1

Permezz tar-rikors tagħha, ir-rikorrenti, is-section Conseil tal-Fédération de la fonction publique européenne section Conseil (FFPE section Conseil) titlob, minn naħa, fuq il-bażi tal-Artikolu 263 TFUE, l-annullament tan-nota tal-Kunsill tal-Unjoni Ewropea tat‑3 ta’ April 2023 dwar ir-riżultat tat-tieni proċedura ta’ verifika li tikkonċernaha, inkwantu din tissospendi d-drittijiet li kienu ngħatawlha bħala organizzazzjoni sindakali jew professjonali (iktar ’il quddiem “OSP”) rappreżentattiva (iktar ’il quddiem id-“deċiżjoni kkontestata”) u, min-naħa l-oħra, fuq il-bażi tal-Artikolu 268 TFUE, il-kumpens għad-danni morali li hija ġarrbet minħabba dan il-fatt.

I.

Il‑fatti li wasslu għall‑kawża

2

Skont l-Artikolu 10c tar-Regolamenti tal-Persunal tal-Unjoni Ewropea (iktar ’il quddiem ir-“Regolamenti”), “[k]ull istituzzjoni tista’ tikkonkludi ftehim dwar il-persunal tagħha ma[l-OSP] rappreżentattivi tagħha tal-persunal. It-tali ftehim ma jistax ikun fihom emendi tar-Regolamenti tal-Persunal jew xi impennji ta’ estimi, lanqas ma jistgħu jaffettwaw l-ħidma ta’ l-istituzzjoni kkonċernata. [L-OSP] rappreżentattivi tal-persunal, li huma firmatarji, għandhom joperaw f’kull istituzzjoni, suġġetti għas-setgħat statutorji tal-kumitat tal-persunal”.

3

Fid-dawl tal-implimentazzjoni ta’ din id-dispożizzjoni, fit‑28 ta’ Marzu 2006, il-Kunsill u diversi OSP tas-Segretarjat Ġenerali tal-Kunsill (SĠK), fosthom ir-rikorrenti, iffirmaw fi Brussell (il-Belġju) dokument intitolat “Ftehim bejn il-Kunsill tal-Unjoni Ewropea u l-Organizzazzjonijiet Sindakali jew Professjonali tal-Persunal tas-Segretarjat Ġenerali tal-Kunsill” [traduzzjoni mhux uffiċjali], bil-għan li jiffissaw il-kriterji għar-rikonoxximent u għar-rappreżentattività tal-OSP tal-Kunsill (iktar ’il quddiem il-“Ftehim”).

4

Minn naħa, l-Artikolu 2 tal-Ftehim, dwar ir-rikonoxximent tal-OSP, jipprevedi l-prinċipju ta’ rikonoxximent uffiċjali tal-OSP tal-persunal tas-SĠK. Għaldaqstant, l-Artikolu 2(2)(f) tal-Ftehim jippreċiża li huma rrikonoxxuti l-OSP li jipproduċu l-prova li fi ħdan is-SĠK għandhom minn tal-inqas 60 membru li għandhom l-istatus ta’ votant u li huma eliġibbli għall-elezzjonijiet tal-Kumitat tal-Persunal u li ma għandhomx kontribuzzjonijiet mhux imħallsin fir-rigward tal-OSP tagħhom (iktar ’il quddiem il-“livell għar-rikonoxximent”).

5

Skont l-Artikolu 13 tal-Ftehim, l-OSP irrikonoxxuti jibbenefikaw mill-possibbiltà li jużaw il-mezzi ta’ traduzzjoni, ta’ riproduzzjoni, ta’ xandir u ta’ komunikazzjoni tas-SĠK, inkluż il-“home page” fis-sit intranet tiegħu, li jżommu laqgħat barra mill-ħin tax-xogħol fil-bini tas-SĠK, li jkollhom uffiċċju standard, li jaqsmuh mal-OSP irrikonoxxuti l-oħra, u li jagħtu lid-diriġenti jew lid-delegati tagħhom leave speċjali li ma jeċċedix erbat ijiem fis-sena sabiex huma jkunu jistgħu jipparteċipaw f’laqgħat jew f’kungressi sindakali barra mis-SĠK kif ukoll leave speċjali għal taħriġ sindakali kif ukoll għal taħriġ professjonali.

6

Min-naħa l-oħra, l-Artikolu 4(1) tal-Ftehim, dwar ir-rappreżentattività tal-OSP, jipprevedi li l-Kunsill jirrikonoxxi bħala rappreżentattivi fi ħdan is-SĠK l-OSP irrikonoxxuti, sakemm dawn ikollhom fi ħdan din l-istituzzjoni tal-inqas 300 membru li għandhom l-istatus ta’ votant u eliġibbli għall-elezzjonijiet tal-Kumitat tal-Persunal u ma għandhomx kontribuzzjonijiet mhux imħallsin fir-rigward tal-OSP tagħhom, inkluż ex uffiċjali jew membri oħra tal-persunal tas-SĠK, li huma intitolati għal pensjoni Komunitarja u membri ta’ OSP, sa massimu ta’ 50 membru (iktar ’il quddiem il-“livell ta’ rappreżentattività”).

7

Skont dokument anness mal-Ftehim u intitolat “Modalitajiet li jikkonċernaw il-provvista ta’ riżorsi għad-dispożizzjoni tal-OSP rappreżentattivi fis-sens tal-Artikolu 4 tal-Ftehim” [traduzzjoni mhux uffiċjali] (iktar ’il quddiem l-“Anness”), l-OSP rappreżentattivi tas-SĠK jibbenefikaw mill-provvista temporanja ta’ membri tal-persunal, ta’ għajnuna segretarjali, ta’ uffiċċji mgħammra u mowbajls għal kull membru tal-persunal ikkollokat full‑time, kif ukoll mill-aċċess kollettiv għal spazju ta’ 27 m2 intiż għal ħafna użi.

8

Barra minn hekk, l-Artikolu 5(1) tal-Ftehim, dwar il-verifika ta’ ċerti kriterji ta’ rikonoxximent u ta’ rappreżentattività tal-OSP, jipprevedi li n-numru ta’ membri tal-OSP firmatarji tal-Ftehim (iktar ’il quddiem l-“OSP kofirmatarji”) għandu jiġi kkomunikat b’dikjarazzjoni ġuramentata tal-president ta’ kull waħda minn dawn l-OSP lil organu indipendenti magħżul bi qbil komuni, li tippreċiża kemm fosthom għandhom il-kwalità ta’ uffiċjal jew ta’ membru tal-persuna tas-SĠK u n-numru ta’ persuni li huma ex uffiċjali jew membri oħra tal-persunal tas-SĠK intitolati għal pensjoni Komunitarja.

9

Din id-dispożizzjoni tippreċiża wkoll li l-organu indipendenti msemmi fil-punt 8 iktar ’il fuq għandu jivverifika jekk l-OSP kofirmatarji jilħqux, b’mod partikolari, il-livelli għar-rikonoxximent u ta’ rappreżentattività u għandu jiddetermina l-piż relattiv ta’ kull OSP rappreżentattiva (iktar ’il quddiem il-“proċedura ta’ verifika”). Fi tmiem din il-proċedura ta’ verifika, l-imsemmi organu għandu jikkomunika r-riżultat tal-konstatazzjonijiet tiegħu lill-OSP kkonċernati u lill-Awtorità tal-Ħatra, mingħajr madankollu ma jiżvela ebda informazzjoni miksuba fil-kuntest ta’ din il-proċedura.

10

Fl-aħħar nett, l-ewwel subparagrafu tal-Artikolu 5(3) tal-Ftehim jipprevedi li l-ġurament imsemmi fil-punt 8 iktar ’il fuq u l-proċedura ta’ verifika għandhom isiru kull tliet snin u kull meta xi OSP ġdida titlob li tkun parti mill-Ftehim.

11

Permezz ta’ nota tad‑29 ta’ Marzu 2022, id-Direttorat Ġenerali “Żvilupp Organizzazzjonali u Servizzi” tas-SĠK informa lill-OSP kofirmatarji bl-implimentazzjoni tal-proċedura ta’ verifika skont l-Artikolu 5 tal-Ftehim.

12

Fit‑3 u s-17 ta’ Mejju 2022, is-SĠK żamm laqgħat mal-OSP kofirmatarji li fihom ippreżentalhom l-abbozz ta’ ittra ta’ missjoni li kellha tiġi indirizzata lill-organu indipendenti msemmi fl-Artikolu 5 tal-Ftehim (iktar ’il quddiem l-“ewwel ittra ta’ missjoni”). Waqt dawn il-laqgħat, ir-rappreżentanti tat-tliet OSP kofirmatarji esprimew ix-xewqa li d-data ta’ riferiment li għandha tittieħed inkunsiderazzjoni mill-imsemmi organu għall-istabbiliment tal-listi tal-membri tagħhom (iktar ’il quddiem l-“ewwel data ta’ riferiment”) għandha tkun il‑31 ta’ Lulju 2022.

13

Fis‑17 ta’ Ġunju 2022, is-SĠK informa lill-OSP kofirmatarji, essenzjalment, li marixxall stabbilit fi Brussell (iktar ’il quddiem il-“marixxall”) kien aċċetta li jmexxi l-proċedura ta’ verifika u li l-ewwel data ta’ riferiment kienet iffissata għall‑31 ta’ Mejju 2022.

14

Matul Settembru 2022, fil-kuntest tal-proċedura ta’ verifika msemmija fil-punt 13 iktar ’il fuq (iktar ’il quddiem l-“ewwel proċedura ta’ verifika”) l-uffiċċjal ġudizzjarju eżamina l-informazzjoni kkomunikata mill-OSP kofirmatarji sabiex jevalwa jekk dawn jilħqux il-livelli għar-rikonoxximent u ta’ rappreżentattività.

15

Fl‑20 ta’ Ottubru 2022, il-marixxall ħejja rapport li minnu jirriżulta li, fil‑31 ta’ Mejju 2022, ir-rikorrenti ma kinitx laħqet il-livell għar-rikonoxximent u, konsegwentement, lanqas il-livell ta’ rappreżentattività (iktar ’il quddiem l-“ewwel rapport”).

16

Permezz ta’ nota tal‑24 ta’ Novembru 2022 (iktar ’il quddiem in-“nota tal‑24 ta’ Novembru 2022”), is-Segretarju Ġenerali tal-Kunsill ħa inkunsiderazzjoni b’mod partikolari l-fatt li r-rikorrenti ma ssodisfatx il-kriterji previsti fl-Artikolu 2(2)(f) u fl-Artikolu 4(1) tal-Ftehim u talabha tikkonforma ruħha mal-imsemmija kriterji f’terminu ta’ tliet xhur, skont il-proċedura prevista fl-ewwel subparagrafu tal-Artikolu 6(1) tal-Ftehim.

17

Fit‑30 ta’ Novembru 2022, is-SĠK ippubblika fuq l-intranet tiegħu avviż li jgħid li, għall-kuntrarju taż-żewġ OSP kofirmatarji l-oħra, ir-rikorrenti ma kinitx għadha tilħaq il-livelli għar-rikonoxximent u ta’ rappreżentattività previsti mill-Ftehim u li hija kellha terminu ta’ tliet xhur sabiex tirrimedja din is-sitwazzjoni.

18

Fis‑16 ta’ Jannar 2023, is-SĠK bagħat lir-rikorrenti abbozz ġdid ta’ ittra ta’ missjoni intiża għall-marixxall immirata għal verifika ġdida tas-sitwazzjoni tagħha fir-rigward tal-livelli għar-rikonoxximent u ta’ rappreżentattività (iktar ’il quddiem it-“tieni proċedura ta’ verifika”).

19

Fid‑19 ta’ Jannar 2023, is-SĠK u r-rikorrenti pparteċipaw f’laqgħa li matulha, minn naħa, ir-rikorrenti talbet li, fil-kuntest tat-tieni proċedura ta’ verifika, il-marixxall jistabbilixxi l-lista ta’ membri tagħha fuq il-bażi ta’ data ta’ riferiment (iktar ’il quddiem it-“it-tieni data ta’ riferiment”) li tiġi wara s‑17 ta’ April 2023 u, min-naħa l-oħra, is-SĠK indika li, skont l-interpretazzjoni tiegħu tal-Ftehim, din it-tieni data ta’ riferiment kellha tiġi ffissata għat‑28 ta’ Frar 2023, minħabba li din id-data kienet tikkorrispondi għal tmiem it-terminu ta’ tliet xhur li skatta permezz tan-nota tal‑24 ta’ Novembru 2022.

20

Matul Marzu 2023, fil-kuntest tat-tieni proċedura ta’ verifika, il-marixxall eżamina l-informazzjoni mogħtija mir-rikorrenti.

