Eagrán sealadach

BREITHIÚNAS NA CÚIRTE GINEARÁLTA (an Cúigiú Dlísheomra ina bhfuil cúigear Breithiúna ina suí)

8 Iúil 2026(*)

(Tarchur chun réamhrialú – Cánachas – Dleachtanna máil – Struchtúir dleachtanna máil ar alcól agus ar dheochanna alcólacha a chomhchuibhiú – Alcól eitile – Díolúintí – Airteagal 27(1)(b) de Threoir 92/83/CEE – An coincheap ‘táirgí nach bhfuil ceaptha lena gcaitheamh ag an duine’ – Critéir mheasúnaithe)

I gCás T‑381/25,

IARRAIDH ar réamhrialú faoi Airteagal 267 CFAE ó Naczelny Sąd Administracyjny (an Chúirt Uachtarach Riaracháin, an Pholainn), trí bhreith an 29 Eanáir 2025, a fuarthas ag an gCúirt an 29 Eanáir 2025, sna himeachtaí

P. sp. z o.o.

v

Dyrektor Izby Administracji Skarbowej w Łodzi,

páirtí leasmhar:

Prokurator Krajowy,

tugann AN CHÚIRT GHINEARÁLTA (an Cúigiú Dlísheomra ina bhfuil cúigear Breithiúna ina suí),

agus í comhdhéanta mar seo a leanas: M. Sampol Pucurull, Uachtarán

, T. Pynnä, J. Laitenberger (Rapóirtéir), M. Stancu agus W. Valasidis, Breithiúna,

Abhcóide Ginearálta: J. Martín y Pérez de Nanclares,

Cláraitheoir: V. Di Bucci,

ag féachaint do tharchur na hiarrata ar réamhrialú ón gCúirt Bhreithiúnais chuig an gCúirt Ghinearálta an 13 Meitheamh 2025, de bhun an tríú mír d’Airteagal 50b de Reacht Chúirt Bhreithiúnais an Aontais Eorpaigh,

ag féachaint don ábhar dá dtagraítear i bpointe (b) den chéad mhír d’Airteagal 50b de Reacht Chúirt Bhreithiúnais an Aontais Eorpaigh agus don easpa ceist neamhspleách léirithe de réir bhrí an dara mír d’Airteagal 50b den Reacht sin,

ag féachaint don nós imeachta i scríbhinn,

tar éis breithniú a dhéanamh ar na barúlacha arna dtíolacadh thar ceann na bpáirtithe seo a leanas:

–        P., ag M. Brończyk, redca prawny,

–        Dyrektor Izby Administracji Skarbowej w Łodzi, ag E. Białas-Giejbatow, i gcáil Gníomhaire,

–        Rialtas na Polainne, ag B. Majczyna, i gcáil Gníomhaire,

–        an Coimisiún Eorpach, ag M. Björkland agus B. Sasinowska, i gcáil Gníomhairí,

tar éis cinneadh a dheanamh, i ndiaidh an tAbhcóide Ginearálta a éisteacht, breithiúnas a thabhairt ar an gcás gan Tuairim,

an Breithiúnas seo a leanas

Breithiúnas

1        Baineann an iarraidh ar réamhrialú le léiriú ar Airteagal 27(1)(b) de Threoir 92/83/CEE ón gComhairle an 19 Deireadh Fómhair 1992 maidir le struchtúir dleachtanna máil ar alcól agus deochanna alcólacha a chomhchuibhiú (IO 1992 L 316, lch. 21).

2        Rinneadh an iarraidh seo in imeachtaí idir P. sp. z o.o., cuideachta atá corpraithe faoi dhlí na Polainne, agus an Dyrektor Izby Administracji Skarbowej w Łodzi (Stiúrthóir an Údaráis Cánach, Łódź, an Pholainn) maidir le hinmhuirireacht na dleachta máil comhchuibhithe i leith dhá chineál caolaitheoirí alcóil arna dtáirgeadh ag an gcuideachta sin idir mí Eanáir agus mí Aibreáin 2014.

 An dlí lena mbaineann

 Dlí an Aontais Eorpaigh

 Treoir 92/83

3         Foráiltear le hAirteagal 19(1) de Threoir 92/83 mar seo a leanas:

‘Cuirfidh na Ballstáit dleacht mháil i bhfeidhm ar alcól eitile i gcomhréir leis an Treoir seo.’

[Aistriúchán neamhoifigiúil]

4        Foráiltear le hAirteagal 20 de Threoir 92/83 mar seo a leanas:

‘Chun críocha na Treorach seo, ciallaíonn “alcól eitile”:

–        gach táirge ar mó ná 1.2 % de réir toirte a neart alcóil iarbhír de réir toirte agus a thagann faoi réim chóid AC 2207 agus 2208, fiú más cuid iad na táirgí sin de tháirge a thagann faoi réim caibidle eile den Ainmníocht Chomhcheangailte,

[...]’

