(1)

Tá sé leagtha amach mar chuspóir dó féin ag an Aontas limistéar saoirse, slándála agus ceartais a chothabháil agus a fhorbairt.

(2)

Le Clár na Háige: saoirse, slándáil agus ceartas a neartú san Eoraip (3), ceanglaítear ar na Ballstáit féidearthachtaí a mheas chun an t-ionchúiseamh ar chásanna iltaobhacha trasteorann a chomhchruinniú i mBallstát amháin, d’fhonn éifeachtúlacht na n-ionchúiseamh a mhéadú agus riar cuí an cheartais á ráthú an tráth céanna.

(3)

Leis an gClár beart chun prionsabal an aitheantais fhrithpháirtigh do chinntí in ábhair choiriúla a chur chun feidhme (4), éilítear ionstraim lena bhféadfar imeachtaí coiriúla a aistriú chuig Ballstáit eile.

(4)

Tá gá le tuilleadh forbartha a dhéanamh ar an gcomhar breithiúnach idir na Ballstáit chun riar éifeachtúil cuí an cheartais choiriúil a fheabhsú laistigh den limistéar coiteann saoirse, slándála agus ceartais agus chun a áirithiú go ndéanfaidh an Ballstát is oiriúnaí cion coiriúil a imscrúdú nó a ionchúiseamh. Go háirithe, d’fhéadfadh rialacha coiteanna do na Ballstáit maidir leis an aistriú imeachtaí coiriúla cuidiú le cosc a chur ar imeachtaí coiriúla comhthreomhara neamhriachtanacha i mBallstáit éagsúla i ndáil leis na fíorais chéanna agus maidir leis an duine céanna, rud a bhféadfadh sárú ar an bprionsabal ne bis in idem a bheith mar thoradh air. Leis na rialacha coiteanna sin, d’fhéadfadh laghdú teacht freisin ar líon na n-imeachtaí coiriúla éagsúla i leith na bhfíoras céanna nó i leith an duine chéanna a dhéantar i mBallstáit éagsúla. Chomh maith leis sin, tá sé de chuspóir ag na rialacha sin a áirithiú gur féidir imeachtaí coiriúla a aistriú má chuirtear moill ar thabhairt suas duine le haghaidh ionchúiseamh coiriúil faoi bharántas gabhála Eorpach, de bhun Chinneadh Réime 2002/584/CGB ón gComhairle (5) nó má dhiúltaítear í ar chúiseanna áirithe, mar shampla, imeachtaí coiriúla comhthreomhara leanúnacha a bheith ar siúl i mBallstát eile i ngeall ar an gcion coiriúil céanna, chun nach mbeadh an duine atá á ionchúiseamh nó á hionchúiseamh saor ó phionós.

(5)

Tá rialacha coiteanna maidir leis an aistriú imeachtaí coiriúla fíor-riachtanach freisin chun an choireacht trasteorann a chomhrac go héifeachtúil, rud atá tábhachtach go háirithe maidir le coireanna a dhéanann grúpaí coiriúla eagraithe, mar shampla gáinneáil ar dhrugaí, smuigleáil imirceach, gáinneáil ar dhaoine, gáinneáil ar airm, coireacht chomhshaoil, cibearchoireacht nó sciúradh airgid. Is féidir le hionchúiseamh a dhéantar ar ghrúpaí coiriúla eagraithe atá gníomhach i mBallstáit éagsúla deacrachtaí móra a chruthú do na húdaráis lena mbaineann. Is uirlis thábhachtach é aistriú imeachtaí coiriúla, lena bhféadfaí an comhrac in aghaidh grúpaí coiriúla eagraithe atá gníomhach ar fud an Aontais a neartú.

(6)

Chun an comhar éifeachtach idir na húdaráis iarrthacha agus na húdaráis iarrtha a áirithiú i ndáil leis an aistriú imeachtaí coiriúla, ba cheart na rialacha maidir leis na haistrithe sin a bhunú trí ghníomh de chuid an Aontais atá ceangailteach ó thaobh dlí de agus atá infheidhme go díreach.

(7)

Ba cheart feidhm a bheith ag an Rialachán seo maidir le gach iarraidh ar aistriú arna eisiúint faoi chuimsiú imeachtaí coiriúla.

(8)

Is é is cuspóir do Chinneadh Réime 2009/948/CGB (6) ón gComhairle cásanna ina bhfuil an duine céanna faoi réir imeachtaí coiriúla comhthreomhara i mBallstáit éagsúla i leith na bhfíoras céanna a chosc, rud a bhféadfadh réiteach críochnaitheach na n-imeachtaí sin in dhá Bhallstát nó níos mó a bheith mar thoradh air. Dá bhrí sin, bunaítear leis an gCinneadh Réime sin nós imeachta maidir le comhairliúcháin dhíreacha idir údaráis inniúla na mBallstát lena mbaineann agus é d’aidhm acu comhdhearcadh a bhaint amach maidir le haon réiteach éifeachtach atá dírithe ar iarmhairtí díobhálacha a eascraíonn as imeachtaí comhthreomhara den sórt sin a sheachaint chomh maith le haon am agus acmhainní de chuid na n-údarás inniúil sin a chur amú. I gcás ina gcinneann na húdaráis inniúla sin, tar éis comhairliúcháin i gcomhréir leis an gCinneadh Réime sin, imeachtaí a chomhchruinniú i mBallstát amháin trí na himeachtaí coiriúla a aistriú, ba cheart an t-aistriú sin a dhéanamh i gcomhréir leis an Rialachán seo.

(9)

Áirítear i ngníomhartha dlí eile sa réimse maidir le hábhair choiriúla, go háirithe na cinn a bhaineann le cineálacha sonracha coireachta, mar shampla Treoir (AE) 2017/541 ó Pharlaimint na hEorpa agus ón gComhairle (7) agus Cinntí Réime 2002/475/CGB (8) agus 2008/841/CGB (9) ón gComhairle, forálacha ina dtagraítear do na tosca atá le cur san áireamh d’fhonn imeachtaí coiriúla a lárú i mBallstát amháin i gcás inar féidir le níos mó ná Ballstát amháin ionchúiseamh bailí a dhéanamh ar bhonn na bhfíoras céanna. I gcás ina gcinneann údaráis inniúla na mBallstát lena mbaineann, tar éis comhair i gcomhréir leis na gníomhartha dlí sin, chun imeachtaí coiriúla a lárú i mBallstát amháin tríd an aistriú imeachtaí coiriúla, ba cheart an t-aistriú sin a dhéanamh i gcomhréir leis an Rialachán seo.

(10)

Glacadh roinnt gníomhartha dlí de chuid an Aontais maidir le cur i bhfeidhm phrionsabal an aitheantais fhrithpháirtigh ar chinntí breithiúnacha agus ar bhreithiúnais in ábhair choiriúla, go háirithe Cinntí Réime 2005/214/CGB (10), 2008/909/CGB (11) agus 2008/947/CGB (12) ón gComhairle. Forlíontar leis an Rialachán seo na Cinntí Réime sin agus ní dhéanann sé difear dá gcur i bhfeidhm.

(11)

Ní dhéanann an Rialachán seo difear do mhalartuithe faisnéise gan choinne a rialaítear le gníomhartha dlí eile de chuid an Aontais.

(12)

Níl feidhm ag an Rialachán seo maidir le cinntí cásanna a ath-leithdháileadh, a chumasc nó a roinnt ar cásanna iad inar fheidhmigh Oifig an Ionchúisitheora Phoiblí Eorpaigh a hinniúlacht ina leith i gcomhréir le Rialachán (AE) 2017/1939 ón gComhairle (13).

(13)

Chun críocha an Rialacháin seo, ba cheart do na Ballstáit a n-údaráis inniúla a ainmniú ar bhealach ina gcuirtear prionsabal na teagmhála dírí idir na húdaráis sin chun cinn.

(14)

Chun críocha an Rialacháin seo agus ar mhaithe lena chur i bhfeidhm éifeachtach a éascú ar fud an Aontais, i gcás nach gceadaítear le struchtúr chórais dlí inmheánacha na mBallstát atá bunaithe ar an dlí coiteann dá gcúirteanna ná dá n-ionchúisitheoirí bearta a dhéanamh atá coimhdeach leis an gcinneadh glacadh le haistriú imeachtaí coiriúla nó diúltú dó, ba cheart údarás eile, a bhfuil inniúlacht aige bearta a dhéanamh in imeachtaí coiriúla, a bheith in ann na bearta coimhdeacha sin a dhéanamh. Le rannpháirtíocht an údaráis inniúil sin, níor cheart dochar ar bhealach ar bith a dhéanamh don chinneadh, a bheidh le déanamh go heisiach ag breitheamh, cúirt, breitheamh imscrúdaithe nó ionchúisitheoir poiblí, cé acu glacadh le haistriú imeachtaí coiriúla nó diúltú dó, agus ba cheart a mheasúnú ar na forais atá leis an diúltú faoin Rialachán seo a bheith san áireamh sa chinneadh sin, de réir riachtanas. Is chun an chinnteoireacht bhreithiúnach sin agus cur i bhfeidhm éifeachtach an Rialacháin seo a éascú, agus chuige sin amháin, atá rannpháirtíocht aon údaráis inniúil eile beartaithe.