21

Fit‑28 ta’ Marzu 2023, il-marixxall bagħat lir-rikorrenti t-tieni rapport, bid-data tas‑27 ta’ Marzu 2023, li minnu kien jirriżulta li, fid-dawl tal-listi uffiċjali tal-uffiċjali u membri oħra tal-persunal u tal-ex uffiċjali u membri oħra tal-persunal magħmula, rispettivament, fit‑28 ta’ Frar u fl‑1 ta’ Marzu 2023, ir-rikorrenti kienet tissodisfa l-kundizzjonijiet għar-rikonoxximent previsti mill-Ftehim, inkluż il-kriterju previst fl-Artikolu 2(2)(f) tal-Ftehim, imma li hija ma kinitx tilħaq il-livell ta’ rappreżentattività previst fl-Artikolu 4(1) tal-imsemmi Ftehim (iktar ’il quddiem it-“tieni rapport”).

22

Permezz tad-deċiżjoni kkontestata, is-SĠK informa lir-rikorrenti bis-sospensjoni tad-drittijiet li hija kellha taħt l-Artikolu 14 tal-Ftehim fil-kwalità ta’ OSP rappreżentattiva. Barra minn hekk, huwa informaha biż-żamma tal-benefiċċju tagħha tar-riżorsi previsti fl-Artikolu 13 tal-Ftehim fil-kwalità ta’ OSP rrikonoxxuta.

II.

It‑talbiet tal‑partijiet

23

Ir-rikorrenti titlob li l-Qorti Ġenerali jogħġobha:

–

tannulla d-deċiżjoni kkontestata;

–

tikkundanna lill-Kunsill għall-ħlas tal-ammont simboliku ta’ EUR 1 bħala kumpens għad-dannu morali subit;

–

tikkundanna lill-Kunsill għall-ispejjeż.

24

Il-Kunsill jitlob li l-Qorti Ġenerali jogħġobha:

–

tiċħad ir-rikors;

–

tikkundanna lir-rikorrenti għall-ispejjeż.

III.

Fid‑dritt

A.

Fuq it‑talbiet intiżi għall-annullament

25

Insostenn tat-talbiet intiżi għall-annullament, ir-rikorrenti tinvoka, essenzjalment, tliet motivi, ibbażati, l-ewwel, fuq ksur tal-Artikolu 5 tal-Ftehim u fuq irregolaritajiet matul l-ewwel proċedura ta’ verifika, it-tieni, fuq ksur tal-ispirtu ta’ kooperazzjoni leali li joħroġ mill-imsemmi Ftehim, tal-prinċipju ta’ amministrazzjoni tajba, tal-prinċipju ta’ proporzjonalità kif ukoll tal-prinċipju ta’ eżekuzzjoni f’bona fide tal-ftehimiet u, it-tielet, fuq ksur tad-dritt fundamentali għal-libertà sindakali.

26

Barra minn hekk, b’risposta għal miżura ta’ organizzazzjoni tal-proċedura, ir-rikorrenti ressqet, essenzjalment, ir-raba’ motiv, ibbażat fuq l-insuffiċjenza ta’ motivazzjoni tad-deċiżjoni kkontestata.

27

Peress li hija ġurisprudenza stabbilita li l-assenza jew l-insuffiċjenza ta’ motivazzjoni taqa’ taħt il-ksur tar-rekwiżiti formali essenzjali, fis-sens tal-Artikolu 263 TFUE, u tikkostitwixxi motiv ta’ ordni pubbliku li għandu, jekk ikun il-każ, jitqajjem ex officio mill-qorti tal-Unjoni (ara s-sentenza tat‑12 ta’ Lulju 2023, Eurecna vs Il-Kummissjoni, T‑377/21, EU:T:2023:398, punt 18 u l-ġurisprudenza ċċitata), il-Qorti Ġenerali jidhrilha xieraq, meħudin inkunsiderazzjoni ċ-ċirkustanzi partikolari tal-każ, li tiddeċiedi dwar ir-raba’ motiv qabel ma teżamina mbagħad it-tliet motivi l-oħra invokati mir-rikorrenti.

1.

Fuq ir‑raba’ motiv, ibbażat fuq l‑insuffiċjenza ta’ motivazzjoni tad‑deċiżjoni kkontestata

28

Ir-rikorrenti ssostni, essenzjalment, li, peress li l-validità tad-deċiżjoni kkontestata hija suġġetta għan-nuqqas ta’ osservanza tal-livell ta’ rappreżentattività, it-tieni rapport kellu jsemmi b’mod ċar in-numru preċiż ta’ membri li l-marixxall kien ikkonstata sabiex wasal għal konklużjoni li hija ma kinitx laħqet dan il-livell. B’hekk, hija ma kinitx f’pożizzjoni li tkun taf la r-raġunijiet li għalihom hija ma kinitx laħqet dan il-livell u lanqas, barra minn hekk, il-ġustifikazzjoni essenzjali tad-deċiżjoni kkontestata, b’mod li hija tkun tista’ tiddefendi d-drittijiet tagħha, bi ksur tal-obbligu ta’ motivazzjoni li huma suġġetti għalih l-atti tal-istituzzjonijiet tal-Unjoni.

29

Il-Kunsill jikkontesta l-allegazzjonijiet tar-rikorrenti.

30

F’dan ir-rigward, skont ġurisprudenza stabbilita, il-motivazzjoni tal-atti tal-istituzzjonijiet tal-Unjoni mitluba mill-Artikolu 296 TFUE u mill-Artikolu 41(2)(ċ) tal-Karta tad-Drittijiet Fundamentali tal-Unjoni Ewropea (iktar ’il quddiem il-“Karta”) għandha tkun aġġustata għan-natura tal-att inkwistjoni u għandha turi b’mod ċar u mhux ekwivoku r-raġunament tal-istituzzjoni, awtriċi tal-att, b’mod li tippermetti lill-persuni kkonċernati li jkunu jafu bil-ġustifikazzjonijiet għall-miżura meħuda u lill-qorti kompetenti li tagħmel l-istħarriġ tagħha. Ir-rekwiżit ta’ motivazzjoni għandu jkun evalwat skont iċ-ċirkustanzi kollha tal-kawża, b’mod partikolari l-kontenut tal-att, in-natura tal-motivi invokati u l-interess li d-destinatarji tal-att jew ta’ persuni oħra kkonċernati direttament u individwalment minnu jista’ jkollhom sabiex jirċievu spjegazzjoni. Ma huwiex meħtieġ li l-motivazzjoni tispeċifika l-punti ta’ fatt u ta’ liġi kollha rilevanti, inkwantu l-punt dwar jekk il-motivazzjoni ta’ att tissodisfax ir-rekwiżiti tad-dispożizzjonijiet iċċitati iktar ’il fuq għandu jiġi evalwat fid-dawl mhux biss tal-formulazzjoni tagħha, imma wkoll fil-kuntest tagħha kif ukoll tar-regoli ġuridiċi kollha li jirregolaw il-materja kkonċernata (ara, f’dan is-sens, is-sentenza tal‑31 ta’ Mejju 2018, Groningen Seaports et vs Il-Kummissjoni, T‑160/16, mhux ippubblikata, EU:T:2018:317, punt 78).

31

Barra minn hekk, l-assenza ta’ motivazzjoni tista’ tiġi kkonstatata anki meta d-deċiżjoni inkwistjoni tinkludi ċerti elementi ta’ motivazzjoni. Għalhekk, motivazzjoni kontradittorja jew li ma tinftiehemx hija ekwivalenti għal assenza ta’ motivazzjoni. L-istess japplika meta l-elementi ta’ motivazzjoni li jinsabu fid-deċiżjoni inkwistjoni jkunu tant lakuni li bl-ebda mod ma jippermettu lid-destinatarju tagħha, fil-kuntest tal-adozzjoni tagħha, li jifhem ir-raġunament tal-awtur tagħha (ara, f’dan is-sens, is-sentenza tal‑11 ta’ Ġunju 2020, Il-Kummissjoni vs Di Bernardo, C‑114/19 P, EU:C:2020:457, punt 55 u l-ġurisprudenza ċċitata).

32

F’dan il-każ, l-ewwel nett, ġie ppreċiżat, fid-deċiżjoni kkontestata, li l-marixxall maħtur sabiex imexxi t-tieni proċedura ta’ verifika kien ippreżenta r-relazzjoni tiegħu fit‑28 ta’ Marzu 2023 u li, skont dan ir-relazzjoni, ir-rikorrenti kienet tissodisfa l-kundizzjonijiet sabiex tkun ikkunsidrata bħala OSP rrikonoxxuta, imma mhux bħala OSP rappreżentattiva.

33

It-tieni, mill-indikazzjonijiet li jinsabu fit-tieni rapport, li għalih tirreferi espressament id-deċiżjoni kkontestata jirriżulta li, fid-dawl, b’mod partikolari, ta’ lista uffiċjali tal-uffiċjali u membri oħra tal-persunal tas-SĠK magħmula fit‑28 ta’ Frar 2023 u ta’ lista uffiċjali oħra tal-ex uffiċjali u membri oħra tal-persunal tas-SĠK magħmula fl‑1 ta’ Marzu 2023, minn naħa, ir-rikorrenti laħqet il-livell għar-rikonoxximent li huwa ta’ mill-inqas 60 membru previst fl-Artikolu 2(2)(f) tal-Ftehim u, min-naħa l-oħra, hija ma laħqitx il-livell ta’ rappreżentattività ta’ mill-inqas 300 membru li kellhom l-istatus ta’ votant u eliġibbli għall-elezzjonijiet tal-Kumitat tal-Persunal, li ma għandhomx kontribuzzjonijiet mhux imħallsin, previst fl-Artikolu 4(1) tal-Ftehim, mingħajr ma d-diskrepanza kkonstatata kienet inqas minn 20 membru.

34

B’hekk, jeħtieġ li jiġi kkonstatat li d-deċiżjoni kkontestata, meħuda skont il-Ftehim li r-rikorrenti kienet waħda mill-firmatarji, ittieħdet wara li l-marixxall bagħtilha, fit‑28 ta’ Marzu 2023, it-tieni rapport, f’kuntest li hija kienet taf bih.

35

Barra minn hekk, id-deċiżjoni kkontestata, bil-fatt li tagħmel riferiment, b’mod partikolari, għall-Ftehim u għat-tieni rapport, esponiet l-elementi kemm ġuridiċi kif ukoll fattwali li kellhom importanza essenzjali fl-istruttura ta’ din id-deċiżjoni u li kienu jqiegħdu kemm lir-rikorrenti kif ukoll lill-Qorti Ġenerali f’pożizzjoni li jevalwaw il-legalità tagħha.

36

Huwa minnu li la d-deċiżjoni kkontestata u lanqas it-tieni rapport, konformement mat-tieni subparagrafu tal-Artikolu 5(1) tal-Ftehim, ma jsemmu n-numru eżatt ta’ membri li l-marixxall kkonstata sabiex wasal għall-konstatazzjoni li r-rikorrenti ma laħqitx il-livell ta’ rappreżentattività.

37

Madankollu, minn qari konġunt tad-deċiżjoni kkontestata u tat-tieni rapport jirriżulta li n-numru ta’ membri tar-rikorrenti li ngħaddu mill-marixxall kien, minn naħa, daqs jew ogħla mil-livell għar-rikonoxximent u, min-naħa l-oħra, inqas mill-livell ta’ rappreżentattività, mingħajr ma d-diskrepanza kkonstatata kienet inqas minn għoxrin membru, jiġifieri numru ta’ membri bejn 60 u 280.

38

B’hekk, il-motivazzjoni tad-deċiżjoni kkontestata la hija kontradittorja u lanqas ma tinftiehemx u turi r-raġunament tal-awtur tagħha b’mod ċar u mhux ekwivoku.

39

Konsegwentement, ir-raba’ motiv, ibbażat fuq insuffiċjenza ta’ motivazzjoni, għandu jiġi miċħud bħala infondat.

2.

Fuq l‑ewwel motiv, ibbażat fuq ksur tal‑Artikolu 5 tal‑Ftehim u fuq l‑irregolaritajiet waqt l‑ewwel proċedura ta’ verifika

40

L-ewwel motiv jikkonsisti, essenzjalment, f’żewġ partijiet, ibbażati, l-ewwel parti, fuq ksur tal-Artikolu 5 tal-Ftehim waqt l-ewwel proċedura ta’ verifika u, it-tieni, fuq irregolaritajiet li jaffettwaw l-ewwel rapport.

41

Il-Kunsill jikkontesta l-allegazzjonijiet tar-rikorrenti.

42

B’mod preliminari, jeħtieġ li jiġi kkonstatat li, bl-argument imressaq insostenn ta’ dan il-motiv, ir-rikorrenti tikkritika inċidentalment ir-regolarità tal-ewwel proċedura ta’ verifika li wasslet lill-Kunsill sabiex jadotta n-nota tal‑24 ta’ Novembru 2022 kif ukoll il-fondatezza ta’ din in-nota.

43

F’dan ir-rigward, jeħtieġ li jitfakkar li, skont ġurisprudenza stabbilita, għalkemm miżuri ta’ natura purament preparatorja ma jistgħux, bħala tali, ikunu s-suġġett ta’ rikors għal annullament, l-eventwali illegalitajiet li jivvizzjawhom jistgħu jiġu invokati insostenn tar-rikors ippreżentat kontra l-att definittiv li minnu huma jikkostitwixxu stadju fit-tħejjija tiegħu (ara s-sentenza tat‑22 ta’ April 2021, thyssenkrupp Electrical Steel u thyssenkrupp Electrical Steel Ugo vs Il-Kummissjoni, C‑572/18 P, EU:C:2021:317, punt 50 u l-ġurisprudenza ċċitata).

