ANNESS

KUNDIZZJONIJIET LI JIRREGOLAW L-ATTIVITAJIET TAS-SAJD TAL-BASTIMENTI TAL-UNJONI FIŻ-ŻONA TAS-SAJD TAL-GUINEA-BISSAU

KAPITOLU I

DISPOŻIZZJONIJIET ĠENERALI

1.   Ħatra tal-awtorità kompetenti

Għall-finijiet ta’ dan l-Anness u dment li ma jkunx speċifikat mod ieħor, kwalunkwe referenza għall-Unjoni jew għall-Guinea-Bissau bħala awtorità kompetenti għandha tfisser:

(a)	għall-Unjoni: il-Kummissjoni Ewropea, jekk ikun meħtieġ permezz tad-delegazzjoni tal-Unjoni fil-Guinea-Bissau,

(b)	għall-Guinea-Bissau: id-dipartiment tal-gvern responsabbli mis-sajd.

2.   Żona tas-sajd awtorizzata

Iż-żona tas-sajd awtorizzata li fiha l-bastimenti tal-Unjoni huma awtorizzati jistadu għandha tikkorrispondi għaż-żona tas-sajd tal-Guinea-Bissau, fosthom dik il-parti li tikkorrispondi għaż-żona komuni ta’ bejn il-Guinea-Bissau u s-Senegal, f’konformità mal-leġiżlazzjoni tal-Guinea-Bissau u mal-konvenzjonijiet internazzjonali applikabbli li l-Guinea-Bissau hija Parti għalihom.

Il-linji bażi għandhom jiġu ddefiniti mil-leġiżlazzjoni nazzjonali.

3.   Ħatra ta’ aġent lokali

Minbarra l-bastimenti għat-tonn, kwalunkwe bastiment tal-Unjoni li jkun jixtieq jikseb awtorizzazzjoni tas-sajd skont dan il-Protokoll irid ikun rrappreżentati minn aġent li jkun residenti fil-Guinea-Bissau.

4.   Kont bankarju

Qabel id-dħul fis-seħħ ta’ dan il-Protokoll, il-Guinea-Bissau għandha tgħaddi lill-Unjoni d-dettalji tal-kont jew tal-kontijiet bankarji li fihom għandhom jitħallsu l-ammonti ta’ flus li l-bastimenti tal-Unjoni għandhom iħallsu skont il-Ftehim. L-ammonti dovuti b’rabta mat-trasferimenti bankarji għandhom iħallsuhom is-sidien tal-bastimenti.

5.   Punti fokali

Il-Partijiet għandhom jgħarrfu lil xulxin dwar il-punti fokali rispettivi tagħhom li jippermettu li tiġi skambjata l-informazzjoni dwar l-implimentazzjoni ta’ dan il-Protokoll, b’mod partikolari dwar il-kwistjonijiet marbuta mal-iskambju tad-data aggregata rigward il-qabdiet u l-isforz tas-sajd, dwar il-proċeduri marbuta mal-awtorizzazzjonijiet tas-sajd u mal-qabdiet u dwar l-implimentazzjoni tal-appoġġ settorjali.

KAPITOLU II

AWTORIZZAZZJONIJIET TAS-SAJD

TAQSIMA 1

PROĊEDURI APPLIKABBLI

1.   Kundizzjoni biex tinkiseb awtorizzazzjoni tas-sajd – bastimenti eliġibbli

L-awtorizzazzjonijiet tas-sajd imsemmija fl-Artikolu 6 tal-Ftehim għandhom jinħarġu bil-kundizzjoni li l-bastiment ikun imniżżel fir-reġistru tal-bastimenti tas-sajd tal-Unjoni u li dan ikun konformi mad-dispożizzjonijiet tar-Regolament (UE) 2017/2403 tal-Parlament Ewropew u tal-Kunsill (1). Iridu jkunu ntlaħqu l-obbligi preċedenti kollha ta’ sid il-bastiment, tal-kaptan jew tal-bastiment innifsu li jinħolqu mill-attivitajiet tas-sajd tagħhom fil-Guinea-Bissau skont il-Ftehim.

2.   Talba għal awtorizzazzjoni tas-sajd

L-Unjoni għandha tippreżenta lill-Guinea-Bissau, b’mod elettroniku, applikazzjoni għal kull bastiment li għandu jiġi awtorizzat mill-inqas 40 jum tax-xogħol qabel id-data li fiha għandhom jibdew l-operazzjonijiet, billi tuża l-formola li tinsab fl-Appendiċi I għal dan l-Anness.

L-applikazzjonijiet għall-awtorizzazzjonijiet tas-sajd u n-notifika dwar jekk ġewx aċċettati għandhom jintbagħtu b’mod elettroniku permezz tas-sistema LICENCE, jiġifieri s-sistema elettronika u sigura għall-ġestjoni tal-awtorizzazzjonijiet tas-sajd magħmula disponibbli mill-Kummissjoni Ewropea.

Sakemm is-sistema LICENCE tibda taħdem kompletament, l-Unjoni se tkompli tippreżenta applikazzjoni lill-Guinea-Bissau b’mod uffiċjali għal kull bastiment li għandu jiġi awtorizzat. Il-Kumitat Konġunt se jiddeċiedi dwar it-tranżizzjoni lejn l-użu tas-sistema LICENCE.

Għal kull talba inizjali għal awtorizzazzjoni tas-sajd skont dan il-Protokoll jew wara li l-bastiment ikkonċernat issirlu bidla teknika, flimkien mat-talba għandu jintbagħat dan li ġej:

(a)	il-prova tal-ħlas tal-imposta b’rata fissa għall-perjodu ta’ validità tal-awtorizzazzjoni tas-sajd mitluba;

(b)	l-isem u l-indirizz tal-aġent lokali tal-bastiment, jekk ikun hemm wieħed;

(c)	għall-bastimenti tat-tkarkir, il-prova tal-ħlas bil-quddiem tal-kontribuzzjoni b’rata fissa għall-kostijiet marbuta mal-osservatur;

(d)	fil-każ tal-bastimenti tat-tkarkir, iċ-ċertifikat tat-tunnellaġġ tal-bastiment, maħruġ mill-Istat tal-bandiera.

Għat-tiġdid ta’ awtorizzazzjoni tas-sajd skont dan il-Protokoll għal bastiment li l-karatteristiċi tekniċi tiegħu ma jkunux inbidlu, it-talba għat-tiġdid għandha tkun akkumpanjata biss mill-prova tal-ħlas tal-imposta u, jekk ikun il-każ, mill-prova tal-ħlas tal-kontribuzzjoni b’rata fissa għall-kostijiet marbuta mal-osservatur.

3.   Ħruġ tal-awtorizzazzjoni tas-sajd

Il-Guinea-Bissau għandha toħroġ l-awtorizzazzjoni oriġinali tas-sajd f’perjodu massimu ta’ 25 jum minn meta tirċievi l-fajl tal-applikazzjoni komplut u mill-inqas 15-il jum qabel jibda l-perjodu tas-sajd. Din l-awtorizzazzjoni għandha tintbagħat lis-sidien tal-bastimenti:

(a)	fil-każ tal-bastimenti tat-tkarkir, permezz tal-aġenti, flimkien ma’ kopja skennjata li għandha tintbagħat lill-Unjoni; u

(b)	fil-każ tal-bastimenti għat-tonn, permezz tad-delegazzjoni tal-Unjoni fil-Guinea-Bissau; jekk id-delegazzjoni tkun magħluqa, il-Guinea-Bissau tista’ tibgħat l-awtorizzazzjoni tas-sajd direttament lil sid il-bastiment, jew lill-aġent tiegħu, u tibgħat kopja lill-Unjoni.

Fil-każ tal-bastimenti għat-tonn, l-awtorità kompetenti għandha tibgħat minnufih, b’mod elettroniku, kopja ta’ din l-awtorizzazzjoni tas-sajd lil sid il-bastiment, u, jekk ikun il-każ, lill-aġent lokali tiegħu. Dik il-kopja ma għandhiex tibqa’ valida malli tasal l-awtorizzazzjoni oriġinali tas-sajd. Dik il-kopja, li għandha tinżamm abbord il-bastimenti, għandha tkun valida għal perjodu ta’ 40 jum li matulu għandha titqies li hija ekwivalenti għall-awtorizzazzjoni oriġinali.

Ladarba l-għodda LICENCE tibda taħdem, il-Guinea-Bissau se tindika li l-applikazzjoni ġiet aċċettata u ttella’ fis-sistema LICENCE kopja elettronika ffirmata tal-liċenzja oriġinali. Sadanittant, il-Guinea-Bissau għandha tibgħat lill-Unjoni, permezz ta’ email, kopja skennjata tal-liċenzji maħruġa.