[Aistriúchán neamhoifigiúil]

5        Foráiltear le hAirteagal 27(1) de Threoir 92/83 mar seo a leanas:

‘Díolmhóidh na Ballstáit na táirgí a chumhdaítear leis an Treoir seo ón dleacht mháil chomhchuibhithe faoi choinníollacha a leagfaidh siad síos chun a áirithiú go gcuirfear na díolúintí sin i bhfeidhm i gceart agus go díreach agus chun aon imghabháil, seachaint nó mí-úsáid a chosc i gcás ina:

[...]

(b)      bhfuil siad dínádúraithe i gcomhréir le ceanglais Bhallstáit agus úsáidte le haghaidh monarú táirgí nach bhfuil ceaptha lena gcaitheamh ag an duine.

(c)      n‑úsáidtear iad chun fínéagar de chód AC‑2209 a tháirgeadh

[...]’

[Aistriúchán neamhoifigiúil]

 AC

6        Le Caibidil 22 den Ainmníocht Chomhcheangailte (‘AC’) atá in Iarscríbhinn I a ghabhann le Rialachán (CEE) Uimh. 2658/87 ón gComhairle an 23 Iúil 1987 maidir leis an ainmníocht taraife agus staidrimh agus leis an gComhtharaif Chustaim (IO 1987 L 256, lch. 1), sa leagan a eascraíonn as Rialachán Cur Chun Feidhme (AE) Uimh. 1101/2014 ón gCoimisiún an 16 Deireadh Fómhair 2014 (IO 2014 L 312, lch. 1), dar teideal ‘Deochanna, biotáillí agus fínéagar’, áirítear, inter alia, ceannteideal 2207, mar seo a leanas:

Cód AC

Cur síos ar na hearraí

2207

Alcól eitile gan dínádúrú ar 80 % nó níos mó a neart alcóil de réir toirte; alcól eitile agus biotáillí eile, iad dínádúraithe, d’aon neart

[...]

[...]

2207 20 00

– Alcól eitile agus biotáillí eile d’aon neart, iad dínádúraithe

[Aistriúchán neamhoifigiúil]

7        Le Caibidil 38 de AC, sa leagan is infheidhme maidir leis an díospóid sna príomhimeachtaí, dar teideal ‘Táirgí ceimiceacha ilghnéitheacha’, áirítear, inter alia, ceannteideal 3814, mar seo a leanas:

Cód AC

Cur síos ar na hearraí

3814 00

Tuaslagóirí agus caolaitheoirí comhchodacha orgánacha nach bhfuil sonraithe ná áirithe in áit eile; ullmhóidí díothaithe péinte nó vearnaise:

3814 00 10

– iad bunaithe ar aicéatáit bhúitile

3814 00 90

– eile

 [Aistriúchán neamhoifigiúil]

 Dlí na Polainne

8        Foráiltear le hAirteagal 32(4) den Ustawa o podatku akcyzowym (an Dlí maidir le Dleachtanna Máil), an 6 Nollaig 2008 (Dz. U. 2011, Uimh. 108, mír 626), arna leasú (an Dlí maidir le Dleachtanna Máil), mar seo a leanas:

‘[...]

4.      Beidh an méid seo a leanas díolmhaithe freisin ó dhleacht mháil mar gheall ar an úsáid atá beartaithe dóibh:

[...]

(2)      alcól eitile dínádúraithe le gníomhairí dínádúraithe atá curtha ar liosta na ngníomhairí atá údaraithe chun alcól eitile a dhínádúrú ag an Aire atá freagrach as airgeadas poiblí de bhun na rialachán a glacadh faoi Dhlí an 2 Márta 2001 maidir le táirgeadh alcóil eitile agus monarú táirgí tobac (Dz. U. 2001, Uimh. 31, mír 353), arna leasú, agus a úsáidtear chun táirgí a mhonarú nach bhfuil ceaptha lena gcaitheamh ag an duine, sna cásanna dá dtagraítear i mír 3, pointí 1 nó 8, agus sna cásanna sin amháin, ar choinníoll go gcomhlíontar na coinníollacha a leagtar síos i míreanna 5 go 13; i gcás an úsáideora, beidh an díolúine ó dhleacht mháil teoranta do chainníochtaí nach sáraíonn na teorainneacha údaraithe úsáide dá dtagraítear in Airteagal 85(1)(2)(b) agus Airteagal 85(2)(1)(b).’