44

F’dan il-każ, jeħtieġ li jiġi kkonstatat li n-nota tal‑24 ta’ Novembru 2022 tirriżulta mill-applikazzjoni tat-tieni subparagrafu tal-Artikolu 6(1) tal-Ftehim, li jgħid li kull OSP li kienet rappreżentattiva u li ma kinitx għadha tilħaq il-livell ta’ rappreżentattività għandha tiġi mitluba mis-Segretarju Ġenerali tal-Kunsill sabiex tikkonforma ruħha mal-kriterju previst fl-Artikolu 4(1) tal-imsemmi Ftehim f’terminu massimu ta’ tliet xhur, u fin-nuqqas ta’ dan, id-drittijiet tagħha bħala OSP rappreżentattiva jiġu sospiżi.

45

B’hekk, in-nota tal‑24 ta’ Novembru 2022, li ma esprimietx il-pożizzjoni definittiva tal-Kunsill fuq il-punt dwar jekk ir-rikorrenti kellhiex titqies bħala li hija dejjem rappreżentattiva skont il-Ftehim, kienet tikkorrispondi, konformement mal-Artikolu 6 tal-Ftehim, għal fażi preliminari tal-proċedura li wasslet għall-adozzjoni tad-deċiżjoni kkontestata li, min-naħa tagħha, tesprimi din il-pożizzjoni definittiva.

46

Konsegwentement, peress li n-nota tal‑24 ta’ Novembru 2022 għandha n-natura ta’ miżura purament preparatorja, ir-rikorrenti hija ammessa, skont il-ġurisprudenza ċċitata fil-punt 43 iktar ’il fuq, tikkritika, b’mod inċidentali, l-ewwel proċedura ta’ verifika li wasslet għall-adozzjoni tal-imsemmija nota kif ukoll il-fondatezza tagħha.

a)

Dwar l‑ewwel parti, ibbażata fuq il‑ksur tal‑Artikolu 5 tal‑Ftehim waqt l‑ewwel proċedura ta’ verifika

47

Insostenn ta’ din il-parti, ir-rikorrenti tinvoka żewġ ilmenti, ibbażati, l-ewwel, fuq ksur tal-Artikolu 5(1) tal-Ftehim u, it-tieni, fuq ksur tal-Artikolu 5(3) tiegħu.

1)

Fuq l‑ewwel ilment, ibbażat fuq il‑ksur tal‑Artikolu 5(1) tal‑Ftehim

48

Ir-rikorrenti ssostni, minn naħa, li l-għażla tal-organu indipendenti ġiet imposta fuq l-OSP mill-Kunsill sabiex tiġi implimentata l-ewwel proċedura ta’ verifika u, min-naħa l-oħra, li l-OSP ma approvatx il-kontenut tal-ewwel ittra ta’ missjoni.

49

F’dan ir-rigward, jeħtieġ li jitfakkar, l-ewwel nett, li l-ewwel subparagrafu tal-Artikolu 5(1) tal-Ftehim, dwar il-verifika ta’ ċerti kriterji għar-rikonoxximent u ta’ rappreżentattività tal-OSP, jipprevedi li n-numru ta’ membri tagħhom għandu jiġi kkomunikat permezz ta’ ġurament tal-presidenti rispettivi tagħhom lil organu indipendenti magħżul bi qbil komuni.

50

F’dan il-każ, min-nota msemmija fil-punt 11 iktar ’il fuq jirriżulta li, fid‑29 ta’ Marzu 2022, is-SĠK stieden lill-OSP kofirmatarji sabiex jaħtru organu indipendenti bi qbil komuni u pproponielhom għaldaqstant li jafdaw l-eżekuzzjoni tal-ewwel proċedura ta’ verifika lill-istess marixxall li quddiem kienet saret talba fl-2010 u fl‑2014.

51

Barra minn hekk, mill-minuti tal-laqgħa tat‑3 ta’ Mejju 2022 bejn il-Kunsill u l-OSP kofirmatarji, li jinsabu f’posta elettronika mibgħuta fl-istess jum minn konsulent legali tad-diviżjoni kompetenti tad-Direttorat Ġenerali “Żvilupp organizzazzjonali u servizzi” lil kap tad-diviżjoni tiegħu, jirriżulta li l-OSP kollha kofirmatarji esprimew il-qbil tagħhom fir-rigward tal-proposta tas-SĠK li jafdaw l-eżekuzzjoni tal-ewwel proċedura ta’ verifika f’idejn l-istess marixxall li lilu kienet saret it-talba għall-proċedura ta’ verifika preċedenti.

52

Fl-aħħar nett, mill-proċess ma jirriżultax li l-OSP kofirmatarji kienu bagħtu xi lmenti lis-SĠK dwar il-ħatra tal-marixxall tali li jqajmu dubji dwar in-natura probatorja tal-indikazzjonijiet li jinsabu fil-minuti tal-laqgħa tat‑3 ta’ Mejju 2022, imsemmija fil-punt 51 iktar ’il fuq.

53

B’hekk, jeħtieġ li tiġi miċħuda bħala infondata fil-fatt l-allegazzjoni tar-rikorrenti li tgħid li l-Kunsill għażel l-organu indipendenti responsabbli għall-ewwel proċedura ta’ verifika waħdu u mhux bi qbil komuni mal-OSP imsemmijin.

54

It-tieni, jeħtieġ li jiġi rrilevat li la l-Artikolu 5(1) tal-Ftehim u lanqas xi dispożizzjonijiet oħra ta’ dan il-Ftehim ma jipprevedu l-obbligu għall-Kunsill li jibgħat ittra ta’ missjoni lill-organu indipendenti responsabbli mill-implimentazzjoni ta’ proċedura ta’ verifika, b’mod li ebda dispożizzjoni ta’ dan il-Ftehim ma imponiet lill-Kunsill li jġib il-kunsens tal-OSP kofirmatarji fuq il-kontenut tal-ewwel ittra ta’ missjoni.

55

Konsegwentement, l-ewwel ilment ma huwiex fondat u għandu jiġi miċħud.

2)

Dwar it‑tieni lment, ibbażat fuq il‑ksur tal‑Artikolu 5(3) tal‑Ftehim

56

Ir-rikorrenti ssostni, essenzjalment, li d-deċiżjoni kkontestata ttieħdet b’mod tardiv fid-dawl tal-kalendarju triennali ta’ verifika tal-livelli għar-rikonoxximent u ta’ rappreżentattività.

57

F’dan ir-rigward, mill-Artikolu 5(3) tal-Ftehim, dwar il-verifika ta’ ċerti kriterji ta’ rikonoxximent u ta’ rappreżentattività tal-OSP jirriżulta li, mingħajr preġudizzju għall-proċeduri straordinarji ta’ verifika tal-kriterji ta’ rikonoxximent li jistgħu jiġu implimentati fuq talba ta’ kull OSP rrikonoxxuta, il-proċeduri ta’ verifika dwar l-OSP kofirmatarji kellhom jitwettqu kull tliet snin. Barra minn hekk, l-Artikolu 16(5) tal-imsemmi Ftehim, dwar id-dispożizzjonijiet tranżitorji u finali, kien jipprovdi li l-ewwel verifika tal-kriterji għar-rikonoxximent u r-rappreżentattività prevista fl-Artikolu 5 tal-istess Ftehim kellu jseħħ matul is-sitt xhur wara li ġie ffirmat, jiġifieri mhux iktar tard mit‑28 ta’ Settembru 2006.

58

F’dan il-każ, mill-proċess jirriżulta li mhux biss il-proċeduri ta’ verifika implimentati b’effett mill-iffirmar tal-Ftehim kienu ġew ikkompletati fil‑15 ta’ Mejju 2007, fl‑24 ta’ Ġunju 2010 u fl‑14 ta’ Jannar 2014, b’mod li dawn kienu tardivi fid-dawl tal-kalendarju triennali li jirriżulta mid-dispożizzjonijiet imsemmija fil-punt 57 iktar ’il fuq, imma wkoll li ebda proċedura ta’ verifika ma kienet twettqet bejn dik tal‑14 ta’ Jannar 2014 u l-ewwel proċedura ta’ verifika.

59

Barra minn hekk, mill-ispjegazzjonijiet mogħtija mill-Kunsill jirriżulta li l-ewwel proċedura ta’ verifika kienet ġiet ittardjata bin-negozjati għar-reviżjoni tal-Ftehim immexxija fl‑2017 u fl‑2018, li kienu intiżi, b’mod partikolari, sabiex jissimplifikaw il-modalitajiet sabiex titkejjel ir-rappreżentattività tal-OSP kofirmatarji, u mbagħad bil-pandemija tal-COVID‑19.

60

Għalkemm ir-rikorrenti ma tikkontestax il-kontenut ta’ dawn l-ispjegazzjonijiet, hija ssostni madankollu li dawn ma jiġġustifikawx li ebda verifika ma saret bejn tmiem in-negozjati għar-reviżjoni tal-Ftehim u l-bidu tal-pandemija tal-COVID‑19.

61

Madankollu, għalkemm huwa minnu li l-Ftehim ma jipprevedi ebda deroga mill-kalendarju triennali li jirriżulta mill-Artikolu 5(3) u mill-Artikolu 16(5) tiegħu, jeħtieġ li jiġi osservat, l-ewwel nett, li l-għan ta’ dan il-kalendarju huwa li jiggarantixxi l-verifika, b’intervalli regolari, tal-kundizzjonijiet għar-rikonoxximent u għar-rappreżentattività tal-OSP mill-Kunsill, kif dawn huma previsti mill-Ftehim, sabiex jiżgura l-eżistenza ta’ relazzjonijiet strutturati bejn l-imsemmija OSP u din l-istituzzjoni, mingħajr ma l-iskadenza tat-terminu li jirriżulta minn dan il-kalendarju jġib awtomatikament miegħu t-telf tad-drittijiet li minnhom jibbenefikaw l-OSP rrikonoxxuti u rappreżentattivi.

62

Barra minn hekk, għandu jiġi kkonstatat li l-firmatarji tal-Ftehim ma pprevedewx dispożizzjoni tali li tipprevjeni u tissanzjona n-nuqqas ta’ osservanza tal-kalendarju triennali li jirriżulta mill-Artikolu 5(3) u mill-Artikolu 16(5) tal-Ftehim. B’hekk, bil-fatt li għall-implimentazzjoni tal-proċeduri ta’ verifika adotta l-imsemmi kalendarju, il-Kunsill, bil-qbil tal-OSP kofirmatarji, ma riedx jippreskrivi dan il-kalendarju taħt piena ta’ nullità tal-imsemmija proċeduri u lanqas jagħti natura imperattiva lill-imsemmija dispożizzjonijiet, imma ried jistabbilixxi għan sabiex issir verifika, b’intervalli regolari, tal-kundizzjonijiet għar-rikonoxximent u għar-rappreżentattività tal-OSP mill-Kunsill.

63

Għaldaqstant, in-nuqqas ta’ osservanza tal-kalendarju previst mill-Ftehim ma jistax jitqies bħala l-ksur ta’ formalità essenzjali, imma għandha titqies bħala irregolarità proċedurali.

64

Issa, jeħtieġ li jitfakkar li, skont ġurisprudenza stabbilita, difett proċedurali ma jwassalx għall-annullament tad-deċiżjoni meħuda fi tmiem il-proċedura amministrattiva inkwistjoni ħlief jekk, fl-assenza ta’ din l-irregolarità, din il-proċedura setgħet twassal għal riżultat differenti. F’dan il-kuntest, ma jistax jiġi impost fuq il-parti rikorrenti, li tinvoka difett proċedurali, li turi li d-deċiżjoni tal-istituzzjoni tal-Unjoni kkonċernata kienet tkun differenti, imma biss li tali ipoteżi ma hijiex kompletament eskluża, fejn l-evalwazzjoni ta’ dan il-punt għandha ssir, barra minn hekk, skont iċ-ċirkustanzi ta’ fatt u ta’ dritt speċifiċi għal kull każ (ara s-sentenza tas‑6 ta’ Ottubru 2021, AV u AW vs Il-Parlament, T‑43/20, mhux ippubblikata, EU:T:2021:666, punt 94 u l-ġurisprudenza ċċitata).

65

Għandu jiġi kkonstatat li, f’dan il-każ, ir-rikorrenti ma pprovdiet ebda prova prima facie li hija kellha numru suffiċjenti ta’ membri sabiex tkun irrikonoxxuta bħala rappreżentattiva fid-dati li fihom kellha titkejjel ir-rappreżentattività kieku l-kalendarju triennali previst mill-Ftehim kien ġie osservat. Konsegwentement, ir-rikorrenti ma stabbilixxietx li ma kienx kompletament eskluż li, fl-assenza tal-irregolarità invokata, id-deċiżjoni kkontestata setgħet tkun differenti.

