1

Permezz tar-rikors tagħha bbażat fuq l-Artikolu 263 TFUE, ir-rikorrenti, Tele Columbus AG, titlob l-annullament tad-Deċiżjoni tal-Kummissjoni C(2019) 5187 final tat‑18 ta’ Lulju 2019 li tiddikjara kompatibbli mas-suq intern u mal-Ftehim ŻEE l-konċentrazzjoni intiża għall-akkwist minn Vodafone Group plc ta’ ċerti assi ta’ Liberty Global plc (Każ COMP/M.8864 – Vodafone/Certain Liberty Global Assets (iktar ’il quddiem id-“deċiżjoni kkontestata”).

II.

Il‑proċedura u t‑talbiet tal‑partijiet

48

Ir-rikorrenti titlob li l-Qorti Ġenerali jogħġobha:

–

tannulla d-deċiżjoni kkontestata;

–

tikkundanna lill-Kummissjoni għall-ispejjeż.

49

Il-Kummissjoni u Vodafone jitolbu li l-Qorti Ġenerali jogħġobha:

–

tiċħad ir-rikors;

–

tikkundanna lir-rikorrenti għall-ispejjeż.

III.

Id‑dritt

B.

Fuq l‑ewwel motiv, ibbażat fuq żbalji manifesti ta’ evalwazzjoni u fuq irregolaritajiet ta’ proċedura fil-kuntest tal‑eżami tal‑effetti orizzontali mhux ikkoordinati fis-suq MDU

2.

Fuq l‑ewwel parti, ibbażata fuq żball manifest ta’ evalwazzjoni li jaffettwa l‑evalwazzjoni tal‑eżistenza ta’ kompetizzjoni diretta bejn il‑partijiet fil‑konċentrazzjoni

82

F’dan ir-rigward, għandu jiġi ppreċiżat li teżisti kompetizzjoni diretta bejn impriżi meta dawn jikkompetu għall-istess klijenti.

83

F’dan il-każ, ma huwiex ikkontestat li n-netwerks tal-kejbil tal-partijiet fil-konċentrazzjoni ma jikkoinċidux u li, fil-fatt, meta klijent MDU jkun jixtieq jikkonkludi kuntratt ma’ fornitur ta’ sinjali tat-televiżjoni, bħala prinċipju huwa jkollu biss il-possibbiltà li jagħżel bejn il-parti fil-konċentrazzjoni li fil-cable footprint tagħha tinsab il-proprjetà immobbli li għandha tiġi konnessa u wieħed mill-kompetituri tagħha, bħar-rikorrenti. Il-fatt li s-suq MDU kien, qabel il-konċentrazzjoni, ta’ portata nazzjonali jew li kien ġie limitat għall-cable footprints tal-partijiet fil-konċentrazzjoni ma jbiddel xejn minn dan, peress li, fiż-żewġ każijiet, din il-konstatazzjoni tapplika.

84

Minn dan jirriżulta li Unitymedia ma tistax validament tiġi kklassifikata bħala “fornitur alternattiv” għall-kumpanniji ta’ akkomodazzjoni fis-suq MDU, li l-konċentrazzjoni tkun telimina, bħalma ssostni r-rikorrenti. Minn dan jirriżulta wkoll li l-prodotti kkummerċjalizzati mill-partijiet fil-konċentrazzjoni ma kinux, fil-prattika, f’kompetizzjoni, u dan irrispettivament mid-delimitazzjoni ġeografika tas-suq MDU, b’tali mod li l-ewwel parti ta’ dan il-motiv ma tistax tintlaqa’.

85

L-argumenti l-oħrajn imressqa mir-rikorrenti ma jippermettux li jintwera l-kuntrarju.

86

Fir-rigward, qabelxejn, tal-allegazzjoni tar-rikorrenti li l-attivitajiet tal-partijiet fil-konċentrazzjoni jikkoinċidu, għandu jiġi enfasizzat li, għalkemm ma teżisti ebda koinċidenza bejn in-netwerks tal-kejbil ta’ Vodafone u ta’ Unitymedia, aspett li ma huwiex ikkontestat mir-rikorrenti, huwa minnu li, fid-deċiżjoni kkontestata, il-Kummissjoni kkonstatat li madankollu kienu jeżistu ċerti sovrappożizzjonijiet bejn l-attivitajiet tagħhom, peress li dawn l-operaturi jixtru, f’dan il-każ, servizzi intermedjarji ta’ trażmissjoni ta’ sinjali tat-televiżjoni mingħand il-parti l-oħra jew minn operatur ieħor tan-netwerk ta’ livell 3 sabiex ikunu jistgħu jilħqu l-klijenti MDU kkonċernati.

87

Issa, għandu jiġi rrilevat li, għalkemm hija tikkontesta n-natura negliġibbli tagħhom, ir-rikorrenti ma tikkontestax iċ-ċifri, bħala tali, żvelati mill-Kummissjoni matul il-proċedura quddiem il-Qorti Ġenerali dwar il-kuntratti konklużi mill-partijiet fil-konċentrazzjoni barra mill-cable footprint tagħhom u n-numru ta’ klijenti kkonċernati. F’dan ir-rigward, għandu jiġi rrilevat li dawn iċ-ċifri juru li dawn il-kuntratti kienu jirrappreżentaw numru limitat ħafna ta’ klijenti MDU f’termini ta’ djar konnessi u ta’ sehem mis-suq, peress li inqas minn 1 %, tant negliġibbli li ma jistax jirrappreżenta kompetizzjoni residwa li għandha tiġi protetta.

88

Sussegwentement, fir-rigward tal-allegazzjoni tar-rikorrenti li l-istrateġija kummerċjali tal-partijiet fil-konċentrazzjoni tista’ tevolvi, b’tali mod li huma jistgħu jiddeċiedu li jestendu l-attivitajiet tagħhom barra mill-cable footprints rispettivi tagħhom, għandu jiġi kkonstatat li tali affermazzjoni tirrigwarda l-eżistenza ta’ kompetizzjoni potenzjali, iktar milli allegata kompetizzjoni diretta eżistenti, li jagħmilha ineffettiva fil-kuntest tal-ewwel parti ta’ dan il-motiv.

89

L-istess japplika f’dak li jirrigwarda l-allegazzjoni tar-rikorrenti li l-kumulu tal-ishma tas-suq u tal-valur tal-induċju Herfindahl-Hirschman fis-suq MDU, iddefinit bħala ta’ portata nazzjonali, ikun għoli ħafna, peress li din id-data ma tistax turi l-eżistenza ta’ kompetizzjoni diretta bejn żewġ partijiet għal konċentrazzjoni qabel tali konċentrazzjoni. Fir-rigward, b’mod iktar partikolari, tal-indiċju Herfindahl-Hirschman, li huwa ugwali għas-somma tal-kwadrati tal-ishma tas-suq ta’ kull waħda mill-impriżi preżenti fis-suq, għandu jiġi kkonstatat li dan jintuża sabiex jiġu mkejla l-livelli ta’ konċentrazzjoni f’suq u li dan seta’ jagħti l-ewwel indikazzjoni tal-pressjonijiet kompetittivi li jiġu eżerċitati wara l-konċentrazzjoni (ara, f’dan is-sens, is-sentenza tas‑7 ta’ Ġunju 2013, Spar Österreichische Warenhandels vs Il‑Kummissjoni, T‑405/08, mhux ippubblikata, EU:T:2013:306, punt 65).

90

Mill-kunsiderazzjonijiet preċedenti kollha jirriżulta li r-rikorrenti ma turix li l-Kummissjoni, b’mod manifestament żbaljat, ikkunsidrat fid-deċiżjoni kkontestata li l-partijiet fil-konċentrazzjoni ma kinux kompetituri diretti qabel din il-konċentrazzjoni. Għaldaqstant, l-ewwel parti ta’ dan il-motiv għandha tiġi miċħuda.

3.

Fuq ir‑raba’ parti, ibbażata fuq żball manifest ta’ evalwazzjoni li jaffettwa l‑evalwazzjoni tal‑eżistenza ta’ kompetizzjoni indiretta bejn il‑partijiet fil‑konċentrazzjoni

103

Preliminarjament, għandu jiġi ppreċiżat li impriżi li ma jipparteċipawx f’kompetizzjoni diretta jistgħu madankollu jsibu ruħhom f’kompetizzjoni indiretta bejniethom, b’mod partikolari meta jkunu suġġetti għal pressjonijiet kompetittivi simili min-naħa ta’ impriżi oħra li kull waħda minnhom hija f’kompetizzjoni diretta magħhom jew meta fatturi oħra, bħalma huma r-rekwiżiti imposti mill-klijenti, jillimitaw b’mod paragunabbli l-possibbiltajiet tagħhom li jiffissaw il-prezzijiet u l-kundizzjonijiet kummerċjali tagħhom.

104

F’dan ir-rigward, għandu jiġi osservat li l-argument tar-rikorrenti, deskritt, essenzjalment, fil-punti 98 sa 101 iktar ’il fuq, huwa ġenerali ħafna, ma huwa sostnut minn ebda prova u huwa bbażat fuq allegazzjonijiet vagi, li ma huwiex biżżejjed sabiex jiġu kkontestati l-evalwazzjonijiet magħmula mill-Kummissjoni. L-uniku argument konkret huwa dak ibbażat fuq il-prezzijiet u fuq il-karatteristiċi tal-offerti offruti bħala pakkett għall-internet u għat-telefon. Issa, peress li dawn jikkonċernaw swieq oħra, il-prezzijiet u l-karatteristiċi tal-offerti msemmija mir-rikorrenti ma humiex rilevanti għall-evalwazzjoni tal-eżistenza ta’ kompetizzjoni indiretta fis-suq MDU, li tikkonċerna t-trażmissjoni tas-sinjal tat-televiżjoni.

105

Barra minn hekk, mid-deċiżjoni kkontestata (ara, b’mod partikolari, il-premessa 697 tad-deċiżjoni kkontestata), li r-rikorrenti ma tikkontestax, isegwi li diversi kuntratti ma’ klijenti MDU huma r-riżultat ta’ negozjati, ta’ sejħiet għal offerti jew ta’ proċeduri formali ta’ sejħa għal offerti, bħala prinċipju sigrieti. Il-kuntratti konklużi mill-partijiet fil-konċentrazzjoni mal-klijenti MDU tagħhom għalhekk ma humiex kuntratti standard, li l-kundizzjonijiet tagħhom jistgħu jiġu influwenzati minn dak li toffri l-parti l-oħra fil-cable footprint tagħha jew minn ċerti operaturi attivi fuq livell nazzjonali, kuntrarjament għall-allegazzjoni magħmula mir-rikorrenti.

106

Għandu jiġi rrilevat ukoll li, fid-deċiżjoni kkontestata, il-Kummissjoni spjegat, minn naħa, li l-eżami tad-dokumenti interni tal-partijiet fil-konċentrazzjoni ma kien ipprovda ebda element li jissuġġerixxi li l-imsemmija partijiet kienu jieħdu inkunsiderazzjoni t-termini u l-kundizzjonijiet rispettivi matul in-negozjati tagħhom dwar il-kuntratti MDU u, min-naħa l-oħra, li l-partijiet fil-konċentrazzjoni kienu ppreżentaw elementi konvinċenti sabiex jikkontestaw l-allinjament tal-kuntratti MDU fit-territorju Ġermaniż kollu. Il-fatt li r-rikorrenti ma tqisx li dawn il-konstatazzjonijiet huma “plawżibbli” ma huwiex biżżejjed sabiex dawn jiġu kkontestati.

107

Konsegwentement, ir-rikorrenti ma turix li l-Kummissjoni, b’mod manifestament żbaljat, ikkonkludiet fid-deċiżjoni kkontestata li l-partijiet fil-konċentrazzjoni ma kinux kompetituri indiretti.

108

Sa fejn ir-rikorrenti ma turix li l-Kummissjoni wettqet żball manifest ta’ evalwazzjoni meta kkunsidrat li l-konċentrazzjoni ma twassalx għat-telf ta’ kwalunkwe kompetizzjoni indiretta, dan l-ilment għandu jiġi miċħud mingħajr ma jkun neċessarju li jiġi evalwat jekk hija wettqitx żball meta qieset li l-kompetizzjoni indiretta kellha tkun partikolarment b’saħħitha jew li kienet neċessarja trażmissjoni sistematika tal-kundizzjonijiet.

109

Għaldaqstant, ir-raba’ parti ta’ dan il-motiv għandha tiġi miċħuda.

4.

Fuq it‑tielet parti, ibbażata fuq żball manifest ta’ evalwazzjoni u fuq ksur tad‑dritt għal smigħ u tal‑prinċipju ta’ amministrazzjoni tajba li jaffettwaw l‑evalwazzjoni tal‑eżistenza ta’ kompetizzjoni potenzjali bejn il‑partijiet fil‑konċentrazzjoni

b)

Fuq l‑iżball manifest ta’ evalwazzjoni mwettaq mill‑Kummissjoni, sa fejn din tal‑aħħar ibbażat ruħha esklużivament fuq il‑kriterji suġġettivi ta’ investiment u fuq dokumenti interni tal‑partijiet fil‑konċentrazzjoni

139

F’dan ir-rigward, fl-ewwel lok, għandu jitfakkar li, fil-qasam tal-kontroll tal-konċentrazzjonijiet, skont ġurisprudenza stabbilita, l-eżami tal-kundizzjonijiet ta’ kompetizzjoni huwa bbażat mhux biss fuq il-kompetizzjoni attwali li teżisti bejn l-impriżi li huma diġà preżenti fis-suq inkwistjoni, iżda wkoll fuq il-kompetizzjoni potenzjali, sabiex jkun magħruf jekk, fid-dawl tal-istruttura tas-suq u tal-kuntest ekonomiku u ġuridiku li jirregola l-funzjonament tiegħu, jeżistux possibbiltajiet reali u konkreti li l-impriżi kkonċernati jikkompetu bejniethom, jew li kompetitur ġdid ikun jista’ jidħol fis-suq inkwistjoni u jikkompeti mal-impriżi diġà stabbiliti (ara s-sentenza tal‑4 ta’ Lulju 2006, easyJet vs Il‑Kummissjoni, T‑177/04, EU:T:2006:187, punt 116 u l-ġurisprudenza ċċitata).

140

Sabiex jiġi vverifikat jekk impriża tikkostitwixxix kompetitur potenzjali f’suq, il-Kummissjoni għandha l-obbligu li tivverifika jekk, fl-assenza tal-konċentrazzjoni inkwistjoni, kinux jeżistu possibbiltajiet reali u konkreti li din l-impriża tidħol fl-imsemmi suq u tikkompeti mal-impriżi li kienu stabbiliti fih. Tali prova ma għandhiex tistrieħ fuq sempliċi ipoteżi, iżda għandha tiġi ssostanzjata permezz ta’ punti ta’ fatt jew analiżi tal-istrutturi tas-suq rilevanti. Għalhekk, impriża ma tistax tiġi kklassifikata bħala kompetitur potenzjali jekk id-dħul tagħha fis-suq ma jikkorrispondix għal strateġija ekonomika vijabbli (ara, b’analoġija, is-sentenza tad‑29 ta’ Ġunju 2012, E.ON Ruhrgas u E.ON vs Il‑Kummissjoni, T‑360/09, EU:T:2012:332, punt 86 u l-ġurisprudenza ċċitata).

