Brussell, 17.11.2020

COM(2020) 728 final

2020/0323(NLE)

Proposta għal

DEĊIŻJONI TA’ IMPLIMENTAZZJONI TAL-KUNSILL

li tawtorizza lin-Netherlands jintroduċi miżura speċjali li tidderoga mill-Artikolu 168 u 168a tad-Direttiva 2006/112/KE dwar is-sistema komuni ta’ taxxa fuq il-valur miżjud


MEMORANDUM TA’ SPJEGAZZJONI

Skont l-Artikolu 395(1) tad-Direttiva 2006/112/KE tat-28 ta’ Novembru 2006 dwar is-sistema komuni ta’ taxxa fuq il-valur miżjud (minn hawn ’il quddiem “id-Direttiva tal-VAT 1 ”), il-Kunsill, li jaġixxi b’mod unanimu fuq proposta tal-Kummissjoni, jista’ jawtorizza kwalunkwe Stat Membru biex japplika miżuri speċjali li jidderogaw mid-dispożizzjonijiet ta’ dik id-Direttiva sabiex jissimplifika l-proċedura tal-ġbir tal-VAT jew biex jipprevjeni ċerti forom ta’ evażjoni jew ta’ evitar tat-taxxa.

Permezz tal-ittra rreġistrata mal-Kummissjoni fit-30 ta’ Lulju 2020, in-Netherlands talab awtorizzazzjoni biex tkompli tapplika miżura ta’ deroga mill-Artikoli 168 u 168a tad-Direttiva 2006/112/KE, biex teskludi mid-dritt ta’ tnaqqis il-VAT fuq oġġetti u servizzi li jintużaw għal iktar minn 90 % mill-persuna taxxabbli għall-użu privat tagħha jew għal dak tal-impjegati tagħha, jew b’mod ġenerali għal finijiet li mhumiex tan-negozju jew għal attivitajiet mhux ekonomiċi.

F'konformità mal-Artikolu 395(2) tad-Direttiva 2006/112/KE, il-Kummissjoni infurmat lill-Istati Membri l-oħra permezz ta' ittra datata l-10 ta' Settembru 2020 bit-talba magħmula min-Netherlands. Il-Kummissjoni nnotifikat lin-Netherlands permezz ta’ ittra datata l-11 ta’ Settembru 2020 li kellha l-informazzjoni kollha meħtieġa biex tikkunsidra t-talba.

1.KUNTEST TAL-PROPOSTA

•Raġunijiet u għanijiet tal-proposta

L-Artikolu 168 tad-Direttiva 2006/112/KE jistipula li persuna taxxabbli hija intitolata tnaqqas il-VAT imposta fuq l-affarijiet li tkun xtrat u s-servizzi li tkun irċeviet għall-iskopijiet tat-tranżazzjonijiet taxxabbli tagħha. L-Artikolu 168a(1) tad-Direttiva 2006/112/KE jistipula li l-VAT fuq in-nefqa relatat ma’ proprjetà immobbli li tifforma parti mill-assi kummerċjali ta’ persuna taxxabbli u li tintuża kemm għal finijiet tan-negozju kif ukoll għal finijiet li mhumiex tan-negozju, għandha tkun deduċibbli biss sal-proporzjon tal-użu tal-proprjetà għall-finijiet kummerċjali tal-persuna taxxabbli. Skont l-Artikolu 168a(2) tad-Direttiva 2006/112/KE, l-Istati Membri jistgħu japplikaw din ir-regola wkoll b’rabta man-nefqa relatat ma’ oġġetti oħrajn li jiffurmaw parti mill-assi kummerċjali, skont dak li jispeċifikaw.

Il-miżura li qed japplika n-Netherlands ma żżommx ma’ dawk il-prinċipji, u teskludi għalkollox mid-dritt tat-tnaqqis il-VAT fuq l-oġġetti u s-servizzi li l-persuna taxxabbli tuża, f’iktar minn 90 % tal-każijiet, għal finijiet privati jew li mhumiex tan-negozju, inklużi l-attivitajiet mhux ekonomiċi.

Ir-rata ta’ 90 % hija bbażata fuq l-implimentazzjoni ta’ din ir-rata fil-Pajjiżi l-Baxxi għal skopijiet ta’ taxxa korporattiva u tat-taxxa fuq id-dħul. Aktar minn 90 % ta’ użu mhux kummerċjali jfisser li l-investimenti huma kważi kompletament użati mill-kummerċjant għall-użu privat tiegħu stess jew għal skopijiet privati tal-impjegati tiegħu, jew, b’mod ġenerali, għal skopijiet mhux kummerċjali jew attivitajiet mhux ekonomiċi u dawn l-investimenti, għalhekk, mhumiex meqjusa bħala investimenti kummerċjali.

