|
Il-Ġurnal Uffiċjali |
MT Is-serje C |
|
C/2025/6668 |
11.12.2025 |
Pubblikazzjoni ta’ applikazzjoni għar-reġistrazzjoni skont l-Artikolu 15(4) tar-Regolament (UE) 2024/1143 tal-Parlament Ewropew u tal-Kunsill
(C/2025/6668)
Fi żmien 3 xhur mid-data ta’ din il-pubblikazzjoni, l-awtoritajiet ta’ Stat Membru jew ta’ pajjiż terz, jew persuna fiżika jew ġuridika li jkollha interess leġittimu u tkun stabbilita jew residenti f’pajjiż terz, tista’ tippreżenta oppożizzjoni lill-Kummissjoni f’konformità mal-Artikolu 17 tar-Regolament (UE) 2024/1143 tal-Parlament Ewropew u tal-Kunsill (1).
DOKUMENT UNIKU
Denominazzjonijiet ta’ oriġini u indikazzjonijiet ġeografiċi ta’ prodotti agrikoli
“Sapin de Noël du Morvan”
Nru tal-UE: PGI-FR-03379 – 16.12.2024
1. Isem/Ismijiet
“Sapin de Noël du Morvan”
2. Tip ta’ indikazzjoni ġeografika
DOP ☐ IĠP ☒
3. Pajjiż li għalih tappartjeni ż-żona ġeografika definita
Franza
4. Deskrizzjoni tal-prodott agrikolu
4.1. Klassifikazzjoni tal-prodott agrikolu f’konformità mal-intestatura u l-kodiċi tan-Nomenklatura Magħquda, kif imsemmi fl-Artikolu 6(1) tar-Regolament (UE) 2024/1143
06 – SIĠAR ĦAJJIN U PJANTI OĦRAJN; BASAL, GĦERUQ U BĦALHOM; FJURI MAQTUGĦIN U WERAQ ORNAMENTALI
0604 – Faxxina, friegħi u partijiet oħrajn tal-pjanti, mingħajr fjuri jew blanzuni, u ħaxix, ħażiż u likeni, li huma oġġetti adattati għall-bukketti jew għal finijiet ornamentali, friski, imnixxfin, miżbugħin, ibbliċjati, imprenjati jew ippreparati mod ieħor
4.2. Deskrizzjoni tal-prodott agrikolu li għalih japplika l-isem reġistrat
Is-“Sapin de Noël du Morvan” hija siġra ornamentali, maqtugħa jew fil-qsari, li tradizzjonalment tintuża biex iżżejjen id-djar tal-konsumaturi matul il-perjodu tal-Milied.
Is-“Sapin de Noël du Morvan” hija ppreżentata maqtugħa jew fil-qsari. Tiġi mill-ispeċi:
|
— |
Abies nordmanniana (żnuber ta’ Nordmann) |
|
— |
Abies procera (syn. nobilis) (żnuber nobbli) |
|
— |
Picea abies (abit) |
Is-“Sapin de Noël du Morvan” tissodisfa l-kriterji estetiċi li ġejjin:
|
— |
qagħda bbilanċjata u simetrika; |
|
— |
friegħi regolari u densi; |
|
— |
weraq għall-ponta ta’ kulur “aħdar skur” għall-abit u għaż-żnuber ta’ Nordmann, u “aħdar jagħti fil-blu” għaż-żnuber nobbli; |
|
— |
stat tajjeb ta’ freskezza assoċjat mat-tqaċċit jew mal-qlugħ tard. |
Id-daqs huwa bejn 40 cm u 15 m għas-siġar tal-Milied maqtugħin, u bejn 60 cm u 2 m għal dawk fil-qsari.
Is-siġar fi blokok tal-ħamrija jew dawk li jkunu ġew applikati t-trab, il-ġlata jew is-silġ fuqhom, jew li jkunu ġew ittrattati b’sustanza kuluranti, huma pprojbiti.