 An díospóid sna príomhimeachtaí agus na ceisteanna a tharchuirtear le haghaidh réamhrialú

9        Tar éis iniúchadh cánach a rinneadh ar P. maidir leis an tréimhse ó mhí Eanáir go mí Aibreáin 2014, chinn Naczelnik Drugiego Urzędu Skarbowego L. (Stiúrthóir an Dara Oifig Cánach in L., an Pholainn) (‘an t‑údarás cánach céadchéime’) gur alcól dínádúraithe a bhí sna táirgí a mhonaraigh P. agus a ainmníodh mar chaolaitheoirí faoi na hainmneacha ‘RRK 5’ agus ‘RRK 12’, ar táirgí iad a tháinig as 1 % de ghliocól próipiléine de réir maise a chur le halcól atá dínádúraithe go páirteach, agus, dá bhrí sin, gur cheart iad a bheith aicmithe faoi cheannteideal 2207 20 00 de AC. Dá réir sin, mheas an t‑údarás cánach céadchéime go ndearna P. earráid trí na táirgí sin a aicmiú faoi cheannteideal 3814 00 90 de AC agus trína mheas nach raibh siad beartaithe lena gcaitheamh ag an duine. Mheas an t‑údarás sin freisin, i gcás inar dhearbhaigh duine atá faoi dhliteanas an dleacht mháil chomhchuibhithe a íoc gur úsáideadh an t‑alcól eitile dínádúraithe go páirteach atá i gceist chun táirgí a mhonarú nach bhfuil ceaptha lena gcaitheamh ag an duine, cé, i ndáiríre, gur úsáideadh an t‑alcól chun táirge a bhí fós ina alcól eitile a mhonarú, mar is léir ó AC, gur bhain an fíoras sin an bonn de chuspóir na díolúine dá bhforáiltear in Airteagal 32(4)(2) den Dlí maidir le dleacht mháil.

10      Ina theannta sin, chinn an t‑údarás cánach céadchéime nár úsáid ach trí cinn de chomhpháirtithe conarthacha P. féin an táirge RRK 12 agus gur léirigh siad a n‑úsáid bheartaithe. Ó thaobh na sé pháirtí chonarthacha eile de, d’athdhíol siad an táirge ar bhealach a d’fhág nárbh fhéidir na faighteoirí a shainaithint trí bhíthin admhálacha. Sna himthosca sin, shocraigh an t‑údarás sin, le cinneadh an 26 Lúnasa 2019, an dleacht mháil a raibh P. faoi dhliteanas ina leith ó mhí Eanáir go mí Aibreáin 2014.

11      Tar éis na hagóide a rinne P., sheas Stiúrthóir Riarachán Cánach Łódź, le cinneadh an 22 Samhain 2019, le cinneadh an údaráis cánach céadchéime. Thionscain P. caingean i gcoinne an chinnidh sin.

12      Le breithiúnas an 25 Feabhra 2021, dhiúltaigh an Wojewódzki Sąd Administracyjny w Łodzi (an Chúirt Réigiúnach Riaracháin, Łódź, an Pholainn) don chaingean sin.

13      An 12 Bealtaine 2021, rinne P. achomharc ar phointe dlí i gcoinne an bhreithiúnais sin os comhair an Naczelny Sąd Administracyjny (an Chúirt Riaracháin Uachtarach, an Pholainn), eadhon an chúirt a rinne an tarchur.

14      Ar an gcéad dul síos, measann an chúirt a rinne an tarchur nach dtugann cásdlí Chúirt Bhreithiúnais an Aontais Eorpaigh atá ann cheana freagra aonchiallach ar an gceist an bhfuil Airteagal 27(1)(b) de Threoir 92/83 le léiriú sa chaoi, maidir leis an gcoinníoll díolúine a bhaineann le húsáid an táirge atá i gceist chun táirgí nach bhfuil ceaptha lena gcaitheamh ag an duine a mhonarú, nach mór an monarú sin a dheimhniú trí na táirgí sin a aicmiú faoi chód taraife seachas ceannteideal 2207 de AC, agus mar thoradh air sin gur leor mainneachtain an táirge a aicmiú faoi chód den sórt sin chun cur i bhfeidhm na díolúine dá dtagraítear san fhoráil sin a dhiúltú.

15      Ar an dara dul síos, murab amhlaidh an cás, fiafraíonn an chúirt a rinne an tarchur, go bunúsach, an bhféadfadh an diúltú táirgí nach bhfuil ceaptha, dar leis an monaróir, lena gcaitheamh ag an duine a dhíolmhú ó dhleacht mháil chomhchuibhithe a bheith ag brath ar na himthosca a bhaineann le díol na dtáirgí sin, go háirithe, ar dhícheall an mhonaróra sin le linn a ghníomhaíochtaí.

16      Sna himthosca sin, chinn an Naczelny Sąd Administracyjny (an Chúirt Uachtarach Riaracháin) bac a chur ar na himeachtaí agus na ceisteanna seo a leanas a tharchur chuig an gCúirt Bhreithiúnais le haghaidh réamhrialú:

‘1      An t‑earra máil is alcól eitile arna dhínádúrú le gliocól próipiléine, an leor é go n‑aicmítear faoi Chód AC 220720 é le diúltú d’iarratas ar an díolúine dá dtagraítear in Airteagal 27(1)(b) de Threoir [92/83]/?

