IARSCRÍBHINN

COINNÍOLLACHA LENA RIALAÍTEAR GNÍOMHAÍOCHTAÍ IASCAIREACHTA I LIMISTÉAR IASCAIREACHTA GHUINE BISSAU A DHÉANANN SOITHÍ DE CHUID AN AONTAIS

CAIBIDIL I

FORÁLACHA GINEARÁLTA

1.   An t-údarás inniúil a ainmniú

Chun críocha na hIarscríbhinne seo agus mura sonraítear a mhalairt, ciallóidh aon tagairt don Aontas nó do Ghuine Bissau mar údarás inniúil:

(a)	i gcás an Aontais: an Coimisiún Eorpach, i gcás inarb iomchuí trí thoscaireacht an Aontais i nGuine Bissau,

(b)	i gcás Ghuine Bissau: an roinn rialtais atá freagrach as an iascach.

2.   Limistéar iascaireachta údaraithe

Comhfhreagróidh an limistéar iascaireachta údaraithe ina bhfuil soithí de chuid an Aontais údaraithe chun iascaireacht a dhéanamh do limistéar iascaireachta Ghuine Bissau, lena n-áirítear an sciar comhfhreagrach den chomhlimistéar idir Guine Bissau agus an tSeineagáil, i gcomhréir le reachtaíocht Ghuine Bissau agus leis na coinbhinsiúin idirnáisiúnta is infheidhme a bhfuil Guine Bissau ina páirtí iontu.

Saineofar na bunlínte leis an dlí náisiúnta.

3.   Gníomhaire áitiúil a cheapadh

Cé is moite de shoithí tuinníní, déanfaidh gníomhaire a bhfuil cónaí air i nGuine Bissau ionadaíocht ar aon soitheach de chuid an Aontais ar mian leis údarú iascaireachta a fháil faoin bPrótacal seo.

4.   Cuntas bainc

Roimh theacht i bhfeidhm an Phrótacail seo, seolfaidh Guine Bissau chuig an Aontas mionsonraí an chuntais bainc/na gcuntas bainc nach mór na méideanna airgeadais is iníoctha ag soithí de chuid an Aontais faoin gComhaontú a íoc ann/iontu. Is iad úinéirí na soithí a iompróidh na costais a bhaineann leis na haistrithe bainc.

5.   Pointí fócasacha

Cuirfidh na Páirtithe a chéile ar an eolas faoina bpointí fócasacha féin lenar féidir faisnéis a mhalartú maidir le cur chun feidhme an Phrótacail seo, go háirithe maidir le saincheisteanna a bhaineann le malartú sonraí comhiomlána maidir le gabhálacha agus an iarracht iascaireachta, nósanna imeachta a bhaineann le húdaruithe iascaireachta agus gabhálacha, agus cur chun feidhme na tacaíochta earnála.

CAIBIDIL II

ÚDARUITHE IASCAIREACHTA

ROINN 1

NÓSANNA IMEACHTA IS INFHEIDHME

1.   Coinníoll chun údarú iascaireachta a fháil — soithí incháilithe

Eiseofar na húdaruithe iascaireachta dá dtagraítear in Airteagal 6 den Chomhaontú ar choinníoll go bhfuil an soitheach cláraithe i gclár shoithí iascaireachta an Aontais agus go gcomhlíonfaidh sé forálacha Rialachán (AE) 2017/2403 ó Pharlaimint na hEorpa agus ón gComhairle (1). Na réamhoibleagáidí uile a bhaineann le húinéir an tsoithigh, leis an gcaptaen nó leis an soitheach féin, oibleagáidí a eascraíonn as a ngníomhaíochtaí iascaireachta i nGuine Bissau faoin gComhaontú, ní mór gur comhlíonadh iad.

2.   Iarratas ar údarú iascaireachta

Cuirfidh an tAontas iarratas le haghaidh gach soithigh atá le húdarú faoi bhráid Ghuine Bissau trí mheán leictreonach, 40 lá oibre ar a laghad roimh an dáta inmhianaithe a chuirfear tús leis na hoibríochtaí, agus úsáid á baint as an bhfoirm a leagtar amach san Fhoscríbhinn 1 a ghabhann leis an Iarscríbhinn seo.

Chun iarratais ar údaruithe iascaireachta a tharchur agus a léiriú gur glacadh leo, bainfear úsáid as córas LICENCE, is é sin an córas leictreonach slán chun údaruithe iascaireachta a bhainistiú, arna chur ar fáil ag an gCoimisiún Eorpach.

Go dtí go mbeidh córas LICENCE ag feidhmiú go hiomlán, leanfaidh an tAontas d’iarratas le haghaidh gach soithigh atá le húdarú a chur faoi bhráid Ghuine Bissau trí bhealaí oifigiúla. Déanfaidh an Comhchoiste cinneadh maidir leis an aistriú chuig úsáid chóras LICENCE.

I gcás gach chéad iarratais ar údarú iascaireachta faoin bPrótacal seo, nó tar éis modhnú teicniúil a dhéanamh ar an soitheach lena mbaineann, beidh an méid seo a leanas ag gabháil leis an iarratas:

(a)	cruthúnas gur íocadh an muirear ar ráta comhréidh le haghaidh thréimhse bhailíochta an údaraithe iascaireachta a iarradh;

(b)	ainm agus seoladh ghníomhaire áitiúil an tsoithigh, i gcás inarb ann do cheann;

(c)	i gcás trálaer, cruthúnas gur réamhíocadh an ranníocaíocht ar ráta comhréidh maidir leis na costais a bhaineann leis an mbreathnóir;

(d)	i gcás trálaer, deimhniú thonnáiste an tsoithigh arna eisiúint ag an Stát brataí.

Nuair a dhéanfar údarú iascaireachta faoin bPrótacal seo a athnuachan, i gcás soitheach nár athraíodh a shaintréithe teicniúla, ní bheidh ag gabháil leis an iarratas ar athnuachan ach cruthúnas gur íocadh an muirear agus, i gcás inarb iomchuí, cruthúnas gur íocadh an ranníocaíocht ar ráta comhréidh maidir leis na costais a bhaineann leis an mbreathnóir.

3.   Údaruithe iascaireachta a eisiúint

Eiseoidh Guine Bissau an t-údarú iascaireachta bunaidh laistigh de 25 lá ar a mhéad tar éis di an comhad iarratais iomlán a fháil, agus 15 lá ar a laghad roimh thús na tréimhse iascaireachta. Seolfar an t-údarú sin chuig úinéirí na soithí:

(a)	i gcás trálaer, trí na gníomhairí, agus seolfar cóip scanta chuig an Aontas, agus

(b)	i gcás soithí tuinníní, trí thoscaireacht an Aontais i nGuine Bissau; i gcás ina mbeidh an toscaireacht dúnta, féadfaidh Guine Bissau an t-údarú iascaireachta a eisiúint go díreach d’úinéir an tsoithigh nó dá ghníomhaire agus cuirfidh sí cóip faoi bhráid an Aontais.

I gcás soithí tuinníní, déanfaidh an t-údarás inniúil cóip den údarú iascaireachta sin a sheoladh láithreach, trí mheán leictreonach, chuig úinéir an tsoithigh agus, i gcás inarb iomchuí, chuig a ghníomhaire áitiúil. Rachaidh bailíocht na cóipe sin in éag nuair a gheofar an t-údarú iascaireachta bunaidh. Beidh an chóip sin, a choimeádfar ar bord soithí, bailí ar feadh tréimhse 40 lá agus measfar í a bheith coibhéiseach leis an gcóip bhunaidh le linn na tréimhse sin.

A luaithe a bheidh uirlis LICENCE feidhmiúil, léireoidh Guine Bissau gur glacadh leis an iarratas agus uaslódálfaidh sí cóip leictreonach den cheadúnas bunaidh sínithe i gcóras LICENCE. Idir an dá linn, seolfaidh Guine Bissau cóip scanta de na ceadúnais a eisíodh chuig an Aontas le ríomhphost.

4.   Mífheidhmiú chóras LICENCE

I gcás ina dtiocfaidh deacrachtaí chun cinn maidir le faisnéis a tharchur idir an Coimisiún Eorpach agus Guine Bissau i gcóras LICENCE, déanfar malartuithe leictreonacha údaruithe iascaireachta trí bhealaí oifigiúla go dtí go mbeidh an córas ag feidhmiú arís.