66

Barra min hekk, kif isostni l-Kunsill, l-assenza ta’ proċedura ta’ verifika ma wasslitx għal konsegwenzi negattivi fuq is-sitwazzjoni tar-rikorrenti, li setgħet tibbenefika b’mod mhux interrott mill-mezzi pprovduti mill-OSP rappreżentattivi matul id-disa’ snin li skorrew bejn il-proċedura ta’ verifika tal‑14 ta’ Jannar 2014 u dawk li wasslu għal din it-tilwima.

67

Konsegwentement, l-imsemmi lment għandu jiġi miċħud.

b)

Dwar it‑tieni parti, ibbażata fuq irregolaritajiet li jaffettwaw l‑ewwel rapport

68

Insostenn ta’ din il-parti, ir-rikorrenti tinvoka, essenzjalment, erba’ lmenti bbażati, l-ewwel, fuq riferiment żbaljat fl-ewwel rapport, it-tieni, fuq in-nuqqas ta’ osservanza mill-marixxall tal-kalendarju previst mill-ewwel ittra ta’ missjoni, it-tielet, fuq żball li jikkonċerna l-ewwel data ta’ riferiment u r-raba’, fuq in-natura żbaljata tal-ewwel rapport.

1)

Dwar l‑ewwel ilment, ibbażat fuq riferiment żbaljat fl‑ewwel rapport

69

Ir-rikorrenti ssostni li l-ewwel rapport huwa vvizzjat bi żball ta’ fatt peress li jindika li l-ewwel ittra ta’ missjoni saret bi qbil komuni bejn il-Kunsill u l-OSP kofirmatarji.

70

F’dan ir-rigward, jeħtieġ li jitfakkar li ebda dispożizzjoni tat-trattati ma timponi fuq il-qorti tal-Unjoni li teżamina, fi kwalunkwe każ, il-fondatezza tal-motivi jew tal-argumenti mressqa insostenn tat-talbiet li jsirulha. Min-naħa l-oħra, il-qorti tal-Unjoni tista’, b’mod partikolari, għar-raġunijiet marbutin ma’ amministrazzjoni effikaċi tal-ġustizzja, tastjeni milli teżamina l-fondatezza tal-motivi jew tal-argumenti li għandhom ikunu skartati bħala inammissibbli jew ineffettivi (ara, f’dan is-sens u b’analoġija, is-sentenza tad‑29 ta’ Settembru 2022, HIM vs Il-Kummissjoni, C‑500/21 P, mhux ippubblikata, EU:C:2022:741, punti 72 u 73).

71

F’dan il-każ, għalkemm huwa minnu li l-ewwel rapport jsemmi, fil-kummenti preliminari, “l-ittra ta’ missjoni tal-Kunsill, bi qbil mal-[OSP], għat-twettiq tal-verifika tan-numru ta’ membri fi ħdan l-‘organizzazzjonijiet’ fis-sens tal-imsemmi ftehim” [traduzzjoni mhux uffiċjali], mill-punt 54 iktar ’il fuq, jirriżulta li ebda dispożizzjoni mill-Ftehim ma pprevediet l-obbligu għall-Kunsill li jġib il-kunsens tal-OSP fuq l-ewwel ittra ta’ missjoni mibgħuta lill-marixxall.

72

Konsegwentement, ir-riferiment iċċitat fil-punt 71 iktar ’il fuq, li jinsab fl-ewwel rapport, anki jekk titqies żbaljata, ma taffettwa la l-kontenut jew il-validità ta’ dan ir-rapport u lanqas, konsegwentement, il-legalità tan-nota tal‑24 ta’ Novembru 2022 u d-deċiżjoni kkontestata. F’dan ir-rigward, jeħtieġ li jiżdied li r-rikorrenti ma tressaq ebda element li juri li din ir-referenza affettwat l-ewwel proċedura ta’ verifika jew l-ewwel rapport.

73

Għaldaqstant, jeħtieġ li jiġi miċħud dan l-ilment bħala ineffettiv.

2)

Dwar it‑tieni lment, ibbażat fuq in‑nuqqas ta’ osservanza mill-marixxall tal‑kalendarju previst fl‑ewwel ittra ta’ missjoni

74

Ir-rikorrenti ssostni li l-ewwel proċedura ta’ verifika twettqet matul Settembru 2022, filwaqt li din kellha ssir l-iktar tard sal‑31 ta’ Lulju 2022, skont il-mandat mogħti lill-marixxall mill-ewwel ittra ta’ missjoni.

75

F’dan ir-rigward, huwa minnu li, skont it-termini tal-ewwel ittra ta’ missjoni, il-marixxall kellu jwettaq l-ewwel proċedura ta’ verifika sa mhux iktar tard mid-data tal‑31 ta’ Lulju 2022 u li mill-ewwel rapport jirriżulta li din il-proċedura twettqet fl‑1, fis-6, fid-9 u fid-29 ta’ Settembru 2022, fejn l-ewwel rapport ġie stabbilit fl‑20 ta’ Ottubru 2022.

76

Issa, fl-ewwel lok, ma jirriżultax la mill-ewwel ittra ta’ missjoni u lanqas mid-dispożizzjonijiet tal-Ftehim li n-nuqqas ta’ osservanza tal-iskadenza tal‑31 ta’ Lulju 2022 kellu jkollu xi tip ta’ effett fuq ir-regolarità tal-ewwel proċedura ta’ verifika jew fuq il-validità tal-ewwel rapport.

77

Fit-tieni lok, mill-ewwel rapport jirriżulta li l-marixxall, fil-kuntest tal-ewwel proċedura ta’ verifika, għadd in-numru ta’ membri ta’ kull OSP kofirmatarja billi ħa inkunsiderazzjoni l-ewwel data ta’ riferiment ffissata fil‑31 ta’ Mejju 2022, skont l-ewwel ittra ta’ missjoni.

78

Konsegwentement, peress li l-marixxall ma kienx awtorizzat jieħu inkunsiderazzjoni, waqt il-kalkolu tan-numru ta’ soċji tal-OSP kofirmatarji, kwalunkwe tibdil ta’ dan in-numru wara l-ewwel data ta’ riferiment tal‑31 ta’ Mejju 2022 u li huwa kellu jwaqqaf il-konstatazzjonijiet tiegħu ma’ din id-data, mill-proċess ma jirriżultax li n-nuqqas ta’ osservanza tad-data tal‑31 ta’ Lulju 2022 prevista għall-formulazzjoni finali tal-rapport tiegħu affettwat b’xi mod ir-regolarità tal-ewwel proċedura ta’ verifika jew il-validità tal-ewwel rapport u lanqas, konsegwentement, il-legalità tan-nota tal‑24 ta’ Novembru 2022 u tad-deċiżjoni kkontestata.

79

Għaldaqstant, jeħtieġ li dan l-ilment jiġi miċħud bħala ineffettiv.

3)

Dwar it‑tielet ilment, ibbażat fuq żball li jikkonċerna l‑ewwel data ta’ riferiment

80

Ir-rikorrenti ssostni li, skont l-ewwel ittra ta’ missjoni, il-marixxall kellu jwettaq l-ewwel proċedura ta’ verifika billi jieħu l‑31 ta’ Awwissu 2022 bħala l-ewwel data ta’ riferiment, peress li din kienet l-aħħar ġurnata tax-xahar ta’ qabel it-twettiq tal-ewwel proċedura ta’ verifika, u mhux il‑31 ta’ Mejju 2022.

81

F’dan ir-rigward, fl-ewwel lok, jeħtieġ li jitfakkar, minn naħa, li d-determinazzjoni tad-dati ta’ riferiment għat-twettiq ta’ verifika tal-kundizzjonijiet għar-rikonoxximent u r-rappreżentattività tal-OSP ma hijiex irregolata mill-Ftehim u, min-naħa l-oħra, li l-ewwel ittra ta’ missjoni kienet tobbliga lill-marixxall li sabiex iwettaq l-ewwel proċedura ta’ verifika jagħmel kuntatt mad-Direttorat Ġenerali “Żvilupp Organizzazzjonali u Servizzi” sabiex ikollu lista uffiċjali tal-uffiċjali u membri oħra tal-persunal kif ukoll lista uffiċjali tal-ex uffiċjali u membri oħra tal-persunal fil‑31 ta’ Mejju 2022.

82

Fit-tieni lok, il-Qorti Ġenerali ma setgħetx tadotta l-interpretazzjoni mogħtija mir-rikorrenti li tgħid li l-ewwel data ta’ riferiment li għandha tittieħed inkunsiderazzjoni sabiex jingħaddu n-numru ta’ membri tal-OSP kofirmatarji kellu jikkorrispondi mal-aħħar jum tax-xahar ta’ qabel l-eżerċizzji konkreti ta’ verifika tal-marixxall, peress li tali interpretazzjoni kellha twassal lill-Kunsill li jikser il-prinċipju taċ-ċertezza legali u, jekk ikun il-każ, il-prinċipju ta’ ugwaljanza fit-trattament.

83

Fil-fatt, jeħtieġ li jitfakkar li r-rekwiżit fundamentali taċ-ċertezza legali, fil-manifestazzjonijiet differenti tiegħu, huwa intiż li jiggarantixxi l-prevedibbiltà tas-sitwazzjonijiet u tar-relazzjonijiet ġuridiċi li jaqgħu taħt id-dritt tal-Unjoni (ara s-sentenza tad‑9 ta’ Marzu 2023, Galeote u Watson vs Il-Parlament, C‑715/21 P u C‑716/21 P, mhux ippubblikata, EU:C:2023:190, punt 113 u l-ġurisprudenza ċċitata). B’mod partikolari, mill-prinċipju ta’ ċertezza legali jirriżulta li l-leġiżlazzjoni tal-Unjoni għandha tkun ċerta u l-applikazzjoni tagħha għandha tkun prevedibbli għall-individwi (ara, f’dan is-sens, is-sentenza tad‑9 ta’ Lulju 2015, Cabinet Medical Veterinar Dr. Tomoiagă Andrei, C‑144/14, EU:C:2015:452, punt 34 u l-ġurisprudenza ċċitata).

84

Barra minn hekk, il-prinċipju ta’ ugwaljanza fit-trattament, stabbilit fl-Artikolu 20 tal-Karta, jikkostitwixxi prinċipju ġenerali tad-dritt tal-Unjoni li jeżiġi li sitwazzjonijiet komparabbli ma jiġux ittrattati b’mod differenti u li sitwazzjonijiet differenti ma jiġux ittrattati b’mod ugwali, sakemm differenza fit-trattament ma tkunx oġġettivament iġġustifikata (ara s-sentenza tal‑14 ta’ Lulju 2022, Il-Kummissjoni vs VW et, C‑116/21 P sa C‑118/21 P, C‑138/21 P u C‑139/21 P, EU:C:2022:557, punt 95 u l-ġurisprudenza ċċitata).

85

B’hekk, għalkemm l-interpretazzjoni li ngħatat fil-punt 82 iktar ’il fuq kienet ġiet aċċettata mill-Kunsill, din setgħet twassal lill-marixxall sabiex jikkunsidra d-dati ta’ riferiment differenti skont kull OSP kofirmatarja, fil-każ fejn, għal raġunijiet prattiċi marbutin mad-disponibbiltà tad-diriġenti tagħhom jew tar-rappreżentanti tagħhom, il-marixxall ma kienx ikun f’pożizzjoni li jwettaq, matul l-istess xahar, l-eżerċizzji ta’ verifika li huwa kien obbligat jagħmel.

86

F’dawn iċ-ċirkustanzi, l-implimentazzjoni tal-interpretazzjoni msemmija fil-punt 82 iktar ’il fuq kienet twassal lill-Kunsill sabiex jikser il-prinċipji ta’ ugwaljanza fit-trattament u taċ-ċertezza legali li kienu jobbligawh jiffissa l-ewwel data ta’ riferiment li tkun mhux biss l-istess għall-OSP kofirmatarji kollha, imma wkoll ċara u prevedibbli.

87

Konsegwentement, jeħtieġ li dan l-ilment jiġi miċħud bħala infondat.

4)

Dwar ir‑raba’ lment, ibbażat fuq in‑natura żbaljata tal‑ewwel rapport

88

Ir-rikorrenti ssostni li l-ewwel rapport huwa żbaljat inkwantu jikkonstata li hija ma laħqitx il-livell għar-rikonoxximent, filwaqt li hija kienet uriet, fl-ewwel data ta’ riferiment, tal-inqas 221 membru.

89

F’dan ir-rigward, huwa minnu li, permezz tan-nota tal‑24 ta’ Novembru 2022, il-Kunsill għamel tiegħu l-konstatazzjoni tal-uffiċjal ġudizzjarju li tinsab fl-ewwel rapport, li tgħid li mill-ewwel proċedura ta’ verifika jirriżulta li r-rikorrenti ma kinitx laħqet il-livell għar-rikonoxximent.

90

Madankollu, jeħtieġ li jiġi rrilevat li, permezz tad-deċiżjoni kkontestata, il-Kunsill irreveda l-konstatazzjoni msemmija fil-punt 89 iktar ’il fuq u li, għall-kuntrarju, indika lir-rikorrenti li hija kellha żżomm id-drittijiet li hija tislet mill-Ftehim fil-kwalità ta’ OSP rrikonoxxuta.