(15)

I gcás inar gá mar gheall ar struchtúr a gcóras dlí inmheánach, ba cheart na Ballstáit a bheith in ann údarás lárnach amháin nó níos mó a ainmniú le haghaidh tarchur agus glacadh riaracháin iarrataí ar an aistriú imeachtaí coiriúla, chomh maith le comhfhreagras oifigiúil eile a bhaineann leis na hiarrataí. D’fhéadfadh na húdaráis lárnacha sin tacaíocht riaracháin a sholáthar freisin agus d’fhéadfadh siad róil maidir le comhordú agus cúnamh a bheith acu, agus ar an gcaoi sin glacadh le hiarrataí ar an aistriú imeachtaí coiriúla a éascú agus a chur chun cinn.

(16)

Ceanglaítear le roinnt gníomhartha dlí de chuid an Aontais cheana féin ar na Ballstáit na bearta is gá a dhéanamh chun dlínse a bhunú maidir le cionta coiriúla sonracha, mar shampla na cionta sin a bhaineann le gníomhaíochtaí sceimhlitheoireachta de bhun Threoir (AE) 2017/541 nó le góchumadh an euro de bhun Threoir 2014/62/AE ó Pharlaimint na hEorpa agus ón gComhairle (14) i gcásanna ina ndiúltaítear duine a thabhairt suas.

(17)

Chun a áirithiú gur féidir imeachtaí coiriúla a aistriú i gcomhréir leis an Rialachán seo, i gcás ina gceanglaítear amhlaidh ar mhaithe le riar éifeachtúil cuí an cheartais agus le cearta bunúsacha na ndaoine atá faoi dhrochamhras nó atá cúisithe, chomh maith le cearta bunúsacha na n-íospartach, a chosaint go héifeachtach, mar a leagtar amach i ndlí an Aontais, leis an Rialachán seo, ba cheart foráil a dhéanamh do dhlínse i gcásanna sonracha, chun a áirithiú gur féidir leis an Stát iarrtha dlínse a fheidhmiú i dtaca leis na cionta coiriúla a bhfuil dlí náisiúnta an Stáit iarrthaigh infheidhme maidir leo. Ba cheart dlínse a bheith ag an Stát iarrtha maidir leis na cionta coiriúla dá n-iarrtar an t-aistriú imeachtaí coiriúla, tráth ar bith a mheastar gurb é sin an Ballstát is fearr chun ionchúiseamh a dhéanamh ar an gcion coiriúil atá i gceist. Leis na rialacha maidir le dlínse dá bhforáiltear sa Rialachán seo, níor cheart cosc a chur ar na Ballstáit bearta náisiúnta a ghlacadh chun a áirithiú go bhfuil siad in ann dlínse a fheidhmiú sna cásanna sonracha dá bhforáiltear sa Rialachán seo.

(18)

I dteannta na dlínse dá bhforáiltear cheana le dlí náisiúnta an Stáit iarrtha, ba cheart dlínse a bhunú ar bhonn na bhforas sonrach a leagtar amach sa Rialachán seo i gcás ina meastar gurb é an Ballstát sin an Ballstát is fearr chun ionchúiseamh a dhéanamh. Ba cheart dlínse a bheith ag an Stát iarrtha i gcásanna ina ndiúltaíonn an Stát iarrtha duine atá faoi dhrochamhras nó duine atá cúisithe ar eisíodh barántas gabhála Eorpach ina leith agus atá i láthair sa Stát iarrtha agus ar náisiúnach nó cónaitheoir de chuid an Stáit sin é nó í a thabhairt suas, i gcás ina bhfuil an diúltú sin bunaithe ar na forais shonracha a leagtar amach sa Rialachán seo. Mar shampla, ba cheart dlínse a bhunú i gcás ina ndiúltaítear don tabhairt suas ar bhonn Airteagal 4, pointe (7)(b), de Chinneadh Réime 2002/584/CGB, a bhfuil feidhm aige i gcásanna ina ndearnadh cionta lasmuigh de chríoch an Bhallstáit eisiúna agus nach gceadaítear le dlí an Bhallstáit fhorghníomhaithigh ionchúiseamh i leith na gcionta céanna nuair a dhéantar lasmuigh dá chríoch iad. D’fhéadfaí an riail sin a chur i bhfeidhm i gcásanna ina ndéanann náisiúnaigh de chuid Ballstát eile nó náisiúnaigh tríú tír cion ar chríoch Ballstáit eile nó ar chríoch tríú tír, agus i gcásanna inar cónaitheoir de chuid an Stáit iarrtha é nó í an duine atá faoi dhrochamhras nó atá cúisithe sa Stát iarrtha. Tá tábhacht ar leith ag baint leis sin maidir le coireanna tromchúiseacha a sháraíonn luachanna bunúsacha an chomhphobail idirnáisiúnta, ar nós coireanna cogaidh nó cinedhíothú, i gcás ina bhféadfadh baol a bheith ann go mbeadh saoirse ó phionós ann toisc barántas gabhála Eorpach a bheith diúltaithe ar bhonn Airteagal 4, pointe (7)(b), de Chinneadh Réime 2002/584/CGB. Ba cheart dlínse a bheith ag an Stát iarrtha freisin i gcás ina dtarlaíonn éifeachtaí an chiona choiriúil nó an damáiste a bhaineann leis go príomha sa Stát iarrtha. Ba cheart damáiste a chur san áireamh ar choinníoll gur ceann d’eilimintí an chiona choiriúil é, i gcomhréir leis an dlí náisiúnta sa Stát iarrtha. Ba cheart dlínse a bheith ag an Stát iarrtha freisin i gcás ina bhfuil imeachtaí coiriúla ar siúl cheana féin sa Stát sin in aghaidh an duine atá faoi dhrochamhras nó atá cúisithe i leith fíorais eile ionas go bhféadfaí breithiúnas a dhéanamh ar iompar coiriúil líomhnaithe an duine sin in aon dlínse amháin, nó i gcás ina bhfuil imeachtaí coiriúla ar siúl sa Stát sin in aghaidh daoine eile i leith na bhfíoras céanna, fíorais atá mar an gcéanna go páirteach nó fíorais ghaolmhara, a d’fhéadfadh a bheith ábhartha go háirithe chun an t-imscrúdú agus an t-ionchúiseamh ar eagraíocht choiriúil a chomhchruinniú in aon Bhallstát amháin. Sa dá chás, ba cheart an duine atá faoi dhrochamhras nó atá cúisithe sna himeachtaí coiriúla atá á n-aistriú a bheith ina náisiúnach nó ina chónaitheoir nó ina cónaitheoir de chuid an Stáit iarrtha sa Stát iarrtha.

(19)

Chun aidhm an Rialacháin seo a chomhlíonadh agus chun coinbhleachtaí dlínse a chosc, ag féachaint go sonrach do na Ballstáit a bhfuil a gcórais dlí bunaithe ar ionchúiseamh éigeantach agus dóibh siúd nach bhfuil ionchúiseamh éigeantach iontu ach i leith cionta coiriúla áirithe, ba cheart Stát iarrthach a bheith in ann, agus iarraidh á déanamh aige ar an aistriú imeachtaí coiriúla, na himeachtaí a tharscaoileadh i leith ionchúiseamh an duine lena mbaineann as an gcion coiriúil dá bhfuil an t-aistriú á lorg. Leis an Rialachán seo, dá bhrí sin, ba cheart a cheadú d’údaráis inniúla an Stáit iarrthaigh na himeachtaí coiriúla a thabharfar os a gcomhair a tharscaoileadh, a chur ar fionraí nó a scor i bhfabhar an Bhallstáit a mheastar a bheith i staid níos fearr chun ionchúiseamh a dhéanamh, i gcomhréir leis an dlí náisiúnta, fiú i gcás ina mbeadh dualgas ar na húdaráis sin ionchúiseamh a dhéanamh. Ba cheart an méid sin a bheith gan dochar do na forálacha ar éifeachtaí an aistrithe imeachtaí coiriúla sa Stát iarrthach a leagtar síos sa Rialachán seo.