Fit-talba tiegħu, in-Netherlands jargumenta li abbażi tal-fatt li kull min regolarment jipprovdi oġġetti jew servizzi għal remunerazzjoni huwa persuna taxxabbli, l-awtoritajiet tat-taxxa Netherlandiżi, fl-ekonomija (diġitali) attwali qed jiffaċċjaw għadd kbir ta’ persuni privati jew negozji part-time jew mikro b’fatturat żgħir ħafna. Huma jistgħu jnaqqsu l-VAT fuq l-inputs/spejjeż tagħhom. Pereżempju, hemm sidien ta’ pannelli solari, parteċipanti fl-ekonomija kollaborattiva li jikru l-karozzi jew id-djar tagħhom, persuni indipendenti mingħajr persunal, eċċ. Fil-prattika, din il-linja bejn l-attivitajiet professjonali u privati tagħhom tiġġenera ħafna diskussjonijiet dwar il-livell tad-dritt tagħhom li jnaqqsu l-VAT tal-input, dritt li spiss huwa limitat ħafna għal dawn il-persuni.

In-Netherlands informa lill-Kummissjoni li l-ġestjoni tad-dritt għat-tnaqqis tat-taxxa tal-input għal dawn il-persuni taxxabbli, b’dikjarazzjonijiet u korrezzjonijiet kontinwi tal-VAT, twassal għal piżijiet sproporzjonati, kemm għall-persuni taxxabbli kkonċernati kif ukoll għall-amministrazzjonijiet tat-taxxa.

Barra minn hekk, dan iwassal għal vantaġġ mhux ġustifikat fil-fluss tal-flus kontra l-persuni taxxabbli li jużaw dawn l-oġġetti u s-servizzi 100 % għal skopijiet ta’ negozju. Persuni taxxabbli li jużaw dawn l-oġġetti u servizzi biss marġinalment għal skopijiet ta’ negozju xorta huma permessi għal dritt ta’ tnaqqis ta’ 100 %. Barra minn hekk, il-leġiżlazzjoni tal-VAT għandha livell għoli ta’ kumplessità għall-mikrointrapriżi li ma jistgħux jaffordjaw appoġġ legali, li jinvolvi riskju kbir għal żbalji, evażjoni u b’hekk jikkomplika l-konformità. Dan tal-aħħar huwa sostnut minn eżempju ta’ sidien ta’ pannelli solari li jsiru persuni taxxabbli għall-enerġija li jipproduċu u jipprovdu lin-netwerk tal-elettriku, fejn huma jnaqqsu l-VAT kollha fuq il-pannelli mixtrija u saħansitra jżidu l-kostijiet bħall-prezz tax-xiri ta’ art għall-bini u djar biex jinstallaw il-pannelli solari. Peress li l-użu tal-garaxxijiet u d-djar huwa primarjament għall-użu privat, dan iwassal għal diskussjonijiet ikkumplikati dwar id-dritt li titnaqqas il-VAT tal-input u kif dan għandu jiġi applikat b’mod korrett.

Minħabba f’hekk, il-miżura speċjali kkonċernata tiffaċilitalhom ħajjithom kemm għall-amministrazzjonijiet tat-taxxa kif ukoll għan-negozji, billi ma jkollhomx bżonn jimmonitorjaw l-użu sussegwenti tal-oġġetti u tas-servizzi li għalihom tkun applikat l-esklużjoni mit-tnaqqis meta jkunu nxtraw, b’mod partikolari f’dak li għandu x’jaqsam mat-tassazzjoni possibbli ta’ użu privat skont l-Artikolu 16 jew 26 tad-Direttiva 2006/112/KE. Għalhekk, huwa xieraq li l-miżura ta’ deroga tkun xierqa.

Il-miżura hija mistennija li jkollha ftit impatt fuq id-dħul globali mit-taxxa. It-tnaqqis inizjali huwa attwalment ikkoreġut għall-użu mhux kummerċjali permezz tal-korrezzjoni abbażi tal-Artikoli 16 u 26 tad-Direttiva 2006/112/KE. Il-miżura mistennija ma jkollha l-ebda impatt negattiv fuq ir-riżorsi proprji tal-Unjoni li ġejjin mill-VAT.

