(1)

Le Cinneadh 2003/96/CE (2), d’fhormheas an Chomhairle tabhairt i gcrích an Chomhaontaithe le haghaidh comhar san eolaíocht agus sa teicneolaíocht idir an Comhphobal Eorpach agus an Úcráin (3) (“an Comhaontú”). Síníodh an Comhaontú i gCóbanhávan an 4 Iúil 2002 agus tháinig sé i bhfeidhm an 11 Feabhra 2003.

(2)

Foráladh le pointe (b) d’Airteagal 12 den Chomhaontú go dtabharfaí an Comhaontú i gcrích le haghaidh tréimhse tosaigh dar críoch an 31 Nollaig 2002 agus go bhféadfaí é a athnuachan de chomhthoil na bpáirtithe ar feadh tréimhsí breise cúig bliana.

(3)

Ar bhonn Chinntí 2003/737/CE (4), 2011/182/AE (5) agus (AE) 2015/344 (6) ón gComhairle, athnuadh an Comhaontú ar feadh trí thréimhse bhreise cúig bliana gach uair, le héifeacht chúlghabhálach ón 8 Samhain 2009 agus ón 8 Samhain 2014, don dá athnuachan dheireanacha. Chuaigh an Comhaontú in éag an 7 Samhain 2019.

(4)

Tá an Úcráin ina gníomhaí tábhachtach maidir leis an eolaíocht, an teicneolaíocht agus an nuálaíocht i gcomharsanacht an Aontais. Chun go leanfar den chomhar a éascú i réimsí tosaíochta comhchoiteanna ó thaobh na heolaíochta agus na teicneolaíochta, measann an dá pháirtí gur lena gcomhleas a bheadh sé an Comhaontú a athnuachan.

(5)

Dheimhnigh an dá pháirtí go bhfuil sé ar intinn acu an Comhaontú a athnuachan go ceann tréimhse bhreise cúig bliana. Ba cheart inneachar an Chomhaontaithe athnuaite a bheith comhionann le hinneachar an Chomhaontaithe atá ann faoi láthair. Ar mhaithe le leanúnachas an Chomhaontaithe a áirithiú, ba cheart éifeacht chúlghabhálach a bheith ag an athnuachan amhail ón 8 Samhain 2019.

(6)

Ba cheart dá bhrí sin athnuachan an Chomhaontaithe a fhormheas thar ceann an Aontais,