“Sapin de Noël du Morvan” ta’ bejn 40 cm u 3 m għandha l-karatteristiċi li ġejjin:
|
Kriterji |
Valur fil-mira |
|
Kulur |
Konsistenti mas-siġra kollha |
|
Forma |
Proporzjon ta’ wisa’/għoli bejn 0,5 u 1 |
|
Densità |
Iċ-ċrieki tal-weraq tal-friegħi u l-internodi jridu jkunu mqassma b’mod uniformi tul l-għoli kollu tas-siġra, u jkunu biżżejjed fin-numru biex jiżguraw densità tajba. |
|
Zokk ewlieni |
Zokk ewlieni wieħed fiċ-ċentru tas-siġra |
|
Rimja terminali |
Rimja terminali [il-parti ta’ fuq nett] dritta, għalkemm tista’ tkun ikkurvata jew ta’ forma irregolari sakemm il-kurva ma taqbiżx l-20° b’referenza mal-linja vertikali. It-tul ivarja minn daqs it-tul tal-friegħi taċ-ċirku tal-weraq ta’ fuq nett sad-doppju ta’ dak it-tul. |
|
Simetrija |
Dehra ġeneralment simetrika bil-friegħi mqassmin tul iz-zokk ewlieni Mill-inqas erba’ fergħat tal-istess tul f’kull ċirku tal-weraq, sakemm ma jkunx hemm numru ta’ friegħi intermedjarji bl-istess effett [viżiv] |
Għas-siġar itwal minn 3 metri u mhux itwal minn 15-il metru, is-“Sapin de Noël du Morvan” għandha l-karatteristiċi li ġejjin:
|
Kriterji |
Valur fil-mira |
|
Kulur |
Konsistenti mas-siġra kollha |
|
Forma |
Proporzjon ta’ wisa’/għoli bejn 0,4 u 0,9 |
|
Densità |
Iċ-ċrieki tal-weraq tal-friegħi u l-internodi jridu jkunu mqassma b’mod uniformi tul l-għoli kollu tas-siġra, u jkunu biżżejjed fin-numru biex jiżguraw densità tajba. |
|
Zokk ewlieni |
Zokk ewlieni wieħed fiċ-ċentru tas-siġra |
|
Simetrija |
Dehra ġeneralment simetrika bil-friegħi mqassmin tul iz-zokk ewlieni |
“Sapin de Noël du Morvan” jista’ jkollha ħsara żgħira f’post wieħed u difett żgħir wieħed.
Il-klassifikazzjoni tal-ħsara u tad-difetti bħala kbar jew żgħar hija stabbilita hawn taħt.
Għas-“Sapins de Noël du Morvan” ta’ bejn 40 cm u 3 m.
|
Kriterji |
Difetti/Ħsara |
Kbar/żgħar |
|
Il-friegħi jkollhom fuqhom likeni u/jew muski |
Ħsara |
Żgħira |
|
Il-weraq għall-ponta ma jkunux spazjati b’mod regolari |
Ħsara |
Żgħira |
|
Xi friegħi jkunu miksura jew mejta |
Ħsara |
Kbira |
|
Traċċi ta’ alka jew preżenza ta’ ħsara minuri kkawżata minn insetti jew annimali |
Ħsara |
Żgħira |
|
Biex tiġi żgurata distribuzzjoni regolari tal-friegħi u tan-nodi, l-internodi ma jistgħux ikunu aktar mid-doppju tat-tul tat-tkabbir tas-sena ta’ qabel. |
Difett |
Kbir |
|
Siġra ta’ kulur inkonsistenti |
Difett |
Żgħir |
|
Proporzjon ta’ wisa’/għoli bejn 1 u 1,33 jew bejn 0,3 u 0,5 |
Difett |
Żgħir |
|
Preżenza ta’ aktar minn zokk ewlieni wieħed |
Difett |
Kbir |
|
L-inklinazzjoni tar-rimja terminali taqbeż l-20° mill-vertikali |
Difett |
Kbir |
|
Ir-rimja terminali ma tissodisfax ir-rekwiżit għat-tul |
Difett |
Żgħir |
|
Siġra ma jkollhiex simetrija b’inqas minn erba’ fergħat f’kull ċirku tal-weraq, fejn ma jkunx hemm biżżejjed fergħat internodali biex jaħbu d-difett. |