Madankollu, kwalunkwe miżuri ta’ deroga għandhom ikunu limitati fiż-żmien sabiex ikun jista’ jiġi evalwat jekk il-kundizzjonijiet li fuqhom hija msejsa d-deroga jkunux għadhom validi. Għaldaqstant, qed jiġi propost li d-deroga tiġi estiża sa tmiem l-2023 u li, flimkien mat-talba għall-estensjoni, in-Netherlands, jintalab jippreżenta rapport sa mhux aktar tard mill-31 ta’ Marzu 2023 li jkun jinkludi analiżi tat-tqassim applikat għall-użu kummerċjali u għal dak mhux kummerċjali li fuqu tissejjes l-esklużjoni mit-tnaqqis, f’każ li tkun prevista estensjoni oħra għal wara l-2023.

•Konsistenza mad-dispożizzjonijiet ta’ politika eżistenti fil-qasam tal-politika

Derogi simili b’rabta mar-restrizzjoni tad-dritt ta’ tnaqqis ingħataw lil Stati Membri oħra, l-Awstrija 2 , il-Ġermanja 3 .

Minkejja l-inizjattivi preċedenti biex jiġu stabbiliti regoli li skonthom il-kategoriji tan-nefqa jistgħu jkunu soġġetti għal restrizzjoni fuq id-dritt ta’ tnaqqis tal-VAT 4 , tali deroga hija xierqa sa meta jiġu armonizzati dawn ir-regoli fil-livell tal-UE.

2.BAŻI ĠURIDIKA, SUSSIDJARJETÀ U PROPORZJONALITÀ

•Il-bażi ġuridika

L-Artikolu 395 tad-Direttiva tal-VAT.

•Sussidjarjetà (għall-kompetenza mhux esklussiva)

Meta titqies id-dispożizzjoni tad-Direttiva tal-VAT li fuqha hija bbażata l-proposta, il-proposta taqa’ fil-kompetenza esklużiva tal-Unjoni. Għalhekk il-prinċipju tas-sussidjarjetà ma japplikax.

•Proporzjonalità

Id-Deċiżjoni tikkonċerna awtorizzazzjoni mogħtija lil Stat Membru wara talba tiegħu stess u ma tikkostitwixxi l-ebda obbligu.

Minħabba l-kamp ta’ applikazzjoni limitat tad-deroga, il-miżura speċjali hija proporzjonata mal-għan li jrid jintlaħaq, jiġifieri l-prevenzjoni ta’ ċerti forom ta’ evażjoni jew ta’ evitar tat-taxxa. Il-miżura ta’ deroga tevita li l-VAT fuq l-investimenti, li jintużaw biss marġinalment għal skopijiet kummerċjali, l-ewwel titnaqqas kompletament daqslikieku tintuża kompletament għal skopijiet kummerċjali u sussegwentement tiġi kkoreġuta biex tirrifletti l-użu marġinali reali tan-negozju, u b’hekk tinvolvi rekwiżiti amministrattivi u ta’ rappurtar kontinwi. B’din il-miżura, l-użu privat ma jeħtieġx aktar li jiġi rivedut u aġġustat kull sena, u lanqas ma jeħtieġ li l-amministrazzjoni tat-taxxa timmonitorja l-bidliet fil-proporzjon tal-użu privat/tan-negozju matul il-perjodu ta’ reviżjoni.

 •    Għażla tal-istrument

L-istrument propost: Deċiżjoni ta’ Implimentazzjoni tal-Kunsill.

Skont l-Artikolu 395 tad-Direttiva tal-Kunsill 2006/112/KE, deroga mir-regoli komuni tal-VAT hija possibbli biss bl-awtorizzazzjoni tal-Kunsill li jkun qiegħed jaġixxi b’mod unanimu fuq proposta mill-Kummissjoni. Deċiżjoni ta’ Implimentazzjoni tal-Kunsill hija l-iktar strument adattat peress li tista’ tiġi indirizzata lil Stat Membru individwali.

3.RIŻULTATI TAL-EVALWAZZJONIJIET EX-POST, TAL-KONSULTAZZJONIJIET MAL-PARTIJIET IKKONĊERNATI U TAL-VALUTAZZJONIJIET TAL-IMPATT

•Konsultazzjonijiet mal-partijiet ikkonċernati

Din il-proposta hi bbażata fuq talba li għamlu n-Netherlands u tikkonċerna biss lil dan l-Istat Membru.