91

Barra minn hekk, ir-rikorrenti ma tikkontestax li hija ma ġietx imċaħħda mid-drittijiet tagħha ta’ OSP rrikonoxxuta bejn id-dati tal-adozzjoni tan-nota tal‑24 ta’ Novembru 2022 u tad-deċiżjoni kkontestata.

92

Konsegwentement, l-eventwali żball li bih jista’ jkun ivvizzjat l-ewwel rapport ma jkollu ebda effett fuq il-legalità tad-deċiżjoni kkontestata, b’mod li dan l-ilment għandu jiġi miċħud bħala ineffettiv.

93

Konsegwentement, jeħtieġ li t-tieni parti ta’ dan il-motiv kif ukoll l-ewwel motiv fl-intier tiegħu jiġu miċħuda.

3.

Dwar it‑tieni motiv, ibbażat fuq ksur tal‑ispirtu ta’ kooperazzjoni leali li joħroġ mill‑Ftehim, tal‑prinċipju ta’ amministrazzjoni tajba, tal‑prinċipju ta’ proporzjonalità u tal‑prinċipju ta’ eżekuzzjoni f’bona fide tal‑ftehimiet

94

Insostenn tat-tieni motiv, ir-rikorrenti tinvoka, essenzjalment, tliet partijiet, ibbażati, l-ewwel, fuq il-ksur tal-prinċipju ta’ eżekuzzjoni f’bona fide tal-ftehimiet, it-tieni, fuq il-ksur tal-prinċipju ta’ amministrazzjoni tajba u, b’mod iktar partikolari, tal-obbligi ta’ diliġenza u imparzjalità u, it-tielet, fuq il-ksur tal-“ispirtu ta’ kooperazzjoni leali”, moqri fid-dawl tal-prinċipju ta’ proporzjonalità.

95

Il-Kunsill jikkontesta l-allegazzjonijiet tar-rikorrenti.

a)

Dwar l-ewwel parti, ibbażata fuq il-ksur tal-prinċipju ta’ eżekuzzjoni f’bona fide tal-ftehimiet

96

Ir-rikorrenti ssostni li, bħala dokument innegozjat fuq bażi konvenzjonali, il-Ftehim għandu jiġi eżegwit f’bona fide, skont il-prinċipju ta’ eżekuzzjoni f’bona fide tal-konvenzjonijiet jew tas-“sinċerità kuntrattwali”, li jikkorrispondi għal prinċipju ġenerali tad-dritt tal-Unjoni ispirat mit-tradizzjonijiet ġuridiċi komuni tal-Istati Membri.

97

B’mod partikolari, ir-rikorrenti tikkritika lill-Kunsill li adotta approċċ unilaterali li kien iktar fil-forma ta’ att ta’ awtorità milli att innegozjat, minn naħa, billi ma laqax it-talba tagħha li jipposponi l-ewwel data ta’ riferiment għall‑31 ta’ Lulju 2022 u, min-naħa l-oħra, billi skatta l-ewwel proċedura ta’ verifika mingħajr ma ħa inkunsiderazzjoni ċerti punti ta’ diskussjoni jew ta attenzjoni fir-rigward tas-sitwazzjoni ta’ ċerti kategoriji ta’ uffiċjali li kienu tressqu mill-OSP kofirmatarji u li kienu għadhom pendenti.

98

F’dan ir-rigward, jeħtieġ li jitfakkar li, skont ġurisprudenza stabbilita, il-miżuri li jaffettwaw direttament l-interess kollettiv li OSP tiddefendi fil-kuntest tar-relazzjonijiet tagħha ma’ xi istituzzjoni jistgħu jkunu s-suġġett ta’ rikors għal annullament min-naħa ta’ din l-OSP fuq il-bażi tal-Artikolu 263 TFUE, inkluż meta dawn il-miżuri jittieħdu skont ftehim konkluż bejn l-istituzzjoni kkonċernata u xi OSP (ara d-digriet tad‑9 ta’ April 2014, Colart et vs Il-Parlament, F‑87/13, EU:F:2014:53, punt 40 u l-ġurisprudenza ċċitata; ara wkoll, f’dan is-sens, id-digriet tal‑31 ta’ Marzu 2003, Hecq vs Il-Kummissjoni, T‑227/02, EU:T:2003:89, punt 17 u l-ġurisprudenza ċċitata).

99

Għaldaqstant, jeħtieġ li jiġi kkonstatat li, b’mod konformi ma’ din il-ġurisprudenza, ir-rikorrenti ppreżentat ir-rikors tagħha fuq il-bażi tal-Artikolu 263 TFUE, mingħajr din il-bażi legali ma ġiet ikkontestata mill-Kunsill.

100

Minn dan isegwi li l-partijiet f’din it-tilwima impliċitament iżda neċessarjament ikkunsidraw li l-evalwazzjoni tal-legalità tad-deċiżjoni kkontestata ma kinitx taqa’ taħt il-kompetenza tal-qorti tal-kuntratt.

101

Barra minn hekk, jeħtieġ li jiġi rrilevat li l-Ftehim ma jissuġġettax għan-negozjati tal-Kunsill u tal-OSP kofirmatarji elementi bħalma huma l-iffissar tad-data ta’ riferiment u d-deċiżjoni sabiex tiskatta l-proċedura ta’ verifika.

102

Konsegwentement, ir-rikorrenti ma tistax validament tikkritika lill-Kunsill li kiser il-prinċipju ta’ eżekuzzjoni f’bona fide tal-ftehimiet minħabba li huwa ffissa l-ewwel data ta’ riferiment għall‑31 ta’ Mejju 2022 u li huwa skatta l-ewwel proċedura ta’ verifika mingħajr ma ħa inkunsiderazzjoni ċerti talbiet imressqa mill-OSP kofirmatarji.

103

Mill-kunsiderazzjonijiet preċedenti jirriżulta li l-argument ibbażat fuq il-ksur tal-prinċipju ta’ eżekuzzjoni f’bona fide tal-ftehimiet għandu jiġi miċħud bħala ineffettiv.

b)

Dwar it‑tieni parti, ibbażata fuq il‑ksur tal‑prinċipju ta’ amministrazzjoni tajba u, b’mod iktar partikolari, tal‑obbligi ta’ diliġenza u ta’ imparzjalità

104

Insostenn tal-argument tagħha dwar il-ksur tal-prinċipju ta’ amministrazzjoni tajba u, b’mod iktar partikolari, tal-obbligi ta’ diliġenza u ta’ imparzjalità, ir-rikorrenti tinvoka tliet ilmenti, ibbażati, l-ewwel, fuq irregolaritajiet li jaffettwaw l-iskattar tal-ewwel proċedura ta’ verifika, it-tieni, fuq l-assenza tat-teħid inkunsiderazzjoni mill-Kunsill tad-diffikultajiet iffaċċjati mir-rikorrenti sabiex taċċedi għall-informazzjoni korretta li tippermettilha tissodisfa r-rekwiżiti ta’ din il-proċedura u, it-tielet, fuq il-pubblikazzjoni mill-Kunsill, fit‑30 ta’ Novembru 2022, tar-riżultati tal-imsemmija proċedura.

1)

Dwar l‑ewwel ilment, ibbażat fuq irregolaritajiet li jaffettwaw l‑iskattar tal‑ewwel proċedura ta’ verifika

105

Insostenn ta’ dan l-ilment, ir-rikorrenti tressaq tliet argumenti, ibbażati, l-ewwel, fuq ksur tal-obbligu ta’ diliġenza inkwantu l-Kunsill skatta l-ewwel proċedura ta’ verifika mingħajr ma ħa inkunsiderazzjoni ċerti punti ta’ diskussjoni jew ta’ attenzjoni fir-rigward tas-sitwazzjoni ta’ ċerti kategoriji ta’ uffiċjali, it-tieni, fuq ksur tal-obbligu ta’ diliġenza inkwantu l-iskattar tal-ewwel proċedura ta’ verifika u l-iffissar tal-ewwel data ta’ riferiment ma ġewx deċiżi bi qbil mal-OSP kofirmatarji u, it-tielet, fuq ksur tal-obbligu ta’ imparzjalità.

i)

Dwar l‑ewwel argument, ibbażat fuq ksur tal‑obbligu ta’ diliġenza inkwantu l‑Kunsill skatta l‑ewwel proċedura ta’ verifika mingħajr ma ħa inkunsiderazzjoni ċerti punti ta’ diskussjoni jew ta attenzjoni fir‑rigward tas‑sitwazzjoni ta’ ċerti kategoriji ta’ uffiċjali

106

Ir-rikorrenti ssostni li l-Kunsill kiser l-obbligu ta’ diliġenza inkwantu huwa skatta l-ewwel proċedura ta’ verifika mingħajr ma ħa inkunsiderazzjoni ċerti punti ta’ diskussjoni jew ta attenzjoni fir-rigward tas-sitwazzjoni ta’ ċerti kategoriji ta’ uffiċjali li kienu tressqu mill-OSP kofirmatarji u li kienu għadhom pendenti, b’mod partikolari s-sitwazzjoni tal-uffiċjali kkollokati, b’diżabbiltà u li jirritornaw mil-leave għal raġunijiet personali jew mil-leave tal-familja.

107

F’dan ir-rigward, jeħtieġ li jitfakkar li d-dritt għal amministrazzjoni tajba, previst fl-Artikolu 41 tal-Karta, jinkludi, b’mod partikolari, l-obbligu ta’ imparzjalità u l-obbligu ta’ azzjoni f’terminu raġonevoli, protetti mill-paragrafu 1 ta’ dan l-artikolu, kif ukoll l-obbligu ta’ diliġenza, mislut mill-ġurisprudenza, li timponi fuq l-istituzzjonijiet li jaġixxu b’kura u bi prudenza billi jeżaminaw l-elementi rilevanti kollha tal-każ ineżami (ara s-sentenza tas‑16 ta’ Ġunju 2022, SGL Carbon et vs Il-Kummissjoni, C‑65/21 P u C‑73/21 P sa C‑75/21 P, EU:C:2022:470, punti 30 u 31 u l-ġurisprudenza ċċitata).

108

Barra minn hekk, mill-ġurisprudenza ċċitata fil-punt 64 iktar ’il fuq jirriżulta li difett proċedurali ma jwassalx għall-annullament tad-deċiżjoni meħuda fi tmiem il-proċedura amministrattiva inkwistjoni ħlief jekk, fl-assenza ta’ din l-irregolarità, din il-proċedura setgħet twassal għal riżultat differenti.

109

F’dan il-każ, jeħtieġ li jiġi rrilevat li d-deċiżjoni kkontestata ttieħdet wara żewġ proċeduri ta’ verifika suċċessivi u distinti, skont it-tieni subparagrafu tal-Artikolu 6(1) tal-Ftehim. B’mod partikolari, in-numru ta’ membri li ttieħed inkunsiderazzjoni mill-Kunsill sabiex jasal għall-konklużjoni definittiva li r-rikorrenti ma kinitx laħqet il-livell ta’ rappreżentattività jikkorrispondi għal dak ikkonstatat mill-marixxall fit-tieni data ta’ riferiment fil-kuntest tat-tieni proċedura ta’ verifika.

110

Issa, f’dan il-każ, l-ewwel argument, li huwa mmirat b’mod inċidentali kontra l-ewwel proċedura ta’ verifika, ma ġiex riprodott mir-rikorrenti kontra t-tieni proċedura ta’ verifika.

111

Għaldaqstant, minn naħa, ir-rikorrenti ma turix u lanqas tallega li l-Kunsill rrifjuta li l-marixxall jieħu inkunsiderazzjoni, waqt il-kalkolu tal-membri tagħha fit-tieni data ta’ riferiment tat‑28 ta’ Frar 2023, tal-uffiċjali kkollokati, b’diżabbiltà jew li jirritornaw mil-leave għal raġunijiet personali jew mil-leave familjari.

112

Min-naħa l-oħra, mill-proċess ma jirriżultax li l-eventwali rifjut tal-Kunsill milli jieħu inkunsiderazzjoni s-sitwazzjoni partikolari ta’ ċerti kategoriji ta’ uffiċjali fil-kuntest tal-ewwel proċedura ta’ verifika kellu xi influwenza fuq il-kalkolu mill-marixxall tan-numru ta’ membri tagħha fil-kuntest tat-tieni proċedura ta’ verifika.

113

Konsegwentement, jeħtieġ li dan l-ewwel argument jiġi miċħud bħala ineffettiv.

ii)

Dwar it‑tieni argument, ibbażat fuq ksur tal‑obbligu ta’ diliġenza inkwantu l‑iskattar tal‑ewwel proċedura ta’ verifika ma ġiex deċiż bi qbil mal‑OSP kofirmatarji

114

Ir-rikorrenti ssostni li, fid-data tal-iskattar tal-ewwel proċedura ta’ verifika, l-istatuti tagħha ma kinux jippermettulha li torganizza laqgħa ġenerali permezz ta’ vidjokonferenza, li l-ewwel laqgħa ġenerali ma setgħetx tinżamm qabel it-tneħħija tar-restrizzjonijiet sanitarji marbutin mal-pandemija tal-COVID‑19 li seħħet f’Mejju 2022 u li kull deċiżjoni ta’ din il-laqgħa ġenerali dwar l-ammont ta’ kontribuzzjonijiet seta’ jkollha effett biss tliet xhur wara, jiġifieri f’Lulju 2022, fid-dawl tal-frekwenza trimestrali tas-sejħiet għall-kontribuzzjonijiet.

