Eagrán sealadach
BREITHIÚNAS NA CÚIRTE (an Dara Dlísheomra)
16 Iúil 2026 (*)
(Tarchur chun réamhrialú – Treoir 2000/31/CE – Airteagal 1(5) – Raon feidhme an chur i bhfeidhm – Gníomhaíochtaí cearrbhachais a eisiamh – Fógraíocht ar chearrbhachas – Fógraíocht den sórt sin a óstáil – Airteagal 14 – Córas dliteanais le haghaidh soláthraithe seirbhísí óstála – Ról gníomhach – Conradh tráchtála a rinneadh idir soláthraí seirbhíse óstála agus faighteoir na seirbhíse)
I gCás C‑421/24,
IARRAIDH ar réamhrialú de bhun Airteagal 267 CFAE, ó Consiglio di Stato (Comhairle Stát, an Iodáil), trí bhreith an 11 Meitheamh 2024, a fuarthas ag an gCúirt an 14 Meitheamh 2024, sna himeachtaí
Autorità per le Garanzie nelle Comunicazioni (AGCOM)
v
Google Ireland Ltd,
tugann AN CHÚIRT (an Dara Dlísheomra),
agus í comhdhéanta mar seo a leanas: K. Jürimäe (Rapóirtéir), Uachtarán an Dlísheomra, K. Lenaerts, Uachtarán na Cúirte, i gcáil Bhreitheamh an Dara Dlísheomra, F. Schalin, M. Gavalec agus Z. Csehi, Breithiúna,
Abhcóide Ginearálta: M. Szpunar,
Cláraitheoir: E. Sartori, Riarthóir,
ag féachaint don nós imeachta i scríbhinn agus tar éis éisteacht an 10 Meán Fómhair 2025,
tar éis breithniú a dhéanamh ar na barúlacha a cuireadh isteach thar ceann iad seo a leanas:
– Google Ireland Ltd, ag F. Angeloni, A. Bellan, M. Berliri agus G. Gelera, avvocati,
– Rialtas na hIodáile, ag S. Fiorentino, i gcáil Gníomhaire, le cúnamh ó R. Guizzi agus F. Varrone, avvocati dello Stato,
– Rialtas na Beilge, ag C. Jacob agus L. Van den Broeck, i gcáil Gníomhairí, le cúnamh ó V. Ramognino, avocat, agus de R. Verbeke agus P. Vlaemminck, advocaten,
– Rialtas na Seice, ag A. Edelmannová agus ag M. Smolek agus J. Vláčil, i gcáil Gníomhairí,
– Rialtas na Portaingéile, ag P. Barros da Costa, L. Medeiros agus A. Silva Coelho, i gcáil Gníomhairí,
– an Coimisiún Eorpach, ag L. Armati, P. A. Messina agus J. Szczodrowski, i gcáil Gníomhairí,
tar éis éisteacht leis an Tuairim ón Abhcóide Ginearálta ag éisteacht an 27 Samhain 2025
an Breithiúnas seo a leanas:
Breithiúnas
1 Baineann an iarraidh ar réamhrialú le léiriú ar Airteagal 5(1) agus Airteagal 14 de Threoir 2000/31/CE ó Pharlaimint na hEorpa agus ón gComhairle an 8 Meitheamh 2000 maidir le gnéithe dlíthiúla áirithe de sheirbhísí na sochaí faisnéise, go háirithe tráchtáil leictreonach, sa mhargadh inmheánach (‘an Treoir maidir le Tráchtáil Leictreonach’) (IO 2000 L 178, lch. 1).
2 Rinneadh an iarraidh seo in imeachtaí idir Google Ireland Ltd (‘Google’), cuideachta atá corpraithe faoi dhlí na hÉireann, agus an Autorità per le Garanzie nelle Comunicazioni (Údarás Rialála Cumarsáide, an Iodáil; ‘AGCOM’) maidir le fíneáil a ghearr AGCOM ar Google as fógraíocht a dhéanamh ar láithreáin chearrbhachais agus iad a chur chun cinn.
An dlí lena mbaineann
Dlí an Aontais Eorpaigh
3 Luaitear an méid seo a leanas in aithrisí 12, 16, 21, agus 42 de Threoir 2000/31:
‘(12) Is gá gníomhaíochtaí áirithe a eisiamh ó raon feidhme na Treorach seo, ar an bhforas nach féidir, ag an bpointe seo, an tsaoirse chun seirbhísí a sholáthar sna réimsí sin a ráthú faoin gConradh [FUE] nó faoin reachtaíocht thánaisteach atá ann cheana. Trí na gníomhaíochtaí sin a eisiamh, ní chuirtear cosc ar aon ionstraim a d’fhéadfadh a bheith riachtanach d’fheidhmiú cuí an mhargaidh inmheánaigh. […]
[...]
(16) Ní chumhdaítear le heisiamh gníomhaíochtaí cearrbhachais ó raon feidhme na Treorach seo ach cluichí áidh, crannchuir agus idirbhearta gealltóireachta, a bhfuil baint acu le geallta airgeadaíochta. Ní chumhdaítear leis sin comórtais nó cluichí fógraíochta inarb é an cuspóir atá leo díol earraí nó seirbhísí a spreagadh agus i gcás nach bhfónann íocaíochtaí, má thagann siad chun cinn, ach amháin chun na hearraí nó na seirbhísí a cuireadh chun cinn a fháil.
[...]
(21) Tá raon feidhme an réimse chomhordaithe gan dochar do chomhchuibhiú Comhphobail amach anseo maidir le seirbhísí na sochaí faisnéise agus do reachtaíocht a ghlacfar ar an leibhéal náisiúnta amach anseo i gcomhréir le dlí an Chomhphobail; Ní chumhdaítear leis an réimse comhordaithe ach ceanglais a bhaineann le gníomhaíochtaí ar líne, amhail faisnéis ar líne, fógraíocht ar líne, siopadóireacht ar líne, conraitheoireacht ar líne agus ní bhaineann sé le ceanglais dhlíthiúla na mBallstát maidir le hearraí amhail caighdeáin sábháilteachta, oibleagáidí lipéadaithe nó dliteanas i leith táirgí, ná le ceanglais na mBallstát maidir le hearraí a sheachadadh nó a iompar, lena n‑áirítear dáileadh táirgí íocshláinte. [...]