141

Barra minn hekk, il-vijabbiltà ekonomika ta’ strateġija ta’ dħul fis-suq ma tistax tiġi assimilata mas-sempliċi profittabbiltà ta’ tali strateġija. Kieku dan kien il-każ, sempliċi kapaċità teoretika ta’ dħul f’suq tkun tista’ tiġi kkunsidrata bħala suffiċjenti sabiex tiġi kkonstatata l-eżistenza ta’ kompetizzjoni potenzjali. Għaldaqstant, il-Kummissjoni tista’ tieħu inkunsiderazzjoni l-interess kummerċjali jew ekonomiku ta’ dħul f’suq tal-impriża li l-kwalità tagħha bħala kompetitur potenzjali hija analizzat (ara, f’dan is-sens, is-sentenzi tal‑21 ta’ Settembru 2005, EDP vs Il‑Kummissjoni, T‑87/05, EU:T:2005:333, punti 177, 185, 187, 188, 191 u 195, u tal‑4 ta’ Lulju 2006, easyJet vs Il‑Kummissjoni, T‑177/04, EU:T:2006:187, punt 123) u, għaldaqstant, tibbaża ruħha fuq il-kriterji ta’ investiment tagħha. Għalhekk, il-Kummissjoni ma tistax tikklassifika impriża bħala kompetitur potenzjali abbażi ta’ kunsiderazzjonijiet ġenerali u astratti mingħajr ma tieħu inkunsiderazzjoni l-interessi kummerċjali ta’ din l-impriża, l-istrateġija tagħha ta’ żvilupp għal żmien qasir u medju kif ukoll il-kriterji ta’ profittabbiltà li hija stabbilixxiet għal dan l-għan.

142

Minn dan isegwi li meta l-Kummissjoni tikkonstata, l-ewwel, li l-impriża kkonċernata ma tkun wettqet ebda pass sabiex tidħol fis-suq f’terminu ta’ żmien suffiċjentement qasir ikkalkolat fid-dawl tal-karatteristiċi tas-suq, it-tieni, li l-imsemmija impriża ma tikkunsidrax li huwa ekonomikament razzjonali u interessanti għaliha li tidħol fis-suq u għalhekk, it-tielet, li l-imsemmija impriża ma għandhiex l-intenzjoni li tidħol fis-suq fil-futur b’mod sinjifikattiv, hija tista’, mingħajr ma twettaq żball manifest ta’ evalwazzjoni, tikkonkludi li l-impriża inkwistjoni ma hijiex kompetitur potenzjali tal-parti l-oħra fil-konċentrazzjoni. Tali konstatazzjoni hija biżżejjed sabiex jiġi miċħud l-ewwel ilment tar-rikorrenti, li jgħid li l-Kummissjoni f’dan il-każ injorat il-kriterji rilevanti sabiex teżamina l-kompetizzjoni potenzjali billi bbażat ruħha kważi esklużivament fuq il-kriterji suġġettivi ta’ investiment u fuq dokumenti interni tal-partijiet fil-konċentrazzjoni.

143

Fit-tieni lok, f’dak li jirrigwarda l-allegazzjoni tar-rikorrenti li l-Kummissjoni ma setgħetx tibbaża ruħha fuq il-kriterji ta’ investiment tal-partijiet fil-konċentrazzjoni, peress li dawn setgħu jiġu mmodifikati fi kwalunkwe mument, jew anki mmanipulati, u li ma jikkorrispondux mal-prattika tas-settur, għandu jitfakkar li l-vijabbiltà ekonomika ta’ strateġija ta’ dħul fis-suq ma tistax tiġi assimilata mal-profittabbiltà ta’ tali strateġija u li l-Kummissjoni tista’ tibbaża ruħha fuq l-interess kummerċjali jew ekonomiku li tidħol f’suq tal-impriża li l-kwalità tagħha bħala kompetitur potenzjali hija analizzata (ara l-punti 140 u 141 iktar ’il fuq) u, għaldaqstant, fuq il-kriterji ta’ investiment tagħha.

144

Barra minn hekk, fid-dawl tar-rekwiżit ta’ ħeffa u tat-termini stretti imposti fuq il-Kummissjoni fil-kuntest tal-proċedura ta’ kontroll tal-konċentrazzjonijiet, hija ma tistax, fin-nuqqas ta’ indikazzjonijiet li juru l-ineżattezza tal-informazzjoni pprovduta, tkun marbuta li twettaq verifiki fir-rigward tal-informazzjoni kollha li hija tirċievi. Fil-fatt, minkejja li l-obbligu ta’ eżami diliġenti u imparzjali li huwa impost fuq il-Kummissjoni, fil-kuntest ta’ tali proċedura, ma jippermettilhiex tibbaża ruħha fuq elementi jew fuq informazzjoni li ma jistgħux jitqiesu bħala veri, l-imsemmi rekwiżit ta’ ħeffa jippreżupponi, madankollu, li hija ma tistax tivverifika waħedha, fl-iċken dettall, l-awtentiċità u l-affidabbiltà tal-komunikazzjonijiet kollha mibgħuta lilha, sa fejn il-proċedura ta’ kontroll tal-konċentrazzjonijiet tistrieħ neċessarjament u sa ċertu punt fuq il-fiduċja (sentenza tas‑7 ta’ Mejju 2009, NVV et vs Il‑Kummissjoni, T‑151/05, EU:T:2009:144, punt 184).

145

Barra minn hekk, għandu jiġi enfasizzat li diversi miżuri intiżi sabiex jiskoraġġixxu u jikkastigaw it-trażmissjoni ta’ informazzjoni ineżatta jew qarrieqa huma previsti mil-leġiżlazzjoni applikabbli għall-kontroll tal-konċentrazzjonijiet. Fil-fatt, il-partijiet li jinnotifikaw konċentrazzjoni huma suġġetti, skont l-Artikolu 4(1) u l-Artikolu 6(2) tar-Regolament Nru 802/2004, għall-obbligu espress li jipprovdu lill-Kummissjoni b’mod reali u komplet il-fatti u ċ-ċirkustanzi rilevanti għad-deċiżjoni ta’ kompatibbiltà, liema obbligu huwa stabbilit fl-Artikolu 14 tar-Regolament Nru 139/2004. Barra minn hekk, il-Kummissjoni tista’ wkoll tirrevoka, abbażi tal-Artikolu 6(3)(a) u tal-Artikolu 8(6)(a) tar-Regolament Nru 139/2004, id-deċiżjoni ta’ kompatibbiltà jekk din tkun ibbażata fuq indikazzjonijiet ineżatti li waħda mill-impriżi kkonċernati hija responsabbli għalihom jew jekk din tkun inkisbet b’qerq (sentenza tas‑7 ta’ Mejju 2009, NVV et vs Il‑Kummissjoni, T‑151/05, EU:T:2009:144, punt 185).

146

Fl-aħħar nett, għandu jiġi kkonstatat, minn naħa, li mill-premessa 742 u min-nota ta’ qiegħ il-paġna Nru 553 tad-deċiżjoni kkontestata jsegwi, b’mod partikolari, li l-Kummissjoni vverifikat il-projezzjonijiet magħmula mill-partijiet fil-konċentrazzjoni, li fil-kuntest tagħhom dawn tal-aħħar eżaminaw il-profittabbiltà, fid-dawl tal-kriterji ta’ investiment tagħhom, ta’ diversi proġetti ta’ installazzjoni ta’ infrastruttura, u kkunsidrat li r-riżultati tagħhom kienu suffiċjentement robusti u, min-naħa l-oħra, li l-Kummissjoni ma bbażatx ruħha biss fuq il-kriterji ta’ investiment tal-partijiet fil-konċentrazzjoni sabiex tikkonkludi li ma kienx hemm kompetizzjoni potenzjali bejniethom, iżda li hija ħadet inkunsiderazzjoni b’mod partikolari tal-fatt li, fil-prattika, la Vodafone u lanqas Unitymedia ma kienu rduppjaw in-netwerk bil-kejbil tal-parti l-oħra u li dawn il-partijiet kienu estendew b’mod negliġibbli biss in-netwerk tagħhom fi ħdan il-cable footprint rispettiv tagħhom, minkejja li tali estensjoni interna kienet iktar profittabbli.

147

Dan it-tieni lment tar-rikorrenti dwar l-affidabbiltà tal-kriterji ta’ investiment tal-partijiet fil-konċentrazzjoni ma jistax, għaldaqstant, jintlaqa’.

148

Fit-tielet lok, fir-rigward tad-deċiżjoni tal-Kummissjoni tas‑16 ta’ Ġunju 2011 fil-Każ M.5900 – LGI/KBW, imsemmija mir-rikorrenti, għandu jiġi ppreċiżat li, f’dik id-deċiżjoni, il-Kummissjoni bagħtet lura l-konċentrazzjoni li kienet ġiet innotifikata lilha u li kienet tirrigwarda l-akkwist ta’ KBW minn LGI lill-awtoritajiet kompetenti tar-Repubblika Federali tal-Ġermanja, konformement mal-Artikolu 9(3)(b) tar-Regolament Nru 139/2004, wara li kkonstatat li l-kundizzjonijiet għal rinviju skont l-Artikolu 9(2)(a) tar-Regolament Nru 139/2004 kienu ssodisfatti. Issa, f’tali deċiżjoni tar-rinviju, il-Kummissjoni ma tiddeċidix dwar il-kompatibbiltà ta’ konċentrazzjoni mas-suq intern (ara, f’dan is-sens, is-sentenzi tat‑3 ta’ April 2003, Royal Philips Electronics vs Il‑Kummissjoni, T‑119/02, EU:T:2003:101, punt 275, u tat‑30 ta’ Settembru 2003, Cableuropa et vs Il‑Kummissjoni, T‑346/02 u T‑347/02, EU:T:2003:256, punt 52). Fil-fatt, din it-tip ta’ deċiżjoni ma għandhiex l-għan li tagħti deċiżjoni fuq l-effetti tal-konċentrazzjoni fuq is-swieq ikkonċernati li huma s-suġġett tar-rinviju, iżda li tittrasferixxi r-responsabbiltà ta’ dan l-eżami lill-awtoritajiet nazzjonali kompetenti li jagħmlu talba sabiex dawn jiddeċiedu skont id-dritt nazzjonali tal-kompetizzjoni tagħhom (ara, f’dan is-sens, is-sentenzi tat‑3 ta’ April 2003, Royal Philips Electronics vs Il‑Kummissjoni, T‑119/02, EU:T:2003:101, punt 276, u tat‑30 ta’ Settembru 2003, Cableuropa et vs Il‑Kummissjoni, T‑346/02 u T‑347/02, EU:T:2003:256, punt 53).

149

Barra minn hekk, f’deċiżjoni ta’ rinviju, il-Kummissjoni ma tistax, sabiex il-mekkaniżmu ma titneħħilux is-sustanza tiegħu, twettaq eżami tal-kompatibbiltà tal-konċentrazzjoni ta’ natura li jorbot lill-awtoritajiet nazzjonali kkonċernati fil-mertu, iżda hija għandha tillimita ruħha li tivverifika, wara eżami prima facie, jekk, abbażi tal-provi li hija għandha fil-mument tal-evalwazzjoni tal-fondatezza tat-talba għal rinviju, il-konċentrazzjoni kkonċernata tipperikolax li toħloq jew issaħħaħ pożizzjoni dominanti fis-swieq ikkonċernati (ara s-sentenza tat‑30 ta’ Settembru 2003, Cableuropa et vs Il‑Kummissjoni, T‑346/02 u T‑347/02, EU:T:2003:256, punt 217 u l-ġurisprudenza ċċitata).

150

Għaldaqstant, għandu jitqies li, fid-deċiżjoni tas‑16 ta’ Ġunju 2011 fil-każ M.5900 – LGI/KBW, il-Kummissjoni ma għamlet l-ebda evalwazzjoni definittiva dwar l-eżistenza eventwali ta’ relazzjoni ta’ kompetizzjoni potenzjali bejn il-partijiet fil-konċentrazzjoni. Barra minn hekk, din l-evalwazzjoni hija kkonfermata mill-formuli ipotetiċi użati f’dik id-deċiżjoni.

151

Barra minn hekk, anki jekk jitqies li tali affermazzjoni tar-rikorrenti dwar il-każ M.5900 – LGI/KBW hija eżatta, huwa biżżejjed li jitfakkar li l-Kummissjoni ma hijiex marbuta, fi kwalunkwe każ, mill-prassi preċedenti tagħha. Fil-fatt, għandu jiġi rrilevat li, meta l-Kummissjoni tiddeċiedi fuq il-kompatibbiltà ta’ konċentrazzjoni mas-suq intern abbażi ta’ notifika u ta’ fajl rispettivi għal din il-konċentrazzjoni, rikorrent ma jkollux id-dritt li jikkontesta l-konstatazzjonijiet tagħha għar-raġuni li dawn ikunu differenti minn dawk li jkunu saru preċedentement f’każ ieħor, abbażi ta’ notifika u ta’ fajl differenti, anki jekk is-swieq inkwistjoni fiż-żewġ każijiet ikunu simili, jew saħansitra identiċi (sentenzi tal‑14 ta’ Diċembru 2005, General Electric vs Il‑Kummissjoni, T‑210/01, EU:T:2005:456, punt 118, u tat‑13 ta’ Mejju 2015, Niki Luftfahrt vs Il‑Kummissjoni, T‑162/10, EU:T:2015:283, punt 142).

152

Fir-rigward tad-deċiżjonijiet tal-Awtorità Federali Kompetenti fil-Qasam tal-Kompetizzjoni invokati mir-rikorrenti, għandu jiġi rrilevat li, fid-dawl tat-tqassim preċiż tal-kompetenzi li fuqu huwa bbażat ir-Regolament Nru 139/2004, id-deċiżjonijiet tal-awtoritajiet nazzjonali ma jistgħux jorbtu lill-Kummissjoni fil-kuntest tal-proċeduri ta’ kontroll tal-konċentrazzjonijet (ara, f’dan is-sens, is-sentenzi tat‑18 ta’ Diċembru 2007, Cementbouw Handel & Industrie vs Il‑Kummissjoni, C‑202/06 P, EU:C:2007:814, punt 56, u tas‑7 ta’ Mejju 2009, NVV et vs Il‑Kummissjoni, T‑151/05, EU:T:2009:144, punt 139), a fortiori meta dawn jikkonċernaw il-partijiet f’konċentrazzjoni oħra u f’perijodu ieħor.

153

Mill-kunsiderazzjonijiet preċedenti jirriżulta li l-Kummissjoni ma wettqet ebda żball manifest ta’ evalwazzjoni meta ħadet inkunsiderazzjoni l-kriterji ta’ investiment u d-dokumenti interni tal-partijiet fil-konċentrazzjoni, sabiex tiddetermina jekk dawn kellhomx jiġu kkunsidrati bħala kompetituri potenzjali jew le.

c)

Fuq l‑iżball manifest ta’ evalwazzjoni mwettaq mill‑Kummissjoni, inkwantu din tal‑aħħar ma ħaditx elementi oħra inkunsiderazzjoni biżżejjed

160

F’dan ir-rigward, fir-rigward, fl-ewwel lok, tal-opinjoni tal-impriżi diġà attivi fis-suq inkwistjoni, espressa matul l-investigazzjoni tas-suq, għandu jiġi enfasizzat li l-Kummissjoni għandha dritt teħodha inkunsiderazzjoni. Madankollu, dan il-kriterju ma jistax ikun deċiżiv sabiex issir evalwazzjoni dwar l-eżistenza ta’ kompetizzjoni potenzjali.

