European flag

Il-Ġurnal Uffiċjali
tal-Unjoni Ewropea

MT

Is-serje L


2026/1786

24.7.2026

REGOLAMENT TA’ IMPLIMENTAZZJONI TAL-KUMMISSJONI (UE) 2026/1786

tat-23 ta’ Lulju 2026

li jikkonċerna l-awtorizzazzjoni tat-tintura tal-ħabaq mill-Ocimum basilicum L. bħala addittiv tal-għalf għall-ispeċijiet kollha tal-annimali

(Test b’rilevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (KE) Nru 1831/2003 tal-Parlament Ewropew u tal-Kunsill tat-22 ta’ Settembru 2003 dwar l-addittivi għall-użu fl-għalf tal-annimali (1), u b’mod partikolari l-Artikolu 9(2) tiegħu,

Billi:

(1)

Ir-Regolament (KE) Nru 1831/2003 jipprevedi l-awtorizzazzjoni ta’ addittivi għall-użu fin-nutrizzjoni tal-annimali u r-raġunijiet u l-proċeduri għall-għoti ta’ tali awtorizzazzjoni. L-Artikolu 10(2) ta’ dak ir-Regolament jipprevedi l-evalwazzjoni mill-ġdid tal-addittivi awtorizzati skont id-Direttiva tal-Kunsill 70/524/KEE (2).

(2)

Is-sustanza tintura tal-ħabaq mill-Ocimum basilicum L. kienet ġiet awtorizzata mingħajr limitu ta’ żmien, f’konformità mad-Direttiva 70/524/KEE, bħala addittiv tal-għalf għall-ispeċijiet kollha tal-annimali. Din is-sustanza wara ddaħħlet fir-Reġistru tal-Addittivi tal-Għalf bħala prodott eżistenti, f’konformità mal-Artikolu 10(1), il-punt (b), tar-Regolament (KE) Nru 1831/2003.

(3)

F’konformità mal-Artikolu 10(2) tar-Regolament (KE) Nru 1831/2003, flimkien mal-Artikolu 7 tiegħu, ġiet sottomessa applikazzjoni għall-awtorizzazzjoni tat-tintura tal-ħabaq mill-Ocimum basilicum L. bħala addittiv tal-għalf għall-ispeċijiet kollha tal-annimali, bit-talba li l-addittiv jiġi kklassifikat fil-kategorija tal-addittivi “addittivi sensorjali” u fil-grupp funzjonali “komposti aromatizzanti”. Mal-applikazzjoni ntbagħtu d-dettalji u d-dokumenti meħtieġa skont l-Artikolu 7(3) tar-Regolament (KE) Nru 1831/2003.

(4)

L-applikant talab li l-addittiv jiġi awtorizzat ukoll biex jintuża fl-ilma tax-xorb. Madankollu, ir-Regolament (KE) Nru 1831/2003 ma jippermettix l-awtorizzazzjoni ta’ “komposti aromatizzanti” għall-użu fl-ilma tax-xorb. Għalhekk, jenħtieġ li l-użu ta’ dan l-addittiv fl-ilma tax-xorb ma jkunx permess.

(5)

