(1)

Ir-Regolament (UE) 2016/2031 jirrikjedi li l-Istati Membri, il-portijiet marittimi, l-ajruporti u l-operaturi tat-trasport internazzjonali jqiegħdu għad-dispożizzjoni tal-passiġġieri l-informazzjoni dwar il-projbizzjonijiet u r-rekwiżiti fir-rigward tal-introduzzjoni ta’ pjanti, prodotti mill-pjanti u oġġetti oħra fit-territorju tal-Unjoni.

(2)

L-operaturi tas-servizzi postali u l-operaturi professjonisti involuti fil-bejgħ permezz ta’ kuntratti mill-bogħod iridu wkoll iqiegħdu dik l-informazzjoni għad-dispożizzjoni tal-klijenti tagħhom.

(3)

Jenħtieġ li l-informazzjoni tiġi ppreżentata b’mod ċar u li tinftiehem mill-ewwel. Din l-informazzjoni jenħtieġ li tirrappreżenta b’mod viżwali dawn l-oġġetti pprojbiti li jġorru l-passiġġieri: il-pjanti għat-tħawwil, il-fjuri maqtugħa, il-frott u l-ħxejjex.

(4)

Għall-fini ta’ ċarezza, jenħtieġ li din l-informazzjoni tinkludi wkoll messaġġ dwar l-aktar regoli u rekwiżiti importanti fir-rigward tal-introduzzjoni ta’ pjanti, prodotti mill-pjanti u oġġetti oħra fit-territorju tal-Unjoni. Jenħtieġ li dak il-messaġġ ikun fih informazzjoni dwar il-frott li huwa eżentat mir-rekwiżit għal ċertifikat fitosanitarju, skont l-Artikolu 73 tar-Regolament (UE) 2016/2031, il-pajjiżi terzi li minnhom mhux meħtieġ ċertifikat fitosanitarju u t-territorji tal-Unjoni li minnhom huwa meħtieġ dak iċ-ċertifikat.

(5)

Jenħtieġ li dik l-informazzjoni tkun disponibbli fil-punti kollha tad-dħul fl-Unjoni jew fuq il-mezzi tat-trasport li jkunu deħlin fl-Unjoni. Jenħtieġ li l-Istati Membri jkunu liberi wkoll li jagħżlu punti addizzjonali, bħall-punti tat-tluq mill-Unjoni lejn pajjiżi terzi, sabiex din l-informazzjoni tkun aċċessibbli fi żmien xieraq għall-passiġġieri li aktar tard ikunu se jirritornaw minn dawk il-pajjiżi lejn l-Unjoni.

(6)

Dan ir-Regolament jenħtieġ li jidħol fis-seħħ fit-tielet jum wara l-pubblikazzjoni tiegħu, sabiex ikun żgurat li l-passiġġieri, kif ukoll il-klijenti tas-servizzi postali u l-operaturi professjonisti involuti fil-bejgħ permezz ta’ kuntatti mill-bogħod, ikunu infurmati kemm jista’ jkun malajr dwar l-applikazzjoni tar-regoli l-ġodda.

(7)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,