A luaithe a bheidh an córas ag feidhmiú arís, déanfaidh gach Páirtí an fhaisnéis a thabhairt cothrom le dáta i gcóras LICENCE.

5.   Liosta na soithí atá údaraithe chun iascaireacht a dhéanamh

A luaithe a eiseofar an t-údarú iascaireachta, tarraingeoidh Guine Bissau suas, gan mhoill, le haghaidh gach catagóire soithigh, liosta cinntitheach na soithí atá údaraithe chun iascaireacht a dhéanamh i limistéar iascaireachta Ghuine Bissau. An liosta sin, seolfar láithreach é chuig an údarás náisiúnta atá freagrach as rialú a dhéanamh ar an iascaireacht, trí mheán leictreonach, agus chuig an Aontas.

6.   Tréimhse bhailíochta an údaraithe iascaireachta

Déanfar údaruithe iascaireachta a tharraingt suas ar feadh tréimhse 3 mhí, 6 mhí nó 1 bhliain. Chun tús na tréimhse bailíochta a chinneadh, ciallóidh ‘tréimhse 1 bhliain’ an méid seo a leanas:

(a)	i gcás na chéad bhliana a chuirfear an Prótacal seo i bhfeidhm, an tréimhse idir dáta a chur i bhfeidhm sealadaigh agus an 31 Nollaig an bhliain chéanna;

(b)	ina dhiaidh sin, gach bliain féilire iomlán;

(c)	i gcás na bliana deireanaí a chuirfear an Prótacal seo i bhfeidhm, an tréimhse idir an 1 Eanáir agus an dáta a rachaidh an Prótacal seo in éag.

Tosóidh tréimhse bhailíochta 3 mhí nó 6 mhí an chéad lá de gach mí. Mar sin féin, ní bheidh údaruithe iascaireachta bailí tar éis an 31 Nollaig an bhliain ar eisíodh iad lena linn.

7.   An údarú iascaireachta a choimeád ar bord

Ní mór an ceadúnas iascaireachta a choimeád ar bord i gcónaí.

Údarófar do shoithí tuinníní, áfach, iascaireacht a dhéanamh a luaithe a bheidh siad ar an liosta sealadach. Ní mór do soithí den sórt sin an liosta sealadach a choimeád ar bord i gcónaí go dtí go n-eiseofar a gceadúnas iascaireachta.

8.   An t-údarú iascaireachta a aistriú

Eiseofar údarú iascaireachta le haghaidh soitheach ar leith agus ní bheidh sé inaistrithe.

Mar sin féin, i gcás force majeure agus arna iarraidh sin don Aontas, cuirfear údarú nua in ionad an údaraithe iascaireachta, arna eisiúint thar ceann soitheach eile cosúil leis an soitheach atá le hionadú.

Chun an t-aistriú a dhéanamh, tabharfaidh úinéir an tsoithigh nó a ghníomhaire i nGuine Bissau an t-údarú iascaireachta atá le hionadú ar ais agus déanfaidh Guine Bissau an t-údarú athsholáthair a tharraingt suas gan mhoill. Eiseofar an t-údarú athsholáthair gan mhoill d’úinéir an tsoithigh nó dá ghníomhaire, tráth a thabharfar an t-údarú atá le hionadú ar ais, a luaithe a bheidh an t-iniúchadh teicniúil déanta i gcomhréir le pointe 10. Gabhfaidh éifeacht leis an údarú athsholáthair an lá a thabharfar an t-údarú atá le hionadú ar ais.

I gcás trálaer, más mó tonnáiste an tsoithigh athsholáthair ná tonnáiste an tsoithigh atá á ionadú, déanfar an muirear breise a ríomh ar bhonn pro rata de réir na difríochta sa tonnáiste agus na tréimhse bailíochta atá fágtha. Íocfaidh úinéir an tsoithigh an muirear breise sin tráth a aistreofar an t-údarú iascaireachta.

Tabharfaidh Guine Bissau liosta na soithí atá údaraithe chun iascaireacht a dhéanamh cothrom le dáta gan mhoill. An liosta nua sin, seolfar láithreach é chuig an údarás náisiúnta atá freagrach as rialú a dhéanamh ar an iascaireacht agus chuig an Aontas.

Tabharfaidh na Páirtithe an fhaisnéis cothrom le dáta i gcóras LICENCE.

9.   Soithí tacaíochta

Arna iarraidh sin don Aontas, údaróidh Guine Bissau do shoithí iascaireachta de chuid an Aontais a bhfuil údarú iascaireachta acu cúnamh a fháil ó shoithí tacaíochta. Beidh bratach Ballstáit den Aontas ar foluain ag soithí tacaíochta, nó bainfidh siad le cuideachta de chuid an Aontais, agus ní bheidh siad feistithe chun iascaireacht a dhéanamh.

Tarraingeoidh Guine Bissau suas liosta na soithí tacaíochta atá údaraithe agus seolfaidh sí gan mhoill é chuig an údarás náisiúnta atá freagrach as rialú a dhéanamh ar an iascaireacht agus chuig an Aontas.

Tabharfaidh na Páirtithe an fhaisnéis cothrom le dáta i gcóras LICENCE.

Ní mór údarú a bheith ag soithí tacaíochta chun na críche sin, arna eisiúint i gcomhréir le dlí Ghuine Bissau, faoi réir muirear bliantúil a íoc.

10.   Iniúchadh teicniúil is infheidhme maidir le trálaeir

Uair sa bhliain, nó tar éis tonnáiste an tsoithigh a athrú, nó i gcás ina mbeidh athrú ar an gcatagóir iascaireachta mar thoradh ar threalamh iascaireachta eile a úsáid, tiocfaidh trálaeir uile an Aontais i láthair i gcalafort Bissau chun go ndéanfar iniúchadh teicniúil, i gcomhréir le reachtaíocht Ghuine Bissau atá i bhfeidhm.

Is é is aidhm don iniúchadh teicniúil comhlíonadh shaintréithe teicniúla an tsoithigh agus an trealaimh iascaireachta ar bord a fhíorú, agus a fhíorú gur comhlíonadh na rialacháin sláinte agus na rialacha maidir le mairnéalaigh náisiúnta a thabhairt ar bord.

Ní mór do Ghuine Bissau an t-iniúchadh teicniúil a dhéanamh tráth nach déanaí ná 48 n-uair an chloig tar éis don trálaer teacht i gcalafort, ar choinníoll gur tugadh fógra roimh ré faoina theacht i dtír.

Ag deireadh an iniúchta theicniúil, eiseoidh Guine Bissau deimhniú comhréireachta do chaptaen an tsoithigh gan mhoill.

Beidh an deimhniú comhréireachta bailí ar feadh tréimhse bliana. Mar sin féin, beidh gá le deimhniú comhréireachta nua i gcás aon athrú ar an gcatagóir iascaireachta, is é sin i gcás ina rachfar i mbun na hiascaireachta séaclaí nó ina scoirfear den iascaireacht séaclaí. Ina theannta sin, beidh gá le deimhniú nua comhréireachta má fhágann an soitheach limistéar iascaireachta Ghuine Bissau ar feadh tréimhse níos faide ná 45 lá.

Ní mór an deimhniú comhréireachta a choimeád ar bord i gcónaí.

Is é úinéir an tsoithigh a iompróidh na costais a bhaineann leis an iniúchadh teicniúil agus is éard a bheidh iontu an méid a chinnfear de réir na rátaí a leagtar amach i reachtaíocht Ghuine Bissau. Ní fhéadfaidh na costais sin a bheith níos mó ná na méideanna a íocann soithí náisiúnta nó soithí a bhfuil bratach tríú Stát ar foluain acu as an tseirbhís chéanna.

ROINN 2

MUIRIR AGUS RÉAMHÍOCAÍOCHTAÍ

Sonraítear méid an mhuirir ar ráta comhréidh le haghaidh gach catagóire soithigh sna bileoga sonraí i bhFoscríbhinn 2 a ghabhann leis an Iarscríbhinn seo. Áirítear ann gach cáin náisiúnta agus áitiúil, cé is moite de dhleachtanna calafoirt, muirir chun seirbhísí a sholáthar agus an dleacht stampála is infheidhme maidir le méideanna táillí ceadúnais.