[...]
(42) Ní chumhdaítear leis na díolúintí ó dhliteanas a bhunaítear sa Treoir seo ach cásanna ina bhfuil gníomhaíocht sholáthraí seirbhíse na sochaí faisnéise teoranta don phróiseas teicniúil a bhaineann le líonra cumarsáide a oibriú agus rochtain a thabhairt air, ar líonra é ar a ndéantar faisnéis arna cur ar fáil ag tríú páirtithe a tharchur nó a stóráil go sealadach, chun críche an tarchur a dhéanamh níos éifeachtúla agus chun na críche sin amháin; níl sa ghníomhaíocht seo ach gníomhaíocht theicniúil, uathoibríoch agus éighníomhach, rud a thugann le tuiscint nach bhfuil eolas ná smacht ag soláthraí seirbhíse na sochaí faisnéise ar an bhfaisnéis a tharchuirtear nó a stóráiltear.’
[Aistriúchán neamhoifigiúil]
4 Foráiltear don mhéid seo a leanas le hAirteagal 1 den Treoir sin dar teideal ‘Ábhar agus raon feidhme’:
‘1. Féachtar tríd an Treoir seo le cur le feidhmiú cuí an mhargaidh inmheánaigh trí shaorghluaiseacht sheirbhísí na sochaí faisnéise a chinntiú idir na Ballstáit.
2. Comhfhogasaítear leis an Treoir seo, a mhéid is gá chun an cuspóir atá leagtha amach i mír 1 a bhaint amach, forálacha náisiúnta áirithe maidir le seirbhísí na sochaí faisnéise a bhaineann leis an margadh inmheánach, bunú na soláthraithe seirbhísí, cumarsáid tráchtála, conarthaí leictreonacha, dliteanas na n‑idirghabhálaithe, cóid iompair, socraíochtaí díospóide lasmuigh den chúirt, caingne cúirte agus comhar idir na Ballstáit.
[…]
5. Ní bheidh feidhm ag an Treoir seo maidir le:
(a) réimse an chánachais;
(b) ceisteanna a bhaineann le seirbhísí na sochaí faisnéise a chumhdaítear le Treoracha 95/46/CE [ó Pharlaimint na hEorpa agus ón gComhairle an 24 Deireadh Fómhair 1995 maidir le daoine aonair a chosaint i dtaca le próiseáil sonraí pearsanta agus maidir le saorghluaiseacht sonraí den sórt sin (IO 1995 L 281, lch. 31)] agus 97/66/CE [ó Pharlaimint na hEorpa agus ón gComhairle an 15 Nollaig 1997 maidir le sonraí pearsanta a phróiseáil agus maidir le príobháideachas a chosaint san earnáil cumarsáide leictreonaí (IO 1998 L 24, lch. 1)];
(c) ceisteanna a bhaineann le comhaontuithe nó cleachtais arna rialú le dlí cairtéil;
(d) na gníomhaíochtaí seo a leanas de chuid sheirbhísí na sochaí faisnéise:
– gníomhaíochtaí nótairí nó gairmeacha comhionanna a mhéid a bhaineann siad le nasc díreach sonrach le feidhmiú údaráis phoiblí,
– ionadaíocht do chliant agus a leasanna a chosaint os comhair na gcúirteanna,
– gníomhaíochtaí cearrbhachais ina gcuirtear geall lena ngabhann luach airgeadúil i gcluichí áidh, lena n‑áirítear crannchuir agus idirbhearta gealltóireachta.’
[Aistriúchán neamhoifigiúil]
5 Foráiltear mar seo a leanas le hAirteagal 3(1) agus (2) den Treoir sin, dar teideal ‘an Margadh Inmheánach’:
‘1. Áiritheoidh gach Ballstát go gcomhlíonfaidh seirbhísí na sochaí faisnéise arna soláthar ag soláthraí seirbhíse atá bunaithe ar a chríoch na forálacha náisiúnta is infheidhme sa Bhallstát atá i gceist a thagann faoin réimse comhordaithe.
2. Ní fhéadfaidh na Ballstáit, ar chúiseanna a thagann faoin réimse comhordaithe, srian a chur ar an tsaoirse chun seirbhísí na sochaí faisnéise a sholáthar ó Bhallstát eile.’
[Aistriúchán neamhoifigiúil]
6 I Roinn 4 de Chaibidil II de Threoir 2000/31, maidir le soláthraithe seirbhísí idirghabhálacha, tá Airteagail 12 go 15 den Treoir sin. Foráiltear mar seo a leanas le hAirteagal 14 den Rialachán sin, dar teideal ‘Óstáil’:
‘1. Áiritheoidh na Ballstáit, i gcás go soláthraítear seirbhís sochaí faisnéise arb é atá i gceist léi stóráil faisnéise arna soláthar ag faighteoir na seirbhíse, nach mbeidh an soláthraí freagrach as an bhfaisnéis a stóráiltear arna iarraidh sin d’fhaighteoir na seirbhíse ar choinníoll:
(a) nach bhfuil eolas iarbhír ag an soláthraí ar an ngníomhaíocht neamhdhleathach ná ar an bhfaisnéis neamhdhleathach agus, sa mhéid a bhaineann le héileamh ar dhamáistí, nach bhfuil sé ar an eolas faoi fhíorais nó imthosca óna leanann sé go bhfuil an ghníomhaíocht nó an fhaisnéis neamhdhleathach
nó
(b) nuair a fhaigheann an soláthraí an t‑eolas nó an fheasacht sin, go bhfeidhmíonn sé go tapa chun rochtain ar an bhfaisnéis a bhaint nó a dhíchumasú.
2. Ní bheidh feidhm ag mír 1 i gcás ina bhfuil faighteoir na seirbhíse ag gníomhú faoi údarás nó faoi rialú na soláthraithe.
3. Ní dhéanfaidh an tAirteagal seo difear don fhéidearthacht atá ag cúirt nó údarás riaracháin, i gcomhréir le córais dlí na mBallstát, a cheangal ar an soláthraí deireadh a chur le sárú nó sárú a chosc, ná ní dhéanfaidh sé difear ach oiread don fhéidearthacht atá ag na Ballstáit nósanna imeachta a bhunú lena rialófar baint nó díchumasú rochtana ar fhaisnéis den sórt sin.’