115

B’hekk, ir-rikorrenti ssostni li, bil-fatt li rrifjuta li jieħu inkunsiderazzjoni dawn id-diffikultajiet u li jipposponi d-data ta’ riferiment għall‑31 ta’ Lulju 2022, il-Kunsill naqas milli jwettaq l-obbligu ta’ diliġenza tiegħu billi ma eżaminax bir-reqqa l-elementi rilevanti kollha tal-fajl.

116

Issa, mingħajr il-bżonn li jiġi eżaminata jekk dan l-argument huwiex effettiv, ma jidhirx, fl-ewwel lok, li, bil-fatt li ffissa d-data ta’ riferiment għall‑31 ta’ Mejju 2022, il-Kunsill naqas milli jwettaq l-obbligu ta’ diliġenza tiegħu.

117

Fil-fatt, l-ewwel nett, jeħtieġ li jitfakkar li l-Artikolu 5 tal-Ftehim ma kienx joħloq obbligu fuq il-Kunsill li jġib il-kunsens tal-OSP kofirmatarji fir-rigward tad-data għall-iskattar tal-proċedura ta’ verifika u lanqas fir-rigward tad-data ta’ riferiment meħuda inkunsiderazzjoni għall-verifika tal-livelli għar-rikonoxximent u ta’ rappreżentattività.

118

It-tieni, ebda dispożizzjoni mill-Ftehim ma kienet tobbliga lill-Kunsill li jiffissa l-ewwel data ta’ riferiment għall-aħħar jum tax-xahar ta’ qabel l-iffirmar tal-ewwel ittra ta’ missjoni, b’mod li huwa seta’ jiffissa data ta’ riferiment għal waħda wara li tintbagħat din l-ittra, sakemm din tkun l-istess għall-OSP kofirmatarji kollha u tiġi ffissata biżżejjed żmien minn qabel. Madankollu, tali soluzzjoni kien ikollha l-konsegwenza li żżid it-tul tal-proċedura ta’ verifika u li tittardja l-konstatazzjonijiet tal-marixxall.

119

Fil-fatt, f’xenarju bħal dan, minn naħa, l-OSP kofirmatarji kien ikollhom bżonn ta’ terminu addizzjonali sabiex, wara d-data ta’ riferiment, janalizzaw id-data li kien ikollhom u jikkomunikawha lill-marixxall, fil-kuntest tad-dikjarazzjoni ġuramentata prevista fl-Artikolu 5(1) tal-Ftehim. Min-naħa l-oħra, il-marixxall kien ikollu bżonn ukoll ta’ terminu addizzjonali sabiex janalizza u jivverifika din id-data kif ukoll dik ikkomunikata mill-Kunsill.

120

Fit-tielet lok, għalkemm mill-indikazzjonijiet konkordanti tal-partijiet jirriżulta li l-OSP kofirmatarji kellhom għarfien tal-intenzjoni tal-Kunsill li jiffissa l-ewwel data ta’ riferiment għall‑31 ta’ Mejju 2022, waqt il-komunikazzjoni, fit‑3 ta’ Mejju 2022, tal-abbozz tal-ewwel ittra ta’ missjoni, mill-punt 11 iktar ’il fuq jirriżulta li l-OSP kofirmatarji kienu avżati sa mid‑29 ta’ Marzu 2022 bl-intenzjoni tal-Kunsill li jibda l-proċedura ta’ verifika, b’mod li, sabiex jippreparaw ruħhom għal din il-proċedura, huma kellhom terminu ta’ kważi xahrejn, li, fiċ-ċirkustanzi tal-każ, ma jidhirx insuffiċjenti.

121

Fit-tieni lok u fi kwalunkwe każ, mill-proċess ma jirriżultax li kwalunkwe ksur tal-obbligu ta’ diliġenza li jirriżulta mir-rifjut tal-Kunsill li jipposponi l-ewwel data ta’ riferiment għall‑31 ta’ Lulju 2022 seta’ jkollu influwenza fuq il-legalità tad-deċiżjoni kkontestata.

122

Ċertament, ir-rikorrenti tilmenta mill-fatt li, waqt l-ewwel proċedura ta’ verifika, il-Kunsill ma ħax inkunsiderazzjoni l-impossibbiltà li fiha hija sabet ruħha li żżomm laqgħa ġenerali, minħabba r-restrizzjonijiet marbutin mal-pandemija tal-COVID-19, sabiex taġġusta l-ammonti tal-kontribuzzjonijiet dovuti mill-membri tagħha.

123

F’dan ir-rigward, jeħtieġ li jitfakkar li, fil-kuntest tal-ewwel u t-tieni proċedura ta’ verifika, il-marixxall kellu jivverifika l-osservanza tal-kundizzjoni prevista fl-Artikolu 2(2)(e) tal-Ftehim, li tgħid li, sabiex jingħaddu fil-kuntest tal-proċeduri msemmijin, il-membri tal-OSP kofirmatarji għandhom jikkontribwixxu kull xahar għall-ammont ta’ mill-inqas 0.2 % tas-salarju tagħhom jew tal-pensjoni bażika tagħhom.

124

Issa, peress li l-OSP kofirmatarji ma kellhomx għarfien, f’ħin reali, tat-tibdil tar-remunerazzjoni tal-membri tagħhom, marbuta mas-sitwazzjoni statutorja jew personali tagħhom, huwa possibbli li, fid-data ta’ riferiment magħżula sabiex issir il-proċedura ta’ verifika, uħud mill-membri tagħhom ma jistgħux jingħaddu għall-verifika tal-livell għar-rikonoxximent jew ir-rappreżentattività minħabba li, bil-fatt tat-tibdil tar-remunerazzjoni tagħhom, il-livell tal-kontribuzzjonijiet ta’ kull xahar tagħhom sar inqas mill-perċentwal msemmi fil-punt 123 iktar ’il fuq.

125

Madankollu, ir-rikorrenti ma tressaq ebda element li juri li, fid-data tal‑31 ta’ Lulju 2022 jew fit-tieni data ta’ riferiment, hija kienet tkun f’pożizzjoni li tilħaq il-livell ta’ rappreżentattività, u dan minkejja li t-tieni proċedura ta’ verifika offritilha terminu addizzjonali u opportunità ġdida sabiex taġġusta l-livell tal-kontribuzzjonijiet tal-membri tagħha u li żżid in-numru tagħhom, skont id-data ġdida ta’ riferiment li kienet ġiet iffissata għat‑28 ta’ Frar 2023.

126

Konsegwentement, bil-fatt li qies id-data tal‑31 ta’ Mejju 2022 bħala l-ewwel data ta’ riferiment, il-Kunsill ma kisirx l-obbligu ta’ diliġenza tiegħu.

iii)

Dwar it‑tielet argument, ibbażat fuq ksur tal‑obbligu ta’ imparzjalità

127

Ir-rikorrenti tilmenta minn ksur tal-obbligu ta’ imparzjalità, mingħajr, madankollu, ma tikkorrobora l-argument tagħha bi preċiżazzjonijiet suffiċjenti li jippermettu li tiġi evalwata l-fondatezza tiegħu.

128

F’dan ir-rigward, jeħtieġ li jitfakkar li l-Artikolu 76(d) tar-Regoli tal-Proċedura tal-Qorti Ġenerali jipprevedi li r-rikors ippreżentat fl-ewwel istanza għandu jkun fih “il-motivi u l-argumenti invokati kif ukoll espożizzjoni fil-qosor ta’ dawn il-motivi”. Għaldaqstant, skont ġurisprudenza stabbilita, il-qorti tal-Unjoni ma hijiex obbligata tirrispondi għall-argumenti invokati minn xi parti li ma humiex suffiċjentement ċari u preċiżi, inkwantu ma jiġux żviluppati iktar u ma jkunux akkumpanjati b’argument speċifiku li jikkorroborahom (ara s-sentenza tat‑18 ta’ Novembru 2021, Il-Greċja vs Il-Kummissjoni, C‑107/20 P, mhux ippubblikata, EU:C:2021:937, punt 76 u l-ġurisprudenza ċċitata).

129

Konsegwentement, dan it-tielet argument għandu jiġi miċħud bħala inammissibbli, b’mod li l-ewwel ilment ta’ din il-parti għandu jiġi miċħud fl-intier tiegħu.

2)

Dwar it‑tieni lment, ibbażat fuq l‑assenza tat‑teħid inkunsiderazzjoni mill‑Kunsill tad‑diffikultajiet iffaċċjati mir‑rikorrenti sabiex taċċedi għall‑informazzjoni korretta li tippermettilha tissodisfa r-rekwiżiti tal‑ewwel u t‑tieni proċedura ta’ verifika

130

Ir-rikorrenti ssostni li l-Kunsill ma ħax inkunsiderazzjoni d-diffikultajiet li hija ffaċċjat sabiex taċċedi għall-informazzjoni korretta li tippermettilha tirrispondi għar-rekwiżiti tal-ewwel u t-tieni proċedura ta’ verifika, jiġifieri l-livelli ta’ remunerazzjoni tal-uffiċjali, tal-membri tal-persunal u tal-pensjonanti li huma marbutin mal-gradi tagħhom.

131

B’hekk, ir-rikorrenti ssostni li l-Kunsill kellu jikkomunikalha, waqt l-ewwel u t-tieni proċedura ta’ verifika, jekk ikun il-każ fil-forma anonimizzata, l-informazzjoni li tirrigwarda l-gradi tal-uffiċjali, tal-membri tal-persunal u tal-pensjonanti, sabiex tkun tista’ tivverifika l-proporzjon ta’ kontribuzzjoni meta mqabbel mas-salarju bażiku.

132

F’dan ir-rigward, jeħtieġ li jitfakkar li t-tielet inċiż tal-Artikolu 5(2) tal-Ftehim kien jeżiġi mingħand l-OSP kofirmatarji, għall-iskopijiet tal-proċeduri ta’ verifika, li jikkomunikaw lill-marixxall l-listi tal-membri tagħhom li jaħdmu mas-SĠK filwaqt li jindikaw in-nazzjonalitajiet tagħhom, il-funzjonijiet tagħhom, il-gruppi ta’ funzjonijiet li għalihom jappartjenu, kif ukoll lista tal-ex uffiċjali u membri oħra tal-persunal tas-SĠK intitolati għal pensjoni Komunitarja.

133

Barra minn hekk, l-ewwel u t-tieni ittra ta’ missjoni kienu jobbligaw lill-marixxall, meta jwettaq l-ewwel u t-tieni proċedura ta’ verifika, li jagħmel kuntatt mad-Direttorat Ġenerali “Żvilupp organizzazzjonali u servizzi” sabiex jikseb il-listi uffiċjali tal-uffiċjali u ta’ membri oħra tal-persunal kif ukoll il-listi uffiċjali tal-ex uffiċjali u membri oħra tal-persunal stabbiliti rispettivament fl-ewwel data ta’ riferiment tal‑31 ta’ Mejju 2022 u t-tieni data ta’ riferiment tat‑28 ta’ Frar 2023 (iktar ’il quddiem il-“listi uffiċjali stabbiliti mill-Kunsill”).

134

B’mod partikolari, il-listi uffiċjali stabbiliti mill-Kunsill kienu jinkludu d-data li tirrigwarda l-gradi u r-remunerazzjonijiet tal-membri u tal-ex membri tal-persunal tas-SĠK sabiex jippermettu lill-marixxall li jivverifika l-osservanza tal-kundizzjoni prevista fl-Artikolu 2(2)(e) tal-Ftehim, li tgħid li sabiex jingħaddu fil-kuntest tal-proċeduri ta’ verifika, il-membri tal-OSP kofirmatarji għandhom jikkontribwixxu kull xahar sal-ammont ta’ mill-inqas 0.2 % tas-salarju jew tal-pensjoni bażika tagħhom.

135

Issa, l-ewwel nett, jeħtieġ li jiġi rrilevat li ebda dispożizzjoni mill-Ftehim ma tipprevedi l-komunikazzjoni lill-OSP kofirmatarji tad-data li tinsab fil-listi uffiċjali stabbiliti mill-Kunsill.

136

It-tieni, mill-proċess ma jirriżultax li r-rikorrenti kienet talbet lill-Kunsill jibgħatilha, għall-iskopijiet tal-ewwel u t-tieni proċedura ta’ verifika, il-lista uffiċjali stabbiliti minnu.

137

It-tielet, il-Kunsill ma setax jilqa’ talba tar-rikorrenti intiża sabiex jiġu kkomunikati l-listi uffiċjali stabbiliti minnu mingħajr ma jikser il-klawżola ta’ kunfidenzjalità li tinsab fl-Artikolu 5(1) tal-Ftehim.

