(1)

Ba cheart tús a chur le caibidlíocht d’fhonn comhaontú a thabhairt i gcrích idir an tAontas Eorpach agus an Úcráin maidir le hiompar lasta de bhóthar lena leasaítear an Comhaontú (‘an Comhaontú’), lena n-áirítear a fhad.

(2)

I bhfianaise na n-imthosca eisceachtúla agus uathúla a thug gur gá an Comhaontú a chaibidil, agus i gcomhréir leis na Conarthaí, mheas an Chomhairle gurb iomchuí don Aontas an inniúlacht roinnte ábhartha atá tugtha dó sna Conarthaí a fheidhmiú go sealadach. Tá feidhm ag an mbreithniú sin freisin maidir leis an leasú ar an gComhaontú. Ba cheart, áfach, aon éifeacht de chuid an Chinnidh seo ar roinnt na n-inniúlachtaí idir an tAontas agus na Ballstáit a bheith teoranta go docht ó thaobh ama de. Níor cheart, dá bhrí sin, an inniúlacht arna feidhmiú ag an Aontas ar bhonn an Chinnidh seo agus an Comhaontú, lena n-áirítear na leasuithe atá le caibidil faoin gCinneadh seo, a fheidhmiú ach amháin le linn thréimhse chur i bhfeidhm an Chomhaontaithe. Dá réir sin, scoirfidh an inniúlacht roinnte a fheidhmítear ar an gcaoi sin de bheith á feidhmiú ag an Aontas a luaithe a scoirfidh an Comhaontú d’fheidhm a bheith aige. Gan dochar do bhearta eile de chuid an Aontais, agus faoi réir chomhlíonadh bhearta sin an Aontais, déanfaidh na Ballstáit an inniúlacht sin a fheidhmiú arís, i gcomhréir le hAirteagal 2(2) den Chomhaontú ar Fheidhmiú an Aontais Eorpaigh (CFAE), i ndiaidh an dáta sin. Thairis sin, meabhraítear, mar a leagtar amach i bPrótacal Uimh. 25 maidir le hinniúlacht roinnte, atá i gceangal leis an gConradh ar an Aontas Eorpach (CAE) agus le CFAE, nach gcumhdaítear le raon feidhme fheidhmiú inniúlacht an Aontais sa Chinneadh seo ach na heilimintí a rialaítear leis an gCinneadh seo agus nach gcumhdaítear an réimse go léir leis. Tá feidhmiú inniúlacht an Aontais leis an gCinneadh seo gan dochar d’inniúlachtaí an Aontais agus na mBallstát faoi seach i ndáil le haon chaibidlíocht atá ar siúl faoi láthair nó a dhéanfar amach anseo maidir le comhaontuithe idirnáisiúnta a shíniú nó a thabhairt i gcrích le haon tríú tír eile sa réimse sin.

(3)

Ba cheart an Coimisiún a ainmniú mar idirbheartaí an Aontais.

(4)

Ba cheart don Choimisiún an chaibidlíocht a dhéanamh i gcomhar leis an Meitheal um Iompar de Thalamh de chuid na Comhairle, agus i gcomhréir leis na róil faoi seach atá ag na hinstitiúidí a leagtar amach in Airteagal 13(2) de CAE agus in Airteagal 218 de CFAE, arna léirmhíniú ag Cúirt Bhreithiúnais an Aontais Eorpaigh.