[Aistriúchán neamhoifigiúil]
Dlí na hIodáile
7 Cuirtear cosc le hAirteagal 9 den decreto-legge Uimh. 87 – Disposizioni urgenti per la dignità dei lavoratori e delle imprese (Dlí Foraithne Uimh. 87 maidir le forálacha práinneacha maidir le dínit oibrithe agus gnóthas) an 12 Iúil 2018 (GURI Uimh. 161 an 13 Iúil 2018) (‘Dlí Foraithne Uimh. 87/2018’) aon chineál fógraíochta a dhéanamh, lena n‑áirítear fógraíocht indíreach, i dtaca le cluichí nó gealltóireacht le hairgead buaite agus cearrbhachas, cibé slí a dhéantar iad agus ar bhealach ar bith, lena n‑áirítear imeachtaí spóirt, cultúrtha nó ealaíonta, cláir theilifíse nó raidió, preas laethúil agus tréimhsiúil, foilseacháin ghinearálta, póstaeir agus cainéil faisnéise dhigiteacha agus leictreonacha, lena n‑áirítear na meáin shóisialta. I gcás sárú ar an toirmeasc sin, beidh príomhaí, úinéir an mhodha nó an láithreáin chraolta nó an láithreáin chinn scríbe agus eagraí an imeachta, an imeachta nó na gníomhaíochta faoi réir fíneáil riaracháin 20 % de luach na hurraíochta nó na fógraíochta, nach mbeidh níos lú ná EUR 50 000 in aghaidh an tsáraithe in aon chás.
An díospóid sna príomhimeachtaí agus na ceisteanna a tharchuirtear le haghaidh réamhrialú
8 Le cinneadh an 19 Iúil 2022, ghearr AGCOM, údarás rialála cumarsáide na hIodáile, fíneáil riaracháin EUR 750 000 ar Google as sárú ar Airteagal 9 de Dhlí Foraithne Uimh. 87/2018, lena dtoirmisctear aon chineál fógraíochta, fiú fógraíocht indíreach, a bhaineann le cearrbhachas, in aon fhoirm agus ar aon mheán.
9 Cháin AGCOM Google as cur chun cinn suíomhanna gréasáin cearrbhachais a cheadú, trí fhíseáin a d’fhoilsigh cruthaitheoir ábhair ar chúig chainéal den ardán físeán ar líne YouTube (‘ardán Youtube’). Ina theannta sin, chuir gach ceann de na cainéil sin físeáin i láthair lena n‑iarrtar ar an úsáideoir, gan beann ar a aois, físeáin a sheoladh ina dtaispeántar a bhuachan féin, ionas go mbeadh an cruthaitheoir ábhair sin in ann, mar chomaoin a íoctar leis an úsáideoir sin, físeáin a chraoladh ina dtaispeántar na buaiteoirí is fearr a baineadh amach. Chomh maith le fíneáil a ghearradh, d’ordaigh AGCOM do Google 630 físeán den chruthaitheoir ábhair sin agus físeáin den chruthaitheoir ábhair sin ina bhfuil ábhar comhchosúil a sháraíonn an toirmeasc a leagtar síos in Airteagal 9 de Dhlí Foraithne Uimh. 87/2018 a bhaint d’ardán YouTube.
10 Thug Google caingean i gcoinne an chinnidh sin os comhair Tribunale amministrativo regionale per il Lazio (an Chúirt Réigiúnach Riaracháin, Lazio, an Iodáil). Chinn an chúirt sin nár sháraigh Google forálacha Airteagal 9 de Dhlí Foraithne Uimh. 87/2018. Rinne an chúirt sin na seirbhísí a thairgeann ardán YouTube a aicmiú mar sheirbhísí óstála agus thuig an chúirt dá bharr gur cheart do Google tairbhe a bhaint as an díolúine ó dhliteanas dá bhforáiltear le forálacha dhlí na hIodáile lena dtrasuitear Airteagal 14 de Threoir 2000/31.
11 Rinne AGCOM achomharc i gcoinne chinneadh na cúirte sin os comhair an Consiglio di Stato (Comhairle Stáit, an Iodáil), arb í an chúirt a rinne an tarchur í. Mar thaca leis an achomharc sin, áitíonn AGCOM nach bhfuil feidhm ag Treoir 2000/31 maidir leis na fógraí atá i gceist sna príomhimeachtaí, ós rud é go n‑eisiatar gníomhaíochtaí cearrbhachais óna raon feidhme le hAirteagal 1(5) den Treoir sin.
12 Os a choinne sin, áitíonn Google go bhfuil feidhm ag an Treoir sin. Ní bhaineann an t‑eisiamh dá bhforáiltear in Airteagal 1(5) den Treoir sin le soláthraithe seirbhísí óstála, ach le soláthraithe seirbhísí cearrbhachais amháin. Ina theannta sin, measann Google nach gceanglaítear air, ina cháil mar sholáthraí seirbhísí óstála, ábhar na bhfíseán a fhoilsítear ar a ardán YouTube a fhíorú. Sna himthosca sin, forchuirtear cinsireacht le cinneadh AGCOM agus cuirtear srian leis ar an tsaoirse chun tuairimí a nochtadh atá ag úsáideoirí an ardáin sin agus ar an tsaoirse chun seirbhísí Google a sholáthar.
13 Tá amhras ar an gcúirt a rinne an tarchur maidir le hinfheidhmeacht Threoir 2000/31 maidir leis na fíorais atá i gceist sna príomhimeachtaí. Is léir ón dara habairt d’aithris 21 den Treoir sin nach mór fógraíocht ar líne a mheas mar ghníomhaíocht ar líne de réir bhrí na Treorach sin. Dá bhrí sin, d’fhéadfaí a thuiscint ón tríú fleasc d’Airteagal 1(5)(d) den Treoir sin go raibh sé beartaithe ag reachtas an Aontais gach gníomhaíocht in earnáil an chearrbhachais, lena n‑áirítear a bhfógraíocht ar líne, a eisiamh ó raon feidhme na Treorach sin.
14 I gcás go gcinnfidh an Chúirt go bhfuil feidhm ag Treoir 2000/31 maidir leis an ngníomhaíocht atá i gceist sna príomhimeachtaí, tá sé beartaithe ag an gcúirt a rinne an tarchur an dara ceist a chur faoi bhráid na Cúirte maidir le raon feidhme na rialacha maolaithe maidir le dliteanas a leagtar síos in Airteagal 14 den Treoir sin.
