|
10.11.2022 |
GA |
Iris Oifigiúil an Aontais Eorpaigh |
L 289/3 |
CINNEADH CUR CHUN FEIDHME (AE) 2022/2190 ÓN gCOMHAIRLE
an 8 Samhain 2022
lena leasaítear Cinneadh Cur Chun Feidhme (AE) 2020/1353 lena ndeonaítear tacaíocht shealadach faoi Rialachán (AE) 2020/672 do Phoblacht na Polainne chun rioscaí dífhostaíochta a mhaolú i gcás na héigeandála a d’eascair as ráig COVID-19
TÁ COMHAIRLE AN AONTAIS EORPAIGH,
Ag féachaint don Chonradh ar Fheidhmiú an Aontais Eorpaigh,
Ag féachaint do Rialachán (AE) 2020/672 ón gComhairle an 19 Bealtaine 2020 maidir le bunú ionstraime Eorpaí le haghaidh tacaíocht shealadach chun rioscaí dífhostaíochta a mhaolú i gcás éigeandáil (SURE) a d’eascair as ráig COVID-19 (1), agus go háirithe Airteagal 6(1) de,
Ag féachaint don togra ón gCoimisiún Eorpach,
De bharr an mhéid seo a leanas:
|
(1) |
Ag éirí as iarraidh ón bPolainn an 6 Lúnasa 2020, dheonaigh an Chomhairle, trí bhíthin Chinneadh Cur Chun Feidhme (AE) 2020/1353 (2), cúnamh airgeadais don Pholainn i bhfoirm iasachta arb ionann é agus uasmhéid EUR 11 236 693 087 le meánaibíocht uasta 15 bliana agus tréimhse infhaighteachta 18 mí, d’fhonn iarrachtaí náisiúnta na Polainne a chomhlánú chun aghaidh a thabhairt ar thionchar ráig COVID-19 agus chun freagairt d’iarmhairtí socheacnamaíocha na ráige sin ar oibrithe agus ar dhaoine féinfhostaithe. |
|
(2) |
Bhí an iasacht le húsáid ag an bPolainn chun scéimeanna oibre gearr-ama agus bearta comhchosúla leo a mhaoiniú, dá dtagraítear in Airteagal 3 de Chinneadh Cur Chun Feidhme (AE) 2020/1353. |
|
(3) |
De bharr ráig COVID-19 cuirtear bac ar chuid shuntasach de lucht saothair na Polainne i gcónaí. Mar thoradh air sin tá mórmhéadú tobann leanúnach tagtha ar an gcaiteachas poiblí sa Pholainn i ndáil le bearta nua, eadhon tástáil PCR agus sochair airgid le haghaidh oibrithe sláinte atá ag comhrac COVID-19. |
|
(4) |
Maidir le ráig COVID-19 agus na bearta urghnácha a chuir an Pholainn chun feidhme in 2020, 2021 agus 2022 chun srian a chur ar an ráig sin agus a tionchar socheacnamaíoch agus a tionchar ar chúrsaí sláinte, d’imir siad tionchar ollmhór ar an airgeadas poiblí agus imríonn go fóill. In 2020, bhí easnamh rialtais ghinearálta agus ollfhiachas rialtais ghinearálta de 6,9 % agus 57,1 % den olltáirgeacht intíre (OTI) faoi seach ar an bPolainn, méid a chúngaigh go 1,9 % agus 53,8 % faoi dheireadh 2021. De réir réamhaisnéis an earraigh 2022 ón gCoimisiún, táthar ag súil go mbeidh easnamh rialtais ghinearálta agus ollfhiachas rialtais ghinearálta de 4,0 % agus 50,8 % de OTI faoi seach ag an bPolainn faoi dheireadh 2022. De réir réamhaisnéis an tsamhraidh 2022 ón gCoimisiún, tuartar go dtiocfaidh méadú 5,2 % ar OTI na Polainne in 2022. |
|
(5) |
An 19 Meán Fómhair 2022, d’iarr an Pholainn ar an Aontas cur le liosta na mbeart ar deonaíodh cúnamh airgeadais ina leith cheana féin trí bhíthin Chinneadh Cur Chun Feidhme (AE) 2020/1353 d’fhonn leanúint den chomhlíonadh ar na hiarrachtaí náisiúnta a rinne sí in 2020, 2021 agus 2022 chun aghaidh a thabhairt ar thionchar ráig COVID-19 agus chun freagairt d’iarmhairtí socheacnamaíocha na ráige ar oibrithe agus ar dhaoine féinfhostaithe (“an iarraidh”). Go sonrach, thug an Pholainn isteach sraith beart i ndáil le sláinte, a leagtar amach in Aithrisí 6 go 7, chun aghaidh a thabhairt ar ráig COVID-19. |
