(1)

Il-Konvenzjoni riveduta għan-Navigazzjoni fuq ir-Renu tas-17 ta’ Ottubru 1868, emendata mill-Konvenzjoni li temenda l-Konvenzjoni Riveduta għan-Navigazzjoni fuq ir-Renu, adottata fl-20 ta’ Novembru 1963, daħlet fis-seħħ fl-14 ta’ April 1967.

(2)

F’konformità ma’ dik il-Konvenzjoni, il-Kummissjoni Ċentrali għan-Navigazzjoni fuq ir-Renu (CCNR) tista’ tadotta rekwiżiti tekniċi għall-bastimenti tal-passaġġi fuq l-ilma interni.

(3)

Jenħtieġ li l-azzjoni mill-Unjoni fis-settur tan-navigazzjoni interna jkollha l-għan li tiżgura l-uniformità fl-iżvilupp tar-rekwiżiti tekniċi għall-bastimenti tal-passaġġi fuq l-ilma interni applikati fl-Unjoni.

(4)

Il-Kumitat Ewropew għat-tfassil ta’ standards fil-qasam tan-navigazzjoni interna (“CESNI”) twaqqaf fit-3 ta’ Ġunju 2015 fil-qafas tas-CCNR biex jiżviluppa standards tekniċi għall-passaġġi fuq l-ilma interni f’diversi oqsma, b’mod partikolari fir-rigward tal-bastimenti, it-teknoloġija tal-informazzjoni u l-ekwipaġġ.

(5)

Għal trasport effiċjenti fuq il-passaġġi fuq l-ilma, huwa importanti li r-rekwiżiti tekniċi għal bastimenti jkunu kompatibbli u kemm jista’ jkun armonizzati skont reġimi legali differenti fl-Ewropa. B’mod partikolari, jenħtieġ li l-Istati Membri li huma wkoll membri tas-CCNR jappoġġaw id-deċiżjonijiet li jarmonizzaw ir-regoli tas-CCNR ma’ dawk applikati fl-Unjoni.

(6)

Huwa mistenni li s-CESNI jadotta l-Istandard Ewropew li jistabbilixxi r-Rekwiżiti Tekniċi għall-bastimenti tan-Navigazzjoni Interna (“l-istandard ES-TRIN”) 2021/1 u l-Istandard Normattiv għan-Navigazzjoni Interna AIS 2021/3.0 waqt il-laqgħa tiegħu tat-13 ta’ Ottubru 2020.

(7)

L-istandard ES-TRIN 2021/1 jistabbilixxi r-rekwiżiti tekniċi uniformi meħtieġa biex tiġi żgurata s-sikurezza tal-bastimenti tal-passaġġi fuq l-ilma interni. Dan jinkludi: dispożizzjonijiet dwar il-bini tal-bastimenti, l-armar u t-tagħmir għall-bastimenti tal-passaġġi fuq l-ilma interni; dispożizzjonijiet speċjali fir-rigward ta’ kategoriji speċifiċi ta’ bastimenti, bħal bastimenti tal-passiġġieri, konvojs imbuttati u bastimenti tal-kontejners; dispożizzjonijiet dwar it-tagħmir tas-sistema ta’ identifikazzjoni awtomatika; dispożizzjonijiet dwar l-identifikazzjoni tal-bastiment; mudell ta’ ċertifikati u reġistru; dispożizzjonijiet tranżitorji; u struzzjonijiet għall-applikazzjoni tal-istandard tekniku. L-Istandard Normattiv tan-Navigazzjoni Interna AIS 2021/3.0 jiddefinixxi r-rekwiżiti operattivi u tal-prestazzjoni, il-metodi tal-ittestjar u r-riżultati tat-testijiet meħtieġa għal tagħmir tal-AIS tan-Navigazzjoni Interna ta’ fuq il-bastiment.

(8)

Huwa xieraq li tiġi stabbilita l-pożizzjoni li għandha tittieħed f’isem l-Unjoni fi ħdan is-CESNI, billi l-istandard ES-TRIN 2021/1 ser ikun kapaċi jinfluwenza b’mod deċiżiv il-kontenut tal-liġi tal-Unjoni, jiġifieri d-Direttiva (UE) 2016/1629 tal-Parlament Ewropew u tal-Kunsill (1).L-Anness II għal dik id-Direttiva tirreferi għar-rekwiżiti tekniċi għall-inġenji bħala dawk mogħtija fl-istandard ES-TRIN 2019/1. Il-Kummissjoni għandha s-setgħa taġġorna dik ir-referenza għall-iktar verżjoni reċenti tal-istandard ES-TRIN u tistabbilixxi d-data tal-applikazzjoni tagħha.

(9)

Barra minn hekk, fil-laqgħa tagħha tat-3 ta’ Diċembru 2020, is-CCNR hija mistennija tadotta riżoluzzjoni li temenda r-Regolamenti CCNR sabiex tinkludi referenza għall-istandard ES-TRIN 2021/1 u l-Istandard Normattiv tan-Navigazzjoni Interna komplementari AIS 2021/3.0. Għalhekk, huwa xieraq ukoll li tiġi stabbilita l-pożizzjoni li għandha tittieħed f’isem l-Unjoni fi ħdan is-CCNR.

(10)

L-Unjoni la hija membru tas-CCNR u lanqas tas-CESNI. Il-pożizzjoni tal-Unjoni fi ħdan dawk il-korpi għalhekk jenħtieġ li tiġi espressa minn dawk l-Istati Membri li huma membri ta’ dawk il-korpi, li jaġixxu b’mod konġunt fl-interess tal-Unjoni,