161

Fil-fatt, għalkemm l-opinjoni tal-kompetituri tista’ tikkostitwixxi sors importanti ta’ informazzjoni fuq l-impatt prevedibbli ta’ konċentrazzjoni fis-suq, din ma tistax torbot lill-Kummissjoni fl-evalwazzjoni awtonoma tagħha tal-impatt tal-konċentrazzjoni f’dan is-suq (ara, f’dan is-sens, is-sentenzi tal‑25 ta’ Marzu 1999, Gencor vs Il‑Kummissjoni, T‑102/96, EU:T:1999:65, punti 290 u 291, u tal‑5 ta’ Ottubru 2020, HeidelbergCement u Schwenk Zement vs Il‑Kummissjoni, T‑380/17, EU:T:2020:471, punt 673 (mhux ippubblikata)).

162

Fi kwalunkwe każ, għandu jiġi kkonstatat li mill-premessi 727, 728, 752 u 753 tad-deċiżjoni kkontestata jsegwi li l-Kummissjoni effettivament ħadet inkunsiderazzjoni l-opinjoni tal-operaturi kompetituri, peress li minn dawn il-premessi jirriżulta li hija wettqet eżami fil-fond tal-eżistenza ta’ kompetizzjoni potenzjali bejn il-partijiet fil-konċentrazzjoni, b’mod partikolari minħabba l-osservazzjonijiet ifformulati minnhom.

163

Fir-rigward tal-allegazzjoni tar-rikorrenti li l-partijiet fil-konċentrazzjoni kienu diġà attivi fil-cable footprint tal-parti l-oħra, li Vodafone kienet diġà tagħmel investimenti fil-cable footprint ta’ Unitymedia jew li dawn il-partijiet kienu jissorveljaw l-attivitajiet rispettivi tagħhom, għandu jiġi rrilevat li dawn l-elementi jirrigwardaw l-eżistenza allegata ta’ kompetizzjoni diretta jew indiretta reali, aspett li jirrendi tali allegazzjoni ineffettiva fil-kuntest ta’ din il-parti li tirrigwarda l-kompetizzjoni potenzjali. Fi kwalunkwe każ, mill-eżami tal-ewwel u tat-tieni parti iktar ’il fuq isegwi li huwa mingħajr ma twettaq żball manifest ta’ evalwazzjoni li l-Kummissjoni setgħet tikkonkludi, fid-deċiżjoni kkontestata, li l-partijiet fil-konċentrazzjoni la kienu, fis-suq MDU, kompetituri diretti u lanqas kompetituri indiretti.

164

Mill-kunsiderazzjonijiet preċedenti jirriżulta li l-ewwel ilment tar-rikorrenti għandu jiġi miċħud.

165

Fir-rigward, fit-tieni lok, tal-allegazzjoni tar-rikorrenti li l-Kummissjoni, wara li kkonstatat li operaturi iżgħar kienu jwettqu investimenti barra miż-żoni ta’ kopertura tagħhom, kellha tikkunsidra li Vodafone u Unitymedia kienu wkoll f’pożizzjoni li jagħmlu dan, għandu jiġi kkonstatat li l-Kummissjoni spjegat, fid-deċiżjoni kkontestata, ir-raġunijiet li għalihom dawn l-istrateġiji ma kinux applikabbli għall-partijiet fil-konċentrazzjoni.

166

F’dak li jirrigwarda b’mod iktar partikolari l-każ tar-rikorrenti, il-provi ppreżentati fil-premessa 744(a) u fil-premessi 797 sa 799 tad-deċiżjoni kkontestata, li ma humiex ikkontestati bħala tali mir-rikorrenti, jindikaw li din tal-aħħar ma kinitx verament wettqet duplikazzjoni tan-netwerk bil-cable fis-snin li ppreċedew l-adozzjoni tad-deċiżjoni kkontestata. B’mod partikolari, il-figura 20 inkluża fil-premessa 798 tad-deċiżjoni kkontestata turi li n-numru ta’ djar konnessi man-netwerk tar-rikorrenti ma kienx żdied b’mod sinjifikattiv bejn l‑2012 u l‑2018, ħlief minħabba l-akkwist ta’ assi preeżistenti ta’ kumpanniji oħra.

167

Fir-rigward ta’ Deutsche Telekom, mill-premessa 744(c) tad-deċiżjoni kkontestata u mit-tweġiba ta’ dan l-operatur li hija ċċitata fiha jsegwi li s-sitwazzjoni tagħha kienet differenti ħafna minn dik tal-partijiet fil-konċentrazzjoni, b’mod partikolari minħabba li Deutsche Telekom diġà kellha netwerk ta’ fibra ottika wiesgħa ħafna, li hija kienet tuża dan in-netwerk sabiex tipprovdi servizzi ta’ aċċess għall-internet b’veloċità għolja permezz tat-teknoloġija ta’ linja diġitali tal-abbonat (Digital Subscriber Line, DSL), aspett li r-rikorrenti bl-ebda mod ma tikkontesta. Għaldaqstant, sabiex testendi l-offerta tagħha lil klijenti MDU għal żoni ġodda, Deutsche Telekom setgħet tibbaża ruħha fuq il-linji tagħha stess ta’ fibra ottika jew fuq il-linji tal-fluss eżistenti tagħha u ġeneralment kellha bżonn tibni biss partijiet qosra tan-netwerk tal-livell 3 neċessarju.

168

Minn dan isegwi li l-każijiet ta’ duplikazzjoni tan-netwerk imwettqa minn dawn l-operaturi ma jippermettux li jiġu kkontestati l-evalwazzjonijiet tal-Kummissjoni dwar il-kompetizzjoni potenzjali bejn il-partijiet fil-konċentrazzjoni.

169

Konsegwentement, it-tieni argument tar-rikorrenti għandu jiġi miċħud.

170

Fir-rigward, fit-tielet lok, tal-fatt li l-Kummissjoni ma ħaditx inkunsiderazzjoni l-infrastruttura eżistenti ta’ Vodafone, b’mod partikolari fil-cable footprint ta’ Unitymedia, u tal-fatt li spejjeż simili kienu neċessarji sabiex jiġi estiż network bil-kejbil, kemm jekk fi ħdan kif ukoll jekk barra l-cable footprint tal-partijiet fil-konċentrazzjoni, għandu jiġi rrilevat li mill-premessa 740 tad-deċiżjoni kkontestata isegwi li l-projezzjonijiet imwettqa minn Vodafone u vverifikati mill-Kummissjoni kienu fil-fatt jieħdu inkunsiderazzjoni l-infrastrutturi eżistenti ta’ dan l-operatur kif ukoll l-installazzjoni tal‑5G, li madankollu ma kinux jippermettu li ssir duplikazzjoni tan-netwerk bil-kejbil suffiċjentement profittabbli.

171

Barra minn hekk, għandu jiġi rrilevat li, fil-premessa 737 tad-deċiżjoni kkontestata, il-Kummissjoni kkonstatat li d-duplikazzjoni tan-netwerk bil-cable ma kinitx globalment attraenti għal Vodafone, “b’mod partikolari meta mqabbla maż-żieda ta’ djar ġodda fil-cable footprint rispettiva tagħha li kienet timplika inqas investimenti fl-infrastrutturi u li kienet toffri opportunitajiet ta’ dħul ogħla minħabba l-assenza ta’ operatur diġà eżistenti”. Minn dan isegwi li l-Kummissjoni kkonstatat li duplikazzjoni tan-netwerk bil-kejbil barra mill-cable footprint tagħha kienet inqas profittabbli minn estensjoni tan-netwerk bil-kejbil fit-territorju rispettiv tagħha, aspett li r-rikorrenti ma tikkontestax. F’dan il-każ, ir-rikorrenti sempliċement issostni li l-ispejjeż marbuta mal-iżvilupp, minn operatur tal-kejbil, tan-netwerk tiegħu fi ħdan il-cable footprint tiegħu kienu simili għal dawk sostnuti għal estensjoni tan-netwerk bil-kejbil tiegħu barra miż-żona ta’ kopertura tiegħu, mingħajr ma ssostni din il-pretensjoni, u b’mod partikolari mingħajr ma tikkontesta dawn l-elementi mressqa mill-Kummissjoni.

172

Barra minn hekk, għandu jiġi kkonstatat li, fiż-żewġ siltiet żvelati mill-Kummissjoni, skont id-digriet tat‑30 ta’ Marzu 2023, tal-premessi 736 u 759 tad-deċiżjoni kkontestata, il-Kummissjoni indikat li hija kienet ikkonstatat li, fil-ħames snin preċedenti, il-partijiet fil-konċentrazzjoni kienu estendew b’mod negliġibbli biss in-netwerk tagħhom fi ħdan il-cable footprints rispettivi tagħhom jew viċin tagħhom. Din il-konstatazzjoni, mhux ikkontestata mir-rikorrenti fl-osservazzjonijiet tagħha tat‑2 ta’ Ġunju 2023, tikkorrobora l-konklużjoni tal-Kummissjoni li estensjoni tal-partijiet fil-konċentrazzjoni fil-cable footprint tal-parti l-oħra kienet tkun improbabbli fl-assenza ta’ konċentrazzjoni. Fil-fatt, għalkemm Vodafone u Unitymedia kienu estendew b’mod negliġibbli biss in-netwerk bil-kejbil tagħhom fi ħdan il-cable footprints rispettivi tagħhom qabel il-konċentrazzjoni, kien effettivament improbabbli li huma jestendu n-netwerk bil-kejbil tagħhom barra mill-cable footprints tagħhom, u b’mod partikolari f’dak tal-parti l-oħra, peress li tali estensjoni kienet inqas profittabbli minn estensjoni fi ħdan il-cable footprints rispettivi tagħhom.

173

Konsegwentement, dan it-tielet ilment imressaq mir-rikorrenti ma jistax jintlaqa’.

174

Fir-rigward, fir-raba’ lok, tal-allegazzjoni tar-rikorrenti li l-Kummissjoni naqset milli tieħu inkunsiderazzjoni l-fatt li Vodafone u Unitymedia setgħu jikkompetu abbażi ta’ mezzi li ma humiex marbuta mal-infrastruttura, għandu jiġi kkonstatat li, kuntrarjament għall-allegazzjonijiet tar-rikorrenti, il-Kummissjoni ma llimitatx ruħha li teżamina l-probabbiltà ta’ kompetizzjoni potenzjali permezz ta’ duplikazzjoni ta’ netwerk bil-cable, bħalma jsegwi mill-premessa 745 tad-deċiżjoni kkontestata għal dak li jirrigwarda Vodafone, u mill-premessa 763 għal dak li jirrigwarda Unitymedia. F’dan il-kuntest, il-Kummissjoni kkunsidrat li lanqas ma kien probabbli li parti tidħol fil-cable footprint tal-parti l-oħra abbażi ta’ mezzi mhux ibbażati fuq l-infrastruttura, bħal, b’mod partikolari, il-linji mikrija, l-infrastruttura tas-satellita jew in-netwerks ta’ livell 4, b’tali mod li dan ir-raba’ lment ma jistax jintlaqa’.

175

Fi kwalunkwe każ, il-Kummissjoni spjegat quddiem il-Qorti Ġenerali, mingħajr ma ġiet kontradetta mir-rikorrenti, li, għalkemm teoretikament kien possibbli li jiġu pprovduti servizzi ta’ trażmissjoni ta’ sinjali tat-televiżjoni lil klijenti MDU mingħajr l-użu tal-infrastruttura rispettiva tagħha tal-livell 3, fil-prattika, din ma kinitx possibbiltà interessanti mill-perspettiva tal-kompetizzjoni. F’dan ir-rigward, għandu jiġi rrilevat ukoll li, fil-premessa 820 tad-deċiżjoni kkontestata, li r-rikorrenti għamlet riferiment għaliha diversi drabi fil-kuntest ta’ din il-proċedura, il-Kummissjoni kkonstatat li l-operaturi ta’ livell 4, fosthom ir-rikorrenti, kienu jiddependu kompletament mir-rieda tal-partijiet li joffru servizzi ta’ trażmissjoni intermedjarja tas-sinjali tat-televiżjoni b’kundizzjonijiet kompetittivi, aspett li r-rikorrenti ma tikkontestax. Sussegwentement, fil-premessa 1479 tad-deċiżjoni kkontestata, il-Kummissjoni rrilevat li l-operaturi tal-livell 4 kienu spjegaw huma stess li kienu attivi f’settur ta’ niċċa tas-suq, filwaqt li l-assoċjazzjonijiet ta’ akkomodazzjoni kienu affermaw li l-operaturi tal-livell 4 ta’ spiss ma kinux jissodisfaw ir-rekwiżiti meħtieġa fil-qasam tal-livell ta’ servizz u ma kinux f’pożizzjoni li jieħdu ħsieb l-aġġornament tan-netwerk tal-livell 3, aspett li lanqas ma ġie kkontestat mir-rikorrenti. Issa, dawn l-elementi jikkorroboraw il-konstatazzjoni tal-Kummissjoni li ma tantx kien probabbli li l-partijiet fil-konċentrazzjoni jestendu l-attivitajiet tagħhom fil-cable footprint tal-parti l-oħra billi jibbażaw ruħhom fuq mezzi mhux ibbażati fuq l-infrastruttura.

176

Konsegwentement, ir-raba’ motiv invokat mir-rikorrenti għandu jiġi miċħud.

e)

Fuq l‑allegata kollużjoni bejn il‑partijiet fil‑konċentrazzjoni

188

Ir-rikorrenti ssostni wkoll li jekk il-partijiet fil-konċentrazzjoni ma kinux f’kompetizzjoni bejniethom u qatt ma kienu rduppjaw in-netwerks tal-kejbil tagħhom, dan kien minħabba li bejniethom kienet teżisti kollużjoni impliċita jew taċita. Skont ir-rikorrenti, li kieku l-Kummissjoni pproċediet b’mod korrett, hija kienet tikkonstata li, fl-ipoteżi fejn la Vodafone u lanqas Unitymedia ma kienu estendew l-attivitajiet tagħhom fis-suq MDU fil-cable footprint tal-oħra, dan kien ikun biss minħabba tali kollużjoni.

191

F’dan ir-rigward, għandu jiġi osservat li l-kritika tar-rikorrenti ma tirrigwardax il-konċentrazzjoni eżaminata fid-deċiżjoni kkontestata, u lanqas l-effetti tagħha fuq is-suq MDU, iżda hija pjuttost intiża sabiex tipprova tispjega r-raġuni li għaliha l-partijiet f’din il-konċentrazzjoni ma kinux jikkompetu magħha.