(20)

Leis an Rialachán seo, urramaítear na cearta bunúsacha mar aon leis na prionsabail a aithnítear i gCairt um Chearta Bunúsacha an Aontais Eorpaigh (an ‘Chairt’) agus sa Choinbhinsiún Eorpach chun Cearta an Duine agus Saoirsí Bunúsacha a Chosaint.

(21)

Ní dhéanann an Rialachán seo difear do chearta nós imeachta mar a leagtar amach iad sa Chairt ná i ngníomhartha eile dlí de chuid an Aontais, mar shampla Treoracha 2010/64/AE (15), 2012/13/AE (16), 2013/48/AE (17), (AE) 2016/343 (18), (AE) 2016/800 (19) agus (AE) 2016/1919 (20) ó Pharlaimint na hEorpa agus ón gComhairle i dtaca leis na Ballstáit sin atá faoi cheangal acu. Go háirithe, ba cheart don údarás iarrthach a áirithiú go n-urramófar na cearta sin, dá bhforáiltear faoi dhlí an Aontais agus faoin dlí náisiúnta, agus aistriú imeachtaí coiriúla á iarraidh faoin Rialachán seo.

(22)

Ba cheart do na Ballstáit, le linn dóibh an Rialachán seo a chur chun feidhme, a áirithiú go gcuirtear riachtanais daoine leochaileacha san áireamh. I gcomhréir leis an Moladh ón gCoimisiún an 27 Samhain 2013 maidir le coimircí nós imeachta do dhaoine leochaileacha atá faoi dhrochamhras nó atá cúisithe in imeachtaí coiriúla (21), ba cheart a thuiscint go gciallaíonn daoine leochaileacha atá faoi dhrochamhras nó atá cúisithe na daoine uile atá faoi dhrochamhras nó atá cúisithe nach bhfuil in ann imeachtaí coiriúla a thuiscint nó a bheith rannpháirteach go héifeachtach iontu mar gheall ar a n-aois, a mbail coirp nó meabhrach nó aon mhíchumas atá orthu.

(23)

Ar an gcaoi chéanna, ba cheart do na Ballstáit, agus an Rialachán seo á chur chun feidhme acu, a áirithiú go gcuirtear san áireamh cearta nós imeachta daoine atá faoi dhrochamhras agus atá cúisithe agus atá faoi réir coinneáil réamhthrialach, agus Moladh (AE) 2023/681 ón gCoimisiún (22) á chur san áireamh, i gcás inarb iomchuí.

(24)

Ba cheart an t-údarás iarrthach a bheith in ann a iarraidh go n-aistreofaí imeachtaí coiriúla ar a thionscnamh féin, tar éis dul i gcomhairle leis an údarás iarrtha nó gan dul i gcomhairle leis, ar thogra ó dhuine atá faoi dhrochamhras nó atá cúisithe, nó ar thogra ó íospartach. Leis an Rialachán seo, níor cheart aon oibleagáid a fhorchur an t-aistriú imeachtaí coiriúla a iarraidh nó imeachtaí coiriúla a aistriú. Agus breithniú á dhéanamh aige ar cibé acu ba cheart nó nár cheart iarraidh ar an aistriú imeachtaí coiriúla a eisiúint, ba cheart don údarás iarrthach measúnú a dhéanamh ar cibé acu an bhfónfadh an t-aistriú sin don chuspóir maidir le riar éifeachtúil cuí an cheartais, lena n-áirítear cibé acu atá nó nach bhfuil sé comhréireach agus iomchuí chun críoch na n-imeachtaí lena mbaineann. Ba cheart an measúnú sin a dhéanamh ar bhonn cás ar chás chun go sainaithneofar an Ballstát is fearr chun an cion coiriúil atá i gceist a ionchúiseamh.

(25)

Agus measúnú á dhéanamh ar cé acu atá nó nach bhfuil údar le hiarraidh ar an aistriú imeachtaí coiriúla, ba cheart don údarás iarrthach aird a thabhairt ar roinnt critéar, áit ar cheart tosaíocht agus ualú na gcritéar sin a bheith bunaithe ar fhíorais agus fiúntas gach cáis ar leith. Ba cheart na tosca ábhartha uile a chur san áireamh chun leas an cheartais. Mar shampla, i gcás ina ndearnadh cion coiriúil go hiomlán nó go páirteach ar chríoch an Stáit iarrtha, nó i gcás inar tharla an chuid is mó de na héifeachtaí nó ina ndearnadh cuid shubstaintiúil den damáiste arbh é an cion coiriúil ba chúis leo, i gcás ina gcomhdhéanann na héifeachtaí nó an damáiste sin cuid d’eilimintí an chiona choiriúil, ar chríoch an Stáit iarrtha, ba cheart a bheith in ann a mheas gurbh é an Stát sin an Stát ab fhearr chun ionchúiseamh a dhéanamh, toisc go bhfuil an fhianaise atá le bailiú, mar shampla fianaise ó fhinnéithe, agus íospartaigh, nó tuairimí saineolaithe, sa Stát iarrtha agus toisc, dá réir sin, go mbeadh sé níos éasca iad a chruinniú dá n-aistreofaí na himeachtaí coiriúla. Anuas air sin, d’éascófaí tionscnamh imeachtaí ar dhamáistí sa Stát iarrtha ina dhiaidh sin dá ndéanfaí na himeachtaí foluiteacha lena mbunaítear freagracht choiriúil sa Bhallstát céanna freisin. Ar an gcaoi chéanna, má tá an chuid is mó den fhianaise lonnaithe sa Stát iarrtha, d’fhéadfadh aistriú imeachtaí coiriúla bailiúchán agus inghlacthacht na fianaise dá éis sin, a bhailítear i gcomhréir le dlí náisiúnta an Stáit iarrtha, a éascú.

(26)

I gcás inar náisiúnaigh nó inar cónaitheoirí de chuid an Stáit iarrtha sa Stát iarrtha iad duine amháin nó níos mó de na daoine atá faoi dhrochamhras nó atá cúisithe, d’fhéadfadh údar a bheith le haistriú imeachtaí coiriúla chun ceart an duine atá faoi dhrochamhras nó atá cúisithe a bheith i láthair ag an triail a áirithiú, i gcomhréir le Treoir (AE) 2016/343. Ar an gcaoi chéanna, i gcás inar náisiúnaigh nó cónaitheoirí de chuid an Stáit iarrtha iad duine amháin nó níos mó de na híospartaigh, d’fhéadfadh údar a bheith le haistriú imeachtaí coiriúla chun ligean d’íospartaigh a bheith rannpháirteach ar bhealach níos éasca sna himeachtaí coiriúla agus chun scrúdú a dhéanamh orthu go héifeachtach mar fhinnéithe le linn na n-imeachtaí. I gcásanna ina ndiúltaítear duine atá faoi dhrochamhras nó atá cúisithe a thabhairt suas, duine ar eisíodh barántas gabhála Eorpach ina leith, sa Stát iarrtha ar na forais a shonraítear sa Rialachán seo, d’fhéadfadh údar a bheith le haistriú freisin i gcás ina bhfuil an duine sin i láthair sa Stát iarrtha gan a bheith ina náisiúnach nó ina chónaitheoir nó ina cónaitheoir de chuid an Stáit sin.

(27)

