produttur tal-Unjoni biegħ prinċipalment lill-utenti filwaqt li l-produtturi Ċiniżi biegħu l-iktar lil negozjanti. It-tieni, abbażi ta' bosta sottomissjonijiet, sar aġġustament għad-differenza fil-kwalità u l-perċezzjoni tas-suq ta' din id-differenza bejn il-produttur Ċiniż tal-Ace-K u l-produttur tal-Unjoni tal-Ace-K. Barra minn hekk, il-valur normali kien aġġustat għal ċerta riċerka u żvilupp eċċezzjonali (R&Ż) kif ukoll spejjeż ta' kummerċjalizzazzjoni sostnuti mill-produttur tal-Unjoni matul il-perjodu ta' investigazzjoni. Dawn l-ispejjeż huma diskussi f'aktar dettall fil-premessa 67.

(28)

Għal kull wieħed mill-produtturi esportaturi li kkooperaw, il-Kummissjoni qabblet il-prezzijiet medji peżati għal kull tip ta' prodott esportat mal-valur normali medju peżat, skont l-Artikolu 2(11) u (12) tar-Regolament bażiku.

(29)

Fuq din il-bażi, il-marġnijiet ta' dumping medju peżat provviżorju, espress bħala perċentwal tal-prezz CIF fil-fruntiera tal-Unjoni, bid-dazju mhux imħallas, huma kif ġej:

(30)

Għall-produtturi esportaturi kollha l-oħrajn fil-pajjiż ikkonċernat, il-Kummissjoni stabbiliet il-marġini tad-dumping fuq il-bażi tal-fatti disponibbli skont l-Artikolu 18 tar-Regolament bażiku. Għal dan il-għan, il-Kummissjoni ddeterminat il-livell ta' kooperazzjoni tal-produtturi esportaturi. Il-livell ta' kooperazzjoni huwa l-volum ta' esportazzjonijiet tal-produtturi esportaturi li kkooperaw lejn l-Unjoni espress bħala proporzjon tal-volum totali ta' esportazzjoni — kif irrapportat fl-istatistika tal-importazzjonijiet tal-Eurostat — mill-pajjiż ikkonċernat lejn l-Unjoni.

(31)

Il-livell ta' kooperazzjoni f'dan il-każ huwa għoli minħabba li l-esportazzjonijiet tal-produtturi esportaturi li kkooperaw lejn l-Unjoni kienu jikkostitwixxu l-esportazzjonijiet totali lejn l-Unjoni matul il-perjodu tal-investigazzjoni. Abbażi ta' dan, il-Kummissjoni ddeċidiet li tibbaża l-marġni ta' sussidju residwali fil-livell tal-kumpanija li kkooperat fil-kampjun mal-ogħla marġni ta' sussidju.

(32)

Il-marġni provviżorju tad-dumping mogħti bħala perċentwal tal-prezz CIF fil-fruntiera tal-Unjoni, bid-dazju mhux imħallas, huwa għalhekk 97,8 %.

(33)

L-analiżi tikkonċerna kumpanija waћda biss. Għalhekk, għal raġunijiet ta' kunfidenzjalità l-biċċa l-kbira tal-indikaturi huma mogħtija f'forma ta' indiċi jew firxiet.

(34)

Il-prodott simili kien manifatturat minn produttur tal-Unjoni matul il-perjodu ta' investigazzjoni, li jikkostitwixxi l-industrija tal-Unjoni skont it-tifsira tal-Artikolu 4(1) tar-Regolament bażiku.

(35)

Il-Kummissjoni stabbiliet il-konsum tal-Unjoni fuq il-bażi tad-dejta pprovduta mill-industrija tal-Unjoni, l-istatistika tal-esportazzjoni Ċiniża u d-dejta tal-produtturi esportaturi Ċiniżi. Id-dejta tal-Eurostat ma kinitx adattata għal dan l-għan minħabba li l-prodott ikkonċernat huwa importat taħt bosta kodiċijiet tan-NM, flimkien ma' ħafna prodotti oħra. Fin-nuqqas ta' produzzjoni Ace-K fi kwalunkwe pajjiż terz, l-importazzjonijiet kollha lejn l-Unjoni kienu mir-RPĊ.

(36)

Il-konsum tal-Unjoni żviluppa kif ġej:

Tabella 1

Il-konsum tal-Unjoni (f'tunnellati metriċi)

(37)

Il-konsum Ace-K fl-Unjoni żdied b'madwar 4 % matul il-perjodu kkunsidrat, allegatament minħabba żieda fid-domanda ta' prodotti mingħajr zokkor fl-Unjoni. Fl-aħħar sena tal-perjodu kkunsidrat kien hemm tnaqqis fil-konsum minħabba żieda fil-kompetizzjoni kkawżata minn sustanzi oħrajn (ġodda) li jagħtu l-ħlewwa. Madankollu, dan it-tnaqqis jidher li huwa ta' natura temporanja u ma kien hemm l-ebda indikazzjoni ċara fil-fajl li d-domanda għal Ace-K se tkompli tonqos fis-snin li ġejjin.

(38)

Il-Kummissjoni stabbiliet il-volum tal-importazzjonijiet Ċiniżi fuq il-bażi tal-istatistika tal-esportazzjoni Ċiniża kontraverifikata mad-dejta pprovduta mit-tliet produtturi esportaturi mir-RPĊ li jirrappreżentaw il-volum totali tal-esportazzjonijiet tal-prodott ikkonċernat matul il-perjodu ta' investigazzjoni.

(39)

Importazzjonijiet lejn l-Unjoni u s-sehem mis-suq mir-RPĊ żviluppaw kif ġej:

Tabella 2

Volum ta' importazzjoni (f'tunnellati metriċi) u s-sehem mis-suq

(40)

Il-livell tal-importazzjonijiet minn dawn il-pajjiżi żdied b'14 % matul il-perjodu kkunsidrat. Matul l-istess perjodu, is-sehem mis-suq tal-importazzjonijiet Ċiniżi żdied ukoll, b'10 % biex laħaq 65 % — 80 % matul il-perjodu ta' investigazzjoni.

(41)

Il-Kummissjoni stabbiliet il-prezzijiet tal-importazzjonijiet fuq il-bażi tad-dejta miksuba mill-produtturi li kkooperaw mir-RPĊ. Il-prezz medju peżat CIF f'Euro għal kull kilo ta' importazzjonijiet lejn l-Unjoni mir-RPĊ żviluppa hekk:

Tabella 3

Prezzijiet tal-importazzjoni CIF mir-RPĊ (EUR/kg)

(42)

Il-prezzijiet medji tal-importazzjonijiet mir-RPĊ naqsu b'mod konsistenti matul il-perjodu meqjus bi 30 %.

(43)

Il-Kummissjoni ddeterminat it-twaqqigħ tal-prezz matul il-perjodu tal-investigazzjoni billi qabblet:

(44)

Il-medja ponderata tal-prezz tal-industrija tal-Unjoni tqabbel mal-prezzijiet medji ponderati korrispondenti għal kull tip ta' prodott tal-importazzjonijiet mill-produtturi esportaturi li kkooperaw għal tranżazzjonijiet fl-istess livell ta' kummerċ, wara tnaqqis ta' ribassi u skontijiet kif ukoll wara l-aġġustamenti tal-prezzijiet tal-industrija tal-Unjoni għad-differenza fil-kwalità u perċezzjoni tas-suq tiegħu u R&Ż u spejjeż ta' kummerċjalizzazzjoni għall-istess raġunijiet bħal dawk imsemmija fil-premessa 27 hawn fuq. Ir-riżultat tat-tqabbil ingħata bħala perċentwal tal-fatturat tal-produtturi tal-Unjoni fil-kampjun matul il-perjodu tal-investigazzjoni. Il-Kummissjoni sabet medja tat-twaqqigħ tal-prezzijiet b'medja ponderata bejn 18 % u 45 % mill-importazzjonijiet mir-RPĊ fis-suq tal-Unjoni.

