Eagrán sealadach

TUAIRIM AN ABHCÓIDE GHINEARÁLTA

ĆAPETA

arna tabhairt an 27 Márta 2025 (1)

Cás C‑97/23 P

WhatsApp Ireland Ltd

v

an Bord Eorpach um Chosaint Sonraí

(Achomharc – Cosaint sonraí pearsanta – Rialachán (AE) 2016/679 – Airteagal 65 – Sásra comhsheasmhachta – Réiteach díospóide ag an mBord Eorpach um Chosaint Sonraí – Caingean le haghaidh neamhniú – Mír 1 d’Airteagal 263 CFAE – An coincheap ‘gníomh inchonspóide’ – Mír 4 d’Airteagal 263 CFAE – An coincheap ‘cúram díreach’ – Na coincheapa ‘gníomh ullmhúcháin’ agus ‘gníomh idirmheánach’ – Ceist maidir le ‘neamh-infhorfheidhmitheacht’ cinnidh i gcoinne duine nádúrtha nó dlítheanach – Rogha an chomhlachta a chuireann an cinneadh sin chun feidhme)






I.      Réamhrá

1.        Leis an achomharc seo, tarraingítear an cheist shíoraí anuas maidir le léiriú ar na coinníollacha agus le cur i bhfeidhm na gcoinníollacha maidir le hinghlacthacht caingne le haghaidh neamhniú arna tionscnamh ag iarratasóirí ar daoine nádúrtha nó dlítheanacha iad. Go háirithe, baineann an cás leis na coincheapa ‘gníomh inchonspóide’, chun críocha mhír 1 d’Airteagal 263 CFAE, agus ‘cúram díreach’, de réir bhrí mhír 4 d’Airteagal 263 CFAE.

2.        Tarraingítear na ceisteanna sin anuas i gcomhthéacs an tsásra comhsheasmhachta dá bhforáiltear i Rialachán (AE) 2016/679. (2) Is éard atá i gceist leis an sásra sin nós imeachta ilchodach lena mbaineann rannpháirtíocht na n‑údarás maoirseachta náisiúnta agus an Bhoird Eorpaigh um Chosaint Sonraí (BECS).

3.        San ordú atá faoi achomharc, mheas an Chúirt Ghinearálta go raibh caingean a thionscain WhatsApp Ireland Ltd (‘WhatsApp’ nó ‘an t‑achomharcóir’) neamh-inghlactha i gcoinne Chinneadh Ceangailteach 1/2021 (‘an cinneadh atá faoi chonspóid’), (3) cinneadh ó BECS a glacadh i gcomhthéacs an tsásra sin. (4) Dá bhrí sin, an t‑achomharc seo. (5)

4.        Lasmuigh den achomharc sonrach sa chás seo, tá deis ag an gCúirt Bhreithiúnais a mhíniú ar bhealach níos ginearálta an chaoi a gcuirfear na rialacha maidir le hinghlacthacht caingne le haghaidh neamhniú i bhfeidhm maidir le nósanna imeachta ilchodacha.

II.    Cúlra

5.        Eascraíonn an cás seo as an sásra comhsheasmhachta a tugadh isteach le RGCS. Ar bhealach níos sonraí, baineann sé leis an gcuid den sásra sin, dá bhforáiltear in Airteagal 65 de RGCS, ar dá réir a thugtar an chumhacht do BECS cinntí ceangailteacha a ghlacadh lena réitítear cineálacha áirithe díospóidí a thagann chun cinn i measc na n‑údarás maoirseachta náisiúnta agus rialacha RGCS á bhforfheidhmiú acu.

6.        Tá an sásra comhsheasmhachta ar cheann de ‘nósanna imeachta riaracháin ilchodacha’ iomadúla a bunaíodh le dlí tánaisteach an Aontais. (6)

7.        Úsáidtear an téarma sin chun tuairisc a thabhairt ar nósanna imeachta ina ndéantar an chinnteoireacht i gcéimeanna iomadúla, lena mbaineann institiúidí nó comhlachtaí an Aontais agus institiúidí nó comhlachtaí náisiúnta araon. (7)

8.        Is é ceann de na saincheisteanna dlí a thagann chun cinn i ndáil le nósanna imeachta den sórt sin ná an chaoi a gcinnfear na gníomhartha arna nglacadh ag gníomhaithe iomadúla le linn an nós imeachta sin ar ‘gníomhartha inchonspóide’ iad, agus ansin na cúirteanna ar cheart agóid a dhéanamh os a gcomhair i gcoinne gníomhartha den sórt sin. (8)

9.        Ní mór an t‑achomharc seo a chur sa chomhthéacs sin. Measann an t‑achomharcóir gur rialaigh an Chúirt Ghinearálta go mícheart nach gníomh ar féidir conspóid a dhéanamh ina choinne os comhair Chúirteanna an Aontais é an cinneadh atá faoi chonspóid a glacadh faoin sásra comhsheasmhachta.

A.      Sásra comhsheasmhachta RGCS

10.      Tá sé de chúram ar údaráis mhaoirseachta éagsúla na mBallstát laistigh dá gcríocha faoi seach faireachán a dhéanamh ar rialacha RGCS agus iad a fhorfheidhmiú. (9)

11.      Chun dul i ngleic leis an ilroinnt a d’fhéadfaí a bheith ann i gcur chun feidhme na rialacha cosanta sonraí ar fud an Aontais Eorpaigh a d’fhéadfaí teacht as córas ‘díláraithe’ den sórt sin, déantar foráil le RGCS maidir le comhoibriú idir údaráis mhaoirseachta náisiúnta. (10)

12.      I gcás ina bhfuil gné thrasteorann ag baint le hoibríocht próiseála sonraí, ní mór don údarás atá i gceannas ar an bpróiseálaí nó ar an rialaitheoir atá faoi cheist – an príomhúdarás maoirseachta (LSA) – a dhréachtchinneadh lena bhforfheidhmítear rialacha RGCS i gcoinne an phróiseálaí nó an rialaitheora faoina inniúlacht a scaipeadh ar údaráis mhaoirseachta na mBallstát eile lena mbaineann.

13.      Má aontaíonn na húdaráis eile sin leis an léiriú ar RGCS agus leis na bearta forfheidhmiúcháin arna moladh ag LSA, féadfaidh LSA a chinneadh críochnaitheach a ghlacadh, atá ina cheangal ar an rialaitheoir nó ar an bpróiseálaí atá faoi cheist.

14.      Ach má chuireann na húdaráis mhaoirseachta eile sin agóidí ábhartha agus réasúnaithe in iúl a n‑easaontaíonn LSA leo nó má mheasann sé nach bhfuil siad ábhartha ná réasúnaithe, ní mór do LSA an tsaincheist a chur faoi bhráid BECS ionas gur féidir leis cinneadh a dhéanamh. (11)

15.      Déanann BECS breithniú ar an díospóid idir na húdaráis mhaoirseachta náisiúnta lena mbaineann agus réitíonn sé an cás aonair sin trí bhíthin cinneadh ceangailteach. (12)

16.      De réir Airteagal 65(2) de RGCS, dírítear an cinneadh sin ar LSA agus ar gach údarás maoirseachta eile lena mbaineann agus cuirtear ceangal orthu leis. (13) Foilsítear an cinneadh freisin ar shuíomh gréasáin BECS. (14)

17.      Laistigh de spriocdhátaí forordaithe (15) agus ar bhonn an chinnidh cheangailtigh ó BECS, (16) ní mór do LSA a chinneadh críochnaitheach a ghlacadh, a dtugtar fógra ina leith don rialaitheoir nó don phróiseálaí atá faoi cheist ina dhiaidh sin.

B.      Imeachtaí as ar eascair an cás seo

18.      Is cuideachta é WhatsApp a sholáthraíonn seirbhísí glaonna agus teachtaireachtaí atá bunaithe ar an idirlíon (‘an tseirbhís teachtaireachtaí’).

19.      Chun cuntas a chruthú leis an gcuideachta sin, ní mór d’úsáideoir aontú lena théarmaí seirbhíse agus lena bheartas príobháideachais. (17)

20.      An 24 Bealtaine 2018, d’athraigh WhatsApp a bheartas príobháideachta chun athruithe a tugadh isteach le RGCS a chur san áireamh, a bhí le cur i bhfeidhm ón 25 Bealtaine 2018 ar aghaidh. (18) Tugadh an rogha d’úsáideoirí a bhí ann cheana glacadh leis na hathruithe sin nó deireadh a chur lena n‑úsáid ar sheirbhís teachtaireachtaí an achomharcóra.

21.      Ina dhiaidh sin, fuair Coimisiún um Chosaint Sonraí na hÉireann (‘údarás maoirseachta na hÉireann’) roinnt gearán ó ábhair sonraí maidir le gníomhaíochtaí próiseála sonraí an achomharcóra. (19)

22.      I mí na Nollag 2018, agus tar éis réamh-mheasúnú a dhéanamh ar na gearáin, chuir údarás maoirseachta na hÉireann tús le fiosrúchán i dtaobh ar urscaoil WhatsApp a oibleagáidí trédhearcachta RGCS, faoi Airteagail 12 go 14 de, maidir le faisnéis a sholáthar d’úsáideoirí agus do neamhúsáideoirí a sheirbhíse teachtaireachtaí agus le trédhearcacht na faisnéise sin. (20)

23.      Ós rud é go bhfuil próiseáil trasteorann ar fud an Aontais Eorpaigh i gceist le seirbhís teachtaireachtaí WhatsApp, i gcomhréir lena oibleagáidí a eascraítear as RGCS, scaip údarás maoirseachta na hÉireann a dhréachtchinneadh ar na húdaráis mhaoirseachta náisiúnta eile lena mbaineann. (21)

24.      Mar fhreagra air sin, fuair údarás maoirseachta na hÉireann agóidí ó údaráis mhaoirseachta na Gearmáine (ar leibhéal Cónaidhme), na hUngáire, na hÍsiltíre, na Polainne, na Fraince, na hIodáile, na Portaingéile agus Stát Cónaidhme Baden‑Württemberg na Gearmáine. (22) Ina theannta sin, fuarthas roinnt nótaí tráchta ar an dréachtchinneadh ó údaráis mhaoirseachta na hOstaire, na hÍsiltíre, na Danmhairge, na Polainne, na Beilge, na Fraince agus Stát Cónaidhme Hamburg na Gearmáine. (23)

25.      Ós rud é gur chuir roinnt údaráis mhaoirseachta eile agóidí ábhartha agus réasúnaithe in iúl i gcoinne an dréachtchinnidh nár chomhaontaigh údarás maoirseachta na hÉireann leis, tharchuir údarás maoirseachta na hÉireann na hagóidí chuig BECS lena réiteach. (24)

26.      An 28 Iúil 2021, ghlac BECS an cinneadh atá faoi chonspóid agus, ina dhiaidh sin, thug sé fógra d’údarás maoirseachta na hÉireann agus d’údaráis mhaoirseachta eile lena mbaineann ina leith. (25)

27.      Sa chinneadh atá faoi chonspóid, tugann BECS treoir d’údarás maoirseachta na hÉireann athrú a dhéanamh ar roinnt de na torthaí atá sa dréachtchinneadh agus na fíneálacha a mholtar ann a mhéadú.

28.      Go bunúsach, ceanglaítear leis an gcinneadh atá faoi chonspóid ar údarás maoirseachta na hÉireann a chinneadh gurb ionann ‘sonraí caillteacha haiseáilte’ (26) agus sonraí pearsanta de réir bhrí Airteagal 4(1) de RGCS (27) agus gur sháraigh an t‑achomharcóir rialacha trédhearcachta Airteagal 5(1)(a), Airteagal 13(1)(d) agus (2)(e) agus Airteagal 14 den Rialachán sin. (28)

29.      Maidir le torthaí agus fíneálacha nós imeachta, ceanglaítear leis an gcinneadh atá faoi chonspóid tréimhse chomhlíontachta an achomharcóra a laghdú ó 6 mhí go 3 mhí, áitítear leis go ndearna údarás maoirseachta na hÉireann léiriú mícheart ar an gcritéar maidir le candam na bhfíneálacha, agus sonraítear ann gur cheart méideanna na bhfíneálacha atá beartaithe ag an údarás sin a mhéadú. (29)

30.      Ag gníomhú ar na treoracha sin, rinne údarás maoirseachta na hÉireann athrú ar a dhréachtchinneadh agus ghlac sé an cinneadh náisiúnta críochnaitheach an 20 Lúnasa 2021. (30)

31.      An 1 Samhain 2021, thionscain an t‑achomharcóir caingean os comhair na Cúirte Ginearálta inar iarradh go gcuirfí an cinneadh atá faoi chonspóid ar neamhní.

32.      An 7 Nollaig 2022, ghlac an Chúirt Ghinearálta an t‑ordú atá faoi achomharc, lenar diúltaíodh do chaingean an achomharcóra toisc í a bheith neamh-inghlactha.

33.      San ordú sin, mheas an Chúirt Ghinearálta, go bunúsach, nach raibh an cinneadh atá faoi chonspóid ina ghníomh inchonspóide de réir bhrí mhír 1 d’Airteagal 263 CFAE agus nach de chúram an achomharcóra an cinneadh sin go díreach, de réir bhrí mhír 4 d’Airteagal 263 CFAE.

34.      Is mar seo a leanas atá leagan amach an ordaithe atá faoi achomharc:

–        I mír 40, cinneann an Chúirt Ghinearálta go mbaineann an cinneadh atá faoi chonspóid leis an achomharcóir go leithleach.

–        I míreanna 42 go 49, tugann an chúirt sin aghaidh ar an gceist an bhfuil an cinneadh atá faoi chonspóid ina ghníomh inchonspóide de réir bhrí mhír 1 d’Airteagal 263 CFAE, agus tagann sí ar an gconclúid nach gníomh den sórt sin é;

–        I míreanna 50 go 65, déanann an Chúirt Ghinearálta scrúdú an de chúram an achomharcóra an cinneadh atá faoi chonspóid go díreach de réir bhrí mhír 4 d’Airteagal 263 CFAE. Tagann sí ar an gconclúid nach ndéantar difear díreach do sheasamh dlíthiúil an achomharcóra leis agus go bhfágtar rogha d’údarás maoirseachta na hÉireann leis, sa chaoi nach gcomhlíontar na coinníollacha maidir le cúram díreach.

–        Mar fhocal scoir, mar sin, i gcoinne inghlacthacht de chaingean an achomharcóra le haghaidh neamhniú, i míreanna 66 go 71, míníonn an Chúirt Ghinearálta freisin an chúis a bhfuil a cinneadh i gcomhréir le loighic chóras na leigheasanna breithiúnacha a bhunaítear leis na Conarthaí.

C.      Nós imeachta os comhair na Cúirte Breithiúnais

35.      Lena achomharc a taisceadh an 17 Feabhra 2023, iarrann an t‑achomharcóir ar an gCúirt Bhreithiúnais an t‑ordú atá faoi achomharc a chur ar ceal, a chinneadh go bhfuil an chaingean inghlactha, an cás a tharchur ar ais chuig an gCúirt Ghinearálta chun cinneadh a dhéanamh ar shubstaint an ábhair, agus a ordú do BECS na costais a íoc.

36.      Rinne Rialtas na Gearmáine idirghabháil chun tacú le BECS.

37.      Tionóladh éisteacht an 26 Samhain 2024 inar chuir an t‑achomharcóir agus BECS argóintí ó bhéal isteach.

III. Anailís

38.      Cuireann an t‑achomharcóir dhá fhoras achomhairc ar aghaidh. Lena chéad fhoras achomhairc, maíonn sé go ndearna an Chúirt Ghinearálta léiriú mícheart ar na coincheapa ‘gníomh inchonspóide’, mar a eascraítear é as mír 1 d’Airteagal 263 CFAE, agus ‘cúram díreach’, mar atá i mír 4 de. Mar thoradh ar an earráid sin, cuireadh Airteagal 263 CFAE i bhfeidhm go mícheart sa chás seo, as ar thángthas go ndearna an Chúirt Ghinearálta an cinneadh atá faoi chonspóid a cháiliú go mícheart mar ghníomh nach féidir leis an achomharcóir conspóid a dhéanamh ina choinne. Sa dara foras achomhairc, maíonn an t‑achomharcóir go ndearna an Chúirt Ghinearálta léiriú mícheart ar Airteagal 65(1) de RGCS agus gur chuir sí i bhfeidhm é go mícheart i ndáil leis an gcinneadh atá faoi chonspóid.

39.      Sa Tuairim seo, molfaidh mé don Chúirt Bhreithiúnais a chinneadh gur chuir an Chúirt Ghinearálta an anailís a cheanglaítear faoi mhíreanna 1 agus 4 d’Airteagal 263 CFAE i bhfeidhm go mícheart maidir le sásra comhsheasmhachta a bunaíodh le RGCS. Mar sin, ba cheart seasamh leis an gcéad fhoras achomhairc agus an t‑ordú atá faoi achomharc a chur ar ceal. Ar an gcúis sin, ní gá déileáil leis an dara foras achomhairc.