15 I ndáil leis sin, fiafraíonn an chúirt a rinne an tarchur an bhféadfadh Google tairbhe a bhaint as an scéim sin, ós rud é gur thug sé comhaontú comhpháirtíochta tráchtála i gcrích leis an gcruthaitheoir ábhair atá i gceist (‘YouTube Partner Program’, ‘Clár na gComhpháirtithe YouTube’) nach bhfuil ról teicniúil agus neodrach amháin ag Google maidir leis an ábhar a chuirtear ar líne. Foráiltear leis an gcomhpháirtíocht tráchtála sin, ar thaobh amháin, do chomhroinnt na n‑ioncam arna nginiúint ag an gcraoladh fógraíochta roimh gach físeán den chruthaitheoir ábhair sin agus arna bhailiú ag Google. Ar an taobh eile, faigheann Google íocaíochtaí go díreach ó shíntiúsóirí ar chainéil an chruthaitheora ábhair sin agus cuireann sé ar ais chuig an gcruthaitheoir ábhair iad. Chun an chomhpháirtíocht tráchtála sin a thabhairt i gcrích, bheadh ar an gcruthaitheoir ábhair céanna coinníollacha áirithe arna mbunú ag Google a chomhlíonadh. Go háirithe, ba cheart go sáródh sé tairseacha i dtéarmaí líon na síntiúsóirí agus uaireanta féachana a fhíseán. Ina theannta sin, sula ndéanann sé comhaontú comhpháirtíochta tráchtála den sórt sin le cruthaitheoir ábhair ar ardán YouTube, seiceálann Google ábhair na bhfíseán freisin trí scrúdú a dhéanamh ar théama an chainéil, ar na físeáin is mó a breathnaíodh nó a rinneadh le déanaí agus ar mheiteashonraí (teidil, tuairiscí, etc.) na bhfíseán sin. Mar sin féin, ní bheadh rialú iomlán ar fhíseáin uile an chainéil i gceist leis an rialú sin.
16 Meabhraíonn an chúirt a rinne an tarchur nach bhfuil Airteagal 14 de Threoir 2000/31 infheidhme ach amháin maidir le soláthraí seirbhísí óstála a bhfuil ról ‘neodrach’ aige, nach bhfuil aige ach ról teicniúil amháin. Dar leis an gcúirt sin, i bhfianaise rialú Google ar ábhar cruthaitheoirí agus ‘barrfheabhsú’ ghníomhaíocht tráchtála na gcruthaitheoirí sin trí ioncam a chomhroinnt leo, ní féidir a mheas go bhfuil seasamh Google ‘neodrach’.
17 Sna himthosca sin, chinn Consiglio di Stato (Comhairle Stáit na hIodáile) bac a chur ar na himeachtaí agus na ceisteanna seo a leanas a tharchur chuig an gCúirt le haghaidh réamhrialú:
‘(1) Faoi Airteagal 1(5) de Threoir [2000/31/CE], an bhfuil an córas dliteanais do sholáthraithe óstála a leagtar síos in Airteagal 14 den treoir sin [infheidhme] maidir le gníomhaíochtaí a bhaineann le fógraíocht ar líne cluichí nó gealltóireachta le hairgead buaite agus le fógraíocht ar chearrbhachas?
(2) An bhfuil feidhm ag an gcóras dliteanais a leagtar síos in Airteagal 14 de Threoir 2000/31/CE maidir le soláthraí óstála amhail Google i ndáil leis an ábhar arna fhoilsiú ag úinéirí cainéil YouTube lenar thug Google an comhaontú comhpháirtíochta tráchtála a ndéantar cur síos air thuas i gcrích?’
Na ceisteanna le haghaidh réamhrialú
An chéad cheist
18 Lena céad cheist, fiafraíonn an chúirt a rinne an tarchur, go bunúsach, an gá an tríú fleasc d’Airteagal 1(5)(d) de Threoir 2000/31 a léiriú sa chaoi go dtagann seirbhís de chuid na sochaí faisnéise arb é atá inti físeáin a óstáil ar líne faoi raon feidhme na Treorach sin i gcás go bhfuil fógraí cearrbhachais sna físeáin sin lena mbaineann geall a chur a bhfuil luach airgeadaíochta aige i gcluichí áidh, de réir bhrí na forála sin.
19 Ní mór a mheabhrú gur léir ó Airteagal 1(1) agus (2) de Threoir 2000/31 go bhféachtar tríd an Treoir cur le feidhmiú cuí an mhargaidh inmheánaigh. Ar thaobh amháin, cruthaítear leis creat dlíthiúil lena n‑áirithítear saorghluaiseacht sheirbhísí na sochaí faisnéise idir na Ballstáit agus arb é atá ann, inter alia, cur i bhfeidhm an tsásra dá dtagraítear in Airteagal 3(1) agus (2) den Treoir sin, faoina rialaítear, laistigh den réimse comhordaithe, seirbhísí na sochaí faisnéise sa Bhallstát ina bhfuil soláthraithe na seirbhísí sin bunaithe agus sa Bhallstát sin amháin. Ar an taobh eile, leagtar síos leis an Treoir sin, go háirithe i gCaibidlí II agus III di, forálacha lena ndéantar comhfhogasú, a mhéid is gá chun an cuspóir sin a bhaint amach, ar fhorálacha náisiúnta áirithe maidir leis na seirbhísí sin (breithiúnas an 16 Meitheamh 2026, WebGroup Czech Republic agus páirtithe eile, C‑188/24 agus C‑190/24, EU:C:2026:492 , mír 54).
20 Foráiltear le hAirteagal 1(5)(d) de Threoir 2000/31 nach mbeidh feidhm ag an Treoir sin maidir le ‘gníomhaíochtaí’ sheirbhísí na sochaí faisnéise a liostaítear san fhoráil sin, lena n‑áirítear, sa tríú fleasc di, ‘gníomhaíochtaí cearrbhachais ina gcuirtear geall lena ngabhann luach airgeadúil i gcluichí áidh, lena n‑áirítear crannchuir agus idirbhearta gealltóireachta’. Ina theannta sin, luaitear in aithris 16 den Treoir sin nach gcumhdaítear leis an eisceacht dá dtagraítear sa tríú fleasc sin comórtais nó cluichí fógraíochta inarb é an cuspóir atá leo díol earraí nó seirbhísí a spreagadh agus i gcás nach bhfónann íocaíochtaí, má thagann siad chun cinn, ach amháin chun na hearraí nó na seirbhísí a cuireadh chun cinn a fháil..