2      I gcás ina dtugtar freagra diúltach ar an gcéad cheist, ar mhaithe le diúltú d’iarratas ar an díolúine, an bhfuil sé le léiriú ag na húdaráis chánach go bhfuil a fhios ag duine inchánach a mhonaraíonn earraí máil go bhfuil na hearraí sin le hithe ag daoine, nó an leor do na húdaráis dálaí a léiriú leis an tátal a bhaint nár mhór a fhios sin a bheith ag an duine inchánach?’

 Na ceisteanna a tharchuirtear le haghaidh réamhrialú

 An chéad cheist

17      Lena céad cheist, fiafraíonn an chúirt a rinne an tarchur, go bunúsach, an bhfuil Airteagal 27(1)(b) de Threoir 92/83 le léiriú sa chaoi go gcuirtear cosc leis ar an díolúine ó dhleacht mháil ar alcól eitile dínádúraithe a úsáidtear i dtáirgí nach bhfuil ceaptha lena gcaitheamh ag an duine a chur faoi réir, inter alia, gur bunaíodh úsáid bheartaithe na dtáirgí sin trína n‑aicmiú faoi cheannteideal AC seachas ceannteideal 2207.

18      Ba cheart a mheabhrú, agus foráil de dhlí an Aontais á léiriú, amhail Airteagal 27(1)(b) de Threoir 92/83, gur gá machnamh a dhéanamh ní hamháin ar fhoclaíocht na forála sin ach ar an gcomhthéacs ina bhfuil sí agus ar na cuspóirí a shaothraítear leis na rialacha ar cuid díobh í (féach breithiúnas an 17 Meitheamh 2010, British American Tobacco (Germany), C‑550/08, EU:C:2010:349, mír 35 agus an cásdlí dá dtagraítear).

19      Sa chéad áit, is léir ó fhoclaíocht Airteagal 27(1)(b) de Threoir 92/83 go mbraitheann an díolúine dá bhforáiltear san Airteagal sin ar dhá choinníoll charnacha a chomhlíonadh, eadhon, ar an gcéad dul síos, go ndéanfar an t‑alcól a dhínádúrú i gcomhréir le ceanglais Bhallstáit agus, ar an dara dul síos, go n‑úsáidfear é chun táirgí nach bhfuil ceaptha lena gcaitheamh ag an duine a mhonarú.

20      I ndáil leis sin, ní luaitear an cheist maidir le haicmiú an táirge atá i gceist faoi chód AC ar leith i bhfoclaíocht Airteagal 27(1)(b) de Threoir 92/83, agus mar thoradh air sin ní féidir a thuiscint ón bhforáil sin go raibh sé beartaithe ag reachtas an Aontais aicmiú faoi chód AC ar leith a shainiú mar chritéar ann féin chun an díolúine atá i gceist a chur i bhfeidhm.

21      Sa dara háit, maidir le comhthéacs Airteagal 27(1)(b) de Threoir 92/83, ba cheart a thabhairt faoi deara go bhfuil sé mar chuid de shraith díolúintí sainordaitheacha is infheidhme maidir le halcól agus deochanna alcólacha a bhaineann le catagóirí speisialta áirithe atá faoi réir úsáidí sonracha.

22      Chinn an Chúirt cheana féin, i ndáil leis sin, gurb í an riail díolúine na dtáirgí a chumhdaítear le hAirteagal 27(1)(a) agus 27(1)(b) de Threoir 92/83 agus gur eisceacht é an diúltú. Thairis sin, ní féidir leis an gcumhacht a thugtar do na Ballstáit le hAirteagal 27(1) de Threoir 92/83 na coinníollacha a leagan síos don díolúine sin ‘chun a áirithiú go gcuirfear na díolúintí sin i bhfeidhm i gceart agus go díreach agus chun aon imghabháil, seachaint nó mí-úsáid a chosc’ amhras a chaitheamh ar chineál neamhchoinníollach na hoibleagáide díolúine a dheonú a leagtar síos leis an bhforáil sin (féach breithiúnas an 7 Nollaig 2000, an Iodáil v an Coimisiún, C‑482/98, EU:C:2000:672, mír 50 agus an cásdlí dá dtagraítear).

23      Go sonrach, chinn an Chúirt cheana féin go mbaineann alcól eitile atá i dtáirge nach bhfuil ceaptha lena chaitheamh ag an duine agus a dínádúraíodh i gcomhréir le modh arna fhormheas i mBallstát tairbhe as an díolúine dá bhforáiltear in Airteagal 27(1)(b) de Threoir 92/83 (féach breithiúnas an 28 Feabhra 2019, Bene Factum, C‑567/17, EU:C:2019:158, mír 21 agus an cásdlí dá dtagraítear).

24      Dá bhrí sin, i gcás ina bhfuil an t‑alcól ionchorpraithe cheana féin i dtáirge nach bhfuil ceaptha lena chaitheamh ag an duine, braitheann deonú nó diúltú na díolúine faoi Airteagal 27(1)(b) de Threoir 92/83 ar an modh dínádúraithe (féach, chuige sin, breithiúnas an 7 Nollaig 2000, an Iodáil v an Coimisiún, C‑482/98, EU:C:2000:672, míreanna 40 agus 41).