|
(6) |
Ar bhonn “Acht an 2 Márta 2020 maidir le réitigh shonracha a bhaineann le cosc, cur i gcoinne agus díothú a dhéanamh ar COVID-19, ar ghalair thógálacha eile agus ar chásanna éigeandála a eascraíonn astu” (3) thug an tAire Sláinte treoir don Chiste Náisiúnta Sláinte conarthaí maidir le tástálacha RT-PCR i leith SARS-CoV-2 a thabhairt i gcrích le saotharlanna leasmhara. Rinneadh costas na dtástálacha a mhaoiniú ó bhuiséad an stáit agus bhí siad comhréireach le líon na ndaoine a rinne iarratas ar thástáil. Mar a thagraítear dó san iarraidh, ní iarrtar maoiniú a dhéanamh faoi Rialachán (AE) 2020/672ach ar chaiteachas a forghníomhaíodh in 2020 agus 2021. Is beart nua é sin agus cuireadh chun feidhme é ó dheireadh mhí Aibreáin 2020 go dtí deireadh mhí an Mhárta 2022. |
|
(7) |
Ar bhonn “Acht an 2 Márta 2020 maidir le réitigh shonracha a bhaineann le cosc, cur i gcoinne agus díothú a dhéanamh ar COVID-19, ar ghalair thógálacha eile agus ar chásanna éigeandála a eascraíonn astu” (4) agus ar bhonn “Acht an 14 Lúnasa 2020 maidir le hachtanna áirithe a leasú chun áirithiú a dhéanamh ar fheidhmiú na cosanta sláinte i dtaca le heipidéim COVID-19 agus tar éis di teacht chun deiridh” (5), thug an tAire Sláinte treoir don Chiste Náisiúnta Sláinte cistí a aistriú chuig eintitis leighis, ar cistí iad atá beartaithe le haghaidh dheonú na sochar airgid le haghaidh oibrithe cúraim sláinte atá ag comhrac COVID-19, dá dtagraítear san iarraidh. Is éard atá sa bheart cumhdach a dhéanamh ar an gcostas a bhaineann le sochar airgid breise míosúil a dheonú le haghaidh gairmithe leighis agus sochar airgid breise aonuaire a dheonú le haghaidh oibrithe cúraim sláinte eile. Deonaíodh na sochair do dhaoine a bhí rannpháirteach i soláthar seirbhísí agus ag a raibh teagmháil dhíreach le hothair a bhí ionfhabhtaithe, nó a rabhthas in amhras gur ionfhabhtaíodh iad, le víreas SARS-CoV-2 in aonaid eagraíochtúla de chuid eintiteas leighis. Ní iarrtar maoiniú a dhéanamh faoi Rialachán (AE) 2020/672 ach ar chaiteachas a forghníomhaíodh in 2020 agus 2021. Is beart nua é sin agus cuireadh chun feidhme é ó mhí Mheán Fómhair 2020 go dtí deireadh mhí an Mhárta 2022. |
|
(8) |
Comhlíonann an Pholainn na coinníollacha maidir le cúnamh airgeadais a iarraidh, coinníollacha a leagtar amach in Airteagal 3 de Rialachán (AE) 2020/672. Chuir an Pholainn fianaise chuí ar fáil don Choimisiún ina léirítear go bhfuil méadú EUR 11 826 003 428 tagtha ar an gcaiteachas poiblí iarbhír agus ar an gcaiteachas poiblí beartaithe ón 1 Feabhra 2020 ar aghaidh mar thoradh ar na bearta náisiúnta a rinneadh chun aghaidh a thabhairt ar éifeachtaí socheacnamaíocha ráig COVID-19. Is mórmhéadú tobann é sin mar go mbaineann sé freisin leis na bearta i ndáil le sláinte a rinneadh chun aghaidh a thabhairt ar ráig COVID-19 agus lena gcumhdaítear sciar suntasach de na gnóthais agus den lucht saothair sa Pholainn. Tá sé beartaithe ag an bPolainn EUR 9 100 000 den mhéid méadaithe caiteachais a tharla mar gheall ar na bearta nua i ndáil le sláinte a mhaoiniú trí chistí an Aontais agus trí EUR 580 210 341 dá maoiniú féin a sholáthar. |
