(1)

Il-ġidri tan-nagħaġ u l-ġidri tal-mogħoż huma mard virali infettiv li jolqot lill-annimali kaprini u ovini u li jista’ jħalli impatt serju fuq il-popolazzjoni tal-annimali kkonċernati u fuq il-profittabbiltà tat-trobbija tal-annimali, billi jikkawża tfixkil fil-movimenti tal-kunsinni ta’ dawk l-annimali u tal-prodotti tagħhom fl-Unjoni u fl-esportazzjonijiet lejn il-pajjiżi terzi. F’każ ta’ tifqigħa tal-ġidri tan-nagħaġ u tal-ġidri tal-mogħoż fl-annimali kaprini jew ovini, hemm riskju serju li dak il-mard jinxtered lejn stabbilimenti oħra li jżommu l-annimali kaprini jew ovini.

(2)

Ir-Regolament Delegat tal-Kummissjoni (UE) 2020/687 (2) jissupplimenta r-regoli għall-kontroll tal-mard elenkat imsemmi fl-Artikolu 9(1), il-punti (a), (b) u (c), tar-Regolament (UE) 2016/429, u definit bħala mard tal-kategoriji A, B u C fir-Regolament ta’ Implimentazzjoni tal-Kummissjoni (UE) 2018/1882 (3). B’mod partikolari, l-Artikoli 21 u 22 tar-Regolament Delegat (UE) 2020/687 jipprevedu l-istabbiliment ta’ żona ristretta f’każ ta’ tifqigħa ta’ marda tal-kategorija A, inkluż il-ġidri tan-nagħaġ u l-ġidri tal-mogħoż, kif ukoll ċerti miżuri li jridu jiġu applikati fiha. Barra minn hekk, l-Artikolu 21(1) ta’ dak ir-Regolament Delegat jipprevedi li ż-żona ristretta trid tkun tinkludi żona ta’ protezzjoni, żona ta’ sorveljanza u, jekk ikun meħtieġ, żona ristretta ulterjuri madwar jew maġenb iż-żoni ta’ protezzjoni u ta’ sorveljanza.

(3)

Id-Deċiżjoni ta’ Implimentazzjoni tal-Kummissjoni (UE) 2026/1108 (4) ġiet adottata fil-qafas tar-Regolament (UE) 2016/429 u tistabbilixxi ċerti miżuri ta’ emerġenza relatati mal-infezzjoni bil-ġidri tan-nagħaġ u bil-ġidri tal-mogħoż fir-Rumanija.

(4)

B’mod aktar partikolari, l-Artikolu 1 tad-Deċiżjoni ta’ Implimentazzjoni (UE) 2026/1108 jipprevedi li ż-żona ristretta, li tinkludi żoni ta’ protezzjoni, żoni ta’ sorveljanza u żoni ristretti ulterjuri, li trid tiġi stabbilita mir-Rumanija, f’konformità mal-Artikolu 21 tar-Regolament Delegat (UE) 2020/687, trid tkun tinkludi mqar iż-żoni elenkati fl-Anness I ta’ dik id-Deċiżjoni ta’ Implimentazzjoni, u l-miżuri li jeħtieġ jiġu applikati fiż-żoni ta’ protezzjoni u fiż-żoni ta’ sorveljanza jridu jiġu applikati mqar sad-dati elenkati fl-Anness I.

(5)

Minn dakinhar li saret l-aħħar emenda tad-Deċiżjoni ta’ Implimentazzjoni tal-Kummissjoni (UE) 2026/1108 (5) ’l hawn, ir-Rumanija nnotifikat lill-Kummissjoni, fid-29 ta’ Ġunju 2026, dwar tifqigħa addizzjonali tal-ġidri tan-nagħaġ u tal-ġidri tal-mogħoż fi stabbiliment fejn jinżammu l-annimali ovini u kaprini, li jinsab fil-kontea ta’ Buzău barra miż-żoni ta’ protezzjoni u miż-żoni ta’ sorveljanza elenkati fl-Anness tad-Deċiżjoni ta’ Implimentazzjoni (UE) 2026/1108.

(6)

Għalhekk, iż-żona ristretta, li tinkludi żoni ta’ protezzjoni, żoni ta’ sorveljanza u żoni ristretti ulterjuri, kif stipulat fl-Anness I tad-Deċiżjoni ta’ Implimentazzjoni (UE) 2026/1108, jenħtieġ li tiġi aġġustata, kemm fl-ispazju kif ukoll fiż-żmien, biex jiġi evitat li l-mard ikompli jinxtered fit-territorju tar-Rumanija jew fil-bqija tal-Unjoni.