Difett |
Kbir |
Għas-“Sapins de Noël du Morvan” ta’ aktar minn 3 m iżda mhux aktar minn 15 m
|
Kriterji |
Difetti/Ħsara |
Kbar/żgħar |
|
Siġra ta’ kulur inkonsistenti |
Difett |
Żgħir |
|
Proporzjon ta’ wisa’/għoli mhux bejn 0,4 u 0,9 |
Difett |
Kbir |
|
Preżenza ta’ aktar minn zokk ewlieni wieħed |
Difett |
Kbir |
|
Iċ-ċrieki tal-weraq tal-fergħat u l-internodi ma jkunux imqassma b’mod uniformi tul l-għoli kollu tas-siġra u ma jkunux biżżejjed fin-numru biex jiżguraw densità tajba. |
Difett |
Kbir |
|
Id-dehra ġenerali tas-siġra ma tkunx simetrika u l-friegħi ma jkunux distribwiti kif suppost tul iz-zokk ewlieni. |
Difett |
Kbir |
|
Xi friegħi jkunu miksura bħala riżultat tat-tqaċċit u tat-trasport |
Ħsara |
Żgħira |
4.3. Derogi dwar l-akkwist ta’ għalf (għal prodotti li joriġinaw mill-annimali ddeżinjati b’Denominazzjoni ta’ Oriġini Protetta biss) u restrizzjonijiet fuq l-akkwist ta’ materja prima (għal prodotti proċessati deżinjati minn Indikazzjoni Ġeografika Protetta biss)
__
4.4. Passi speċifiċi fil-produzzjoni li jridu jsiru fiż-żona ġeografika definita
L-azzjonijiet relatati mal-produzzjoni tas-siġar tal-Milied bit-tikketta tal-IĠP (it-tħawwil, il-kultivazzjoni, l-immarkar, it-tqaċċit jew il-qlugħ) isiru fiż-żona ġeografika tal-IĠP.
4.5. Regoli speċifiċi dwar l-imballaġġ, it-tfettit, it-taħkik, eċċ. tal-prodott agrikolu li għalih jirreferi l-isem reġistrat
L-imballaġġ irid isir fiż-żona ġeografika sabiex tiġi evitata ħsara lill-prodott matul id-dispaċċ, u b’hekk jinżamm fi stat mingħajr ħsara. Tabilħaqq, l-imballaġġ jagħmilha possibbli li l-friegħi jiġu rranġati tul iz-zokk ewlieni, u b’hekk jiġi evitat li dawn jitħabblu u jitħassru (ksur, telf tal-weraq għall-ponta) matul it-trasport.
4.6. Regoli speċifiċi dwar it-tikkettar tal-prodott agrikolu li għalih jirreferi l-isem reġistrat
Is-“Sapins de Noël du Morvan” huma identifikati b’tikketta li tinkludi:
|
— |
referenza għall-IĠP “Sapin de Noël du Morvan” |
|
— |
id-dettalji ta’ kuntatt tal-korp tal-kwalità Excellence Végétale |
|
— |
l-isem tal-ispeċi mqiegħda fis-suq (l-isem komuni u dak Latin) |
|
— |
referenza għall-identità tal-produttur |
|
— |
it-tul tas-siġra |
5. Definizzjoni qasira taż-żona ġeografika
Muniċipalitajiet fid-dipartimenti li ġejjin:
Côte-d’Or
Aisy-sous-Thil, Bard-le-Régulier, Blanot, Brazey-en-Morvan, Champeau-en-Morvan, Dompierre-en-Morvan, Juillenay, Lacour-d'Arcenay, Liernais, Ménessaire, Molphey, (La) Motte-Ternant, Montigny-Saint-Barthemy, Montlay-en-Auxois, Précy-sous-Thil, (La) Roche-en-Brenil, Rouvray, Saint-Andeux, Saint-Didier, Saint-Germain de Modéon, Saint-Martin-de-la-Mer, Saulieu, Savilly, Sincey-les-Rouvray, Thoisy-la-Berchère, Vianges, Vic-sous-Thil, Villargoix u Villiers-en-Morvan.