4.   Ħsarat fis-sistema LICENCE

Meta jinqalgħu xi diffikultajiet fit-trażmissjoni tal-informazzjoni fis-sistema LICENCE bejn il-Kummissjoni Ewropea u l-Guinea-Bissau, sakemm is-sistema terġa’ tibda taħdem l-iskambji elettroniċi tal-liċenzji tas-sajd għandhom isiru permezz tal-kanali uffiċjali.

Wara li s-sistema terġa’ tibda taħdem bħas-soltu, l-informazzjoni għandha tiġi aġġornata fis-sistema LICENCE minn kull Parti.

5.   Lista tal-bastimenti li huma awtorizzati jistadu

Malli toħroġ l-awtorizzazzjoni tas-sajd, il-Guinea-Bissau għandha tistabbilixxi minnufih, għal kull kategorija ta’ bastimenti, il-lista finali tal-bastimenti li huma awtorizzati jistadu fiż-żona tas-sajd tagħha. Din il-lista għandha tintbagħat minnufih lill-awtorità nazzjonali responsabbli mill-kontroll tas-sajd u lill-Unjoni b’mod elettroniku.

6.   Durata tal-validità tal-awtorizzazzjoni tas-sajd

L-awtorizzazzjonijiet tas-sajd għandhom jiġu stabbiliti għal perjodu ta’ 3 xhur, ta’ 6 xhur jew ta’ sena. Sabiex jiġi stabbilit il-bidu tal-perjodu ta’ validità, “perjodu ta’ sena” għandu jfisser dan li ġej:

(a)	għall-ewwel sena ta’ applikazzjoni ta’ dan il-Protokoll, il-perjodu bejn id-data tal-applikazzjoni provviżorja tiegħu u l-31 ta’ Diċembru tal-istess sena;

(b)	fis-snin ta’ wara, kull sena kalendarja sħiħa;

(c)	għall-aħħar sena tal-applikazzjoni ta’ dan il-Protokoll, il-perjodu bejn l-1 ta’ Jannar u d-data tal-iskadenza ta’ dan il-Protokoll.

Perjodu ta’ validità ta’ 3 xhur jew ta’ 6 xhur għandu jibda fl-ewwel tax-xahar ta’ kull xahar. Madankollu, l-awtorizzazzjonijiet tas-sajd ma jistgħux jibqgħu validi wara l-31 ta’ Diċembru tas-sena li jinħarġu fiha.

7.   Żamma abbord tal-awtorizzazzjoni tas-sajd

L-awtorizzazzjoni tas-sajd trid tinżamm dejjem abbord il-bastiment.

Madankollu, il-bastimenti għat-tonn għandhom jiġu awtorizzati jistadu malli jiddaħħlu fil-lista provviżorja. Tali bastimenti jridu dejjem iżommu abbord il-lista provviżorja sakemm tinħarġilhom l-awtorizzazzjoni tas-sajd tagħhom.

8.   Trasferiment tal-awtorizzazzjoni tas-sajd

L-awtorizzazzjoni tas-sajd għandha tinħareġ għal bastiment partikolari u ma tistax tiġi ttrasferita.

Madankollu, f’każ ta’ forza maġġuri u fuq talba tal-Unjoni, l-awtorizzazzjoni tas-sajd għandha tinbidel b’awtorizzazzjoni ġdida maħruġa f’isem bastiment ieħor li jkun simili għal dak li għandu jinbidel.

It-trasferiment għandu jsir billi sid il-bastiment jew l-aġent tiegħu jagħti lura lill-Guinea-Bissau l-awtorizzazzjoni tas-sajd li għandha tiġi sostitwita, u billi l-Guinea-Bissau tistabbilixxi minnufih l-awtorizzazzjoni ta’ sostituzzjoni. L-awtorizzazzjoni ta’ sostituzzjoni għandha tingħata minnufih lil sid il-bastiment jew lill-aġent tiegħu hekk kif tingħata lura l-awtorizzazzjoni li għandha tiġi sostitwita, ladarba ssir l-ispezzjoni teknika f’konformità mal-punt 10. L-awtorizzazzjoni ta’ sostituzzjoni għandha tibda tgħodd dakinhar li tingħata lura l-awtorizzazzjoni li għandha tiġi sostitwita.

Fil-każ tal-bastimenti tat-tkarkir, jekk it-tunnellaġġ tal-bastiment ta’ sostituzzjoni jkun ikbar minn dak tal-bastiment sostitwit, l-imposta addizzjonali għandha tiġi kkalkulata b’mod proporzjonat għad-differenza fit-tunnellaġġ u għall-perjodu ta’ validità li jkun għad fadal. Sid il-bastiment għandu jħallas dik l-imposta addizzjonali hekk kif tiġi ttrasferita l-awtorizzazzjoni tas-sajd.

Il-Guinea-Bissau għandha taġġorna minnufih il-lista tal-bastimenti li huma awtorizzati jistadu. Il-lista l-ġdida għandha titgħadda minnufih lill-awtorità nazzjonali responsabbli mill-kontroll tas-sajd u lill-Unjoni.

Il-Partijiet għandhom jaġġornaw l-informazzjoni fis-sistema LICENCE.

9.   Bastimenti ta’ appoġġ

Fuq talba tal-Unjoni, il-Guinea-Bissau għandha tawtorizza lill-bastimenti tal-Unjoni li jkollhom awtorizzazzjoni tas-sajd jiġu megħjuna minn bastimenti ta’ appoġġ. Il-bastimenti ta’ appoġġ għandhom itajru l-bandiera ta’ Stat Membru tal-Unjoni jew ikunu ta’ kumpanija tal-Unjoni, u ma jistgħux ikunu mgħammra għas-sajd.

Il-Guinea-Bissau għandha tistabbilixxi l-lista tal-bastimenti ta’ appoġġ awtorizzati u tgħaddiha minnufih lill-awtorità nazzjonali responsabbli mill-kontroll tas-sajd u lill-Unjoni.

Il-Partijiet għandhom jaġġornaw l-informazzjoni fis-sistema LICENCE.

Għal dan l-għan, il-bastimenti ta’ appoġġ irid ikollhom awtorizzazzjoni maħruġa skont il-liġi tal-Guinea-Bissau u għandhom iħallsu imposta annwali.

10.   Spezzjoni teknika tal-bastimenti tat-tkarkir

Darba fis-sena jew wara li jinbidel it-tunnellaġġ tal-bastiment, jew meta l-użu ta’ rkaptu ieħor tas-sajd iwassal għal bidla fil-kategorija tas-sajd, kull bastiment tat-tkarkir tal-Unjoni għandu jidħol fil-port ta’ Bissau biex issirlu spezzjoni teknika, f’konformità mal-leġiżlazzjoni tal-Guinea-Bissau li tkun fis-seħħ.

L-għan tal-ispezzjoni teknika huwa li tivverifika l-konformità tal-karatteristiċi tekniċi tal-bastiment u tal-irkaptu tas-sajd li jkun hemm abbord, kif ukoll il-ħarsien tar-regoli sanitarji u tar-regoli marbutin mal-imbark tal-baħrin nazzjonali.

Il-Guinea-Bissau hija obbligata twettaq l-ispezzjoni teknika f’massimu ta’ 48 siegħa minn meta l-bastiment tat-tkarkir jasal fil-port, dejjem jekk tkun ġiet avżata minn qabel dwar il-wasla tiegħu.

Wara l-ispezzjoni teknika, il-Guinea-Bissau għandha tagħti ċertifikat tal-konformità lill-kaptan tal-bastiment minnufih.

Iċ-ċertifikat tal-konformità għandu jkun validu għal sena. Madankollu, għandu jkun meħtieġ ċertifikat tal-konformità ġdid f’każ ta’ kwalunkwe bidla fl-attivitajiet tas-sajd mill-kategorija tas-sajd għall-gambli jew lejn din il-kategorija. Barra minn hekk, f’każ li l-bastiment joħroġ miż-żona tas-sajd tal-Guinea-Bissau għal iktar minn 45 jum, ikun meħtieġ ta’ ċertifikat tal-konformità ġdid.

Iċ-ċertifikat tal-konformità għandu jinżamm dejjem abbord il-bastiment.

Il-kostijiet marbutin mal-ispezzjoni teknika għandu jħallashom sid il-bastiment u għandhom ikunu jikkorrispondu għall-ammont stabbilit skont l-iskala li tinsab fil-leġiżlazzjoni tal-Guinea-Bissau. Dawn il-kostijiet ma jistgħux jaqbżu l-ammonti li jħallsu l-bastimenti nazzjonali jew il-bastimenti li jtajru l-bandiera ta’ Stat terz għall-istess servizzi.