|
(9) |
Chuaigh an Coimisiún i gcomhairle leis an bPolainn agus d’fhíoraigh sé an mórmhéadú tobann ar an gcaiteachas poiblí iarbhír agus ar an gcaiteachas poiblí beartaithe a bhaineann go díreach le scéimeanna oibre gearr-ama agus bearta comhchosúla, chomh maith leis an gcaoi a ndeachthas i muinín bearta ábhartha i ndáil le sláinte agus a bhaineann le ráig COVID-19, dá dtagraítear san iarraidh, i gcomhréir le hAirteagal 6 de Rialachán (AE) 2020/672. |
|
(10) |
Méid EUR 1 672 546 359 atá sna bearta i ndáil le sláinte, mar a thagraítear dó san iarraidh agus in Aithrisí (6) go (7). |
|
(11) |
Dá bhrí sin, ba cheart don chúnamh airgeadais a deonaíodh cheana le Cinneadh Cur Chun Feidhme (AE) 2020/1353 cumhdach a dhéanamh freisin ar na bearta nua dá dtagraítear in aithrisí (6) go (7). |
|
(12) |
Ba cheart don Chinneadh seo a bheith gan dochar do thoradh aon nósanna imeachta a d’fhéadfaí a dhéanamh, nósanna imeachta a bhaineann le saobhadh fheidhmiú an mhargaidh inmheánaigh, go háirithe de bhun Airteagail 107 agus 108 den Chonradh. Leis an gCinneadh seo ní sháraítear an ceanglas atá ar na Ballstáit fógra a thabhairt don Choimisiún faoi chásanna Státchabhrach a d’fhéadfadh a bheith ann faoi Airteagal 108 den Chonradh. |
|
(13) |
Ba cheart don Pholainn an Coimisiún a chur ar an eolas go tráthrialta faoi cur chun feidhme an chaiteachais phoiblí atá bheartaithe, chun a chur ar chumas an Choimisiúin measúnú a dhéanamh ar a mhéid a chuir an Pholainn an caiteachas sin chun feidhme, |
TAR ÉIS AN CINNEADH SEO A GHLACADH:
Airteagal 1
Cuirtear an méid seo a leanas in ionad Airteagal 3 de Chinneadh Cur Chun Feidhme (AE) 2020/1353:
“Airteagal 3
Féadfaidh an Pholainn na bearta seo a leanas a mhaoiniú:
|
(a) |
laghdú ar ranníocaíochtaí slándála sóisialta, dá bhforáiltear in Airteagal 31zo de chuid ‘Acht an 2 Márta 2020 maidir le réitigh shonracha a bhaineann le cosc, cur i gcoinne agus díothú a dhéanamh ar COVID-19, ar ghalair thógálacha eile agus ar na cásanna éigeandála a eascraíonn astu’, don chuid den chaiteachas a bhaineann leis an tacaíocht do dhaoine féinfhostaithe, do na comharchumainn shóisialta go léir (gan beann ar líon na bhfostaithe) agus, i gcás cuideachtaí ina bhfostaítear 50 duine nó níos lú, don chuid den chaiteachas i leith fostaithe a bhí fostaithe go leanúnach; |
|
(b) |
sochar neamhfhónaimh le haghaidh daoine féinfhostaithe agus dóibh siúd atá ag obair faoi conarthaí dlí shibhialta, dá bhforáiltear in Airteagail 15zq agus 15zua de chuid ‘Acht an 2 Márta 2020 maidir le réitigh shonracha a bhaineann le cosc, cur i gcoinne agus díothú a dhéanamh ar COVID-19, ar ghalair thógálacha eile agus ar na cásanna éigeandála a eascraíonn astu’; |
|
(c) |