138

Fil-fatt, din il-klawżola li kienet tipprojbixxi lill-marixxall milli jiżvela l-informazzjoni miksuba fil-kuntest tal-proċeduri ta’ verifika tippermetti li tiggarantixxi s-sigriet mhux biss tal-appartenenza sindakali tal-uffiċjali u tal-membri tal-persunal tas-SĠK kif ukoll tal-ex uffiċjali u membri oħra tal-persunal, imma wkoll in-natura kunfidenzjali tar-remunerazzjoni tagħhom, skont id-dispożizzjonijiet tar-Regolament (UE) 2018/1725 tal-Parlament Ewropew u tal-Kunsill tat‑23 ta’ Ottubru 2018 dwar il-protezzjoni ta’ persuni fiżiċi fir-rigward tal-ipproċessar ta’ data personali mill-istituzzjonijiet, korpi, uffiċċji u aġenziji tal-Unjoni u dwar il-moviment liberu ta’ tali data, u li jħassar ir-Regolament (KE) Nru 45/2001 u d-Deċiżjoni Nru 1247/2002/KE (ĠU 2018, L 295, p. 39).

139

Ir-raba’, għalkemm ir-rikorrenti ssostni li l-listi uffiċjali stabbiliti mill-Kunsill setgħu jiġu kkomunikati lilha fil-forma anonimizzata, ma huwiex ċert li, f’xenarju bħal dan, ir-rikorrenti kienet issib ruħha fl-impossibbiltà li tidentifika l-membri u l-ex membri tal-persunal tas-SĠK li jinsabu f’dawn il-listi jew, tal-inqas, uħud minnhom, bis-saħħa tad-data li tirrigwarda l-gradi tagħhom u r-remunerazzjonijiet tagħhom.

140

Konsegwentement, dan l-ilment għandu jiġi miċħud bħala infondat.

3)

Dwar it‑tielet ilment, ibbażat fuq il‑pubblikazzjoni mill‑Kunsill, fit‑30 ta’ Novembru 2022, tar‑riżultati tal‑ewwel proċedura ta’ verifika

141

Ir-rikorrenti tikkritika lill-Kunsill li kiser il-prinċipju ta’ amministrazzjoni tajba meta, fit‑30 ta’ Novembru 2022, ippubblika fuq l-intranet tiegħu, ir-riżultati tal-ewwel proċedura ta’ verifika, mingħajr konsultazzjoni magħha u lanqas maż-żewġ OSP kofirmatarji l-oħra kkonċernati u b’mod mgħaġġel, b’mod li hija ma kellhiex l-opportunità li tippreżenta osservazzjonijiet u lanqas tikkontesta eventwalment din il-proċedura.

142

Barra minn hekk, ir-rikorrenti ssostni li din il-pubblikazzjoni inkoraġġixxiet lil OSP kofirmatarja oħra sabiex tniedi kampanja ta’ tmaqdir fil-konfront tagħha billi trendi pubbliku, fit‑23 ta’ Jannar 2023, l-ewwel rapport, ħaġa li rrendiet dejjem iktar diffiċli x-xogħol ta’ rimobilizzazzjoni tal-membri tagħha bil-għan li tkun regolarizzata s-sitwazzjoni tagħha.

143

F’dan ir-rigward, jeħtieġ li jiġi kkonstatat li, fit‑30 ta’ Novembru 2022, il-Kunsill ippubblika fuq l-intranet tiegħu artiklu qasir fuq il-Ftehim, il-kundizzjonijiet għar-rikonoxximent u ta’ rappreżentattività tal-OSP kofirmatarji kif ukoll fuq l-ewwel proċedura ta’ verifika. Kien hemm indikat ukoll li l-marixxall kien reċentement ippreżenta r-relazzjoni tiegħu u stabbilixxa li żewġ OSP kofirmatarji, imsemmija b’isimhom, kienu laħqu l-livelli għar-rikonoxximent u ta’ rappreżentattività, u dan għall-kuntrarju tar-rikorrenti. Dan l-artikolu kien jindika wkoll li, skont il-Ftehim, ir-rikorrenti kellha tliet xhur sabiex tilħaq dawn il-livelli u tkompli tibbenefika mid-drittijiet previsti mill-Ftehim.

144

Fl-ewwel lok, għalkemm ir-rikorrenti ssostni li din il-informazzjoni ġiet ippubblikata mingħajr konsultazzjoni minn qabel mal-OSP kkonċernati u mingħajr ma din ġiet informata, hija ma turix u lanqas tallega li l-Kunsill kellu l-obbligu li jwettaq din il-konsultazzjoni u informazzjoni minn qabel. Fi kwalunkwe każ, hija ma tindikax kif tali ċirkustanza tammonta għal ksur tal-prinċipju ta’ amministrazzjoni tajba.

145

Fit-tieni lok, jeħtieġ li jiġi rrilevat li, għalkemm ir-rikorrenti ssostni li l-pubblikazzjoni li saret mill-Kunsill fuq l-intranet tiegħu fit‑30 ta’ Novembru 2022 inkoraġġixxiet OSP kofirmatarja oħra sabiex tibda kampanja ta’ tmaqdir fil-konfront tagħha billi rrendiet pubbliku, fit-23 ta’ Jannar 2023, il-kontenut tal-ewwel rapport, ħaġa li kienet trendi iktar diffiċli r-rimobilizzazzjoni tal-membri tagħha fid-dawl tat-tieni proċedura ta’ verifika, hija ma pprovdiet ebda element li juri r-realtà ta’ din l-allegazzjoni, peress li l-prospett bid-data tat‑23 ta’ Jannar 2023 li hija pproduċiet ma jurix l-eżistenza ta’ kampanja ta’ tmaqdir kontriha.

146

Għaldaqstant, dan l-ilment kif ukoll it-tieni parti fl-intier tagħha għandhom jiġu miċħuda bħala infondati.

c)

Dwar it‑tielet parti, ibbażata fuq il‑ksur tal‑“ispirtu ta’ kooperazzjoni leali” moqri fid‑dawl tal‑prinċipju ta’ proporzjonalità

147

Ir-rikorrenti ssostni li l-Kunsill kiser l-“ispirtu ta’ kooperazzjoni leali”, moqri fid-dawl tal-prinċipju ta’ proporzjonalità, minħabba li kellu jikkonċedilha l-benefiċċju tal-perijodu tranżitorju ta’ 18-il xahar previst fil-paragrafu 4 tal-Anness, sabiex jippermettilha tiġġestixxi t-tranżizzjoni bejn is-sitwazzjoni li tirriżulta mill-istatus tagħha ta’ OSP rrikonoxxuta u rappreżentattiva u dik li tirriżulta mill-istatus ġdid tagħha bħala OSP rrikonoxxuta biss.

148

F’dan ir-rigward, fl-ewwel lok, jeħtieġ li jitfakkar li, skont l-ewwel subparagrafu tal-Artikolu 4(3) TUE, bis-saħħa tal-prinċipju ta’ kooperazzjoni leali, l-Unjoni u l-Istati Membri għandhom jirrispettaw lil xulxin u jassistu reċiprokament lil xulxin fit-twettiq tal-kompiti li joħorġu mit-trattati.

149

B’hekk, din id-dispożizzjoni ma tpoġġix fuq il-Kunsill obbligu ta’ kooperazzjoni leali fir-relazzjonijiet tiegħu ma’ persuna ġuridika bħalma hija r-rikorrenti.

150

Barra minn hekk, ir-rikorrenti ma invokatx xi dispożizzjoni oħra tad-dritt tal-Unjoni li tpoġġi fuq l-istituzzjoni, fir-relazzjonijiet tagħha mal-OSP, obbligu ta’ “kooperazzjoni leali”.

151

B’mod partikolari, jeħtieġ li jiġi kkonstatat li l-Ftehim ma jipprevedix l-obbligu ta’ kooperazzjoni leali li jaqa’ fuq il-Kunsill u fuq l-OSP kofirmatarji.

152

Konsegwentement, ir-rikorrenti ma tistax validament tinvoka l-prinċipju ta’ kooperazzjoni leali u din il-parti, inkwantu hija bbażata fuq il-ksur ta’ dan il-prinċipju, għandha tiġi miċħuda bħala ineffettiva.

153

Fit-tieni lok, għal dak li jirrigwarda l-prinċipju ta’ proporzjonalità, jeħtieġ li jitfakkar li, skont l-Artikolu 52(1) tal-Karta, “[k]ull limitazzjoni fl-eżerċizzju tad-drittijiet u tal-libertajiet rikonoxxuti minn din il-Karta għandha tkun prevista mil-liġi u għandha tirrispetta l-essenza ta’ dawk id-drittijiet u l-libertajiet. Bla ħsara għall-prinċipju ta’ proporzjonalità, jistgħu jsiru limitazzjonijiet f’dawk il-każijiet biss fejn ikun meħtieġ u fejn ġenwinament jintlaħqu l-objettivi ta’ interess ġenerali rikonoxxuti mill-Unjoni jew il-ħtieġa li jiġu protetti d-drittijiet u l-libertajiet ta’ oħrajn”. Barra minn hekk, skont l-Artikolu 5(4) TUE, skont il-prinċipju ta’ proporzjonalità, il-kontenut u l-forma tal-azzjoni tal-Unjoni ma għandhomx jeċċedu dak li huwa meħtieġ sabiex jintlaħqu l-għanijiet tat-trattati.

154

F’dan ir-rigward, jeħtieġ li jiġi rrilevat li l-paragrafu 4 tal-Anness jipprevedi li, f’każ ta’ tibdil fit-tqassim tal-kollokamenti bejn l-OSP rappreżentattivi, il-membri tal-persunal ikkollokati jistgħu jibqgħu posthom għal perijodu tranżitorju ta’ 18-il xahar.

155

B’hekk, mit-termini ta’ din id-dispożizzjoni jirriżulta li din tapplika biss għall-OSP rappreżentattivi, kwalità li r-rikorrenti ma għadhiex tista’ tinvoka minħabba li ġiet adottata d-deċiżjoni kkontestata.

156

Konsegwentement, il-Kunsill ma setax jikkonċedi lir-rikorrenti l-benefiċċju tal-perijodu tranżitorju ta’ 18-il xahar previst fil-paragrafu 4 tal-Anness mingħajr, meta jagħmel hekk, ma jikser din id-dispożizzjoni u jikser b’hekk il-qafas legali li huwa stess stabbilixxa kif ukoll il-prinċipju taċ-ċertezza legali.

157

F’dawn iċ-ċirkustanzi, ir-rikorrenti ma hijiex iġġustifikata ssostni li r-rifjut tal-Kunsill li jikkonċedilha l-benefiċċju tal-perijodu tranżitorju previst fil-paragrafu 4 tal-Anness jkun jikkostitwixxi ksur tal-prinċipju ta’ proporzjonalità.

158

Għaldaqstant, jeħtieġ li jiġu miċħuda din il-parti u, konsegwentement, it-tieni motiv fl-intier tiegħu.

4.

Dwar it‑tielet motiv, ibbażat fuq ksur tad‑dritt fundamentali għal‑libertà sindakali

159

Ir-rikorrenti ssostni li d-deċiżjoni kkontestata tikser il-libertà sindakali ggarantita mill-Artikolu 12(1) tal-Karta, kif ukoll mill-Artikoli 27 u 28 tagħha, u mill-Artikolu 11 tal-Konvenzjoni għall-Protezzjoni tad-Drittijiet tal-Bniedem u tal-Libertajiet Fundamentali, iffirmata f’Ruma fl‑4 ta’ Novembru 1950 (iktar ’il quddiem il-“KEBD”). Hija tikkunsidra, fil-fatt, li din toħloq ostaklu għall-eżerċizzju tal-libertà sindakali tal-membri tagħha peress li għandha bħala effett immedjat li tittermina l-kollokament tal-president tagħha u l-provvista ta’ assistent tas-segretarjat u li tħallilha biss sempliċi indirizz elettroniku bħala mezz ta’ azzjoni.

160

Ir-rikorrenti ssostni wkoll li, peress li l-president tagħha issa jrid jerġa’ jsib pożizzjoni full-time fi ħdan is-SĠK, hija mhux ser tibqa’ disponibbli daqs qabel sabiex twettaq il-funzjonijiet sindakali tagħha fis-servizz tal-membri tagħha, b’mod li hija tkun kkundannata għad-diżinteress tal-membri attwali jew potenzjali tagħha u għal “mewt bil-mod”.

161

Il-Kunsill jikkontesta l-allegazzjonijiet tar-rikorrenti.

162

F’dan ir-rigward, jeħtieġ li jitfakkar li, għalkemm, kif jikkonferma l-Artikolu 6(3) TUE, id-drittijiet fundamentali stabbiliti fil-KEDB jagħmlu parti mid-dritt tal-Unjoni bħala prinċipji ġenerali u għalkemm l-Artikolu 52(3) tal-Karta jipprovdi li d-drittijiet previsti fiha li jikkorrispondu għal drittijiet iggarantiti mill-KEDB għandhom l-istess tifsira u l-istess portata bħal dawk li tagħtihom l-imsemmija konvenzjoni, din tal-aħħar ma hijiex, minħabba li l-Unjoni ma aderixxietx magħha, strument legali li jagħmel formalment parti mill-ordinament ġuridiku tal-Unjoni (ara s-sentenza tat‑22 ta’ Ottubru 2020, Silver Plastics u Johannes Reifenhäuser vs Il-Kummissjoni, C‑702/19 P, EU:C:2020:857, punt 24 u l-ġurisprudenza ċċitata).