(45)

Skont l-Artikolu 3(5) tar-Regolament bażiku, l-eżaminazzjoni tal-impatt tal-importazzjonijiet oġġett ta' dumping fl-industrija tal-Unjoni kienet tinkludi evalwazzjoni tal-indikaturi ekonomiċi kollha li influwenzaw l-istat tal-industrija tal-Unjoni matul il-perjodu kkunsidrat. Għad-determinazzjoni tad-dannu, il-Kummissjoni ma għamlitx distinzjoni bejn l-indikaturi tad-dannu makroekonomiċi u dawk mikroekonomiċi peress li l-uniku produttur tal-Unjoni kien jikkostitwixxi l-industrija tal-Unjoni fit-tifsira tal-Artikolu 4(1) tar-Regolament bażiku. Il-Kummissjoni evalwat l-indikaturi ekonomiċi fuq il-bażi tad-dejta relatata mal-produttur tal-Unjoni uniku. Id-dejta nstabet li tirrappreżenta s-sitwazzjoni ekonomika tal-industrija tal-Unjoni.

(46)

L-indikaturi ekonomiċi huma: il-produzzjoni, il-kapaċità tal-produzzjoni, l-utilizzazzjoni tal-kapaċità, il-volum tal-bejgħ, is-sehem mis-suq, it-tkabbir, l-impjiegi, il-produttività, il-kobor tal-marġni ta' dumping u l-irkupru minn dumping tal-passat, il-prezzijiet medji ta' unità, il-kost unitarju, il-kostijiet tal-manodopera, l-inventarji, il-profittabbiltà, il-fluss tal-flus, l-investimenti, ir-redditu fuq l-investimenti u l-abbiltà li jiġi ġġenerat il-kapital. Dawn huma analizzati kif ġej.

(47)

Il-produzzjoni totali tal-Unjoni, il-kapaċità tal-produzzjoni u l-użu tal-kapaċità żviluppaw matul il-perjodu taħt kunsiderazzjoni kif ġej:

Tabella 4

Il-produzzjoni, il-kapaċità produttiva u l-użu tal-kapaċità

(48)

Il-volum ta' produzzjoni tal-industrija tal-Unjoni naqas b'mod konsistenti, b'31 %. Fil-fatt, matul il-perjodu kkunsidrat, il-produttur tal-Unjoni wettaq dejjem aktar għeluq tal-faċilitajiet ta' produzzjoni sabiex jitnaqqsu l-ispejjeż. Matul il-perjodu ta' investigazzjoni, il-fabbrika, għal dik ir-raġuni, ingħalqet għal erba' xhur sħaħ.

(49)

Il-kapaċità tal-produzzjoni tal-industrija tal-Unjoni baqgħet l-istess matul il-perjodu kkunsidrat, peress li ħafna mill-ispejjeż huma fissi, indipendentement mill-kapaċità. Konsegwentement, l-użu tal-kapaċità naqas b'konformità mal-volum tal-produzzjoni.

(50)

Il-volum tal-bejgħ tal-industrija tal-Unjoni fl-Unjoni lil klijenti mhux relatati u s-sehem mis-suq żviluppaw b'mod negattiv matul il-perjodu kkunsidrat:

Tabella 5

Volum tal-bejgħ u sehem mis-suq

(51)

Matul il-perjodu ikkunsidrat, il-volum ta' bejgħ tal-produtturi tal-Unjoni naqas b'mod ġenerali bi 13 %, għalkemm il-konsum żdied matul dak il-perjodu. Din ix-xejra negattiva tinkludi perjodu ta' rkupru ta' volum żgħir mill-2013 sal-perjodu ta' investigazzjoni li jista' jinkiseb biss permezz ta' kuntratti ma' prezzijiet tal-bejgħ li xekkel ulterjorment il-vijabbiltà tal-industrija tal-Unjoni.

(52)

Is-sehem mis-suq tal-industrija tal-Unjoni wkoll naqas, b'16 %, matul il-perjodu kkunsidrat, kemm minħabba klijenti li bidlu fornitur u lill-klijenti bi provvista doppja li żdied is-sehem ta' xiri mir-RPĊ.

(53)

Huwa ċar li t-tkabbir tal-industrija tal-Unjoni kien negattiv meta wieħed iżomm f'moħħu t-tnaqqis imsemmi qabel fis-sehem tas-suq u ż-żieda fil-konsum imsemmija fil-premessa 37.

(54)

L-impjiegi u l-produttività żviluppaw kif ġej tul il-perjodu kkunsidrat:

Tabella 6

L-Impjiegi u l-Produttività

(55)

Mill-2011 sa tmiem il-perjodu tal-investigazzjoni, l-industrija tal-Unjoni naqqset il-persunal tagħha bi kważi wieħed minn kull ħamsa biex tlaħħaq ma' tnaqqis fil-produzzjoni u skont l-għeluq temporanju. Il-produttività żdiedet b'6 % matul l-istess perjodu bħala konsegwenza tat-tnaqqis fl-għadd ta' impjegati.

(56)

L-ispejjeż medji tal-manodopera tal-industrija tal-Unjoni żviluppaw kif ġej matul il-perjodu kkunsidrat:

Tabella 7

Spejjeż medji tal-manodopera għal kull impjegat

(57)

L-ispejjeż tal-manodopera medji tal-industrija tal-Unjoni għal kull impjegat żdiedu bi 15 % matul il-perjodu kkunsidrat minħabba li kienu dovuti ħlasijiet għal terminazzjonijiet bħala riżultat tat-tnaqqis fil-persunal (ara l-premessa 54). Barra minn hekk, allegatament rati ġodda ta' pagi kienu applikabbli fis-settur tal-kimiċi.

(58)

Il-marġnijiet kollha tad-dumping kienu sinifikanti (ara l-premessa 29 hawn fuq). L-impatt tad-daqs tal-marġnijiet attwali tad-dumping fuq l-industrija tal-Unjoni kien sostanzjali, meta jitqies il-volum u l-prezzijiet tal-importazzjonijiet mir-RPĊ.

(59)

Din hi l-ewwel investigazzjoni antidumping dwar il-prodott ikkonċernat. Għalhekk, ma kienx hemm dejta disponibbli biex tevalwa l-effetti possibbli ta' dumping fil-passat.

(60)

Il-prezzijiet medji ponderati tal-bejgħ ta' unità tal-produtturi tal-Unjoni lill-klijenti mhux relatati fl-Unjoni żviluppaw kif ġej:

Tabella 8

Prezzijiet tal-bejgħ fl-Unjoni

(61)

Il-prezz tal-bejgħ medju tal-industrija tal-Unjoni tal-prodott simili naqas bi 12 % fil-perjodu meqjus, parzjalment wara xejra negattiva ħafna tal-prezzijiet medji tal-importazzjoni mir-RPĊ (ara l-premessa 42).