192

Issa, mill-Artikolu 21(1) tar-Regolament Nru 139/2004 jirriżulta li dan tal-aħħar huwa applikabbli biss għall-konċentrazzjonijiet kif iddefiniti fl-Artikolu 3 ta’ dan ir-regolament, li għalihom ir-Regolament tal-Kunsill (KE) Nru 1/2003 tas‑16 ta’ Diċembru 2002 fuq l-implimentazzjoni tar-regoli tal-kompetizzjoni mniżżlin fl-Artikoli [101] u [102 TFUE] (ĠU Edizzjoni Speċjali bil-Malti, Kapitolu 8, Vol. 2, p. 205), fil-prinċipju, ma japplikax. Min-naħa l-oħra, dan ir-regolament tal-aħħar huwa l-uniku wieħed applikabbli għall-aġir tal-impriżi li, mingħajr ma jikkostitwixxi konċentrazzjoni fis-sens tar-Regolament Nru 139/2004, jista’ madankollu jwassal għal koordinazzjoni bejniethom kuntrarja għall-Artikolu 101 TFUE u li, għal din ir-raġuni, huwa suġġett għall-kontroll tal-Kummissjoni jew tal-awtoritajiet nazzjonali tal-kompetizzjoni (sentenza tas‑7 ta’ Settembru 2017, Austria Asphalt, C‑248/16, EU:C:2017:643, punti 32 u 33).

193

Minn dan jirriżulta li l-ilment tar-rikorrenti bbażat fuq allegata kollużjoni impliċita jew taċita bejn il-partijiet fil-konċentrazzjoni qabel il-konċentrazzjoni huwa ineffettiv, peress li ma jirrigwardax is-suġġett tad-deċiżjoni kkontestata, jiġifieri konċentrazzjoni suġġetta għar-Regolament Nru 139/2004, iżda pjuttost jirrigwarda prattiki li potenzjalment jaqgħu fil-kamp ta’ applikazzjoni tal-Artikoli 101 jew 102 TFUE u tar-Regolament Nru 1/2003. Għalhekk, anki jekk l-allegazzjonijiet tar-rikorrenti kienu fondati, jiġifieri anki fl-ipoteżi fejn kien hemm, qabel il-konċentrazzjoni, kollużjoni impliċita jew taċita bejn il-partijiet fil-konċentrazzjoni li tispjega l-assenza ta’ kompetizzjoni reali jew potenzjali bejniethom fis-suq MDU, bħalma ssostni r-rikorrenti, din ma kinitx tippermetti li tiġi kkontestata l-konklużjoni li waslet għaliha l-Kummissjoni fir-rigward ta’ dan is-suq, jiġifieri l-assenza ta’ kompetizzjoni bejn il-partijiet fil-konċentrazzjoni li l-eliminazzjoni tagħha setgħet tagħti lok għal OSKE.

194

Fi kwalunkwe każ, għandu jitfakkar li, fid-deċiżjoni kkontestata, il-Kummissjoni kkunsidrat li l-allegazzjonijiet ta’ terzi bbażati fuq kollużjoni taċita bejn il-partijiet fil-konċentrazzjoni ma kinux ikkonfermati minn eżami tad-dokumenti interni tal-imsemmija partijiet u kienu kontradetti mill-provi li kienu jinsabu fil-fajl dwar il-profittabbiltà insuffiċjenti tad-duplikazzjoni tan-netwerks bil-kejbil (ara n-noti ta’ qiegħ il-paġna Nri 534 u 566). L-argumenti mressqa mir-rikorrenti, li diġà ġew miċħuda iktar ’il fuq, fil-kuntest tal-eżami ta’ din il-parti, ma jippermettux li tiġi kkontestata din il-konstatazzjoni tal-Kummissjoni. Barra minn hekk, mistoqsija dwar il-kwistjoni ta’ kollużjoni taċita bejn il-partijiet fil-konċentrazzjoni waqt is-seduta, ir-rikorrenti ma kinitx f’pożizzjoni li tippreżenta l-iċken prova f’dan ir-rigward. Fl-aħħar nett, fir-rigward taż-żewġ deċiżjonijiet tal-Awtorità Federali Kompetenti fil-Qasam tal-Kompetizzjoni invokati, għandu jitfakkar li dawn ma jistgħux jorbtu lill-Kummissjoni, bħalma tfakkar fil-punt 152 iktar ’il fuq.

5.

Fuq it‑tieni parti, ibbażata fuq żball manifest ta’ evalwazzjoni u fuq assenza ta’ motivazzjoni, sa fejn il‑Kummissjoni naqset milli tieħu inkunsiderazzjoni ż‑żieda kbira fir‑riżorsi tal‑entità li rriżultat mill‑konċentrazzjoni

b)

Fuq l‑iżball manifest ta’ evalwazzjoni

219

F’dan ir-rigward, għandu jiġi enfasizzat li l-Artikolu 2(1)(b) tar-Regolament Nru 139/2004 isemmi s-saħħa ekonomika u finanzjarja fost l-elementi li għandhom jittieħdu inkunsiderazzjoni sabiex jiġi evalwat jekk konċentrazzjoni hijiex kompatibbli mas-suq intern jew le.

220

Madankollu, sabiex tevalwa l-kumpatibbiltà ta’ konċentrazzjoni mas-suq intern, il-Kummissjoni għandha tieħu inkunsiderazzjoni għadd ta’ punti, fosthom l-istruttura tas-swieq inkwistjoni, il-kompetizzjoni reali jew potenzjali minn impriżi, il-pożizzjoni tal-impriżi kkonċernati kif ukoll is-saħħa ekonomika u finanzjarja tagħhom, il-possibbiltajiet ta’ għażla tal-fornituri u tal-utenti, l-eżistenza ta’ ostakoli għad-dħul kif ukoll it-tendenzi fil-provvista u fid-domanda (sentenza tal‑15 ta’ Frar 2005, Il‑Kummissjoni vs Tetra Laval, C‑12/03 P, EU:C:2005:87, punt 125). Il-konstatazzjoni ta’ żieda tar-riżorsi tal-entità li tirriżulta mill-konċentrazzjoni ma tippermettix, għaldaqstant, waħedha, li jiġi konkluż li hemm OSKE.

221

Minn dan isegwi li ċ-ċirkustanza li konċentrazzjoni bejn żewġ impriżi tikkawża żieda fir-riżorsi tal-entità li tirriżulta mill-konċentrazzjoni, anki jekk dan seħħ, ma hijiex suffiċjenti, fiha nnifisha, sabiex l-imsemmija konċentrazzjoni tiġi ddikjarata inkompatibbli mas-suq intern. Fil-fatt, għandu jintwera wkoll li din iż-żieda fir-riżorsi tagħti lok għal OSKE.

222

Issa, f’dan il-każ, mingħajr ma huwa neċessarju li tiġi deċiża l-kwistjoni dwar jekk iż-żieda fir-riżorsi kinitx “speċifika” għall-konċentrazzjoni jew le, ir-rikorrenti ma turix kif tali żieda setgħet tagħti lok għal OSKE.

223

Is-sempliċi fatt li konċentrazzjoni tagħti lok għal sinerġiji jew għal tnaqqis tal-ispejjeż favur l-entità li tirriżulta minnha ma jfissirx li din il-konċentrazzjoni neċessarjament tfixkel il-kompetizzjoni. Barra minn hekk, is-sempliċi fatt li konċentrazzjoni toħloq jew issaħħaħ pożizzjoni dominanti, jew li impriża dominanti waħda tiddeċiedi dwar l-istrateġija kompetittiva u l-politika tal-prezzijiet tal-entità li tirriżulta mill-konċentrazzjoni fit-territorju nazzjonali kollu, ukoll ma jfissirx li din awtomatikament tagħti lok għal OSKE. Fil-fatt, iċ-ċirkustanza li konċentrazzjoni toħloq jew issaħħaħ pożizzjoni dominanti ma hijiex, fiha nnifisha, suffiċjenti sabiex jitqies li din il-konċentrazzjoni hija inkompatibbli mas-suq intern, peress li din ma tostakolax b’mod sinjifikattiv kompetizzjoni effettiva fis-suq intern jew f’parti sostanzjali tiegħu (ara, f’dan is-sens u b’analoġija, is-sentenza tal‑20 ta’ Ottubru 2021, Polskie Linie Lotnicze “LOT” vs Il‑Kummissjoni, T‑296/18, EU:T:2021:724, punt 107).

224

Barra minn hekk, għandu jiġi enfasizzat li l-Kummissjoni tista’ tiddikjara konċentrazzjoni inkompatibbli mas-suq intern biss jekk hija tikkonstata OSKE li jkun il-konsegwenza diretta u immedjata tal-konċentrazzjoni. Tali ostakolu, li jirriżulta mid-deċiżjonijiet futuri tal-entità li tirriżulta mill-konċentrazzjoni, jista’ jitqies biss bħala konsegwenza diretta u immedjata tal-konċentrazzjoni jekk dan l-aġir futur isir possibbli u ekonomikament razzjonali permezz tal-bidla fil-karatteristiċi u fl-istruttura tas-suq ikkawżata mill-konċentrazzjoni (sentenza tal‑11 ta’ Diċembru 2013, Cisco Systems u Messagenet vs Il‑Kummissjoni, T‑79/12, EU:T:2013:635, punt 118).

225

Issa, f’dan il-każ, huwa paċifiku li kemm Vodafone kif ukoll Unitymedia kienu diġà jinsabu f’pożizzjoni dominanti fis-suq MDU fil-cable footprints rispettivi tagħhom qabel il-konċentrazzjoni, bil-konsegwenza li t-tnejn li huma kellhom il-poter li jaġixxu, b’mod kunsiderevoli, b’mod indipendenti fil-konfront tal-kompetituri tagħhom u tal-klijenti MDU tagħhom. Konsegwentement, anki jekk, bħalma ssostni r-rikorrenti, l-entità li tirriżulta mill-konċentrazzjoni setgħet, permezz ta’ żieda fir-riżorsi tagħha, teskludi l-kompetituri l-oħra tagħha bl-applikazzjoni, b’mod partikolari, ta’ prezzijiet predatorji, għandu jiġi kkonstatat li dan kien diġà l-każ qabel il-konċentrazzjoni u li dan l-aġir futur ma jsirx, għaldaqstant, possibbli u ekonomikament razzjonali permezz tat-tibdil tal-karatteristiċi u tal-istruttura tas-suq ikkawżata mill-konċentrazzjoni.

226

Fi kwalunkwe każ, jekk l-entità li tirriżulta mill-konċentrazzjoni timplimenta prattiki antikompetittivi sabiex teskludi l-kompetizzjoni residwa fis-suq MDU, ikun possibbli għal terzi li jirrapportaw tali abbuż potenzjali lill-awtoritajiet nazzjonali tal-kompetizzjoni jew lill-Kummissjoni, bla ħsara għall-possibbiltà li dawn jaġixxu ex officio, konformement mal-Artikolu 5 u mal-Artikolu 7(1) tar-Regolament Nru 1/2003. (ara, f’dan is-sens, is-sentenza tat‑13 ta’ Mejju 2015, Niki Luftfahrt vs Il‑Kummissjoni, T‑162/10, EU:T:2015:283, punt 250).

227

Fl-aħħar nett, il-Kummissjoni la hija marbuta bid-deċiżjoni tal-Oberlandesgericht Düsseldorf (il-Qorti Reġjonali Superjuri ta’ Düsseldorf) tal‑14 ta’ Awwissu 2013, u lanqas bil-prassi deċiżjonali rispettiva tagħha.

228

Fir-rigward tad-deċiżjoni tal-Oberlandesgericht Düsseldorf (il-Qorti Reġjonali Superjuri ta’ Düsseldorf), għandu barra minn hekk jiġi kkonstatat li din ingħatat fl‑2013, filwaqt li l-konċentrazzjoni kienet ġiet innotifikata fl‑2018. Madankollu, is-swieq tat-telekomunikazzjonijiet jevolvu b’mod mgħaġġel ħafna. F’dan il-kuntest, il-fatt li għaddew ħames snin jista’ wkoll jiġġustifika l-assenza ta’ teħid inkunsiderazzjoni ta’ dik id-deċiżjoni. Għandu jiġi rrilevat ukoll li, fid-dawal tat-tqassim preċiż tal-kompetenzi li fuqu huwa bbażat ir-Regolament Nru 139/2004, id-deċiżjonijiet tal-awtoritajiet nazzjonali ma jistgħux jorbtu lill-Kummissjoni fil-kuntest tal-proċeduri ta’ kontroll tal-konċentrazzjonijet (Ara, f’dan is-sens, is-sentenzi tat‑18 ta’ Diċembru 2007, Cementbouw Handel & Industrie vs Il‑Kummissjoni, C‑202/06 P, EU:C:2007:814, punt 56, u tas‑7 ta’ Mejju 2009, NVV et vs Il‑Kummissjoni, T‑151/05, EU:T:2009:144, punt 139).

229

Fir-rigward tal-prassi deċiżjonali preċedenti tal-Kummissjoni, għandu jitfakkar li, meta l-Kummissjoni tiddeċiedi fuq il-kompatibbiltà ta’ konċentrazzjoni mas-suq intern abbażi ta’ notifika u ta’ fajl għal din il-konċentrazzjoni, rikorrent ma jkollux id-dritt li jikkontesta l-konstatazzjonijiet tagħha għar-raġuni li dawn ikunu differenti minn dawk li jkunu saru preċedentement f’każ ieħor, abbażi ta’ notifika u ta’ fajl differenti, anki jekk is-swieq inkwistjoni fiż-żewġ każijiet ikunu simili, jew saħansitra identiċi (sentenzi tal‑14 ta’ Diċembru 2005, General Electric vs Il‑Kummissjoni, T‑210/01, EU:T:2005:456, punt 118, u tat‑13 ta’ Mejju 2015, Niki Luftfahrt vs Il‑Kummissjoni, T‑162/10, EU:T:2015:283, punt 142).

230

Mill-kunsiderazzjonijiet preċedenti jirriżulta li r-rikorrenti ma turix li l-Kummissjoni wettqet żball manifest ta’ evalwazzjoni sa fejn din tal-aħħar ma kkonkludietx li kienu jeżistu effetti orizzontali mhux ikkoordinati fis-suq MDU minħabba ż-żieda fir-riżorsi li jirriżultaw mill-konċentrazzjoni.

D.

Fuq it‑tielet motiv, ibbażat fuq żball manifest ta’ evalwazzjoni u fuq irregolaritajiet proċedurali fil‑kuntest tal‑eżami tal‑effetti vertikali mhux ikkoordinati fis-suq intermedjarju u fis‑suq MDU

3.

Fuq it‑tieni parti, ibbażata fuq żbalji manifesti ta’ evalwazzjoni

314

F’dan ir-rigward, għandu jiġi kkonstatat li mill-punt 31 tal-Linji gwida dwar l-evalwazzjoni ta’ amalgamazzjonijiet mhux orizzontali taħt ir-Regolament tal-Kunsill dwar il-kontroll tal-konċentrazzjonijiet bejn l-impriżi (ĠU 2008, C 265, p. 6, iktar ’il quddiem il-“Linji Gwida dwar il-Konċentrazzjonijiet mhux Orizzontali”) jirriżulta li jkun hemm esklużjoni tad-dħul meta, bħala riżultat tal-konċentrazzjoni inkwistjoni, l-entità l-ġdida tista’ tirrestrinġi l-aċċess għall-prodotti jew għas-servizzi li hija kienet tipprovdi li kieku l-imsemmija konċentrazzjoni ma seħħitx, b’mod partikolari meta din l-entità tkun tista’ żżid l-ispejjeż tal-kompetituri tagħha li jinsabu downstream, billi tirrendi iktar diffiċli għal dawn tal-aħħar il-provvista ta’ inputs bi prezzijiet u b’kundizzjonijiet identiċi għal dawk li kienu jipprevalu fl-assenza ta’ din il-konċentrazzjoni.