Nièvre
Alligny-en-Morvan, Arleuf, Avrée, Bazoches, Blismes, Brassy, Cervon, Chalaux, Château-Chinon (Campagne), Château-Chinon (Ville), Châtin, Chaumard, Chiddes, Corancy, Dommartin, Dun-les-Places, Dun-sur-Grandry, Empury, Fâchin, Fléty, Gâcogne, Gien-sur-Cure, Glux-en-Glenne, Gouloux, Larochemillay, Lavault-de-Frétoy, Lormes, Luzy, Marigny-l'Église, Mhère, Millay, Montigny-en-Morvan, Montreuillon, Montsauche-les-Settons, Moulins-Engilbert, Mouron-sur-Yonne, Moux-en-Morvan, Onlay, Ouroux-en-Morvan, Planchez, Poil, Pouques-Lormes, Préporché, Saint-Agnan, Saint-André-en-Morvan, Saint-Brisson, Saint-Hilaire-en-Morvan, Saint-Honoré-Les-Bains, Saint-Léger-de-Fougeret, Saint-Martin-du-Puy, Saint-Péreuse, Sémelay, Sermages, Vauclaix u Villapourçon.
Saône-et-Loire
Anost, Autun, Barnay, Brion, Broye, (La) Celle-en-Morvan, (La) Chapelle-Sous-Uchon, Charbonnat, Chissey en Morvan, (La) Comelle, Cussy en Morvan, Dettey, Étang-sur-Arroux, (La) Grande-Verrière, Laizy, Lucenay-l'Évêque, Mesvres, (La) Petite-Verrière, Roussillon-en-Morvan, Saint-Didier-sur-Arroux, Saint-Léger-sous-Beuvray, Saint-Nizier-sur-Arroux, Saint-Prix, Sommant, (La) Tagnière, Thil-sur-Arroux u Uchon.
Yonne
Avallon, Beauvilliers, Bussières, Chastellux-sur-Cure, Cussy-les-Forges, Domecy-sur-Cure, Island, Magny, Pontaubert, Quarré-les-Tombes, Saint-Brancher, Saint-Germain-des-Champs, Saint-Léger-Vauban u Sainte-Magnance.
6. Rabta maż-żona ġeografika
Fatturi naturali
Ir-rabta bejn is-“Sapin de Noël du Morvan” u ż-żona ġeografika hija bbażata fuq il-kwalità speċifika tagħha marbuta maż-żona
Id-demarkazzjoni taż-żona ġeografika tas-“Sapin de Noël du Morvan” hija bbażata fuq kriterji relatati mal-ħamrija, mal-klima u mal-istorja. Iż-żona hija l-massif tal-granit tal-Morvan, jiġifieri n-naħa tat-Tramuntana tal-Massif Central. L-elevazzjoni tar-reġjun tiżdied gradwalment mit-Tramuntana għan-Nofsinhar, u tilħaq il-quċċata f’Haut Folin, l-ogħla punt fil-Morvan, b’901 metru. L-elevazzjoni medja hija ta’ 600 metru.