40.      Lasmuigh de chomhthéacs láithreach an achomhairc seo, áfach, tugaim faoi deara go n‑ardaítear leis an gcás seo saincheist de chineál níos cothrománaí freisin: is é sin an cheist maidir leis na céimeanna anailíseacha ar cheart iad a leanúint chun a chinneadh inghlacthacht caingne le haghaidh neamhniú arna tionscnamh i gcoinne gníomh arna ghlacadh le linn nós imeachta ilchodach.

41.      Tá nósanna imeachta ilchodacha an‑éagsúil, le gach ceann acu deartha go sonrach le gníomh tánaisteach de chuid an Aontais lena dtugtar isteach iad chun an cuspóir a chomhlíontar leis an nós imeachta áirithe sin i réimse áirithe cinnteoireachta riaracháin atá bunaithe ar dhlí an Aontais.

42.      Má thuigtear go mícheart na céimeanna anailíseacha maidir le hinghlacthacht caingne le haghaidh neamhniú ag daoine nádúrtha nó dlítheanacha i gcoinne gníomhartha arna ndéanamh i nósanna imeachta den sórt sin a chinneadh, is dócha, i gcásanna amach anseo a bhaineann le cineálacha éagsúla nósanna imeachta ilchodacha, go ndiúltódh an Chúirt Ghinearálta, gan údar, rochtain ar Chúirteanna an Aontais do na daoine sin.

43.      Ní dhéantar athrú ar na coinníollacha lena rialaítear Airteagal 263 CFAE, áfach, d’ainneoin na leaganacha amach éagsúla sin. Dá réir sin, ba cheart na rialacha ginearálta maidir le hinghlacthacht caingne a thionscnaíonn daoine nádúrtha nó dlítheanacha i gcoinne gníomhartha arna nglacadh laistigh de nós imeachta ilchodach a chur i bhfeidhm ar an mbealach céanna – agus na céimeanna anailíseacha céanna á n‑úsáid – maidir le gach nós imeachta ilchodach den sórt sin, agus mionsonraí gach nós imeachta á gcur san áireamh.

44.      Mar a dhéanfaidh mé iarracht a léiriú i m’anailís, thug an Chúirt Ghinearálta roinnt céimeanna anailíseacha nach bhfuil gá leo (agus atá míthreorach), arna spreagadh ag mionsonraí shásra comhsheasmhachta RGCS, isteach ina measúnú ar na coinníollacha maidir le hinghlacthacht faoi Airteagal 263 CFAE. I mo thuairim féin, mar shampla, má fhiafraítear an bhfuil an cinneadh atá faoi chonspóid ina ghníomh idirmheánach laistigh den nós imeachta sin, baintear ón gceist ábhartha an gníomh críochnaitheach agus ceangailteach é an cinneadh sin, arb é an t‑aon cheist chuí a iarraidh i gcomhthéacs anailís atá le déanamh faoi mhír 1 d’Airteagal 263 CFAE. Ar an mbealach céanna, baintear leis an bhfiosrúchán i dtaobh an féidir an cinneadh atá faoi chonspóid a fhorghníomhú go díreach i gcoinne an achomharcóra ón gceist anailíseach an ndéantar leis an gcinneadh sin ann féin difear do sheasamh dlíthiúil an achomharcóra, mar a cheanglaítear le mír 4 d’Airteagal 263 CFAE.

45.      Nuair a thugann sí údar lena cinneadh maidir le (neamh-)inghlacthacht i gcás sonrach, is minic a dhéanann an Chúirt Bhreithiúnais tagairt do mhionsonraí an nós imeachta ilchodach a bhí faoi cheist sa chás seo, agus ní hannamh a dhéanann sí idirdhealú idir na mionsonraí sin agus tréithe nós imeachta eile inar tháinig sí ar chonclúid dhifriúil. (31) Ní féidir aon mhíniú den sórt sin ón gCúirt a ghinearálú ná a thrasuí go meicniúil i gcásanna nua. (32)

46.      Bhraith an Chúirt Ghinearálta ina hanailís ar roinnt breithiúnas ón gCúirt Bhreithiúnais, go háirithe na breithiúnais in IBM (33) agus Deutsche Post. (34)

47.      Molfaidh mé go ndéanfadh an Chúirt Bhreithiúnais athbhreithniú ar roinnt de na breithiúnais sin agus a shoiléiriú nach gcuirfí ráitis áirithe a rinneadh iontu leis na coinníollacha a bunaíodh le Conradh FAE. Ina ionad sin, ba é ba chuspóir dóibh cur i bhfeidhm rialacha an Chonartha a mhíniú maidir leis an gcás ar leith is bonn leis na cásanna sin. Mar thoradh ar atáirgeadh uathoibríoch i mbreithiúnais níos déanaí, a eascraítear as imthosca éagsúla, ar na ráitis a rinne an Chúirt i gcásanna níos luaithe – mar a rinne sí sa chás seo – d’fhéadfadh an Chúirt Ghinearálta teacht ar chonclúid mhícheart maidir le hinghlacthacht caingne le haghaidh neamhniú.

48.      Dá réir sin, tugtar leis an gcás seo an deis don Chúirt Bhreithiúnais míniú a thabhairt arís ar na céimeanna anailíseacha atá riachtanach agus leordhóthanach chun a shuí an féidir le duine aonair caingean dhíreach le haghaidh neamhniú a thionscnamh.

49.      Maidir leis sin, creidim go bhfuil sé tábhachtach go ndéanfadh an Chúirt Bhreithiúnais idirdhealú soiléir idir dhá chéim anailíseach is bonn leis na coinníollacha maidir le hinghlacthacht faoi Airteagal 263 CFAE: ar an gcéad dul síos, an anailís ar an gceist an bhfuil gníomh ina ghníomh inchonspóide chun críoch mhír 1 d’Airteagal 263 CFAE; agus, ar an dara dul síos, i gcás ina bhfuil an gníomh sin inchonspóide, an anailís, faoi mhír 4 d’Airteagal 263 CFAE, ar an bhfuil iarratasóir ar leith, ar duine nádúrtha nó dlítheanach é, i dteideal agóid a dhéanamh i gcoinne an ghnímh sin.

50.      I bhfianaise an mhéid roimhe seo, leagtar m’anailís amach mar seo a leanas. Tosóidh mé leis an réamh-shaincheist gur tionscnaíodh an bhunchaingean go déanach (A). Ina dhiaidh sin, tiocfaidh mé ar shubstaint an achomhairc chun a leagan amach an chúis a gceapaim gur cheart don Chúirt an t‑ordú atá faoi achomharc a chur ar neamhní. I bhfianaise leagan amach an chéad fhorais achomhairc, míneoidh mé ar dtús gur thóg an Chúirt Ghinearálta na coinníollacha chun a shuí an bhfuil an cinneadh atá faoi chonspóid ina ghníomh inchonspóide in ábhraíocht na gcoinníollacha chun a chinneadh an de chúram an achomharcóra go díreach é. Is ar an mbonn sin a chinnim gur tháinig an chúirt sin ar an gconclúid mhícheart nach bhfuil an cinneadh atá faoi chonspóid ina ghníomh inchonspóide (B). Ina dhiaidh sin, míneoidh mé go ndearna an Chúirt Ghinearálta earráid dlí freisin nuair a mheas sí nárbh de chúram an achomharcóra go díreach an cinneadh atá faoi chonspóid (C). Ar deireadh, léireoidh mé, murab ionann agus seasamh na Cúirte Ginearálta, go gceanglaítear le loighic chóras na leigheasanna breithiúnacha, mar a cheaptar faoi na Conarthaí agus mar a ndearna an Chúirt Bhreithiúnais léiriú air, go gcinnfear bailíocht an chinnidh atá faoi chonspóid i gcaingean dhíreach os comhair Chúirteanna an Aontais (D).

A.      Tionscnaíodh an chaingean go déanach

51.      Ina fhreagra, maíonn BECS gur tionscnaíodh caingean an achomharcóra go déanach. (35) Déanann BECS tagairt do litir i gcomhad na Cúirte, dar dáta an 16 Lúnasa 2021, óna ndealraíonn sé gur chuir údarás maoirseachta na hÉireann an t‑achomharcóir ar an eolas cheana féin an 13 Lúnasa 2021 maidir le ‘hábhar ábhartha’ an chinnidh atá faoi chonspóid sular fhoilsigh BECS ar a shuíomh gréasáin í. Dá réir sin, áitíonn BECS go rachadh an tréimhse chun caingean le haghaidh neamhniú a thaisceadh in éag an ‘25 Deireadh Fómhair 2021 ar a dhéanaí’, is é sin le rá, roimh an 1 Samhain 2021, an dáta ar ar comhdaíodh an t‑iarratas os comhair na Cúirte Ginearálta.

52.      Measaim gur cheart diúltú don argóint sin.

53.      Is léir ón gcásdlí go bhfuil an tagairt, i mír 6 d’Airteagal 263 CFAE, don lá ar ar tháinig an t‑iarratasóir ar an eolas faoi bheart ina fochuid de na critéir maidir leis an mbeart céanna a fhoilsiú nó fógra a thabhairt ina leith. (36)

54.      Sa chás seo, níor tugadh aon fhógra don achomharcóir faoin gcinneadh atá faoi chonspóid. Níl sé d’oibleagáid ar BECS ach fógra faoina chinneadh a thabhairt go díreach do LSA na hÉireann agus do na húdaráis mhaoirseachta náisiúnta lena mbaineann. (37)

55.      Dá réir sin, ní mór a chinneadh ar foilsíodh an cinneadh atá faoi chonspóid, de réir bhrí mhír 6 d’Airteagal 263 CFAE.

56.      Ní chuirtear aon choinníoll sonrach leis an ngníomh foilsithe le hAirteagal 263 CFAE.

57.      Ós rud é go raibh an Chúirt Bhreithiúnais i bhfabhar léiriú a dhéanamh ar na teorainneacha ama a fhorordaítear leis na Conarthaí ar bhealach ina seachnaítear aon teorannú míchuí ar an gceart chun leigheas breithiúnach éifeachtach a fháil, (38) áfach, ní mór coincheap ‘foilsiú’ a thuiscint go leathan. (39)

58.      Maidir leis sin, bhí deis ag an gCúirt a chinneadh cheana féin go gcomhlíontar leis an bhfoilsiú ar shuíomh gréasáin, i gcás ina sainordaítear é le dlí tánaisteach an Aontais, an ceanglas maidir le ‘foilsiú’, mar atá i mír 6 d’Airteagal 263 CFAE. (40)

59.      Sa chás seo, sainordaítear leis an tríú habairt d’Airteagal 65(5) de RGCS cinntí ceangailteacha BECS a fhoilsiú, amhail an cinneadh atá faoi chonspóid.

60.      Ós rud é go ndearna an t‑achomharcóir agóid i gcoinne an chinnidh atá faoi chonspóid laistigh de na teorainneacha ama is infheidhme óna dháta foilsithe ar shuíomh gréasáin BECS (an 2 Meán Fómhair 2021), ní bhaineann sé le hábhar chun críocha inghlacthacht na caingne seo le haghaidh neamhniú go bhféadfadh sé a bheith ar an eolas freisin faoi ábhar ábhartha an chinnidh sin roimh a fhoilsiú sainordaithe. (41)

61.      I bhfianaise an mhéid roimhe seo, ní gá an tráth beacht ar tháinig an t‑achomharcóir ar an eolas faoi ábhar an chinnidh atá faoi chonspóid a chinneadh.

62.      Molaim, dá réir sin, go ndiúltódh an Chúirt d’argóint BECS gur tionscnaíodh an chaingean os comhair na Cúirte Ginearálta go déanach.

B.      Tá an cinneadh atá faoi chonspóid ina ghníomh inchonspóide

1.      Dhá shaincheist atá ar leithligh go hanailíseach

63.      Leis an gcéad argóint agus leis an dara hargóint ar an gcéad fhoras achomhairc, maíonn an t‑achomharcóir, contrártha do sheasamh na Cúirte Ginearálta, nach gceanglaítear anailís a dhéanamh ar an gceist an dtagtar athrú ar leith leis an ngníomh sin ar sheasamh dlíthiúil an achomharcóra mar thoradh ar an gceist an bhfuil gníomh ina ghníomh inchonspóide.

64.      Aontaím leis an achomharcóir. Ní hionann an cheist an bhfuil beart ina ghníomh inchonspóide agus an cheist an féidir le hiarratasóir nithiúil, ar duine nádúrtha nó dlítheanach é, agóid a dhéanamh i gcoinne an ghnímh sin – ar choinníoll gur gníomh inchonspóide é – sa chéad áit.

65.      Baineann an cheist an bhfuil gníomh ina ghníomh inchonspóide leis an anailís faoi mhír 1 d’Airteagal 263 CFAE. Chuige sin, tá gá le modh anailíse atá éagsúil agus ar leithligh lena gcuirtear ceisteanna atá éagsúil leis na ceisteanna sin atá ábhartha chun a shuí an ndéantar difear do sheasamh dlíthiúil an iarratasóra le gníomh (a bhaineann le mír 4 d’Airteagal 263 CFAE).

66.      Eascraítear an chonclúid sin as foclaíocht, leagan amach agus stair Airteagal 263 CFAE (a) agus níl sí contrártha do chásdlí na Cúirte Breithiúnais (b).

(a)    Téacs, leagan amach agus stair Airteagal 263 CFAE

67.      Tá roinnt cúiseanna ann ar cheart an measúnú ar an gceist an ionann an cinneadh atá faoi chonspóid agus an cineál gnímh is féidir a bheith faoi réir measúnú bailíochta ag Cúirteanna an Aontais a bheith ar leithligh ón gceist an ndéanann an gníomh sin difear do sheasamh dlíthiúil an achomharcóra.

68.      Ar an gcéad dul síos, déantar foráil i mír 1 d’Airteagal 263 CFAE maidir leis an gcineál gnímh is féidir agóid a dhéanamh ina choinne os comhair Chúirteanna an Aontais. Déantar an cinneadh sin gan aird a thabhairt ar an duine a thionscnaíonn an agóid.

69.      Mar sin, ní mór gurb ionann an freagra ar an gceist an bhfuil gníomh ina ghníomh inchonspóide agus ar tionscnaíodh an chaingean le haghaidh neamhniú le hiarratasóir atá faoi phribhléid (mar a liostaítear i mír 2 d’Airteagal 263 CFAE), le hiarratasóir atá faoi leathphribhléid (mar a liostaítear i mír 3 de), nó le hiarratasóir nach bhfuil faoi phribhléid (mar a liostaítear i mír 4 de).

70.      Ar an dara dul síos, ceanglaítear leis an bhfreagra ar an gceist an bhfuil gníomh inchonspóide measúnú a dhéanamh ar an bhféadfaí leis an ngníomh sin éifeachtaí dlíthiúla ceangailteacha a bheith aige i leith tríú páirtí. (42) Ní gá gurb ionann an páirtí sin agus an páirtí a thionscnaíonn an chaingean le haghaidh neamhniú atá faoi cheist.

71.      Eascraíonn an ceanglas sin, mar a mhíneoidh mé thíos, as foclaíocht reatha mhír 1 d’Airteagal 263 CFAE, atá mar thoradh ar roinnt leasuithe, agus as cásdlí na Cúirte, a raibh ina cheann feadhna ar na hathruithe sin.

72.      Ina leagan reatha, foráiltear i mír 1 d’Airteagal 263 CFAE an méid seo a leanas mar ghníomhartha inchonspóide, (i) gníomhartha reachtacha, (ii) gníomhartha ón gComhairle, ón gCoimisiún agus ón mBanc Ceannais Eorpach seachas moltaí agus tuairimí agus (iii) gníomhartha ó Pharlaimint na hEorpa agus ón gComhairle Eorpach, chomh maith le gníomhartha ó chomhlachtaí, oifigí nó gníomhaireachtaí de chuid an Aontais atá beartaithe chun éifeachtaí dlíthiúla a bheith acu i leith tríú páirtithe.

73.      Níor liostaíodh i gConradh bunaidh CEE na gníomhartha ar féidir agóid a dhéanamh ina gcoinne, ach níor sainmhíníodh iad ach ar bhealach diúltach, mar ‘ghníomhartha dlí an Choimisiúin agus na Comhairle, seachas moltaí agus tuairimí’. (43)

74.      Ós rud é go sainmhínítear moltaí agus tuairimí sa Chonradh mar ghníomhartha nach bhfuil aon fheidhm cheangailteach acu, (44) tháinig an Chúirt ar an gconclúid go bhfuil na gníomhartha uile (de chuid institiúidí agus comhlachtaí eile an Aontais) ina ngníomhartha inchonspóide, d’ainneoin a bhfoirme nó a n‑ainm, a bhfuil sé beartaithe éifeachtaí dlíthiúla ceangailteacha a bheith acu. (45)

75.      Mura bhfuil éifeachtaí dlíthiúla ceangailteacha ag gníomh, tá an chaingean neamh-inghlactha, gan beann ar ar tionscnaíodh í le hiarratasóirí atá faoi phribhléid nó le hiarratasóirí nach bhfuil faoi phribhléid. (46)

76.      Mar sin, ní gá an cheist ina dhiaidh sin a chur, an ndéantar an gníomh difear do sheasamh dlíthiúil an iarratasóra, de bhun mhír 4 d’Airteagal 263 CFAE. (47)

77.      Eascraíonn sé as an gcásdlí agus as foclaíocht mhír 1 d’Airteagal 263 CFAE go bhfuil gníomh ceangailteach ó thaobh dlí má tá sé ceaptha chun éifeacht dhlíthiúil a bheith acu i leith tríú páirtithe. Cad atá i gceist leis sin?

