(1)

Fit-12 ta’ Settembru 2011, il-Kunsill impona, permezz tar-Regolament ta’ Implimentazzjoni (UE) Nru 917/2011 (3) (“l-investigazzjoni oriġinali”), dazju antidumping definittiv fuq l-importazzjonijiet ta’ madum taċ-ċeramika (“il-prodott ikkonċernat”) li joriġina mir-Repubblika tal-Poplu taċ-Ċina (“ir-RPĊ”). Minħabba l-għadd kbir ta’ produtturi esportaturi li kkooperaw fiċ-Ċina matul l-investigazzjoni oriġinali, intgħażel kampjun ta’ produtturi esportaturi Ċiniżi u rati individwali ta’ dazju ad valorem li jvarjaw minn 13,9 % (4) għal 36,5 % ġew imposti fuq il-kumpaniji inklużi fil-kampjun, filwaqt li kumpaniji oħra li kkooperaw mhux inklużi fil-kampjun ingħataw rata ta’ dazju ta’ 30,6 %. Id-dazju residwu impost fuq il-produtturi esportaturi Ċiniżi li ma kkooperawx kien jammonta għal 69,7 %.

(2)

Fit-22 ta’ Novembru 2017, wara rieżami ta’ skadenza, il-Kummissjoni ddeċidiet, permezz tar-Regolament ta’ Implimentazzjoni (UE) 2017/2179, li żżomm fis-seħħ id-dazji antidumping.

(3)

Skont l-Artikolu 2 tar-Regolament ta’ Implimentazzjoni (UE) 2017/2179, il-Kummissjoni tista’ temenda l-Anness I ta’ dak ir-Regolament billi tagħti lil produttur esportatur ġdid ir-rata tad-dazju applikabbli għall-kumpaniji li kkooperaw u li mhumiex inklużi fil-kampjun jew li ma ngħatawx trattament individwali, jiġifieri r-rata tad-dazju medja ponderata ta’ 30,6 %, meta dak il-produttur esportatur ġdid fir-RPĊ jagħti biżżejjed evidenza lill-Kummissjoni.

(4)

F’Ottubru 2018, il-kumpanija Zhuhai Xuri Ceramics Co., Ltd (“l-applikant”) ippreżentat ruħha, wara l-pubblikazzjoni tar-Regolament ta’ Implimentazzjoni (UE) 2017/2179 u ressqet talba biex tingħata trattament ta’ produttur esportatur ġdid u għalhekk tkun soġġetta għar-rata ta’ dazju applikabbli għall-kumpaniji li kkooperaw fir-RPĊ li mhumiex inklużi fil-kampjun jew li ma ngħatawx trattament individwali, jiġifieri 30,6 %. L-applikant iddikjara li huwa jissodisfa t-tliet kriterji stabbiliti fl-Artikolu 2 tar-Regolament ta’ Implimentazzjoni (UE) 2017/2179.

(5)

Sabiex tiddetermina jekk l-applikant issodisfax dawn il-kriterji, il-Kummissjoni talbet lill-applikant biex jimla kwestjonarju. Wara l-analiżi tat-tweġiba għall-kwestjonarju, il-Kummissjoni kkunsidrat li l-applikant kien ipprovda informazzjoni suffiċjenti u ma talbitx aktar evidenza ta’ sostenn.

(6)

Il-Kummissjoni nnotifikat lill-industrija tal-Unjoni dwar it-talba għal trattament ta’ produttur esportatur ġdid u tatha l-opportunità tikkummenta. Il-Kummissjoni ma rċeviet l-ebda kumment.

(7)

Fir-rigward tal-kundizzjoni stabbilita fil-punt (a) tal-Artikolu 2 tar-Regolament ta’ Implimentazzjoni (UE) 2017/2179, l-ewwel kriterju, il-Kummissjoni eżaminat bir-reqqa r-reġistru tal-bejgħ tal-applikant li jkopri l-perjodu tal-investigazzjoni. Ir-reġistru kien jirrifletti biss il-bejgħ domestiku.