(62)

L-ispiża medja tal-industrija tal-Unjoni tal-produzzjoni żdiedet b'19 %. Dan kien ikkawżat prinċipalment mill-impatt miżjud tal-ispejjeż fissi fuq it-tnaqqis fil-volum ta' produzzjoni u bejgħ u b'żieda fil-prezz tal-materja prima.

(63)

Il-livelli tal-istokk tal-industrija tal-Unjoni żviluppaw matul il-perjodu kkunsidrat kif ġej:

Tabella 9

Inventarji

(64)

Għalkemm l-istokks tal-għeluq naqsu fil-perjodu kkunsidrat minħabba għeluq temporanju ta' faċilitajiet ta' produzzjoni biex jitnaqqsu l-ispejjeż (ara l-premessa 48), bħala perċentwal tal-produzzjoni, il-ħażniet żdiedu.

(65)

Il-profittabbiltà, il-fluss tal-flus, l-investimenti u r-redditu fuq l-investimenti tal-produtturi tal-Unjoni żviluppaw matul il-perjodu kkunsidrat kif ġej:

Tabella 10

Profittabbiltà, fluss tal-flus, investimenti u redittu fuq l-investimenti

(66)

Il-Kummissjoni stabbiliet il-profittabilità tal-industrija tal-Unjoni billi l-profitt nett qabel it-taxxa tal-bejgħ tal-prodott simili lil klijenti mhux relatati fl-Unjoni ġie espress bħala perċentwal tal-fatturat ta' dak il-bejgħ. Fil-kalkolu tal-profittabilità, il-Kummissjoni naqqset mill-ispejjeż rapportati l-ispejjeż kollha ta' R&Ż u ta' kummerċjalizzazzjoni li hija qieset li kienu ta' natura eċċezzjonali, kif issemma wkoll fil-premessa 27 hawn fuq. Mingħajr dan it-tnaqqis, l-industrija tal-Unjoni tkun laħqet sitwazzjoni ta' telf matul il-perjodu ta' investigazzjoni. Bħala riżultat tat-tnaqqis tal-profittabilità, il-fluss tal-flus nett, l-investimenti u r-redditu fuq l-investimenti naqas ukoll.

(67)

L-industrija tal-Unjoni sostniet li l-ispejjeż ta' R&Ż u ta' kummerċjalizzazzjoni li tnaqqsu kienu normali, spejjeż rikorrenti relatati mal-prodott ikkonċernat. Madankollu, l-investigazzjoni kkonkludiet li dawn l-ispejjeż huma relatati ma' prodott ġdid, għalkemm prodott li jaqa' fl-ambitu tal-prodott ta' din l-investigazzjoni. Dawn l-ispejjeż eċċezzjonali u għoljin ma jseħħux b'mod normali jew f'sena rappreżentattiva għall-industrija tal-Unjoni. Barra minn hekk, dawn l-ispejjeż jikkonċernaw ir-R&Ż u l-kummerċjalizzazzjoni ta' prodott li ma ġiex mibjugħ f'volumi sinifikanti fis-suq tal-Unjoni matul il-perjodu kkunsidrat.

(68)

Anke b'esklużjoni tal-ispejjeż imsemmija hawn fuq, il-profittabilità tal-produtturi tal-Unjoni naqset f'daqqa u b'mod konsistenti matul il-perjodu kkunsidrat. Il-Kummissjoni kkunsidrat il-livell ta' profittabilità matul il-perjodu ta' investigazzjoni u x-xejra ta' profittabilità li jkun ta' dannu minħabba t-tnaqqis ċar u sostanzjali deskritt hawn fuq.

(69)

It-tnaqqis qawwi fil-profittabilità kien prinċipalment minħabba l-allokazzjoni ta' żieda fl-ispejjeż fissi b'mod kostanti għal kull tunnellata metrika, meta mqabbla ma' tnaqqis fil-volum ta' produzzjoni u bejgħ. Barra minn hekk, kien hemm tnaqqis ċar fil-prezzijiet medji, li wasslu għan-nuqqas ta' ħila tal-industrija tal-Unjoni li żżomm il-livelli tal-profitti u b'riżultat ta' dan, il-profitabbilità naqset b'mod drammatiku. Kif muri fit-Tabella 10 hawn fuq, l-indikaturi l-oħra ta' prestazzjoni segwew xejra simili għal redditu fuq id-dħul.

(70)

Il-fluss tal-flus nett huwa l-ħila tal-produtturi tal-Unjoni li jiffinanzjaw l-attivitajiet tagħhom huma stess. Espressi bħala indiċi, ix-xejra tal-fluss tal-flus nett żviluppat b'mod negattiv matul il-perjodu kkunsidrat, naqset b'22 % bħala konsegwenza tat-tnaqqis fil-profittabilità.

(71)

L-investimenti tal-industrija tal-Unjoni naqsu b'mod aktar sinifikanti. Il-volum ta' investimenti matul il-perjodu ta' investigazzjoni kien biss madwar terz tal-volum ta' investimenti fl-2011. Fir-rigward tal-profittabilità, l-investimenti f'prodott ġdid ma ttieħdux inkonsiderazzjoni għal dan il-kalkolu.

(72)

Ir-redditu fuq l-investimenti huwa l-profitt f'perċentwal tal-valur nett skont il-kotba tal-investimenti. Dan naqas b'mod qawwi u b'mod konsistenti mill-2011 sal-perjodu ta' investigazzjoni, bi tnaqqis ta' madwar 75 %.

(73)

Minħabba li huwa parti minn grupp internazzjonali kbir, l-uniku produttur tal-Unjoni ma ddikjarax li l-abbiltà tiegħu li jiġġenera kapital kien s'issa ġie affettwat mill-iżviluppi ta' hawn fuq. Madnakollu, l-industrija tal-Unjoni għamlitha ċara matul il-proċedura li s-sitwazzjoni attwali ma kinitx sostenibbli.

(74)

Ġew osservati xejriet negattivi sinifikanti f'dawn l-indikaturi ekonomiċi li ġejjin: il-produzzjoni, l-utilizzazzjoni tal-kapaċità, is-sehem tas-suq, l-impjiegi, il-volum tal-bejgħ u l-prezzijiet tal-bejgħ fis-suq tal-Unjoni. Il-ħażniet (bħala perċentwal tal-produzzjoni) żdiedu għalkemm dawn naqsu f'termini assoluti. L-impatt ta' prezzijiet tal-bejgħ li jonqsu b'mod konsistenti flimkien ma' tnaqqis fil-volum tal-bejgħ ġenerali kien sostanzjali, li jwassal għal tnaqqis konsiderevoli b'sehem tas-suq, profitt, ritorn fuq investiment u fluss ta' flus kontanti.

(75)

Il-fatt li s-suq tal-Unjoni huwa ddominat minn atturi kbar fis-settur tal-ikel u x-xorb u li dan il-kummerċ isir permezz ta' kuntratti annwali jfisser li f'dan is-settur l-industrija tal-Unjoni hija partikolarment sensittiva għal tnaqqis fil-volumi tal-bejgħ u prezzijiet saħansitra jekk dan it-tnaqqis jikkonċerna numru żgħir ta' klijenti.