Is leis na rialacháin maidir le dleacht stampála a bheidh i bhfeidhm tráth sínithe an Phrótacail a chinnfear an ráta is infheidhme maidir le ceadúnais, ráta a fhanfaidh mar an gcéanna ar feadh fhad an Phrótacail.

I gcás ina mbeidh an t-údarú iascaireachta bailí ar feadh tréimhse is lú ná bliain amháin, déanfar méid an mhuirir ar ráta comhréidh a oiriúnú ar bhonn pro rata de réir na tréimhse bailíochta a iarradh. Cuirfear leis an méid coigeartaithe sin an méid breise a bheidh dlite as na tréimhsí 3 mhí nó 6 mhí, i gcás inarb iomchuí, i gcomhréir leis na rátaí a leagtar síos sna bileoga sonraí comhfhreagracha.

CAIBIDIL III

BEARTA TEICNIÚLA CAOMHNÚCHÁIN

Na bearta teicniúla is infheidhme maidir le soithí de chuid an Aontais a bhfuil údarú iascaireachta acu, ar bearta iad a bhaineann leis an limistéar, an trealamh iascaireachta agus leibhéal na bhfoghabhálacha, déantar iad a shainiú le haghaidh gach catagóire iascaireachta sna bileoga sonraí i bhFoscríbhinn 2 a ghabhann leis an Iarscríbhinn seo.

Comhlíonfaidh soithí tuinníní na moltaí uile arna nglacadh ag CITAC.

CAIBIDIL IV

GABHÁLACHA A DHEARBHÚ

1.   Logleabhar iascaireachta

An captaen ar shoitheach de chuid an Aontais a dhéanann iascaireacht faoin gComhaontú, coimeádfaidh sé logleabhar iascaireachta. I gcás soithí tuinníní, beidh an logleabhar iascaireachta i gcomhréir le rúin ábhartha CITAC lena rialaítear bailiú agus tarchur sonraí a bhaineann le gníomhaíochtaí iascaireachta.

Aon soitheach de chuid an Aontais, ní mór é a fheistiú le córas leictreonach (dá ngairtear ‘ERS’ anseo feasta) lenar féidir sonraí a bhaineann le gníomhaíocht iascaireachta an tsoithigh a thaifeadadh agus a tharchur (dá ngairtear ‘sonraí ERS’ anseo feasta).

Ní fhéadfaidh soitheach de chuid an Aontais nach bhfuil feistithe le ERS, nó nach bhfuil a ERS ag feidhmiú, dul isteach i limistéar iascaireachta Ghuine Bissau chun gníomhaíochtaí iascaireachta a dhéanamh ann.

Déanfaidh an captaen an logleabhar iascaireachta a líonadh isteach le haghaidh gach lae a bheidh an soitheach i limistéar iascaireachta Ghuine Bissau. Déanfaidh an soitheach sonraí ERS a tharchur chuig a Stát brataí, a chuirfidh ar fáil go huathoibríoch iad do Lárionad Faireacháin Iascaigh Ghuine Bissau (dá ngairtear ‘LFI’ anseo feasta), a luaithe a bheidh a chóras ERS feidhmiúil.

Déanfar sonraí ERS a tharchur trí úsáid a bhaint as na modhanna cumarsáide leictreonacha atá á mbainistiú ag an gCoimisiún Eorpach chun sonraí maidir leis an iascaireacht a mhalartú i bhfoirm chaighdeánaithe. Déanfar na ceanglais theicniúla maidir leis an gcumarsáid trí bhíthin ERS a bhailíochtú sa Chomhchoiste.

Gach lá, déanfaidh an captaen cainníocht gach speicis a thaifeadadh sa logleabhar iascaireachta, arna shainaithint lena chód alfa 3 FAO agus a gabhadh nó a choimeádtar ar bord, arna sloinneadh i gcileagraim bheomheáchain nó, i gcás inarb infheidhme, i líon na n-aonán.

I gcás inarb iomchuí, déanfaidh an captaen cainníochtaí gach speicis a cuireadh ar ais san fharraige a thaifeadadh gach lá sa logleabhar iascaireachta freisin, arna sloinneadh i gcileagraim bheomheáchain nó, i gcás inarb infheidhme, i líon na n-aonán.

Nuair a tharchuirfear an logleabhar iascaireachta chuig údaráis Ghuine Bissau, beidh sé líonta isteach ar bhealach soléite, i gceannlitreacha, agus beidh sé sínithe ag an gcaptaen.

Is é an captaen atá freagrach as cruinneas na sonraí arna dtaifeadadh sa logleabhar iascaireachta.

2.   Gabhálacha a dhearbhú

Riail maidir le gabhálacha a dhearbhú fad nach n-úsáidtear an ERS

Dearbhóidh an captaen gabhálacha an tsoithigh trína logleabhair iascaireachta a bhaineann leis an tréimhse a bheidh sé i limistéar iascaireachta Ghuine Bissau a thabhairt ar láimh do Ghuine Bissau.

Tarchuirfidh an captaen na logleabhair iascaireachta chuig Guine Bissau trí úsáid a bhaint as an seoladh ríomhphoist a cuireadh in iúl chun na críche sin. Dearbhóidh Guine Bissau go bhfuarthas é gan mhoill trí ríomhphost a sheoladh ar ais.

De rogha air sin, féadfar logleabhair iascaireachta a tharchur ar an mbealach seo a leanas:

(a)

i gcás ina bhfuiltear ag dul trí chalafort de chuid Ghuine Bissau, tabharfar an leagan bunaidh de gach logleabhar iascaireachta ar láimh d’ionadaí Ard-Stiúrthóireacht Iascach Tionsclaíoch Ghuine Bissau (dá ngairtear ‘Ard-Stiúrthóireacht an Iascaigh Thionsclaíoch’ anseo feasta), a dhearbhóidh i scríbhinn go bhfuarthas é;

(b)

i gcás ina bhfuiltear ag imeacht as limistéar iascaireachta Ghuine Bissau gan dul trí chalafort de chuid Ghuine Bissau ar dtús, seolfar an leagan bunaidh de gach logleabhar iascaireachta tríd an bpost laistigh de 14 lá tar éis an theacht isteach in aon chalafort eile, agus in aon chás laistigh de 30 lá tar éis imeacht as limistéar iascaireachta Ghuine Bissau.

Seolfaidh an captaen cóip de na logleabhair iascaireachta uile chuig an Aontas. I gcás soithí tuinníní agus báid spiléireachta dromchla, cuirfidh an máistir cóip de na logleabhair iascaireachta uile chuig ceann de na hinstitiúidí eolaíocha seo a leanas freisin:

(a)	IRD (Institut de recherche pour le développement);

(b)	IEO (Instituto Español de Oceanografia); nó

(c)	IPMA (Instituto Português do Mar e da Atmosfera).

I gcás ina dtiocfaidh an soitheach ar ais i limistéar iascaireachta Ghuine Bissau le linn thréimhse bhailíochta a údaraithe iascaireachta, ní mór dó a ghníomhaíochtaí agus a ghabhálacha a dhearbhú arís.

I gcás nach gcomhlíonfar forálacha na Caibidle seo, féadfaidh Guine Bissau údarú iascaireachta an tsoithigh lena mbaineann a chur ar fionraí go dtí go ndearbhófar na gabhálacha atá ar iarraidh agus pionós a ghearradh ar úinéir an tsoithigh i gcomhréir leis na forálacha dá bhforáiltear chuige sin sa reachtaíocht náisiúnta atá i bhfeidhm. Má dhéantar an cion arís, féadfaidh Guine Bissau diúltú an t-údarú iascaireachta a athnuachan. Cuirfidh Guine Bissau an tAontas ar an eolas gan mhoill faoi aon phionós a ghearrfar sa chomhthéacs sin.