315

Skont il-punt 32 tal-Linji Gwida dwar il-Konċentrazzjonijiet mhux Orizzontali, fl-evalwazzjoni tal-probabbiltà ta’ xenarju ta’ esklużjoni antikompetittiva tad-dħul, il-Kummissjoni għandha teżamina, l-ewwel, jekk l-entità li tirriżulta mill-konċentrazzjoni jkollhiex, wara l-konċentrazzjoni, il-kapaċità li teskludi l-aċċess tad-dħul b’mod sinjifikattiv, it-tieni, jekk ikollhiex interess li tagħmel dan u, it-tielet, jekk strateġija ta’ esklużjoni tas-suq ikollhiex impatt negattiv sinjifikattiv fuq il-kompetizzjoni tal-output.

316

Għandu jiġi osservat li dawn it-tliet kundizzjonijiet huma kumulattivi, b’tali mod li l-assenza ta’ waħda minnhom hija suffiċjenti sabiex jiġi eskluż ir-riskju ta’ esklużjoni antikompetittiva tad-dħul (sentenzi tat‑23 ta’ Mejju 2019, KPN vs Il‑Kummissjoni, T‑370/17, EU:T:2019:354, punti 118 u 119, u tas‑27 ta’ Jannar 2021, KPN vs Il‑Kummissjoni, T‑691/18, mhux ippubblikata, EU:T:2021:43, punti 111 u 112). Barra minn hekk, f’dak li jirrigwarda b’mod iktar partikolari t-tielet waħda minn dawn il-kundizzjonijiet, għandu jiġi rrilevat li, sabiex tali kundizzjoni tiġi ssodisfatta, għandu jintwera effett negattiv li jkun sinjifikattiv fuq il-kompetizzjoni downstream, bħalma jsegwi mill-punt 32 tal-Linji Gwida dwar il-Konċentrazzjonijiet mhux Orizzontali.

317

Għandu jiġi kkonstatat li, fid-deċiżjoni kkontestata, minkejja l-assenza ta’ rabta vertikali ġdida bejn is-suq intermedju upstream u s-suq MDU downstream li tirriżulta mill-konċentrazzjoni, il-Kummissjoni, fil-premessi 1476 sa 1506 tad-deċiżjoni kkontestata, eżaminat dawn it-tliet kundizzjonijiet mingħajr dan l-approċċ ma huwa, bħala tali, ikkritikat mir-rikorrenti.

318

F’dan il-każ, il-Qorti Ġenerali tqis opportun li tibda billi teżamina l-argumenti mressqa mir-rikorrenti sabiex turi li l-Kummissjoni, fid-deċiżjoni kkontestata, ikkonkludiet b’mod manifestament żbaljat li t-tielet waħda minn dawn il-kundizzjonijiet ma kinitx issodisfatta, jiġifieri t-tielet ilment tagħha, miġbur fil-qosor fil-punt 312 iktar ’il fuq.

319

F’dan ir-rigward, għandu jiġi kkonstatat li, f’dan il-kuntest, ir-rikorrenti ma tikkontestax diversi elementi li wasslu lill-Kummissjoni sabiex tikkonkludi li strateġija eventwali ta’ esklużjoni mis-suq fi kwalunkwe każ ma jkollhiex effett negattiv sinjifikattiv fuq il-kompetizzjoni downstream.

320

Għalhekk, ir-rikorrenti ma tikkontestax li tali strateġija ma affettwatx l-attività prinċipali tagħha, peress li din kienet eżerċitata barra mill-cable footprint ta’ Unitymedia. Barra minn hekk, għalkemm ir-rikorrenti tikkontesta l-konklużjoni tal-Kummissjoni li hija kienet ftit biss attiva fil-cable footprint ta’ Unitymedia, hija madankollu bl-ebda mod ma ssostni tali allegazzjoni u b’mod partikolari ma tikkontestax il-fatt li hija ma setgħetx tipparteċipa fis-sejħiet għal offerti li jeħtieġu aġġornamenti tan-netwerk ta’ livell 3, in-natura limitata, peress li ta’ [0–5] % tas-sehem tagħha tas-suq ikkonċernat u l-parteċipazzjoni limitata tagħha f’sejħiet għal offerti fil-cable footprint ta’ Unitymedia.

321

Barra minn hekk, l-ebda wieħed mill-argumenti mressqa mir-rikorrenti ma huwa fondat.

322

Fir-rigward, l-ewwel, tal-allegazzjoni tar-rikorrenti li hija kienet teżerċita restrizzjoni kompetittiva suffiċjenti fil-cable footprint ta’ Unitymedia, minkejja l-fatt li hija kienet sempliċement terġa’ tbigħ il-prodott ta’ din tal-aħħar, għandu jiġi kkonstatat li tali allegazzjoni ma hijiex akkumpanjata minn elementi li jippermettu li jiġu kkontestati l-ispjegazzjonijiet li jinsabu fil-premessi 1501 u 1503 tad-deċiżjoni kkontestata, kif imfakkra fil-punti 283 u 284 iktar ’il fuq.

323

Għalhekk, ir-rikorrenti bl-ebda mod ma ssostni l-allegazzjoni tagħha li l-għajbien tal-bejjiegħa mill-ġdid, li rnexxielhom jirbħu s-sejħiet għal offerti fil-passat, kellu effett negattiv sinjifikattiv fuq il-kompetizzjoni.

324

Barra minn hekk, għandu jiġi kkonstatat li, kuntrarjament għall-allegazzjoni tar-rikorrenti, ma taqax taħt proċedura ta’ kontroll tal-konċentrazzjonijiet ir-responsabbiltà li jiġi żgurat it-tisħiħ tar-rikorrenti bħala l-kompetitur prinċipali tal-partijiet fil-konċentrazzjoni u sors prinċipali ta’ kompetizzjoni residwa, iktar u iktar peress li r-rikorrenti ma tispeċifikax fiex jikkonsisti tali tisħiħ, u lanqas minn liema bażi legali għandu jirriżulta.

325

Fl-aħħar nett, ir-rikorrenti ma hijiex fondata li tinvoka l-fatt li, fir-rigward tal-effetti orizzontali mhux ikkoordinati fis-suq tal-aċċess fiss għall-internet, il-Kummissjoni aċċettat miżura korrettiva purament ibbażata fuq il-bejjiegħa mill-ġdid. Fil-fatt, bħalma tispjega l-Kummissjoni, jeżistu differenzi sinjifikattivi bejn is-suq MDU u s-suq tal-aċċess fiss għall-internet, li rrendew neċessarja l-adozzjoni ta’ miżura korrettiva fil-każ ta’ dan tal-aħħar. Fil-fatt, il-kundizzjonijiet ta’ kompetizzjoni fuq iż-żewġt iswieq kienu differenti (ara l-premessi 391 et seq kif ukoll il-premessi 700 et seq tad-deċiżjoni kkontestata). F’dan ir-rigward, fis-suq MDU, l-enfasi kienet fuq kollox fuq l-infrastruttura li kellha ssir disponibbli (ara l-premessi 107 u 699 tad-deċiżjoni kkontestata) u l-fornituri tal-livell 4 ma kinux jeżerċitaw pressjoni kompetittiva sinjifikattiva fuqu (punti 818 sa 820 u 1478 sa 1480 tad-deċiżjoni kkontestata). Min-naħa l-oħra, qabel il-konċentrazzjoni, Vodafone kienet teżerċita pressjoni kompetittiva kunsiderevoli fuq is-suq tal-aċċess fiss għall-internet (ara l-premessi 445 sa 499, u b’mod partikolari l-premessa 454 tad-deċiżjoni kkontestata), b’tali mod li miżura korrettiva kienet neċessarja (ara, b’mod partikolari, il-premessa 1898 tad-deċiżjoni kkontestata).

326

It-tieni, fir-rigward tal-allegazzjoni tar-rikorrenti li hija bbażat ruħha biss temporanjament fuq is-servizzi intermedjarji ta’ trażmissjoni tas-sinjal tat-televiżjoni pprovduti minn Unitymedia sakemm nediet in-netwerk tagħha tal-livell 3, mill-premessa 798 u mill-figura 20 tad-deċiżjoni kkontestata, li l-Kummissjoni tagħmel riferiment għalihom fil-premessa 1504 tal-imsemmija deċiżjoni, isegwi li l-evalwazzjonijiet magħmula mill-Kummissjoni huma bbażati kemm fuq it-tweġiba għad-dikjarazzjoni tal-oġġezzjonijiet kif ukoll fuq iċ-ċifri kkomunikati mir-rikorrenti stess. Il-provi ppreżentati fil-premessa 744(a) u fil-premessi 797 sa 799 tad-deċiżjoni kkontestata juru li r-rikorrenti ma kinitx verament wettqet duplikazzjoni tan-netwerk bil-cable ta’ operatur ieħor fis-snin li ppreċedew l-adozzjoni tad-deċiżjoni kkontestata. B’mod partikolari, il-figura 20 tad-deċiżjoni kkontestata, inkluża fil-premessa 798 tal-imsemmija deċiżjoni, turi li n-numru ta’ djar konnessi man-netwerk tar-rikorrenti ma kienx żdied b’mod sinjifikattiv bejn l‑2012 u l‑2018, ħlief minħabba l-akkwist ta’ assi preeżistenti ta’ kumpanniji oħra. Issa, ir-rikorrenti sempliċement tagħmel riferiment għad-dikjarazzjonijiet rispettivi tagħha, iżda ma tipproduċi ebda prova li tikkontradixxi l-konklużjoni li hija “[kienet] żviluppat ftit biss l-infrastruttura tagħha tal-livell 3 f’dawn l-aħħar snin”.

327

Minn dan isegwi li l-argumenti mressqa mir-rikorrenti ma jurux li l-Kummissjoni wettqet żball manifest ta’ evalwazzjoni, meta qieset li l-elementi li kellha għad-dispożizzjoni tagħha kienu juru li l-fatt li r-rikorrenti ma kinitx b’saħħitha fil-cable footprint a’ Unitymedia ma għandux effett negattiv sinjifikattiv fuq il-kompetizzjoni fis-suq tal-provvista bl-imnut tal-klijenti MDU.

328

Għaldaqstant, it-tielet ilment ifformulat mir-rikorrenti insostenn tat-tieni parti tat-tielet motiv għandu jiġi miċħud.

329

Fid-dawl tan-natura kumulattiva tat-tliet kundizzjonijiet dwar l-eżistenza ta’ riskju ta’ esklużjoni tad-dħul, li barra minn hekk ma huwiex ikkontestat mir-rikorrenti, il-fatt li r-rikorrenti ma wrietx li l-Kummissjoni kienet wettqet żball manifest ta’ evalwazzjoni meta kkunsidrat li t-tielet waħda minn dawn il-kundizzjonijiet ma kinitx issodisfatta huwa biżżejjed sabiex jiġi eskluż tali riskju ta’ esklużjoni, mingħajr ma jkun hemm bżonn li jiġi eżaminat jekk il-Kummissjoni ikkunsidratx, b’mod manifestament żbaljat, li ż-żewġ kundizzjonijiet l-oħra lanqas ma kienu ssodisfatti. Konsegwentement, ma hemmx lok li tiġi eżaminata l-fondatezza tal-ewwel u tat-tieni lment ifformulati mir-rikorrenti insostenn tat-tieni parti tat-tielet motiv, li jirrigwardaw, essenzjalment, dawn l-ewwel żewġ kundizzjonijiet.

330

Fid-dawl tal-kunsiderazzjonijiet preċedenti, it-tielet motiv għandu jiġi miċħud, mingħajr ma huwa neċessarju li jiġi eżaminat jekk ir-rikorrenti kellhiex interess li tinvokah.

E.

Fuq ir‑raba’ motiv, ibbażat fuq żball manifest ta’ evalwazzjoni fil‑kuntest tal‑eżami tal‑effetti orizzontali mhux ikkoordinati fis‑suq ta’ xiri lura ta’ sinjali tat‑televiżjoni

2.

Fuq l‑iżball manifest ta’ evalwazzjoni allegat mir‑rikorrenti

348

F’dak li jirrigwarda, fl-ewwel lok, il-kritika li hija għamlet lill-Kummissjoni li allegatament illimitat ruħha li tanalizza ċerti effetti antikompetittivi fuq it-tariffi tax-xiri lura jew fuq is-servizzi OTT u HBBTV, ir-rikorrenti sempliċement tiċċita ċerti funzjonalitajiet tekniċi u ċerti aspetti kummerċjali li l-Kummissjoni, fil-fehma tagħha, kellha teżamina, iżda bl-ebda mod ma tispjega kif dawn jistgħu jiġu affettwati mill-konċentrazzjoni, u b’mod iktar partikolari r-raġunijiet li għalihom, u l-mod li bih, l-entità li tirriżulta mill-konċentrazzjoni jkollha l-kapaċità, u fuq kollox l-interess, li tiddeterjora dawn il-funzjonalitajiet u aspetti kummerċjali waqt in-negozjati tagħha max-xandara, kif, fid-dawl b’mod partikolari tal-importanza tagħhom, dan jista’ jkollu l-effett li jostakola b’mod sinjifikattiv kompetizzjoni effettiva fis-suq tax-xiri ta’ sinjali tat-televiżjoni u kif tali deterjorament probabbli ta’ dawn il-funzjonalitajiet u aspetti kummerċjali jkun speċifiku għall-konċentrazzjoni, aspett li jippermetti li dan l-ewwel ilment jiġi miċħud.

349

Fi kwalunkwe każ, bħalma ssostni ġustament il-Kummissjoni, is-sempliċi fatt li l-Kummissjoni ma wettqitx l-eżamijiet kollha mixtieqa jew meqjusa utli mir-rikorrenti ma jiġġustifikax, fih innifsu, l-annullament tad-deċiżjoni kkontestata.

350

F’dak li jirrigwarda, fit-tieni lok, l-allegazzjoni li l-Kummissjoni ma ħaditx inkunsiderazzjoni l-fatt li l-entità li tirriżulta mill-konċentrazzjoni jkollha l-kapaċità u l-inċentiv li tistabbilixxi esklużivitajiet parzjali sabiex tipprojbixxi x-xandir ta’ kontenut permezz ta’ wħud mill-kompetituri tagħha, bħal hija stess, għandu jiġi kkonstatat li tali allegazzjoni hija ġenerali ħafna u bl-ebda mod ma hija sostnuta.