Is faoin údarás iarrthach atá sé measúnú a dhéanamh, ar bhonn an ábhair atá os a chomhair, cé acu is ann nó nach ann d’fhorais réasúnacha lena chreidiúint go bhfuil cónaí ar an duine atá faoi dhrochamhras, an duine atá cúisithe nó an t-íospartach sa Stát iarrtha. I gcás nach bhfuil ach faisnéis theoranta ar fáil, ba cheart an measúnú sin a bheith ina ábhar do chomhairliúcháin idir an t-údarás iarrthach agus an t-údarás iarrtha chun áit chónaithe an duine atá faoi dhrochamhras, an duine atá cúisithe nó an íospartaigh sa Stát iarrtha a dhearbhú. Chun críocha an mheasúnaithe sin, imthosca oibiachtúla éagsúla, a d’fhéadfadh a thabhairt le fios go bhfuil gnáthshuíomh leasanna an duine lena mbaineann bunaithe aige nó aici i mBallstát ar leith nó go bhfuil sé ar intinn aige nó aici déanamh amhlaidh, d’fhéadfadh siad a bheith ábhartha. D’fhéadfadh sé gur ann d’fhorais réasúnacha lena chreidiúint go bhfuil cónaí ar dhuine sa Stát iarrtha, go háirithe i gcás ina bhfuil duine cláraithe mar chónaitheoir de chuid an Stáit iarrtha, trí chárta aitheantais nó cead cónaithe a bheith ina sheilbh aige nó aici nó trí chlárú i gclár oifigiúil cónaithe. I gcás nach bhfuil an duine lena mbaineann cláraithe sa Stát iarrtha, d’fhéadfaí cónaí a thabhairt le fios leis an bhfíoras gur léirigh duine go raibh sé i gceist aige nó aici é nó í féin a lonnú sa Bhallstát sin nó go bhfuil, tar éis tréimhse sheasta láithreachta sa Bhallstát sin, naisc áirithe faighte aige nó aici leis ar naisc iad atá cosúil leis na cinn sin a d’eascródh as cónaí foirmiúil a bhunú sa Bhallstát sin. Chun a chinneadh, i gcás sonrach, cé acu atá nó nach bhfuil naisc leordhóthanacha idir an duine lena mbaineann agus an Stát iarrtha, as a dtagann fíorais réasúnacha lena chreidiúint go bhfuil cónaí ar an duine lena mbaineann sa Bhallstát sin, is gá tosca oibiachtúla éagsúla ar saintréith iad do chás an duine sin a chur san áireamh, lena n-áirítear, go háirithe, fad, cineál agus coinníollacha a láithreachta sa Stát iarrtha nó na naisc theaghlaigh nó eacnamaíocha atá ag an duine sin leis an Stát iarrtha. Feithicil chláraithe, cuntas bainc, an fíoras nach raibh briseadh i bhfanacht an duine sa Stát iarrtha nó tosca oibiachtúla eile, d’fhéadfadh siad a bheith ábhartha chun a chinneadh gur ann d’fhorais réasúnacha lena chreidiúint go bhfuil cónaí ar an duine lena mbaineann sa Stát iarrtha. Cuairt ghairid, fanacht saoire, lena n-áirítear i dteach saoire, nó fanacht cosúil leis sin sa Stát iarrtha gan aon nasc substaintiúil eile, ní leor an méid sin chun cónaí a bhunú sa Bhallstát sin.

(28)

D’fhéadfadh údar a bheith le haistriú imeachtaí coiriúla freisin i gcás ina bhfuil imeachtaí coiriúla ar bun sa Stát iarrtha i leith na bhfíoras céanna, fíorais atá mar an gcéanna go páirteach nó fíorais eile, in aghaidh an duine atá faoi dhrochamhras nó atá cúisithe, nó i gcás ina bhfuil imeachtaí coiriúla ar bun sa Stát iarrtha i leith na bhfíoras céanna, fíorais atá mar an gcéanna go páirteach nó fíorais ghaolmhara, in aghaidh daoine eile, mar shampla i gcásanna ionchúisimh eagraíochtaí coiriúla trasteorann, i gcás ina bhféadfaí daoine comhchúisithe éagsúla a ionchúiseamh i mBallstáit éagsúla. Thairis sin, más rud é go bhfuil pianbhreith á cur isteach nó le cur isteach sa Stát iarrtha ag an duine atá faoi dhrochamhras nó atá cúisithe, ar pianbhreith í lena mbaineann cailleadh saoirse, d’fhéadfadh údar a bheith le haistriú imeachtaí coiriúla chun ceart an duine atá ciontaithe a bheith i láthair ag an triail dá lorgaítear aistriú imeachtaí coiriúla a áirithiú, fad a chuireann sé nó sí an phianbhreith isteach sa Stát iarrtha. Ba cheart do na húdaráis iarrthacha machnamh cuí a dhéanamh ar cibé acu an bhféadfaí, trí imeachtaí coiriúla a aistriú, an dóchúlacht a mhéadú go ndéanfaí an duine lena mbaineann a athshlánú go sóisialta i gcás ina bhforfheidhmeofaí an phianbhreith sa Stát iarrtha. Chun na críche sin, d’fhéadfaí a chur san áireamh ceangal an duine leis an Stát iarrtha, más suíomh an teaghlaigh é an Stát sin dar leis an duine i dtrácht, agus naisc theanga, chultúrtha, shóisialta, eacnamaíocha agus aon nasc eile leis an Stát iarrtha. Ina theannta sin, is minic a thagann údaráis inniúla ar chomhaontuithe maidir le comhchruinniú na n-imeachtaí bunaithe ar shainaithint na dlínse is fearr. D’fhéadfaí teacht ar na comhaontuithe sin i gcruinnithe comhordúcháin Ghníomhaireacht an Aontais Eorpaigh um Chomhar Ceartais Choiriúil (Eurojust), a bunaíodh le Rialachán (AE) 2018/1727 ó Pharlaimint na hEorpa agus ón gComhairle (23) i gcruinnithe déthaobhacha nó iltaobhacha gan idirghabháil ó Eurojust nó tar éis comhairliúcháin faoi Chinneadh Réime 2009/948/CGB.

(29)

Roimh bhreithniú a dhéanamh ar imeachtaí coiriúla a aistriú ar an gcúis gur sa Stát iarrtha atá tromlach na fianaise lonnaithe, agus ar an gcúis sin amháin, moltar don údarás iarrthach a chur san áireamh an fhéidearthacht fianaise a fháil ó Bhallstáit eile trí ionstraimí atá ann cheana a bhaineann le haitheantas frithpháirteach cinntí breithiúnacha, mar shampla, i dtaca leis na Ballstáit sin atá faoi cheangal aici, Treoir 2014/41/AE ó Pharlaimint na hEorpa agus ón gComhairle (24), agus cúnamh dlíthiúil frithpháirteach.

(30)

Ba cheart do dhaoine atá faoi dhrochamhras nó atá cúisithe nó íospartaigh a bheith ábalta a mholadh go n-aistreofaí na himeachtaí coiriúla a bhaineann leo chuig Ballstát eile. Ba cheart daoine atá faoi dhrochamhras nó atá cúisithe nó íospartaigh a bheith ábalta moladh den sórt sin a dhéanamh le húdaráis inniúla an Stáit iarrthaigh nó an Stát iarrtha i gcás ina measann siad go bhfuil cúiseanna ann go bhfuil bonn cirt le haistriú imeachtaí coiriúla ar mhaithe leis an gceartas. Mar shampla, d’fhéadfadh duine de na daoine seo an moladh sin a dhéanamh sa Stát iarrtha: duine atá faoi dhrochamhras nó atá cúisithe nó íospartach atá ar an eolas go bhfuil imeachtaí coiriúla ar siúl sa Stát iarrtha i leith na bhfíoras céanna, fíorais atá mar an gcéanna go páirteach nó fíorais eile in aghaidh an duine chéanna atá faoi dhrochamhras nó atá cúisithe nó i leith na bhfíoras céanna, fíorais atá mar an gcéanna go páirteach nó fíorais ghaolmhara in aghaidh daoine eile. D’fhéadfaí moladh den sórt sin a dhéanamh sa Stát iarrtha i gcás, mar shampla, ina gcónaíonn duine atá faoi dhrochamhras, duine atá cúisithe nó íospartach sa Stát sin nó inar náisiúnach de chuid an Stáit é nó í, nó ina bhfuil sé nó sí ar an eolas faoi imeachtaí a bheith tionscanta i leith na bhfíoras céanna, fíorais atá mar an gcéanna go páirteach nó fíorais eile a bhaineann leis na daoine céanna atá faoi dhrochamhras nó atá cúisithe. Cé gur cheart moladh den sórt sin a mheas agus a thaifeadadh, níor cheart aon oibleagáid a fhorchur leis ar an údarás iarrthach nó ar an údarás iarrtha an t-aistriú imeachtaí coiriúla a iarraidh nó imeachtaí coiriúla a aistriú nó dul i gcomhairle le húdarás Ballstáit eile chun na críche sin. Má thagann aon cheann de na húdaráis sin ar an eolas go bhfuil imeachtaí coiriúla comhthreomhara ar bun ar bhonn moladh maidir leis an aistriú imeachtaí coiriúla arna chur isteach ag duine atá faoi dhrochamhras, duine atá cúisithe, nó ag íospartach, nó ag dlíodóir thar a gceann, tá sé de dhualgas air dul i gcomhairle leis an údarás eile i gcomhréir le Cinneadh Réime 2009/948/CGB.