Riail maidir le gabhálacha a dhearbhú a luaithe a úsáidfear an ERS

Is mar seo a leanas a chuirfear na gabhálacha in iúl:

(a)

déanfaidh captaein na soithí uile a oibríonn faoin bPrótacal seo in uiscí Ghuine Bissau an logleabhar iascaireachta leictreonach a líonadh isteach gach lá agus seolfaidh siad é tríd an ERS, nó i gcás nach bhfuil sin ag feidhmiú, le ríomhphost chuig LFI an Stáit brataí agus chuig LFI Ghuine Bissau laistigh de 7 lá tar éis dóibh imeacht as an limistéar iascaireachta;

(b)

ní mór cainníocht gach speicis a shonrú sa logleabhar iascaireachta, speiceas arna shainaithint lena chód alfa 3 FAO agus a gabhadh nó a choimeádtar ar bord, arna sloinneadh i gcileagraim bheomheáchain nó, i gcás inarb infheidhme, i líon na n-aonán. I gcás gach príomhspeicis, luafaidh an captaen gabhálacha nialasacha freisin. Déanfaidh sé cainníochtaí gach speicis a cuireadh ar ais san fharraige a thaifeadadh freisin, arna sloinneadh i gcileagraim bheomheáchain nó, i gcás inarb infheidhme, i líon na n-aonán.

Déanfaidh an soitheach sonraí ERS a tharchur chuig a Stát brataí a chuirfidh ar fáil do Ghuine Bissau go huathoibríoch iad. Áiritheoidh an Stát brataí go bhfaighfear iad agus go ndéanfar iad a thaifeadadh i mbunachar sonraí TF lenar féidir na sonraí sin a stóráil go slán ar feadh 36 mhí ar a laghad.

Áiritheoidh an Stát brataí agus Guine Bissau go mbeidh an trealamh agus na bogearraí TF is gá acu chun sonraí ERS a tharchur go huathoibríoch.

Ní mór sonraí ERS a tharchur trí úsáid a bhaint as na modhanna cumarsáide leictreonacha atá á mbainistiú ag an gCoimisiún Eorpach chun sonraí maidir leis an iascaireacht a mhalartú i bhfoirm chaighdeánaithe.

I gcás nach gcomhlíonfar na forálacha a bhaineann le gabhálacha a dhearbhú, féadfaidh Guine Bissau údarú iascaireachta an tsoithigh lena mbaineann a chur ar fionraí go dtí go bhfaighfear na gabhálacha atá ar iarraidh agus pionós a ghearradh ar úinéir an tsoithigh i gcomhréir leis na forálacha dá bhforáiltear chuige sin sa reachtaíocht náisiúnta atá i bhfeidhm. Má dhéantar an cion arís, féadfaidh Guine Bissau diúltú an t-údarú iascaireachta a athnuachan. Cuirfidh Guine Bissau an tAontas ar an eolas gan mhoill faoi aon phionós a ghearrfar sa chomhthéacs sin.

Ainmneoidh an Stát brataí agus Guine Bissau araon a chomhfhreagraí ERS féin a bheidh ina phointe teagmhála le haghaidh saincheisteanna a bhaineann le cur chun feidhme na hIarscríbhinne seo. Seolfaidh an Stát brataí agus Guine Bissau sonraí teagmhála a gcomhfhreagraithe ERS chuig a chéile agus, i gcás inarb iomchuí, tabharfaidh siad an fhaisnéis sin cothrom le dáta gan mhoill.

3.   Ráiteas críochnaitheach na muirear i gcás soithí tuinníní

I gcás gach soithigh tuinníní agus ar bhonn a dhearbhuithe gabhálacha, tarraingeoidh an tAontas suas ráiteas críochnaitheach na muirear nach mór don soitheach a íoc mar gheall ar a shéasúr bliantúil den bhliain roimhe sin.

Seolfaidh an tAontas an ráiteas críochnaitheach sin chuig Guine Bissau ar a dhéanaí faoin 30 Aibreán an bhliain tar éis na bliana a rinneadh na gabhálacha. Beidh mí amháin ag Guine Bissau chun an ráiteas sin a bhailíochtú nó soiléiriú a iarraidh.

Má tá méid an ráitis chríochnaithigh níos mó ná an muirear ar ráta comhréidh a íocadh chun an t-údarú iascaireachta a fháil, íocfaidh úinéir an tsoithigh an fuílleach le Guine Bissau gan mhoill. Má tá méid an ráitis chríochnaithigh níos lú ná an muirear ar ráta comhréidh, ní fhéadfaidh úinéir an tsoithigh an tsuim iarmhair a fháil ar ais.

CAIBIDIL V

TABHAIRT I dTÍR AGUS TRASLOINGSIÚ

1.   Gabhálacha a thabhairt i dtír nó a thrasloingsiú

Ní mór do chaptaen soithigh de chuid an Aontais ar mian leis gabhálacha a rinneadh i limistéar iascaireachta Ghuine Bissau a thabhairt i dtír nó a thrasloingsiú i gcalafort Bhissau fógra faoin méid seo a leanas a thabhairt d’ionadaí Ard-Stiúrthóireacht na nIascach Tionsclaíoch 24 uair an chloig ar a laghad roimh an tabhairt i dtír nó an trasloingsiú:

(a)	ainm an tsoithigh de chuid an Aontais a thabharfaidh i dtír nó a dhéanfaidh an trasloingsiú;

(b)	calafort an tabhairt i dtír nó an trasloingsithe;

(c)	an dáta agus an t-am a bheartaítear an tabhairt i dtír nó an trasloingsiú a dhéanamh;

(d)	cainníocht (arna sloinneadh i gcileagraim bheomheáchain nó, i gcás inarb infheidhme, i líon na n-aonán) gach speicis atá le tabhairt i dtír nó le trasloingsiú (arna shainaithint lena chód alfa 3 FAO);

(e)	i gcás trasloingsithe, ainm an tsoithigh glactha.

I gcás trasloingsithe, áiritheoidh an captaen go bhfuil údarú ag an soitheach glactha, ar údarú é a d’eisigh na húdaráis inniúla le haghaidh na hoibríochta sin.

Ní mór an oibríocht trasloingsithe a dhéanamh i gcomhréir le reachtaíocht Ghuine Bissau i gcalafort Bhissau, agus déanfaidh na húdaráis inniúla comhordanáidí geografacha an chalafoirt sin a tharchur chuig captaen agus gníomhaire an tsoithigh. Beidh toirmeasc ar an trasloingsiú ar muir.

Mura gcomhlíonfar na forálacha sin, gearrfar na pionóis dá bhforáiltear chuige sin i reachtaíocht Ghuine Bissau.

2.   Ranníocaíocht chomhchineáil le haghaidh na slándála bia

Beidh trálaeir a bhíonn ag iascaireacht i nGuine Bissau faoi réir oibleagáid cuid dá ngabhálacha a thabhairt i dtír i nGuine Bissau, ar mhaithe le slándáil bia na tíre. Comhlíonfaidh an tabhairt i dtír na ceanglais seo a leanas:

(a)	2,5 tona in aghaidh na ráithe in aghaidh an tsoithigh i gcás trálaeir iasc eite/ceifileapód,

(b)	1,25 tona in aghaidh na ráithe in aghaidh an tsoithigh i gcás trálaeir séaclaí.

Chun cur chun feidhme an bhirt sin a éascú, féadfaidh roinnt soithí an rannchuidiú in aghaidh an tsoithigh a ghrúpáil le chéile agus féadfar é a chur ar fáil go carnach le haghaidh roinnt ráithí. Déanfar an tabhairt i dtír i limistéar calafoirt Bhissau agus is é ionadaí Ard-Stiúrthóireacht na nIascach Tionsclaíoch a ghlacfaidh iad.

I gcomhréir le hAirteagal 5 den Chomhaontú, ní mór go gcomhlíonfaidh an tabhairt i dtír a chumhdaítear sa Chaibidil seo na rialacháin atá i bhfeidhm i nGuine Bissau, go háirithe na rialacháin sin a bhaineann le híosmhéid na speiceas a mbaineann an oibleagáid tabhairt i dtír leo. I gcomhthéacs na hoibleagáide sin, ní thabharfaidh soithí de chuid an Aontais i dtír ach speicis éisc a n-údaraítear iad a ghabháil faoin bPrótacal seo, lena n-áirítear foghabhálacha údaraithe.