(76)

Il-produttività min-naħa l-oħra tjiebet. Madankollu, l-iżvilupp kien konsegwenza ta' tnaqqis fin-numru ta' impjegati minħabba t-tnaqqis fid-domanda u, konsegwentement, il-produzzjoni, li wasslet għas-sensja ta' ħaddiema. Għalhekk, taħt dawn iċ-ċirkustanzi, iż-żieda fil-produttività ma tistax tiġi kkunsidrata bħala element pożittiv.

(77)

Il-konsum fl-Unjoni żdied ukoll. Madankollu, l-industrija tal-Unjoni ma kinitx kapaċi tibbenefika minnu minħabba t-tnaqqis kemm fil-volum tal-bejgħ kif ukoll fil-prezzijiet tal-bejgħ imsemmija hawn fuq.

(78)

Parti interessata kkontestat l-eżistenza ta' dannu. Din il-parti argumentat li s-sitwazzjoni tal-industrija tal-Unjoni matul il-perjodu ta' investigazzjoni kienet normali. Din iddikjarat li l-industrija tal-Unjoni kienet tilfet il-protezzjoni tal-privattivi u sussegwentement il-pożizzjoni dominanti tagħha fis-suq. Għalhekk, issa għandha taċċetta profitti u volumi tal-bejgħ aktar baxxi.

(79)

Dan l-argument ma kellux bażi. Il-privattiva prinċipali tal-produzzjoni skadiet fl-2005 (żewġ privattivi iżgħar skadew qabel u wara dik id-data). Wara l-iskadenza tal-privattiva tal-produzzjoni fl-2005, u ferm qabel il-perjodu kkunsidrat, atturi ġodda daħlu fis-suq, jiġifieri l-produtturi esportaturi Ċiniżi, u l-preżenza tagħhom żdiedet b'mod gradwali minn dak iż-żmien 'l hawn. Fl-2009, ferm qabel il-bidu tal-perjodu kkunsidrat, is-sehem mis-suq tal-industrija tal-Unjoni niżel mill-pożizzjoni attwali dominanti tiegħu għal inqas minn 50 %. Sal-2011, fil-bidu tal-perjodu kkunsidrat, is-sehem mis-suq tal-importazzjonijiet Ċiniżi fis-suq tal-Unjoni diġà kien qabeż sew is-sehem mis-suq tal-industrija tal-Unjoni. Għalhekk, tabilħaqq l-iskadenza ta' protezzjoni tal-privattiva fl-2005 wasslet għal suq ta' aktar minn attur wieħed.

(80)

Barra minn hekk, il-qagħda ta' dannu ġiet analizzata matul il-perjodu kkunsidrat, jiġifieri minn 2011 sa 2014 jew sa sitt snin wara l-iskadenza tal-privattiva ta' produzzjoni. L-iżvilupp tal-maġġoranza tal-indikaturi tad-dannu matul dak il-perjodu (2011 — il-perjodu ta' investigazzjoni) kien estremament negattiv għall-industrija tal-Unjoni. B'mod aktar speċifiku, hija kienet tilfet sehem mis-suq, naqqset il-prezzijiet tal-bejgħ tagħha, esperjenzat tnaqqis qawwi fil-profittabilità u fil-bqija tal-indikaturi finanzjarji eżaminati iktar 'il fuq, naqset il-produttività, sar neċessarju li jingħalqu postijiet tal-produzzjoni sabiex jitnaqqsu l-ispejjeż u ma rriżultaw ebda benefiċċji minn żieda fil-konsum kif spjegat fil-premessa 74 hawn fuq. Tali sitwazzjoni ekonomika ma tistax tiġi sempliċement spjegata mill-possibbiltà għal atturi ġodda li jidħlu fis-suq, li hija riżultat tal-iskadenza ta' protezzjoni tal-privattiva. Fi kwalunkwe każ, din is-sitwazzjoni ma tistax titqies normali f'dan is-sens ta' sitwazzjoni sostenibbli u pożittiva. L-ewwel nett, il-privattiva ta' produzzjoni skadiet ferm qabel il-perjodu kkunsidrat u għalhekk kien hemm żmien biżżejjed għall-industrija tal-Unjoni biex tirreaġixxi għan-nuqqas ta' protezzjoni. It-tieni nett, anki jekk l-iskadenza ta' protezzjoni tal-privattiva tista' tkun immarkata b'ċertu tnaqqis fil-prestazzjoni, il-livelli ta' indikaturi ta' dannu matul il-perjodu ta' investigazzjoni stess huma konsiderevolment baxxi għal industrija sostenibbli u pożittiva. Barra minn hekk, minkejja dan it-telf ta' protezzjoni tal-privattiva, l-industrija tal-Unjoni żammet is-sitwazzjoni ekonomika u finanzjarja b'saħħitha sal-2011.

(81)

Fuq din il-bażi, l-argument li l-industrija tal-Unjoni ma ġarrbitx dannu għandha tiġi miċħuda. L-iskadenza ta' protezzjoni tal-privattiva, madankollu, qed tkompli tiġi analizzata bħala fattur li jikkontribwixxi għad-dannu li ġarrbet l-industrija tal-Unjoni.

(82)

Fuq il-bażi ta' dak li ntqal aktar 'il fuq, il-Kummissjoni f'dan l-istadju kkonkludiet li l-industrija tal-Unjoni sofriet dannu materjali skont it-tifsira tal-Artikolu 3(5) tar-Regolament bażiku.

(83)

Skont l-Artikolu 3(6) tar-Regolament bażiku, il-Kummissjoni eżaminat jekk l-importazzjonijiet li huma l-oġġett ta' dumping mill-pajjiż ikkonċernat ikkawżawx dannu materjali lill-industrija tal-Unjoni. Skont l-Artikolu 3(7) tar-Regolament bażiku, il-Kummissjoni eżaminat ukoll jekk fatturi oħrajn magħrufa setgħux fl-istess ħin ikunu ta' dannu lill-industrija tal-Unjoni. Il-Kummissjoni żgurat li kwalunkwe dannu possibbli kkawżat minn fatturi oħra għajr l-importazzjonijiet li huma l-oġġett ta' dumping mill-pajjiż ikkonċernat ma kienx attribwit lill-importazzjonijiet li huma l-oġġett ta' dumping. Dawn il-fatturi huma: (a) il-prestazzjoni tal-industrija tal-Unjoni fuq is-swieq tal-esportazzjoni, (b) it-telf ta' protezzjoni tal-privattivi u (c) l-istrateġija tan-negozju tal-industrija tal-Unjoni.

(84)

Id-deterjorament tas-sitwazzjoni tal-industrija tal-Unjoni matul il-perjodu kkunsidrat ħabat maż-żieda fl-importazzjonijiet bi prezzijiet li huma l-oġġett ta' dumping li joriġinaw mir-RPĊ. Matul il-perjodu kkunsidrat il-volumi tal-importazzjoni żdiedu b'14 % u l-prezzijiet tagħhom waqgħu b'30 %. Dan irriżulta f'żieda ta' 10 % fis-sehem tas-suq għall-esportaturi Ċiniżi. Fl-istess ħin, l-industrija tal-Unjoni tilfet sehem mis-suq, il-prezzijiet tal-bejgħ tagħha kienu mmexxija 'l isfel u l-volumi tal-bejgħ żviluppaw ukoll b'mod negattiv.

(85)

B'mod partikolari, il-marġnijiet ta' twaqqigħ kbir fil-prezzijiet ta' bejn 18 u 45 % huma indikaturi ulterjuri li l-importazzjonijiet li huma l-oġġett ta' dumping mill-pajjiżi kkonċernati eżerċitaw pressjoni sinifikanti fuq il-prezzijiet tal-prezzijiet tal-industrija tal-Unjoni.