Fl-opinjoni tagħha tal-24 ta’ Ġunju 2025 (3), l-Awtorità Ewropea dwar is-Sigurtà fl-Ikel (“l-Awtorità”) ikkonkludiet li t-tintura tal-ħabaq mill-Ocimum basilicum L. ma hija tal-ebda tħassib għas-sikurezza tal-annimali li jgħixu għal żmien qasir (speċijiet għas-simna) u li huwa improbabbli ħafna li twassal għal effetti avversi fl-annimali li jgħixu għal żmien twil u riproduttivi sa ċerti konċentrazzjonijiet massimi speċifikati aktar f’dik l-opinjoni għal kull speċi. Barra minn hekk, ikkonkludiet li ma ġie identifikat l-ebda tħassib dwar is-sikurezza għall-konsumaturi u għall-ambjent wara l-użu tat-tintura tal-ħabaq mill-Ocimum basilicum L.. L-Awtorità kkonkludiet ukoll li t-tintura tal-ħabaq mill-Ocimum basilicum L. jenħtieġ li titqies bħala irritant tal-ġilda u tal-għajnejn u sensitizzatur dermali u respiratorju. L-Awtorità indikat li, waqt l-immaniġġar tal-addittiv, jista’ jkun hemm esponiment tal-utenti mhux protetti għall-metilewġenol u għall-estragol u li għalhekk, l-esponiment tal-utenti jenħtieġ li jiġi minimizzat, biex jitnaqqas ir-riskju. Minbarra dan, l-Awtorità kkonkludiet li minħabba li tintura tal-ħabaq mill-Ocimum basilicum L. hija rikonoxxuta li tagħti t-togħma lill-ikel u billi l-funzjoni tagħha fl-għalf tkun essenzjalment l-istess bħal dik fl-ikel, ma hemmx bżonn li jkun hemm aktar provi tal-effikaċja tagħha. Hi vverifikat ukoll ir-rapport dwar il-metodu tal-analiżi tal-addittivi tal-għalf fl-għalf li ġie ppreżentat mil-Laboratorju ta’ Referenza mwaqqaf bir-Regolament (KE) Nru 1831/2003.

(6)

Fid-dawl ta’ dan ta’ hawn fuq, il-Kummissjoni jidhrilha li t-tintura tal-ħabaq mill-Ocimum basilicum L. tissodisfa l-kundizzjonijiet previsti fl-Artikolu 5 tar-Regolament (KE) Nru 1831/2003. Għaldaqstant, l-użu ta’ dik is-sustanza jenħtieġ li jiġi awtorizzat kif speċifikat fl-Anness ta’ dan ir-Regolament. Il-Kummissjoni jidhrilha li l-preżenza tal-metilewġenol u tal-estragol, sustanzi ta’ tħassib, fit-tintura tal-ħabaq mill-Ocimum basilicum L., teħtieġ l-istabbiliment ta’ kontenut massimu fl-għalf komplet. Hija jidhrilha wkoll li l-użu simultanju tat-tintura tal-ħabaq mill-Ocimum basilicum L. ma’ addittivi oħra huwa permess, dment li l-kontenut tal-metilewġenol u tal-estragol fil-materjali tal-għalf u fl-għalf kompost jibqa’ taħt dak li jirriżulta mill-użu tal-addittiv jew tal-addittivi bl-ogħla kontenut ta’ dawn is-sustanzi ta’ tħassib, fost l-addittivi tal-għalf awtorizzati kollha, fil-kontenut massimu jew rakkomandat tagħhom għall-ispeċijiet jew għall-kategorija tal-annimali rilevanti. Barra minn hekk, il-Kummissjoni jidhrilha li jenħtieġ li jittieħdu miżuri protettivi xierqa biex jiġu evitati l-effetti avversi fuq saħħet l-utenti tal-addittiv.

(7)

Peress li r-raġunijiet ta’ sikurezza ma jirrikjedux l-applikazzjoni immedjata tal-modifiki fil-kundizzjonijiet tal-awtorizzazzjoni tas-sustanza kkonċernata, jixraq li jiġi previst perjodu tranżizzjonali biex il-partijiet interessati jħejju ruħhom ħalli jissodisfaw ir-rekwiżiti l-ġodda li jirriżultaw mill-awtorizzazzjoni.

(8)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,

ADOTTAT DAN IR-REGOLAMENT:

Artikolu 1

Awtorizzazzjoni

Is-sustanza speċifikata fl-Anness, li tappartjeni għall-kategorija ta’ addittivi “addittivi sensorjali” u għall-grupp funzjonali “komposti aromatizzanti”, hija awtorizzata bħala addittiv fin-nutrizzjoni tal-annimali, soġġett għall-kundizzjonijiet stabbiliti f’dak l-Anness.

Artikolu 2

Miżuri tranżizzjonali

1.   L-addittiv tal-għalf, tintura tal-ħabaq mill-Ocimum basilicum L., kif awtorizzat skont id-Direttiva 70/524/KEE, u l-premixxeli li fihom dan l-addittiv, li jiġu prodotti u ttikkettati qabel it-13 ta’ Frar 2027 f’konformità mar-regoli applikabbli qabel it-13 ta’ Awwissu 2026 jistgħu jibqgħu jiġu introdotti fis-suq u jintużaw sakemm jispiċċaw l-istokkijiet ikkonċernati.