Déanfaidh Ard-Stiúrthóireacht na nIascach Tionsclaíoch foirm maidir le glacadh an rannchuidithe comhchineáil sin a tharraingt suas agus a shíniú gach uair agus a thabhairt don chaptaen.

CAIBIDIL VI

RIALÚ AGUS INIÚCHADH

1.   Dul isteach i limistéar iascaireachta Cabo Verde agus imeacht as

Gach uair a théann soitheach de chuid an Aontais a bhfuil údarú iascaireachta aige isteach i limistéar iascaireachta Ghuine Bissau nó a imíonn as, ní mór dó fógra a thabhairt do Ghuine Bissau faoi sin laistigh de 24 uair an chloig roimh dhul isteach ann nó imeacht as. Laghdaítear an tréimhse sin go 4 uair an chloig i gcás soithí tuinníní.

Nuair a bheidh fógra á thabhairt ag an soitheach go bhfuil sé ag dul isteach nó ag imeacht, sonróidh sé an méid seo a leanas go háirithe:

(a)	an dáta, an t-am agus an láthair a bheartaítear;

(b)	cainníocht gach speicis a choimeádtar ar bord, arna shainaithint lena chód alfa 3 FAO agus arna sloinneadh i gcileagraim bheomheáchain nó, i gcás inarb infheidhme, i líon na n-aonán;

(c)	cur i láthair na dtáirgí.

Tabharfar an fógra le ríomhphost más féidir nó, ina éagmais sin, le facs nó ar an raidió, chuig seoladh ríomhphoist, uimhir theileafóin nó minicíocht arna cur in iúl ag Guine Bissau. Cuirfidh Guine Bissau na soithí lena mbaineann agus an tAontas ar an eolas gan mhoill faoi aon athrú ar na seoltaí ríomhphoist, ar an uimhir theileafóin nó ar an minicíocht tarchurtha.

Aon soitheach a mbéarfar air agus é i mbun iascaireachta i limistéar iascaireachta Ghuine Bissau gan fógra a thabhairt roimh ré go mbeadh sé ann, measfar gur soitheach é atá i mbun iascaireachta gan údarú.

2.   Teachtaireachtaí maidir le suíomh na soithí — VMS

Agus iad i limistéar iascaireachta Ghuine Bissau, ní mór do shoithí de chuid an Aontais a bheith feistithe le córas faireacháin satailíte (Vessel Monitoring System, VMS) lena n-áirithítear go gcuirtear a suíomh in iúl go huathoibríoch agus go leanúnach, gach uair an chloig, do LFI a Stáit brataí.

Beidh toirmeasc ar an ngaireas rianaithe leanúnaigh a bhaineann úsáid as an gcumarsáid satailíte a cuireadh ar bord an tsoithigh chun sonraí a tharchur a bhogadh, a dhícheangal, a scriosadh, a dhamáistiú nó a chur ó mhaith, nó sonraí a astaítear nó a thaifeadtar leis an gcóras sin a athrú d’aon ghnó, a atreorú nó a bhrionnú.

Tabharfar na fógraí faoi na teachtaireachtaí suímh agus faoi ghabhálacha leis an VMS/ERS más féidir, nó i gcás mhífheidhmiú sa chóras sin, le ríomhphost, le facs nó ar an raidió. Cuirfidh Guine Bissau na soithí lena mbaineann agus an tAontas ar an eolas gan mhoill faoi aon athrú ar an seoladh ríomhphoist, ar an uimhir theileafóin nó ar an minicíocht tarchurtha.

Ní mór an méid seo a leanas a bheith i ngach teachtaireacht suímh:

(a)	sonraí aitheantais an tsoithigh;

(b)	suíomh geografach is déanaí an tsoithigh (domhanleithead, domhanfhad), lena ngabhann lamháil earráide is lú ná 500 méadar eatramh muiníne 99 %;

(c)	an dáta agus an t-am a taifeadadh an suíomh; agus

(d)	luas agus cúrsa an tsoithigh.

Aon soitheach a mbéarfar air agus é i mbun iascaireachta i limistéar iascaireachta Ghuine Bissau gan fógra a thabhairt roimh ré go mbeadh sé ann, measfar gur soitheach é atá sárú déanta aige.

3.   Iniúchadh ar muir nó i gcalafort

Is iad soithí agus cigirí Ghuine Bissau, a shainaithneofar go soiléir gur sannadh iad chun rialú a dhéanamh ar an iascaireachta, a dhéanfaidh iniúchadh ar muir i limistéar iascaireachta Ghuine Bissau, nó i gcalafort, ar shoithí de chuid an Aontais a bhfuil údarú iascaireachta acu.

Roimh dhul ar bord, cuirfidh cigirí Ghuine Bissau soitheach de chuid an Aontais ar an eolas maidir lena gcinneadh iniúchadh a dhéanamh. Beirt chigirí ar a mhéad a dhéanfaidh an t-iniúchadh, agus ní mór dóibh cruthúnas a sholáthar ar a gcéannacht agus ar a bpost oifigiúil mar chigire sula ndéanfaidh siad an t-iniúchadh. Féadfaidh ionadaithe fhórsaí slándála náisiúnta Ghuine Bissau a bheith in éineacht leo, i gcás inarb iomchuí, i gcomhréir le dlí idirnáisiúnta na mara.

Ní fhanfaidh cigirí Ghuine Bissau ar bord an tsoithigh de chuid an Aontais ach ar feadh an ama is gá chun na cúraimí a bhaineann leis an iniúchadh a dhéanamh. Déanfaidh siad an t-iniúchadh ar bhealach a n-íoslaghdóidh an tionchar ar an soitheach, ar a ghníomhaíocht iascaireachta agus ar a lasta.

Féadfaidh Guine Bissau cigirí atá creidiúnaithe ag an Aontas a údarú chun páirt a ghlacadh san iniúchadh mar bhreathnóirí.

Déanfaidh captaen an tsoithigh de chuid an Aontais dul ar bord agus obair chigirí Ghuine Bissau a éascú.

Ag deireadh gach iniúchta, déanfaidh chigirí Ghuine Bissau tuarascáil iniúchóireachta a tharraingt suas. Beidh sé de cheart ag captaen an tsoithigh de chuid an Aontais a bharúlacha a chur sa tuarascáil iniúchóireachta. Is iad na daoine seo a leanas a shíneoidh an tuarascáil iniúchóireachta: an cigire a tharraing suas í agus captaen an tsoithigh de chuid an Aontais.

Tabharfaidh cigirí Ghuine Bissau cóip den tuarascáil iniúchóireachta do chaptaen an tsoithigh de chuid an Aontais sula bhfágfaidh sé an soitheach. Seolfaidh Guine Bissau cóip den tuarascáil iniúchóireachta chuig an Aontas laistigh de thréimhse 8 lá tar éis an iniúchta.

4.   Gabhálacha a rialú

Go dtí go n-úsáidfear an ERS iarbhír, oibríochtaí rialaithe samplála chun scrúdú a dhéanamh ar chomhlíontacht na ngabhálacha leis na heilimintí a dhearbhaítear sna logleabhair iascaireachta, déanfar na hoibríochtaí sin ar bhonn uainíochta ar thrian amháin de thrálaeir an Aontais atá údaraithe chun iascaireacht a dhéanamh, in aghaidh na ráithe. Ina dhiaidh sin, déanfar athbhreithniú ar mhinicíocht na n-oibríochtaí rialaithe gabhálacha chun tabhairt isteach an fhíoraithe ar shonraí gabhála leis an ERS a chur san áireamh.

Déanfar gach iniúchadh ag deireadh an turais iascaireachta tar éis fógra 24 uair an chloig agus ní mhairfidh sé níos mó ná 4 uair an chloig.

Déanfar na hoibríochtaí rialaithe sin ag pointe a dtarchuirfidh na húdaráis inniúla a chomhordanáidí geografacha chuig captaen agus gníomhaire an tsoithigh i gcomhréir le reachtaíocht náisiúnta Ghuine Bissau.

CAIBIDIL VII

SÁRAITHE

1.   Forálacha ginearálta

I gcomhréir le hAirteagal 5 den Chomhaontú, beidh feidhm ag rialacháin Guine Bissau i dtaca le gníomhaíochtaí iascaireachta a rialú maidir le soithí de chuid an Aontais atá i mbun gníomhaíochtaí sa limistéar iascaireachta faoin bPrótacal seo.