Il-formazzjoni kurrenti tal-ħamrija hija marbuta mal-iżvilupp ta’ ħamrija aċiduża kannella fuq ramel granitiku. Din il-ħamrija hija fqira f’termini agrikoli u għandha l-karatteristiċi li ġejjin:
|
— |
sawra ta’ trab tafli ramli ġulġlieni |
|
— |
aċiduża, pH: 4 sa 5 |
|
— |
defiċjenzi kimiċi sinifikanti ta’ aċidu fosforiku u ta’ katjoni |
|
— |
kapaċità għolja ta’ skambju fil-wiċċ ta’ 20 mg/100 g, li tonqos malajr aktar ma jiżdied il-fond, u taqa’ għal ftit milliekwivalenti fis-saff ramli |
|
— |
riżerva tal-ilma ta’ aktar minn 1 mm ilma għal kull ċentimetru ħamrija. |
Il-Morvan għandha “xitwa twila u ħarxa, rebbiegħa li tibda tard u sajf sħun iżda qasir” (Sirugue (2008), Le Morvan, inventaire cartographique des paysages et du patrimoine naturel [Il-Morvan, l-immappjar tal-pajsaġġi u tal-wirt naturali]). Ikun hemm varjazzjoni sinifikanti bejn sena u oħra. L-ammont ta’ xita hu għoli, b’temperaturi moderati u b’riskji frekwenti ta’ ġlata.
Il-preċipitazzjoni fil-Morvan tista’ tirdoppja minn sena għall-oħra. Bħala l-ewwel żona elevata li kapaċi timblokka s-sħab milli jgħaddi mill-kosta tal-Atlantiku, il-Morvan tirċievi medja ta’ 1 000 mm preċipitazzjoni fis-sena, imqassma fuq 200 jum.
Il-preċipitazzjoni tiżdied mal-elevazzjoni: minn medja ta’ 800 mm/sena f’elevazzjoni ta’ bejn 300 u 400 metru, taqbeż l-1 600 mm/sena f’elevazzjoni ogħla minn 900 metru. Id-distribuzzjoni staġunali tagħha hija mmarkata wkoll, bi staġun aktar xott minn Marzu sa Ottubru, u staġun aktar imxarrab minn Novembru sa Frar.
It-temperaturi medji huma moderati, minħabba l-influwenzi marittimi. Dawn ivarjaw minn –2 °C sa +4 °C fix-xitwa, u minn +10 °C sa +25 °C fis-sajf. Madankollu, dawn il-medji jaħbu meded wisgħin, li xi kultant jaqbżu l-20 °C f’ġurnata waħda. Il-ġlata xi kultant tkun intensa u frekwenti ħafna, b’medja ta’ 100 jum ta’ ġlata fis-sena. Ma huwiex rari li f’Awwissu jiġu rreġistrati temperaturi kemxejn taħt il-punt tal-iffriżar fil-qigħan tal-wied.
Fatturi umani
L-idea tas-“siġra tal-Milied” storikament ġejja mill-kultura tal-Protestanti, speċjalment fil-Ġermanja u fl-Iskandinavja, fejn diġà kienet mifruxa fis-seklu 16. Fi Franza, din it-tradizzjoni żviluppat wara t-Tieni Gwerra Dinjija u l-okkupazzjoni Ġermaniża, b’mod partikolari f’Pariġi. Minħabba r-rabtiet kummerċjali mill-qrib tagħha mal-belt kapitali permezz tat-trasport fuq ix-xmajjar, il-Morvan gawdiet minn din id-domanda l-ġdida fi żmien meta s-siġar kienu qed jiġu prodotti fi żmien li altrimenti kien diffiċli għall-agrikoltura. Is-siġar tal-abit mid-deforestazzjoni kienu jintbagħtu fis-suq ta’ Pariġi.
Id-domanda żdiedet malajr ħafna, u s-siġar miġjuba mid-deforestazzjoni ma kinux qed ilaħħqu mad-domanda. Il-kultivazzjoni tas-siġra tal-Milied, kif nafuha llum, bdiet f’dak iż-żmien u żviluppat malajr. Aktar u aktar sidien ta’ rqajja’ tal-foresti ħadu vantaġġ minn din l-opportunità, jew biex jissupplimentaw sorsi oħra ta’ introjtu, jew bħala l-attività ewlenija tagħhom. Il-bdiewa fil-Morvan iddiversifikaw ukoll l-attività tagħhom u bdew jipproduċu siġar tal-Milied fuq l-aktar biċċiet raba’ diffiċli tagħhom, li kienu adattati għat-tkabbir tas-siġar tal-Milied.