(31)

Ba cheart don údarás iarrthach, a luaithe is féidir, an duine atá faoi dhrochamhras nó atá cúisithe a chur ar an eolas faoin rún chun iarraidh ar an aistriú imeachtaí coiriúla a eisiúint agus ba cheart dó an deis a thabhairt don duine sin tuairim a chur in iúl, lena n-áirítear maidir le gnéithe a bhaineann leis an gceartas aisiríoch, i gcomhréir leis an dlí náisiúnta is infheidhme, chun a chur ar a gcumas do na húdaráis leasanna dlisteanacha an duine sin a chur san áireamh roimh iarraidh ar aistriú a eisiúint. Tá sé tábhachtach an fhaisnéis sin a sholáthar i scríbhinn. Ba cheart a bheith in ann an fhaisnéis a sholáthar ó bhéal freisin ar an gcoinníoll go ndéantar nóta den fhaisnéis a soláthraíodh i gcomhréir leis an nós imeachta maidir le taifeadadh faoin dlí náisiúnta. Ba cheart a bheith in ann an fhaisnéis a sholáthar agus úsáid á baint as foirmeacha caighdeánacha. I gcás ina measfaidh an t-údarás iarrthach go bhfuil gá leis, i bhfianaise, mar shampla, aois, bhail coirp nó bhail meabhrach an duine atá faoi dhrochamhras nó atá cúisithe lena mbaineann, ba cheart an deis a thabhairt d’ionadaí dlíthiúil an duine sin an tuairim a chur in iúl, i gcás ina mbeidh fáil ar an ionadaí sin. Agus measúnú á dhéanamh ar leas dlisteanach an duine atá faoi dhrochamhras nó atá cúisithe maidir le heolas a fháil faoin rún chun iarraidh ar aistriú a eisiúint, ba cheart don údarás iarrthach a chur san áireamh an gá atá le rúndacht imscrúdaithe nó an baol maidir le dochar a dhéanamh don imscrúdú in aghaidh an duine sin, tráth ar bith a bheadh gá le leas tábhachtach an phobail a chosaint, i gcásanna, mar shampla, ina bhféadfadh an fhaisnéis sin dochar a dhéanamh d’imscrúduithe rúnda leanúnacha nó dochar tromchúiseach a dhéanamh do shlándáil náisiúnta an Bhallstáit ina bhfuil na himeachtaí coiriúla ar siúl. I gcás nach bhféadfaidh an t-údarás iarrthach an duine atá faoi dhrochamhras nó atá cúisithe a aimsiú ná dul i dteagmháil leis nó léi d’ainneoin iarrachtaí réasúnacha a dhéanamh, ní mór feidhm a bheith ag an oibleagáid maidir leis an duine sin a chur ar an eolas a luaithe a fhéadfar an duine atá faoi dhrochamhras nó atá cúisithe a aimsiú nó dul i dteagmháil leis nó léi.

(32)

Ba cheart cearta na n-íospartach a leagtar amach i dTreoir 2012/29/AE ó Pharlaimint na hEorpa agus ón gComhairle (25), lena n-áirítear an ceart chun faisnéise, a chur san áireamh agus an Rialachán seo á chur i bhfeidhm. Níor cheart an Rialachán seo a léirmhíniú mar rialachán lena gcuirtear cosc ar na Ballstáit cearta atá níos leithne ná na cinn siúd a leagtar síos i ndlí an Aontais a dheonú d’íospartaigh faoin dlí náisiúnta.

(33)

Agus cinneadh á dhéanamh maidir le hiarraidh ar an aistriú imeachtaí coiriúla, ba cheart don údarás iarrthach aird chuí a thabhairt ar leasanna dlisteanacha na n-íospartach, lena n-áirítear a gcosaint agus gnéithe a bhaineann le ceartas aisiríoch, agus ba cheart dó measúnú a dhéanamh an bhféadfadh an t-aistriú imeachtaí coiriúla a bheith díobhálach don chumas atá ag íospartaigh a gcearta a fheidhmiú go héifeachtach sna himeachtaí coiriúla lena mbaineann. D’fhéadfaí a chuimsiú leis an measúnú sin, mar shampla, breithniú ar an bhféidearthacht agus ar na socruithe atá ar fáil d’íospartaigh chun fianaise a thabhairt le linn trialacha sa Stát iarrtha murab é sin an Ballstát ina bhfuil cónaí orthu. Thairis sin, ba cheart machnamh a dhéanamh ar an bhféidearthacht d’íospartaigh fianaise a fháil agus a sholáthar, mar shampla ó fhinnéithe agus ó shaineolaithe, cúiteamh a éileamh nó tairbhe a bhaint as cláir um chosaint finnéithe nó um cheartas aisiríoch sa Stát iarrtha. Níor cheart don aistriú imeachtaí coiriúla dochar a dhéanamh do chearta na n-íospartach maidir le cúiteamh a fháil. Níl aon tionchar ag an Rialachán seo ar na rialacha maidir le cúiteamh ná le haiseag maoine d’íospartaigh in imeachtaí náisiúnta.

(34)

I gcás ina bhfuil gá leis lena áirithiú go leantar sa Stát iarrtha leis an gcosaint a soláthraíodh don íospartach sa Stát iarrthach, sa Stát iarrtha ba cheart d’údaráis inniúla sa Stát iarrthach breithniú a dhéanamh ar ordú cosanta Eorpach a eisiúint i gcomhréir le Rialachán (AE) Uimh. 606/2013 ó Pharlaimint na hEorpa agus ón gComhairle (26) nó, i gcás na mBallstát atá faoi cheangail aici, Treoir 2011/99/AE ó Pharlaimint na hEorpa agus ón gComhairle (27).

(35)

A luaithe a bheidh sé ar intinn ag an údarás iarrthach iarraidh ar an aistriú imeachtaí coiriúla a eisiúint, ba cheart dó, a luaithe is féidir, an t-eolas sin a thabhairt do na híospartaigh a bhfuil cónaí orthu sa Stát iarrthach nó, i gcás daoine dlítheanacha, atá bunaithe sa Stát iarrthach agus a fhaigheann faisnéis faoi na himeachtaí coiriúla i gcomhréir le hAirteagal 6(1) de Threoir 2012/29/AE, mar a chuirtear chun feidhme é sa dlí náisiúnta, nó, i gcás daoine dlítheanacha, a fhaigheann faisnéis den sórt sin i gcomhréir leis an dlí náisiúnta. Ba cheart don údarás iarrthach an deis a thabhairt do na daoine sin tuairim a chur in iúl, i gcomhréir leis an dlí náisiúnta is infheidhme, chun a chur ar a gcumas do na húdaráis a leasanna dlisteanacha a chur san áireamh roimh iarraidh ar aistriú a eisiúint. Tá sé tábhachtach an fhaisnéis sin a sholáthar i scríbhinn. Ba cheart a bheith in ann an fhaisnéis a sholáthar ó bhéal freisin ar an gcoinníoll go ndéantar nóta den fhaisnéis a soláthraíodh i gcomhréir leis an nós imeachta maidir le taifeadadh faoin dlí náisiúnta. Ba cheart a bheith in ann an fhaisnéis a sholáthar trí úsáid a bhaint as foirmeacha caighdeánacha nó, i gcás ina mbeidh líon thar a bheith mór d’íospartaigh le cur ar an eolas, trí mhodhanna eile chun faisnéis ghinearálta a thabhairt don phobal, ar nós ionstraimí sonracha foilseacháin ar líne atá ar fáil d’údaráis bhreithiúnacha faoin dlí náisiúnta. I gcás ina measfaidh an t-údarás iarrthach go bhfuil gá leis, i bhfianaise, mar shampla, aois, bhail coirp nó bhail meabhrach an íospartaigh lena mbaineann, ba cheart an deis a thabhairt d’ionadaí dlíthiúil an íospartaigh an tuairim a chur in iúl, i gcás ina mbeidh fáil ar an ionadaí sin. Agus measúnú á dhéanamh ar leas dlisteanach na n-íospartach maidir le heolas a fháil faoin rún chun iarraidh ar aistriú a eisiúint, ba cheart don údarás iarrthach an gá atá le rúndacht imscrúdaithe nó an baol maidir le dochar a dhéanamh don imscrúdú a chur san áireamh, i gcásanna, mar shampla, ina bhféadfadh an fhaisnéis sin dochar a dhéanamh d’imscrúduithe rúnda leanúnacha nó dochar tromchúiseach a dhéanamh do shlándáil náisiúnta an Stáit iarrthaigh.

(36)

Ba cheart a bheith in ann freisin foirmeacha caighdeánacha a úsáid i gcásanna áirithe dá bhforáiltear faoin Rialachán seo chun gur fusa a bheidh sé don údarás iarrthach agus don údarás iarrtha cúnamh a thabhairt dá chéile chun an duine atá faoi dhrochamhras, atá cúisithe nó an t-íospartach a chur ar an eolas agus chun a dtuairim a lorg maidir leis an rún chun iarraidh ar an aistriú imeachtaí coiriúla a eisiúint. Maidir leis an úsáid a d’fhéadfaí a bhaint as na foirmeacha caighdeánacha sin, níor cheart cosc a chur ar an údarás iarrthach ná ar an údarás iarrtha fógraí díreacha a thabhairt do dhaoine atá faoi dhrochamhras nó atá cúisithe nó d’íospartaigh.