351

Barra minn hekk, għalkemm ir-rikorrenti ssostni li l-entità li tirriżulta mill-konċentrazzjoni jkollha l-kapaċità u l-inċentiv li tistabbilixxi tali strateġija ta’ esklużività parzjali fil-konfront ta’ wħud mill-kompetituri tagħha, għandu jiġi kkonstatat li hija lanqas ma tipprova turi li tali strateġija jkollha effett negattiv sinjifikattiv fuq il-kompetizzjoni downstream, billi tibbaża ruħha pereżempju fuq provi li juru li proporzjon potenzjalment sinjifikattiv ta’ kumpanniji ta’ akkomodazzjoni f’dak li jirrigwarda s-suq MDU, jew ta’ telespettaturi Ġermaniżi f’dak li jirrigwarda s-suq SDU, kien lest li jaqleb għall-offerta tal-entità li tirriżulta mill-konċentrazzjoni għas-sempliċi raġuni li ċerti stazzjonijiet ma kinux ġew proposti mill-fornitur attwali tagħhom. Issa, bħalma jsegwi mill-punti 315 u 316 iktar ’il fuq u mill-ġurisprudenza ċċitata fihom, it-tliet kundizzjonijiet imsemmija fil-punt 32 tal-Linji Gwida dwar il-Konċentrazzjonijiet mhux Orizzontali huma kumulattivi, b’tali mod li l-assenza ta’ waħda minnhom hija suffiċjenti sabiex jiġi eskluż ir-riskju ta’ esklużjoni antikompetittiv tad-dħul, li jippermetti li dan it-tieni lment jiġi miċħud.

352

Fi kwalunkwe każ, il-konklużjoni, minn impriża f’pożizzjoni dominanti, ta’ ftehim ta’ esklużività ma’ fornitur intiż li jeskludi mis-suq downstream kompetitur wieħed jew iktar identifikati individwalment tista’ tikkostitwixxi aġir kuntrarju għad-dritt tal-kompetizzjoni (ara, f’dan is-sens, is-sentenza tat‑22 ta’ Marzu 2011, Altstoff Recycling Austria vs Il‑Kummissjoni, T‑419/03, EU:T:2011:102, punt 51). Mistoqsija f’dan ir-rigward waqt is-seduta għas-sottomissjonijiet orali, il-Kummissjoni barra minn hekk ikkonfermat li jekk l-entità li tirriżulta mill-konċentrazzjoni tikkonkludi ftehim ta’ esklużività totali jew parzjali ma’ xandar, dan ikun potenzjalment jikkostitwixxi ksur tal-Artikolu 101 jew 102 TFUE.

353

Konsegwentement, għandu jitqies li ma tantx kien probabbli li l-entità li tirriżulta mill-konċentrazzjoni tkun inċentivata tikkonkludi tali ftehimiet wara din il-konċentrazzjoni, li kien japplika wkoll għax-xandara. Fil-fatt, mill-ġurisprudenza jsegwi li għalkemm huwa xieraq li jittieħdu inkunsiderazzjoni inċentivi sabiex jiġi adottat aġir antikompetittiv, għandu jittieħed inkunsiderazzjoni wkoll il-fatt li l-imsemmija inċentivi jistgħu jitnaqqsu, jew saħansitra jiġu eliminati, minħabba l-illegalità tal-aġir inkwistjoni, il-probabbiltà li jiġi skopert, l-azzjoni meħuda mill-awtoritajiet kompetenti kemm fil-livell tal-Unjoni kif ukoll fil-livell nazzjonali u s-sanzjonijiet pekunjarji li jistgħu jirriżultaw minnu (ara, f’dan is-sens, is-sentenzi tal‑25 ta’ Ottubru 2002, Tetra Laval vs Il‑Kummissjoni, T‑5/02, EU:T:2002:264, punt 159, u tal‑14 ta’ Diċembru 2005, General Electric vs Il‑Kummissjoni, T‑210/01, EU:T:2005:456, punti 303 sa 311). Għaldaqstant, il-Kummissjoni ma tistax tiġi kkritikata li ma ħaditx inkunsiderazzjoni l-possibbiltà improbabbli, fid-dawl tan-natura potenzjalment illegali tagħha, li l-entità li tirriżulta mill-konċentrazzjoni tikkonkludi ma’ xandar ftehim ta’ esklużività li permezz tiegħu kompetitur wieħed jew iktar fis-swieq downstream, bħar-rikorrenti, jiġu mċaħħda minn aċċess għal ċertu kontenut.

354

F’dak li jirrigwarda, fit-tielet lok, l-allegazzjoni li l-entità li tirriżulta mill-konċentrazzjoni tista’ tuża fis-suq MDU l-vantaġġi li hija tibbenefika minnhom fis-suq tax-xiri mill-ġdid tas-sinjali tat-televiżjoni, għandu jiġi kkonstatat li dawn l-elementi diġà ġew invokati mir-rikorrenti insostenn tat-tieni parti tal-ewwel motiv tagħha, ibbażata fuq żball manifest ta’ evalwazzjoni u fuq nuqqas ta’ motivazzjoni, sa fejn il-Kummissjoni, fil-kuntest tal-eżami tagħha tas-suq MDU, naqset milli tieħu inkunsiderazzjoni ż-żieda kbira tar-riżorsi tal-entità li tirriżulta mill-konċentrazzjoni. Issa, din it-tieni parti ġiet miċħuda għar-raġunijiet esposti fil-punti 199 sa 230 iktar ’il fuq, b’tali mod li dan it-tielet ilment ma jistax jintlaqa’.

355

Fi kwalunkwe każ, jekk il-vantaġġi allegati li tkun tibbenefika minnhom l-entità li tirriżulta mill-konċentrazzjoni jkunu jippermettulha toffri prezzijiet iktar vantaġġużi lill-klijenti MDU, bħalma ssostni r-rikorrenti, ikun hemm lok li jitqies li dan juri effetti pożittivi għall-konsumaturi, peress li kien probabbli li tali tnaqqis fil-prezz kien ser jiġi rifless fl-ammont tal-kera fix-xahar ta’ min jikri l-immobbli kkonċernati, iktar milli OSKE. Barra minn hekk, għandu jiġi kkonstatat li r-rikorrenti bl-ebda mod ma turi li l-vantaġġi li hija tallega, jiġifieri l-ġbir ta’ tariffi ta’ xiri lura u l-akkwist ta’ kontenut b’kundizzjonijiet iktar vantaġġużi minn dawk tal-operaturi iżgħar li jxandru bil-kejbil, kienu speċifiċi għall-konċentrazzjoni.

356

Għaldaqstant, ir-rikorrenti ma turix li l-Kummissjoni wettqet żball manifest ta’ evalwazzjoni fil-kuntest tal-eżami tal-effetti orizzontali mhux ikkoordinati fis-suq tax-xiri lura tas-sinjali tat-televiżjoni, bil-konsegwenza li r-raba’ motiv għandu jiġi miċħud.

F.

Fuq il‑ħames motiv, ibbażat fuq żball manifest ta’ evalwazzjoni u fuq irregolarità proċedurali fil‑kuntest tal‑eżami tal‑impenji

2.

Fuq l‑ewwel parti, ibbażata fuq żball manifest fl‑evalwazzjoni tal‑impenn WCBA

370

Sussegwentement, fir-rigward tal-allegazzjoni tar-rikorrenti li l-impenn WCBA huwa ineffettiv peress li ma jippermettix li tiġi kkumpensata t-tneħħija tal-pressjoni kompetittiva mill-infrastrutturi u l-innovazzjonijiet eżerċitata minn Unitymedia qabel il-konċentrazzjoni, għandu jiġi kkonstatat li l-għan prinċipali tal-impenn WCBA kien li tiġi rrimedjata l-problema kompetittiva li tirriżulta mit-tneħħija tal-pressjoni kompetittiva eżerċitata mill-attività DSL ta’ Vodafone fil-cable footprint ta’ Unitymedia, bħalma jsegwi b’mod partikolari mill-premessa 1898 tad-deċiżjoni kkontestata.

371

Fil-fatt, wara l-konċentrazzjoni, l-attività eżerċitata minn Unitymedia permezz tan-netwerk bil-kejbil tagħha tkompli u terġa’ tibda minn Vodafone. Min-naħa l-oħra, Vodafone kienet tipprevedi li ttemm, fil-cable footprint ta’ Unitymedia, l-attività DSL tagħha, li hija kienet teżerċita abbażi ta’ aċċess bl-ingrossa pprovdut minn Deutsche Telekom (ara, b’mod partikolari, il-premessi 566, 604 u 605 tad-deċiżjoni kkontestata). Minn dan isegwi li hija l-attività DSL ta’ Vodafone, jiġifieri attività ta’ bejgħ mill-ġdid tal-prodott DSL ta’ Deutsche Telekom, li titneħħa wara l-konċentrazzjoni.

372

L-impenn WCBA ma setax, għaldaqstant, jitqies bħala ineffettiv sa fejn dan kien jipprevedi d-dħul ta’ operatur, Telefónica, li ma kienx attiv fil-qasam tal-infrastrutturi, iżda kien jagħmel biss bejgħ mill-ġdid, peress li kellu preċiżament l-għan li jikkumpensa t-tmiem ta’ operatur, Vodafone, fil-cable footprint ta’ Unitymedia, li ma kienx attiv fil-qasam tal-infrastrutturi, iżda kien jagħmel biss il-bejgħ, b’tali mod li dan l-ewwel ilment ma jistax jintlaqa’.

373

Fi kwalunkwe każ, mill-premessa 452 tad-deċiżjoni kkontestata jsegwi b’mod partikolari li, fil-cable footprint tagħha, Vodafone kienet tinvesti u tagħmel innovazzjoni qabel il-konċentrazzjoni. Barra minn hekk, wara l-konċentrazzjoni, l-attività bil-kejbil tal-entità li tirriżulta mill-konċentrazzjoni tibqa’ suġġetta, fil-cable footprint ta’ Unitymedia, għall-kompetizzjoni ta’ operaturi oħra, bħal Deutsche Telekom, United Internet u Telefónica, aspett li jirriżulta wkoll minn din il-premessa. Minn dan jirriżulta li l-entità li tirriżulta mill-konċentrazzjoni probabbilment ikollha, fil-cable footprint preċedenti ta’ Unitymedia, tagħmel investimenti f’termini ta’ infrastruttura u ta’ innovazzjoni simili għal dawk li kienet twettaq din tal-aħħar qabel il-konċentrazzjoni. Fi kwalunkwe każ, ir-rikorrenti ma tipproduċi ebda prova li turi b’mod suffiċjenti li, minkejja dawn iċ-ċirkustanzi u, b’mod iktar preċiż, minkejja l-kompetizzjoni eżerċitata minn Deutsche Telekom, United Internet u Telefónica, l-entità li tirriżulta mill-konċentrazzjoni ser tieqaf tinvesti u tagħmel innovazzjonijiet fil-cable footprint preċedenti ta’ Unitymedia, bil-konsegwenza li l-konċentrazzjoni twassal għal telf tal-pressjoni kompetittiva li tirriżulta minn tali investimenti u innovazzjonijiet.

374

Fit-tieni lok, f’dak li jirrigwarda l-allegazzjoni tar-rikorrenti li l-Kummissjoni ma setgħetx taċċetta l-impenn WCBA minħabba n-natura komportamentali u mhux strutturali tagħha, huwa minnu li, bħalma tikkonstata r-rikorrenti, il-Kummissjoni tispjega, fil-punt 15 tal-Avviż dwar ir-Rimedji, li l-impenji ta’ natura strutturali, bħall-impenn li tiġi ttrasferita attività, huma ġeneralment preferibbli mill-perspettiva tal-għan iddefinit fir-Regolament Nru 139/2004, sa fejn dawn jipprekludu, għal żmien twil, il-problemi ta’ kompetizzjoni li jirriżultaw mill-konċentrazzjoni nnotifikata u ma jeħtiġux miżuri ta’ sorveljanza fuq perijodu medju jew twil. Barra minn hekk, il-Kummissjoni tenfasizza fil-punt 17 tal-imsemmi avviż li l-impenji dwar l-aġir futur tal-entità li tirriżulta mill-konċentrazzjoni jistgħu jkunu ammissibbli eċċezzjonalment biss, f’ċirkustanzi speċifiċi ħafna.

375

Sussegwentement, il-Kummissjoni tista’ taċċetta biss impenji ta’ natura li jagħmlu l-konċentrazzjoni kompatibbli mas-suq intern. Fi kliem ieħor, l-impenji proposti mill-impriżi kkonċernati għandhom jippermettu lill-Kummissjoni tikkonkludi li l-konċentrazzjoni inkwistjoni ma tfixkilx b’mod sinjifikattiv kompetizzjoni effettiva fis-suq intern jew f’parti sostanzjali minnu, b’mod partikolari minħabba l-ħolqien jew it-tisħiħ ta’ pożizzjoni dominanti fis-sens tal-Artikolu 2(2) ta’ dan ir-regolament (ara s-sentenza tat‑23 ta’ Frar 2006, Cementbouw Handel & Industrie vs Il‑Kummissjoni, T‑282/02, EU:T:2006:64, punt 294 u l-ġurisprudenza ċċitata).

376

L-impenji li saru matul il-fażi II għandhom, b’mod partikolari, l-għan li jirrimedjaw il-problemi ta’ kompetizzjoni kkonstatati mill-Kummissjoni matul il-fażi I u li wasslu lill-Kummissjoni tiftaħ il-fażi II. Konsegwentement, meta l-Qorti Ġenerali jkollha teżamina jekk l-impenji meħuda matul il-fażi II humiex, fid-dawl tal-portata tagħhom u tal-kontenut tagħhom, ta’ natura li jippermettu lill-Kummissjoni tadotta deċiżjoni li tapprova l-konċentrazzjoni, hija għandha tivverifika li l-Kummissjoni setgħet, mingħajr ma twettaq żball manifest ta’ evalwazzjoni, tikkunsidra li l-imsemmija impenji kienu jikkostitwixxu risposta diretta u suffiċjenti għall-problemi ta’ kompetizzjoni kkonstatati fil-fażi I (ara, f’dan is-sens, is-sentenza tat‑13 ta’ Mejju 2015, Niki Luftfahrt vs Il‑Kummissjoni, T‑162/10, EU:T:2015:283, punt 298)

377

Skont il-premessa 30 tar-Regolament Nru 139/2004, meta l-impriżi konċernati jagħmlu xi bidliet f’konċentrazzjoni nnotifikata, b’mod partikolari billi jagħmlu impenji sabiex jagħmluha kompatibbli mas-suq intern, il-Kummissjoni għandha tkun tista’ tiddikjara din il-konċentrazzjoni, kif mibdula, kompatibbli mas-suq intern. Dawn l-impenji għandhom ikunu proporzjonati mal-problema ta’ kompetizzjoni u jsolvuha kompletament (ara, f’dan is-sens, is-sentenza tat‑23 ta’ Frar 2006, Cementbouw Handel & Industrie vs Il‑Kummissjoni, T‑282/02, EU:T:2006:64, punt 307).

378

Fl-aħħar nett, l-impenji ta’ mġiba ma humiex insuffiċjenti min-natura tagħhom stess sabiex jipprekludu OSKE fis-suq intern jew f’parti sostanzjali minnu, b’mod partikolari minħabba l-ħolqien jew it-tisħiħ ta’ pożizzjoni dominanti u għandhom jiġu evalwati fuq bażi ta’ każ b’każ bħall-impenji strutturali (ara, f’dan is-sens, is-sentenza tal‑21 ta’ Settembru 2005, EDP vs Il‑Kummissjoni, T‑87/05, EU:T:2005:333, punt 100 u l-ġurisprudenza ċċitata).