TAQSIMA 2

IMPOSTI U ĦLASIJIET BIL-QUDDIEM

L-ammont tal-imposta b’rata fissa huwa stabbilit għal kull kategorija ta’ bastimenti fl-iskedi tekniċi fl-Appendiċi 2 ta’ dan l-Anness. Dan jinkludi t-taxxi nazzjonali u lokali kollha, minbarra t-taxxi tal-port, il-kostijiet relatati mal-forniment tas-servizzi u t-taxxa tal-boll applikabbli għall-ammonti tat-tariffi tal-liċenzji.

Ir-regolamenti dwar it-taxxa tal-boll fis-seħħ fil-mument tal-iffirmar tal-Protokoll għandhom jiddeterminaw ir-rata applikabbli għal-liċenzji, li għandha tibqa’ fissa għad-durata tal-Protokoll.

Meta l-awtorizzazzjoni tas-sajd tkun valida għal inqas minn sena, l-ammont tal-imposta b’rata fissa għandu jiġi aġġustat b’mod proporzjonat għall-perjodu ta’ validità mitlub. Jekk ikun meħtieġ, ma’ dan l-ammont aġġustat għandu jiżdied l-ammont dovut għall-perjodu ta’ 3 xhur jew ta’ 6 xhur skont l-iskali stabbiliti fl-iskedi tekniċi korrispondenti.

KAPITOLU III

MIŻURI TEKNIĊI TA’ KONSERVAZZJONI

Il-miżuri tekniċi applikabbli għall-bastimenti tal-Unjoni li jkollhom awtorizzazzjoni tas-sajd u li jkunu marbutin maż-żona, mal-irkaptu tas-sajd u mal-livell tal-qabdiet aċċessorji, huma ddefiniti għal kull kategorija tas-sajd fl-iskedi tekniċi fl-Appendiċi 2 ta’ dan l-Anness.

Il-bastimenti għat-tonn għandhom iħarsu r-rakkomandazzjonijiet kollha adottati mill-ICCAT.

KAPITOLU IV

DIKJARAZZJONI TAL-QABDIET

1.   Ġurnal ta’ abbord tas-sajd

Il-kaptan ta’ bastiment tal-Unjoni li jkun qed jistad skont il-Ftehim għandu jżomm ġurnal ta’ abbord tas-sajd. F’dak li għandu x’jaqsam mal-bastimenti għat-tonn, il-ġurnal ta’ abbord tas-sajd għandu jkun konformi mar-riżoluzzjonijiet applikabbli tal-ICCAT dwar il-ġbir u t-trażmissjoni tad-data marbuta mal-attivitajiet tas-sajd.

Kull bastiment tal-Unjoni għandu jkun mgħammar b’sistema elettronika (minn hawn ’il quddiem imsejħa “ERS”, electronic reporting system) li tkun kapaċi tirreġistra u tittrażmetti data dwar l-attivitajiet tas-sajd tal-bastiment (minn hawn ’il quddiem id-“ data tal-ERS”).

Bastiment tal-UE li ma jkunx mgħammar b’ERS, jew li l-ERS tiegħu ma tkunx qiegħda taħdem, ma għandux ikun awtorizzat jidħol fiż-żona tas-sajd tal-Guinea-Bissau biex iwettaq attivitajiet tas-sajd fiha.

Il-ġurnal ta’ abbord tas-sajd għandu jimtela mill-kaptan għal kull jum li l-bastiment ikun fiż-żona tas-sajd tal-Guinea-Bissau. Il-bastiment għandu jittrażmetti d-data tal-ERS lill-Istat tal-bandiera tiegħu, li għandu jqegħedha awtomatikament għad-dispożizzjoni taċ-ċentru tal-monitoraġġ tas-sajd tal-Guinea-Bissau (minn hawn’ il quddiem imsejjaħ “ĊMS”), ladarba l-ERS tiegħu tibda taħdem.

Id-data tal-ERS għandha tiġi trażmessa bl-użu tal-mezzi elettroniċi ta’ komunikazzjoni ġestiti mill-Kummissjoni Ewropea għall-iskambji standardizzati tad-data dwar is-sajd. Ir-rekwiżiti tekniċi għat-trażmissjonijiet permezz tal-ERS se jiġu vvalidati fil-Kumitat Konġunt.

Kuljum, il-kaptan għandu jniżżel fil-ġurnal ta’ abbord tas-sajd il-kwantità ta’ kull speċi, identifikata bil-kodiċi alfa-3 tal-FAO tagħha, maqbuda u miżmuma abbord, espressa f’kilogrammi ta’ piż ħaj jew, jekk ikun meħtieġ, fl-għadd ta’ ħut individwali.

Jekk ikun il-każ, kuljum, fil-ġurnal ta’ abbord tas-sajd, il-kaptan għandu jniżżel ukoll il-kwantitajiet ta’ kull speċi mormija lura l-baħar, espressa f’kilogrammi ta’ piż ħaj jew, jekk ikun meħtieġ, fl-għadd ta’ ħut individwali.

Meta jkun se jintbagħat lill-awtoritajiet tal-Guinea-Bissau, il-ġurnal ta’ abbord tas-sajd għandu jimtela b’ittri kbar biex ikun jista’ jinqara u għandu jiġi ffirmat mill-kaptan.

Il-kaptan għandu jkun responsabbli mill-akkuratezza tad-data rreġistrata fil-ġurnal ta’ abbord tas-sajd.

2.   Dikjarazzjoni tal-qabdiet

Regola għar-rappurtar tal-qabdiet sakemm l-ERS tibda tintuża

Il-kaptan għandu jiddikjara l-qabdiet tal-bastiment billi jagħti lill-Guinea-Bissau l-ġurnali ta’ abbord tas-sajd tiegħu għall-perjodu li matulu kien jinsab fiż-żona tas-sajd tal-Guinea-Bissau.

Il-kaptan għandu jibgħat il-ġurnali ta’ abbord tas-sajd lill-Guinea-Bissau fl-indirizz elettroniku pprovdut għal dan l-għan. Il-Guinea-Bissau għandha tikkonferma li tkun irċeviethom billi twieġeb l-email minnufih.

B’mod alternattiv, il-ġurnali ta’ abbord tas-sajd jistgħu jintbagħtu kif ġej:

(a)

f’każ li l-bastiment ikun se jgħaddi minn port tal-Guinea-Bissau, kull ġurnal ta’ abbord tas-sajd oriġinali għandu jitgħadda lir-rappreżentant tad-Direttorat Ġenerali għas-Sajd Industrijali tal-Ministeru għas-Sajd tal-Guinea-Bissau (minn hawn ’il quddiem imsejjaħ id-“Direttorat Ġenerali għas-Sajd Industrijali”), li għandu jikkonferma bil-miktub li jkun irċevihom;

(b)

f’każ li l-bastiment ikun se joħroġ miż-żona tas-sajd tal-Guinea-Bissau mingħajr ma jgħaddi minn port tal-Guinea-Bissau qabel, kull ġurnal ta’ abbord tas-sajd oriġinali għandu jintbagħat bil-posta fi żmien 14-il jum mill-wasla fi kwalunkwe port ieħor u, fi kwalunkwe każ, fi żmien 30 jum minn meta joħroġ miż-żona tas-sajd tal-Guinea-Bissau.

Il-kaptan għandu jibgħat kopja ta’ kull ġurnal ta’ abbord tas-sajd lill-Unjoni. Fil-każ tal-bastimenti għat-tonn u tal-bastimenti tas-sajd bil-konzijiet tal-wiċċ, il-kaptan għandu jibgħat ukoll kopja ta’ kull ġurnal ta’ abbord tas-sajd tiegħu lil wieħed mill-istituti xjentifiċi li ġejjin:

(a)	lill-IRD (Institut de recherche pour le développement);

(b)	lill-IEO (Instituto Español de Oceanografia); jew

(c)	lill-IPMA (Instituto Português do Mar e da Atmosfera).

Jekk bastiment jerġa’ lura fiż-żona tal-Guinea-Bissau matul il-perjodu ta’ validità tal-awtorizzazzjoni tas-sajd tiegħu, irid jerġa’ jibgħat dikjarazzjoni ġdida tal-attivitajiet u tal-qabdiet.

F’każ li ma jitħarsux id-dispożizzjonijiet ta’ dan il-Kapitolu, il-Guinea-Bissau tista’ tissospendi l-awtorizzazzjoni tas-sajd tal-bastiment ikkonċernat sakemm issir id-dikjarazzjoni tal-qabdiet li tkun nieqsa u tista’ tippenalizza lil sid il-bastiment skont id-dispożizzjonijiet previsti għal dan l-għan fil-leġiżlazzjoni nazzjonali li tkun fis-seħħ. Jekk ir-reat jiġi ripetut, il-Guinea-Bissau tista’ tirrifjuta li ġġedded l-awtorizzazzjoni tas-sajd. Il-Guinea-Bissau għandha tgħarraf lill-Unjoni minnufih b’kwalunkwe penali li tiġi applikata f’dan il-kuntest.