Déanfaidh an tAontas gach beart is iomchuí chun a áirithiú go gcomhlíonfaidh soithí a bhfuil bratach ceann dá Bhallstáit ar foluain acu forálacha an Phrótacail seo agus an reachtaíocht lena rialaítear an iascaireacht in uiscí Ghuine Bissau, i gcomhréir le Coinbhinsiún na Náisiún Aontaithe maidir le Dlí na Farraige.

2.   Láimhseáil sáruithe

Aon sárú a dhéanfaidh soitheach de chuid an Aontais a bhfuil údarú iascaireachta aige i ndáil le forálacha an Phrótacail seo, ní mór fógra faoi a thabhairt don Aontas laistigh de 48 n-uair an chloig ina léireofar cineál an tsáraithe. Déanfar an cinneadh maidir leis an sárú sin a tharchur chuig an Aontas agus chuig an Stát brataí laistigh de 7 lá oibre.

Beidh síniú na tuarascála iniúchóireachta ag an gcaptaen gan dochar do cheart úinéir an tsoithigh é féin a chosaint in aghaidh an tsáraithe a ndearnadh gearán ina leith.

3.   Dul ar bord soithigh — cruinniú faisnéise

Má dhéantar foráil sa reachtaíocht náisiúnta maidir leis an sárú a ndearnadh gearán ina leith, féadfar a cheangal ar aon soitheach de chuid an Aontais a rinne sárú scor dá ghníomhaíocht iascaireachta agus, i gcás ina mbeidh an soitheach ar muir, filleadh ar chalafort de chuid Ghuine Bissau.

Tabharfaidh Guine Bissau fógra don Aontas laistigh de 48 n-uair an chloig ar a mhéad faoi dhul ar bord soithigh de chuid an Aontais a bhfuil údarú iascaireachta aige. Beidh fianaise dhoiciméadach ar an sárú a ndearnadh gearán ina leith ag gabháil leis an bhfógra sin.

Sula ndéanfaidh Guine Bissau aon bheart in aghaidh an tsoithigh, an chaptaein, nó an lastais, cé is moite de bhearta arb é is aidhm dóibh fianaise a chosaint, eagróidh sí, arna iarraidh sin don Aontas, laistigh de lá oibre amháin tar éis gur tugadh fógra faoi dhul ar bord an tsoithigh, cruinniú faisnéise chun na fíricí a shoiléiriú as ar eascair dul ar bord an tsoithigh agus chun míniú a thabhairt ar bhearta breise a d’fhéadfaí a dhéanamh. Féadfaidh ionadaí Stát brataí an tsoithigh a bheith i láthair ag an gcruinniú faisnéise sin.

4.   Pionós mar gheall ar shárú — Nós imeachta um réiteach

Socróidh Guine Bissau an pionós mar gheall ar an sárú a ndearnadh gearán ina leith de réir fhorálacha na reachtaíochta náisiúnta atá i bhfeidhm.

I gcás ina mbainfidh imeachtaí breithiúnacha le réiteach an tsáraithe agus sula dtionscnófar iad, tionscnófar nós imeachta um réiteach idir Guine Bissau agus an tAontas chun téarmaí agus leibhéal an phionóis a chinneadh. Féadfaidh ionadaí Stát brataí an tsoithigh a bheith rannpháirteach sa nós imeachta sin um réiteach. Tiocfaidh deireadh leis an nós imeachta um réiteach 4 lá ar a dhéanaí tar éis fógra a thabhairt faoi dhul ar bord an tsoithigh.

5.   Imeachtaí breithiúnacha — Urrús bainc

Má theipeann ar an nós imeachta um réiteach agus má thugtar an sárú os comhair na cúirte inniúla, déanfaidh úinéir an tsoithigh a rinne an sárú urrús bainc a thaisceadh i mbanc arna ainmniú ag Guine Bissau, agus cumhdófar le méid an urrúis, arna socrú ag Guine Bissau, na costais a bhaineann le dul ar bord an tsoithigh, an fhíneáil mheasta agus aon chúiteamh a d’fhéadfadh a bheith ann. Coinneofar an t-urrús bainc in eascró go dtí go dtabharfar na himeachtaí breithiúnacha i gcrích.

Scaoilfear an t-urrús bainc agus tabharfar ar ais d’úinéir an tsoithigh é gan mhoill tar éis thabhairt an bhreithiúnais:

(a)	ina iomláine, murar gearradh aon phionós;

(b)	tabharfar ar ais méid an fhuílligh atá fágtha, más fíneáil atá sa phionós ar lú í ná méid an urrúis bainc.

Cuirfidh Guine Bissau an tAontas ar an eolas faoi thoradh na n-imeachtaí breithiúnacha laistigh de 8 lá tar éis thabhairt an bhreithiúnais.

6.   Scaoileadh an tsoithigh

Údarófar don soitheach agus dá chaptaen an calafort a fhágáil a luaithe a réiteofar an pionós arna eascairt as an nós imeachta um réiteach, nó a luaithe a thaiscfear an t-urrús bainc.

CAIBIDIL VIII

IASCAIRÍ A FHOSTÚ AR BORD SOITHÍ DE CHUID AN AONTAIS

1.   An líon iascairí atá le tabhairt ar bord

Tabharfaidh oibreoir soithigh de chuid an Aontais atá údaraithe faoin bPrótacal seo iascairí de chuid Eagraíocht na Stát san Afraic, i Muir Chairib agus san Aigéan Ciúin (OEACP) ar bord chun oibriú ar bord a shoithigh mar bhaill den chriú fad a mhairfidh gníomhaíochtaí iascaireachta an tsoithigh faoin bPrótacal.

Ar feadh thréimhse bhailíochta a údaraithe iascaireachta, tabharfaidh gach soitheach tráil ghrinnill de chuid an Aontais iascairí ar náisiúnaigh de chuid Ghuine Bissau iad ar bord laistigh de na teorainneacha seo a leanas:

(a)	seisear iascairí, i gcás toilleadh níos lú ná 250 OTC;

(b)	seachtar iascairí, i gcás toilleadh idir 250 agus 400 OTC;

(c)	ochtar iascairí, i gcás toilleadh níos mó ná 400 OTC.

Na hiascairí atá le tabhairt ar bord de bhun na míre seo, comhlíonfaidh siad ceanglais reachtaíocht an Stáit brataí lena dtrasuitear Treoir (AE) 2017/159 ón gComhairle (2), lena n-áirítear a mhéid a bhaineann leis an bpas, an leabhar mairnéalaigh, an deimhniú leighis agus an oiliúint tosaigh. Seolfaidh an Stát brataí liosta na gceanglas a eascraíonn as an reachtaíocht sin chuig údaráis Guine Bissau luath go leor roimh ré. Beidh iascairí de chuid thíortha OEACP atá le tabhairt ar bord i gcomhréir leis an mír seo in ann an teanga oibre atá leagtha síos ar bord an tsoithigh iascaireachta a thuiscint.

Déanfaidh údaráis inniúla Guine Bissau liosta na n-iascairí inniúla a tharraingt suas, a thabhairt cothrom le dáta go tráthrialta agus a sheoladh chuig úinéirí na soithí.

Déanfaidh an scipéir liosta an chriú a tharraingt suas, a shíniú agus dáta a chur leis i gcomhréir le Foirm 5 de Choinbhinsiún IMO maidir le Muirthrácht Idirnáisiúnta a Éascú, agus tarchuirfidh sé cóip den liosta sin chuig údaráis Ghuine Bissau sula bhfágfaidh an soitheach limistéar an chalafoirt.

Diúltóidh úinéir an tsoithigh, nó diúltóidh an captaen thar a cheann, iascaire a ligean ar bord ar a shoitheach mura gcomhlíonann an t-iascaire sin na ceanglais dá dtagraítear sa tríú fomhír den mhír seo.

Déanfaidh úinéirí soithí de chuid an Aontais iarracht iascairí náisiúnta breise a thabhairt ar bord.