(37)

Glactar leis go mbeidh, le cur i bhfeidhm ceart an Rialacháin seo, cumarsáid ann idir an t-údarás iarrtha agus an t-údarás iarrthach lena mbaineann, rud ba cheart a spreagadh chun dul i gcomhairle le chéile nuair is iomchuí chun cur i bhfeidhm réidh agus éifeachtúil an Rialacháin seo a éascú, go díreach nó, i gcás inarb iomchuí, trí Eurojust.

(38)

Ba cheart an t-údarás iarrthach a bheith in ann dul i gcomhairle leis an údarás iarrtha sula n-eisítear iarraidh ar an aistriú imeachtaí coiriúla i gcás ina bhfuil gá leis sin, go háirithe, chun a chinneadh an mbeadh an t-aistriú imeachtaí coiriúla chun leas riar éifeachtúil cuí an cheartais, lena n-áirítear an bhfuil sé comhréireach agus oiriúnach chun críocha na n-imeachtaí lena mbaineann, agus chun a chinneadh an dócha go ndéanfaidh an t-údarás iarrtha ceann amháin de na forais le diúltú a agairt faoin Rialachán seo.

(39)

Agus iarraidh ar an aistriú imeachtaí coiriúla á tarchur, ba cheart don údarás iarrthach faisnéis chruinn shoiléir a sholáthar maidir leis na cúinsí agus coinníollacha is bonn leis an iarraidh, chomh maith le haon doiciméadacht tacaíochta eile, chun a chur ar a chumas don údarás iarrtha cinneadh eolasach a dhéanamh faoin iarraidh ar an aistriú imeachtaí coiriúla. Ba cheart don údarás iarrthach an fhoirm iarrata chomhlánaithe agus, d’fhonn costais agus fad ama an aistriúcháin a laghdú, na codanna bunriachtanacha ar a laghad d’aon doiciméadacht nó faisnéis tacaíochta a aistriú go teanga oifigiúil de chuid an Stáit iarrtha nó go haon teanga eile a nglacann an Stát sin léi i gcomhréir leis an Rialachán seo. Is iad na codanna bunriachtanacha de na doiciméid lena mbaineann na sleachta sin a ndealraíonn sé go bhfuil siad riachtanach don údarás iarrtha chun cinneadh eolasach a dhéanamh maidir leis an iarraidh ar an aistriú imeachtaí coiriúla.

(40)

Fad nach mbeidh cinneadh déanta ag an údarás iarrtha glacadh le haistriú imeachtaí coiriúla nó diúltú dó, ba cheart an t-údarás iarrthach a bheith in ann an iarraidh ar aistriú a tharraingt siar, mar shampla i gcás ina dtagann sé ar an eolas faoi ghnéithe breise, nach ndealraíonn sé go bhfuil gá a thuilleadh leis an aistriú dá mbarr. Ba cheart faisnéis faoi tharraingt siar na hiarrata ar an aistriú imeachtaí coiriúla a sholáthar láithreach don údarás iarrtha agus ba cheart í a chur in iúl do na daoine atá faoi dhrochamhras nó atá cúisithe agus do na híospartaigh, de réir mar is ábhartha.

(41)

Maidir leis an gcinneadh ón údarás iarrtha maidir le cé acu glacadh leis an aistriú imeachtaí coiriúla nó diúltú dó, ba cheart dó an cinneadh a chur in iúl don údarás iarrthach gan moill mhíchuí agus i gcás ar bith tráth nach déanaí ná 60 lá tar éis an iarraidh ar an aistriú imeachtaí coiriúla a fháil. I gcásanna sonracha, nuair nach bhfuil sé indéanta don údarás iarrtha an tréimhse sin ama a chomhlíonadh, mar shampla má cheapann sé go bhfuil gá le tuilleadh faisnéise, níor cheart é a bheith indéanta an tréimhse sin a fhadú ach go ceann 30 lá eile chun moilleanna iomarcacha a sheachaint. Agus é ag glacadh leis an aistriú imeachtaí coiriúla, ba cheart don údarás iarrtha cinneadh cuí-réasúnaithe a dhéanamh. I gcásanna ina ndiúltóidh an t-údarás iarrtha don aistriú imeachtaí coiriúla, ba cheart dó an t-údarás iarrthach a chur ar an eolas faoi chúiseanna an diúltaithe. Chun na críche sin, is leor go soláthróidh an t-údarás iarrtha faisnéis ghonta maidir leis an bhforas nó na forais ábhartha le diúltú.

(42)

I gcás inar ghlac an t-údarás iarrtha leis an aistriú imeachtaí coiriúla, ba cheart don údarás iarrthach, gan moill mhíchuí, cóipeanna bunaidh nó cóipeanna deimhnithe de dhoiciméid uile an cháschomhaid, nó na codanna ábhartha de ar a laghad, mar aon le haistriúcháin ar na codanna sin, a chur ar aghaidh chuig an údarás iarrtha. A luaithe a scoirfear de na himeachtaí náisiúnta, ba cheart don údarás iarrthach aon chodanna ábhartha eile den cháschomhad, sa chóip bhunaidh nó sa chóip dheimhnithe, lena n-áirítear fianaise fhisiceach ábhartha, mar shampla réada ciona nó samplaí fola nó DNA, a tharchur chuig an údarás iarrtha gan moill mhíchuí. Níor cheart doiciméadacht bhunaidh a tharchur ach amháin arna iarraidh sin don údarás iarrtha, mar shampla i gcás inar gá scrúdú a dhéanamh ar dhoiciméad chun críoch fóiréinseach. Ar choinníoll nach bhfuil gá a thuilleadh le cóipeanna bunaidh an cháschomhaid ná leis an bhfianaise fhisiceach sa Stát iarrtha, ba cheart iad a chur ar ais chuig an Stát iarrthach arna n-iarraidh sin dó, i gcás ina bhfuil gá leis na doiciméid sin nó an fhianaise fhisiceach sin chun críoch imscrúdaithe choiriúil eile, mar shampla. I gcás ina gcuirfidh an Stát iarrthach in iúl, nuair a iarrfaidh an Stát iarrtha air déanamh amhlaidh, nach bhfuil sé beartaithe aige cóipeanna bunaidh an cháschomhaid nó an fhianaise fhisiceach a aisghabháil nuair nach bhfuil gá leis nó léi a thuilleadh nó ag deireadh na n-imeachtaí, ba cheart an Stát iarrtha a bheith in ann cinneadh a dhéanamh, i gcomhréir lena dhlí náisiúnta, maidir leis an gcaoi le déileáil leis an gcuid eile den fhianaise, lena n-áirítear an ndéanfar an fhianaise sin a chaomhnú nó a scriosadh. A luaithe a ghlacfar le hiarraidh ar an aistriú imeachtaí coiriúla, agus chun aistriú éifeachtúil a éascú, ba cheart an t-údarás iarrthach agus an t-údarás iarrtha a bheith in ann dul i gcomhairle le chéile chun a chinneadh cad iad na doiciméid nó na codanna de na doiciméid sin is gá a chur ar aghaidh, agus a aistriú go teanga eile, i gcás inar gá sin. Mar sin féin, tá sé tábhachtach go mbeidh an cinneadh gan ach codanna de na doiciméid a sheoladh cothrom agus bunaithe ar bhreithniú cúramach a dhéanamh ar na doiciméid faoi thrácht ionas nach ndéanfar dochar do chothroime na n-imeachtaí.

(43)