Regola għar-rappurtar tal-qabdiet ladarba l-ERS tibda tintuża

Il-qabdiet għandhom ikunu notifikati kif ġej:

(a)

il-kaptani tal-bastimenti kollha li jkunu qed joperaw fl-ilmijiet tal-Guinea-Bissau skont dan il-Protokoll għandhom jimlew il-ġurnal ta’ abbord tas-sajd elettroniku kuljum u jibagħtuh permezz tal-ERS jew, f’każ li din is-sistema tkun bil-ħsara, permezz ta’ email liċ-ĊMS tal-Istat tal-bandiera u liċ-ĊMS tal-Guinea-Bissau fi żmien 7 ijiem minn meta joħorġu miż-żona tas-sajd

(b)

fil-ġurnal ta’ abbord tas-sajd elettroniku trid tiġi speċifikata l-kwantità ta’ kull speċi, identifikata bil-kodiċi alfa-3 tal-FAO tagħha, maqbuda u miżmuma abbord, espressa f’kilogrammi ta’ piż ħaj jew, jekk ikun meħtieġ, fl-għadd ta’ ħut individwali. Għal kull speċi ewlenija, il-kaptan għandu jniżżel ukoll meta ma jinqabad xejn minnha. Il-kaptan għandu jniżżel ukoll il-kwantitajiet ta’ kull speċi mormija lura l-baħar, mogħtija f’kilogrammi ta’ piż ħaj jew, jekk ikun hemm bżonn, fl-għadd ta’ ħut individwali.

Il-bastiment għandu jittrażmetti id-data tal-ERS lill-Istat tal-bandiera tiegħu, li għandu jiżgura li din titqiegħed b’mod awtomatiku għad-dispożizzjoni tal-Guinea-Bissau. L-Istat tal-bandiera għandu jiżgura li din id-data tasal u tiġi rreġistrata f’bażi tad-data elettronika li tippermetti li din id-data tinżamm b’mod sigur għal mill-inqas 36 xahar.

L-Istat tal-bandiera u l-Guinea-Bissau għandhom jiżguraw li jkollhom it-tagħmir tal-IT u s-software meħtieġa biex id-data tal-ERS tiġi trażmessa awtomatikament.

It-trażmissjoni tad-data tal-ERS trid issir bl-użu tal-mezzi elettroniċi ta’ komunikazzjoni ġestiti mill-Kummissjoni Ewropea għall-iskambji standardizzati tad-data dwar is-sajd.

F’każ li ma jitħarsux id-dispożizzjonijiet dwar id-dikjarazzjoni tal-qabdiet, il-Guinea-Bissau tista’ tissospendi l-awtorizzazzjoni tas-sajd tal-bastiment ikkonċernat sakemm tinkiseb id-dikjarazzjoni tal-qabdiet li tkun nieqsa u tista’ tippenalizza lil sid il-bastiment skont id-dispożizzjonijiet previsti għal dan il-għan fil-leġiżlazzjoni nazzjonali li tkun fis-seħħ. Jekk ir-reat jiġi ripetut, il-Guinea-Bissau tista’ tirrifjuta li ġġedded l-awtorizzazzjoni tas-sajd. Il-Guinea-Bissau għandha tgħarraf lill-Unjoni minnufih b’kwalunkwe penali li tiġi applikata f’dan il-kuntest.

L-Istat tal-bandiera u l-Guinea-Bissau għandhom jaħtru korrispondent tal-ERS kull wieħed li se jservi bħala l-punt ta’ kuntatt għall-kwistjonijiet marbuta mal-implimentazzjoni ta’ dan l-Anness. L-Istat tal-bandiera u l-Guinea-Bissau għandhom jgħaddu lil xulxin id-dettalji ta’ kuntatt tal-korrispondent tal-ERS tagħhom u, jekk ikun meħtieġ, għandhom jaġġornaw dik l-informazzjoni minnufih.

3.   Kalkolu tal-imposti għall-bastimenti għat-tonn

Għal kull bastiment għat-tonn, l-Unjoni għandha tistabbilixxi, abbażi tal-qabdiet iddikkjarati minnu, kalkolu finali tal-imposti dovuti mill-bastiment b’rabta mal-istaġun annwali tiegħu għas-sena kalendarja preċedenti.

L-Unjoni għandha tgħarraf lill-Guinea-Bissau b’dan il-kalkolu finali sat-30 ta’ April tas-sena sussegwenti, dik li matulha jkunu saru l-qabdiet. Il-Guinea-Bissau għandu jkollha xahar biex tivvalida dan il-kalkolu jew biex titlob kjarifika.

Meta l-kalkolu finali jkun ogħla mill-imposta b’rata fissa li tkun tħallset għall-ksib tal-awtorizzazzjoni tas-sajd, sid il-bastiment għandu jħallas il-bilanċ pendenti lill-Guinea-Bissau minnufih. Meta l-kalkolu finali jkun inqas mill-imposta b’rata fissa, sid il-bastiment ma jkunx jista’ jirkupra l-ammont li jifdal.

KAPITOLU V

ĦATT L-ART U TRAŻBORD

1.   Ħatt l-art jew trażbord tal-qabdiet

Il-kaptan ta’ bastiment tal-Unjoni li jkun jixtieq iħott l-art jew jittrażborda l-ħut li jkun qabad miż-żona tas-sajd tal-Guinea-Bissau fil-port tal-Guinea-Bissau, għandu jinnotifika lir-rappreżentant tad-Direttorat Ġenerali għas-Sajd Industrijali dwar dan li ġej, mill-inqas 24 siegħa qabel il-ħatt l-art jew it-trażbord:

(a)	isem il-bastiment tal-Unjoni li se jħott l-art jew jittrażborda l-ħut;

(b)	il-port tal-ħatt l-art jew tat-trażbord;

(c)	id-data u l-ħin previsti għall-ħatt l-art jew għat-trażbord;

(d)	il-kwantità (espressa f’kilogrammi ta’ piż ħaj jew, jekk ikun meħtieġ, fl-għadd ta’ ħut individwali) ta’ kull speċi li għandha tinħatt l-art jew tiġi ttrażbordata (identifikata bil-kodiċi alfa-3 tal-FAO tagħha);

(e)	fil-każ tat-trażbord, isem il-bastiment li jkun qed jirċievi l-ħut.

Fil-każ tat-trażbord, il-kaptan irid jiżgura li l-bastiment li jkun qed jirċievi l-ħut ikollu awtorizzazzjoni maħruġa mill-awtoritajiet kompetenti biex jagħmel dan ix-xogħol.

It-trażbord irid isir f’konformità mal-leġiżlazzjoni tal-Guinea-Bissau u fil-port tal-Guinea-Bissau, li l-koordinati ġeografiċi tiegħu għandhom jintbagħtu lill-kaptan u lill-aġent tal-bastiment mill-awtoritajiet kompetenti. It-trażbord fuq il-baħar huwa pprojbit.

In-nuqqas ta’ ħarsien ta’ dawk id-dispożizzjonijiet għandu jwassal biex jiġu applikati l-penali previsti għal dan l-għan fil-leġiżlazzjoni tal-Guinea-Bissau.

2.   Kontribuzzjoni in natura għas-sigurtà alimentari

Il-bastimenti tat-tkarkir li jwettqu attività tas-sajd fil-Guinea-Bissau huma obbligati jħottu l-art parti mill-qabdiet tagħhom fil-Guinea-Bissau għall-finijiet tas-sigurtà alimentari tal-pajjiż. Il-ħatt l-art għandu jsir kif ġej:

(a)	fil-każ tal-bastimenti għall-ħut bil-pinen/għaċ-ċefalopodi, 2,5 tunnellati kull trimestru u għal kull bastiment;

(b)	fil-każ tal-bastimenti għall-gambli, 1,25 tunnellata kull trimestru u għal kull bastiment.

Sabiex tiġi ffaċilitata l-implimentazzjoni ta’ din il-miżura, il-kontribuzzjonijiet ta’ kull bastiment jistgħu jingħataw għal diversi bastimenti f’daqqa u jitqiegħdu għad-dispożizzjoni b’mod akkumulat għal diversi trimestri. Il-ħatt l-art għandu jsir fiż-żona tal-port tal-Guinea-Bissau u l-ħut għandu jingħata lir-rappreżentant tad-Direttorat Ġenerali għas-Sajd Industrijali.

F’konformità mal-Artikolu 5 tal-Ftehim, il-ħatt l-art kopert minn dan il-Kapitolu għandu jħares ir-regolamenti fis-seħħ fil-Guinea-Bissau, b’mod partikolari dawk relatati mad-daqs minimu tal-ispeċijiet ikkonċernati mill-obbligu tal-ħatt l-art. Skont dan l-obbligu, il-bastimenti tal-Unjoni għandhom iħottu l-art biss speċijiet ta’ ħut awtorizzati li jinqabdu skont dan il-Protokoll, inkluż il-qabdiet aċċessorji awtorizzati.

