(1)

L-Artikolu 19 tar-Regolament tal-Kunsill (UE) Nru 389/2012 (3) jistabbilixxi l-obbligu għall-Istati Membri li jżommu reġistri elettroniċi ta’ awtorizzazzjonijiet tal-operaturi ekonomiċi u tal-imħażen tat-taxxa li huma involuti fil-moviment tal-oġġetti soġġetti għas-sisa b’arranġamenti ta’ sospensjoni tad-dazju.

(2)

Id-Direttiva tal-Kunsill (UE) 2020/262 (4) testendi l-użu tas-sistema kompjuterizzata taħt id-Deċiżjoni (UE) 2020/263 tal-Parlament Ewropew u tal-Kunsill (5), li qed tintuża bħalissa biex tissorvelja l-movimenti tal-oġġetti soġġetti għas-sisa b’sospensjoni tad-dazju, għas-superviżjoni tal-oġġetti soġġetti għas-sisa rrilaxxati għall-konsum fit-territorju ta’ Stat Membru wieħed u li mbagħad jiġu trasferiti lejn it-territorju ta’ Stat Membru ieħor biex jiġu konsenjati għal finijiet kummerċjali.

(3)

Sabiex ikun jista’ jseħħ il-funzjonament tajjeb tas-sistema kompjuterizzata billi tiġi żgurata l-ħażna ta’ data kompluta, aġġornata u preċiża, hemm bżonn li l-kamp ta’ applikazzjoni tal-Artikolu 19 tar-Regolament (UE) Nru 389/2012 jiġi emendat sabiex tiġi stipulata l-informazzjoni li l-Istati Membri jenħtieġ li jintroduċu fir-reġistri elettroniċi b’rabta mal-konsenjaturi ċċertifikati u d-destinatarji ċċertifikati li jċaqalqu l-oġġetti soġġetti għas-sisa okkażjonalment biss.

(4)

Minħabba li l-għanijiet ta’ dan ir-Regolament, jiġifieri l-ispeċifikazzjoni tal-informazzjoni li l-Istati Membri jenħtieġ li jdaħħlu fir-reġistri elettroniċi rigward il-konsenjaturi ċċertifikati u d-destinatarji ċċertifikati li jċaqalqu l-oġġetti soġġetti għas-sisa okkażjonalment biss, ma jistax jinkiseb suffiċjentement mill-Istati Membri iżda, minħabba li jrid jiġi żgurat il-funzjonament armonizzat tas-sistema kompjuterizzata u tiġi ffaċilitata l-ġlieda kontra l-frodi, jista’ jinkiseb aħjar fil-livell tal-Unjoni, l-Unjoni tista’ tadotta miżuri, f’konformità mal-prinċipju tas-sussidjarjetà kif stabbilit fl-Artikolu 5 tat-Trattat dwar l-Unjoni Ewropea. F’konformità mal-prinċipju tal-proporzjonalità, kif stabbilit fl-istess Artikolu, dan ir-Regolament ma jmurx lil hinn minn dak meħtieġ biex jintlaħaq dak il-għan.

(5)

Dan ir-Regolament jirrispetta d-drittijiet fundamentali u josserva l-prinċipji rikonoxxuti mill-Karta tad-Drittijiet Fundamentali tal-Unjoni Ewropea, b’mod partikolari d-dritt għall-protezzjoni ta’ data personali. Fid-dawl tal-limiti stabbiliti bir-Regolament (UE) Nru 389/2012, l-ipproċessar ta’ din id-data mwettaq fil-qafas ta’ dan ir-Regolament ma jmurx lil hinn minn dak neċessarju u huwa proporzjonat għall-fini tal-protezzjoni tal-interessi fiskali leġittimi tal-Istati Membri.

(6)

Il-Kontrollur Ewropew għall-Protezzjoni tad-Data ġie kkonsultat f’konformità mal-Artikolu 42 tar-Regolament (UE) 2018/1725 tal-Parlament Ewropew u tal-Kunsill (6).

(7)

Sabiex id-data tal-applikazzjoni ta’ dan ir-Regolament tiġi allinjata mad-data tal-applikazzjoni tad-dispożizzjonijiet tad-Direttiva (UE) 2020/262 dwar l-awtomatizzazzjoni tal-movimenti tal-oġġetti soġġetti għas-sisa rrilaxxati għall-konsum fit-territorju ta’ Stat Membru wieħed u li mbagħad jiġu ttrasferiti lejn it-territorju ta’ Stat Membru ieħor biex jitwasslu għal finijiet kummerċjali fit-territorju ta’ dak l-Istat Membru l-ieħor u biex l-Istati Membri jkollhom biżżejjed żmien biex iħejju għall-bidliet li jirriżultaw minn dan ir-Regolament, dan ir-Regolament jenħtieġ li japplika mit-13 ta’ Frar 2023.

(8)

Għaldaqstant, jenħtieġ li r-Regolament (UE) Nru 389/2012 jiġi emendat skont dan,

“(l)

għall-konsenjaturi ċċertifikati li jibagħtu oġġetti soġġetti għas-sisa okkażjonalment biss imsemmija fl-Artikolu 35(8) tad-Direttiva (UE) 2020/262, il-kwantità ta’ oġġetti soġġetti għas-sisa, l-identità tad-destinatarju fl-Istat Membru tad-destinazzjoni u l-perijodu ta’ żmien li għalih iċ-ċertifikazzjoni temporanja hija valida;

(m)

għad-destinatarji ċċertifikati li jirċievu oġġetti soġġetti għas-sisa okkażjonalment biss imsemmija fl-Artikolu 35(8) tad-Direttiva (UE) 2020/262, il-kwantità ta’ oġġetti soġġetti għas-sisa, l-identità tal-konsenjatur fl-Istat Membru tad-dispaċċ u l-perijodu ta’ żmien li għalih iċ-ċertifikazzjoni temporanja hija valida.”.