163

Min-naħa l-oħra, mill-Ispjegazzjonijiet dwar il-Karta (ĠU 2007, C 303, p. 17) jirriżulta li d-dritt iggarantit mill-Artikolu 12(1) tagħha jikkorrispondi għad-dritt iggarantit mill-Artikolu 11 tal-KEDB u li, skont l-Artikolu 52(3) tal-Karta, għandu l-istess tifsira u portata bħalu (sentenza tad‑19 ta’ Ottubru 2023, Aquino vs Il-Parlament, C‑534/22 P, mhux ippubblikata, EU:C:2023:802, punt 30).

164

Konsegwentement, dan il-motiv għandu jiġi eżaminat fid-dawl tal-Artikolu 12(2) tal-Karta.

165

B’hekk, jeħtieġ li jitfakkar li, skont l-Artikolu 12(1) tal-Karta, “[k]ull persuna għandha d-dritt għal-libertà ta’ għaqda paċifika u għal-libertà ta’ assoċjazzjoni f’kull livell, b’mod partikolari fil-qasam politiku, tat-trade unions, u ċiviku, li jimplika d-dritt ta’ kull persuna li tifforma trade unions flimkien ma’ oħrajn u li tissieħeb magħhom għall-protezzjoni ta’ l-interessi tagħha”.

166

Barra minn hekk, l-Artikoli 27 u 28 tal-Karta jipprevedi li “[l]-ħaddiema jew ir-rappreżentanti tagħhom għandhom, fil-livelli xierqa, jkunu ggarantiti informazzjoni u konsultazzjoni fi żmien utli, fil-każijiet u skond il-kondizzjonijiet previsti mil-liġi ta’ l-Unjoni u mil-liġijiet u l-prattiċi nazzjonali” u li “[l]-ħaddiema u dawk li jħaddmu, jew l-organizzazzjonijiet rispettivi tagħhom, għandhom, skond il-liġi ta’ l-Unjoni u l-liġijiet u l-prattiċi nazzjonali, id-dritt li jinnegozjaw u li jikkonkludu ftehim kollettivi fil-livelli xierqa u, fil-każ ta’ konflitti ta’ interess, li jieħdu azzjoni kollettiva, inkluż l-istrajk, sabiex jiddefendu l-interessi tagħhom”.

167

Fl-aħħar nett, jeħtieġ li jitfakkar li, skont l-Artikolu 24b tar-Regolamenti tal-Persunal “[l]-uffiċjali għandhom ikunu intitolati jeżerċitaw id-dritt ta’ assoċjazzjoni; huma jistgħu partikolarment ikunu membri ta’ trade unions jew assoċjazzjonijiet tal-persunal ta’ l-uffiċjali Ewropej”.

168

F’dan il-kuntest, mill-ġurisprudenza jirriżulta li huwa l-obbligu tal-istituzzjonijiet tal-Unjoni li ma jagħmlu xejn li jista’ jostakola l-libertà sindakali rrikonoxxuta mid-dispożizzjonijiet imsemmija fil-punti 165 sa 167 iktar ’il fuq (ara, f’dan is-sens, is-sentenza tat‑18 ta’ Jannar 1990, Maurissen u Union syndicale vs Il-Qorti tal-Awdituri, C‑193/87 u C‑194/87, EU:C:1990:18, punt 12).

169

Il-libertà sindakali kif irrikonoxxuta lill-uffiċjali u lill-membri tal-persunal tal-Unjoni timplika d-dritt tal-OSP li jwettqu kull attività għad-difiża tal-interessi professjonali tal-membri tagħhom (ara, f’dan is-sens, is-sentenza tat‑18 ta’ Jannar 1990, Maurissen u Union syndicale vs Il-Qorti tal-Awdituri, C-193/87 u C-194/87, EU:C:1990:18, punt 13 u l-ġurisprudenza ċċitata).

170

Minn naħa, jirriżulta li l-istituzzjonijiet tal-Unjoni għandhom jaċċettaw li l-OSP jeżerċitaw il-kompiti ta’ rappreżentazzjoni u ta’ konsultazzjoni tagħhom fuq il-materji kollha li jikkonċernaw lill-persunal u, min-naħa l-oħra, li huma ma jistgħux jippenalizzaw taħt kwalunkwe forma li tkun lill-uffiċjali jew lill-membri tal-persunal minħabba l-attivitajiet sindakali tagħhom (ara, f’dan is-sens, is-sentenza tat‑18 ta’ Jannar 1990, Maurissen u Union syndicale vs Il-Qorti tal-Awdituri, C‑193/87 u C‑194/87, EU:C:1990:18, punti 14 u 15).

171

F’dan il-każ, jeħtieġ li jiġi kkonstatat li, skont id-deċiżjoni kkontestata, ir-rikorrenti tkompli tibbenefika mill-faċilitajiet previsti fl-Artikolu 13 tal-Ftehim bħala OSP rrikonoxxuta bil-għan li teżerċita l-attivitajiet sindakali tagħha b’mod li, għalkemm hija ma għandhiex l-istess prerogattivi u lanqas l-istess riżorsi bħal dawk ta’ OSP rappreżentattiva, hija jibqgħalha tal-inqas il-possibbiltà li teżerċita l-kompiti ta’ rappreżentanza u ta’ konsultazzjoni tagħha fuq il-kwistjonijiet kollha li jinteressaw lill-persunal.

172

Barra minn hekk, id-deċiżjoni kkontestata ma hija ta’ ebda xkiel sabiex ir-rikorrenti tirkupra l-istatus tagħha ta’ OSP rappreżentattiva fil-każ fejn hija tilħaq mill-ġdid il-livell ta’ rappreżentattività previst fil-Ftehim.

173

Apparti dan, id-deċiżjoni kkontestata ma toħloq ebda xkiel la għal-libertà ta’ għaqda paċifika, la għal-libertà ta’ assoċjazzjoni tal-membri tar-rikorrenti, fid-dawl tad-difiża tal-interessi tagħhom, u lanqas għad-dritt tagħhom li jiġu informati u kkonsultati f’ħin utli, b’mod partikolari fil-kuntest tal-Kumitat tal-Persunal speċifikament implimentat mir-Regolamenti tal-Persunal.

174

F’dan ir-rigward, jeħtieġ li jitfakkar li, skont l-Artikolu 9(3) tar-Regolamenti tal-Persunal, il-Kumitat tal-Persunal għandu jirrappreżenta l-interessi tal-persunal rigward l-istituzzjoni tagħhom u jżomm kuntatt kontinwu bejn l-istituzzjoni u l-persunal, filwaqt li jikkoopera għall-funzjonament tajjeb tas-servizzi billi jipprovdi mezz ta’ espressjoni għall-opinjoni tal-persunal (ara, f’dan is-sens, is-sentenza tad-19 ta’ Ottubru 2023, Aquino vs Il-Parlament, C‑534/22 P, mhux ippubblikata, EU:C:2023:802, punt 32).

175

Fl-aħħar nett, id-deċiżjoni kkontestata bl-ebda mod ma hija ta’ xkiel sabiex OSP rappreżentattivi oħra fi ħdan il-Kunsill jiddefendu l-interessi tal-membri tar-rikorrenti fil-mument tan-negozjati u tal-konklużjoni tal-ftehimiet bħalma huma dawk irregolati mill-Artikolu 10c tar-Regolamenti tal-Persunal, u lanqas sabiex il-membri tagħha jirrikorru għall-azzjonijiet kollettivi għad-difiża tal-interessi tagħhom, inkluża l-azzjoni industrijali.

176

F’dawn iċ-ċirkustanzi, id-deċiżjoni kkontestata, li ma tteħditx minħabba attivitajiet sindakali mwettqa mir-rikorrenti, imma li, skont il-Ftehim, hija ġġustifikata minħabba l-konstatazzjonijiet tal-marixxall li skonthom hija ma laħqitx il-livell ta’ rappreżentattività previst mill-imsemmi Ftehim kemm fl-ewwel kif ukoll fit-tieni data ta’ riferiment, ma tistax titqies bħala intiża li tippenalizza jew ixxekkel l-eżerċizzju tal-libertà sindakali tal-membri tagħha kif ukoll id-drittijiet li dawn tal-aħħar jisiltu mill-Artikolu 12(1) tal-Karta kif ukoll mill-Artikoli 27 u 28 tagħha.

177

F’dan ir-rigward, jeħtieġ li jiġi kkonstatat li r-rikorrenti ma sostnietx, u lanqas a fortiori uriet, li d-dispożizzjonijiet tal-Ftehim li jirregolaw il-provvista ta’ riżorsi u ta’ mezzi lill-OSP sabiex tkun iffaċilitata l-azzjoni sindakali tagħhom, skont jekk humiex OSP rappreżentattivi jew OSP irrikonoxxuti, jikkostitwixxu limitazzjoni fuq l-eżerċizzju tad-drittijiet iggarantiti mill-Artikoli 12, 27 u 28 tal-Karta kif ukoll mill-Artikolu 24b tar-Regolamenti tal-Persunal.

178

Konsegwentement, jeħtieġ li jiġi miċħud it-tielet motiv bħala infondat, l-istess bħat-talbiet intiżi għall-annullament fl-intier tagħhom.

B.

Fuq it‑talbiet għal kumpens

179

Ir-rikorrenti ssostni li l-pubblikazzjoni tar-riżultati tal-ewwel proċedura ta’ verifika, fit‑30 ta’ Novembru 2022, mingħajr konsultazzjoni magħha u lanqas maż-żewġ OSP kofirmatarji l-oħra kkonċernati u b’mod prematur, tikkostitwixxi ksur suffiċjentement serju tal-prinċipju ta’ amministrazzjoni tajba fil-konfront tagħha, li kkaġunalha dannu morali minħabba l-ħsara lir-reputazzjoni tagħha. Hija titlob lill-Kunsill iħallas l-ammont simboliku ta’ EUR 1 għal dan il-għan.

180

Il-Kunsill jikkontesta l-allegazzjonijiet tar-rikorrenti.

181

F’dan ir-rigward, jeħtieġ li jitfakkar li, skont ġurisprudenza stabbilita, l-istabbiliment tar-responsabbiltà mhux kuntrattwali tal-Unjoni hija suġġetta li jkunu ssodisfatti numru ta’ kundizzjonijiet, jiġifieri l-eżistenza ta’ ksur suffiċjentement serju ta’ regola ta’ dritt li għandha bħala għan li tagħti drittijiet lill-individwi, ir-realtà tad-dannu u l-eżistenza ta’ rabta kawżali bejn il-ksur tal-obbligu li jaqa’ fuq l-awtur tal-att u d-dannu subit mill-persuni leżi (ara s-sentenza tas‑27 ta’ April 2023, Fondazione Cassa di Risparmio di Pesaro et vs Il-Kummissjoni, C‑549/21 P, mhux ippubblikata, EU:C:2023:340, punt 113 u l-ġurisprudenza ċċitata).

182

F’dan il-każ, ir-rikorrenti tinvoka biss, insostenn ta’ dawn it-talbiet għal kumpens, l-istess kap ta’ illegalità bħal dak espost insostenn tat-talbiet tagħha għal annullament, b’mod partikolari, tat-tielet ilment tat-tieni parti tat-tieni motiv, ibbażat fuq il-ksur tal-prinċipju ta’ amministrazzjoni tajba minħabba l-pubblikazzjoni, fit‑30 ta’ Novembru 2022, tar-riżultati tal-ewwel proċedura ta’ verifika.

183

Issa, mill-punt 146 iktar ’il fuq jirriżulta li t-tielet ilment tat-tieni parti tat-tieni motiv, invokat insostenn tat-talbiet għal annullament, ġie miċħud bħala infondat.

184

Għaldaqstant, ma hijiex issodisfatta l-ewwel kundizzjoni msemmija fil-punt 181 iktar ’il fuq, li tippermetti l-istabbiliment tar-responsabbiltà mhux kuntrattwali tal-Unjoni u li tirrigwarda l-eżistenza ta’ ksur ta’ dispożizzjoni legali li għandha bħala suġġett li tagħti drittijiet lill-individwi.

185

Konsegwentement, mingħajr il-bżonn li jiġu eżaminati l-kundizzjonijiet l-oħra għall-istabbiliment tar-responsabbiltà tal-istituzzjonijiet tal-Unjoni, it-talbiet għal kumpens għandhom jiġu miċħuda.

IV.

Dwar l‑ispejjeż

186

Skont l-Artikolu 134(1) tar-Regoli tal-Proċedura, kull parti li titlef il-kawża għandha tiġi kkundannata għall-ispejjeż, jekk dawn ikunu ntalbu. Peress li r-rikorrenti tilfet il-kawża, jeħtieġ, skont ma ntalab mill-Kunsill, li hija tiġi kkundannata għall-ispejjeż, inkluż dawk li jirrigwardaw il-proċeduri għal miżuri provviżorji.

1)

Ir-rikors huwa miċħud.

2)

Is-section Conseil tal-Fédération de la fonction publique européenne section Conseil (FFPE section Conseil) hija kkundannata għall-ispejjeż, inkluż dawk li jirrigwardaw il-proċedura għal miżuri provviżorji.