Id-Direttorat Ġenerali għas-Sajd Industrijali għandu jfassal u jiffirma b’mod sistematiku formola li tikkonferma l-wasla ta’ dawn il-kontribuzzjonijiet in natura, li mbagħad għandha titgħadda lill-kaptan.

KAPITOLU VI

KONTROLL U SPEZZJONI

1.   Dħul fiż-żona tas-sajd u ħruġ minnha

Kwalunkwe dħul fiż-żona tas-sajd tal-Guinea-Bissau u kwalunkwe ħruġ minnha, minn bastiment tal-Unjoni li jkollu awtorizzazzjoni tas-sajd, irid jiġi nnotifikat lill-Guinea-Bissau fi żmien 24 siegħa qabel dan id-dħul jew dan il-ħruġ. Dan il-perjodu għandu jitnaqqas għal 4 sigħat fil-każ tal-bastimenti għat-tonn.

Meta jinnotifika d-dħul jew il-ħruġ tiegħu, il-bastiment għandu jgħaddi, b’mod partikolari, l-informazzjoni li ġejja:

(a)	id-data, il-ħin u l-punt ta’ qsim tal-fruntiera previsti;

(b)	il-kwantità ta’ kull speċi miżmuma abbord, identifikata bil-kodiċi alfa-3 tal-FAO tagħha u espressa f’kilogrammi ta’ piż ħaj jew, fejn ikun meħtieġ, fl-għadd ta’ ħut individwali;

(c)	il-preżentazzjoni tal-prodotti.

Preferibbilment, in-notifika għandha tintbagħat b’email, jew, jekk dan ma jkunx possibbli, bil-fax jew bir-radju, f’indirizz elettroniku, fuq numru tat-telefown jew fuq frekwenza kkomunikata mill-Guinea-Bissau. Il-Guinea-Bissau għandha tinnotifika minnufih lill-bastimenti kkonċernati u lill-Unjoni b’kwalunkwe bidla fl-indirizzi elettroniċi, fin-numru tat-telefown jew fil-frekwenza tat-trażmissjoni.

Kwalunkwe bastiment li jinqabad jistad fiż-żona tal-Guinea-Bissau mingħajr ma jkun innotifika l-preżenza tiegħu minn qabel għandu jitqies bħala bastiment li jkun qed jistad mingħajr awtorizzazzjoni.

2.   Messaġġi dwar il-pożizzjoni tal-bastimenti – is-sistema ta’ monitoraġġ tal-bastimenti (VMS, Vessel Monitoring System)

Meta jkunu fiż-żona tas-sajd tal-Guinea-Bissau, il-bastimenti tal-Unjoni jridu jkunu mgħammra b’sistema ta’ monitoraġġ bis-satellita, jiġifieri permezz tal-VMS, li tiżgura l-komunikazzjoni awtomatika u kontinwa tal-pożizzjoni tagħhom, kull siegħa, liċ-ĊMS tal-Istat tal-bandiera tagħhom.

Huwa pprojbit li wieħed iċaqlaq, jitfi, jeqred, jagħmel ħsara jew jiddiżattiva s-sistema ta’ monitoraġġ kontinwu tal-pożizzjoni permezz tal-komunikazzjoni bis-satellita li tkun abbord il-bastiment għat-trażmissjoni tad-data, jew li wieħed jibdel minn jeddu, ibagħbas jew jiffalsifika d-data li din is-sistema tittrażmetti jew tirreġistra.

In-notifiki tal-messaġġi dwar il-pożizzjoni u dwar il-qabdiet għandhom jintbagħtu bi prijorità permezz tal-VMS jew tal-ERS jew, jekk dawn ikunu bil-ħsara, permezz ta’ email, bil-fax jew bir-radju. Il-Guinea-Bissau għandha tinnotifika minnufih lill-bastimenti kkonċernati u lill-Unjoni b’kwalunkwe bidla fl-indirizz elettroniku, fin-numru tat-telefown jew fil-frekwenza tat-trażmissjoni.

Kull messaġġ dwar il-pożizzjoni jrid ikun fih l-informazzjoni li ġejja:

(a)	l-identifikazzjoni tal-bastiment;

(b)	il-pożizzjoni ġeografika l-iżjed riċenti tal-bastiment (il-lonġitudni, il-latitudni), b’marġni ta’ errur ta’ inqas minn 500 metru, u b’intervall ta’ kunfidenza ta’ 99 %;

(c)	id-data u l-ħin tar-reġistrazzjoni tal-pożizzjoni; u

(d)	il-veloċità tal-bastiment u d-direzzjoni li fiha jkun qed jivvjaġġa.

Kwalunkwe bastiment li jinqabad jistad fiż-żona tas-sajd tal-Guinea-Bissau mingħajr ma jkun innotifika l-preżenza tiegħu minn qabel għandu jitqies bħala bastiment li jkun qed jikser il-liġi.

3.   Spezzjoni fuq il-baħar jew fil-port

L-ispezzjoni fuq il-baħar fiż-żona tas-sajd tal-Guinea-Bissau, jew fil-port, tal-bastimenti tal-Unjoni li jkollhom awtorizzazzjoni tas-sajd għandha ssir minn bastimenti u spetturi tal-Guinea-Bissau li jkunu identifikati b’mod ċar bħala bastimenti u spetturi maħtura sabiex iwettqu kontrolli tas-sajd.

Qabel ma jitilgħu abbord, l-ispetturi tal-Guinea-Bissau għandhom javżaw lill-bastiment tal-Unjoni bid-deċiżjoni tagħhom li jwettqu spezzjoni. L-ispezzjoni ssir minn massimu ta’ żewġ spetturi, li jridu jipprovdu prova tal-identità u tal-pożizzjoni uffiċjali tagħhom bħala spetturi qabel ma jwettqu l-ispezzjoni. Jekk ikun il-każ, magħhom jista’ jkun hemm rappreżentanti tal-forzi tas-sigurtà nazzjonali tal-Guinea-Bissau f’konformità mad-dritt internazzjonali tal-baħar.

L-ispetturi tal-Guinea-Bissau għandhom jibqgħu abbord il-bastiment tal-Unjoni biss għall-ħin meħtieġ sabiex iwettqu l-kompiti marbuta mal-ispezzjoni. Għandhom iwettqu l-ispezzjoni b’mod li jxejjen l-impatt fuq il-bastiment u fuq l-attività tas-sajd u l-merkanzija tiegħu.

Il-Guinea-Bissau tista’ tawtorizza lil spetturi akkreditati mill-Unjoni jieħdu sehem fl-ispezzjoni bħala osservaturi.

Il-kaptan tal-bastiment tal-Unjoni għandu jiffaċilita l-imbark u x-xogħol tal-ispetturi tal-Guinea-Bissau.

Fi tmiem kull spezzjoni, l-ispetturi tal-Guinea-Bissau għandhom ifasslu rapport tal-ispezzjoni. Il-kaptan tal-bastiment tal-Unjoni għandu d-dritt iżid il-kummenti tiegħu fir-rapport tal-ispezzjoni. Ir-rapport tal-ispezzjoni għandu jiġi ffirmat mill-ispettur li jkun fasslu u mill-kaptan tal-bastiment tal-Unjoni.

L-ispetturi tal-Guinea-Bissau għandhom jgħaddu kopja tar-rapport tal-ispezzjoni lill-kaptan tal-bastiment tal-Unjoni qabel ma jinżlu minn fuq il-bastiment. Il-Guinea-Bissau għandha tgħaddi kopja tar-rapport tal-ispezzjoni lill-Unjoni fi żmien 8 ijiem mill-ispezzjoni.

4.   Kontroll tal-qabdiet

Sakemm l-ERS tibda verament tintuża, kull trimestru għandhom jitwettqu kontrolli għal għarrieda, abbażi ta’ sistema ta’ rotazzjoni, fuq terz tal-bastimenti tat-tkarkir li huma awtorizzati jistadu, sabiex tiġi eżaminata l-konformità tal-qabdiet mal-informazzjoni ddikjarata fil-ġurnal ta’ abbord tas-sajd. Minn hawn ’il quddiem se tiġi riveduta l-frekwenza tal-kontroll tal-qabdiet biex titqies l-introduzzjoni tal-verifika tad-data dwar il-qabdiet permezz tal-ERS.

Kull kontroll għandu jsir fi tmiem il-vjaġġ wara li jingħata avviż 24 siegħa qabel u ma għandux idum aktar minn 4 sigħat.

Dawn il-kontrolli għandhom isiru f’post li l-koordinati ġeografiċi tiegħu se jintbagħtu lill-kaptan u lill-aġent tal-bastiment mill-awtoritajiet kompetenti, f’konformità mal-leġiżlazzjoni tal-Guinea-Bissau.