(7)

Id-daqs taż-żoni ta’ protezzjoni, taż-żoni ta’ sorveljanza u taż-żoni ristretti ulterjuri, u d-durata tal-miżuri li jridu jiġu applikati fihom, huma bbażati fuq il-kriterji stipulati fl-Artikolu 64(1) tar-Regolament (UE) 2016/429, kif ukoll fuq ir-regoli stabbiliti fir-Regolament Delegat (UE) 2020/687. Il-kriterji applikati għall-għażla tad-daqs taż-żoni ta’ protezzjoni, taż-żoni ta’ sorveljanza u taż-żoni ristretti ulterjuri, kif ukoll tad-durata tal-miżuri li jridu jiġu applikati fihom, ma jqisux biss is-sitwazzjoni epidemjoloġika fir-rigward tal-ġidri tan-nagħaġ u tal-ġidri tal-mogħoż fiż-żoni milquta minn dak il-mard, iżda anki s-sitwazzjoni epidemjoloġika kumplessiva tal-ġidri tan-nagħaġ u tal-ġidri tal-mogħoż fit-territorju kollu tar-Rumanija, kif ukoll il-livell tar-riskju li l-mard ikompli jinxtered. Barra minn hekk, id-durata tal-miżuri previsti b’din id-Deċiżjoni ġiet iddeterminata f’konformità mal-istandards internazzjonali stipulati fil-Kodiċi tas-Saħħa tal-Annimali Terrestri tal-Organizzazzjoni Dinjija għas-Saħħa tal-Annimali (WOAH) (6).

(8)

Barra minn hekk, id-Deċiżjoni ta’ Implimentazzjoni (UE) 2026/1108 tistabbilixxi ż-żoni fit-territorju tar-Rumanija, elenkati fl-Anness II, fejn iridu jiġu applikati miżuri ulterjuri, bħal dawk applikabbli għaż-żoni ristretti ulterjuri, kif previst fir-Regolament Delegat (UE) 2020/687, u fejn għal ċertu perjodu ta’ żmien, wara l-iskadenza tal-perjodi previsti għall-miżuri applikabbli fiż-żoni ta’ protezzjoni u fiż-żoni ta’ sorveljanza, iridu jiġu pprojbiti l-movimenti tal-annimali ovini u kaprini barra l-perimetri esterni ta’ dawk iż-żoni. Fl-Anness II jeħtieġ tiġi indikata d-durata tal-miżuri applikabbli f’dawk iż-żoni.

(9)

Barra minn hekk, id-Deċiżjoni ta’ Implimentazzjoni (UE) 2026/1108 tipprojbixxi l-movimenti tal-annimali kaprini u ovini mit-territorju kollu tar-Rumanija lejn destinazzjoni li tinsab fi Stat Membru ieħor, jew minn Stat Membru ieħor, sal-31 ta’ Lulju 2026.

(10)

Skont l-informazzjoni pprovduta mill-awtorità kompetenti tar-Rumanija, din hija rikorrenza tal-ġidri tan-nagħaġ u tal-ġidri tal-mogħoż f’żona li qatt ma ntlaqtet qabel, aktar minn xahar wara r-rapport tal-aħħar tifqigħa fir-Rumanija bi ftit li xejn informazzjoni dwar l-oriġini tat-tifqigħa. Għalhekk, hemm riskju għoli li l-mard ikompli jinxtered, mhux biss fir-Rumanija u fil-bqija tal-Unjoni, iżda wkoll f’pajjiżi terzi.

(11)

Għalhekk, jeħtieġ tiġi estiża, sal-31 ta’ Diċembru 2026, il-projbizzjoni fuq il-movimenti tal-annimali ovini u kaprini mit-territorju kollu tar-Rumanija lejn kwalunkwe destinazzjoni li tinsab fi Stat Membru ieħor, jew minn Stat Membru ieħor, u jeħtieġ ukoll li dik il-projbizzjoni tiġi estiża għal kwalunkwe destinazzjoni li tinsab f’pajjiżi terzi.

(12)

Għalhekk, iż-żoni identifikati bħala żoni ta’ protezzjoni, żoni ta’ sorveljanza u żoni ristretti ulterjuri fir-Rumanija jenħtieġ li jiġu stipulati fl-Anness I ta’ din id-Deċiżjoni kif xieraq, u jenħtieġ li tiġi stabbilita d-durata ta’ dik ir-reġjonalizzazzjoni. Id-durata ta’ dik ir-reġjonalizzazzjoni tqis il-perjodi minimi biex il-miżuri jiġu applikati fiż-żoni ta’ protezzjoni u fiż-żoni ta’ sorveljanza f’konformità mar-Regolament Delegat (UE) 2020/687.

(13)

Minħabba l-urġenza tas-sitwazzjoni epidemjoloġika fl-Unjoni fir-rigward tat-tixrid tal-ġidri tan-nagħaġ u tal-ġidri tal-mogħoż, u l-ħtieġa tal-evitar tat-tixrid ulterjuri tal-mard mill-istabbilimenti milquta fir-Rumanija lejn partijiet oħra ta’ dak l-Istat Membru jew lejn xi Stati Membri oħra, il-miżuri ta’ emerġenza stabbiliti f’din id-Deċiżjoni ta’ Implimentazzjoni jenħtieġ li jibdew japplikaw mill-aktar fis.

(14)

Il-miżuri previsti f’din id-Deċiżjoni huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,

1.

L-Artikolu 1c huwa sostitwit b’dan li ġej:

2.

L-Annessi huma sostitwiti bit-test stipulat fl-Annessi ta’ din id-Deċiżjoni.