Tul, f’xi każijiet, ħames ġenerazzjonijiet ta’ produtturi, it-tekniki tal-kultivazzjoni tjiebu gradwalment. Akkumula għarfien prattiku ġenwin u dan ingħadda minn ġenerazzjoni għal oħra. L-istadji kollha tal-produzzjoni tas-siġar tal-Milied, l-ewwel fosthom it-tħawwil, isiru fil-Morvan. Xi mxietel speċjalizzaw ukoll fil-produzzjoni ta’ pjanti żgħar, għalkemm, sal-lum, għadu ma huwiex possibbli li l-produtturi fiż-żona jkunu kompletament awtonomi. Ġie stabbilit settur sħiħ, u ħafna intrapriżi huma bbażati fuq il-produzzjoni tas-siġar tal-Milied, eż. il-manifatturi ta’ stands tal-injam, il-fornituri tal-inputs, il-magni, eċċ.
Speċifiċità tal-prodott
Is-“Sapin de Noël du Morvan” hija kkaratterizzata minn:
|
— |
qagħda bbilanċjata u simetrika b’zokk ewlieni wieħed u dritt; |
|
— |
friegħi regolari u densi b’rimja terminali dritta u proporzjonata; |
|
— |
kulur konsistenti tul is-siġra kollha: aħdar skur għall-abit u għaż-żnuber ta’ Nordmann, u aħdar jagħti fil-blu għaż-żnuber nobbli; |
|
— |
stat tajjeb ta’ freskezza u żamma tajba tal-weraq għall-ponta wara t-tqaċċit. |
Rabta kawżali
Is-sitwazzjoni ġeografika tal-għoljiet tal-Morvan, bil-ħamrija u bil-klima, tipprovdi lis-siġar b’kundizzjonijiet tat-tkabbir ideali. Il-produtturi ilhom ikabbru s-siġar tal-Milied għal kważi seklu fuq dan il-massif tal-granit ta’ Bourgogne. L-għarfien prattiku tagħhom, flimkien mal-konfigurazzjoni ġeografika, jippermetti l-produzzjoni ta’ siġar ta’ kwalità għolja. L-għarfien prattiku tal-produtturi huwa rifless fl-operazzjonijiet ta’ żbir matul il-ħajja tas-siġar: it-tneħħija ta’ rimjiet terminali doppji, it-traqqiq fil-bażi, iż-żieda fid-densità permezz ta’ żbir laterali tas-siġar, jew saħansitra tneħħija tar-raħs. Hija wkoll l-għajn imħarrġa tal-produttur li tagħżel is-siġar bl-immarkar individwali.
L-implimentazzjoni ta’ prattiki ekoloġiċi hija wkoll kunsiderazzjoni għall-produtturi bħala riżultat tal-post tagħhom fil-Park Naturali Reġjonali tal-Morvan. Sabiex tiġi ppreżervata l-ekosistema tal-Morvan, u speċjalment il-ħamrija, is-siġar fil-blokok tal-ħamrija huma pprojbiti. Dan sabiex jiġu evitati t-tneħħija u t-tfaqqir tal-ħamrija fil-Morvan. Jintuża l-kompost għall-produzzjoni tas-siġar fil-qsari. Barra minn hekk, dan l-ambjent ġeografiku jiffavorixxi l-produzzjoni ta’ siġar kbar ħafna. Żviluppat ġabra ta’ għarfien relatata dwar il-ġestjoni tas-siġar, li wasslet għall-istabbiliment ta’ rqajja’ għall-produzzjoni ta’ siġar kbar ħafna. Tul is-snin, u bl-operazzjonijiet tat-tqaċċit, il-produtturi jagħżlu s-siġar li jsiru kbar ħafna.