KAPITOLU VII

KSUR TAR-REGOLI

1.   Dispożizzjonijiet ġenerali

F’konformità mal-Artikolu 5 tal-Ftehim, ir-regolamenti tal-Guinea-Bissau dwar il-kontroll tal-attivitajiet tas-sajd għandhom japplikaw għall-bastimenti tal-Unjoni li jwettqu attivitajiet fiż-żona tas-sajd skont dan il-Protokoll.

L-Unjoni għandha tieħu l-passi xierqa kollha biex tiżgura li l-bastimenti li jtajru l-bandiera ta’ wieħed mill-Istati Membri tagħha jħarsu d-dispożizzjonijiet ta’ dan il-Protokoll u tal-leġiżlazzjoni li tirregola s-sajd fl-ilmijiet tal-Guinea-Bissau, f’konformità mal-UNCLOS.

2.   Ipproċessar tal-ksur

Kwalunkwe ksur min-naħa ta’ bastiment tal-Unjoni li jkollu awtorizzazzjoni tas-sajd b’rabta mad-dispożizzjonijiet tal-Protokoll għandu jiġi nnotifikat lill-Unjoni fi żmien 48 siegħa, filwaqt li tiġi indikata n-natura tal-ksur. Id-deċiżjoni dwar dan il-ksur għandha tintbagħat lill-Unjoni u lill-Istat tal-bandiera fi żmien 7 ijiem tax-xogħol.

L-iffirmar tar-rapport tal-ispezzjoni min-naħa tal-kaptan għandha tkun mingħajr preġudizzju għad-dritt ta’ sid il-bastiment li jiddefendi ruħu mill-akkuża tal-ksur allegat.

3.   Detenzjoni ta’ bastiment — Laqgħa ta’ informazzjoni

Meta l-leġiżlazzjoni nazzjonali tkun tipprevedi dan b’rabta mal-ksur allegat, kwalunkwe bastiment tal-Unjoni li jkun wettaq ksur jista’ jiġi mġiegħel iwaqqaf l-attività tas-sajd tiegħu u, f’każ li jkun qed ibaħħar, jirritorna lejn port tal-Guinea-Bissau.

Il-Guinea-Bissau għandha tinnotifika lill-Unjoni fi żmien 48 siegħa b’kwalunkwe detenzjoni ta’ bastiment tal-Unjoni li jkollu awtorizzazzjoni tas-sajd. Ma’ din in-notifika għandha tintbagħat l-evidenza tal-ksur allegat.

Qabel ma tieħu kwalunkwe miżura kontra l-bastiment, il-kaptan jew il-merkanzija kkonċernati, ħlief il-miżuri mmirati għall-ħarsien tal-evidenza, il-Guinea-Bissau għandha torganizza, fuq talba tal-Unjoni, fi żmien jum tax-xogħol min-notifika tad-detenzjoni tal-bastiment, laqgħa ta’ informazzjoni sabiex jiġu ċċarati l-fatti li wasslu għad-detenzjoni tal-bastiment u sabiex jiġi spjegat x’azzjoni oħra tista’ tittieħed. Rappreżentant tal-Istat tal-bandiera tal-bastiment jista’ jattendi din il-laqgħa ta’ informazzjoni.

4.   Penali għall-ksur — Proċedura ta’ kompromess

Il-Guinea-Bissau għandha tistabbilixxi l-penali għall-ksur allegat skont id-dispożizzjonijiet rilevanti tal-leġiżlazzjoni nazzjonali tagħha li tkun fis-seħħ.

Meta s-soluzzjoni għall-ksur tkun tinvolvi proċedimenti legali, qabel dawn jingħataw bidu għandha tinbeda proċedura ta’ kompromess bejn il-Guinea-Bissau u l-Unjoni sabiex jiġu ddeterminati t-termini tal-penali u l-livell tagħha. Rappreżentant tal-Istat tal-bandiera tal-bastiment jista’ jieħu sehem f’din il-proċedura ta’ kompromess. Il-proċedura ta’ kompromess għandha tintemm sa mhux iktar tard minn 4 ijiem min-notifika tad-detenzjoni tal-bastiment.

5.   Proċedimenti legali — Garanzija bankarja

Jekk il-proċedura ta’ kompromess tfalli u l-ksur jitressaq quddiem il-qorti kompetenti, sid il-bastiment li jkun wettaq il-ksur għandu jiddepożita garanzija bankarja f’bank magħżul mill-Guinea-Bissau, li l-ammont tagħha, kif stabbilit mill-Guinea-Bissau, għandu jkun ikopri l-kostijiet marbuta mad-detenzjoni tal-bastiment, il-multa stmata u kwalunkwe kumpens li jista’ jkun hemm ’il quddiem. Il-garanzija bankarja ma tistax tiġi rkuprata qabel ma jkunu ġew konklużi l-proċedimenti legali.

Il-garanzija bankarja għandha tiġi rrilaxxata u tingħata lura lil sid il-bastiment minnufih wara li tinqata’ s-sentenza:

(a)	kollha kemm hi, jekk ma tkun ġiet imposta l-ebda penali;

(b)	skont l-ammont tal-bilanċ li jkun għad fadal, jekk il-penali tkun multa li tkun inqas mill-ammont tal-garanzija bankarja.

Il-Guinea-Bissau għandha tgħarraf lill-Unjoni bir-riżultat tal-proċedimenti legali fi żmien 8 ijiem mis-sentenza.

6.   Rilaxx tal-bastiment

Il-bastiment u l-kaptan tiegħu għandhom jiġu awtorizzati jħallu l-port ladarba l-penali titħallas fi proċedura ta’ kompromess, jew ladarba l-garanzija bankarja tkun ġiet iddepożitata.

KAPITOLU VIII

IMPJIEG TAS-SAJJIEDA ABBORD BASTIMENTI TAL-UNJONI

1.   Għadd ta’ sajjieda li għandhom jiġu imbarkati

L-operatur ta’ bastiment tal-Unjoni awtorizzat skont dan il-Protokoll għandu jimbarka sajjieda mill-pajjiżi membri tal-Organizzazzjoni tal-Istati Afrikani, tal-Karibew u tal-Paċifiku (OSAKP) biex jaħdmu abbord il-bastiment tiegħu bħala membri tal-ekwipaġġ għad-durata tal-attivitajiet tas-sajd tal-bastiment fil-qafas tal-Protokoll.

Matul il-perjodu ta’ validità tal-awtorizzazzjoni tas-sajd tiegħu, kull bastiment tat-tkarkir demersali tal-Unjoni għandu jimbarka sajjieda mill-Guinea-Bissau fil-limiti li ġejjin:

(a)	sitt sajjieda jekk ikollu kapaċità ta’ inqas minn 250 GRT;

(b)	seba’ sajjieda jekk ikollu kapaċità ta’ bejn 250 u 400 GRT;

(c)	tmien sajjieda jekk ikollu kapaċità ta’ iktar minn 400 GRT.

Is- sajjieda li għandhom jiġu imbarkati skont dan il-paragrafu għandhom jissodisfaw ir-rekwiżiti tal-leġiżlazzjoni tal-Istat tal-bandiera li tittrasponi d-Direttiva tal-Kunsill (UE) 2017/159 (2), inkluż f’dak li jirrigwarda l-passaport, il-ktieb tal-baħrin, iċ-ċertifikat mediku u t-taħriġ bażiku. Il-lista ta’ rekwiżiti li jirriżultaw minn din il-leġiżlazzjoni għandha titgħadda biżżejjed minn qabel lill-awtoritajiet tal-Guinea-Bissau mill-Istat tal-bandiera. Is-sajjieda mill-pajjiżi tal-OSAKP li għandhom jiġu imbarkati f’konformità ma’ dan il-paragrafu għandhom ikunu jistgħu jifhmu l-lingwa ta’ ħidma stabbilita abbord il-bastiment tas-sajd.

L-awtoritajiet kompetenti tal-Guinea-Bissau għandhom jistabbilixxu, jaġġornaw regolarment u jgħaddu lis-sidien tal-bastimenti lista ta’ sajjieda kompetenti.

Il-kaptan għandu jfassal, jiddata u jiffirma lista tal-ekwipaġġ konformi mal-Formola 5 tal-Konvenzjoni tal-OMI dwar il-Faċilitazzjoni tat-Traffiku Marittimu Internazzjonali u għandu jibgħat kopja ta’ din il-lista lill-awtoritajiet tal-Guinea-Bissau qabel ma l-bastiment iħalli ż-żona tal-port.

Is-sid tal-bastiment jew, fin-nuqqas tiegħu, il-kaptan, għandu jirrifjuta l-imbark ta’ sajjied fuq il-bastiment tiegħu jekk dan ma jkunx jissodisfa r-rekwiżiti msemmija fit-tielet subparagrafu ta’ dan il-paragrafu.

