(1)

Fuair an Coimisiún iarratas an 4 Lúnasa 2020 ó Cérience (Jouffray-Drillaud roimhe seo) ar fhormheas an eastóscáin síl Vitis vinifera L. (eastóscán síl fíonchaoire) mar shubstaint bhunúsach lena húsáid i gcosaint plandaí mar fhuingicíd ar fhíniúnacha, úlla, prátaí agus leitís.

(2)

Tar éis na seiceálacha inghlacthachta, bhí an fhaisnéis a cheanglaítear faoi Airteagal 23(3), an dara fomhír, de Rialachán (CE) Uimh. 1107/2009 ag gabháil leis an iarratas, mar a fuarthas é i mí Feabhra 2022.

(3)

D’iarr an Coimisiún cúnamh eolaíoch ar an Údarás Eorpach um Shábháilteacht Bia (‘an tÚdarás’) de bhun Airteagal 23(4) de Rialachán (CE) Uimh. 1107/2009. Sholáthair an tÚdarás tuarascáil theicniúil an 30 Deireadh Fómhair 2023 don Choimisiún ar an eastóscán síl Vitis vinifera L. (eastóscán síl fíonchaoire) (2).

(4)

Chuir an Coimisiún an tuarascáil athbhreithniúcháin (3) agus dréacht den Rialachán seo faoi bhráid an Bhuanchoiste um Plandaí, Ainmhithe, Bia agus Beatha an 21 Márta 2024 agus an 10 Iúil 2024, faoi seach.

(5)

Léiríonn an fhaisnéis a sholáthair an t-iarratasóir go n-úsáidtear eastóscán síl Vitis vinifera L. (eastóscán síl fíonchaoire) mar fhorbhia agus mar bhreiseán beathaithe. Thairis sin, ní úsáidtear é chun críche cosanta plandaí den chuid is mó ach tá an tsubstaint úsáideach maidir le cosaint plandaí. Ar bhonn na faisnéise a soláthraíodh san iarratas agus sa Tuarascáil Theicniúil ón Údarás, is féidir teacht ar an gconclúid nach substaint ar údar imní í; nach bhfuil sé de chumas intreach aici bheith ina cúis le héifeachtaí suaiteora inchrínigh, éifeachtaí néarthocsaineacha nó éifeachtaí imdhíon-thocsaineacha; agus nach gcuirtear ar an margadh mar tháirge cosanta plandaí í. Dá réir sin, comhlíonann an t-eastóscán síl Vitis vinifera L. (eastóscán síl fíonchaoire) coinníollacha a leagtar síos in Airteagal 23(1) de Rialachán (CE) Uimh 1107/2009.

(6)

Bhí roinnt meastóireachtaí ábhartha ar fáil, meastóireachtaí a rinneadh i gcomhréir le reachtaíocht eile de chuid an Aontais, dá dtagraítear in Airteagal 23(2) de Rialachán (CE) Uimh. 1107/2009. Bhí trí Thuairim Eolaíocha ón Údarás ábhartha: dhá cheann ó Phainéal FEEDAP agus ceann amháin ó Phainéal NDA (4). Chuir an tÚdarás agus an Coimisiún araon toradh na meastóireachta sin san áireamh.

(7)

Tar éis scrúdú a dhéanamh ar an iarratas agus ar na doiciméid ghaolmhara uile, d’fhéadfadh coinne a bheith leis go gcomhlíonann, go ginearálta, an t-eastóscán síl Vitis vinifera L. (eastóscán síl fíonchaoire) na ceanglais a leagtar síos in Airteagal 23 de Rialachán (CE) Uimh. 1107/2009, go háirithe maidir leis na húsáidí a scrúdaíodh agus a mionsonraíodh i dtuarascáil athbhreithniúcháin an Choimisiúin. Dá bhrí sin is iomchuí an t-eastóscán síl Vitis vinifera L. (eastóscán síl fíonchaoire) a fhormheas mar shubstaint bhunúsach.

(8)

D’iarr an Coimisiún ar an iarratasóir a bharúlacha féin a chur isteach i leith tuarascáil theicniúil an Údaráis agus i leith dréacht-tuarascáil athbhreithnithe an Choimisiúin. Chuir an t-iarratasóir a bharúlacha isteach, rinneadh scrúdú cúramach orthu agus tugadh aird chuí orthu.

(9)

I gcomhréir le hAirteagal 13(2) de Rialachán (CE) Uimh. 1107/2009 i gcomhar le hAirteagal 6 de agus i bhfianaise an eolais eolaíoch reatha agus an eolais theicniúil reatha, is gá, áfach, coinníollacha agus srianta áirithe a chur san áireamh.

(10)

I gcomhréir le hAirteagal 13(4) de Rialachán (CE) Uimh. 1107/2009, ba cheart an Iarscríbhinn a ghabhann le Rialachán Cur Chun Feidhme (AE) Uimh. 540/2011 (5) ón gCoimisiún a leasú dá réir.

(11)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,