(86)

It-tnaqqis fil-volumi tal-bejgħ naqqas il-kapaċità tal-industrija tal-Unjoni li tassorbi l-ispejjeż fissi. L-importazzjonijiet bi prezzijiet baxxi mill-pajjiż ikkonċernat wasslu bie l-industrija tal-Unjoni ma tkunx tista' iżżomm il-livelli tal-profitt u b'riżultat ta' dan, il-profitabbilità naqset b'mod drammatiku (ara t-Tabella 10).

(87)

L-industrija tal-Unjoni u partijiet interessati oħra allegaw li l-akbar żewġ produtturi esportaturi Ċiniżi kienu involuti fi“gwerra tal-prezzijiet” matul il-perjodu kkunsidrat u li kien hemm tentattiv ta' akkwiżizzjoni. Fil-fatt, kmieni fl-2015, ftit wara l-perjodu ta' investigazzjoni, wieħed minn dawn il-produtturi esportaturi li kkooperaw, Suzhou Hope Technology Co., Ltd, applika għal protezzjoni minn falliment skont il-liġi Ċiniża. Żvilupp ta' tnaqqis konsistenti u kontinwu tal-prezzijiet tal-akbar żewġ esportaturi Ċiniżi wassal fir-realtà għal prezzijiet tal-bejgħ f'livelli mhux sostenibbli. Dawn il-prezzijiet naqqsu sew il-prezzijiet tal-industrija tal-Unjoni u b'risultat is-sitwazzjoni tal-industrija tal-Unjoni iddeterjorat ukoll. Jiġifieri f'termini ta' produzzjoni, l-utilizzazzjoni tal-kapaċità, is-sehem tas-suq, l-impjiegi, il-volum tal-bejgħ u l-prezzijiet tal-bejgħ fis-suq tal-Unjoni.

(88)

Fuq il-bażi ta' dan ta' hawn fuq, il-Kummissjoni kkonkludiet li d-deterjorament tal-istat tal-industrija tal-Unjoni ħabat maż-żieda sostanzjali fl-importazzjonijiet bi prezzijiet dumped u li dawn l-importazzjonijiet kellhom rwol determinanti fid-dannu materjali li ġarrbet l-industrija tal-Unjoni. Il-prezzijiet tal-bejgħ tal-produtturi esportaturi naqsu bi 30 % matul il-perjodu ta' investigazzjoni. Billi kontinwament naqqsu l-prezz tal-bejgħ tal-unità matul il-perjodu kkunsidrat, il-produtturi mill-pajjiżi kkonċernati rnexxielhom iżidu s-sehem mis-suq tagħhom. Minħabba l-koinċidenza stabbilita b'mod ċar fiż-żmien bejn, fuq naħa waħda, il-livell ta' importazzjonijiet oġġett ta' dumping bi prezzijiet jonqsu kontinwament u, min-naħa l-oħra, it-telf ta' volum ta' bejgħ u d-depressjoni tal-prezzijiet tal-industrija tal-Unjoni, wieħed jikkonkludi li l-importazzjonijiet dumped kienu responsabbli għas-sitwazzjoni dannuża tal-industrija tal-Unjoni.

(89)

Il-volum u l-medja tal-prezzijiet tal-esportazzjonijiet tal-industrija tal-Unjoni żviluppat kif ġej matul il-perjodu taħt kunsiderazzjoni:

It-Tabella 11

Il-prestazzjoni tal-esportazzjoni tal-industrija tal-Unjoni

(90)

Il-prestazzjoni tal-esportazzjoni tal-industrija tal-Unjoni kienet simili għall-bejgħ tagħha fis-suq tal-Unjoni f'termini ta' volum, għalkemm il-prezzijiet inżammu f'livelli ogħla meta espressi f'euro. Id-differenza fl-iżvilupp tal-prezzijiet jista' jiġi parzjalment attribwit għall-iżvilupp tar-rata tal-kambju bejn l-Euro u d-Dollaru Amerikan fil-perjodu kkunsidrat. Il-Kummissjoni għalhekk tikkonkludi li minkejja li l-prestazzjoni tal-esportazzjoni kienet ukoll negattiva, din ma tispjegax id-dannu mġarrab mill-industrija tal-Unjoni fis-suq tal-Unjoni.

(91)

Uħud mill-partijiet interessati qalu li d-dannu li ġarrbet l-industrija tal-Unjoni tista' tiġi spjegata minn nuqqas tal-protezzjoni tal-privattivi tan-negozju Ace-K mill-uniku produttur tal-Unjoni. Dan l-argument ma għandux bażi. Kif spjegat fil-premessa 79 hawn fuq, b'mod partikulari wara l-iskadenza tal-privattiva ta' produzzjoni fl-2005, atturi ġodda daħlu fis-suq, jiġifieri l-produtturi esportaturi Ċiniżi, u l-preżenza tagħhom żdiedet b'mod gradwali minn dak iż-żmien 'l hawn. Fl-2009, ferm qabel il-bidu tal-perjodu kkunsidrat, is-sehem tas-suq tal-industrija tal-Unjoni kien waqa' minn pożizzjoni dominanti mogħtija bi protezzjoni tal-privattivi għal inqas minn 50 %. Sal-2011, fil-bidu tal-perjodu kkunsidrat, is-sehem mis-suq tal-importazzjonijiet Ċiniżi fis-suq tal-Unjoni fil-biċċa l-kbira qabeż is-sehem mis-suq tal-industrija tal-Unjoni. Għalhekk, tabilħaqq l-iskadenza tal-protezzjoni tal-privattivi wasslet għal suq ta' aktar minn attur wieħed.

(92)

Madankollu, l-investigazzjoni stabbiliet l-eżistenza ta' dannu materjali lill-industrija tal-Unjoni. Minħabba l-konklużjonijiet ta' dannu, huwa meqjus li l-industrija tal-Unjoni żammet is-sitwazzjoni ekonomika u finanzjarja b'saħħitha sal-2011 u bdiet tiddeterjora wara. Jiġifieri sitt snin wara l-iskadenza tal-produzzjoni tal-privattiva jew wara perjodu ta' żmien twil biżżejjed għall-industrija tal-Unjoni biex tirreaġixxi. Għalhekk, ma ma hemmx raġunti valida li s-sitwazzjoni tal-industrija tal-Unjoni ddeterjorat minħabba li kien hemm aktar atturi fis-suq. Is-sitwazzjoni tal-industrija tal-Unjoni pjuttost marret għall-agħar minħabba strateġiji l-ipprezzar li applikaw dawk l-atturi l-ġodda li wasslu għaż-żieda fil-volum ta' importazzjoni bi prezz baxx insostenibbli u t-twaqqigħ sostanzjali fil-prezz.

(93)

Għalhekk, il-Kummissjoni f'dan l-istadju kkonkludiet li t-telf tal-protezzjonijiet tal-privattivi ma kkontribwiex għad-dannu mġarrab mill-industrija tal-Unjoni.