78.      Chun go measfaí go mbeadh éifeachtaí dlíthiúla ceangailteacha ag gníomh i leith tríú páirtithe, ní mór éifeachtaí dlíthiúla a bheith aige lasmuigh den institiúid nó den chomhlacht a ghlac é. Mura gcruthaítear leis an ngníomh oibleagáidí ach ‘go hinmheánach’, is é sin le rá don institiúid chéanna a ghlac é, ach ní chruthaítear iad leis ‘go seachtrach’, is é sin le rá do thríú páirtithe, ní hionann an gníomh sin agus gníomh inchonspóide. (48)

79.      Ní gá gurb é an t‑iarratasóir an tríú páirtí a bhfuil éifeachtaí ceangailteacha ó thaobh dlí ag an ngníomh ina leith. (49)

80.      Shoiléirigh an Chúirt a thuilleadh nach bhfuil éifeachtaí ag gníomh lasmuigh den institiúid ach amháin más rud é, leis an ngníomh sin, gur chuir an institiúid sin a ghlac é a seasamh críochnaitheach in iúl. (50)

81.      Bíonn seasamh críochnaitheach mura féidir leis an institiúid nó leis an gcomhlacht a ghlac an gníomh athrú a dhéanamh air a thuilleadh; is é sin le rá, ní fhéadfaí leis cosc a chur ar na héifeachtaí dlíthiúla a eascraítear as an ngníomh sin ach trí é a chúlghairm. (51) Mura gcúlghairtear an gníomh críochnaitheach lena údar, is é an t‑aon bhealach a bhféadfaí a éifeachtaí dlíthiúla a chur ar neamhní is ea tríd an ngníomh sin a neamhbhailiú in imeachtaí breithiúnacha.

82.      Ar bhonn an mhéid thuasluaite, ciallaítear leis sin a méid seo a leanas maidir leis an gcás seo: chun a chinneadh an bhfuil an cinneadh atá faoi chonspóid ina ghníomh inchonspóide, ba ghá agus ba leor go suífeadh an Chúirt Ghinearálta gur léiríodh leis an gcinneadh atá faoi chonspóid seasamh críochnaitheach BECS agus gur forchuireadh leis an gcinneadh sin oibleagáid ar dhuine lasmuigh den chomhlacht sin; sa chás seo, údarás maoirseachta na hÉireann.

83.      Maidir leis an measúnú sin, níor ghá measúnú a dhéanamh ar an dtagtar athrú ar leith ar sheasamh dlíthiúil an achomharcóra freisin mar thoradh ar an ngníomh sin. Is ceist í an ceann deireanach sin a bhaineann le cúram díreach agus ní bhaineann sé le cáilíocht an ghnímh inchonspóide. (52)

84.      An dtugtar conclúid dhifriúil le fios leis an gcásdlí ar a bhfuil an Chúirt Ghinearálta ag brath?

(b)    An cásdlí lena gcumasctar an dá choinníoll de réir cosúlachta

85.      I mír 41 den ordú atá faoi achomharc, mhínigh an Chúirt Ghinearálta nach mór di scrúdú a dhéanamh ‘an bhfuil éifeachtaí dlíthiúla ag an gcinneadh atá faoi chonspóid lena dtagann athrú ar leith ar sheasamh dlíthiúil WhatsApp agus an de chúram Whatsapp go díreach é de réir bhrí mhír 4 d’Airteagal 263 CFAE’. (53)
[Aistriúchán neamhoifigiúil]

86.      Maidir le conclúid na Cúirte Ginearálta go bhfuil an measúnú ar an dtagtar athrú ar leith ar sheasamh dlíthiúil WhatsApp le cinneadh atá faoi chonspóid, ar thaobh amháin, agus an measúnú an de chúram na cuideachta sin an cinneadh úd go díreach, ar an taobh eile, ina dhá anailís ar leith atá le déanamh, dealraíonn sé go bhfuil sí bunaithe ar an gcásdlí a luaitear inti, eadhon na breithiúnais in IBM  agus Deutsche Post. (54)

87.      Mar sin, déanfaidh mé athbhreithniú ar na breithiúnais sin.

88.      I mír 9 den bhreithiúnas in IBM, shonraigh an Chúirt Bhreithiúnais go bhfuil ‘aon bheart a bhfuil a éifeachtaí dlíthiúla ceangailteacha ar an iarratasóir agus a d’fhéadfaí difear a dhéanamh dá leasanna trí athrú ar leith a dhéanamh ar a sheasamh dlíthiúil, ina ghníomh nó ina chinneadh a d’fhéadfaí a bheith ina ábhar caingne faoi Airteagal 173’. (55)
[Aistriúchán neamhoifigiúil]

89.      Rinneadh léiriú ar an bhfoclaíocht sin, ar baineadh úsáid aisti arís agus arís eile i líon mór breithiúnas ina dhiaidh sin, ón gCúirt Bhreithiúnais (56) agus ón gCúirt Ghinearálta (57) araon, ar bhealach a dtugtar le tuiscint go gcuimsítear freisin leis an gceist an bhfuil gníomh ina ghníomh inchonspóide faoi mhír 1 d’Airteagal 263 CFAE an measúnú ar an ndéantar difear do sheasamh dlíthiúil an iarratasóra agus d’fhéadfaí go leanfaí den léiriú céanna a dhéanamh uirthi. (58) Is mar sin freisin a dhealraíonn sé gur thuig an Chúirt Ghinearálta mír 9 den bhreithiúnas in IBM  (féach mír 86 den Tuairim seo).

90.      I mo thuairim féin, ní tuiscint cheart (nó úsáideach) é sin ar an mír sin.

91.      Léim mír 9 den bhreithiúnas in IBM  mar nochtadh na Cúirte Breithiúnais – in aon abairt amháin – maidir leis na coinníollacha uile is gá a chomhlíonadh dá bhfaigheadh iarratasóir nach bhfuil faoi phribhléid rochtain ar Chúirteanna an Aontais: is é sin le rá, iadsan a eascraítear as mír 1 d’Airteagal 263 CFAE, ar thaobh amháin, agus iadsan a eascraítear as mír 4 d’Airteagal 263 CFAE, ar an taobh eile.

92.      Leis an abairt sin, ní chuireann an Chúirt Bhreithiúnais an cheist maidir le héifeachtaí an ghnímh ar an iarratasóir mar chuid den mheasúnú ar chomhlíonadh na gcoinníollacha faoi mhír 1 d’Airteagal 263 CFAE. Go deimhin, féadfar a mheas fós go bhfuil gníomh ina ghníomh inchonspóide go ginearálta, fiú mura féidir le hiarratasóir áirithe nach bhfuil faoi phribhléid agóid a dhéanamh ina choinne, i gcás sonrach, toisc nach dtagtar athrú ar leith leis ar sheasamh dlíthiúil an iarratasóra sin.

93.      I mo thuairim féin, rinne an Chúirt iarracht an mearbhall a d’fhéadfaí a bheith ann tríd an bhfrása a úsáidtear arís agus arís eile sa bhreithiúnas in IBM sna míreanna seo a leanas den bhreithiúnas in Deutsche Post a dhíbirt:

‘36       De réir cásdlí comhsheasmhach, a forbraíodh i gcomhthéacs caingne le haghaidh neamhniú arna dtionscnamh ag Ballstáit nó ag institiúidí, aon bheart arna ghlacadh ag na hinstitiúidí, gan beann ar a fhoirm, a bhfuil sé beartaithe éifeachtaí dlíthiúla ceangailteacha a bheith acu, meastar gur gníomhartha iad ar féidir agóid a dhéanamh ina gcoinne, de réir bhrí Airteagal 263 CFAE …

37      I gcás ina dtionscnaíonn duine nádúrtha nó dlítheanach an chaingean le haghaidh neamhniú i gcoinne gníomh arna ghlacadh ag institiúid, [chinn] an Chúirt Bhreithiúnais arís agus arís eile nach luíonn ábhar caingne ann ach amháin más rud é go bhféadfaí éifeachtaí dlíthiúla ceangailteacha atá ag an ngníomh sin difear a dhéanamh do leasanna an iarratasóra trí athrú ar leith a dhéanamh ar a sheasamh dlíthiúil … (59)

38      Ní mór a chur i dtábhacht go láidir, áfach, gur forbraíodh an cásdlí a luaitear sa mhír thuas i gcomhthéacs caingne arna dtionscnamh os comhair bhreithiúnacht an Aontais ag daoine nádúrtha nó dlítheanacha i gcoinne bearta ar díríodh orthu. Más rud é, mar atá sa chás is cúis leis an ordú in Deutsche Post v an Coimisiún, [(60)] go dtionscnaíonn iarratasóir nach bhfuil faoi phribhléid caingean le haghaidh neamhniú i gcoinne gníomh nach bhfuil dírithe air, tá forluí idir an ceanglas nach mór éifeachtaí dlíthiúla ceangailteacha an bhirt a bhfuil agóid á déanamh ina choinne a bheith de chineál a dhéanfaí difear do leasanna an iarratasóra sin trí athrú ar leith a dhéanamh ar a sheasamh dlíthiúil agus na coinníollacha a leagtar síos i mír 4 d’Airteagal 263 CFAE’.
[Aistriúchán neamhoifigiúil]  

94.      I mo thuairim féin, sa bhreithiúnas in Deutsche Post, d’iarr an Chúirt lena shoiléiriú go mbaineann mír 9 dá breithiúnas in IBM le cás ina bhfuil iarratasóir nach bhfuil faoi phribhléid ina dhuine ar a bhfuil an gníomh atá faoi chonspóid dírithe. Is amhlaidh sin, i gcás den sórt sin, toisc gur gá go gceanglaítear leis an bhfreagra ar an gceist an bhfuil éifeachtaí dlíthiúla ceangailteacha ag gníomh i leith tríú páirtithe measúnú a dhéanamh ar an bhfuil éifeachtaí ag an ngníomh sin i ndáil leis an iarratasóir mar dhuine ar a bhfuil an gníomh dírithe. I gcás den sórt sin, is iad na ceisteanna céanna an cheist an bhfuil éifeachtaí dlíthiúla ceangailteacha ag gníomh agus an cheist an ndéantar athrú leis ar staid dhlíthiúil an iarratasóra.

95.      Nuair nach é an t‑iarratasóir nach bhfuil faoi phribhléid an duine ar a bhfuil an gníomh atá faoi cheist dírithe, áfach, is í an cheist an dtagtar athrú ar leith leis an ngníomh sin ar a sheasamh dlíthiúil a bhaineann le cúram díreach, nach mór measúnú a dhéanamh air faoi mhír 4 d’Airteagal 263 CFAE – agus ní faoi mhír 1 de.

96.      Leis an bhfoclaíocht a luaitear go mícheart go minic, ar dá réir atá ‘forluí’ idir an cheist an bhfuil éifeachtaí dlíthiúla ag an ngníomh lena dtagtar athrú ar leith agus an ceanglas maidir le cúram díreach i mír 4 d’Airteagal 263 CFAE, cuirtear in iúl léi go dtuigtear don Chúirt nach mór measúnú ar leithligh a dhéanamh ar an gceist maidir le cúram díreach agus sa bhreis ar an gceist an bhfuil éifeachtaí dlíthiúla ceangailteacha ag an ngníomh.

97.      Ina cásdlí is déanaí, lean an Chúirt de ghnáth, tar éis di mír 38 den bhreithiúnas in Deutsche Post a lua, leis an anailís ar an bhfuil an gníomh atá i gceist ina chúram díreach don iarratasóir nach bhfuil faoi phribhléid nach bhfuil an ghníomh a bhfuil agóid á déanamh ina choinne dírithe air. (61)

98.      Mar sin, níor cheart breithiúnas in IBM, mar a mhínítear leis an mbreithiúnas in  Deutsche Post,  a léamh ar bhealach ina dtagtar le chéile na ceanglais faoi mhír 1 agus mír 4 d’Airteagal 263 CFAE maidir le cásanna ina ndírítear gníomh ar dhuine seachas an t‑iarratasóir.

99.      I gcás den sórt sin, is é sin le rá, i gcás ina bhfuil an gníomh dírithe ar dhuine seachas an t‑iarratasóir, tá an ceanglas go bhfuil an gníomh ceangailteach ó thaobh dlí ar leithligh ón gceanglas go dtiocfaí athrú ar leith leis an ngníomh sin ar sheasamh dlíthiúil an iarratasóra.

100. Sa chás seo, chun freagra a thabhairt ar an gceist an bhfuil caingean arna tionscnamh ag iarratasóir inghlactha, ní leor éifeachtaí dlíthiúla ceangailteacha a bheith ag an ngníomh atá faoi cheist ar a dhuine ar a bhfuil sé dírithe nó ar dhuine eile; ní mór don Chúirt a mheas freisin an ndéantar leis an ngníomh atá faoi cheist difear do sheasamh dlíthiúil an iarratasóra. Is é sin an méid a cheanglaítear leis an gcoinníoll breise maidir le hinghlacthacht a eascraítear as mír 4 d’Airteagal 263 CFAE.

101. Ina breithiúnas in Deutsche Post, lean an Chúirt an mhodheolaíocht sin go beacht agus shuigh sí, in dhá chéim ar leith, sa chéad áit, go bhfuil an beart ceangailteach ó thaobh dlí, agus, ina dhiaidh sin amháin, go mbaineann sé go díreach leis an iarratasóir nach bhfuil faoi phribhléid. Tá sé tábhachtach freisin, sa chuid den anailís a bhaineann leis an gceist an raibh an beart ceangailteach ó thaobh dlí, nár mheas an Chúirt go raibh sé ábhartha a chinneadh an raibh an beart sin ullmhaitheach laistigh den nós imeachta níos mó inar achtaíodh é. (62) De réir na Cúirte, ba é an rud a bhí tábhachtach, chun críocha na hanailíse sin, ná go raibh éifeachtaí dlíthiúla neamhspleácha ag an gcinneadh, lenar cumasaíodh go bhféadfaí leis a bheith ina ábhar do chaingean le haghaidh neamhniú. (63) Níor lean an Chúirt Bhreithiúnais ar aghaidh leis an dara céim den anailís ach amháin tar éis di a shuí go ndearna an Chúirt Ghinearálta earráid dlí nuair a mheas sí nach raibh an cinneadh a ndearnadh agóid ina choinne ceangailteach ó thaobh dlí mar gheall ar a chineál ullmhúcháin, (64) chun a chinneadh an de chúram díreach agus leithleach an iarratasóra nach bhfuil faoi phribhléid atá faoi cheist an beart sin freisin, sa chás sin, Deutsche Post AG. (65)

102. I mo thuairim féin, mar sin, is é is cuspóir do na dtrí mhír den bhreithiúnas in Deutsche Post go beacht, a luaitear i mír 93 den Tuairim seo, go mbainfear an mearbhall a d’fhéadfaí a bheith ann a eascraítear as an mbreithiúnas in IBM agus go ndéanfar idirdhealú idir an anailís ar an gcineál atá ceangailteach ó thaobh dlí den ghníomh a bhfuil agóid á déanamh ina choinne agus an anailís ar an gceist an ndéantar difir do sheasamh dlíthiúil an iarratasóra leis an ngníomh sin.

103. Sa chás seo, ní dhearna an Chúirt Ghinearálta idirdhealú idir an dá chéim anailíseacha sin. Ós rud é nach ndéantar leis an gcinneadh atá faoi chonspóid, ann féin, difear do sheasamh dlíthiúil an achomharcóra, tháinig an chúirt ar an gconclúid go hearráideach nach bhfuil an cinneadh atá faoi chonspóid ina ghníomh inchonspóide. San anailís sin, níor dhírigh an Chúirt Ghinearálta ar an gceist an bhfuil éifeachtaí ceangailteacha ó thaobh dlí ag an gcinneadh atá faoi chonspóid i leith tríú páirtithe. Ina ionad sin, dhírigh an chúirt sin ar an gceist ar cheart breathnú ar an ngníomh sin mar idirmheánach ó thaobh an iarratasóra de. (66) Agus an méid sin á dhéanamh aici, rinne an Chúirt Ghinearálta earráid ar an mbealach céanna agus a rinne sí ina hordú in Deutsche Post v an Coimisiún (67) mórán blianta roimhe sin, agus chuir an Chúirt Bhreithiúnais ar neamhní é ina breithiúnas in Deutsche Post.

104. I mo thuairim féin, tá an cheist an bhfuil gníomh ‘idirmheánach’ nó ‘ullmhúcháin’ iomarcach agus déantar léi an anailís faoi mhíreanna 1 agus 4 d’Airteagal 263 CFAE níos casta ná mar is gá. Mar a léirítear sa chás seo, d’fhéadfaí conclúid mhícheart maidir le hinghlacthacht caingne le haghaidh neamhniú a bheith mar thoradh ar spleáchas dogmach ar na coincheapa sin. Athróidh mé go dtí an tsaincheist sin anois.