21 De réir cásdlí socair, chun foráil de dhlí an Aontais a léiriú, gur gá machnamh a dhéanamh ní hamháin ar fhoclaíocht forála den sórt sin, ach freisin ar a comhthéacs agus ar chuspóirí na rialacha ar cuid díobh í (féach breithiúnais an 6 Deireadh Fómhair 1982, Cilfit agus páirtithe eile, 283/81, EU:C:1982:335, mír 20, agus an 19 Nollaig 2024, Ford Italia, C‑157/23, EU:C:2024:1045, mír 42).
22 I ndáil leis sin, ba cheart a thabhairt faoi deara gur léir ó fhoclaíocht an tríú fleasc d’Airteagal 1(5)(d) de Threoir 2000/31 agus, go háirithe comhthéacs na forála sin, ón gcuspóir a shaothraítear leis an bhforáil sin go gcumhdaítear leis an eisiamh a leagtar síos léi ní hamháin cearrbhachas ann féin, ach freisin gníomhaíochtaí a bhfuil dlúthbhaint acu leis an gcearrbhachas sin, agus go háirithe gníomhaíocht fógraíochta cearrbhachais ar líne, de réir bhrí na forála sin.
23 Ar thaobh amháin, tá an t‑eisiamh sin agus na heisiaimh eile dá bhforáiltear in Airteagal 1(5) den Treoir sin foirmlithe i dtéarmaí leathana, rud a léiríonn nach mór na ‘réimsí’, na ‘hábhair’ agus na ‘gníomhaíochtaí’ dá dtagraítear ann a thuiscint go leathan (féach, chuige sin, breithiúnas an 27 Aibreán 2022, Airbnb Ireland, C‑674/20, EU:C:2022:303, mír 29).
24 Ar an taobh eile, agus thar aon ní eile, is léir ó aithris 12 den Treoir sin go bhféachtar le hAirteagal 1(5) di gur gá gníomhaíochtaí áirithe a eisiamh ó raon feidhme na Treorach seo, ar an bhforas nach féidir, ag an bpointe seo, an tsaoirse chun seirbhísí a sholáthar sna réimsí sin a ráthú faoin gConradh [FAE] nó faoin reachtaíocht thánaisteach atá ann cheana. Maidir le, go háirithe, gníomhaíochtaí cearrbhachais a bhaineann le geall a chur a bhfuil luach airgeadaíochta ag baint leis i gcluichí áidh, chinn an Chúirt cheana féin go bhfuil rialáil cluichí áidh ar cheann de na réimsí ina bhfuil difríochtaí móra morálta, reiligiúnacha agus cultúrtha idir na Ballstáit. In éagmais comhchuibhiú ón Aontas sa réimse sin, is faoi gach Ballstát atá sé a chinneadh sna réimsí sin, i gcomhréir lena scála luachanna féin, an méid is gá chun cosaint tomhaltóirí agus caomhnú an oird phoiblí a áirithiú (féach, chuige sin, breithiúnas 2 Márta 2023, Recreatieprojecten Zeeland agus páirtithe eile, C‑695/21, EU:C:2023:144, mír 14 agus an cásdlí dá dtagraítear).
25 Chun an lánrogha nach mór a bheith ag na Ballstáit a ráthú chun go mbeidh siad in ann réimse an chearrbhachais a rialáil go héifeachtach de réir a gcóras luacha féin, ní mór do na Ballstáit a bheith in ann rialáil a dhéanamh ar na gníomhaíochtaí uile a bhfuil dlúthbhaint acu leis an réimse sin, lena n‑áirítear fógraíocht a bhaineann leis sin, i gcomhréir le dlí an Aontais.
26 Dá bhrí sin, ní mór an tríú fleasc d’Airteagal 1(5)(d) de Threoir 2000/31 a léiriú sa chaoi nach bhfuil feidhm ag an Treoir sin maidir le gníomhaíocht fógraíochta cearrbhachais ar líne, de réir bhrí na forála sin.
27 Mar sin féin, ní leanann sé go gcumhdaítear, leis an eisiamh a leagtar síos sa tríú fleasc d’Airteagal 1(5)(d) de Threoir 2000/31, an ghníomhaíocht a bhaineann le fógraí den sórt sin a óstáil ar líne freisin.
28 Murab ionann agus an ghníomhaíocht arb é atá inti fógraíocht a dhéanamh ar chearrbhachas ar líne, níl dlúthbhaint ag gníomhaíocht an óstála ar líne leis an gcearrbhachas sin. An ghníomhaíocht dheireanach úd, nach bhfuil inti ach ábhar a sholáthraíonn úsáideoir na seirbhíse a stóráil, tá sí, go bunúsach, neodrach maidir leis an ábhar stóráilte agus ní dhéanann sí idirdhealú bunaithe ar nádúr an ábhair sin. Dá bhrí sin, níl aon difríocht idir gníomhaíocht óstála fógraí cearrbhachais ar líne, mar a shainmhínítear san fhoráil seo, agus gníomhaíocht óstála fógraí eile nó, níos leithne, ábhar eile. Go háirithe, níl aon nasc díreach ag an ngníomhaíocht sin leis na cineálacha sin cearrbhachais agus níl sé i gceist léi iad a chur chun cinn.
29 Sna himthosca sin, mar a chuireann an tAbhcóide Ginearálta in iúl, go bunúsach, i mír 34 dá Thuairim, ní gá an ghníomhaíocht a bhaineann le fógraí cearrbhachais a óstáil ar líne a eisiamh ó raon feidhme na Treorach sin chun a chur ar chumas na mBallstát beartas leathnaithe rialaithe cearrbhachais a shaothrú, más mian leo agus i gcomhréir lena gcóras luacha féin.