379

Huwa għalhekk li, fil-punt 15 tal-Avviż dwar ir-Rimedji, il-Kummissjoni tenfasizza li ma huwiex possibbli li jiġi eskluż a priori li tipi oħra ta’ impenji, li ma humiex impenji ta’ natura strutturali, jistgħu wkoll jipprekludu l-formazzjoni ta’ OSKE.

380

Mill-kunsiderazzjonijiet preċedenti jirriżulta li, ċertament, fl-Avviż dwar ir-Rimedji, il-Kummissjoni turi preferenza għall-impenji strutturali, b’mod partikolari minħabba l-faċilità ta’ implimentazzjoni tagħhom. Madankollu, għandu jiġi kkonstatat li hija prinċipalment in-natura xierqa u suffiċjenti tal-impenji sabiex tiġi solvuta l-problema ta’ kompetizzjoni identifikata, kif ukoll iċ-ċertezza li l-imsemmija impenji jistgħu jiġu implimentati, li tirregola l-aċċettazzjoni ta’ dawn tal-aħħar.

381

Għaldaqstant, ir-rikorrenti ma hijiex fondata ssostni li l-Kummissjoni kellha tiċħad l-impenn WCBA għas-sempliċi raġuni li dan kien jirrigwarda biss l-aġir tal-entità li tirriżulta mill-konċentrazzjoni, li jippermetti li t-tieni lment jiġi miċħud.

382

Fit-tielet lok, f’dak li jirrigwarda l-allegazzjoni tar-rikorrenti bbażata fuq l-allegata inkapaċità ta’ Telefónica li teżerċita pressjoni kompetittiva qawwija fis-suq tal-aċċess fiss għall-internet, għandu jiġi kkonstatat li l-kontenut tal-premessa 529 tad-deċiżjoni kkontestata, invokata mir-rikorrenti insostenn ta’ dan l-ilment, jikkonċerna dikjarazzjoni ta’ Deutsche Telekom dwar is-saħħa kompetittiva ta’ Telefónica qabel it-teħid inkunsiderazzjoni tal-impenn WCBA, li jippermetti li jiġi miċħud l-argument tar-rikorrenti li l-Kummissjoni stess, f’din il-premessa, irrikonoxxiet din l-inkapaċità ta’ Telefónica.

383

Barra minn hekk, fir-rigward tal-argument tar-rikorrenti bbażat fuq veloċitajiet allegatament limitati li huma offruti lil Telefónica skont l-impenn WCBA, huwa minnu li, fil-premessa 531 tad-deċiżjoni kkontestata, il-Kummissjoni għamlet il-konstatazzjonijiet li ġejjin:

384

Madankollu, għandu jiġi enfasizzat li tali konstatazzjonijiet magħmula mill-Kummissjoni kienu jirrigwardaw is-sitwazzjoni ta’ Telefónica fl-assenza tal-impenn WCBA.

385

Għaldaqstant, għandu jitqies li dawn il-konstatazzjonijiet, li ma jiħdux inkunsiderazzjoni l-obbligi kollha assunti minn Vodafone fil-kuntest tal-impenn WCBA, ma jippermettu li tinsilet ebda konklużjoni dwar il-kapaċità u l-inkoraġġiment ta’ Telefónica sabiex topera bħala saħħa kompetittiva vijabbli u attiva ladarba jiġi implimentat dan l-impenn.

386

Barra minn hekk, għandu jiġi rrilevat li, fil-premessi 1896 sa 1917 tad-deċiżjoni kkontestata, f’taqsima intitolata “Portata” [traduzzjoni mhux uffiċjali], il-Kummissjoni eżaminat l-impenn WCBA fid-dettall. B’mod iktar partikolari, fil-premessi 1901 sa 1906 tal-imsemmija deċiżjoni, il-Kummissjoni eżaminat il-veloċitajiet offruti minn Vodafone lil Telefónica. Bħalma tenfasizza l-intervenjenti fil-kuntest ta’ din il-proċedura, Telefónica kellha debitu massimu ipotetiku ta’ 250 Mbits/s għall-attivitajiet DSL tagħha. B’paragun ma’ dan, l-impenn WCBA jippermettilha taċċedi veloċitajiet sa 300 Mbits/s meta jiġi implimentat u sa 500 Mbits/s wara. Huwa għalhekk li, fil-premessa 1906 tad-deċiżjoni kkontestata, il-Kummissjoni kkunsidrat li l-veloċitajiet disponibbli fil-kuntest tal-impenn WCBA joffru vantaġġi sinjifikattivi meta mqabbla ma’ dawk disponibbli fuq l-infrastruttura DSL ta’ Deutsche Telekom. B’mod partikolari, hija rrilevat li dan l-impenn kien joffri veloċitajiet ogħla mill-prodott l-iktar veloċi teknikament disponibbli bl-infrastruttura DSL u kien joħloq kompetitur li kien eqreb għal Unitymedia milli għall-attività DSL ta’ Vodafone f’termini ta’ veloċità. B’mod ġenerali, il-Kummissjoni qieset li l-veloċitajiet disponibbli b’applikazzjoni tal-impenn WCBA jikkostitwixxu titjib meta mqabbla mal-offerta bl-ingrossa ta’ Deutsche Telekom u huma suffiċjenti sabiex jippermettu lil Telefónica teżerċita kompetizzjoni effettiva fis-suq tal-aċċess fiss għall-Internet fil-futur prevedibbli.

387

Għalhekk, is-sempliċi ċirkustanza li, qabel it-teħid inkunsiderazzjoni tal-impenn WCBA, il-Kummissjoni kkunsidrat li l-introduzzjoni tardiva ta’ veloċitajiet ogħla fil-portafoll ta’ prodotti tagħha kienet tikkostitwixxi prova importanti tal-kompetittività limitata ta’ Telefónica fis-suq, ma tippermetti li tinsilet ebda konklużjoni dwar il-kapaċità u l-inċentiv ta’ Telefónica li topera bħala saħħa kompetittiva vijabbli u attiva, u għalhekk fuq in-natura xierqa u suffiċjenti tal-impenn WCBA, ladarba implimentat, li jippermetti li jiġi miċħud dan it-tielet ilment.

388

Mill-kunsiderazzjonijiet preċedenti kollha jirriżulta li l-ewwel parti tal-ħames motiv, ibbażata fuq żball manifest li allegatament wettqet il-Kummissjoni fl-evalwazzjoni tal-impenn WCBA, għandha tiġi miċħuda.

3.

Fuq it‑tieni parti, ibbażata fuq irregolarità proċedurali u fuq żball manifest fl‑evalwazzjoni tal‑impenji li jirrigwardaw is‑suq tax‑xiri tas‑sinjali tat‑televiżjoni

389

Fl-ewwel lok, ir-rikorrenti ssostni li l-Kummissjoni wettqet irregolarità proċedurali meta aċċettat l-impenn dwar it-tariffi ta’ xiri lura, peress li dan kien ġie ppreżentat tard, wara l-iskadenza tat-terminu previst fl-Artikolu 19(2) tar-Regolament Nru 802/2004, u mingħajr konsultazzjoni mal-atturi tas-suq.

400

It-tieni, fir-rigward tal-allegazzjoni tar-rikorrenti li l-impenn OTT kien insuffiċjenti, peress li s-servizzi OTT kellhom biss importanza limitata fil-Ġermanja u peress li ma pproteġewx l-operaturi tal-kejbil l-oħra u l-fornituri IPTV, għandu jiġi kkonstatat, minn naħa, li mill-premessa 1266 tad-deċiżjoni kkontestata jirriżulta li l-problema tal-kompetizzjoni kkonstatata, li għaliha dan ir-rimedju kien intiż li jipprovdi soluzzjoni, kienet tikkonsisti fil-possibbiltà ikbar li l-entità li tirriżulta mill-konċentrazzjoni jkollha li tostakola l-ħolqien u l-iżvilupp ta’ ċerti servizzi televiżivi innovattivi, li l-importanza dejjem tikber tagħhom kienet ġiet ikkonstatata, li tippermetti iktar interazzjoni bejn ix-xandar u t-telespettaturi, fosthom l-OTT.

401

Konsegwentement, indipendentement mill-kwistjoni tal-kuntest temporali li fih is-servizzi OTT kienu kapaċi jillimitaw il-marġni ta’ manuvra u s-setgħa ikbar ta’ negozjar tal-entità li tirriżulta mill-konċentrazzjoni, għandu jiġi kkonstatat li l-impenn OTT, sa fejn jipprekludi lil Vodafone, sa mid-data tal-adozzjoni tad-deċiżjoni kkontestata, mhux biss milli tikkonkludi jew iġġedded ftehim ma’ xandar li jkun inkluda termini li jirrestrinġu direttament jew indirettament il-kapaċità ta’ dan ix-xandar li joffri servizz OTT fil-Ġermanja, iżda jobbligaha wkoll li ma timplimentax tali klawżoli li kienu jeżistu u li tirtira restrizzjonijiet simili fil-kuntratti eżistenti (ara l-punti 13 u 14 tat-Taqsima B.II tat-test tal-impenji), seta’ immedjatament jipprekludi lil Vodafone milli tostakola l-emerġenza u l-iżvilupp tas-servizzi OTT u, għaldaqstant, milli jelimina l-problema tal-kompetizzjoni kkonstatata li għaliha kien ġie adottat.

402

Min-naħa l-oħra, għandu jiġi rrilevat li, għalkemm il-Kummissjoni kkunsidrat, fid-deċiżjoni kkontestata, li l-entità li tirriżulta mill-konċentrazzjoni jkollha l-kapaċità u l-inċentiv li tostakola l-ħolqien u l-iżvilupp ta’ servizzi televiżivi innovattivi bħall-HBBTV u l-OTT u li Vodafone kienet, sabiex tirrimedja din il-problema ta’ kompetizzjoni, ipproponiet l-impenji OTT u HBBTV, hija ma qisitx li dan kien ikun il-każ ta’ mezzi oħra ta’ xandir, bħall-operaturi tal-kejbil l-oħra jew il-fornituri IPTV. Fir-rigward ta’ dan il-prodott tal-aħħar, għandu jiġi kkonstatat li dan kien, kuntrarjament għall-OTT, f’fażi ta’ tnaqqis ta’ popolarità, b’sehem mis-suq limitat ta’ 8 % (ara l-premessa 291 tad-deċiżjoni kkontestata), aspett li ma huwiex ikkontestat mir-rikorrenti.

403

Issa, ir-rikorrenti ma kkritikatx lill-Kummissjoni li ma qisitx li l-entità li tirriżulta mill-konċentrazzjoni kien ikollha l-kapaċità u l-interess li tostakola l-ħolqien u l-iżvilupp ta’ mezzi oħra ta’ xandir, bħall-operaturi tal-kejbil l-oħra jew il-fornituri IPTV, bil-konsegwenza li ma kienx neċessarju li timponi impenn f’dan ir-rigward, u dan jippermetti li tiġi miċħuda din l-allegazzjoni tar-rikorrenti.

404

Fir-rigward, it-tielet, tal-allegazzjoni tar-rikorrenti li l-kapaċità eżistenti bejn in-netwerk tal-internet tal-entità li tirriżulta mill-konċentrazzjoni u l-fornituri terzi ta’ servizzi ta’ interkonnettività tal-internet prevista fil-kuntest tal-impenn OTT ma kinitx biżżejjed sabiex tiggarantixxi veloċità li tippermetti x-xandir ta’ servizzi OTT, iżda li pjuttost kellu jiġi ffissat għal 32 in-numru ta’ akkomodazzjonijiet konnessi għal kull distributur, għandu jiġi kkonstatat li r-rikorrenti ma ssostni ebda prova simili, b’tali mod li dan it-tielet ilment ma jistax jintlaqa’.

405

Fi kwalunkwe każ, għandu jiġi rrilevat li mill-punt 15 tat-Taqsima B.II tat-test tal-impenji jsegwi li l-għan tat-tieni aspett tal-impenn OTT, li jirrigwarda l-interkonnessjoni għas-servizzi OTT, kien li jinżammu mill-inqas tliet rotot mhux konġestjonati lejn in-netwerk IP tal-entità li tirriżulta mill-konċentrazzjoni fil-Ġermanja. Fi kliem ieħor, l-għan kien li tiġi pprovduta kapaċità ta’ interkonnessjoni suffiċjenti sabiex il-klijenti tal-internet b’veloċità għolja tal-entità li tirriżulta mill-konċentrazzjoni jkunu jistgħu jaċċessaw kwalunkwe servizz OTT fil-Ġermanja, jew permezz tal-punti ta’ interkonnessjoni deskritti fil-punt 16 tat-Taqsima B.II tat-test tal-impenji, jew mod ieħor.

406

Għal dan l-għan, il-punt 16 tat-Taqsima B.II tat-test tal-impenji kien jipprevedi, b’mod partikolari, l-obbligi li ġejjin. L-ewwel, Vodafone kellha tiżgura li l-użu tal-ogħla livell ta’ kuljum fuq il-punti ta’ interkonnessjoni kollha tal-entità li tirriżulta mill-konċentrazzjoni ma’ kull wieħed mill-gruppi ta’ mill-inqas tliet fornituri ta’ interkonnettività ta’ reputazzjoni li kienu lesti jbigħu servizzi ta’ tranżitu, permezz ta’ punt wieħed jew iktar ta’ interkonnessjoni fiżiċi fil-Ġermanja, li fuqhom it-traffiku seta’ jiċċaqlaq lejn il-klijenti tal-internet b’veloċità għolja, ma jaqbiżx it‑80 %, bil-konsegwenza li jkun hemm mill-inqas 20 % tal-kapaċità disponibbli lil hinn mill-ogħla livell ta’ kuljum. It-tieni, Vodafone kellha tiżgura li l-kapaċità disponibbli lil hinn mill-ogħla livell ta’ kuljum tkun mill-inqas ta’ 20 Gbit/s. Dan l-ammont kellu jiġi rrivedut kull sena skont proċedura deskritta fit-test tal-impenji. Issa, ir-rikorrenti ma tispjegax b’mod konkret kif dan kien insuffiċjenti.

407

F’dan ir-rigward, għandu jiġi rrilevat ukoll li l-Kummissjoni u l-intervenjenti spjegaw essenzjalment, mingħajr ma ġew kontradetti, li l-entità li tirriżulta mill-konċentrazzjoni tkun inċentivata ħafna sabiex timminimizza konġestjoni fuq il-livell tal-linja lokali għar-raġuni li tali konġestjoni, li tikkawża konġestjoni “fl-aħħar kilometru” (on the last mile), kienet tikkomprometti wkoll l-attrattività tal-offerta fissa tagħha ta’ servizzi ta’ internet b’veloċità għolja u kienet tesponiha għar-riskju li titlef klijenti favur operaturi oħra.