2.      Na ceisteanna iomarcacha an bhfuil gníomh ‘ullmhúcháin’/‘idirmheánach’ agus an bhfuil sé ‘infhorfheidhmithe’

105. I mír 42 den ordú atá faoi achomharc, mheas an Chúirt Ghinearálta go raibh sé ábhartha dá measúnú ar inghlacthacht go bhfuil an cinneadh atá faoi chonspóid (i) ina ghníomh ‘ullmhúcháin’ nó ‘idirmheánach’ i nós imeachta nach mór a dhúnadh le cinneadh críochnaitheach ón údarás maoirseachta náisiúnta agus (ii) nach bhfuil an cinneadh sin infhorfheidhmithe go díreach i gcoinne an achomharcóra.

106. Níl ceachtar den dá fhachtóir sin – cineál ‘ullmhúcháin’ nó ‘idirmheánach’ an ghnímh nó a in‑fhorfheidhmitheacht dhíreach i gcoinne an achomharcóra – ábhartha go hanailíseach chun an cheist a fhreagairt an bhfuil an gníomh sin ina ghníomh inchonspóide chun críocha mhír 1 d’Airteagal 263 CFAE.

107. Tá na tosca sin chomh neamhábhartha céanna sa mheasúnú an de chúram an achomharcóra an gníomh sin go díreach faoi mhír 4 d’Airteagal 263 CFAE (a dtabharfaidh mé aghaidh air i Roinn C thíos).

108. Mar an gcéanna, an cheist an bhfuil an gníomh atá faoi cheist ‘críochnaitheach’, is é sin le rá nach bhfuil an cheist an ndúntar leis nós imeachta ilchodach áirithe, nó an bhfuil gníomh ‘eile’ de chuid an chomhlachta chéanna nó an chomhlachta eile atá le déanamh ábhartha chun a chinneadh an bhfuil an gníomh atá cheist faoi réir agóide. Go deimhin, mar a mhíním i mír 78 den Tuairim seo, is í an cheist cheart atá le cur maidir leis an measúnú ar an féidir agóid a dhéanamh i gcoinne gnímh ná an bhfuil éifeachtaí dlíthiúla neamhspleácha ag an ngníomh sin – éifeachtaí nach bhféadfar a bheith aige ach amháin má tá sé cinntitheach nó críochnaitheach ó thaobh na hinstitiúide nó an chomhlachta a ghlac é.

109. San ordú atá faoi achomharc, bhraith an Chúirt Ghinearálta ar mhír 10 den bhreithiúnas in IBM chun teacht ar an gconclúid go bhfuil prionsabal ann ar dá réir nach bhfuil gníomhartha idirmheánacha ina ngníomhartha ar féidir agóid a dhéanamh ina gcoinne. (68) Tar éis di an prionsabal sin a bhunú, mhínigh an Chúirt Ghinearálta gur eisceacht é an fhéidearthacht agóid a dhéanamh i gcoinne gníomh idirmheánach, atá ann nuair a bhíonn éifeachtaí dlíthiúla neamhspleácha ag gníomh den sórt sin. (69)

110. I mír 10 dá breithiúnas in IBM, leag an Chúirt Bhreithiúnais síos an méid seo a leanas: ‘i bprionsabal, ní fhéadfar athbhreithniú a dhéanamh ar ghníomh ach más beart é lena leagtar síos go cinntitheach seasamh an Choimisiúin nó na Comhairle maidir le conclúid an nós imeachta sin’. (70) Dá réir sin, mhínigh an Chúirt Bhreithiúnais gur cheart an anailís ar gcineál inchonspóide gnímh a dhíriú ar an gceist an léirítear leis an ngníomh seasamh cinntitheach na hinstitiúide, ó thaobh na hinstitiúide sin.

111. Mar sin, níor nochtadh leis an mbreithiúnas in IBM  go bhfuil prionsabal ann ar dá réir nach féidir agóid a dhéanamh i gcoinne gníomhartha idirmheánacha.

112. Ina theannta sin, níor bhain an breithiúnas in IBM  fiú le nós imeachta ilchodach, ach le nós imeachta a rinne an Coimisiún amháin. I gcomhthéacs an nós imeachta sin, rinne an Chúirt measúnú ar ábharthacht na gcéimeanna éagsúla den nós imeachta inmheánach laistigh den Choimisiún chun teacht ar an gconclúid nár léiríodh leis an litir a ndearnadh agóid ina coinne sa chás sin seasamh cinntitheach na hinstitiúide sin. (71)

113. Mar sin, ní fhéadfar an téarma ‘idirmheánach’ nó ‘ullmhúcháin’ a bheith ábhartha ach amháin má úsáidtear é i gcoinne an téarma ‘cinntitheach’ nó ‘críochnaitheach’ laistigh de nós imeachta inmheánach institiúide nó comhlachta. (72)

114. Dá dtuigfí gníomh mar ‘idirmheánach’, agus mar sin nach bhféadfaí agóid a dhéanamh ina choinne, de bharr a áite sa nós imeachta ilchodach amháin ina mbeidh gníomh eile ann, ó thaobh an iarratasóra, a dhíreofar ar an iarratasóir sin, ní bheadh duine aonair in ann agóid a dhéanamh choíche i gcoinne an ghnímh iarbhír lena ndéantar difear dá sheasamh dlíthiúil agus mar sin is de chúram díreach an duine aonair sin é. Bheadh sé sin contrártha do mhír 4 d’Airteagal 263 CFAE.

115. Mar a úsáidtear sa chás seo, ós rud é go ndíríonn an Chúirt Ghinearálta ar chineál ‘idirmheánach’ nó ‘ullmhúcháin’ an chinnidh atá faoi chonspóid, baintear, mar sin, an anailís ón aon cheist ábhartha amháin faoi mhír 1 d’Airteagal 263 CFAE: is é sin, an ionann seasamh BECS, mar a léirítear é sa chinneadh atá faoi chonspóid, agus seasamh críochnaitheach an chomhlachta sin, eadhon seasamh atá ceangailteach i leith tríú páirtí, gan beann ar an bhfíoras go leanfar leis an ngníomh eile chun an nós imeachta a leagtar síos i sásra comhsheasmhachta RGCS a ‘dhúnadh’.

116. Sa chás seo, is é gníomh BECS an cinneadh atá faoi chonspóid. Leis an gcinneadh sin, glacann an comhlacht sin a sheasamh críochnaitheach maidir leis an gceist, ar an gcéad dul síos, an ionann ‘sonraí caillteacha haiseáilte’ mar a úsáideann an t‑achomharcóir iad, agus ‘sonraí pearsanta’, de réir bhrí RGCS agus, ar an dara dul síos, ar sháraigh an t‑achomharcóir rialacha trédhearcachta RGCS. Tá éifeacht dhlíthiúil ag an dá thoradh chríochnaitheacha sin go gcuirtear d’oibleagáid ar údarás maoirseachta na hÉireann, ina ról mar LSA, a dhréachtchinneadh a leasú (is é sin, an cinneadh féin inar mhol sé roimhe sin teacht ar chonclúid dá mhalairt). Leis an gcinneadh atá faoi chonspóid, cuireann BECS d’oibleagáid ar an údarás sin an tréimhse chomhlíontachta ábhartha a laghdú agus tugann sé treoracha ceangailteacha maidir leis an gcaoi leis na fíneálacha atá faoi cheist a ríomh. Mar thoradh air sin, méadófar na fíneálacha sin i gcomparáid leis na fíneálacha a bhí beartaithe ag údarás maoirseachta na hÉireann a ghearradh. Tá na torthaí sin críochnaitheach ó thaobh BECS sa mhéid go leagtar síos seasamh cinntitheach an chomhlachta sin maidir leis na ceisteanna a tharchuirtear chuige. Ar an mbealach sin, cruthaítear leo oibleagáid (73) d’údarás maoirseachta na hÉireann nach bhféadfar a chur ar neamhní ach má chúlghaireann BECS a chinneadh nó má chuireann Cúirteanna an Aontais ar neamhní é.

117. Ós rud é go bhfuil an cinneadh sin críochnaitheach, agus ós rud é go bhfuil éifeachtaí dlíthiúla ceangailteacha aige lasmuigh den chomhlacht a ghlac é, is é sin le rá i leith údarás maoirseachta na hÉireann, ba cheart go dtiocfadh an Chúirt Ghinearálta ar an gconclúid go gcomhlíontar leis an gcinneadh atá faoi chonspóid coinníollacha mhír 1 d’Airteagal 263 CFAE agus mar sin ba cheart go n‑aicmeofaí é mar ghníomh inchonspóide.

118. Is é an dara gné iomarcach a thug an Chúirt Ghinearálta isteach ina hanailís in‑fhorfheidhmitheacht dhíreach chinneadh BECS i gcoinne WhatsApp.

119. Is féidir liom tuairisc ghairid a dhéanamh air sin: ós rud é nach mbraitear le cinneadh maidir leis an gcumas agóid a dhéanamh i gcoinne gnímh ar an ndéantar athrú leis ar sheasamh dlíthiúil iarratasóra nó ar an gcaoi a ndéantar athrú air leis, ní féidir an cheist maidir le hin‑fhorfheidhmitheacht dhíreach an chinnidh atá faoi chonspóid i gcoinne WhatsApp a bheith ábhartha don anailís faoi mhír 1 d’Airteagal 263 CFAE. Thairis sin, mar a áiteoidh mé níos déanaí, níl an in‑fhorfheidhmitheacht dhíreach i gcoinne an pháirtí sin ábhartha freisin mar chritéar chun measúnú a dhéanamh an de chúram díreach na cuideachta sin cinneadh BECS.

3.      Conclúid eatramhach

120. Leis an bhfreagra ar an gceist an bhfuil gníomh institiúide nó comhlachta de chuid an Aontais Eorpaigh ina ghníomh inchonspóide os comhair Chúirteanna an Aontais, de réir bhrí mhír 1 d’Airteagal 263 CFAE, ceanglaítear measúnú a dhéanamh ar an léirítear leis an ngníomh sin seasamh cinntitheach na hinstitiúide sin nó an chomhlachta sin a bhfuil éifeachtaí dlíthiúla ceangailteacha aige do dhuine lasmuigh den institiúid sin nó den chomhlacht sin.

121. Chun freagra a thabhairt ar an gceist an ndéantar agóid i gcoinne an ghnímh os comhair Chúirteanna an Aontais, ní gá gurb ionann an tríú duine a bhfuil éifeachtaí dlíthiúla ceangailteacha ag an ngníomh air agus an tríú duine a thionscain an chaingean le haghaidh neamhniú.

122. Réitítear an cheist an bhfuil sé de chumas ag an duine a thionscain an chaingean i gcoinne gníomh inchonspóide agóid a dhéanamh i gcoinne an ghnímh sin faoi mhír 4 d’Airteagal 263 CFAE agus ní faoi mhír 1 de.

123. Chun a shuí an bhfuil gníomh inchonspóide, ní bhaineann sé le hábhar go bhfuil an gníomh sin ina chéim ‘idirmheánach’ de nós imeachta ilchodach.

124. Trí dhíriú ar an bhfíoras nach ionann cinneadh atá faoi chonspóid agus an cinneadh críochnaitheach laistigh den sásra comhsheasmhachta atá beartaithe ag RGCS, in ionad measúnú a dhéanamh ar an ionann an cinneadh sin agus cinneadh críochnaitheach nó cinntitheach BECS a bhfuil éifeachtaí dlíthiúla ceangailteacha aige ar údarás maoirseachta na hÉireann, rinne an Chúirt Ghinearálta earráid, san ordú atá faoi achomharc, ina measúnú ar na coinníollacha faoi mhír 1 d’Airteagal 263 CFAE.

125. Mar sin, molaim go seasfadh an Chúirt Bhreithiúnais leis an gcéad dá argóint den chéad fhoras achomhairc.

C.      Is de chúram an achomharcóra an cinneadh atá faoi chonspóid go díreach

126. Lena thríú hargóint agus lena cheathrú hargóint ar an gcéad fhoras achomhairc, maíonn an t‑achomharcóir go ndearna an Chúirt Ghinearálta earráid agus í ag cinneadh nach mbaineann an cinneadh atá faoi chonspóid go díreach leis.

127. De réir an achomharcóra, cé go leagann an Chúirt Ghinearálta cásdlí na Cúirte Breithiúnais síos i gceart lena gceanglaítear nach mór dhá choinníoll a chomhlíonadh chun a shuí gur de chúram duine nádúrtha nó dlítheanach go díreach gníomh nach bhfuil dírithe air, (74) cuireann an Chúirt Ghinearálta an cásdlí sin i bhfeidhm go hearráideach, áfach.

128. De réir cásdlí arna lua ag an gCúirt Ghinearálta, ‘ní mór dhá chritéar charnacha a chomhlíonadh chun gur de chúram duine nádúrtha nó dlítheanach an beart a bhfuil agóid á déanamh ina choinne go díreach, eadhon, sa chéad áit, ní mór don bheart atá faoi chonspóid difear díreach a dhéanamh do staid dhlíthiúil an duine sin agus, sa dara háit, ní mór dó gan aon rogha a fhágáil ag na daoine a bhfuil sé dírithe air agus a bhfuil sé de chúram orthu é a chur chun feidhme, cur chun feidhme den sórt sin atá uathoibríoch go hiomlán agus a eascraítear as rialacha an Aontais amháin gan rialacha idirmheánacha eile a chur i bhfeidhm’. (75)

129. Eascraítear an chaoi a gcaitear leis an dá chritéar sin mar chritéir ‘charnacha’ as an gcásdlí inar ghá bearta cur chun feidhme a dhéanamh i leith an ghnímh a ndearnadh agóid ina choinne. (76)

130. I gcás den sórt sin, ní fhéadfaí leis an mbeart a ndéantar agóid ina choinne difear díreach a dhéanamh do staid dhlíthiúil an iarratasóra ach amháin mura raibh aon rogha ag an gcomhlacht cur chun feidhme maidir leis an mbeart a ndéantar agóid ina choinne a chur chun feidhme agus leis an gcaoi a gcuirfí chun feidhme é. (77)

131. Is amhlaidh atá sa chás seo. Dírítear an cinneadh atá faoi chonspóid, a bhaineann leis an achomharcóir, ar údarás maoirseachta na hÉireann, agus dhírítear ar an achomharcóir é. Ceanglaítear leis ar údarás na hÉireann a dhréachtchinneadh a leasú agus an cinneadh críochnaitheach á ghlacadh aige, atá dírithe ar an achomharcóir, ar an mbealach a gcuirtear na torthaí atá sa chinneadh atá faoi chonspóid chun feidhme leis. Mar sin, maidir leis an gceist ar fágadh rogha ag údarás maoirseachta na hÉireann tar éis do BECS an cinneadh atá faoi chonspóid a ghlacadh, tá sí ábhartha chun a chinneadh an mbaineann sé go díreach leis an achomharcóir.

132. Sa chomhthéacs sin, maíonn an t‑achomharcóir do ndearna an Chúirt Ghinearálta léiriú mícheart as mír 4 d’Airteagal 263 CFAE ar dhá bhealach. Ar an gcéad dul síos, ina measúnú ar an gcéad choinníoll maidir le cúram díreach, chuir an Chúirt Ghinearálta na critéir maidir le ‘hin‑fhorfheidhmitheacht’ agus ‘céim dheiridh sa nós imeachta’ i bhfeidhm, nach bhfuil ceachtar acu ábhartha chun cúram díreach a shuí. Ar an dara dul síos, ina measúnú ar an dara coinníoll maidir le cúram díreach, chuir an Chúirt Ghinearálta an critéar maidir le rogha a chur i bhfeidhm go mícheart maidir leis an gcinneadh atá faoi chonspóid.

133. Aontaím leis an achomharcóir maidir leis an dá phointe sin.

1.      In‑fhorfheidhmitheacht an chinnidh atá faoi chonspóid i gcoinne an achomharcóra

134. Is é an chéad léiriú mícheart a lochtaíonn an t‑achomharcóir an Chúirt Ghinearálta ina leith ná gur mheas an Chúirt Ghinearálta, i mír 52 den ordú atá faoi achomharc, nach gcomhlíontar an coinníoll go ndéantar leis an gcinneadh atá faoi chonspóid difear díreach do sheasamh dlíthiúil WhatsApp toisc nach bhfuil an gníomh sin infhorfheidhmithe ina choinne.

135. Níl an coinníoll maidir le ‘hin‑fhorfheidhmitheacht’ i mír 4 d’Airteagal 263 CFAE, ná ní eascraítear as cásdlí na Cúirte Breithiúnais é.

136. Ar chúis mhaith i bhformhór na gcásanna ina gceanglaítear beart cur chun feidhme ar leibhéal an Aontais nó ar an leibhéal náisiúnta, níl an cinneadh ón Aontas atá á chur chun feidhme in‑fhorfheidhmithe é féin in aghaidh daoine nádúrtha nó dlítheanacha, fiú más iad na daoine sin a bhfuil an beart sin dírithe orthu. Is é an chúis bheacht gur minic a cheanglaítear an beart cur chun feidhme ná nach féidir beart an Aontais atá faoi cheist an t‑iarratasóir a ‘shroicheadh’ as féin. Sna cásanna sin, is é an beart cur chun feidhme amháin atá in‑fhorfheidhmithe i gcoinne duine nádúrtha nó dlítheanach.