Is-sidien tal-bastimenti tal-Unjoni għandhom jagħmlu ħilithom biex jimbarkaw aktar sajjieda nazzjonali.

2.   Kundizzjonijiet tax-xogħol

Il-kundizzjonijiet li bihom is-sajjieda mill-pajjiżi tal-OSAKP jiġu imbarkati jikkonformaw mal-leġiżlazzjoni tal-Istat tal-bandiera li tittrasponi d-Direttiva (UE) 2017/159, inkluż fir-rigward tas-sigħat tax-xogħol jew tal-mistrieħ, id-drittijiet ta’ ripatrijazzjoni u s-sikurezza u s-saħħa okkupazzjonali.

3.   Kuntratt tax-xogħol tas-sajjieda

Għal kull sajjied impjegat abbord bastiment tal-Unjoni f’konformità mal-punt 1, għandu jiġi nnegozjat u ffirmat kuntratt tax-xogħol bil-miktub kemm mis-sajjied kif ukoll mill-impjegatur, li għandu wkoll jiġi approvat mill-awtorità kompetenti tal-Guinea-Bissau.

Il-ftehim jikkonforma mar-rekwiżiti tal-leġiżlazzjoni tal-Istat tal-bandiera li tittrasponi d-Direttiva (UE) 2017/159 (l-Anness I tad-Direttiva).

4.   Paga tas-sajjieda

Il-kost tal-paga u kwalunkwe kost addizzjonali tax-xogħol għandhom jitħallsu direttament jew, fil-każ fejn is-sajjied ikun impjegat minn servizz privat tas-suq tax-xogħol, indirettament minn sid il-bastiment.

Is-sajjieda mill-pajjiżi tal-OSAKP għandu jkollhom paga fix-xahar jew regolari garantita, preferibbilment permezz ta’ trasferiment bankarju. Din għandha tiġi stabbilita bi ftehim reċiproku bejn sidien il-bastimenti jew ir-rappreżentanti tagħhom u s-sajjieda u/jew it-trade unions jew ir-rappreżentanti tagħhom. Meta ma jkunux ġew konklużi ftehimiet kollettivi u l-pagi bażiċi minimi tal-Istati tal-bandiera ma jkunux japplikaw, il-kundizzjonijiet tal-paga bażika mogħtija lis-sajjieda mill-pajjiżi tal-OSAKP ma jistgħux ikunu inferjuri għall-istandards tal-ILO.

Is-sajjieda ma għandhomx għalfejn iġarrbu kwalunkwe kost potenzjali tal-pagamenti li jirċievu. Is-sajjieda għandu jkollhom il-mezzi biex jibagħtu b’xejn lill-familji tagħhom il-pagamenti kollha li jirċievu, jew parti minnhom, inkluż il-pagamenti bil-quddiem.

Is-sajjieda għandhom jirċievu payslip għal kull paga li jirċievu u, jekk jitolbuha, prova li l-paga ntbagħtet.

5.   Sigurtà soċjali

Il-Guinea-Bissau għandha tiżgura li s-sajjieda residenti abitwali fit-territorju tagħha u d-dipendenti tagħhom, sa fejn previst mil-liġi nazzjonali, ikunu intitolati għall-protezzjoni soċjali b’kundizzjonijiet mhux inqas favorevoli minn dawk applikabbli għal ħaddiema oħra, b’mod partikolari l-impjegati u l-persuni li jaħdmu għal rashom, li għandhom ir-residenza abitwali tagħhom fit-territorju tagħha.

6.   Servizzi privati ta’ reklutaġġ u kollokament għas-sajjieda

Is-servizzi privati tas-suq tax-xogħol jinkludu servizz privat ta’ reklutaġġ u kollokament għas-sajjieda, jiġifieri kwalunkwe persuna, kumpanija, istituzzjoni, aġenzija jew organizzazzjoni oħra, inkluż l-aġenti magħżula mis-sidien tal-bastimenti, li jwettqu attivitajiet ta’ reklutaġġ ta’ sajjieda f’isem is-sidien tal-bastimenti jew ta’ kollokament ta’ sajjieda mas-sidien tal-bastimenti.

L-awtoritajiet tal-Guinea-Bissau għandhom jiżguraw li l-aġenti li jfornu servizzi ta’ reklutaġġ u ta’ kollokament kemm lis-sajjieda kif ukoll lis-sidien tal-bastimenti:

(a)	ma jużaw l-ebda mezz, mekkaniżmu jew lista bl-għan li jipprevjenu jew jiskoraġġixxu lis-sajjieda milli jsibu impjieg;

(b)	ma jimponux fuq is-sajjieda, fi flus jew in natura, direttament jew indirettament, kompletament jew parzjalment, tariffi jew kostijiet oħra marbuta mas-servizzi tas-suq tax-xogħol tagħhom;

(c)	ma jagħtux b’self u lanqas ma jfornu oġġetti jew servizzi lis-sajjieda li jridu jiġu rimborżati jew imħallsa mis-sajjieda stess;

(d)	ma jnaqqsux mill-paga tas-sajjieda kwalunkwe ammont bħala ħlas jew ir-rimborż ta’ kwalunkwe self, ta’ oġġetti jew ta’ servizzi fornuti qabel mas-sajjied ikun ġie impjegat; u

(e)

jiżguraw li: (i) il-kuntratt tax-xogħol tas-sajjied ikun jikkonforma ma’ dan il-Kapitolu, mal-leġiżlazzjonijiet, mar-regolamenti u mal-ftehimiet ta’ negozjar kollettivi li jirregolaw il-kuntratt tax-xogħol tas-sajjied; (ii) il-kuntratt tax-xogħol tas-sajjied jitfassal b’lingwa mifhuma mis-sajjied u bil-lingwa uffiċjali jew tax-xogħol tal-bastiment tas-sajd tal-Unjoni kkonċernat; (iii) is-sajjieda impjegati jiġu infurmati bid-drittijiet u bl-obbligi tagħhom qabel ma jiffirmaw il-kuntratt tax-xogħol tagħhom; (iv) jittieħdu l-miżuri meħtieġa biex is-sajjieda impjegati jkunu jistgħu jeżaminaw it-termini tal-kuntratt tax-xogħol tagħhom u jitolbu parir dwaru qabel ma jiffirmawh; (v) is-sajjieda impjegati jirċievu kopja ffirmata tal-kuntratt tax-xogħol tagħhom; (vi) is-sajjieda jħarsu l-obbligi tagħhom skont dan il-Kapitolu; u (vii) is-sid tal-bastiment jirċievi kopja ta’ kull payslip u prova tal-ħlas f’waqthom ma’ kull paga li tintbagħat, jekk il-pagi jkunu f’idejn l-aġent.

L-awtoritajiet tal-Guinea-Bissau għandhom jiżguraw li l-uffiċjali nazzjonali li jimpjegaw sajjieda stazzjonati abbord bastimenti tas-sajd tal-Unjoni jiżguraw li l-kuntratti tax-xogħol tas-sajjieda iffirmati ma’ dawk is-sajjieda jindikaw li huma impjegati mill-aġent, bil-ħsieb li jitqiegħdu għad-dispożizzjoni tas-sidien tal-bastimenti li jassenjawlhom il-kompiti u jissorveljaw il-prestazzjoni tagħhom.

B’deroga mill-punt (b), tat-tieni subparagrafu, il-kostijiet relatati mal-kisba ta’ ktieb tas-sajjieda, ta’ ċertifikat mediku u ta’ passaport għandhom jitħallsu mis-sajjied. Il-kostijiet tal-kisba ta’ viża u ta’ permess tax-xogħol, jekk applikabbli, huma r-responsabbiltà tal-impjegatur.

7.   Ħarsien ta’ dan il-kapitolu

L-awtoritajiet kompetenti taż-żewġ Partijiet għandhom jiżguraw li l-leġiżlazzjoni applikabbli għas-sajjieda tkun aċċessibbli faċilment u mingħajr ħlas f’forma komprensiva u trasparenti.

L-awtoritajiet tal-Guinea-Bissau għandhom jiżguraw l-implimentazzjoni xierqa ta’ dan il-Kapitolu f’konformità mal-obbligi tagħhom skont id-dritt internazzjonali u f’konformità mal-obbligi stabbiliti f’dan il-Kapitolu.

L-awtoritajiet tal-Istat tal-bandiera għandhom jiżguraw l-applikazzjoni xierqa tal-paragrafi 1, 2 u 3 abbord bastimenti li jtajru l-bandiera tagħhom. Dawn jeżerċitaw ir-responsabbiltà tagħhom f’konformità mal-linji gwida tal-ILO għall-Ispezzjoni mill-Istat tal-Bandiera tal-Kundizzjonijiet tal-Ħajja u tax-Xogħol fuq il-Bastimenti tas-Sajd.

Il-Kummissjoni Konġunta għandha timmonitorja l-ħarsien tal-obbligi stabbiliti f’dan il-Kapitolu.