•Ġbir u użu tal-għarfien espert

Ma kienx hemm bżonn għarfien espert estern.

•Il-valutazzjoni tal-impatt

Il-proposta hija maħsuba għall-ġlieda kontra l-evażjoni tat-taxxa u għas-simplifikazzjoni tal-proċedura tal-impożizzjoni tal-VAT, u għaldaqstant għandha impatt pożittiv potenzjali kemm fuq in-negozji kif ukoll fuq l-amministrazzjonijiet. Is-soluzzjoni ġiet identifikata min-Netherlands bħala miżura xierqa u hija komparabbli ma’ derogi oħrajn tal-imgħoddi u tal-lum.

4.IMPLIKAZZJONIJIET BAĠITARJI

Il-proposta mhi se jkollha l-ebda implikazzjoni negattiva għall-baġit tal-UE.

5.ELEMENTI OĦRAJN

Il-proposta fiha klawżola ta’ estinzjoni; limitu ta’ żmien awtomatiku li jiskorri fil-31 ta’ Diċembru 2023.

F’każ li n-Netherlands jikkunsidra estensjoni oħra tal-miżura ta’ deroga lil hinn mill-2023, jenħtieġ li jiġi ppreżentat rapport lill-Kummissjoni li jinkludi rieżami tal-limitu tal-persentaġġ flimkien mat-talba ta’ estensjoni sa mhux iktar tard mill-31 ta’ Marzu 2023.

 

2020/0323 (NLE)

Proposta għal

DEĊIŻJONI TA’ IMPLIMENTAZZJONI TAL-KUNSILL

li tawtorizza lin-Netherlands jintroduċi miżura speċjali li tidderoga mill-Artikolu 168 u 168a tad-Direttiva 2006/112/KE dwar is-sistema komuni ta’ taxxa fuq il-valur miżjud

IL-KUNSILL TAL-UNJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidra d-Direttiva tal-Kunsill 2006/112/KE tat-28 ta’ Novembru 2006 dwar is-sistema komuni ta’ taxxa fuq il-valur miżjud 5 , u b’mod partikolari l-ewwel subparagrafu tal-Artikolu 395(1) tagħha,

Wara li kkunsidra l-proposta tal-Kummissjoni Ewropea,

Billi:

(1)L-Artikoli 168 u 168a tad-Direttiva 2006/112/KE li jirregolaw id-dritt tal-persuni taxxabbli li jnaqqsu t-taxxa fuq il-valur miżjud (VAT) imposta fuq il-merkanzija u s-servizzi fornuti lilhom għall-iskopijiet tat-tranżazzjonijiet taxxabbli tagħhom.

(2)Permezz ta’ ittra reġistrata mal-Kummissjoni fit-30 ta’ Lulju 2020, in-Netherlands talab l-awtorizzazzjoni biex tintroduċi miżura speċjali ta’ deroga mill-Artikoli 168 u 168a tad-Direttiva 2006/112/KE, biex teskludi għalkollox mid-dritt ta’ tnaqqis il-VAT fuq oġġetti u servizzi li jintużaw għal iktar minn 90 % mill-persuna taxxabbli għall-użu privat tagħha jew għal dak tal-impjegati tagħha, jew b’mod ġenerali għal finijiet li mhumiex tan-negozju jew għal attivitajiet mhux ekonomiċi.

(3)F’konformità mat-tieni subparagrafu tal-Artikolu 395(2) tad-Direttiva 2006/112/KE, il-Kummissjoni, b’ittra datata l-10 ta’ Settembru 2020, infurmat lill-Istati Membri l-oħra bit-talba tan-Netherlands. B’ittra datata l-11 ta’ Settembru 2020, il-Kummissjoni nnotifikat lin-Netherlands li kellha l-informazzjoni kollha meħtieġa biex tqis it-talba.

(4)L-objettiv tal-miżura speċjali huwa li tissimplifika l-proċedura tal-imposti u l-ġbir tal-VAT u b’hekk ikunu wkoll impeduti ċerti forom ta’ evażjoni u evitar tat-taxxa. L-ammont ta’ taxxa dovut fil-livell tal-konsum finali huwa affettwat biss b’mod negliġibbli.