2.   L-għalf kompost u l-materjali tal-għalf li fihom l-addittiv tal-għalf imsemmi fil-paragrafu 1, li jiġu prodotti u ttikkettati qabel it-13 ta’ Awwissu 2027 f’konformità mar-regoli applikabbli qabel it-13 ta’ Awwissu 2026 jistgħu jibqgħu jiġu introdotti fis-suq u jintużaw sakemm jispiċċaw l-istokkijiet ikkonċernati jekk ikunu maħsuba għall-annimali li jipproduċu l-ikel.

3.   L-għalf kompost u l-materjali tal-għalf li fihom l-addittiv tal-għalf imsemmi fil-paragrafu 1, li jiġu prodotti u ttikkettati qabel it-13 ta’ Awwissu 2028 f’konformità mar-regoli applikabbli qabel it-13 ta’ Awwissu 2026 jistgħu jibqgħu jiġu introdotti fis-suq u jintużaw sakemm jispiċċaw l-istokkijiet ikkonċernati jekk ikunu maħsuba għall-annimali li ma jipproduċux l-ikel.

Artikolu 3

Dħul fis-seħħ

Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, it-23 ta’ Lulju 2026.

Għall-Kummissjoni

Il-President

Ursula VON DER LEYEN


(1)   ĠU L 268, 18.10.2003, p. 29, ELI: http://data.europa.eu/eli/reg/2003/1831/oj.

(2)  Id-Direttiva tal-Kunsill 70/524/KEE tat-23 ta’ Novembru 1970 li tirrigwarda addittivi f’għalf għall-bhejjem (ĠU L 270, 14.12.1970, p. 1, ELI: http://data.europa.eu/eli/dir/1970/524/oj).

(3)   EFSA Journal, 2025:23(7), e9543. https://doi.org/10.2903/j.efsa.2025.9543.


ANNESS

Numru ta’ identifikazzjoni tal-addittiv

Isem l-addittiv

Kompożizzjoni, formula kimika, deskrizzjoni, metodu analitiku

Speċi jew kategorija ta’ annimal

Età massima

Kontenut minimu

Kontenut massimu

Dispożizzjonijiet oħra

Tmiem il-perjodu ta’ awtorizzazzjoni

mg ta’ addittiv/kg ta’ għalf komplet b’kontenut ta’ ndewwa ta’ 12 %

Kategorija: Addittivi sensorjali. Grupp funzjonali: Komposti aromatizzanti

2b308-t

Tintura tal-ħabaq

Kompożizzjoni tal-addittiv

Tintura mill-weraq imnixxef tal-Ocimum basilicum L.

Għamla likwida

Karatterizzazzjoni tas-sustanza attiva

Tintura tal-ħabaq:

Tintura, kif definita mill-Kunsill tal-Ewropa, (KtE) (1), miksuba mill-weraq imnixxef tal-Ocimum basilicum L. permezz tal-estrazzjoni estiża b’taħlita ta’ solvent ilma/etanol, tal-ippressar u tal-filtrazzjoni.

Numru KE: 283-900-8

Numru CAS: 84775-71-3

Numru KtE: 308

Speċifikazzjonijiet

Kontenut ta’ materja niexfa: 1,79 % - 1,8 %

Total ta’ polifenoli (2): ≤ 0,198 %

Flavonojdi (3): ≤ 0,0257 %

1,8-Ċineol (ewkaliptol): ≤ 0,0019 %

Ganfra: ≤ 0,0047 %

Aċidu rożmariniku: ≤ 0,0110 %

Metilewġenol: ≤ 0,0006 %

Estragol: ≤ 0,00005 %

Metodu analitiku  (4)

Għall-karatterizzazzjoni tal-addittiv tal-għalf:

—

spettrofotometrija għad-determinazzjoni tat-total ta’ polifenoli u tat-total ta’ flavonojdi;

—

kromatografija b’fażi gassuża abbinata ma’ detezzjoni tal-jonizzazzjoni bi fjamma (GC-FID) għad-determinazzjoni ta’ 1,8-ċineol, ganfra, estragol u metilewġenol;

—

kromatografija b’fażi gassuża abbinata ma’ detezzjoni tal-ispettrometrija tal-massa (GC-MS) għad-determinazzjoni tal-ewġenol;

—

kromatografija likwida bi prestazzjoni għolja b’detezzjoni spettrofotometrika (UV) għad-determinazzjoni tal-aċidu rożmariniku.