(8)

Wara verifika ulterjuri ta’ data oħra tal-bejgħ, tal-istatistika u tad-dokumentazzjoni doganali tal-UE, ma nstabet l-ebda evidenza li tissuġġerixxi li l-applikant esporta l-prodott ikkonċernat lejn l-Unjoni qabel jew matul il-perjodu tal-investigazzjoni. Għalhekk, fid-dawl tal-informazzjoni disponibbli, il-Kummissjoni kkonkludiet li l-applikant issodisfa l-ewwel kriterju.

(9)

Fir-rigward tal-kundizzjoni stabbilita fil-punt (b) tal-Artikolu 2 tar-Regolament ta’ Implimentazzjoni (UE) 2017/2179, it-tieni kriterju, il-Kummissjoni nnutat li l-istruttura korporattiva tal-applikant fiha għaxar kumpaniji relatati. Tnejn minn dawk il-kumpaniji relatati kienu involuti fil-manifattura tal-prodott ikkonċernat matul il-perjodu ta’ investigazzjoni iżda kienu joperaw fuq livell domestiku biss. Abbażi tal-evidenza pprovduta ma ġiet identifikata l-ebda rabta kummerċjali jew operazzjonali oħra ma’ esportaturi jew produtturi mir-RPĊ li huma soġġetti għal miżuri antidumping fis-seħħ. Ħamsa minn dawk il-kumpaniji relatati nħolqu wara l-perjodu tal-investigazzjoni u t-tlieta l-oħra ma kienu involuti fl-ebda attività kummerċjali li tikkonċerna l-prodott ikkonċernat. Għalhekk, il-Kummissjoni kkonkludiet li l-applikant issodisfa t-tieni kriterju.

(10)

Rigward il-kundizzjoni stabbilita fil-punt (c) tal-Artikolu 2 tar-Regolament ta’ Implimentazzjoni (UE) 2017/2179, it-tielet kriterju, abbażi tal-evidenza dokumentarja pprovduta, il-Kummissjoni stabbiliet li l-applikant ma kienx esporta l-prodott ikkonċernat lejn l-Unjoni wara l-perjodu tal-investigazzjoni. Fin-nuqqas ta’ dan, l-applikant ipprovda evidenza ta’ ftehimiet kuntrattwali irrevokabbli ta’ bejgħ ta’ kwantitajiet sinifikanti tal-prodott ikkonċernat lejn l-Unjoni. Għalhekk, il-Kummissjoni kkonkludiet li l-applikant issodisfa t-tielet kriterju.

(11)

L-industrija tal-Unjoni ma pprovdiet l-ebda evidenza/informazzjoni li tindika li xi waħda mit-tliet kriterji ma ġietx issodisfata mill-applikant.

(12)

Il-Kummissjoni kkonkludiet li l-applikant issodisfa t-tliet kriterji mitluba sabiex jingħata trattament ta’ produttur esportatur ġdid. Għalhekk, l-isem tal-applikant għandu jiżdied mal-lista ta’ produtturi li kkooperaw li mhumiex inklużi fil-kampjun jew li mhumiex mogħtija trattament individwali elenkati fl-Anness I tar-Regolament ta’ Implimentazzjoni (UE) 2017/2179.

(13)

L-applikant u l-industrija tal-Unjoni ġew infurmati bil-fatti essenzjali u l-kunsiderazzjonijiet li abbażi tagħhom tqies xieraq li tingħata r-rata tad-dazju antidumping applikabbli għall-produtturi esportaturi Ċiniżi li kkoperaw u li mhumiex inklużi fil-kampjun lil Zhuhai Xuri Ceramics Co., Ltd.

(14)

Il-partijiet ngħataw il-possibbiltà li jippreżentaw kummenti li tqiesu kif xieraq fejn meħtieġ.

(15)

Il-miżuri previsti f’dan ir-Regolament huma skont l-opinjoni tal-Kumitat stabbilit bl-Artikolu 15(1) tar-Regolament bażiku,