137. Dá mba choinníoll maidir le cúram díreach é ‘in‑fhorfheidhmitheacht dhíreach’ birt in aghaidh duine nádúrtha nó dlítheanach, is ar éigean a bheadh aon chás ann ina mbeadh iarratasóirí nach bhfuil faoi phribhléid in ann agóid a dhéanamh i gcoinne gníomh de chuid an Aontais lena gceanglaítear bearta cur chun feidhme.

138. I ndáiríre, ní bhaineann sé go díreach leis an gceist maidir le cúram díreach an bhfuil an beart cur chun feidhme atá faoi cheist infhorfheidhmithe i gcoinne duine nádúrtha nó dlítheanach amháin, ná leis an mbeart a ndéanann an duine sin agóid i gcoinne a bhailíochta os comhair Chúirteanna an Aontais. Mura bhfuil an beart cur chun feidhme ach ina mhacasamhail den bheart is ábhar don chaingean toisc nach raibh aon rogha ag an gcomhlacht cur chun feidhme maidir lena chinneadh a dhéanamh agus leis an gcaoi a ndéanfaí é, is léir gurb é an beart a ndéantar agóid ina choinne an fhíorchúis le difear a dhéanamh do sheasamh dlíthiúil an iarratasóra.

139. Sa chás seo, ciallaítear leis sin go ndearna an Chúirt Ghinearálta earráid nuair a chuir sí in‑fhorfheidhmitheacht an chinnidh atá faoi chonspóid i leith an achomharcóra san áireamh mar thoisc ábhartha chun a measúnú a dhéanamh ar an mbaineann an cinneadh sin go díreach leis an achomharcóir.

2.      Níl an beart atá faoi chonspóid sa nós imeachta atá beartaithe leis an sásra comhsheasmhachta ina chéim dheiridh

140. Sa mhír chéanna, mír 52, den ordú atá faoi achomharc, mheas an Chúirt Ghinearálta nach ndéantar leis an gcinneadh atá faoi chonspóid difear díreach don achomharcóir toisc nach ionann an cinneadh sin agus an chéim dheiridh sa nós imeachta atá beartaithe le sásra comhsheasmhachta RGCS, ach ina ionad sin go gceanglaítear leis bearta cur chun feidhme ar an leibhéal náisiúnta.

141. Eascraíonn sé cheana as an bplé roimhe seo gur féidir gur de chúram duine go díreach beart fiú i gcás go bhfuil bearta cur chun feidhme i gceist leis an mbeart sin. (78)

142. Ní bheadh aon chiall leis an ‘dara’ coinníoll chun cúram díreach a shuí i gcásdlí na Cúirte Breithiúnais (féach mír 128 den Tuairim seo), a ndearna an Chúirt Ghinearálta tagairt dó mar an dlí is infheidhme san ordú atá faoi achomharc, (79) mura bhféadfaí cúram díreach a bheith ann i gcás ina raibh bearta cur chun feidhme i gceist leis an mbeart atá faoi chonspóid.

143. Ina theannta sin, leis an tuiscint sin, déantar neamhaird den idirdhealú idir an ceanglas nach bhfuil bearta cur chun feidhme i gceist le gníomh rialála agus an ceanglas maidir le cúram díreach, nach mór an dá cheanglas sin a chomhlíonadh chun go mbunóidh iarratasóir nach bhfuil faoi phribhléid seasamh faoi mhír 4 d’Airteagal 263 CFAE. (80)

144. Mar sin, rinne an Chúirt Ghinearálta earráid nuair a mheas sí gur critéar ábhartha é, faoin sásra comhsheasmhachta, an fíoras nach mór d’údarás maoirseachta na hÉireann cinneadh a ghlacadh chun an cinneadh atá faoi chonspóid a chur chun feidhme chun anailís a dhéanamh ar an de chúram an achomharcóra go díreach an cinneadh deireanach sin.

145. Rinne an chúirt iarracht ar idirdhealú a dhéanamh idir an staid sa chás seo agus staideanna de réir mar a thagtar chun cinn iad i réimse na Státchabhrach ina gcinneann an Coimisiún nach bhfuil cabhair ag luí leis an margadh inmheánach agus ina n‑ordaíonn sé don Bhallstát lena mbaineann an chabhair atá faoi cheist a aisghabháil. (81) I gcásanna den sórt sin, chinn an Chúirt Bhreithiúnais gur de chúram faighteoirí cabhrach cinneadh ábhartha ón gCoimisiún, fiú i gcás gur gá don Bhallstát atá i gceist an cinneadh sin a chur chun feidhme agus nach bhféadfaí é a fhorfheidhmiú ach amháin ar bhonn na mbeart cur chun feidhme sin. (82)

146. Caithfidh mé aontú leis an achomharcóir go raibh an Chúirt Ghinearálta ag brath go mícheart ar na cásanna sin chun idirdhealú a dhéanamh idir an staid reatha agus chun a chinneadh nach de chúram WhatsApp go díreach an cinneadh atá faoi chonspóid. (83)

147. Os a choinne sin, tugtar argóintí ina gcinntear gur de chúram WhatsApp go díreach an cinneadh atá faoi chonspóid leis na cásanna sin. Is é an cinneadh sin is cúis leis an athrú ar sheasamh dlíthiúil an achomharcóra, d’ainneoin an ghá atá le cinneadh ‘cur chun feidhme’ a bheith glactha ag údarás maoirseachta na hÉireann. Mar sin, ina chroílár, is é an loighic go díreach a ghlac an Chúirt Bhreithiúnais sa chásdlí a luaigh an Chúirt Ghinearálta i mír 64 den ordú atá faoi achomharc.

148. Ar an mbealach chéanna, measaim go ndearna an Chúirt Ghinearálta earráid agus í ag cinneadh nach raibh an cinneadh atá faoi chonspóid ar aon dul le cinntí an Choimisiúin lena n‑éilítear aisghabháil cabhrach de bhua an fhíorais nár tugadh an nós imeachta riaracháin atá faoi cheist chun críche ar an leibhéal náisiúnta leis an gcinneadh atá faoi chonspóid. (84) A mhéid a bhaineann sé leis na saincheisteanna a chinn BECS trí bhíthin an chinnidh atá faoi chonspóid, áfach, tugadh an nós imeachta lena rialaítear an sásra comhsheasmhachta chun críche, i ndáiríre, ós rud é nach féidir le húdarás maoirseachta na hÉireann athrú a dhéanamh ar na torthaí atá sa chinneadh atá faoi chonspóid. Cé go bhféadfadh sé go mbeadh ar an údarás sin cinneadh a dhéanamh freisin maidir le saincheisteanna breise áirithe nach gcumhdaítear leis an gcinneadh atá faoi chonspóid, ní dhéantar athrú ar ‘chríochnaitheacht’ na dtorthaí a fuarthas sa chinneadh atá faoi chonspóid maidir leis na saincheisteanna a réitigh sé.

149. Ón méid thuas, is léir dom go ndéantar leis an gcinneadh atá faoi chonspóid difear do sheasamh dlíthiúil an achomharcóra toisc go gcáilítear leis, sa chéad áit, a nós imeachta ‘haiseála cailltí’ mar nós imeachta lena mbaineann sonraí pearsanta agus, sa dara háit, go gcinntear leis go bhfuil cleachtas na cuideachta sin ag sárú rialacha trédhearcachta áirithe arna bhforchur ar rialaitheoirí le RGCS.

150. Leis an gcinneadh sin amháin, cruthaítear oibleagáid dhlíthiúil don achomharcóir athrú a dhéanamh ar a chleachtas. Thairis sin, léirítear leis an mbunús dlí d’údarás maoirseachta na hÉireann chun fíneálacha níos airde a ghearradh ar an achomharcóir. Gan an cinneadh atá faoi chonspóid, ní fhéadfadh an t‑údarás sin amhlaidh a dhéanamh. Ba é an t‑aon chúis a chuir sé na cinntí sin san áireamh ina chinneadh críochnaitheach a díríodh ar an achomharcóir ná go raibh sé d’oibleagáid air amhlaidh a dhéanamh leis an gcinneadh atá faoi chonspóid. I mo thuairim féin, léirítear go soiléir leis gurb é an cinneadh atá faoi chonspóid an fhíorchúis leis an athrú ar sheasamh dlíthiúil an achomharcóra agus nach é, mar a chinn an Chúirt Ghinearálta go mícheart, cinneadh údarás maoirseachta na hÉireann.

3.      Rogha údarás maoirseachta na hÉireann

151. Má cheanglaítear bearta cur chun feidhme le gníomh atá faoi réir caingean le haghaidh neamhniú, ní mheasfar gur de chúram an iarratasóra go díreach é ach amháin mura bhfuil aon rogha ag an gcomhlacht a ghlacann na bearta cur chun feidhme sin, ach ní mór dó, ina ionad sin, torthaí an chinnidh atá faoi chonspóid a chur i bhfeidhm go huathoibríoch.

152. Sa chás seo, chiallófaí leis sin gur de chúram WhatsApp an cinneadh atá faoi chonspóid go díreach mura mbeadh aon rogha ag údarás maoirseachta na hÉireann maidir leis an gcinneadh sin a chur chun feidhme agus leis an gcaoi a gcuirfí chun feidhme é.

153. San ordú atá faoi achomharc, mheas an Chúirt Ghinearálta go raibh rogha ag údarás maoirseachta na hÉireann agus, mar sin, nach de chúram an achomharcóra an cinneadh atá faoi chonspóid go díreach, ach le cinneadh críochnaitheach an údaráis sin amháin. (85)

154. Aontaím leis an achomharcóir go ndearna an Chúirt Ghinearálta earráid ina measúnú sa phointe seo freisin.

155. Ar an gcéad dul síos, ba ghá toradh BECS gurb ionann próiseáil sonraí pearsanta agus ‘haiseáil chaillteach’ agus gur sháraigh an t‑achomharcóir, mar rialaitheoir sonraí, a oibleagáidí faoi Airteagail 5, 13 agus 14 de RGCS a thrasuí i gcinneadh críochnaitheach údarás maoirseachta na hÉireann, rud lenar fágadh nach raibh aon rogha ag an údarás sin maidir leis an bhféidearthacht teacht ar chonclúid chontrártha.

156. Ar an dara dul síos, leis an gcinneadh atá faoi chonspóid, forchuireadh oibleagáid neamhchoinníollach ar údarás maoirseachta na hÉireann na fíneálacha a mhéadú agus na modhanna ríofa a sonraíodh i gcinneadh BECS a úsáid, fiú dá bhfágfaí ríomh agus forchur críochnaitheach mhéid na bhfíneálacha sin ag údarás maoirseachta na hÉireann. Ciallaítear leis sin nár fágadh aon rogha ag an údarás sin, ina cháil mar ‘chomhlacht cur chun feidhme’, na fíneálacha bunaidh a choinneáil nó iad a laghdú. (86)

157. Mar sin, maidir leis na gnéithe sin den chinneadh atá faoi chonspóid, ní raibh aon rogha ag údarás maoirseachta na hÉireann maidir le cinneadh a dhéanamh i ndáil leis an achomharcóir ná leis an gcaoi le cinneadh a dhéanamh ina leith.

158. Dá bhrí sin, rinne an Chúirt Ghinearálta earráid agus í ag cinneadh go raibh rogha ag údarás maoirseachta na hÉireann maidir leis na gnéithe sin. (87)

159. Faoi Airteagal 65(1)(a) de RGCS, ní dhéanann BECS cinneadh ach maidir leis na gnéithe sin de chur i bhfeidhm RGCS a ndearna údaráis mhaoirseachta eile agóid ina gcoinne agus nár socraíodh i measc na n‑údarás maoirseachta rannpháirteach. Mar sin, fágtar de rogha ag údarás maoirseachta na hÉireann cinneadh a dhéanamh maidir leis na saincheisteanna sin nár cuireadh faoi bhráid BECS, ach atá mar chuid den chinneadh náisiúnta críochnaitheach mar sin féin. (88)

160. An bhfuil sé sin ábhartha chun a chinneadh gur de chúram an achomharcóra an cinneadh atá faoi chonspóid go díreach?

161. San ordú atá faoi achomharc, mheas an Chúirt Ghinearálta go raibh raon feidhme teoranta an chinnidh atá faoi chonspóid i gceist toisc gurb ionann cinneadh críochnaitheach údarás maoirseachta na hÉireann agus iomlán nach féidir a ghearradh de réir na ngnéithe sin a raibh agus nach raibh rogha ag údarás maoirseachta na hÉireann ina leith. (89)

162. I mo thuairim féin, agus arís i gcomhaontú leis an achomharcóir, ní bhaineann an ghné sin leis an gceist an de chúram an pháirtí sin an cinneadh atá faoi chonspóid go díreach.

163. Chun measúnú a dhéanamh ar an gceist maidir le cúram díreach, ní mór tosú ó shubstaint an ghnímh a bhfuil agóid á déanamh ina choinne. (90) I ndáil leis sin, is leor nár fágadh le hábhar an chinnidh atá faoi chonspóid, lena ndéantar difear do sheasamh dlíthiúil an achomharcóra, aon rogha ag údarás maoirseachta na hÉireann maidir leis na pointí sin, fiú má déileáladh lena chinneadh críochnaitheach le saincheisteanna eile freisin.

164. I ndáiríre, mar a mhíneoidh mé sa chéad chuid eile den Tuairim seo, mura ndéanfadh an t‑achomharcóir agóid i gcoinne an chinnidh atá faoi chonspóid os comhair na Cúirte Ginearálta, chaillfeadh sé an deis a phléadáil go raibh an cinneadh sin neamhbhailí mar chuid dá agóid i gcoinne chinneadh críochnaitheach údarás maoirseachta na hÉireann os comhair chúirteanna inniúla na hÉireann.

165. Mar a mhínigh an t‑achomharcóir ag an éisteacht, tá imeachtaí den sórt sin os comhair chúirteanna na hÉireann ar feitheamh go deimhin. Sa chás sin, iarrann an t‑achomharcóir go gcuirfí cinneadh críochnaitheach údarás maoirseachta na hÉireann ó bhail freisin maidir leis na gnéithe sin nach ndéileáiltear leo sa chinneadh atá faoi chonspóid. Ag an am céanna, áfach, rinne an t‑achomharcóir agóid i gcoinne chinneadh BECS os comhair na Cúirte Ginearálta chun coimirciú a dhéanamh ar a cheart chun neamhbhailíocht na gcodanna sin de chinneadh maoirseachta na hÉireann nach bhféadfadh an t‑údarás sin aon rogha a fheidhmiú ina leith a phléadáil.

166. Dá bhrí sin, rinne an Chúirt Ghinearálta earráid freisin ina conclúid nach de chúram an achomharcóra an cinneadh go díreach, atá faoi chonspóid toisc go raibh rogha ag údarás maoirseachta na hÉireann an cinneadh atá faoi chonspóid a ‘chur chun feidhme’ toisc go raibh gnéithe sa chinneadh náisiúnta críochnaitheach freisin nár cumhdaíodh leis an gcinneadh atá faoi chonspóid.

4.      Conclúid eatramhach

167. Rinne an Chúirt Ghinearálta earráid agus í ag cur i bhfeidhm na gcoinníollacha chun measúnú a dhéanamh ar an ann do chúram díreach faoi mhír 4 d’Airteagal 263 CFAE.

168. Sa chéad áit, bhunaigh sé a mheasúnú ar choinníollacha nach ann dóibh cheana go mbeidh an gníomh a ndéantar agóid ina choinne (i) infhorfheidhmithe go díreach i leith an iarratasóra i nós imeachta um neamhniú agus (ii) nach bhfuil bearta cur chun feidhme i gceist leis.

169. Sa dara háit, rinne an Chúirt Ghinearálta earráid sa mheasúnú gur fágadh leis an gcinneadh atá faoi chonspóid rogha ag údarás cur chun feidhme, sa chás seo, údarás maoirseachta na hÉireann.

170. Ar deireadh, rinne an Chúirt Ghinearálta earráid agus í ag teacht ar an gconclúid go raibh codanna nach gcumhdaítear leis an gcinneadh atá faoi chonspóid i gcinneadh críochnaitheach údarás maoirseachta na hÉireann ábhartha maidir leis an gceist ar fágadh leis an gcinneadh atá faoi chonspóid aon rogha ag an údarás sin.

171. Mar sin, molaim go seasfadh an Chúirt Bhreithiúnais leis an tríú hargóint agus leis an gceathrú hargóint sa chéad fhoras achomhairc.

D.      Ceanglaítear le loighic chóras leigheasanna breithiúnacha an Aontais inghlacthacht na caingne sa chás seo

172. Lena chúigiú hargóint laistigh den chéad fhoras achomhairc, áitíonn an t‑achomharcóir gur shonraigh an Chúirt Ghinearálta go mícheart ceanglais nós imeachta chóras leigheasanna breithiúnacha an Aontais.

173. San ordú atá faoi achomharc, mheas an Chúirt Ghinearálta, sa nós imeachta a leagtar síos leis an sásra comhsheasmhachta, nach mór imeachtaí dlíthiúla i gcoinne chinneadh críochnaitheach an údaráis maoirseachta náisiúnta a thionscnamh os comhair na gcúirteanna náisiúnta inniúla. I dtuairim na Cúirte Ginearálta, labhraítear le loighic chóras iomlán na leigheasanna breithiúnacha i bhfabhar na cúirte náisiúnta mar fhóram iomchuí, (91) a thionscnófaí leis an nós imeachta um réamhrialú os comhair na Cúirte Breithiúnais maidir le bailíocht na coda sin den chinneadh náisiúnta a shocraítear leis an gcinneadh ábhartha ó BECS.