fóirdheontais i leith tuarastal agus ranníocaíochtaí slándála sóisialta de chuid cuideachtaí a úsáideann obair gearr-ama nó a laghdaíonn am obair go deonach nó ina raibh na fostaithe i bhfostaíocht go leanúnach, dá bhforáiltear in Airteagail 15g, 15ga, 15gga, 15gg, 15zzb, 15zze agus 15zze2 de chuid ‘Acht an 2 Márta 2020 maidir le réitigh shonracha a bhaineann le cosc, cur i gcoinne agus díothú a dhéanamh ar COVID-19, ar ghalair thógálacha eile agus ar na cásanna éigeandála a eascraíonn astu’; |
|
(d) |
fóirdheontais le haghaidh daoine féinfhostaithe nach bhfuil fostaithe acu, dá bhforáiltear in hAirteagal 15zzc de chuid ‘Acht an 2 Márta 2020 maidir le réitigh shonracha a bhaineann le cosc, cur i gcoinne agus díothú a dhéanamh ar COVID-19, ar ghalair thógálacha eile agus ar na cásanna éigeandála a eascraíonn astu’; |
|
(e) |
iasachtaí atá in-chomhshóite go fóirdheontais arna ndeonú do dhaoine féinfhostaithe, micrea-chuideachtaí agus eagraíochtaí neamhrialtasacha, le haghaidh an mhéid a chomhshóitear iarbhír go deontais, dá bhforáiltear in Airteagal 15zzd agus 15zzda de chuid ‘Acht an 2 Márta 2020 maidir le réitigh shonracha a bhaineann le cosc, cur i gcoinne agus díothú a dhéanamh ar COVID-19, ar ghalair thógálacha eile agus ar na cásanna éigeandála a eascraíonn astu’; |
|
(f) |
maoiniú a dhéanamh ar dhéanamh na dtástálacha diagnóiseacha PCR sna saotharlanna a rinne conarthaí maidir le tástálacha RT-PCR i leith SARS-CoV-2 a thabhairt i gcrích leis an gCiste Náisiúnta Sláinte, dá bhforáiltear in Airteagal 10a, míreanna 1 agus 2, agus tar éis d’Airteagal 10a dul in éag, in Airteagal 11h, mír 2, pointe 2 agus mír 4 de chuid “Acht an 2 Márta 2020 maidir le réitigh shonracha a bhaineann le cosc, cur i gcoinne agus díothú a dhéanamh ar COVID-19, ar ghalair thógálacha eile agus ar na cásanna éigeandála a eascraíonn astu’; |
|
(g) |
sochar airgid breise míosúil a dheonú do ghairmithe leighis agus sochar airgid breise aonuaire a dheonú d‘oibrithe cúraim sláinte eile, dá bhforáiltear in Airteagal 10a, mír 1 de chuid ‘Acht an 2 Márta 2020 maidir le réitigh shonracha a bhaineann le cosc, cur i gcoinne agus díothú a dhéanamh ar COVID-19, ar ghalair thógálacha eile agus ar chásanna éigeandála a eascraíonn astu’, agus, tar éis d’Airteagal 10a dul in éag, in Airteagal 42 de chuid ‘Acht an 14 Lúnasa 2020 maidir le hachtanna áirithe a leasú chun áirithiú a dhéanamh ar fheidhmiú na cosanta sláinte i dtaca le heipidéim COVID-19 agus tar éis di teacht chun deiridh’.”. |
Airteagal 2
Dírítear an Cinneadh seo chuig Poblacht na Polainne.
Tiocfaidh an Cinneadh seo i bhfeidhm an dáta a dtabharfar fógra ina leith don seolaí.
Airteagal 3
Foilseofar an Cinneadh seo in Iris Oifigiúil an Aontais Eorpaigh.
Arna dhéanamh sa Bhruiséil, an 8 Samhain 2022.
Thar ceann na Comhairle
An tUachtarán
Z. STANJURA
(1) IO L 159, 20.5.2020, lch. 1.
(2) Cinneadh Cur Chun Feidhme (AE) 2020/1353 ón gComhairle an 25 Meán Fómhair 2020 lena ndeonaítear tacaíocht shealadach faoi Rialachán (AE) 2020/672 do Phoblacht na Polainne chun rioscaí dífhostaíochta a mhaolú i gcás na héigeandála a d’eascair as ráig COVID-19, (IO L 314, 29.9.2020, lch. 45).
(3) Airteagal 10a, míreanna 1 agus 2, agus, tar éis dul in éag d’Airteagal 10a, Airteagal 11h, mír 2, pointe 2 agus mír 4. 2020 poz. 374, arna leasú.
(4) Art. 10a alt 1. 2020 poz. 374.
(5) Art. 42. 2020 poz. 1493.