Is-siġar jikbru b’rata moderata minħabba l-ħamrija relattivament fqira. Is-siġar prodotti huma konsistenti, bi ċrieki tal-weraq spazjati qrib xulxin. Id-densità tista’ tiżdied bit-tekniki ta’ żbir xierqa. Il-kwalità tas-“Sapins de Noël du Morvan” hija dovuta b’mod speċjali għar-reżistenza tagħhom.
Ir-reżistenza tagħhom għall-ġlata hija mekkaniżmu ta’ akklimatizzazzjoni kkawżat mill-jiem li jiqsaru u mit-tnaqqis fit-temperaturi fil-ħarifa: taħt il-5 °C. Din tintensifika meta t-temperaturi jaqgħu ftit taħt iż-żero. Dan il-fenomenu jibbenefika ħafna mill-kundizzjonijiet klimatiċi ħorox li huma tipiċi tal-Morvan.
Dawn il-kundizzjonijiet iwasslu biex is-siġar jidħlu fi stat ta’ raqda fi stadju bikri ħafna, qabel ma jitqaċċtu. Dan l-istat ta’ raqda għandu impatt partikolarment ta’ benefiċċju fuq iż-żamma tal-weraq għall-ponta u tal-kulur maż-żmien. It-tqaċċit jew il-qlugħ tard tas-siġar jippermetti wkoll li jinżamm dan l-istat ta’ freskezza.
Illum, il-Morvan hija l-akbar reġjun ta’ produtturi fi Franza b’1 500 ettaru ta’ pjantaġġuni. Jiġu prodotti madwar 1,2 miljun siġra tal-Milied kull sena minn madwar 100 produttur li żviluppaw għarfien prattiku eċċellenti u sinerġija unika billi għaqqdu r-riżorsi tagħhom.
Ekonomikament, din l-attività hija essenzjali għal din iż-żona rurali żvantaġġata. Il-wirja tas-siġar Sapin Expo ssir kull 4 snin f’Saulieu, f’Ġunju. Illum saret laqgħa mhux ta’ min jitlifha għall-professjonisti kollha mis-settur tas-siġar tal-Milied, mill-Morvan u lil hinn minnha.
Is-“Sapin de Noël du Morvan” saret simbolu b’saħħtu tar-reġjun. Is-“Sapins de Noël du Morvan” iżejnu l-aktar siti prestiġjużi f’Pariġi, bħas-Senat u l-Opra ta’ Pariġi. Għal ħafna snin, l-Assoċjazzjoni Franċiża tas-Siġar tal-Milied Naturali (AFSNN, Association Française du Sapin de Noël Naturel) ippreżentat siġra taż-żnuber ta’ Nordmann biex iżżejjen il-ġardina interna ewlenija tal-Palazz tal-Elysée, bħala ambaxxatriċi kburija tal-Morvan.
Referenza għall-pubblikazzjoni tal-ispeċifikazzjoni tal-prodott tal-indikazzjoni ġeografika:
https://extranet.inao.gouv.fr/fichier/CDCSapinNoelMorvan-250702.pdf
(1) Ir-Regolament (UE) 2024/1143 tal-Parlament Ewropew u tal-Kunsill tal-11 ta’ April 2024 dwar indikazzjonijiet ġeografiċi għall-inbid, ix-xorb spirituż u l-prodotti agrikoli, kif ukoll l-ispeċjalitajiet tradizzjonali garantiti u t-termini tal-kwalità mhux obbligatorji għall-prodotti agrikoli, li jemenda r-Regolamenti (UE) Nru 1308/2013, (UE) 2019/787 u (UE) 2019/1753 u li jħassar ir-Regolament (UE) Nru 1151/2012 (ĠU L, 2024/1143, 23.4.2024, ELI: http://data.europa.eu/eli/reg/2024/1143/oj).
ELI: http://data.europa.eu/eli/C/2025/6668/oj
ISSN 1977-0987 (electronic edition)