25      Ar deireadh, chinn an Chúirt go raibh sé contrártha le Treoir 92/83 díolúine a dhiúltú do tháirge a chomhlíonann na coinníollacha a leagtar síos in Airteagal 27(1)(b) den Treoir sin ar an bhforas amháin gur cinneadh nach raibh a úsáid bheartaithe iarbhír ag teacht leis an ainm a thug an trádálaí dó (féach breithiúnas an 28 Feabhra 2019, Bene Factum, C‑567/17, EU:C:2019:158, mír 22 agus an cásdlí dá dtagraítear).

26      Dá bhrí sin, is léir ó chásdlí na Cúirte go gcuirtear cosc leis ar chur i bhfeidhm critéar nó coinníollacha nach bhfuil soiléir iontu féin ó fhoclaíocht Airteagal 27(1)(b) de Threoir 92/83. Seachas sin, ní mór scrúdú a dhéanamh, ar bhonn fianaise shonrach, an gcomhlíontar go hoibiachtúil an coinníoll a bhaineann le halcól eitile a úsáid chun táirgí nach bhfuil ceaptha lena gcaitheamh ag an duine a mhonarú, agus ní féidir an scrúdú sin a theorannú do chinneadh maidir le haicmiú faoi chód AC ar leith.

27      Thairis sin, tacaítear le léiriú den sórt sin freisin le foclaíocht na chéad fhleisce d’Airteagal 20 de Threoir 92/83. Foráiltear leis an Airteagal sin, lena sainmhínítear an coincheap ‘alcól eitile’ chun críocha chur i bhfeidhm Threoir 92/83, go gcumhdaítear leis an gcoincheap sin, inter alia, gach táirge a thagann faoi cheannteideal 2207 de AC a bhfuil neart alcóil níos mó ná 1.2 % de réir toirte acu, ‘fiú i gcás ina bhfuil na táirgí sin mar chuid de tháirge a thagann faoi chaibidil eile de AC’. Cé nach gcuirtear cosc leis an bhfíoras go bhfuil alcól eitile ionchorpraithe i dtáirge a thagann faoi chaibidil eile de AC ar é a aicmiú mar alcól eitile de réir bhrí na chéad fhleisce d’Airteagal 20 de Threoir 92/83, ní chiallaíonn sé sin, áfach, gur coinníoll é aicmiú an táirge sin i gcaibidil eile de AC i ndáil leis sin. Dá bhrí sin, mar is léir ón bhfoclaíocht, ní chuirtear bac leis an gcéad fhleasc d’Airteagal 20 de Threoir 92/83 ar an bhféidearthacht, chun críocha chur i bhfeidhm na Treorach sin, go bhféadfar alcól eitile a ionchorprú i dtáirge a aicmítear sa chaibidil chéanna de AC, nó fiú sa cheannteideal céanna de AC, eadhon ceannteideal 2207.

28      Ina theannta sin, tacaítear leis an léiriú sin le scéim Airteagal 27(1) de Threoir 92/83. Foráiltear le hAirteagal 27(1)(c) de Threoir 92/83 do dhíolúine alcóil eitile a úsáidtear ‘chun fínéagar a tháirgeadh a thagann faoi chód AC 2209’. Dá mba mhian leis an reachtóir coinníoll a chur isteach, maidir le díolúine táirgí arna ndínádúrú i gcomhréir le ceanglais Ballstáit agus a úsáidtear chun táirgí nach bhfuil ceaptha lena gcaitheamh ag an duine a mhonarú, ar coinníoll é a bhaineann le cód taraife ar leith a eisiamh, dhéanfadh sé amhlaidh go sainráite in Airteagal 27(1)(b) den Treoir sin.

29      Sa tríú háit, maidir leis na cuspóirí a shaothraítear le Treoir 92/83, is é is aidhm do na díolúintí dá bhforáiltear leis an Treoir sin, inter alia, tionchar na ndleachtanna máil ar alcól mar tháirge idirmheánach a úsáidtear i monarú táirgí tráchtála nó tionsclaíocha eile a neodrú (féach breithiúnas an 22 Nollaig 2022, Quadrant Amroq Beverages, C‑332/21, EU:C:2022:1031, mír 47 agus an cásdlí dá dtagraítear).

30      Dá bhrí sin, leanann sé ó Airteagal 27(1)(b) de Threoir 92/83, arna léamh i gcomhar leis an bhfichiú haithris sa bhrollach a ghabhann léi, go mbraitheann cur i bhfeidhm na díolúine dá bhforáiltear san fhoráil sin ag Ballstát ar úsáid deiridh na dtáirgí lena mbaineann (féach, de réir analaí, breithiúnas an 9 Nollaig 2010, Repertoire Culinaire, C‑163/09, EU:C:2010:752, mír 49).