408

Barra minn hekk, għandu jiġi kkonstatat li, fil-premessa 1929 tad-deċiżjoni kkontestata, il-Kummissjoni rrilevat li n-newtralità tal-internet, iggarantita mir-Regolament (UE) 2015/2120 tal-Parlament Ewropew u tal-Kunsill tal‑25 ta’ Novembru 2015 li jistabbilixxi miżuri dwar aċċess għal Internet miftuħ u li jemenda d-Direttiva 2002/22/KE dwar servizz universali u d-drittijiet tal-utenti li jirrelataw ma’ networks u servizzi ta’ komunikazzjonijiet elettroniċi u r-Regolament (UE) Nru 531/2012 dwar roaming fuq netwerks pubbliċi ta’ komunikazzjoni mobbli fi ħdan l-Unjoni (ĠU 2015, L 310, p. 1), kellha tipprekludi lill-entità li tirriżulta mill-konċentrazzjoni milli tadotta prattiki unilaterali restrittivi intiżi sabiex jevitaw l-impenn, bħad-definizzjoni mill-ġdid tal-prijoritajiet fil-qasam tat-traffiku jew id-diskriminazzjoni, aspett li r-rikorrenti ma tikkontestax.

409

Fid-dawl tal-kunsiderazzjonijiet preċedenti, għandu jiġi kkunsidrat li r-rikorrenti ma turix li l-impenn OTT kien ikun insuffiċjenti sabiex jiggarantixxi kwalità ta’ riċezzjoni suffiċjenti lill-klijenti tat-televiżjoni OTT, li jippermetti li t-tielet ilment jiġi miċħud.

410

Ir-raba’, fir-rigward tal-allegazzjoni tar-rikorrenti li l-impenn OTT u l-impenn HBBTV ma kinux jipprekludu lill-entità li tirriżulta mill-konċentrazzjoni milli tabbuża mill-pożizzjoni tagħha, billi tippreġudika funzjonalitajiet tekniċi oħra, għandu jitfakkar li mill-punti 348 u 349 iktar ’il fuq isegwi li, fil-kuntest tar-raba’ motiv tagħha, ir-rikorrenti ma rnexxilhiex turi li l-Kummissjoni naqset milli tikkonstata li l-entità li tirriżulta mill-konċentrazzjoni setgħet ukoll tippreġudika funzjonalitajiet tekniċi oħra, bħaċ-“CI Plus”, it-“TVHD”, il-gwida elettronika tal-programm jew is-servizzi ta’ VOD, ta’ servizzi ta’ ripetizzjoni u ta’ xandir mill-ġdid istantanji, jiġifieri l-istess bħal dawk li hija ssemmi insostenn ta’ din l-allegazzjoni.

411

B’mod iktar partikolari, ir-rikorrenti ma turix, l-ewwel, kif l-imsemmija funzjonalitajiet setgħu jiġu affettwati mill-konċentrazzjoni, kif ukoll ir-raġunijiet li għalihom, u l-mod li bih, l-entità li tirriżulta mill-konċentrazzjoni kien ikollha l-kapaċità, u fuq kollox l-interess, li tiddeterjora dawn l-aspetti matul in-negozjati tagħha max-xandara, it-tieni, kif, fid-dawl b’mod partikolari tal-importanza tagħhom, dan seta’ jkollu l-effett li jostakola b’mod sinjifikattiv il-kompetizzjoni effettiva fis-suq tax-xiri mill-ġdid tas-sinjali tat-televiżjoni u, it-tielet, kif tali deterjorament probabbli ta’ dawn il-funzjonalitajiet kien ikun speċifiku għall-konċentrazzjoni, bil-konsegwenza li ma kienx neċessarju li jiġi impost impenn f’dan ir-rigward, u dan jippermetti li tiġi miċħuda din l-allegazzjoni tar-rikorrenti.

412

Fir-rigward, il-ħames, tal-allegazzjoni tar-rikorrenti li l-impenn dwar it-tariffi ta’ xiri lura ma pprekludiex lill-entità li tirriżulta mill-konċentrazzjoni milli tirrendi inqas favorevoli, fir-rigward tax-xandara, kundizzjonijiet differenti minn dawn it-tariffi, għandu jiġi kkonstatat li r-rikorrenti u l-intervenjenti jaqblu fuq il-fatt li n-negozjati bejn ix-xandara u l-pjattaformi tat-televiżjoni ma kinux limitati għall-flussi tad-dħul tax-xandara lejn l-entità li tirriżulta mill-konċentrazzjoni, jiġifieri għat-tariffi ta’ xiri lura, iżda kienu jkopru wkoll il-pagamenti marbuta mal-kontenut u mal-pagamenti skont il-kwalità teknika jew il-funzjonalitajiet u s-servizzi supplimentari, li kienu saru mill-entità li tirriżulta mill-konċentrazzjoni favur ix-xandara.

413

Madankollu, għandu jiġi kkonstatat, qabelxejn, li, fil-premessa 1221 tad-deċiżjoni kkontestata, il-Kummissjoni indikat li t-tariffi ta’ xiri lura kienu direttament marbuta mat-trażmissjoni ta’ sinjali tat-televiżjoni bil-kejbil u għalhekk kienu jidhru li kienu l-element prinċipali tal-fluss ta’ ħlas li kien ser ikun affettwat mis-setgħa ikbar tas-suq tal-entità li tirriżulta mill-konċentrazzjoni fis-suq tax-xiri lura tas-sinjali tat-televiżjoni. Barra minn hekk, fil-premessa 1959 tal-imsemmija deċiżjoni, il-Kummissjoni spjegat li, minkejja li l-iżvilupp reċenti tas-servizzi tat-televiżjoni b’valur miżjud ikkontribwixxa għal żieda fil-fluss tad-dħul mill-pjattaformi tat-televiżjoni lejn ix-xandara, it-tariffi ta’ xiri mill-ġdid kienu għadhom jirrappreżentaw element finanzjarju rilevanti ħafna fir-relazzjoni kuntrattwali bejn ix-xandara mingħajr ħlas u l-pjattaformi tat-televiżjoni bil-kejbil. Il-Kummissjoni żiedet li ċerti elementi tal-proċess kienu jissuġġerixxu li l-effett tal-konċentrazzjoni fuq il-fluss ta’ dħul tal-entità li tirriżulta mill-konċentrazzjoni fuq ix-xandara seta’ jiġi limitat (ara t-taqsima VIII.C.2.11.3.9(ii) tad-deċiżjoni kkontestata), filwaqt li ebda element fil-proċess ma kien jissuġġerixxi li l-istess kien jgħodd għat-tariffi ta’ xiri mill-ġdid (ara wkoll il-premessa 1261).

414

Minn dan jirriżulta li l-Kummissjoni setgħet, mingħajr ma twettaq żball manifest, tieħu inkunsiderazzjoni ċ-ċirkustanza li l-impenn li ma jiżdidux it-tariffi ta’ xiri lura seta’ jikkontrobilanċja r-riskju li l-portata u l-kwalità tal-offerta televiżiva lill-klijenti bl-imnut jitnaqqsu, minħabba aggravazzjoni sinjifikattiva tal-kundizzjonijiet kuntrattwali imposti mill-entità li tirriżulta mill-konċentrazzjoni fuq ix-xandara mingħajr ħlas.

415

Sussegwentement, għandu jiġi kkunsidrat li l-Kummissjoni kienet fondata tieħu inkunsiderazzjoni n-natura komplementari tal-impenn dwar it-tariffi ta’ xiri lura u tal-impenn OTT, minħabba li l-ewwel wieħed kien jirrigwarda direttament ir-relazzjoni finanzjarja bejn l-entità li tirriżulta mill-konċentrazzjoni u x-xandara inkwistjoni f’dak li kien jirrigwarda l-offerti tat-televiżjoni tradizzjonali u lineari u li t-tieni jkollu effett fuq il-provvista ta’ servizzi addizzjonali.

416

Barra minn hekk, matul il-proċedura quddiem il-Qorti Ġenerali, il-Kummissjoni sostniet, mingħajr ma ġiet ikkontestata mir-rikorrenti, li jekk l-entità li tirriżulta mill-konċentrazzjoni żżid pagamenti kunsiderevoli minbarra t-tariffi ta’ xiri lura, dan ikun jikkostitwixxi evitar tal-impenji faċilment identifikabbli.

417

Fl-aħħar nett, anki jekk jitqies li l-allegazzjoni tagħha dwar l-evitar tal-impenji tapplika wkoll għat-televiżjoni bi ħlas, ir-rikorrenti lanqas ma pproduċiet provi sabiex tikkontradixxi l-affermazzjoni tal-Kummissjoni li tgħid li, f’dak li kien jirrigwarda l-istazzjonijiet tat-televiżjoni bi ħlas, kull aġir bħal dak li hija ddeskriviet imur kontra l-impenn OTT.

418

Mill-kunsiderazzjonijiet preċedenti jirriżulta li r-rikorrenti ma hijiex f’pożizzjoni li turi li l-Kummissjoni wettqet żball manifest ta’ evalwazzjoni meta aċċettat l-impenn OTT, l-impenn dwar it-tariffi ta’ xiri lura u l-impenn HBBTV, bil-konsegwenza li dan l-ewwel ilment għandu jiġi miċħud.

419

F’dak li jirrigwarda, fit-tieni lok, il-preżentazzjoni tard tal-impenn dwar it-tariffi ta’ xiri lura u l-irregolarità proċedurali li rriżultat, għaldaqstant, mill-aċċettazzjoni tiegħu mill-Kummissjoni, għandu jiġi rrilevat li mill-Artikolu 19(2) tar-Regolament Nru 802/2004, li għalih tagħmel riferiment ir-rikorrenti, jirriżulta li l-impenji proposti mill-impriżi kkonċernati konformement mal-Artikolu 8(2) tar-Regolament Nru 139/2004 għandhom jiġu kkomunikati lill-Kummissjoni f’terminu ta’ 65 jum ta’ xogħol mid-data ta’ bidu tal-proċedura. Meta t-terminu għall-adozzjoni ta’ deċiżjoni adottata skont l-Artikolu 8(2) tar-Regolament Nru 139/2004 jiġi estiż, il-perijodu ta’ 65 jum ta’ xogħol ikun awtomatikament estiż b’numru identiku ta’ jiem ta’ xogħol.

420

Barra minn hekk, mill-punt 94 tal-Avviż dwar ir-Rimedji jsegwi li, meta l-partijiet ibiddlu l-impenji proposti wara t-terminu ta’ 65 jum ta’ xogħol, il-Kummissjoni għandha taċċetta dawn l-impenji mibdula biss meta tkun tista’ tistabbilixxi biċ-ċar - abbażi tal-evalwazzjoni tagħha tal-informazzjoni diġà miksuba fil-kuntest tal-investigazzjoni, b’mod partikolari r-riżultati tal-konsultazzjoni preċedenti mal-atturi tas-suq u mingħajr il-ħtieġa għal kwalunkwe konsultazzjoni oħra tal-istess tip - li, ladarba implimentati, tali impenji jsolvu kompletament, billi jneħħu kwalunkwe ambigwità, il-problemi ta’ kompetizzjoni kkonstatati, u bil-kundizzjoni li jkollha biżżejjed ħin sabiex twettaq analiżi adegwata u sabiex tikkonsulta l-Istati Membri b’mod xieraq. Barra minn hekk, min-nota ta’ qiegħ il-paġna Nru 107 ta’ dan l-avviż, li tirreferi għall-punt 94 tiegħu, isegwi li l-konsultazzjoni tal-Istati Membri normalment tippreżupponi li l-Kummissjoni tkun f’pożizzjoni li tindirizza lil dawn tal-aħħar abbozz ta’ deċiżjoni finali li tinkludi evalwazzjoni tal-impenji emendati mill-inqas għaxart ijiem ta’ xogħol qabel il-laqgħa tal-Kumitat Konsultattiv mal-Istati Membri.

421

Fl-aħħar nett, għandu jiġi rrilevat li l-ġurisprudenza kkunsidrat li dawn iż-żewġ kundizzjonijiet kienu kumulattivi u ppreċiżathom, fis-sens li l-Kummissjoni tista’ tieħu inkunsiderazzjoni l-impenji ppreżentati tard mill-partijiet f’konċentrazzjoni nnotifikata, l-ewwel, jekk dawn isolvu b’mod ċar u mingħajr bżonn ta’ investigazzjoni addizzjonali l-problemi ta’ kompetizzjoni identifikati minn qabel u, it-tieni, jekk jeżisti biżżejjed żmien sabiex jiġu kkonsultati l-Istati Membri dwar dawn l-impenji (ara s-sentenza tas‑6 ta’ Lulju 2010, Ryanair vs Il‑Kummissjoni, T‑342/07, EU:T:2010:280, punt 455 u l-ġurisprudenza ċċitata).

422

F’dan il-każ, għandu jiġi kkonstatat li dawn iż-żewġ kundizzjonijiet huma ssodisfatti.

423

Fir-rigward, l-ewwel, tal-ewwel kundizzjoni, mill-punti 398 sa 418 iktar ’il fuq isegwi li l-argumenti tar-rikorrenti bbażati fuq in-natura insuffiċjenti tal-impenn dwar it-tariffi ta’ xiri lura ġew miċħuda. Għaldaqstant, għandu jiġi kkunsidrat li r-rikorrenti ma wrietx li l-Kummissjoni ma setgħetx tistabbilixxi b’mod ċar — abbażi tal-evalwazzjoni tagħha tal-informazzjoni diġà miksuba fil-kuntest tal-investigazzjoni, b’mod partikolari mir-riżultati tal-konsultazzjoni preċedenti tal-atturi tas-suq — li, ladarba implimentat, l-impenn dwar it-tariffi ta’ xiri lura kien isolvi b’mod ċar u mingħajr bżonn ta’ investigazzjoni addizzjonali l-problemi ta’ kompetizzjoni identifikati minn qabel.

424

It-tieni, fir-rigward tat-tieni kundizzjoni, għandu jiġi rrilevat li mill-premessi 25 u 26 tad-deċiżjoni kkontestata jsegwi li l-parti li nnotifikat il-konċentrazzjoni ppreżentat abbozz rivedut ta’ impenji fil‑11 ta’ Ġunju 2019 u li l-kumitat konsultattiv iddiskuta l-abbozz tad-deċiżjoni u ħareġ opinjoni favorevoli fit‑28 ta’ Ġunju. Minn dan jirriżulta li, f’dan il-każ, il-Kummissjoni kienet fil-fatt f’pożizzjoni li tindirizza lill-Istati Membri abbozz ta’ deċiżjoni finali li jinkludi evalwazzjoni tal-impenji emendati mill-inqas għaxart ijiem ta’ xogħol qabel il-laqgħa tal-Kumitat Konsultattiv, aspett li r-rikorrenti ma tikkontestax u, għaldaqstant, li hija bbenefikat minn żmien suffiċjenti sabiex tikkonsulta lill-Istati Membri dwar l-impenn dwar it-tariffi ta’ xiri lura.

425

Mill-kunsiderazzjonijiet preċedenti jirriżulta li l-Kummissjoni setgħet tieħu inkunsiderazzjoni l-impenn dwar it-tariffi ta’ xiri lura minkejja l-preżentazzjoni tard tiegħu, bil-konsegwenza li l-ilment tar-rikorrenti bbażat fuq allegata irregolarità proċedurali għandu jiġi miċħud, bl-istess mod bħat-tieni parti ta’ dan il-motiv.

426

Fid-dawl tal-kunsiderazzjonijiet preċedenti, il-ħames motiv għandu jiġi miċħud.

1)

Ir-rikors huwa miċħud.

2)

Tele Columbus AG hija kkundannata għall-ispejjeż.