(94)

Parti interessata ddikjarat li d-dannu mġarrab mill-industrija tal-Unjoni kien spjegat bid-deċiżjoni tagħha li żżomm il-pożizzjoni tagħha fis-suq tal-Unjoni bħala manifattur ta' prodotti ta' kwalità għolja. Għall-kuntrarju, l-investigazzjoni kkonkludiet li din l-istrateġija żgurat is-sopravivenza tagħha. Li tipprova tikkompeti biss fuq il-prezz kien iwassal għall-għeluq tan-negozju tal-Ace-K minħabba li l-prezzijiet tal-importazzjoni oġġett ta' dumping naqsu għal livelli insostenibbli. Il-livell insostenibbli tal-prezzijiet ta' importazzjoni hu sostnut mill-fatt li t-tieni l-akbar produttur esportatur, li għalih Ace-K jirrappreżenta parti dominanti tal-fatturat totali tiegħu, applika għal protezzjoni minn falliment skont il-liġi Ċiniża kmieni fl-2015.

(95)

Ġie allegat minn parti interessata li d-dannu mġarrab mill-industrija tal-Unjoni kien spjegat b'nefqa fuq prodott ġdid matul il-perjodu kkunsidrat. Għandu jiġi nnutat li din in-nefqa hi relatata ma' R&Ż u l-kummerċjalizzazzjoni ta' prodott ġdid li jkun fih Ace-K. Madankollu, kif spjegat fil-premessa 66, l-ispejjeż ta' din l-innovazzjoni ma tqisux fl-analiżi tad-dannu u għalhekk il-konklużjoni ta' dannu materjali ma setgħetx tiġi affettwata minn din in-nefqa.

(96)

Huwa għalhekk konkluż li l-istrateġija tan-negozju adottata mill-industrija tal-Unjoni ma kkontribwitx għad-dannu materjali li ġarrbet l-industrija tal-Unjoni.

(97)

Id-dannu f'din l-investigazzjoni hija ċara u b'firxa wiesgħa madwar il-biċċa l-kbira tal-indikaturi kif deskritt hawn fuq. Id-dannu huwa ċar kemm fl-aspetti tiegħu tal-volum (b'mod partikolari, is-sehem tas-suq, il-produzzjoni, l-użu tal-kapaċità, il-volum ta' bejgħ fis-suq tal-Unjoni u l-impjiegi) u fl-aspetti dwar il-prezzijiet (il-prezzijiet medji tal-bejgħ), kif ukoll fl-indikaturi tal-prestazzjoni (il-profittabilità, ir-redditu fuq l-investiment, l-investimenti u l-fluss ta' flus). Kien hemm koinċidenza ċara fiż-żmien bejn iż-żieda fil-volum u s-sehem tas-suq tal-importazzjonijiet oġġett ta' dumping bi prezz baxx bi żvilupp negattiv fis-sitwazzjoni ekonomika tal-industrija tal-Unjoni. Filwaqt li l-aspetti tal-volum huma aktar evidenti, hemm korrelazzjoni ċara bejn deterjorament qawwi ta' volumi ta' bejgħ u ta' produzzjoni u d-deterjorament sussegwenti ta' indikaturi finanzjarji.

(98)

Il-Kummissjoni ddistingwiet u sseparat l-effetti tal-fatturi magħrufa kollha dwar is-sitwazzjoni tal-industrija tal-Unjoni mill-effetti dannużi tal-importazzjonijiet oġġett ta' dumping. Il-Kummissjoni ma identifikat l-ebda fatturi oħra li setgħu kkontribwew għad-dannu.

(99)

Il-Kummissjoni għalhekk ikkonkludiet li l-importazzjonijiet li huma l-oġġett ta' dumping ikkawżaw id-dannu materjali mġarrab mill-industrija tal-Unjoni u li ma kienx hemm fatturi oħra li jistgħu jkissru l-konnessjoni kawżali.

(100)

B'konformità mal-Artikolu 21 tar-Regolament bażiku, il-Kummissjoni analizzat jekk, minkejja l-konklużjoni dwar dumping dannuż, huwiex fl-interess tal-Unjoni li jiġu adottati miżuri f'dan il-każ. Id-determinazzjoni tal-interess tal-Unjoni kienet ibbażata fuq l-apprezzament ta' kull wieħed mill-bosta interessi involuti, inklużi dawk tal-industrija tal-Unjoni, tal-importaturi u tal-utenti.

(101)

L-investigazzjoni stabbiliet li l-industrija tal-Unjoni ġarrbet dannu materjali kkawżat mill-importazzjonijiet li huma l-oġġett ta' dumping mir-RPĊ. Kważi l-indikaturi kollha tad-dannu wrew xejriet negattivi matul il-perjodu kkunsidrat, b'mod partikolari l-volum ta' produzzjoni, il-volum tal-bejgħ, il-prezzijiet tal-bejgħ, l-impjiegi, is-sehem tas-suq u l-profittabilità. Ix-xejra 'l isfel ġiet stabbilita wkoll għal indikaturi oħra relatati mal-prestazzjoni finanzjarja bħalma huma l-fluss tal-flus u r-redditu fuq l-investimenti.

(102)

Huwa mistenni li wara l-impożizzjoni ta' miżuri, il-prezzijiet tal-importazzjoni se jiżdiedu u l-industrija tal-Unjoni se tkun parzjalment meħlusa mill-pressjoni tal-prezzijiet attwalment eżerċitata mill-importazzjonijiet li huma l-oġġett ta' dumping. Fin-nuqqas ta' miżuri, is-sitwazzjoni tal-industrija tal-Unjoni x'aktarx li tkompli tiddeterjora. Aktar telf fil-volum tal-bejgћ u fis-sehem mis-suq huwa ferm probabbli li jdum, minħabba li l-pressjoni tal-prezzijiet mill-importazzjonijiet li huma l-oġġett ta' dumping se tkompli u l-industrija tal-Unjoni se tkun imġiegħla tikkompeti mal-livelli tal-prezzijiet baxxi fl-Unjoni. Min-naħa l-oħra, ma hemm l-ebda raġunijiet biex jiġi stabbilit li l-pressjoni tal-prezzijiet tinbidel fin-nuqqas ta' miżuri u ma ssegwix it-tendenzi osservati tul il-perjodu kkunsidrat. Mhuwiex eskluż li, minħabba n-nuqqas ta' miżuri, l-industrija tal-Unjoni se tkun imġiegħla twaqqaf il-produzzjoni Ace-K għal kollox fuq it-terminu medju, bil-konsegwenza ta' telf ta' impjiegi fl-Unjoni. Dan ukoll irendi lill-Unjoni kompletament dipendenti fuq l-importazzjoni mir-RPĊ.

(103)

Għaldaqstant, f'dan l-istadju ġie konkluż li l-impożizzjoni ta' dazji ta' antidumping tkun fl-interess tal-industrija tal-Unjoni.

(104)

Minn 25 li ġew ikkuntattjati, kienu biss tliet importaturi li ppreżentaw tweġibiet għall-kwestjonarju. It-tweġibiet tagħhom jirrappreżentaw madwar 13 % tal-importazzjonijiet totali tal-Ace-K mir-RPĊ. Dawn il-kumpaniji kienu suġġetti għal verifiki fuq il-post.

(105)

L-importazzjonijiet ta' Ace-K mir-RPĊ jirrappreżentaw inqas minn 10 % tal-fatturat totali ta' dawn l-importaturi fil-perjodu ta' investigazzjoni (għal tnejn minnhom, anki inqas minn 1 %).