174. Tá feidhm éigin ag seasamh na Cúirte Ginearálta chun comhchruinniú caingne a cheangal in aon chúirt amháin. I ndáiríre, réiteodh an moladh ar réiteach an mhíchaoithiúlacht nós imeachta atá ann faoi láthair lena gceanglaítear go héifeachtach ar iarratasóir dhá chaingean ar leith a thionscnamh, ceann amháin os comhair na Cúirte Ginearálta agus ceann eile sa chúirt náisiúnta, más mian leis an bpáirtí sin a áirithiú go ndéanfar coimirciú go héifeachtach ar a chearta uile faoi dhlí an Aontais. Go deimhin, ní hé sin an bealach is éifeachtúla chun cearta an duine a chosaint.

175. Sa chás seo, rinne an t‑achomharcóir é sin go díreach: thionscain sé dhá chaingean, ceann amháin os comhair na Cúirte Ginearálta agus an ceann eile os comhair chúirteanna inniúla na hÉireann. Ina leagan amach reatha ar a laghad, áfach, ní fhoráiltear le córas cosanta dlí an Aontais maidir le haon réiteach eile, mar a mhíneoidh mé.

1.      An ghaolmhaireacht idir caingne díreacha agus indíreacha i gcoinne gníomh de chuid an Aontais

176. Ar an gcéad dul síos, mar a thuigtear go maith, níl sé de chumhacht ag cúirteanna náisiúnta gníomhartha de chuid institiúidí agus chomhlachtaí eile an Aontais a chur ó bhail. Mar sin, má mheasann siad go bhfuil gníomh de chuid an Aontais curtha ó bhail, ní mór dóibh an nós imeachta um réamhrialú a thionscnamh os comhair na Cúirte Breithiúnais, agus deimhniú a fháil ón gcúirt sin go bhfuil sé curtha o bhail. (92)

177. Ar an dara dul síos, ní féidir le cúirt náisiúnta amhras a chaitheamh ar bhailíocht gnímh de chuid an Aontais má chomhlíonann an páirtí atá ag brath ar an neamhniú sin na buanchoinníollacha faoi mhír 4 d’Airteagal 263 CFAE, ach nach ndearna sé agóid i gcoinne an ghnímh sin laistigh den teorainn ama dá bhforáiltear i mír 6 de os comhair Chúirteanna an Aontais. Eascraíonn sé sin as breithiúnas in TWD Textilwerke Deggendorf (93) agus deimhníodh é i mbreithiúnais níos déanaí, lena n‑áirítear an breithiúnas in Georgsmarienhütte agus páirtithe eile, (94) a phléigh na páirtithe sa nós imeachta seo.

178. Sa bhreithiúnas deireanach sin, dhearbhaigh an Chúirt an méid seo a leanas: ‘i gcás ina n‑iarrann duine agóid a dhéanamh i gcoinne bheart an Aontais, tá seasamh aige gan amhras faoi mhír 4 d’Airteagal 263 CFAE agus tá sé de cheangal ar an duine sin úsáid a bhaint as an leigheas a dá bhforáiltear san fhoráil sin trí chaingean a thionscnamh os comhair na Cúirte Ginearálta’. (95) Murar thionscain an duine a raibh an deis aige amhlaidh a dhéanamh caingean le haghaidh neamhniú laistigh den spriocdháta dá bhforáiltear faoi mhír 6 d’Airteagal 263 CFAE, ní féidir leis an gcúirt náisiúnta pléadáil neamhnithe maidir le gníomh de chuid an Aontais a ghlacadh, a thionscain an duine sin, ach ní mór di a mheas go bhfuil an gníomh a ndearnadh agóid ina choinne críochnaitheach i ndáil leis an duine sin. (96) Má thugtar í os comhair cúirt náisiúnta i nós imeachta um réamhrialú i gcás den sórt sin, bheadh ar an gCúirt Bhreithiúnais diúltú don tarchur toisc é a bheith neamh-inghlactha, toisc go bhfreagródh sí ceist nach féidir leis an gcúirt a rinne an tarchur an freagra uirthi a úsáid.
[Aistriúchán neamhoifigiúil]

179. Tá sampla le déanaí a bhaineann le nósanna imeachta ilchodacha sa bhreithiúnas in Iccrea Banca. (97) Sa bhreithiúnas sin, chinn an Chúirt go raibh cuid neamh-inghlactha den tarchur chun réamhrialú ó Tribunale amministrativo regionale per il Lazio (an Chúirt Réigiúnach Riaracháin, Lazio, an Iodáil), ar os a comhair a rinne banc, Iccrea Banca, agóid i gcoinne ríomh mhéid a ranníocaíochta leis an gCiste Réitigh Aonair. Mheas an Chúirt gur de chúram an banc sin cinneadh ó BRA go díreach agus go leithleach – a bhí mar bhunús le méid na ranníocaíochtaí sin a shuí – ach nach ndearna sé agóid a dhéanamh i gcoinne an chinnidh sin trí chaingean le haghaidh neamhniú os comhair na Cúirte Ginearálta. (98) Mar sin, chaill Iccrea Banca an deis chun pléadáil neamhnithe maidir le chinneadh BRA a thabhairt go hindíreach os comhair na cúirte náisiúnta, sa chaoi go raibh ar an gCúirt Bhreithiúnais an tarchur a dhíbhe toisc é a bheith neamh-inghlactha.

180. Agus an cásdlí sin á chur i bhfeidhm sa chás seo, ina raibh seasamh ag WhatsApp agóid a dhéanamh i gcoinne an chinnidh atá faoi chonspóid os comhair na Cúirte Ginearálta, is léir nach bhféadfaí neamhniú an chinnidh ó BECS a thabhairt os comhair na cúirte náisiúnta mura ndearna WhatsApp iarracht ar agóid a dhéanamh i gcoinne an chinnidh sin go díreach os comhair na Cúirte Ginearálta freisin laistigh den tréimhse a leagtar síos i mír 6 d’Airteagal 263 CFAE.(99)

181. Dá réir sin, ós rud é, sa chéad áit, gur de chúram an achomharcóra an cinneadh atá faoi chonspóid go díreach, agus, sa dara háit, mar a chinn an Chúirt Ghinearálta féin, gur de chúram an achomharcóra an cinneadh atá faoi chonspóid go leithleach, (100) ní mór an agóid i gcoinne an chinnidh atá faoi chonspóid a thionscnamh os comhair Chúirteanna an Aontais agus ní os comhair na gcúirteanna náisiúnta.

182. Ar deireadh, deimhnítear le haithris 143 de RGCS gur cheart eagrú cuí an athbhreithnithe bhreithiúnaigh i gcás, amhail an cás atá faoi cheist sa chás seo, a dhéanamh trí chaingne le haghaidh neamhniú os comhair na Cúirte Ginearálta. (101) Fiú mura bhfuil an aithris sin ceangailteach, mar a thíolaic BECS i gceart, déantar tuairisc inti mar sin féin ar na hiarmhairtí a eascraítear as cur i bhfeidhm noirm cheangailteacha an Chonartha a bhaineann le himeachtaí breithiúnacha a eagrú.

183. Ar deireadh, d’fhéadfainn a rá maidir leis na hargóintí roimhe seo gurb í an chaingean dhíreach os comhair na Cúirte Ginearálta, ina bhfuil an comhlacht de chuid an Aontais arb é údar an chinnidh atá faoi chonspóid ina pháirtí sna himeachtaí, an bealach níos iomchuí, i mo thuairim féin, chun bailíocht a cinnidh a chinneadh. Tar éis an mhéid sin uile, os comhair na cúirte náisiúnta, bheadh ról nós imeachta an chomhlachta sin ag brath ar na rialacha nós imeachta náisiúnta ábhartha, rud a d’fhéadfaí rochtain ar an díospóireacht maidir lena ghníomh féin a dhiúltú dó. (102)

2.      Saincheisteanna nós imeachta eile

184. San ordú atá faoi achomharc, chuir an Chúirt Ghinearálta in iúl freisin go raibh imní uirthi go bhféadfaí cinntí éagsúla a bheith ann ar leibhéal an Aontais agus ar an leibhéal náisiúnta, a d’fhéadfaí a bheith mar thoradh ar imeachtaí breithiúnacha forluiteacha. (103)

185. Ní ábhar nua é seo. Mar a mhínigh an Chúirt ina breithiúnas in Masterfoods agus HB, i gcás ina gcaitear amhras ar bhailíocht gnímh de chuid an Aontais os comhair na gcúirteanna náisiúnta agus Chúirteanna an Aontais araon, tá oibleagáid ar na cúirteanna náisiúnta, de bhua phrionsabal an chomhair dhílis, gan cinneadh a dhéanamh a d’fhéadfaí a bheith i mbaol coinbhleachta le cinneadh atá ann cheana féin nó atá le teacht ó Chúirteanna an Aontais. (104) Mar sin, i gcás ina bhfuil caingean le haghaidh neamhniú ar feitheamh os comhair na Cúirte Ginearálta agus ina n‑ardaítear ceist bhailíochta i gcaingean chomhthreomhar in imeachtaí náisiúnta, féadfaidh roinnt na n‑inniúlachtaí idir Cúirteanna an Aontais agus cúirteanna náisiúnta a cheangal ar na cúirteanna náisiúnta bac a chur ar imeachtaí. (105) Dealraíonn sé gurb é sin cinneadh chúirteanna inniúla na hÉireann sa chás seo. (106)

186. Má thionscain an chúirt náisiúnta an réamhnós imeachta os comhair na Cúirte Breithiúnais in ainneoin na caingne neamhnithe atá ar feitheamh os comhair na Cúirte Ginearálta, féadfaidh an Chúirt Bhreithiúnais bac a chur ar a himeachtaí féin chun tús áite a thabhairt don chaingean le haghaidh neamhniú trí Airteagal 54 de Reacht Chúirt Bhreithiúnais an Aontais Eorpaigh a chur i bhfeidhm agus de bhua phrionsabal an dea-riaracháin. (107)

3.      Conclúid eatramhach

187. Ní cheanglaítear le loighic an chórais cosanta breithiúnaí a bhunaítear leis na Conarthaí go gcinnfí go bhfuil an chaingean le haghaidh neamhniú a thionscain an t‑achomharcóir os comhair na Cúirte Ginearálta neamh-inghlactha.

188. Mar sin, molaim go nglacfadh an Chúirt Bhreithiúnais leis an gcúigiú hargóint ar an gcéad fhoras achomhairc freisin.

189. I bhfianaise na n‑argóintí uile roimhe seo, molaim go seasfadh an Chúirt leis an gcéad fhoras achomhairc atá ag an achomharcóir.

E.      Iarmhairtí

190. Faoi Airteagal 61 de Reacht Chúirt Bhreithiúnais an Aontais Eorpaigh, féadfaidh an Chúirt, má cheadaíonn staid na n‑imeachtaí a leithéid, breithiúnas críochnaitheach a thabhairt í féin san ábhar.

191. Sa chás seo, comhlíontar an coinníoll sin a mhéid a bhaineann sé le hinghlacthacht na caingne dírí arna tionscnamh os comhair na Cúirte Ginearálta.

192. Ar an gcéad dul síos, tá an cinneadh atá faoi chonspóid ina ghníomh inchonspóide, chun críocha Airteagal 263 CFAE. Ar an dara dul síos, is de chúram an achomharcóra an cinneadh sin go díreach, de réir bhrí mhír 4 d’Airteagal 263 CFAE. Ar an tríú dul síos, is de chúram an achomharcóra go díreach an cinneadh atá faoi chonspóid, mar a chinn an Chúirt Ghinearálta féin san ordú atá faoi achomharc. (108) Dá bhrí sin, comhlíontar na coinníollacha a leagtar síos i mír 1 agus mír 4 d’Airteagal 263 CFAE. Mar sin, tá an chaingean inghlactha.

193. Ós rud é nár mheas an Chúirt Ghinearálta fiúntas na caingne os a comhair, áfach, ceanglaítear measúnú mionsonraithe dlí agus fíorais a dhéanamh chun í a chinneadh, ní thugtar le staid na n‑imeachtaí cead don Chúirt Bhreithiúnais rialú a thabhairt ar fhiúntas chaingean an achomharcóra.

194. Dá réir sin, ní mór an cás a tharchur ar ais chuig an gCúirt Ghinearálta agus na costais a fhorchoimeád.

IV.    Conclúid

195. Molaim gur cheart don Chúirt Bhreithiúnais an méid seo a leanas a dhéanamh:

–        ordú an 7 Nollaig 2022, WhatsApp Ireland v an Bord Eorpach um Chosaint Sonraí (T‑709/21, EU:T:2022:783) a chur ar ceal;

–        a dhearbhú go bhfuil caingean an iarratasóra le haghaidh neamhniú inghlactha;

–        an cás a tharchur ar ais chuig an gCúirt Ghinearálta le haghaidh cinneadh ar an bhfiúntas; agus

–        a ordú go bhforchoimeádfar na costais.


1      Teanga an cháis: an Béarla.


2      Rialachán ó Pharlaimint na hEorpa agus ón gComhairle an 27 Aibreán 2016 maidir le daoine nádúrtha a chosaint i ndáil le sonraí pearsanta a phróiseáil agus maidir le saorghluaiseacht sonraí den sórt sin, agus lena n‑aisghairtear Treoir 95/46/CE (an Rialachán Ginearálta maidir le Cosaint Sonraí) (IO 2016 L 119, lch. 1) (‘RGCS’), Airteagail 63 agus 65.


3      Cinneadh Ceangailteach 1/2021 maidir leis an díospóid a thángthas chun cinn i ndáil le dréachtchinneadh Údarás Maoirseachta na hÉireann maidir le WhatsApp Ireland faoi Airteagal 65(1)(a) RGCS (‘an cinneadh atá faoi chonspóid’), arna fhoilsiú ag https://www.edpb.europa.eu/our-work-tools/our-documents/binding-decision‑board-art‑65/binding-decision‑12021-dispute-arisen_ga.


4      Ordú an 7 Nollaig 2022, WhatsApp Ireland v an Bord Eorpach um Chosaint Sonraí (T‑709/21; ‘an t‑ordú atá faoi achomharc’; EU:T:2022:783).


5      Tráth scríofa na tuairime seo, tá seacht gcás eile ar feitheamh os comhair na Cúirte Ginearálta i gcoinne cinntí ceangailteacha arna n‑eisiúint ag EDPB tríd an sásra comhsheasmhachta, arb iad próiseálaithe sonraí, rialaitheoirí agus údaráis mhaoirseachta náisiúnta araon a thionscain na caingne sin. Féach Cás T‑682/22, Meta Platforms Ireland v an Bord Eorpach um Chosaint Sonraí; Cás T‑70/23, an Coimisiún um Chosaint Sonraí v an Bord Eorpach um Chosaint Sonraí; Cás T‑84/23, an Coimisiún um Chosaint Sonraí v an Bord Eorpach um Chosaint Sonraí; Cás T‑128/23, Meta Platforms Ireland v an Bord Eorpach um Chosaint Sonraí; Cás T‑129/23, Meta Platforms Ireland v an Bord Eorpach um Chosaint Sonraí; Cás T‑111/23, an Coimisiún um Chosaint Sonraí v an Bord Eorpach um Chosaint Sonraí; agus Cás T‑153/23, WhatsApp Ireland v an Bord Eorpach um Chosaint Sonraí. Déantar agóid le trí chás bhreise, atá ar feitheamh freisin, i gcoinne Chinntí EDPB a glacadh lasmuigh de chuimsiú an tsásra comhsheasmhachta; féach Cás T‑325/23, Meta Platforms Ireland v an Bord Eorpach um Chosaint Sonraí; Cás T‑1030/23, TikTok Technology v an Bord Eorpach um Chosaint Sonraí; agus Cás T‑8/24, Meta Platforms Ireland v an Bord Eorpach um Chosaint Sonraí.


6      Le haghaidh iarrachtaí ar chatagóiriú, féach Eliantonio, M., ‘Access to justice in composite procedures for the implementation of EU law: The story so far’, in Van Creynenbreugel, P. agus Wildemeersch, J. (eag.), Questions choisies de droit européen des affaires / Selected Issues in European Business Law: 60 ans d’études juridiques européennes à Liège / 60 years of European legal studies at Liège, Bruylant, 2023, lgh. 189-221.


7      Míníonn Hofmann, H.C.H gur ‘nósanna imeachta ilchéime iad nósanna imeachta ilchodacha le hionchur ó ghníomhaithe riaracháin ó dhlínsí éagsúla, ag comhoibriú go hingearach idir institiúidí agus comhlachtaí an Aontais agus institiúidí agus comhlachtaí na mBallstát, nó go cothrománach idir institiúidí agus comhlachtaí éagsúla na mBallstát nó i nósanna imeachta trípháirteacha lena mbaineann hinstitiúidí agus comhlachtaí éagsúla na mBallstát agus an Aontais’; féach Hofmann, H.C.H, ‘Composite decision making procedures in EU administrative Law’, in Hofmann, H.C.H. agus Türk, A.H., Legal Challenges in EU Administrative Law, Edward Elgar, Cheltenham, 2009, lch. 136.
[Aistriúchán neamhoifigiúil]


8      Chun cuntas le déanaí a fháil ar cheisteanna teoiriciúla agus praiticiúla a tarraingíodh anuas i nósanna imeachta ilchodacha, féach Bastos, F.B., Judging Composite Decision‑Making: The Transformation of European Administrative Law, Hart Publishing, Oxford, 2024.