30 I bhfianaise na mbreithnithe go léir roimhe seo, is é an freagra ar an gcéad cheist nach mór an tríú fleasc d’Airteagal 1(5)(d) de Threoir 2000/31 a léiriú sa chaoi go dtagann seirbhís de chuid na sochaí faisnéise arb é atá inti físeáin a óstáil ar líne faoi raon feidhme na Treorach sin fiú i gcás go bhfuil fógraí sna físeáin sin maidir le cearrbhachas lena mbaineann geall a chur a bhfuil luach airgeadaíochta aige i gcluichí áidh, de réir bhrí na forála sin.
An dara ceist
31 Lena dara ceist, fiafraíonn an chúirt a rinne an tarchur, go bunúsach, an bhfuil Airteagal 14 de Threoir 2000/31 a léiriú sa chaoi nach bhfuil feidhm aige maidir le hoibreoir ardáin físeán ar líne, a bhfuil comhaontú comhpháirtíochta tráchtála tugtha i gcrích aige, le duine a úsáideann an t‑ardán sin chun físeáin a chraoladh ar chainéal tiomnaithe, lena bhforáiltear do chomhroinnt ioncaim fógraíochta agus, i gcomhthéacs thabhairt i gcrích nó chomhlíonadh an chomhaontaithe sin, a scrúdaigh ábhar an chainéil sin, agus go háirithe a phríomhthéama, na físeáin is mó a ndearnadh faire orthu nó na físeáin is déanaí, nó meiteashonraí na bhfíseán sin.
32 Leagtar amach in Airteagal 14(1) de Threoir 200/13 na coinníollacha faoina n‑áiritheoidh na Ballstáit nach mbeidh an soláthraí seirbhíse faoi dhliteanas i leith na faisnéise a stóráiltear arna iarraidh sin d’fhaighteoir na seirbhíse, nach mbeidh an soláthraí seirbhíse faoi dhliteanas as bhfaisnéis a stóráiltear ar iarratas ó fhaighteoir na seirbhíse. I ndáil leis sin, ní mór gan eolas iarbhír a bheith ag an soláthraí ar ghníomhaíocht nó faisnéis neamhdhleathach agus, maidir le héileamh ar dhamáistí, ar fhíorais nó ar imthosca ónar léir an ghníomhaíocht nó an fhaisnéis neamhdhleathach, nó, má tá an t‑eolas sin aige, ní mór dó gníomhú go tapa, a luaithe a thagann sé ar an eolas, chun rochtain ar an bhfaisnéis a bhaint nó srian a chur ar an rochtain ar.
33 Ní eisiatar leis an sainmhíniú ar an gcoincheap ‘óstáil’ in Airteagal 14(1) go bhféadfadh seirbhís a bhfuil sé mar chuspóir aici freisin an fhaisnéis a stóráiltear a scaipeadh nó a chomhroinnt teacht faoin gcoincheap sin, faoi choinníollacha áirithe. É sin ráite, ní leor ann féin go n‑áirítear leis an tseirbhís a sholáthraíonn oibreoir stóráil na faisnéise a tharchuirtear chuige chun teacht ar an gconclúid go dtagann an tseirbhís sin, in aon chás, faoi raon feidhme Airteagal 14(1) de Threoir 2000/31 (breithiúnas an 16 Meitheamh 2026, WebGroup Czech Republic agus páirtithe eile, C‑188/24 agus C‑190/24, EU:C:2026:492 , míreanna 106 agus 107 agus an cásdlí dá dtagraítear).
34 Chun gurb amhlaidh an cás, tá sé fíor-riachtanach go mbeadh soláthraí na seirbhíse lena mbaineann ina ‘sholáthraí idirghabhála’ de réir bhrí Airteagail 12 go 14 de Threoir 2000/31. Is léir, i ndáil leis sin, ó aithris 42 den Treoir sin nach gcumhdaítear leis na díolúintí ó dhliteanas dá bhforáiltear sna hAirteagail sin ach cásanna ina bhfuil gníomhaíocht an t‑soláthraí seirbhíse i gcomhthéacs an tsochaí faisnéise teoranta don phróiseas teicniúil a bhaineann le hoibriú líonra cumarsáide agus rochtain a sholáthar ar. Chomh maith leis sin, de réir aithris 42, is de chineál teicniúil, uathoibríoch agus éighníomhach amháin í an ghníomhaíocht sin, rud a chiallaíonn nach bhfuil eolas ná smacht ag an soláthraí sin ar an bhfaisnéis a tharchuirtear nó a stóráiltear (féach, chuige sin, breithiúnais an 22 Meitheamh 2021, YouTube agus Cyando, C‑682/18 agus C‑683/18, EU:C:2021:503, mír 105, agus an 16 Meitheamh 2026, WebGroup Czech Republic agus páirtithe eile, C‑188/24 agus C‑190/24, EU:C:2026:492, mír 108).
35 Dá bhrí sin, chun a mheas an féidir oibreoir ardáin físe ar líne a dhíolmhú, i gcomhréir le hAirteagal 14(1) de Threoir 2000/31, ó dhliteanas faoi dhlí Ballstáit i leith físeáin ina bhfuil fógraí le haghaidh cearrbhachais a thoirmisctear leis an dlí sin, is gá scrúdú a dhéanamh, ag an tús, an bhfuil an ról atá ag an oibreoir sin neodrach, is é sin le rá, an bhfuil a iompar go hiomlán teicniúil, uathoibríoch agus éighníomhach, lena dtugtar le tuiscint easpa eolais nó rialaithe ar an ábhar a stórálann sé, nó, os a choinne sin, an bhfuil ról gníomhach ag an oibreoir sin de chineál a thugann eolas nó rialú dó ar an ábhar sin (breithiúnais an 22 Meitheamh 2021, YouTube agus Cyando, C‑682/18 agus C‑683/18, EU:C:2021:503, mír 106, agus an 16 Meitheamh 2026, WebGroup Czech Republic agus páirtithe eile, C‑188/24 agus C‑190/24, EU:C:2026:492, mír 109).
36 I bhfianaise aithris 42 de Threoir 2000/31, ní mór an dá choinníoll eolais agus rialaithe sin a thuiscint mar choinníollacha malartacha agus neamhspleácha ar a chéile (breithiúnas an 16 Meitheamh 2026, WebGroup Czech Republic agus páirtithe eile, C‑188/24 agus C‑190/24, EU:C:2026:492, mír 110).