Níor cheart diúltú d’aistriú imeachtaí coiriúla ar aon fhoras seachas na cinn dá bhforáiltear sa Rialachán seo. Chun go nglacfar leis an aistriú imeachtaí coiriúla, ba cheart é a bheith indéanta ionchúiseamh a dhéanamh ar na fíorais is bonn leis na himeachtaí coiriúla atá faoi réir an aistrithe sa Stát iarrtha. Ba cheart don údarás iarrtha diúltú don aistriú imeachtaí coiriúla mura cion coiriúil sa Stát iarrtha é an t-iompar a lorgaítear aistriú ina leith, nó mura bhfuil dlínse ag an Stát iarrtha ar an gcion coiriúil sin, ach amháin má fheidhmíonn sé dlínse dá bhforáiltear faoin Rialachán seo. Ba cheart don údarás iarrtha diúltú don aistriú imeachtaí coiriúla freisin mura gcomhlíontar na coinníollacha maidir leis an gcion coiriúil a ionchúiseamh sa Stát iarrtha. D’fhéadfadh sé sin a bheith i gceist, mar shampla, i gcás nach ndearnadh gearán ón íospartach, atá riachtanach chun an cion coiriúil a ionchúiseamh sa Stát iarrtha, a chomhdú in am, nó i gcás nach féidir ionchúiseamh a dhéanamh de bhun dhlí náisiúnta an Stáit iarrtha i ngeall ar bhás nó ar ghealtacht an duine atá faoi dhrochamhras nó atá cúisithe. Thairis sin, ba cheart don údarás iarrtha diúltú don aistriú imeachtaí coiriúla má tá baic eile ar ionchúiseamh sa Stát iarrtha. Ba cheart an t-údarás iarrtha a bheith in ann diúltú d’aistriú imeachtaí coiriúla má bhaineann an duine atá faoi dhrochamhras nó atá cúisithe tairbhe as pribhléid nó díolúine i gcomhréir le dlí náisiúnta an Stáit iarrtha, mar shampla i ndáil le catagóirí áirithe daoine, taidhleoirí, mar shampla, nó gaolmhaireachtaí atá faoi chosaint shonrach, pribhléid ghairmiúil dlíodóra, mar shampla, nó má chreideann an t-údarás iarrtha nach bhfuil údar leis an aistriú sin mar gheall ar leasanna um riar éifeachtúil cuí an cheartais, mar shampla i gcás nach gcomhlíontar aon cheann de na critéir maidir le haistriú imeachtaí coiriúla a iarraidh, nó i gcás ina raibh an fhoirm iarrata le haghaidh aistriú imeachtaí coiriúla neamhiomlán nó mícheart go follasach agus nár chomhlánaigh nó nár cheartaigh an t-údarás iarrthach é, rud a fhágann nach bhfuil an fhaisnéis is gá ag an údarás iarrtha chun measúnú a dhéanamh ar an iarraidh ar an aistriú imeachtaí coiriúla. Ba cheart an t-údarás iarrtha a bheith in ann diúltú don iarraidh freisin mura cion coiriúil san áit a ndearnadh é atá san iompar i gcás nach bhfuil aon bhundlínse ag an Stát iarrtha chun cion den sórt sin a imscrúdú agus a ionchúiseamh. Cuirtear san áireamh leis an bhforas diúltaithe sin prionsabal an chríochachais, rud a chiallaíonn gur cheart an Stát iarrtha a bheith in ann diúltú don aistriú imeachtaí coiriúla i gcásanna nach cion coiriúil san áit a ndearnadh é atá sa chion coiriúil líomhnaithe, arna dhéanamh lasmuigh de chríoch an Stáit iarrthaigh, agus nach n-údaraítear le dlí náisiúnta an Stáit iarrtha cionta den sórt sin a ionchúiseamh i gcás ina ndéantar iad lasmuigh dá chríoch. Chun críocha an Rialacháin seo, is é ‘bundlínse’ an dlínse dá bhforáiltear cheana sa dlí náisiúnta agus nach n-eascraíonn as an Rialachán seo.

(44)

Is bunphrionsabal de chuid an dlí choiriúil é an prionsabal ne bis in idem, mar a leagtar amach in Airteagail 54 go 58 den Choinbhinsiún lena ndéantar Comhaontú Schengen an 14 Meitheamh 1985 (28) a chur chun feidhme agus in Airteagal 50 den Chairt é, agus arna léirmhíniú ag Cúirt Bhreithiúnais an Aontais Eorpaigh, prionsabal nár cheart dá réir cosantóir a thriail nó pionós a chur air nó uirthi arís in imeachtaí coiriúla as an gcion coiriúil ar éigiontaíodh nó ar ciontaíodh an cosantóir sin go críochnaitheach ina leith cheana féin. Dá bhrí sin, ba cheart don údarás iarrtha diúltú don aistriú imeachtaí coiriúla más rud é go mbeadh sé contrártha don phrionsabal sin iad a ghabháil.

(45)

Agus scrúdú á dhéanamh aige ar cibé acu glacadh le hiarraidh ar an aistriú imeachtaí coiriúla nó diúltú di, ba cheart don údarás iarrtha a mheas an bhfónfadh an t-aistriú sin don chuspóir maidir le riar éifeachtúil cuí an cheartais. Ba cheart an measúnú sin a dhéanamh ar bhonn cás ar chás chun go sainaithneofar an Ballstát is fearr chun an cion coiriúil atá i gceist a ionchúiseamh. Ba cheart rogha leathan a bheith ag an údarás iarrtha chun críche an mheasúnaithe sin. Ba cheart an measúnú sin a theorannú go himthosca ábhartha an cháis, lena n-áirítear cibé acu an bhfuil comhartha prima facie ann nach ar chríoch an Stáit iarrtha a rinneadh an cion coiriúil go hiomlán nó go páirteach, nach ar chríoch an Stáit sin a tharla an chuid is mó de na héifeachtaí nó cuid shubstaintiúil den damáiste a chomhdhéanann cuid d’eilimintí an chiona choiriúil, agus nach náisiúnach nó cónaitheoir de chuid an Stáit sin an duine atá faoi dhrochamhras nó atá cúisithe. Níor cheart staid phearsanta, ábharach nó teaghlaigh íospartaigh, finné nó aon duine aonair eile lena mbaineann a bheith cinntitheach inti féin maidir le measúnú a dhéanamh an bhfónfadh aistriú imeachtaí coiriúla don chuspóir maidir le riar éifeachtúil cuí an cheartais.

(46)

Sula gcinntear diúltú don iarraidh ar an aistriú imeachtaí coiriúla ar bhonn aon fhoras le diúltú, ba cheart don údarás iarrtha, i gcás inarb iomchuí, dul i gcomhairle leis an údarás iarrthach chun aon fhaisnéis bhreise a bhfuil gá léi a fháil.

(47)

Ba cheart don Stát iarrtha rochtain ar leigheas éifeachtach dlí a áirithiú do dhaoine atá faoi dhrochamhras, do dhaoine atá cúisithe agus d’íospartaigh, in aghaidh an chinnidh glacadh leis an aistriú imeachtaí coiriúla i gcomhréir le hAirteagal 47 den Chairt agus na nósanna imeachta is infheidhme faoin dlí náisiúnta, tráth ar bith a imrítear drochthionchar ar a gcearta de bharr chur i bhfeidhm an Rialacháin seo. Níor cheart an t-athbhreithniú ar an gcinneadh maidir leis an aistriú imeachtaí coiriúla a bhunú ach amháin ar na critéir dá bhforáiltear sna forais le diúltú a leagtar amach sa Rialachán seo. Ba cheart breithniú ar na himthosca uile atá ábhartha maidir le scrúdú na gcritéar sin a bheith i gceist leis an measúnú ar cibé ba cheart nó nár cheart na himeachtaí coiriúla a aistriú. D’fhéadfadh sé gur minic a bheidh cothromaíocht le haimsiú, mar chuid den mheasúnú sin, idir leasanna nó cearta na ndaoine a bhféadfadh tionchar a imirt ar a gcearta; anuas air sin, d’fhéadfadh sé gur minic a dhéanfar breithniú ar shainiúlachtaí agus ar ghnéithe praiticiúla oibriú an chórais ceartais choiriúil mar chuid de freisin. Ba cheart an leigheas dlí sin a bheith gan dochar do leigheasanna dlí eile faoin dlí náisiúnta.

(48)

Ba cheart rogha leathan a bheith ag an údarás iarrtha agus measúnú á dhéanamh an ar mhaithe le riar éifeachtúil cuí an cheartais atá an t-aistriú imeachtaí coiriúla agus ar cheart diúltú d’iarraidh ar aistriú ar aon cheann de na forais roghnacha le diúltú a leagtar amach sa Rialachán seo. Ba cheart an scrúdú ar fheidhmiú na rogha sin a bheith teoranta d’athbhreithniú a dhéanamh ar cé acu a sháraigh nó nár sháraigh an t-údarás iarrtha, agus an cinneadh á dhéanamh aige glacadh leis an iarraidh ar an aistriú imeachtaí coiriúla, teorainneacha a lánrogha go follasach.

(49)

D’fhéadfadh sé gurbh é toradh an leighis dlí go seasfaí leis an gcinneadh glacadh leis an aistriú imeachtaí coiriúla nó go gcuirfí ar ceal go hiomlán nó go páirteach é. I bprionsabal, i gcás leigheas rathúil, fillfidh na himeachtaí coiriúla ar an Stát iarrthach. I gcásanna áirithe, áfach, d’fhéadfadh an chúirt a chinneadh freisin, i gcomhréir lena dlí náisiúnta, gur féidir seasamh leis an gcinneadh glacadh leis an aistriú imeachtaí coiriúla ar choinníoll go gcomhlíontar coinníollacha áirithe nó foirmiúlachtaí breise, mar shampla an coinníoll go gcomhlánófar gnéithe áirithe den fhoirm iarrata atá in easnamh, nó go ndéanfar bearta breise chun an t-aistriú a fhorghníomhú, mar shampla, cosaint finnéithe a choinneáil.