(106)

It-tliet importaturi li kkooperaw kollha allegaw li d-dazji kien ikollhom impatt negattiv fuq l-attivitajiet tagħhom hekk kif huma inevitabbilment iwasslu għal prezzijiet ogħla. Importatur wieħed enfasizza l-importanza ta' sorsi doppji għall-klijenti tiegħu.

(107)

Importatur ieħor qal li l-Ace-K ma kinitx sostitwita faċilment għal prodotti li fihom l-Ace-K, li kienu diġà fis-suq. Se jiġu żviluppati prodotti ġodda b'sustanzi li jagħtu ħlewwa alternattivi aktar milli l-prodott ikkonċernat.

(108)

Il-Kummissjoni stabbiliet li l-importaturi jistgħu tabilħaqq jiġu affettwati b'mod negattiv bil-miżuri iżda sa punt limitat ħafna. Ace-K hu parti żgħira biss tan-negozju għall-importaturi, li għandhom portafoll pjutost wiesa' tal-prodotti. Barra minn hekk, peress li miżuri jirrestawraw biss kompetizzjoni ġusta fis-suq tal-Unjoni, huwa kkunsidrat li l-miżuri antidumping ma jżommux lill-importaturi milli jbiegħu l-prodott ikkonċernat fl-Unjoni.

(109)

Fl-istess linja, billi l-importaturi u l-utenti aħħarin enfasizzaw il-ħtieġa ta' żewġ sorsi ta' forniment, il-miżuri aktarx li jsaħħu l-possibbiltà ta' provvista doppja minflok il-prevenzjoni tagħha. Dan huwa minħabba l-fatt li mingħajr miżuri l-industrija tal-Unjoni wisq probabbli tkun eskluża mis-suq.

(110)

Għalhekk, mill-informazzjoni disponibbli, huwa ċar li l-impożizzjoni tal-miżuri fuq l-importaturi jkollha impatt limitat ħafna, jekk xejn, u dan l-impatt għandu jkun superat b'mod ċar mill-benefiċċji li l-miżuri jistgħu jġibu magħhom lill-industrija tal-Unjoni.

(111)

Il-Kummissjoni kkuntattjat madwar 80 utent tal-Ace-K mat-tnedija. Utent wieħed biss bagħat tweġiba għall-kwestjonarju. L-utenti ewlenin jiffurmaw parti minn segment imnaqqas ta' mingħajr zokkor jew b'inqas zokkor tas-settur tal-ikel u tax-xorb. Bejgħ ieħor ta' Ace-K hu kkonsmat fis-settur farmaċewtiku biex jagħmel il-mediċini b'togħma aktar tajba.

(112)

Għall-utent li kkoopera, għalkemm Ace-K jintuża fil-biċċa l-kbira tal-prodotti tiegħu, ix-xiri tal-Ace-K hu żgħir ħafna meta mqabbel mal-produzzjoni globali u l-ispejjeż tal-bejgħ.

(113)

L-utent li kkoopera sostna li l-prodott ikkonċernat huwa komponent ewlieni għal parti konsiderevoli tal-prodotti lesti tiegħu u estremament diffiċli li jiġi sostitwit mingħajr ma jkun hemm impatt negattiv fuq l-istandards ta' kwalità tiegħu u l-kompetittività.

(114)

Tliet utenti oħra, li jirrappreżentaw kemm il-produtturi multinazzjonali kbar tal-ikel u x-xorb u l-kumpaniji farmaċewtiċi speċjalizzati iżgħar, ma mlewx il-kwestjonarju iżda taw il-kummenti tagħhom fi preżentazzjonijiet bil-miktub. Huma sostnew li, suġġett għal determinazzjoni ta' dumping, l-industrija tal-Unjoni għandha tinżamm bħala kompetitur vijabbli u sors affidabbli ta' provvista ta' kwalità għolja.

(115)

L-investigazzjoni kkonkludiet li, f'termini ta' spejjeż, l-importanza ta' Ace-K f'prodotti lesti huwa minimu. Madankollu, hekk kif sostnut mill-utent li kkoopera, l-użu ta' Ace-K hu essenzjali għal prodotti li diġà jinsabu fis-suq. Prodotti ġodda jistgħu jiġu żviluppati ma' sustanzi li jagħtu l-ħlewwa alternattivi iżda biex tinbidel il-formulazzjoni ta' prodotti stabbiliti hija riskjuża u għalja. Għalhekk, l-aċċess tal-utenti għal sorsi alternattivi ta' Ace-K hu importanti ħafna.

(116)

Dan l-argument tressaq ukoll minn tliet utenti li ppreżentaw kummenti. Huma enfasizzaw li ma jixtiqux ikunu jiddependu esklussivament fuq Ace-K Ċiniż b'riskju ta' prezzijiet ta' monopolju minħabba l-possibbiltà ta' konċentrazzjoni tas-settur fir-RPĊ.

(117)

Kif imsemmi fil-premessa 108 hawn fuq, il-miżuri antidumping proposti għandhom l-għan li jerġgħu jintroduċu kundizzjonijiet ekwivalenti ta' kompetizzjoni li għandhom jippermettu kemm produtturi tal-Unjoni kif ukoll Ċiniżi biex jibqgħu fis-suq bħala kompetituri vijabbli. Il-bżonn tal-utenti għal provvista doppja imbagħad jiġi indirizzat aħjar bl-impożizzjoni ta' miżuri milli mingħajrhom.

(118)

L-impożizzjoni ta' miżuri antidumping x'aktarx mistennija li tippermetti lill-industrija tal-Unjoni li tibqa' fis-suq u wara ttejjeb is-sitwazzjoni tagħha. Jeżisti riskju għoli li jekk il-miżuri ma jiġux imposti, l-industrija tal-Unjoni jkollha tikkunsidra li tirtira min-negozju Ace-K fit-terminu medju, bir-riżultat ta' telf inevitabbli ta' impjiegi. Dan joħloq monopolju għall-produtturi esportaturi Ċiniżi, li n-numru tagħhom x'aktarx ukoll jonqos. Filwaqt li jkun hemm possibbiltà ta' impatt żgħir fuq l-importaturi, dan ikun ta' detriment għall-utenti aħħarin ta' Ace-K, fejn xi wħud saħqu fuq l-importanza li jinżamm sors ta' provvista fl-Unjoni.

(119)

Fuq il-bażi ta' hawn fuq, il-Kummissjoni kkonkludiet li ma kienx hemm raġunijiet persważivi li ma kienx fl-interess tal-Unjoni li timponi miżuri fuq importazzjonijiet tal-Ace-K li joriġinaw fir-RPĊ f'dan l-istadju tla-investigazzjoni.

(120)

Fuq il-bażi tal-konklużjonijiet li waslet għalihom il-Kummissjoni fir-rigward tad-dumping, id-dannu, il-kawżalità u l-interess tal-Unjoni, għandhom jiġu imposti miżuri antidumping provviżorji sabiex ma jippermettux li jsir aktar dannu lill-industrija tal-Unjoni mill-importazzjonijiet oġġett ta' dumping.

(121)

Sabiex jiġi ddeterminat il-livell ta' dawn il-miżuri, il-Kummissjoni l-ewwel stabbiliet l-ammont ta' dazju neċessarju sabiex jiġi eliminat id-dannu mġarrab mill-industrija tal-Unjoni. Il-miżuri għandhom ikunu stabbiliti f'livell suffiċjenti għar-restawr tas-sitwazzjoni ta' kompetizzjoni ġusta bejn l-industrija tal-Unjoni u l-produtturi esportaturi fir-RPĊ.