31      Mar sin, an léiriú gur cheart cur i bhfeidhm na díolúine dá dtagraítear in Airteagal 27(1)(b) de Threoir 92/83 maidir le halcól eitile arna dhínádúrú i gcomhréir le ceanglais Bhallstáit agus a úsáidtear chun táirgí nach bhfuil ceaptha lena gcaitheamh ag an duine a mhonarú a dhiúltú ar an bhforas amháin go bhféadfadh na táirgí ar úsáideadh é lena monarú teacht faoi chód AC ar leith an bonn a bhaint den chuspóir tionchar na ndleachtanna máil ar alcól eitile mar tháirge idirmheánach a úsáidtear i gcomhdhéanamh táirgí tráchtála nó tionsclaíocha eile a neodrú. A mhéid a dhíoltar táirgí nach bhfuil ceaptha lena gcaitheamh ag an duine le daoine lena n‑úsáid chun críocha seachas lena gcaitheamh ag an duine, beidh alcól eitile arna dhínádúrú i gcomhréir le ceanglais Bhallstáit agus a úsáidtear i gcomhdhéanamh na dtáirgí sin faoi réir dleacht mháil, cé go n‑úsáidtear iarbhír é chun na gcríoch sin.

32      Ina theannta sin, cé gur fíor, faoi Airteagal 27(1) de Threoir 92/83, arna léamh i gcomhar le haithris 22 den bhrollach a ghabhann leis an Treoir sin, go bhféadfaidh na Ballstáit coinníollacha a leagan síos chun cur i bhfeidhm ceart agus díreach na ndíolúintí dá bhforáiltear san fhoráil sin a áirithiú agus chun aon imghabháil, seachaint nó mí-úsáid a chosc, is léir ón gcásdlí gur faoi na Ballstáit lena mbaineann atá sé, agus an rogha sin á feidhmiú acu, fianaise shonrach, oibiachtúil agus infhíoraithe a thabhairt ar aird maidir le riosca tromchúiseach imghabhála, seachanta nó mí-úsáide agus a áirithiú nach dtéann na coinníollacha a leagann siad síos faoin rogha sin thar a bhfuil riachtanach chun an cuspóir sin a bhaint amach (féach, chuige sin, breithiúnas an 9 Nollaig 2010, Repertoire Culinaire, C‑163/09, EU:C:2010:752, mír 52 agus an cásdlí dá dtagraítear). Dá bhrí sin, ní fhéadfaidh na Ballstáit cur i bhfeidhm na díolúine dá bhforáiltear le hAirteagal 27(1)(b) de Threoir 92/83 a chur faoi réir coinníollacha a chomhlíonadh nach suitear, ar bhonn fianaise nithiúil, oibiachtúil agus infhíoraithe, go bhfuil gá leo chun cur i bhfeidhm ceart agus díreach na díolúine sin a áirithiú agus chun imghabháil, seachaint nó mí-úsáid a chosc (féach, de réir analaí, breithiúnas an 9 Nollaig 2010, Repertoire Culinaire, C‑163/09, EU:C:2010:752, mír 53).

33      Dealraíonn sé ón bhfaisnéis a chuir an chúirt a rinne an tarchur ar fáil nach bhfuil gá leis an gcoinníoll a leag na húdaráis chánach náisiúnta atá i gceist sna príomhimeachtaí síos, eadhon deimhniú ar úsáid bheartaithe an táirge nach bhfuil ceaptha lena chaitheamh ag an duine trína aicmiú faoi chód seachas ceannteideal 2207 de AC, chun cur i bhfeidhm ceart na díolúine dá bhforáiltear le hAirteagal 27(1)(b) de Threoir 92/83 a áirithiú ná chun imghabháil, seachaint nó mí-úsáid a chosc, ar faoin gcúirt a rinne an tarchur atá sé a fhíorú, áfach, ar bhonn na fianaise sonraí, oibiachtúla agus infhíoraithe atá ar fáil di.

34      I bhfianaise na mbreithnithe go léir roimhe seo, is é an freagra ar an gcéad cheist go bhfuil Airteagal 27(1)(b) de Threoir 92/83 le léiriú sa chaoi go gcuirtear cosc leis ar dhíolúine ó dhleacht mháil i leith alcóil eitile a dínádúraíodh i gcomhréir le ceanglais Bhallstáit agus atá ina chomhábhar de tháirgí nach bhfuil ceaptha lena gcaitheamh ag an duine a bheith faoi réir an choinníll go gcruthófaí úsáid bheartaithe na dtáirgí sin trína n‑aicmiú faoi cheannteideal AC, seachas ceannteideal 2207, mura léir ó ghnéithe nithiúla, oibiachtúla agus infhíoraithe go bhfuil an coinníoll sin riachtanach chun cur i bhfeidhm ceart na díolúine sin a áirithiú agus chun imghabháil, seachaint nó mí-úsáid a chosc.