37 Dá bhrí sin, ar thaobh amháin, eisiatar oibreoir seirbhíse sochaí an eolais a bhfuil smacht aige ar an eolas stóráilte as tairbhe Airteagal 14(1) den treoir sin, fiú mura bhfuil sé ar an eolas faoin eolas sin toisc go ndéantar é a phróiseáil go huathoibríoch. Mar sin féin, is trí úsáid a bhaintear as an algartam go príomha a fheidhmíonn oibreoir den sórt sin smacht ar an bhfaisnéis stóráilte. Fad a chinn an t‑oibreoir, tríd an algartam sin, na coinníollacha maidir le faisnéis den sórt sin a scaipeadh nó gan í a scaipeadh, ní bhaineann sé le hábhar nach ndéanann an t‑oibreoir sin féin idirghabhálacha breise a bhfuil sé d’éifeacht acu faisnéis stóráilte a chur chun cinn, a mhodhnú nó a bhaint d’fhonn í a scaipeadh (breithiúnas an 16 Meitheamh 2026, WebGroup Czech Republic agus páirtithe eile, C‑188/24 agus C‑190/24, EU:C:2026:492, míreanna 110 agus 111).
38 I ndáil leis sin, ní mór a thabhairt faoi deara, más rud é, sa bhreis ar aicmiú agus innéacsú faisnéise amháin d’fhonn í a dhéanamh níos inrochtana, go gcinntear leis an algartam a úsáidtear, ar mhaithe leis an oibreoir nó lena sheirbhís, na coinníollacha, an bealach agus an t‑ord tosaíochta faoina scaiptear nó nach scaiptear an fhaisnéis sin, go bhfeidhmíonn an t‑oibreoir sin rialú ar an bhfaisnéis sin, agus mar thoradh air sin nach féidir an tseirbhís a thairgeann sé a aicmiú mar ‘sheirbhís sochaí faisnéise arb é atá inti stóráil faisnéise arna soláthar ag faighteoir na seirbhíse’ de réir bhrí Airteagal 14(1) de Threoir 2000/31 (breithiúnas an 16 Meitheamh 2026, WebGroup Czech Republic agus páirtithe eile, C‑188/24 agus C‑190/24, EU:C:2026:492, mír 112 agus an cásdlí dá dtagraítear).
39 Ar an taobh eile, i gcás go dtugtar le tuiscint le gníomhaíocht oibreora seirbhíse sochaí faisnéise go bhfuil eolas aige ar an ábhar atá á óstáil aige, eisiatar an t‑oibreoir sin ó raon feidhme Airteagal 14, gan é a bheith riachtanach a léiriú go bhfeidhmíonn sé rialú ar an ábhar sin freisin.
40 I ndáil leis sin, má thagann oibreoir ardáin ar líne ar an eolas, go hindíreach nó de thaisme, go bhfuil ábhar neamhdhleathach sonrach i measc tacar físeán a fhoilsítear ar a ardán, ní leor é sin chun é a chur lasmuigh de raon feidhme Airteagal 14. Is amhlaidh atá i gcás go gcuireann tríú páirtí in iúl d’oibreoir den sórt sin gur foilsíodh ábhar den sórt sin ar a ardán. Sa dá chás sin, dá ndéanfaí an t‑oibreoir sin a eisiamh ón raon feidhme sin, bhainfí éifeacht phraiticiúil d’Airteagal 14(1) de Threoir 2000/31 toisc go gceadaítear go sonrach leis an bhforáil sin do sholáthraí seirbhíse sochaí faisnéise tairbhe a bhaint as an díolúine dá bhforáiltear san fhoráil sin i gcás go ngníomhaíonn sé go tapa, agus eolas aige ar ábhar neamhdhleathach, chun an t‑ábhar sin a bhaint anuas nó chun rochtain ar an ábhar sin a dhéanamh dodhéanta.
41 Ar an gcaoi chéanna, ní féidir a thuiscint ó chur chun feidhme beart teicniúil, ag oibreoir ardáin físeán ar líne, arb é is aidhm dóibh ábhair a sháraíonn forálacha dhlí an Aontais nó an dlí náisiúnta a bhrath i measc na bhfíseán a chuirtear in iúl don phobal ar an ardán sin, go bhfuil ról gníomhach ag an oibreoir sin lena n‑eisiatar é ó thairbhe na scéime díolúine dá bhforáiltear in Airteagal 14(1) den Treoir sin (féach, chuige sin, breithiúnas an 22 Meitheamh 2021, YouTube agus Cyando, C‑682/18 agus C‑683/18, EU:C:2021:503, mír 109).
42 Thairis sin, ní féidir a mheas nach féidir tairbhe na díolúine ó dhliteanas dá bhforáiltear in Airteagal 14 de Threoir 2000/31 a bhaint d’aon ghníomhaíocht de chuid oibreoir ardáin ar líne a fhágann go bhfuil eolas uileghabhálach aige ar an ábhar go léir a uaslódáiltear ar a ardán.
43 Os a choinne sin, i gcás go bhfágann gníomhaíocht oibreoir ardáin ar líne go bhfuil sé ar an eolas faoin ábhar riachtanach arna uaslódáil ag úsáideoir chuig an ardán sin, ní féidir leis brath ar thairbhe na díolúine ó dhliteanas dá bhforáiltear in Airteagal 14 de Threoir 2000/31.
44 Mar a chinn an Chúirt cheana féin, is amhlaidh atá i gcás gur chuir oibreoir ardáin ar líne cúnamh ar fáil, arb é a bhí ann, inter alia, cur i láthair na bhfógraí a foilsíodh ar an ardán sin a bharrfheabhsú nó iad a chur chun cinn. Sa chás sin, ní raibh post neodrach ag an oibreoir mar idirghabhálaí, ach bhí ról gníomhach aige de chineál a thabharfadh eolas nó smacht dó ar ábhar na bhfógraí sin. Dá bhrí sin, ní féidir leis brath, maidir leis na fógraí sin, ar an maolú ar dhliteanas dá dtagraítear in Airteagal 14 de Threoir 2000/31 (breithiúnas an 12 Iúil 2011, L’Oréal agus páirtithe eile, C‑324/09, EU:C:2011:474, mír 116).