(122)

Id-dannu jiġi eliminat jekk l-industrija tal-Unjoni tkun kapaċi tkopri l-ispejjeż tal-produzzjoni tagħha u tagħmel profitt qabel it-taxxa mill-bejgħ tal-prodott simili fis-suq tal-Unjoni li jista' jinkiseb b'mod raġonevoli f'kundizzjonijiet normali ta' kompetizzjoni minn industrija ta' dan it-tip fis-settur, jiġifieri fin-nuqqas ta' importazzjonijiet oġġett ta' dumping.

(123)

Għal dak l-għan, il-prezz tal-industrija tal-Unjoni stabbilit għall-kalkoli tat-twaqqigħ tal-prezzijiet fil-premessi 43 u 44 kien ikkunsidrat bħala prezz mhux ta' dannu u użat fil-kalkoli tal-marġni ta' dannu. Iċ-ċirkustanzi partikolari ta' dan il-każ żvelaw li peress li minħabba l-esklużjoni ta' darba u eċċezzjonali ta' R&Ż u spejjeż ta' kummerċjalizzazzjoni waslu għal profitt attwali fil-bejgħ tal-prodott simili matul il-perjodu ta' investigazzjoni, il-livell ta' eliminazzjoni tad-dannu għandu jinkiseb b'tali prezz reali.

(124)

Għalhekk, il-Kummissjoni mbagħad iddeterminat il-livell ta' eliminazzjoni tad-dannu fuq il-bażi ta' tqabbil bejn il-prezz medju ponderat CIF tal-importazzjonijiet tal-produtturi esportaturi li kkooperaw, kif stabbilit għall-kalkoli tat-twaqqigħ tal-prezz, bil-medja aġġustata ponderata tal-prezz tal-fabbrika tat-tali prodott mibjugħ mill-industrija tal-Unjoni fis-suq tal-Unjoni matul il-perjodu ta' investigazzjoni, kif stabbilit għall-kalkoli tat-twaqqigħ tal-prezz. Kwalunkwe differenza li tirriżulta minn dan it-tqabbil ingħatat bħala perċentwal tal-valur CIF medju peżat tal-importazzjoni.

(125)

Għandhom ikunu imposti miżuri antidumping provviżorji fuq l-importazzjonijiet tal-aċesulfam tal-potassju li joriġinaw mir-RPĊ kif ukoll aċesulfam tal-potassju li joriġina fir-RPĊ li għandhom ċerti preparamenti u/jew taħlitiet, skont ir-regola ta' inqas dazju tal-Artikolu 7(2) tar-Regolament bażiku. Il-Kummissjoni qabblet il-marġnijiet tad-dannu u l-marġnijiet tad-dumping. L-ammont ta' dazji għandu jkun stabbilit fil-livell il-baxx tal-marġini ta' dumping u dak tad-dannu.

(126)

Fuq il-bażi ta' dan li ntqal hawn fuq, ir-rati ta' dazju antidumping provviżorji, mogħtija skont il-prezz CIF fil-fruntiera tal-Unjoni, bid-dazji doganali mhux imħallsa, għandhom ikunu kif ġej:

(127)

Madankollu, peress li d-dazju antidumping għandu japplika wkoll għal kwalunkwe tħejjijiet u/jew taħlitiet li jinkludu Ace-K, huwa aktar xieraq għall-implimentazzjoni tad-dazju mill-awtoritajiet doganali tal-Unjoni, li d-dazju jiġi espress bħala ammont fiss f'Euro għal kull kg nett u dan japplika għal Ace-K pur importat, jew il-proporzjon ta' Ace-K imħejji u/jew prodott imħallat.

(128)

Ir-rati tad-dazju antidumping ta' kumpaniji individwali speċifikati f'dan ir-Regolament ġew stabbiliti fuq il-bażi tal-konklużjonijiet ta' din l-investigazzoni. Gћaldaqstant, dawn jirriflettu l-qagħda li nstabet matul din l-investigazzjoni fir-rigward ta' dawn il-kumpaniji. Dawn ir-rati ta' dazju (għall-kuntrarju tad-dazju applikabbli fil-pajjiż kollu għall-“kumpaniji l-oħra kollha”) għaldaqstant huma esklużivament applikabbli għall-importazzjonijiet tal-prodott ikkonċernat li joriġina mill-pajjiż ikkonċernat u manifatturat mill-entitajiet legali msemmija. L-importazzjoni tal-prodott ikkonċernat prodott minn kull kumpanija oħra mhux imsemmija b'mod speċifiku fil-parti operattiva ta' dan ir-Regolament, inklużi entitajiet relatati ma' dawk imsemmija b'mod speċifiku, għandhom ikunu soġġetti għar-rata ta' dazju applikabbli għall-“kumpaniji kollha l-oħrajn”. Ma għandhomx ikunu soġġetti għal xi rata individwali ta' dazju antidumping.

(129)

Kumpanija tista' titlob l-applikazzjoni ta' dawn ir-rati tad-dazju antidumping individwali jekk imbagħad tibdel l-isem tal-entità tagħha. It-talba għandha tkun indirizzata lill-Kummissjoni (3). It-talba għandha tinkludi l-informazzjoni kollha rilevanti li turi li l-bidla ma taffettwax lid-dritt tal-kumpanija li tibbenefika mir-rata tad-dazju li tapplika għaliha. Jekk il-bidla fl-isem tal-kumpanija ma taffettwax lid-dritt tagħha li tibbenefika mir-rata ta' dazju li tapplika għaliha, tiġi ppubblikata notifika ta' informazzjoni dwar il-bidla tal-isem f'Il-Ġurnal Uffiċjali tal-Unjoni Ewropea.

(130)

Sabiex jiġu minimizzati r-riskji ta' ċirkomvenzjoni minħabba d-differenza għolja fir-rati tad-dazju, huma meħtieġa miżuri speċjali biex tkun żgurata l-applikazzjoni ta' dazji antidumping individwali. Kumpaniji b'dazji individwali tal-antidumping għandhomu jippreżentaw fattura kummerċjali valida lill-awtoritajiet doganali tal-Istati Membri. Il-fattura għandha tkun konformi mar-rekwiżiti stipulati fl-Anness I. L-importazzjonijiet mhux akkumpanjati minn dik il-fattura għandhom ikunu suġġetti għad-dazju antidumping applikabbli għall-“kumpaniji l-oħrajn kollha”.

(131)

Biex ikun żgurat infurzar xieraq ta' dazji antidumping, ir-rata tad-dazju antidumping għall-“kumpaniji kollha l-oħrajn” għandha tkun applikata mhux biss għall-produtturi esportaturi li ma kkooperawx f'din l-investigazzjoni, imma anki għall-produtturi li ma kellhomx esportazzjonijiet lejn l-Unjoni matul il-perjodu ta' investigazzjoni.

(132)

Fl-interessi ta' amministrazzjoni tajba, il-partijiet interessati jissottomettu kummenti bil-miktub u/jew jitolbu seduta mal-Kummissjoni u/jew mal-Uffiċjal tas-Seduta fil-proċeduri kummerċjali bi skadenza fissa.

(133)

Il-konklużjonijiet li jikkonċernaw l-impożizzjoni ta' dazji provviżorji huma provviżorji u jistgħu jiġu emendati fl-istadju definittiv tal-investigazzjoni.