 An dara ceist

35      Lena dara ceist, nach n‑ardaítear ach amháin i gcás ina dtugtar freagra diúltach ar an gcéad cheist, fiafraíonn an chúirt a rinne an tarchur, go bunúsach, an gá do na húdaráis chánach a léiriú, chun tairbhe na díolúine faoi Airteagal 27(1)(b) de Threoir 92/83 a dhiúltú, go raibh a fhios ag an duine inchánach a mhonaraíonn táirgí nach bhfuil ceaptha lena gcaitheamh ag an duine ina bhfuil alcól eitile atá faoi réir dleacht mháil gur úsáideadh iad lena gcaitheamh ag an duine, nó an leor dóibh a shuíomh go bhfuil fianaise ann óna bhféadfaí teacht ar an gconclúid gur cheart go mbeadh a fhios aige faoin úsáid sin.

36      Mar a cuireadh an cheist os a comhair, ní bhaineann sí ach leis an imthoisc shonrach ina bhfuil a fhios ag an duine inchánach a mhonaraíonn na táirgí lena mbaineann, nó ina bhféadfadh sé go raibh a fhios aige, faoi úsáid fhéideartha ina dhiaidh sin na dtáirgí sin atá ar neamhréir lena n‑úsáid bheartaithe tosaigh. Os a choinne sin, ní luaitear inti imthosca a bhaineann le cásanna imghabhála, seachanta nó mí-úsáide a d’fhéadfadh údar a thabhairt le hAirteagal 27(5) de Threoir 92/83/CEE a chur i bhfeidhm. Dá bhrí sin, tá an cheist sin bunaithe ar an toimhde gur cúis leordhóthanach ann féin é go bhfuil a fhios ag an duine inchánach a mhonaraíonn na táirgí lena mbaineann, nó go bhféadfadh go bhfuil a fhios aige, faoi úsáid fhéideartha ina dhiaidh sin ar na táirgí sin nach gcomhlíonann a gcuspóir tosaigh, chun tairbhe na díolúine dá bhforáiltear in Airteagal 27(1)(b) de Threoir 92/83/CEE a dhiúltú.

37      I ndáil leis sin, ba cheart a mheabhrú, mar is léir ó mhír 23 den bhreithiúnas seo, go mbaineann alcól eitile atá i dtáirge nach bhfuil ceaptha lena chaitheamh ag an duine agus atá dínádúraithe i gcomhréir le modh arna fhormheas i mBallstát tairbhe as an díolúine dá bhforáiltear le hAirteagal 27(1)(b) de Threoir 92/83 (féach breithiúnas an 28 Feabhra 2019, Bene Factum, C‑567/17, EU:C:2019:158, mír 21 agus an cásdlí dá dtagraítear).

38      Is léir freisin ó mhír 25 den bhreithiúnas seo go bhfuil sé contrártha do Threoir 92/83 diúltú díolúine a thabhairt do tháirge a chomhlíonann na coinníollacha a leagtar síos in Airteagal 27(1)(b) den Treoir sin ar an bhforas amháin nach bhfreagraíonn an úsáid iarbhír atá beartaithe dó don ainm a thug an trádálaí dó (féach breithiúnas an 28 Feabhra 2019, Bene Factum, C‑567/17, EU:C:2019:158, mír 22 agus an cásdlí dá dtagraítear).

39      Leanann sé ón méid sin roimhe seo nach féidir an díolúine ón dleacht mháil chomhchuibhithe dá bhforáiltear le hAirteagal 27(1)(b) de Threoir 92/83 a bhaint d’alcól eitile dínádúraithe i gcomhréir le ceanglais Bhallstáit, atá i dtáirgí a chuirtear i láthair mar chaolaitheoirí agus, dá bhrí sin, mar tháirgí nach bhfuil ceaptha lena gcaitheamh ag an duine, ar an bhforas go n‑úsáidtear na táirgí sin, go páirteach ar a laghad, lena gcaitheamh ag an duine (féach, chuige sin, breithiúnas an 28 Feabhra 2019, Bene Factum, C‑567/17, EU:C:2019:158, mír 23).

40      Sa chás seo, cé go sonraíonn an chúirt a rinne an tarchur, go bunúsach, de bharr gur léirigh P. easpa díchill agus na táirgí a mhonaraigh sé á ndíol aige go bhféadfadh sé go mbeadh na táirgí sin á gcaitheamh ag an duine, is léir freisin ón iarraidh ar réamhrialú gur díoladh na táirgí sin, arna ndíol ag P. faoi na hainmneacha ‘RRK 5’ agus ‘RRK 12’, mar chaolaitheoirí. Ina theannta sin, faoi réir fíorú ag an gcúirt a rinne an tarchur, ní cosúil go bhfuil aon léiriú ann nach raibh a fhios ag na daoine a cheannaigh iad, más ábhartha, lena gcaitheamh ag an duine go raibh táirgí a margaíodh mar chaolaitheoirí á gceannach acu.