45 Is amhlaidh atá freisin i gcás go ndéanann oibreoir ardáin físe ar líne scrúdú, d’fhonn comhaontú comhroinnte ioncaim a thabhairt i gcrích, ar phríomhthéama cainéil físe, ar na físeáin is mó a mbreathnaítear orthu nó na físeáin is déanaí den chainéal sin, nó ar mheiteashonraí na bhfíseán sin. Cé go bhfuil sé i gceist leis an scrúdú ar ábhar, bíodh sé uathoibrithe nó déanta ag daoine nádúrtha, a fhíorú go gcomhlíonann an cruthaitheoir ábhair atá ag lorg an chomhaontaithe comhpháirtíochta tráchtála sin na rialacha a leagtar síos leis an ardán chun rochtain a fháil ar chomhpháirtíocht den sórt sin, tugann sé eolas nithiúil d’oibreoir an ardáin sin ar ábhar bunriachtanach tacair físeán, agus mar thoradh air sin ní féidir leis a mhaíomh go ndéanann sé gníomhaíocht atá go hiomlán teicniúil, uathoibríoch agus éighníomhach agus, dá bhrí sin, go bhfuil ról idirghabhálach neodrach aige.
46 Sa chás seo, is léir ón ordú tarchuir, i gcomhthéacs an chomhaontaithe comhpháirtíochta tráchtála a tugadh i gcrích idir oibreoir an ardáin YouTube agus cruthaitheoirí ábhar áirithe a fhoilsíonn físeáin ar chainéal a chruthaítear ar an ardán sin, go ndéanann Google, i gcomhthéacs thabhairt i gcrích nó chomhlíonadh an chomhaontaithe sin, scrúdú ar ábhar riachtanach an chainéil sin, agus go háirithe a phríomhthéama, na físeáin is mó ar breathnaíodh orthu nó na físeáin is déanaí, nó meiteashonraí na bhfíseán sin. Tá an scrúdú sin ar ábhar, bíodh sé uathoibrithe nó á dhéanamh ag daoine nádúrtha, ceaptha, inter alia, chun a fhíorú go gcomhlíonann an cruthaitheoir inneachair a iarrann an comhaontú comhpháirtíochta tráchtála sin na rialacha arna leagan síos ag an ardán chun rochtain a fháil ar chomhpháirtíocht den sórt sin agus, dá bhrí sin, go bhfuil sé sa bhreis ar na seiceálacha caighdeánacha a chuirtear chun feidhme gan idirdhealú do gach físeán a uaslódáiltear chuig ardán YouTube. Scrúdófar úrnuacht agus caighdeán an ábhair san athbhreithniú freisin. Ní féidir leis an gcruthaitheoir ábhair lena mbaineann tairbhe a bhaint as an scéim comhroinnte ioncaim fógraíochta a thairgeann Google ach amháin má chomhlíontar na coinníollacha sonracha ábhair sin.
47 Sna himthosca sin agus faoi réir fíorú ag an gcúirt a rinne an tarchur, ní mór a mheas, agus scrúdú á dhéanamh aige ar na cainéil YouTube atá i gceist sna príomhimeachtaí, nach bhféadfadh Google a bheith ar an eolas go réasúnta gurbh é cearrbhachas a bpríomhthéama agus go raibh físeáin iomadúla iontu lena bhfógraítear cluichí den sórt sin, de shárú ar Airteagal 9 de Dhlí Foraithne Uimh. 87/2018.
48 Leanann sé ó na breithnithe go léir roimhe seo nach mór Airteagal 14 de Threoir 2000/31 a léiriú sa chaoi nach bhfuil feidhm aige maidir le hoibreoir ardáin físeán ar líne, a bhfuil comhaontú comhpháirtíochta tráchtála tugtha i gcrích aige, le duine a úsáideann an t‑ardán sin chun físeáin a chraoladh ar chainéal tiomnaithe, lena bhforáiltear do chomhroinnt ioncaim fógraíochta agus, i gcomhthéacs thabhairt i gcrích nó chomhlíonadh an chomhaontaithe sin, a scrúdaigh ábhar an chainéil sin, agus go háirithe a phríomhthéama, na físeáin is mó a ndearnadh faire orthu nó na físeáin is déanaí, nó meiteashonraí na bhfíseán sin.
Costais
49 Ós rud é, a mhéid a bhaineann sé leis na páirtithe sna príomhimeachtaí, go bhfuil na himeachtaí mar chéim sa chás os comhair na cúirte a rinne an tarchur, baineann ceist na gcostas leis an gcúirt sin. Níl na costais a tabhaíodh trí bharúlacha a cuireadh faoi bhráid na Cúirte, seachas costais na bpáirtithe sin, inghnóthaithe.
Ar na forais sin, rialaíonn an Chúirt (an Dara Dlísheomra) mar seo a leanas:
1. Maidir leis an tríú fleiscín d’Airteagal 1(5)(d) de Threoir 2000/31/CE ó Pharlaimint na hEorpa agus ón gComhairle an 8 Meitheamh 2000, maidir le gnéithe áirithe dlí de sheirbhísí na sochaí faisnéise, an trádáil leictreonach, go háirithe, sa mhargadh inmheánach (‘an Treoir um thrádáil leictreonach’),
ní mór léiriú a dhéanamh mar seo a leanas:
tagann seirbhís de chuid na sochaí faisnéise arb é atá inti físeáin a óstáil ar líne faoi raon feidhme na Treorach sin fiú i gcás go bhfuil fógraí sna físeáin sin maidir le cearrbhachas lena mbaineann geall a chur a bhfuil luach airgeadaíochta i gcluichí áidh, de réir bhrí na forála sin.
2. Maidir le hAirteagal 14 de Threoir 2000/31
ní mór léiriú a dhéanamh mar seo a leanas:
cuirtear cosc leis maidir le hoibreoir ardáin físeán ar líne, a bhfuil comhaontú comhpháirtíochta tráchtála tugtha i gcrích aige, le duine a úsáideann an t‑ardán sin chun físeáin a chraoladh ar chainéal tiomnaithe, lena bhforáiltear do chomhroinnt ioncaim fógraíochta agus, i gcomhthéacs thabhairt i gcrích nó chomhlíonadh an chomhaontaithe sin, a scrúdaigh ábhar an chainéil sin, agus go háirithe a phríomhthéama, na físeáin is mó a ndearnadh faire orthu nó na físeáin is déanaí, nó meiteashonraí na bhfíseán sin.
[Sínithe]
* Teanga an cháis: an Iodáilis.