KAPITOLU IX

OSSERVATURI

1.   Osservazzjoni tal-attivitajiet tas-sajd

Il-bastimenti li jkollhom awtorizzazzjoni tas-sajd għandhom ikunu soġġetti għal skema ta’ osservazzjoni tal-attivitajiet tas-sajd li jwettqu fil-kuntest tal-Ftehim.

Osservatur huwa kwalunkwe persuna li tingħata s-setgħa minn awtorità nazzjonali li tosserva l-implimentazzjoni tar-regoli li japplikaw għall-operazzjonijiet tas-sajd jew li tosserva dawn l-operazzjonijiet għal skopijiet xjentifiċi.

Fil-każ tal-bastimenti għat-tonn u tal-bastimenti tas-sajd bil-konzijiet tal-wiċċ, il-Partijiet għandhom jikkonsultaw lil xulxin kif ukoll lill-pajjiżi kkonċernati l-oħra malajr kemm jista’ jkun b’rabta mad-definizzjoni ta’ sistema ta’ osservaturi reġjonali u mal-għażla tal-organizzazzjoni kompetenti tas-sajd.

Il-bastimenti l-oħra għandhom jimbarkaw osservatur maħtur mill-Guinea-Bissau. Jekk l-osservatur ma jitfaċċax fil-ħin u fil-post maqbulin, postu jrid jieħdu xi ħadd ieħor sabiex il-bastiment ikun jista’ jibda l-attivitajiet tiegħu minnufih.

2.   Bastimenti u osservaturi ddeżinjati

Meta toħroġ l-awtorizzazzjoni tas-sajd, il-Guinea-Bissau għandha tgħarraf lill-Unjoni u lil sid il-bastiment, jew lill-aġent tiegħu, bil-bastimenti u bl-osservaturi ddeżinjati, kif ukoll bil-ħin li matulu l-osservatur ikun se jinsab abbord kull bastiment. Il-Guinea-Bissau għandha tgħarraf minnufih lill-Unjoni u lil sid il-bastiment, jew lill-aġent tiegħu, b’kull bidla marbuta mal-bastimenti u l-osservaturi ddeżinjati.

L-osservatur ma għandux iqatta’ iżjed ħin abbord il-bastiment milli għandu bżonn biex iwettaq il-kompiti tiegħu.

3.   Kontribuzzjoni finanzjarja b’rata fissa

Meta jħallas l-imposta, sid il-bastiment għandu jħallas lill-Guinea-Bissau, għal kull bastiment tat-tkarkir, l-ammont ta’ EUR 10 000 fis-sena, aġġustat pro rata temporis skont id-durata tal-awtorizzazzjoni tas-sajd tal-bastimenti ddeżinjati.

4.   Paga tal-osservatur

Il-Guinea-Bissau għandha tħallas il-paga u l-kontribuzzjonijiet soċjali tal-osservatur.

5.   Kundizzjonijiet tal-imbark

Meta jkun abbord, l-osservatur għandu jiġi ttrattat bħala uffiċjal. Madankollu, l-akkomodazzjoni tal-osservatur abbord għandha tqis l-istruttura teknika tal-bastiment.

Sid il-bastiment għandu jħallas il-kostijiet marbuta mal-akkomodazzjoni u mal-ikel ipprovduti lill-osservatur abbord il-bastiment.

Il-kaptan għandu jagħmel ħiltu biex jiżgura s-sigurtà fiżika u l-benesseri tal-osservatur.

L-osservatur għandu jingħata l-faċilitajiet kollha meħtieġa biex iwettaq il-kompiti tiegħu. Għandu jkollu aċċess għall-mezzi ta’ komunikazzjoni, għad-dokumenti marbutin mal-attivitajiet tas-sajd tal-bastiment, b’mod partikolari l-ġurnal ta’ abbord tas-sajd u l-ġurnal tan-navigazzjoni, kif ukoll għall-partijiet tal-bastiment li huma marbutin b’mod dirett mal-kompiti tiegħu.

6.   Obbligi tal-osservatur

Waqt li jkun abbord l-osservatur għandu:

(a)	jieħu l-miżuri xierqa kollha sabiex ma jinterrompix jew ifixkel l-operazzjonijiet tas-sajd;

(b)	iħares l-oġġetti u t-tagħmir li jkun hemm abbord;

(c)	iħares in-natura kunfidenzjali ta’ kwalunkwe dokument tal-bastiment.

7.   L-imbark u l-iżbark tal-osservatur

Sid il-bastiment jew l-aġent tiegħu għandu jgħarraf lill-Guinea-Bissau, 10 ijiem qabel l-imbark, bid-data, bil-ħin u bil-port tal-imbark tal-osservatur. Jekk l-osservatur jiġi imbarkat f’pajjiż barrani, sid il-bastiment għandu jħallas il-kostijiet marbuta mal-ivvjaġġar tiegħu lejn il-port tal-imbark.

Meta l-osservatur ma jiġix żbarkat f’port tal-Guinea-Bissau, sid il-bastiment għandu jiżgura r-ritorn tal-osservatur lura lejn il-Guinea-Bissau mill-aktar fis possibbli u jħallas il-kostijiet relatati hu.

8.   Kompiti tal-osservatur

L-osservaturi għandhom iwettqu l-kompiti li ġejjin:

(a)	josservaw l-attivitajiet tas-sajd tal-bastiment;

(b)	jivverifikaw il-pożizzjoni tal-bastiment waqt l-operazzjonijiet tas-sajd tiegħu;

(c)	iwettaqu attivitajiet fil-kuntest tal-programmi xjentifiċi, inkluż kampjunar bijoloġiku;

(d)	jagħmlu lista tal-irkaptu tas-sajd użat;

(e)	jivverifikaw id-data dwar il-qabdiet li jkunu saru fiż-żona tas-sajd tal-Guinea-Bissau li tkun irrappurtata fil-ġurnal ta’ abbord tas-sajd;

(f)	jivverifikw il-perċentwali tal-qabdiet aċċessorji abbażi ta’ dak li huwa ddefinit fl-iskedi tekniċi għal kull kategorija u jistma l-qabdiet skartati;

(g)	għandhom jgħaddu l-osservazzjonijiet tagħhom darba kuljum fil-kuntest tat-twettiq tal-kompiti tagħhom, fosthom il-kwantità ta’ qabdiet ewlenin u aċċessorji abbord.

9.   Rapport tal-osservatur

Qabel ma jinżel minn fuq il-bastiment, l-osservatur għandu jippreżenta dikjarazzjoni tal-osservazzjonijiet tiegħu lill-kaptan tal-bastiment. Il-kaptan tal-bastiment għandu jkollu d-dritt li jżid il-kummenti tiegħu. Din id-dikjarazzjoni għandha tiġi ffirmata mill-osservatur u mill-kaptan. L-osservatur għandu jippreżenta lill-awtoritajiet tal-Guinea-Bissau responsabbli mill-kontroll u mis-sorveljanza, immedjatament wara li jiżbarka, id-dikjarazzjoni oriġinali u r-rapport finali tal-missjoni ffirmati u ttimbrati kif xieraq mill-kaptan tal-bastiment, li għandu jirċievi kopja tagħhom mingħand l-osservatur. L-awtoritajiet tal-Guinea-Bissau għandhom jibagħtu kopja tad-dokumenti kollha lill-Unjoni.

APPENDIĊIJIET

Appendiċi 1 – Formola tat-talba għal awtorizzazzjoni tas-sajd

Appendiċi 2 – Skedi tekniċi għal kull kategorija

Appendiċi 3 – Ipproċessar tad-data personali

---

(1)  Ir-Regolament (UE) 2017/2403 tal-Parlament Ewropew u tal-Kunsill tat-12 ta’ Diċembru 2017 dwar il-ġestjoni sostenibbli ta’ flotot tas-sajd esterni, u li jħassar ir-Regolament tal-Kunsill (KE) Nru 1006/2008 (ĠU L 347, 28.12.2017, p. 81).

(2)  Id-Direttiva tal-Kunsill (UE) 2017/159 tad-19 ta’ Diċembru 2016 li timplimenta l-Ftehim li jikkonċerna l-implimentazzjoni tal-Konvenzjoni dwar ix-Xogħol fis-Sajd, 2007, tal-Organizzazzjoni Internazzjonali tax-Xogħol, konkluż fil-21 ta’ Mejju 2012 bejn il-Konfederazzjoni Ġenerali tal-Kooperattivi Agrikoli fl-Unjoni Ewropea (Cogeca), il-Federazzjoni Ewropea tal-Ħaddiema tat-Trasport (ETF) u l-Assoċjazzjoni ta’ Organizzazzjonijiet Nazzjonali tal-Intrapriżi tas-Sajd fl-Unjoni Ewropea (Europêche) (ĠU L 25, 31.1.2017, p. 12).