41      Dá bhrí sin, ní cosúil gur chuir na bearta a rinne P. i ndáil le margú na dtáirgí atá i gceist sna príomhimeachtaí cosc orthu a bheith á gcur i láthair mar chaolaitheoirí nach bhfuil ceaptha lena gcaitheamh ag an duine, rud atá le fíorú ag an gcúirt a rinne an tarchur.

42      Faoi réir cásanna imghabhála, seachanta nó mí-úsáide lena dtugtar údar le cur i bhfeidhm Airteagal 27(5) de Threoir 92/83, ní féidir le haon bheart a dhéanann monaróir na dtáirgí atá i gceist maidir lena margú, fad nach gcuireann siad cosc ar a gcur i láthair mar tháirgí nach bhfuil ceaptha lena gcaitheamh ag an duine, tairbhe na díolúine dá bhforáiltear i mír 1(b) den Airteagal sin a bhaint den mhonaróir sin (féach, chuige sin, breithiúnas an 28 Feabhra 2019, Bene Factum, C‑567/17, EU:C:2019:158, mír 30). Go deimhin, is iad na forálacha a bhaineann le cásanna imghabhála, seachanta nó mí-úsáide a fhágann gur féidir aghaidh a thabhairt ar chásanna ina bhfuil úsáid bheartaithe iarbhír na dtáirgí atá i gceist éagsúil leis an úsáid a beartaíodh dóibh.

43      Dá bhrí sin, tá Airteagal 27(1)(b) de Threoir 92/83 le léiriú sa chaoi nach féidir tairbhe na díolúine ón dleacht mháil chomhchuibhithe dá bhforáiltear ann a dhiúltú do dhuine inchánach a mhonaraíonn táirgí nach bhfuil ceaptha lena gcaitheamh ag an duine agus ina bhfuil alcól eitile faoi réir dleacht mháil, amhail caolaitheoirí, ar an bhforas amháin go raibh a fhios ag an duine inchánach sin, nó gur cheart go mbeadh a fhios aige, go raibh na táirgí sin á n‑úsáid lena gcaitheamh ag an duine.

 Costais

44      Ós rud é, a mhéid a bhaineann sé leis na páirtithe sna príomhimeachtaí, go bhfuil na himeachtaí mar chéim sa chás os comhair na cúirte a rinne an tarchur, baineann ceist na gcostas leis an gcúirt sin. Níl na costais a tabhaíodh trí bharúlacha a chur faoi bhráid na Cúirte, seachas costais na bpáirtithe sin, inghnóthaithe.

Ar na forais sin,

rialaíonn AN CHÚIRT GHINEARÁLTA (an Cúigiú Dlísheomra ina bhfuil cúigear Breithiúna ina suí)

mar seo a leanas:

1.      Maidir le hAirteagal 27(1)(b) de Threoir 92/83/CEE ón gComhairle an 19 Deireadh Fómhair 1992 maidir le struchtúir dleachtanna máil ar alcól agus deochanna alcólacha a chomhchuibhiú,

ní mór léiriú a dhéanamh air mar seo a leanas:

cuirtear cosc leis ar dhíolúine ó dhleacht mháil i leith alcóil eitile a dínádúraíodh i gcomhréir le ceanglais Bhallstáit agus atá ina chomhábhar de tháirgí nach bhfuil ceaptha lena gcaitheamh ag an duine a bheith faoi réir an choinníll go gcruthófaí úsáid bheartaithe na dtáirgí sin trína n‑aicmiú faoi cheannteideal den Ainmníocht Chomhcheangailte atá in Iarscríbhinn I a ghabhann le Rialachán (CEE) Uimh. 2658/87 ón gComhairle an 23 Iúil 1987 maidir leis an ainmníocht taraife agus staidrimh agus leis an gComhtharaif Chustaim, seachas ceannteideal 2207, mura léir ó ghnéithe nithiúla, oibiachtúla agus infhíoraithe go bhfuil an coinníoll sin riachtanach chun cur i bhfeidhm ceart na díolúine sin a áirithiú agus chun imghabháil, seachaint nó mí-úsáid a chosc.

2.      Maidir le hAirteagal 27(1)(b) de Threoir 92/83

ní mór léiriú a dhéanamh air mar seo a leanas:

ní féidir tairbhe na díolúine ón dleacht mháil chomhchuibhithe dá bhforáiltear ann a dhiúltú do dhuine inchánach a mhonaraíonn táirgí nach bhfuil ceaptha lena gcaitheamh ag an duine agus ina bhfuil alcól eitile faoi réir dleacht mháil, amhail caolaitheoirí, ar an bhforas amháin go raibh a fhios ag an duine inchánach sin, nó gur go mbeadh a fhios aige, go raibh na táirgí sin á n‑úsáid lena gcaitheamh ag an duine.

Sampol Pucurull

Pynnä

Laitenberger

Stancu

 

      Valasidis

Arna thabhairt i gcúirt oscailte i Lucsamburg, an 8 Iúil 2026.

Sínithe


*      Teanga an cháis: an Pholainnis.