2.   Dálaí oibre

Na dálaí faoina dtabharfar iascairí de chuid thíortha OEACP ar bord, beidh siad i gcomhréir le reachtaíocht an Stáit brataí lena dtrasuitear Treoir (AE) 2017/159, lena n-áirítear a mhéid a bhaineann le huaireanta oibre nó uaireanta scíthe, cearta aisdúichithe agus sábháilteacht agus sláinte cheirde.

3.   Comhaontú fostaíochta an iascaire

I gcás gach iascaire a fhostófar ar bord soithigh de chuid an Aontais i gcomhréir le pointe 1, déanfaidh an t-iascaire agus an fostóir araon comhaontú fostaíochta i scríbhinn a chaibidliú agus a shíniú, agus déanfaidh údarás inniúil Ghuine Bissau é a fhormhuiniú.

Beidh an Comhaontú i gcomhréir le ceanglais reachtaíocht an Stáit brataí lena dtrasuitear Treoir (AE) 2017/159 (Iarscríbhinn I a ghabhann leis an Treoir).

4.   Luach saothair na n-iascairí

Iompróidh úinéir an tsoithigh na costais a bhaineann leis an luach saothair nó le saothar breise go díreach, nó, i gcás inar seirbhís phríobháideach sa mhargadh saothair é fostóir an iascaire, iompróidh sé go hindíreach iad.

Ní mór tuarastal ráthaithe míosúil nó tráthrialta a íoc le hiascairí de chuid thíortha OEACP, trí aistriú bainc más féidir. Déanfar é a chinneadh de chomhthoil idir úinéirí na soithí nó a ngníomhairí agus na hiascairí agus/nó a gceardchumainn nó a n-ionadaithe. I gcás nár tugadh comhaontuithe cómhargála i gcrích agus nach bhfuil feidhm ag bunphá íosta na Stát brataí, ní fhéadfaidh na bunchoinníollacha pá a dheonaítear d’iascairí de chuid thíortha OEACP a bheith faoi bhun chaighdeáin EIS.

Costais a d’fhéadfadh a bheith ann a bhaineann le híocaíochtaí a gheofar, ní bheidh ar iascairí iad a iompar. Tabharfar caoi d’iascairí chun na híocaíochtaí uile a gheofar, nó cuid díobh, lena n-áirítear réamhíocaíochtaí, a sheoladh chuig a dteaghlach saor in aisce.

Ní mór duillín pá a thabhairt don iascaire maidir le gach íocaíocht dá luach saothair agus, má iarrann sé amhlaidh, cruthúnas gur íocadh an tuarastal.

5.   Slándáil shóisialta

Áiritheoidh Guine Bissau go mbeidh iascairí a bhfuil gnáthchónaí orthu ar a críoch maille lena gcuid cleithiúnaithe, a mhéid dá bhforáiltear leis an dlí náisiúnta, i dteideal cosaint shóisialta faoi choinníollacha atá chomh fabhrach céanna leis na coinníollacha is infheidhme maidir le hoibrithe eile, go háirithe oibrithe agus daoine féinfhostaithe, a bhfuil gnáthchónaí orthu ar a críoch.

6.   Seirbhísí príobháideacha chun maraithe a earcú agus a shocrú

Ciallaíonn seirbhísí príobháideacha de chuid mhargadh an tsaothair an méid seo a leanasseirbhís príobháideach chun maraithe a earcú agus a shocrú, is é sin aon duine, cuideachta, institiúid, gníomhaireacht nó eagraíocht eile, lena n-áirítear gníomhairí arna roghnú ag úinéirí soithí, atá i mbun gníomhaíochtaí chun iascairí a earcú thar ceann úinéirí soithí nó chun iascairí a chur ar socrúchán leo.

Áiritheoidh údaráis Ghuine Bissau an méid seo a leanas maidir le gníomhairí Ghuine Bissau a sholáthraíonn seirbhísí earcaíochta agus socrúcháin d’iascairí agus d’úinéirí soithí araon:

(a)	ní bhainfidh siad úsáid as modhanna, sásraí nó liostaí arb é is aidhm dóibh iascairí a chosc fostaíocht a fháil nó an méid sin a dhíspreagadh;

(b)	ní ghearrfaidh siad táillí ná costais eile ar iascairí, in airgead tirim ná i gcomhchineál, go díreach nó go hindíreach, go hiomlán nó go páirteach, as na seirbhísí de chuid mhargadh an tsaothair a sholáthraíonn siad;

(c)	ní dheonóidh siad iasachtaí agus ní sholáthróidh siad earraí ná seirbhísí don iascaire a mbeidh ar an iascaire iad a aisíoc nó íoc astu;

(d)	ní bhainfidh siad amach as saothair an iascaire íocaíocht nó aisíocaíocht as iasachtaí, earraí nó seirbhísí a soláthraíodh sular fostaíodh an t-iascaire; agus

(e)

áiritheoidh siad an méid seo a leanas: (i) comhlíonann comhaontú fostaíochta an iascaire an chaibidil seo, na dlíthe, na rialacháin agus na comhaontuithe cómhargála lena rialaítear comhaontú fostaíochta an iascaire; (ii) déantar comhaontú fostaíochta an iascaire a scríobh i dteanga a thuigeann an t-iascaire agus i dteanga oifigiúil nó oibre an tsoithigh iascaireachta de chuid an Aontais lena mbaineann; (iii) cuirtear na hiascairí a fhostaítear ar an eolas, sula síneofar a gcomhaontú fostaíochta, faoina gcearta agus faoina n-oibleagáidí; (iv) déantar na bearta is gá lenar féidir le hiascairí a fhostaítear scrúdú a dhéanamh ar théarmaí a gcomhaontaithe fostaíochta agus comhairle a lorg ina leith sula síníonn siad é; (v) faigheann iascairí a fhostaítear cóip shínithe dá gcomhaontú fostaíochta; (vi) comhlíonann iascairí a n-oibleagáidí faoin gcaibidil seo; agus (vii) faigheann úinéir an tsoithigh in am trátha cóip de gach duillín pá agus cruthúnas ar íocaíocht i gcás gach réiteach luacha saothair má íocann an gníomhaire an luach saothair.

Áiritheoidh údaráis Ghuine Bissau go n-áiritheoidh oifigigh náisiúnta a fhostaíonn iascairí atá ceaptha ar bord soithí iascaireachta de chuid an Aontais go léireofar i gcomhaontuithe fostaíochta na n-iascairí, a síníodh i dteannta na n-iascairí sin, go bhfuil siad fostaithe ag an ngníomhaire, d’fhonn iad a chur ar fáil d’úinéirí na soithí a shannfaidh cúraimí dóibh agus a dhéanfaidh maoirseacht ar chur i gcrích na gcúraimí sin.

De mhaolú ar phointe (b) den dara fomhír, is é an t-iascaire a iompróidh na costais a bhaineann le leabhar mairnéalaigh, deimhniú leighis agus pas a fháil. Is é an fostóir a iompróidh na costais a bhaineann le víosa agus cead oibre a fháil, i gcás inarb infheidhme.

7.   Comhlíonadh na Caibidle seo

Áiritheoidh údaráis inniúla an dá Pháirtí go mbeidh an reachtaíocht is infheidhme maidir le hiascairí inrochtana go héasca agus saor in aisce i bhfoirm chuimsitheach thrédhearcach.

Áiritheoidh údaráis Guine Bissau cur chun feidhme cuí na caibidle seo i gcomhréir leis na hoibleagáidí atá orthu faoin dlí idirnáisiúnta agus i gcomhréir leis na hoibleagáidí a leagtar síos sa Chaibidil seo.

Áiritheoidh údaráis an Stáit brataí go gcuirfear míreanna 1, 2 agus 3 i bhfeidhm go cuí ar bord soithí a bhfuil a mbratach ar foluain acu. Feidhmeoidh siad a bhfreagracht i gcomhréir le Treoracha EIS maidir leis an iniúchadh ag an Stát brataí ar dhálaí maireachtála agus oibre ar bord soithí iascaireachta.

Déanfaidh an Comhchoiste comhlíonadh na n-oibleagáidí a leagtar amach sa chaibidil seo a rialú.

CAIBIDIL IX

BREATHNÓIRÍ

1.   Breathnóireacht ar na gníomhaíochtaí iascaireachta

Na soithí a bhfuil údarú iascaireachta acu, beidh siad faoi réir scéim chun breathnú ar a ngníomhaíochtaí iascaireachta a dhéanfar faoin gComhaontú.