9      Leagtar síos in Airteagal 55(1) de RGCS go mbeidh ‘gach údarás maoirseachta inniúil chun na cúraimí a sannadh dó a chomhlíonadh agus na cumhachtaí a tugadh dó a fheidhmiú i gcomhréir leis an Rialachán seo ar chríoch a Bhallstáit féin.’


10      Féach, chuige sin, aithrisí 9, 10 agus 13 de RGCS.


11      Féach Airteagal 60(4) de RGCS.


12      Maidir leis sin, tá an ról atá ag EDPB éagsúil lena réamhtheachtaí, Meitheal Oibre Airteagal 29, a bunaíodh de bhun Airteagal 29(1) de Threoir 95/46/CE ó Pharlaimint na hEorpa agus ón gComhairle an 24 Deireadh Fómhair 1995 maidir le daoine aonair a chosaint i dtaca le próiseáil sonraí pearsanta agus le saorghluaiseacht sonraí den sórt sin (IO 1995 L 281, lch. 31), agus nach raibh ach stádas comhairleach aige.


13      Féach freisin aithris 136.


14      Airteagal 65(5) de RGCS.


15      Déantar foráil le hAirteagal 65(6) de RGCS nach mór cinneadh náisiúnta den sórt sin a ghlacadh aon mhí amháin, ar a dhéanaí, tar éis do EDPB fógra a thabhairt don údarás maoirseachta i leith a chinnidh cheangailtigh.


16      Mura n‑aontaíonn údarás maoirseachta náisiúnta le cinneadh ceangailteach ó EDPB, féadfaidh sé agóid a dhéanamh i gcoinne a bhailíochta os comhair na Cúirte Ginearálta. Féach, mar shampla, na gníomhartha atá ina gcúis le breithiúnas an 29 Eanáir 2025, an Coimisiún um Chosaint Sonraí v EDPB (T‑70/23, T‑84/23 agus T‑111/23, EU:T:2025:116).


17      Is é atá i gceist leis an mbeartas príobháideachais rialacha trédhearcachta an achomharcóra a eascraítear as Airteagail 12 go 14 de RGCS a chomhlíonadh, agus d’fhéadfaí a rá gurb é Airteagal 8 den Chairt um Chearta Bunúsacha an Aontais Eorpaigh as a n‑eascraítear iad. Féach, go ginearálta, an Mheitheal Oibre Airteagal 29, Treoirlínte maidir le trédhearcacht faoi Rialachán 2016/679, arna glacadh an 29 Samhain 2017 (WP260).


18      Féach Airteagal 99(2) de RGCS.


19      Féach an Coimisiún um Chosaint Sonraí, an Cinneadh ón gCoimisiún um Chosaint Sonraí arna dhéanamh de bhun Roinn 111 den Acht um Chosaint Sonraí, 2018 agus Airteagail 60 agus 65 den Rialachán Ginearálta maidir le Cosaint Sonraí, 2021 (IN-18-12-2) (‘an cinneadh náisiúnta críochnaitheach’), mír 3; atá ar fáil ag: https://www.dataprotection.ie/sites/default/files/uploads/2022-03/Full_decision_WhatsApp_Ireland-August_2021.pdf.


20      Féach an cinneadh náisiúnta críochnaitheach, mír 4.


21      Féach an t‑ordú atá faoi achomharc, mír 4. Féach freisin an cinneadh náisiúnta críochnaitheach, mír 23.


22      Féach an t‑ordú atá faoi achomharc, mír 5. Féach freisin an cinneadh náisiúnta críochnaitheach, mír 23.


23      Féach an t‑ordú atá faoi achomharc, mír 5. Féach freisin an cinneadh náisiúnta críochnaitheach, mír 24.


24      Féach an t‑ordú atá faoi achomharc, mír 5. Féach freisin an cinneadh náisiúnta críochnaitheach, mír 25.


25      Cinneadh náisiúnta críochnaitheach, mír 25.


26      Is é mo thuiscint ná go bhfuil nós imeachta ‘haiseála cailltí’ an achomharcóra, go bunúsach, ina theicníc chriptithe sonraí chun uimhreacha gutháin úsáideoirí agus neamhúsáideoirí a sheirbhíse teachtaireachtaí a aistriú ina gcóid uimhriúla. Ina dhiaidh sin, chomhroinnfeadh an t‑achomharcóir na cóid uimhriúla le tríú páirtithe. Murab ionann agus an dréachtchinneadh ó údarás maoirseachta na hÉireann, mheas EDPB gur sonraí pearsanta de réir bhrí RGCS a bhí sna sonraí haiseáilte toisc go raibh sé de chumas ag an achomharcóir na hábhair sonraí a roghnú agus a ath-shainaithint, fiú ar bhonn na gcód ‘haiseáilte’ sin. Féach, chuige sin, an cinneadh atá faoi chonspóid, míreanna 141 go 157.


27      Féach, chuige sin, an t‑ordú atá faoi achomharc, mír 11, agus an cinneadh atá faoi chonspóid, mír 427 agus mír 428.


28      Féach, chuige sin, an t‑ordú atá faoi achomharc, mír 11, agus an cinneadh atá faoi chonspóid, mír 426 agus mír 428.


29      Féach, chuige sin, an t‑ordú atá faoi achomharc, mír 11, agus an cinneadh atá faoi chonspóid, mír 429 agus mír 430.


30      Féach, maidir leis sin, an t‑ordú atá faoi achomharc, mír 9.


31      Mar sin, mar shampla, i mbreithiúnas an 18 Meitheamh 2024, an Coimisiún v BRA (C‑551/22 P, ‘an breithiúnas in an Coimisiún v BRA’, EU:C:2024:520), mhínigh an Chúirt nach bhféadfaí torthaí bhreithiúnas an 6 Bealtaine 2021, ABLV Bank agus páirtithe eile v BCE (C‑551/19 P agus C‑552/19 P, EU:C:2021:369) a thrasuí go huathoibríoch sa staid a thagtar chun cinn sa chás sin. Sa bhreithiúnas deireanach sin, chinn an Chúirt nach gníomh inchonspóide é cinneadh ón mBanc Ceannais Eorpach go bhfuil mainneachtain á déanamh aige nó gur dócha go ndéanfar mainneachtain air toisc nach bhfuil sé ina cheangal ar an mBord Réitigh Aonair (BRA), sa chaoi gur cheart caingean le haghaidh neamhniú a thionscnamh i gcoinne an ghnímh arna ghlacadh ag BRA. Ní chiallaítear leis sin, áfach, go mbíonn gníomh arna ghlacadh ag BRA sa nós imeachta réitigh ina ghníomh inchonspóide i gcónaí. Nuair a ghlactar é i gcéim eile den nós imeachta réitigh, níl an gníomh arna ghlacadh ag an gcomhlacht sin ina ghníomh inchonspóide mura bhfuil éifeachtaí dlíthiúla ceangailteacha aige ar an gCoimisiún Eorpach, a dtugtar de chumhacht dó, sa nós imeachta ilchodach sin.


32      Mar sin, ní mór don Chúirt a mhíniú uaireanta an chúis nach féidir na torthaí ina breithiúnais roimhe seo a chur i bhfeidhm maidir leis an mbreithiúnas seo. Maidir leis sin, féach an breithiúnas in an Coimisiún v BRA, mír 92.


33      Breithiúnas an 11 Samhain 1981, IBM v an Coimisiún (60/81, ‘an breithiúnas in IBM’, EU:C:1981:264, mír 9).


34      Breithiúnas an 13 Deireadh Fómhair 2011, Deutsche Post agus an Ghearmáin v an Coimisiún (C‑463/10 P agus C‑475/10 P, ‘an breithiúnas in Deutsche Post’, EU:C:2011:656).


35      Is cásdlí socair é gurb ionann ceisteanna maidir le hinghlacthacht caingne le haghaidh neamhniú agus saincheisteanna beartais phoiblí a d’fhéadfaí a tharraingt anuas tráth ar bith, fiú in éagmais crosachomharc arna thaisceadh de bhun Airteagal 176(2) de Rialacha Nós Imeachta na Cúirte Breithiúnais; féach, ex multis, breithiúnais an 2 Meán Fómhair 2021, Ja zum Nürburgring v an Coimisiún (C‑647/19 P, EU:C:2021:666, míreanna 52 agus 53 agus an cásdlí a luaitear), agus breithiúnas an 21 Meán Fómhair 2023, China Chamber of Commerce for Import and Export of Machinery and Electronic Products agus páirtithe eile v an Coimisiún (C‑478/21 P, EU:C:2023:685, míreanna 42 agus mír 43 agus an cásdlí a luaitear).


36      Féach, ex multis, breithiúnas an 10 Márta 1998, an Ghearmáin v an Chomhairle (C‑122/95, EU:C:1998:94, mír 35) agus breithiúnas an 26 Meán Fómhair 2024, WEPA Hygieneprodukte agus páirtithe eile v an Coimisiún (C‑795/21 P agus C‑796/21 P, EU:C:2024:807, míreanna 63 agus 73).


37      Féach an chéad abairt d’Airteagal 65(5) de RGCS.


38      Féach, chuige sin, breithiúnais an 5 Aibreán 1979, Orlandi v an Coimisiún (117/78, EU:C:1979:109, mír 11) agus breithiúnas an 26 Meán Fómhair 2013, PPG agus SNF v ECHA (C‑625/11 P, EU:C:2013:594, mír 33).


39      Féach, ex multis, breithiúnas an 26 Meán Fómhair 2024, WEPA Hygieneprodukte agus páirtithe eile v an Coimisiún (C‑795/21 P agus C‑796/21 P, EU:C:2024:807, míreanna 68 go 71).


40      Féach, de réir analaí, breithiúnas an 26 Meán Fómhair 2013, PPG agus SNF v ECHA (C‑625/11 P, EU:C:2013:594, míreanna 29 go 33), a bhain le foilsiú liosta substaintí ar shuíomh gréasáin na Gníomhaireachta Eorpaí Ceimiceán amháin, a mheas an Chúirt mar sin féin mar chinneadh foilsithe.


41      Féach, chuige sin, ex multis, breithiúnas an 26 Meán Fómhair 2024, Covestro Deutschland agus an Ghearmáin v an Coimisiún (C‑790/21 P agus C‑791/21 P, EU:C:2024:792, mír 82); agus an 26 Meán Fómhair 2024, WEPA Hygieneprodukte agus páirtithe eile v an Coimisiún (C‑795/21 P agus C‑796/21 P, EU:C:2024:807, míreanna 72 agus 73) lena mínítear, ar mhaithe le deimhneacht dhlíthiúil, nach mór na teorainneacha ama chun caingean a thionscnamh a bhunú go hoibiachtúil agus go cinnte i leith na bpáirtithe uile nár tugadh fógra dóibh faoin gcinneadh sin, gan beann ar an iarratasóir a bheith ar an eolas roimh ré faoin mbeart.


42      Maidir leis an difríocht phraiticiúil a d’fhéadfaí a bheith ann idir bheith ag brath ar éifeachtaí dlíthiúla ceangailteacha nó díreach ar éifeachtaí dlíthiúla chun a chinneadh an féidir agóid a dhéanamh i gcoinne gnímh, féach Tuairim an Abhcóide Ghinearálta Bobek in an Bheilg v an Coimisiún (C‑16/16 P, EU:C:2017:959, mír 59 et seq.).


43      Féach Airteagal 173 de Chonradh CEE (béim curtha leis). D’fhéadfainn a rá freisin gur foráladh le hAirteagal 33 den Chonradh ag bunú an Chomhphobail Eorpaigh do Ghual agus Cruach maidir le liosta dearfach de na gníomhartha inchonspóide, ina liostaítear ‘cinntí’ agus ‘moltaí’. De réir Airteagal 14 de, sainíodh na gníomhartha sin mar ghníomhartha a bhfuil feidhm atá ceangailteach ó thaobh dlí acu. Mar sin, le cásdlí luath na Cúirte, a raibh tionchar aige ar a cásdlí níos déanaí, fiosraíodh an cineál ‘ceangailteach’ birt chun a chinneadh an bhfuil sé in ann a bheith mar bhunús le caingean le haghaidh neamhniú. Féach, mar shampla, breithiúnas an 16 Iúil 1956, Fédération charbonnière de Belgique v an tArd-Údarás (8/55, EU:C:1956:7, lch. 256); breithiúnas an 10 Nollaig 1957, Société des usines à tubes de la Sarre v an tArd-Údarás (1/57 agus 14/57, EU:C:1957:13, lch. 114); agus an 15 Márta 1967, CBR agus páirtithe eile v an Coimisiún (8/66 go 11/66, EU:C:1967:7, lch. 91).


44      Is mar sin a shainítear moltaí agus tuairimí sa lá atá inniu ann in Airteagal 288 CFAE, ach foráladh an sainmhíniú céanna in Airteagal 189 CEE.


45      I mbreithiúnas an 31 Márta 1971, an Coimisiún v an Chomhairle (22/70, EU:C:1971:32, mír 39), rinne an Chúirt tagairt do bhearta a bhfuil beartaithe ‘feidhm dhlíthiúil’ a bheith acu. Ina chásdlí le déanaí, áfach, tá an abairt sin ina habairt lena dtuairiscítear bearta a bhfuil sé beartaithe ‘éifeachtaí dlíthiúla ceangailteacha’ a bheith acu. Féach, mar shampla, breithiúnas an 12 Iúil 2022, Nord Stream 2 v an Pharlaimint agus an Chomhairle (C‑348/20 P, EU:C:2022:548, mír 62 agus an cásdlí a luaitear).


46      Féach, maidir le hiarratasóirí atá faoi phribhléid, mar shampla, ordú an 17 Bealtaine 1989, an Iodáil v an Coimisiún (151/88, EU:C:1989:201, míreanna 22 agus 23) agus breithiúnas an 25 Deireadh Fómhair 2017, an tSlóvaic v an Coimisiún (C‑593/15 P agus C‑594/15 P, EU:C:2017:800, míreanna 63 go 65).


47      Nuair a thionscnaíonn iarratasóir atá faoi pribhléid an chaingean, ní bhaineann an cheist sin le hábhar ar aon nós. Ach mar sin féin, mar a mhínigh mé, ní mór don Chúirt a chinneadh an bhfuil gníomh ceangailteach ó thaobh dlí a ndearnadh agóid ina choinne fiú d’iarratasóirí atá faoi phribhléid. In dhá chás na Cúirte, áfach – nach ndearnadh arís agus arís eile, go bhfios dom – dhiúltaigh an Chúirt do chaingean an iarratasóra atá faoi phribhléid (ba é Rialtas na hÍsiltíre an t‑iarratasóir sa dá chás), ar an bhforas nach raibh aon éifeacht dhlíthiúil cheangailteach ag cinneadh an Choimisiúin, a raibh a neamhniú á éileamh, ar an iarratasóir. Féach, ina leith sin, breithiúnas an 5 Deireadh Fómhair 1999, an Ísiltír v an Coimisiún (C‑308/95, EU:C:1999:477, míreanna 26 agus 29) agus ordú an 28 Eanáir 2004, an Ísiltír v an Coimisiún (C‑164/02, EU:C:2004:54, míreanna 18 agus 22). Chun machnamh criticiúil a dhéanamh ar an dá bhreithiúnas sin, féach Tuairim an Abhcóide Ghinearálta Jacobs in an Iodáil v an Coimisiún (C‑301/03, EU:C:2005:550, míreanna 52 agus 53).


48      Féach, maidir leis sin, a mhéid a bhaineann leis an gcásdlí maidir le treoracha agus treoirlínte inmheánacha, Lenaerts, K., Gutman, K., Nowak, J.T., EU Procedural Law, an dara heagrán, Oxford European Union Law Library, Oxford, 2023, lch. 286, míreanna 7.21 go 7.22.


49      Eascraíonn sé sin go soiléir as an gcásdlí i réimse na Státchabhrach, tríd an gcinneadh ón gCoimisiún lena ndearbhaítear nach bhfuil cabhair atá ann cheana féin ag luí leis an margadh inmheánach agus lena n‑ordaítear don Bhallstát an chabhair sin a aisghabháil nach bhfuil sé ceangailteach ó thaobh dlí ach ar an mBallstát sin amháin, ach go bhféadfaidh faighteoir na cabhrach sin agóid a dhéanamh ina choinne freisin. Féach, mar shampla, breithiúnas an 19 Deireadh Fómhair 2000, an Iodáil agus Sardegna Lines v an Coimisiún (C‑15/98 agus C‑105/99, EU:C:2000:570, míreanna 31 go 37).


50      Féach, maidir leis sin, an breithiúnas in IBM, mír 10, agus an 26 Eanáir 2010, Internationaler Hilfsfonds v an Coimisiún (C‑362/08 P, EU:C:2010:40, mír 58).