Dundjani għas-simna

—

—

87

1.

L-addittiv għandu jiġi inkorporat fl-għalf fil-forma ta’ premixxela.

2.

Fl-istruzzjonijiet għall-użu tal-addittiv u tat-taħlitiet lesti minn qabel għandhom jiġu indikati l-kundizzjonijiet tal-ħżin u l-istabbiltà għat-trattament bis-sħana.

3.

L-użu simultanju tat-tintura tal-ħabaq ma’ addittivi oħra huwa permess, dment li l-kontenut tal-metilewġenol u tal-estragol fil-materjali tal-għalf u fl-għalf kompost huwa taħt dak li jirriżulta mill-użu tal-addittiv jew tal-addittivi bl-ogħla kontenut ta’ metilewġenol u estragol, fost l-addittivi tal-għalf awtorizzati kollha, fil-kontenut massimu jew rakkomandat tagħhom għall-ispeċijiet jew għall-kategorija tal-annimali rilevanti.

4.

Għall-utenti tal-addittiv u tal-premixxeli, l-operaturi tan-negozji tal-għalf għandhom jistabbilixxu proċeduri operazzjonali u miżuri organizzattivi biex jindirizzaw ir-riskji potenzjali li jirriżultaw mill-użu tagħhom. Meta dawk ir-riskji ma jkunux jistgħu jiġu eliminati b’tali proċeduri u miżuri, l-addittiv u l-premixxeli għandhom jintużaw b’tagħmir protettiv personali għall-ġilda, għall-għajnejn u għan-nifs.

It-13 ta’ Awwissu 2036

Tiġieġ għas-simna u pollam tal-ispeċijiet minuri għas-simna

—

—

65

Il-pollam kollu mrobbi għall-bajd jew għat-tnissil

—

—

97

Għasafar ornamentali

—

—

97

Il-pollam kollu għall-bajd u għat-tnissil

—

—

97

Ħnieżer għas-simna

—

—

140

Ħnieżer għas-simna ta’ Suidae minuri

—

—

140

Ħnienes (mhux miftuma u miftuma) tas-Suidae kollha

—

—

116

Is-Suidae kollha għar-riproduzzjoni

—

—

170

Għoġġiela għas-simna

6 xhur

—

291

Nagħaġ u mogħoż

—

—

256

Bhejjem tal-ifrat għas-simna; ruminanti oħra għas-simna għajr in-nagħaġ, il-mogħoż u l-għoġġiela għas-simna sa 6 xhur; Camelidae għas-simna

—

—

256

Ir-ruminanti l-oħra kollha;

il-Camelidae l-oħra kollha

-

-

166

Equidae

-

-

256

Leporidae

-

-

102

Salmonidi u ħut bil-pinen minuri

-

-

292

Klieb

-

-

307

Qtates

-

-

256

Ħut ornamentali

-

-

500

Speċijiet u kategoriji oħra

-

-

65

(1)  Natural sources of flavourings – Rapport Nru 2 (2007).

(2)  Espress bħala ekwivalenti tal-aċidu galliku (GAE).

(3)  Espressi bħala ekwivalenti tal-iperosid.

(4)  Id-dettalji tal-metodi analitiċi huma disponibbli fl-indirizz tal-Laboratorju ta’ Referenza li ġej: https://joint-research-centre.ec.europa.eu/eurl-fa-eurl-feed-additives/eurl-fa-authorisation/eurl-fa-evaluation-reports_en?prefLang=mt.


ELI: http://data.europa.eu/eli/reg_impl/2026/1786/oj

ISSN 1977-074X (electronic edition)