Is éard atá i mbreathnóir aon duine atá údaraithe ag údarás náisiúnta atá freagrach as breathnú ar chur chun feidhme na rialacha is infheidhme maidir le hoibríochtaí iascaireachta nó as breathnú ar oibríochtaí den sórt sin chun críoch eolaíoch.

I gcás soithí tuinníní agus báid spiléireachta dromchla agus a mhéid a bhaineann le córas breathnóirí réigiúnacha a shainiú agus leis an eagraíocht inniúil iascaigh a roghnú, rachaidh na Páirtithe i gcomhairle le chéile a luaithe is féidir, rachaidh siad i gcomhairle freisin leis na tíortha eile lena mbaineann a luaithe is féidir.

Tabharfaidh soithí eile breathnóir arna cheapadh ag Guine Bissau ar bord. Mura dtiocfaidh an breathnóir i láthair ag an am agus ag an áit a comhaontaíodh, ní mór duine eile a chur ina ionad ionas gur féidir leis an soitheach tús a chur lena ghníomhaíochtaí gan mhoill.

2.   Soithí agus breathnóirí ainmnithe

Agus an t-údarú iascaireachta á eisiúint, cuirfidh Guine Bissau an tAontas agus úinéir an tsoithigh, nó a ghníomhaire, ar an eolas faoi na soithí agus na breathnóirí atá ainmnithe, chomh maith le faoi na hamanna a bheidh an breathnóir ar bord gach soithigh. Cuirfidh Guine Bissau Verde an tAontas agus úinéir an tsoithigh, nó a ghníomhaire, ar an eolas gan mhoill faoi aon athrú ar na soithí agus na breathnóirí ainmnithe.

Ní chaithfidh na breathnóirí níos mó ama ar bord an tsoithigh ná mar is gá chun a chúraimí a dhéanamh.

3.   Ranníocaíocht airgeadais ar ráta comhréidh

Tráth a íocfar an muirear, íocfaidh úinéir an tsoithigh EUR 10 000 in aghaidh na bliana le Guine Bissau le haghaidh gach trálaeir, a choigeartófar pro rata temporis de réir fhad údarú iascaireachta na soithí ainmnithe.

4.   Tuarastal an bhreathnóra

Is é Guine Bissau a iompróidh tuarastal agus ranníocaíochtaí sóisialta an bhreathnóra.

5.   Coinníollacha bordála

Is mar oifigigh a dhéileálfar le breathnóirí ar bord. Mar sin féin, cuirfear struchtúr teicniúil an tsoithigh san áireamh maidir le cóiríocht an bhreathnóra ar bord.

Is é úinéir an tsoithigh a iompróidh costas na cóiríochta agus an bhia ar bord an tsoithigh.

Déanfaidh an captaen gach beart laistigh dá réimse freagrachta chun sábháilteacht fhisiceach agus folláine ghinearálta an bhreathnóra a áirithiú.

Beidh gach saoráid is gá ar fáil don bhreathnóir ionas gur féidir leis a chúraimí a dhéanamh. Beidh rochtain aige ar mhodhanna cumarsáide agus ar dhoiciméid a bhaineann le gníomhaíochtaí iascaireachta an tsoithigh, go háirithe an logleabhar iascaireachta agus an loga loingseoireachta, agus ar na codanna den soitheach a bhaineann go díreach lena chúraimí.

6.   Oibleagáid an bhreathnóra

Fad a bheidh an breathnóir ar bord, déanfaidh sé an méid seo a leanas:

(a)	déanfaidh sé gach beart iomchuí ionas nach gcuirfear stop ná bac leis na hoibríochtaí iascaireachta;

(b)	tabharfaidh sé urraim do na hearraí agus don trealamh atá ar bord;

(c)	tabharfaidh sé urraim do rúndacht gach doiciméid ar leis an soitheach é.

7.   An breathnóir a thabhairt ar bord agus a thabhairt i dtír

10 lá roimh an tabhairt ar bord, tabharfaidh úinéir an tsoithigh nó a ghníomhaire fógra do LFI Ghuine Bissau faoin dáta agus faoin am a thabharfar ar bord an breathnóir, mar aon leis an gcalafort bordála. I gcás ina dtabharfar an breathnóir ar bord i dtír eachtrach, is é úinéir an tsoithigh a iompróidh a chostais taistil chun an calafort bordála a bhaint amach.

I gcás nach dtabharfar an breathnóir i dtír i gcalafort de chuid Ghuine Bissau, is é úinéir an tsoithigh a iompróidh na costais a bhaineann leis an mbreathnóir a aisdúichiú chuig Guine Bissau a luaithe is féidir.

8.   Cúraimí an bhreathnóra

Déanfaidh an breathnóir na cúraimí seo a leanas:

(a)	breathnóireacht a dhéanamh ar ghníomhaíochtaí iascaireachta an tsoithigh;

(b)	suíomh an tsoithigh a dheimhniú le linn a chuid oibríochtaí iascaireachta;

(c)	oibríochtaí a dhéanamh i gcomhthéacs clár eolaíoch, lena n-áirítear sampláil bhitheolaíoch;

(d)	taifead a dhéanamh ar an trealamh iascaireachta a úsáidtear;

(e)	sonraí na ngabhálacha a dhéantar i limistéar iascaireachta Ghuine Bissau a thaifeadtar sa logleabhar iascaireachta a fhíorú;

(f)	céatadáin na bhfoghabhálacha a fhíorú ar bhonn a bhfuil sainithe sna bileoga sonraí le haghaidh gach catagóire agus meastachán a dhéanamh ar na gabhálacha aischurtha;

(g)	a mbarúlacha a chur in iúl uair sa lá i gcomhthéacs chur i gcrích a chúraimí, lena n-áirítear cainníocht na ngabhálacha agus na bhfoghabhálacha ar bord.

9.   Tuarascáil ón mbreathnóir

Sula bhfágfaidh an breathnóir an soitheach, cuirfidh sé ráiteas ar a chuid barúlacha faoi bhráid chaptaen an tsoithigh. Beidh sé de cheart ag captaen an tsoithigh a bharúlacha a chur isteach. Déanfaidh an breathnóir agus an captaen araon an ráiteas a shíniú. Déanfaidh an breathnóir leagan bunaidh an ráitis agus an tuarascáil chríochnaitheach ar a mhisin, arna síniú agus arna stampáil go cuí ag captaen tsoithigh, a chur faoi bhráid údaráis Ghuine Bissau atá freagrach as rialú agus faireachas, díreach tar éis dó teacht i dtír, agus gheobhaidh an captaen sin cóip díobh ón mbreathnóir. Tarchuirfidh údaráis Ghuine Bissau cóip de na doiciméid uile chuig an Aontas.

FOSCRÍBHINNÍ

Foscríbhinn 1 – Foirm iarratais ar údarú iascaireachta

Foscríbhinn 2 – Bileoga sonraí de réir catagóire

Foscríbhinn 3 – Próiseáil sonraí pearsanta

---

(1)  Rialachán (AE) 2017/2403 ó Pharlaimint na hEorpa agus ón gComhairle an 12 Nollaig 2017 maidir le bainistiú inbhuanaithe a dhéanamh ar chabhlaigh iascaireachta sheachtracha, agus lena n-aisghairtear Rialachán (CE) Uimh. 1006/2008 ón gComhairle (IO AE L 347, 28.12.2017, lch. 81).

(2)  Treoir (AE) 2017/159 ón gComhairle an 19 Nollaig 2016 lena gcuirtear chun feidhme an Comhaontú i dtaca le cur chun feidhme Choinbhinsiún 2007 na hEagraíochta Idirnáisiúnta Saothair maidir le hObair san Iascaireacht, a tugadh i gcrích an 21 Bealtaine 2012 idir an Coiste Ginearálta um Chomhar Talmhaíochta san Aontas Eorpach (Cogeca), Cónaidhm Oibrithe Iompair na hEorpa (ETF) agus Comhlachas Eagraíochtaí Náisiúnta na bhFiontar Iascaireachta san Aontas Eorpach (Europêche) (IO L 25, 31.1.2017, lch. 12).