(5)Skont l-informazzjoni li bagħat in-Netherlands, is-sitwazzjoni legali u fattwali li ġġustifikat l-applikazzjoni attwali tal-miżura speċjali għadha teżisti. Għalhekk, jenħtieġ li n-Netherlands ikun awtorizzat ikompli jintroduċi din il-miżura speċjali, iżda għandu jkun limitat fiż-żmien sal-31 ta’ Diċembru 2023 biex ikunu jistgħu jiġu analizzati l-ħtieġa u effettività tal-miżura ta’ deroga u tar-rata ta’ tqassim tal-użu kummerċjali u mhux kummerċjali li din tissejjes fuqha.

(6)F’każ li n-Netherlands jikkunsidra li tkun meħtieġa estensjoni lil hinn mill-2023, għandha tagħmel talba għal estensjoni lill-Kummissjoni sal-31 ta’ Marzu 2023 flimkien ma’ rapport dwar l-applikazzjoni tal-miżura ta’ deroga li għandu jinkludi reviżjoni tar-rata ta’ tqassim applikata.

(7)Id-derogi se jkollhom biss effett negliġibbli fuq l-ammont globali ta’ taxxa miġbura fl-istadju tal-konsum finali u mhux se jkollhom impatt negattiv fuq ir-riżorsi proprji tal-Unjoni li jinġabru mit-taxxa fuq il-valur miżjud.

ADOTTA DIN ID-DEĊIŻJONI:

Artikolu 1

B’deroga mill-Artikolu 168 u 168a tad-Direttiva 2006/112/KE, in-Netherlands huwa awtorizzat jeskludi t-taxxa fuq il-valur miżjud (il-VAT) imġarrba fuq l-oġġetti u s-servizzi mid-dritt ta’ tnaqqis tal-VAT meta dawk l-oġġetti u s-servizzi jintużaw, f’iktar minn 90 % tal-każijiet, għall-għanijiet privati ta’ persuna taxxabbli jew tal-impjegati tagħha, jew, b’mod iktar ġenerali, għal għanijiet li mhumiex tan-negozju jew għal attivitajiet mhux ekonomiċi.

Artikolu 2

Din id-Deċiżjoni għandha tapplika mill-1 ta’ Jannar 2021 sal-31 ta’ Diċembru 2023.

Kull talba għal awtorizzazzjoni tal-estensjoni tal-miżuri ta’ deroga awtorizzati b’din id-Deċiżjoni għandha tiġi ppreżentata lill-Kummissjoni sal-31 ta’ Marzu 2023.

Flimkien mat-tali talba għandu jintbagħat rapport dwar l-applikazzjoni ta' din il-miżura li jinkludi analiżi tar-rata ta' tqassim applikata għad-dritt ta' tnaqqis tal-VAT abbażi ta' din id-Deċiżjoni.

Artikolu 3

Din id-Deċiżjoni hija indirizzata lir-Renju tan-Netherlands.

Magħmul fi Brussell,

   Għall-Kunsill

   Il-President

(1)    ĠU 347, 11.12.2006, p. 1.
(2)    Id-Deċiżjoni ta’ Implimentazzjoni tal-Kunsill (UE) 2018/1487 tat-2 ta’ Ottubru 2018 li temenda d-Deċiżjoni 2009/1013/KE li tawtorizza lir-Repubblika tal-Awstrija biex tapplika miżura ta’ deroga mill-Artikolu 168 u 168a tad-Direttiva 2006/112/KE dwar is-sistema komuni ta’ taxxa fuq il-valur miżjud ĠU L 251, 5.10.2018, p. 33-34.
(3)    Id-Deċiżjoni ta’ Implimentazzjoni tal-Kunsill (UE) 2018/2060 tal-20 ta’ Diċembru 2018 li temenda d-Deċiżjoni 2009/791/KE li tawtorizza lill-Ġermanja biex tapplika miżura ta’ deroga mill-Artikolu 168 u 168a tad-Direttiva 2006/112/KE dwar is-sistema komuni ta’ taxxa fuq il-valur miżjud ĠU L 282, 12.11.2018, p. 8-12.
(4)    KUMM (2004) 728 finali - Proposta għal Direttiva tal-Kunsill li temenda d-Direttiva 77/388/KEE bl-għan li jiġu ssimplifikati l-obbligazzjonijiet tat-taxxa fuq il-valur miżjud (ĠU C 24, 29.1.2005, p. 10) irtirata fil-21 ta’ Mejju 2014 (ĠU C 153, 21. 05. 2014, p. 3)
(5)    ĠU 347, 11.12.2006, p. 1.