51      Féach, maidir leis sin, Tuairim an Abhcóide Ghinearálta Roemer i gCásanna Uamtha CBR agus páirtithe eile v an Coimisiún (8/66 go 11/66, nár foilsíodh, EU:C:1967:2, lch. 103).


52      Féach, ar an bpointe sin, níos déanaí, breithiúnas an 13 Feabhra 2025, Swissgrid v an Coimisiún (C‑121/23 P, EU:C:2025:83, mír 46) (ina mínítear i gcás nach bhfuil an t‑iarratasóir i gcaingean le haghaidh neamhniú ina dhuine ar a bhfuil an gníomh atá faoi chonspóid dírithe, ‘is leor a shuíomh go bhfuil sé d’aidhm ag an ngníomh sin éifeachtaí dlíthiúla éigeantacha a chur’, go háirithe, ar a dhaoine ar a bhfuil sé dírithe, ós rud é, ag an gcéim sin, ‘nach gá a fháil amach an bhféadfadh na héifeachtaí dlíthiúla sin difear a dhéanamh do leasanna an achomharcóra trí athrú ar leith a dhéanamh ar a sheasamh dlíthiúil’ ós rud é go gcinntear an ghné sin nuair a dhéantar measúnú ar an gcoinníoll a leagtar síos i mír 4 d’Airteagal 263 CFAE).


53      Béim curtha leis.


54      Féach míreanna 38 agus 39 den ordú atá faoi achomharc. In éineacht leis an mbreithiúnas in IBM, braitheann an Chúirt Ghinearálta freisin ar bhreithiúnas an 18 Samhain 2010, NDSHT v an Coimisiún (C‑322/09 P, EU:C:2010:701, mír 45), ina dtagraítear do chásanna eile ina luaitear mír 9 den bhreithiúnas in IBM freisin.


55      Béim curtha leis.


56      Féach, mar shampla, ex multis, breithiúnas an 31 Márta 1998, an Fhrainc agus páirtithe eile v an Coimisiún (C‑68/94 agus C‑30/95, EU:C:1998:148, mír 62); an 17 Iúil 2008, Athinaïki Techniki v an Coimisiún (C‑521/06 P, EU:C:2008:422, mír 29); an 26 Eanáir 2010, Internationaler Hilfsfonds v an Coimisiún (C‑362/08 P, EU:C:2010:40, mír 51), agus an breithiúnas in an Coimisiún v BRA, mír 65).


57      Féach, ex multis, ordú an 3 Iúil 2007, Commune de Champagne agus páirtithe eile v an Chomhairle agus an Coimisiún (T‑212/02, EU:T:2007:194, míreanna 86 agus 88) agus breithiúnais an 26 Samhain 2018, Shindler agus páirtithe eile v an Chomhairle (T‑458/17, EU:T:2018:838, mír 30) agus an 10 Márta 2021, ViaSat v an Coimisiún (T‑245/17, EU:T:2021:128, mír 68).


58      Féach, mar shampla, Tuairim an Abhcóide Ghinearálta Sharpston in Reynolds Tobacco agus páirtithe eile v an Coimisiún  (C‑131/03 P, EU:C:2006:228, míreanna 102 agus 103), ina gcuireann sí i dtábhacht go ndealrófaí gur chuir an Chúirt an ceanglas go mbeidh gníomh ina cheangal ar an iarratasóir atá faoi cheist leis an gceanglas go bhfuil an gníomh ina cheangal go ginearálta.


59      Fágadh tagairtí don chásdlí a luaitear ar lár.


60      Ordú an 14 Iúil 2010, Deutsche Post v an Coimisiún (T‑570/08, nár foilsíodh, EU:T:2010:311).


61      Féach, mar shampla, breithiúnas an 21 Nollaig 2021, Algebris (UK) agus Anchorage Capital Group v BRA (C‑934/19 P, EU:C:2021:1042, mír 87 et seq.).


62      Féach, chuige sin, an breithiúnas in Deutsche Post, míreanna 40 go 47.


63      Breithiúnas in Deutsche Post, mír 54.


64      Breithiúnas in Deutsche Post, mír 63.


65      Breithiúnas in Deutsche Post, míreanna 66 go 75.


66      An t‑ordú atá faoi achomharc, míreanna 42 go 49.


67      Ordú an 14 Iúil 2010, Deutsche Post v an Coimisiún (T‑570/08, nár foilsíodh, EU:T:2010:311).


68      Féach, chuige sin, ordú atá faoi achomharc, míreanna 43 agus 44 (lena leagtar síos ar dtús, i nósanna imeachta ilchodacha, nach ionann gníomhartha agus gníomhartha idirmheánacha ar féidir agóid a dhéanamh ina gcoinne agus lena leagtar síos ina dhiaidh sin ‘go mbaineann na heisceachtaí ón bprionsabal [sin] … le cásanna ina bhfuil éifeachtaí dlíthiúla neamhspleácha ag an ngníomh idirmheánach’).[Aistriúchán neamhoifigiúil]


69      An t‑ordú atá faoi achomharc, mír 44.


70      Breithiúnas in IBM, mír 10, béim curtha leis.


71      Is féidir an rud céanna a rá faoin ráiteas ón gCúirt i mír 52 de bhreithiúnas an 26 Eanáir 2010, Internationaler Hilfsfonds v an Coimisiún (C‑362/08 P, EU:C:2010:40), ar bhraith an Chúirt Ghinearálta air freisin i mír 43 den ordú atá faoi achomharc.


72      Cé go ndéanann an Chúirt Bhreithiúnais tagairt do choincheap an ghnímh ‘ullmhúcháin’ i nós imeachta ilchodach, agus tuairisc á déanamh aici ar chomhthéacs cáis ar leith, mar sin féin, ní chuireann sí bac ar an bhféidearthacht agóid a dhéanamh i gcoinne gníomh den sórt sin má chinntear go bhfuil éifeachtaí dlíthiúla neamhspleácha aige laistigh den nós imeachta sin. Féach, mar shampla, an breithiúnas in an Coimisiún v BRA , mír 93 (lena mínítear ‘i nós imeachta casta den sórt sin, ní féidir gníomhartha a ghlactar le linn chéimeanna ullmhúcháin ghlacadh an ghnímh chinntithigh, i gcás ina mbíonn éifeachtaí dlíthiúla neamhspleácha acu, a bheith faoi réir caingean le haghaidh neamhniú’) (béim curtha leis).


73      Mar a mhínigh mé, déantar foráil le hAirteagal 65(1) de RGCS maidir leis na héifeachtaí ceangailteacha atá ag cinneadh ó EDPB arna achtú le linn an tsásra comhsheasmhachta ar na húdaráis mhaoirseachta náisiúnta ábhartha.


74      An t‑ordú atá faoi achomharc, mír 51.


75      Féach breithiúnas an 12 Iúil 2022, Nord Stream 2 v an Pharlaimint agus an Chomhairle (C‑348/20 P, EU:C:2022:548, mír 43 agus an cásdlí a luaitear).


76      Feictear domsa gurb é an chéad chás ina ndéantar tagairt do chineál ‘carnach’ na gcritéar sin breithiúnas an 10 Meán Fómhair 2009, an Coimisiún v Ente per le Ville vesuviane agus Ente per le Ville vesuviane v an Coimisiún (C‑445/07 P agus C‑455/07 P, EU:C:2009:529, mír 45), a bhain le cúnamh airgeadais arna dheonú ó Chiste Forbraíochta Réigiúnaí na hEorpa trí chúnamh ó na húdaráis náisiúnta.


77      I gcás ina gceanglófar le beart an Aontais beart cur chun feidhme breise chun an t‑iarratasóir a ‘shroicheadh’ is minice a tharlaíonn sa chleachtas. Ní hé cás den sórt sin an t‑aon chás ina bhféadfaí gur de chúram duine nádúrtha nó dlítheanach gníomh go díreach. Tá gníomhartha ann lena ndéantar difear do staid dhlíthiúil duine aonair gan aon ghá le beart cur chun feidhme. Is fíor sin i gcás gníomhartha a bhfuil feidhm ghinearálta leo, amhail Rialacháin. I bhfianaise, maidir leis sin, mar shampla, na staide a bhí i gceist i mbreithiúnas an 1 Aibreán 2004, an Coimisiún v Jégo-Quéré (C‑263/02 P, EU:C:2004:210) a mheas. In imthosca an cháis sin, forchuireadh go díreach ar chuideachta iascaireachta an iarratasóra úsáid éigeantach líonta a bhfuil mogallmhéid íosta acu chun gabháil colmóirí óga a laghdú, gan aon ghá le bearta cur chun feidhme. Leis an leasú is déanaí ar mhír 4 d’Airteagal 263 CFAE, a eascraítear as Conradh Liospóin, cuireadh an deis agóid a dhéanamh i gcoinne caingean le haghaidh neamhniú le gníomhartha rialála nach gceanglaítear leo bearta cur chun feidhme gan gá le cúram aonair a chruthú. Mar sin féin, ní mór don iarratasóir a chruthú fós gur dá chúram an beart a ndéantar agóid ina choinne go díreach. Ní bheidh an dara critéar ‘carnach’ a eascraítear as an gcásdlí – na mbeart cur chun feidhme – i gceist leis an gcruthúnas sin, ós rud é, i gcás den sórt sin, nach bhfuil aon bheart cur chun feidhme ann a fheidhmítear mar ‘dhroichead’ idir an beart atá faoi chonspóid agus an t‑iarratasóir.


78      Féach, chun deimhniú le déanaí a fháil maidir le Treoracha, a mbíonn bearta cur chun feidhme i gceist leo i gcónaí, breithiúnas an 12 Iúil 2022, Nord Stream 2 v an Pharlaimint agus an Chomhairle (C‑348/20 P, EU:C:2022:548, mír 70).


79      Féach an t‑ordú atá faoi achomharc, mír 51.


80      Féach breithiúnas an 12 Iúil 2022, Nord Stream 2 v an Pharlaimint agus an Chomhairle (C‑348/20 P, EU:C:2022:548, míreanna 71 go 74).


81      An t‑ordú atá faoi achomharc, mír 64.


82      Féach, mar shampla, breithiúnais an 19 Deireadh Fómhair 2000, an Iodáil agus Sardegna Lines v an Coimisiún (C‑15/98 agus C‑105/99, EU:C:2000:570, míreanna 31 agus 34) agus an 29 Aibreán 2004, an Iodáil v an Coimisiún (C‑298/00 P, EU:C:2004:240, mír 39).


83      Is amhlaidh atá freisin maidir leis an gcásdlí ar a bhfuil an Chúirt Ghinearálta ag brath i mír 65 den ordú atá faoi achomharc, a bhain le cinneadh ón gCoimisiún atá dírithe ar Bhallstát lena dtugtar treoir don Stát sin maoiniú áirithe ón Aontas a sholáthraítear do ghnóthas a laghdú. Chinn an Chúirt gur de chúram gnóthais i riocht den sórt sin an cinneadh ón gCoimisiún go díreach, d’ainneoin an ghá atá le bearta cur chun feidhme ag Ballstát.


84      Mír 64 den ordú atá faoi achomharc.


85      Mír 53 den ordú atá faoi achomharc.


86      Ina theannta sin, déanann an t‑achomharcóir agóid i gcoinne chumhacht EDPB cur isteach ar an modh ríofa nó ar mhéid na bhfíneálacha, ina maíonn sé gur fágadh le RGCS an chumhacht sin faoi chúram an údaráis maoirseachta náisiúnta agus faoi na rialacha dá bhforáiltear leis an dlí náisiúnta. Ní mór measúnú a dhéanamh ar an maíomh deireanach sin de réir na bhfiúntas, agus ní féidir leis an gCúirt Bhreithiúnais tuairim a thabhairt maidir leis an gceist sin san achomharc seo.


87      Féach mír 57 go mír 59 den ordú atá faoi achomharc. Cé nár chuir EDPB a sheasamh in iúl i dtaobh ar ghníomhaigh WhatsApp mar rialaitheoir nó mar phróiseálaí i ndáil leis na sonraí pearsanta a eascraíodh as an ‘nós imeachta haiseála cailltí’, ní dhéantar athrú leis sin ar an bhfíoras go bhfuil údarás maoirseachta na hÉireann faoi cheangal ag toradh EDPB gurb ionann an nós imeachta sin agus próiseáil sonraí pearsanta.


88      I míreanna 55 agus mír 56 den ordú atá faoi achomharc, liostaigh an Chúirt Ghinearálta na saincheisteanna sin a chinn EDPB agus na saincheisteanna sin a chinn údarás maoirseachta na hÉireann, ina theannta sin, ina chinneadh náisiúnta críochnaitheach.


89      Féach an t‑ordú atá faoi achomharc, mír 60.


90      Féach, ex multis, breithiúnas an 3 Meitheamh 2021, an Ungáir v an Pharlaimint (C‑650/18, EU:C:2021:426, mír 38 agus an cásdlí a luaitear) agus an breithiúnas in an Coimisiún v BRA, mír 65 agus an cásdlí a luaitear).


91      Maidir leis sin, braitheann an Chúirt Ghinearálta ar bhreithiúnas an 25 Iúil 2002, Unión de Pequeños Agricultores v an Chomhairle (C‑50/00 P, EU:C:2002:462, mír 40); féach freisin an t‑ordú atá faoi achomharc, mír 68.


92      Féach breithiúnas an 22 Deireadh Fómhair 1987, Foto-Frost (314/85, EU:C:1987:452, mír 17).


93      Breithiúnas an 9 Márta 1994 (C‑188/92, EU:T:1994:90, mír 26).


94      Breithiúnas an 25 Iúil 2018 (C‑135/16, EU:C:2018:582, mír 17 agus an cásdlí a luaitear).


95      Breithiúnas an 25 Iúil 2018, Georgsmarienhütte agus páirtithe eile (C‑135/16, EU:C:2018:582, mír 18).


96      Féach, chuige sin, mar shampla, breithiúnas an 10 Márta 2021, Von Aschenbach & Voss (C‑708/19, EU:C:2021:190, míreanna 33 agus 49).


97      Breithiúnas an 3 Nollaig 2019, Iccrea Banca (C‑414/18, ‘an breithiúnas in Iccrea Banca’, EU:C:2019:1036).


98      An breithiúnas in Iccrea Banca, míreanna 72 agus 74.


99      Níl an togra bailí ach amháin dá mbeadh sé ‘gan aon amhras’ go raibh WhatsApp ina sheasamh os comhair Chúirteanna an Aontais. Os a choinne sin, mura raibh seasamh ag WhatsApp os comhair na Cúirte Ginearálta chun agóid a dhéanamh i gcoinne neamhniú an chinnidh atá faoi chonspóid, mar a mhaígh an chúirt sin, níor cheart cosc a chur ar an gcomhlacht sin pléadáil neamhnithe a thabhairt os comhair na cúirte náisiúnta.


100      Féach an t‑ordú atá faoi achomharc, mír 40.


101      Sa chuid ábhartha, léitear aithris 143 de RGCS mar a leanas: ‘I gcás chinntí an Bhoird [ar de chúram] rialaitheo[ra], próiseálaí nó an gearán[aigh], féadfaidh an gearánach sin caingean a thionscnamh le haghaidh neamhniú i gcoinne na gcinntí sin agus ba cheart dóibh amhlaidh a dhéanamh laistigh de 2 mhí tar éis a fhoilsithe ar shuíomh gréasáin an Bhoird, i gcomhréir le hAirteagal 263 CFAE.’


102      Féach, maidir leis sin, Tuairim an Abhcóide Ghinearálta Campos Sánchez-Bordona in Georgsmarienhütte agus páirtithe eile (C‑135/16, EU:C:2018:120, mír 43). Féach freisin na hargóintí a ardaíodh le Tuairim an Abhcóide Ghinearálta Jacobs in Unión de Pequeños Agricultores v an Chomhairle (C‑50/00 P, EU:C:2002:197, mír 40 et seq.).


103      Féach an t-ordú atá faoi achomharc, mír 70.


104      Féach breithiúnas an 14 Nollaig 2000, Masterfoods agus HB (C‑344/98, EU:C:2000:689, mír 39 agus an cásdlí a luaitear).


105      Féach breithiúnais an 14 Nollaig 2000, Masterfoods agus HB (C‑344/98, EU:C:2000:689, mír 57) agus an 25 Iúil 2018, Georgsmarienhütte agus páirtithe eile (C‑135/16, EU:C:2018:582, mír 24 agus an cásdlí a luaitear).


106      Féach Meta Platforms Ireland Ltd v an Coimisiún um Chosaint Sonraí (formheasta) [2024] IEHC 264 an 10 Bealtaine 2024, an méid seo a leanas á thabhairt faoi deara i mír 49: ‘Cuirfear an t-achomharc reachtúil agus an t-athbhreithniú breithiúnach ar atráth chun fanacht le toradh imeachtaí WhatsApp atá ar feitheamh faoi láthair os comhair CBAE.’[Aistriúchán neamhoifigiúil]


107      Féach breithiúnas an 25 Iúil 2018, Georgsmarienhütte agus páirtithe eile (C‑135/16, EU:C:2018:582, mír 25).


108      An t-ordú atá faoi achomharc, mír 40.