(50)

Níor cheart aon athbhreithniú ar thuillteanais an cháis a bheith i gceist leis an leigheas dlí faoin Rialachán seo, mar shampla, an amhlaidh gur leor an fhianaise chun imscrúdú a oscailt nó leanúint de, an amhlaidh gur deimhníodh fíorais an cháis nó gnéithe suibiachtúla, ar nós intinne nó faillí thromchúiseach, de réir na gcaighdeán is infheidhme, nó athbhreithniú a bhaineann le luach nó ualach fianaise ach na fianaise a bailíodh cheana nó creidiúnacht na ráiteas.

(51)

D’fhonn a ráthú gur féidir an ceart chun leighis dlí a fheidhmiú go héifeachtach, ba cheart don Stát iarrtha a áirithiú go mbeidh ceart rochtana ag daoine atá faoi dhrochamhras, ag daoine atá cúisithe agus ag íospartaigh ar gach doiciméad a bhaineann leis an aistriú imeachtaí coiriúla a bhí mar bhunús leis an gcinneadh glacadh le haistriú faoin Rialachán seo, agus atá riachtanach chun agóid éifeachtach a dhéanamh in aghaidh an chinnidh sin. Ba cheart an ceart rochtana ar na doiciméid sin a fheidhmiú i gcomhréir le nósanna imeachta faoi dhlí náisiúnta an Stáit iarrtha agus d’fhéadfaí é a theorannú, i gcás ina mbainfeadh sé an bonn de rúndacht an imscrúdaithe, nó ina ndéanfadh sé dochar don imscrúdú nó do shábháilteacht daoine ar bhealach eile. Ba cheart aon diúltú rochtana den sórt sin a mheas in aghaidh chearta na ndaoine lena mbaineann, agus céimeanna éagsúla na n-imeachtaí coiriúla á gcur san áireamh. Ba cheart srianta ar an rochtain sin a léirmhíniú go docht agus i gcomhréir leis an gceart chun triail chóir a fháil faoin gCairt.

(52)

Níor cheart an teorainn ama don duine atá faoi dhrochamhras, don duine atá cúisithe nó don íospartach chun leigheas éifeachtach dlí a lorg a bheith níos faide ná 15 lá ón dáta a gheobhaidh an duine lena mbaineann an cinneadh réasúnaithe glacadh leis an aistriú imeachtaí coiriúla. Cásanna nach sainaithnítear an duine atá faoi dhrochamhras, an duine atá cúisithe nó an t-íospartach tráth an aistrithe imeachtaí coiriúla, agus nárbh fhéidir an cinneadh réasúnaithe a chur in iúl don duine sin, ba cheart iad a bheith faoi réir an dlí náisiúnta.

(53)

Má ghlacann an t-údarás iarrtha leis an aistriú imeachtaí coiriúla, ba cheart imeachtaí coiriúla sa Stát iarrthach a chur ar fionraí nó a scor chun dúbláil beart sa Stát iarrthach agus sa Stát iarrtha a sheachaint. Ba cheart don mhéid sin a bheith gan dochar, áfach, do bhearta imscrúdaitheacha riachtanacha nó bearta nós imeachta eile, lena n-áirítear bearta riachtanacha práinneacha, a d’fhéadfadh a bheith ar an Stát iarrthach a dhéanamh tar éis dó an fógra maidir le glacadh a fháil ón údarás iarrtha, i gcás ina n-éilítear an méid sin ar mhaithe le riar éifeachtúil cuí an cheartais. Ba cheart an coincheap ‘bearta imscrúdaitheacha nó bearta nós imeachta eile’ a léirmhíniú ar bhonn leathan, mar ní hamháin go n-áirítear leo aon bheart chun fianaise a bhailiú, ach aon ghníomh nós imeachta lena bhforchuirtear coinneáil réamhthrialach nó aon bheart eatramhach eile freisin. Chun a áirithiú nach gcuirfear síneadh leis na himeachtaí coiriúla ar feadh tréimhse fhada sa Stát iarrthach, ba cheart na himeachtaí coiriúla sa Stát iarrthach a chur ar fionraí nó ba cheart deireadh a chur leo a luaithe a thabharfar na bearta imscrúdaitheacha nó na bearta nós imeachta eile a rinneadh i gcrích nó a luaithe nach bhfuil gá leo a thuilleadh. Más rud é go ndearnadh leigheas dlí a bhfuil éifeacht fionraíochta leis a agairt sa Stát iarrtha, níor cheart na himeachtaí coiriúla a chur ar fionraí ná deireadh a chur leo sa Stát iarrthach go dtí go ndéanfar cinneadh maidir leis an leigheas sa Stát iarrtha.

(54)

I gcásanna nach ndíorthaítear dlínse le haghaidh na n-imeachtaí coiriúla ach ar bhonn an Rialacháin seo agus i gcásanna ina bhfaightear iarraidh ar aistriú agus ina bhfuiltear ag feitheamh ar chinneadh maidir le cé acu glacadh leis an aistriú imeachtaí coiriúla nó diúltú dó, ba cheart na Ballstáit a bheith in ann foráil a dhéanamh faoina ndlí náisiúnta maidir le bunús dlí le haghaidh ghabháil shealadach an duine atá cúisithe nó an duine atá faoi dhrochamhras atá ag fanacht sa Stát iarrtha nó le haghaidh glacadh beart sealadach eile ag údarás inniúil an Stáit sin. Níor cheart an ghabháil shealadach nó na bearta sealadacha eile sin a dhéanamh ach amháin i gcomhréir leis an dlí náisiúnta, agus i gcás inar gá. Ba cheart gabháil shealadach den sórt sin nó bearta sealadacha eile a bheith faoi réir na gcoimircí nós imeachta céanna is infheidhme maidir leis na bearta céanna faoin dlí náisiúnta, lena n-áirítear maoirseacht bhreithiúnach. Thairis sin, ba cheart gabháil sealadach den sórt sin nó bearta sealadacha eile a dhéanamh tar éis measúnú cuí a dhéanamh ar bhonn na faisnéise atá ar fáil don údarás iarrtha. Mar sin féin, níor cheart an Rialachán seo a bheith ina bhunús dlí chun daoine a ghabháil d’fhonn iad a aistriú go fisiciúil chuig an Stát iarrtha chun go dtionscnóidh an Stát sin imeachtaí coiriúla in aghaidh an duine sin.

(55)

Ba cheart d’údarás inniúil sa Stát iarrtha an t-údarás iarrthach a chur ar an eolas i scríbhinn faoi aon chinneadh arna dhéanamh ag deireadh na n-imeachtaí coiriúla sa Stát iarrtha. Le Cinneadh Réime 2009/948/CGB, forchuirtear oibleagáid chomhchosúil leis sin i gcás inar thángthas ar chomhaontú maidir le comhchruinniú imeachtaí i mBallstát amháin. I gcás ina gcinneann an t-údarás iarrtha scor d’imeachtaí coiriúla a bhaineann leis na fíorais is bonn leis an iarraidh ar aistriú, ba cheart dó na cúiseanna leis an scor sin a chur in iúl don údarás iarrthach. Ba cheart don údarás iarrtha na codanna bunriachtanacha den fhaisnéis sin agus den chinneadh críochnaitheach i scríbhinn arna dhéanamh sa Stát iarrtha, ar a laghad, a aistriú go teanga oifigiúil de chuid an Stáit iarrthaigh nó go haon teanga eile a nglacann an Stát sin léi i gcomhréir leis an Rialachán seo. Is iad na codanna den fhaisnéis agus den chinneadh atá ceaptha a bheith bunriachtanach na sleachta sin a ndealraíonn sé go bhfuil siad riachtanach chun go mbeidh eolas ag an údarás iarrthach ar a n-ábhar ginearálta.

(56)

Má chinneann an t-údarás iarrtha scor d’imeachtaí coiriúla a bhaineann leis na fíorais is bonn leis an iarraidh ar aistriú, ba cheart an t-údarás iarrthach a bheith in ann leanúint d’imeachtaí coiriúla nó iad a athoscailt mura mbeadh sárú ar an bprionsabal ne bis in idem i gceist leis sin, arna léirmhíniú ag Cúirt Bhreithiúnais an Aontais Eorpaigh, eadhon i gcás nach gcuireann an cinneadh deireadh a chur le himeachtaí bac cinntitheach ar thuilleadh ionchúisimh faoi dhlí náisiúnta an Stáit iarrtha agus nár glacadh é tar éis cinneadh a dhéanamh ar thuillteanais an cháis, rud a fhágann, dá bhrí sin, nach gcuirtear bac ar imeachtaí coiriúla breise, i leith na ngníomhartha céanna, sa Stát sin. Ba cheart an deis a bheith ag íospartaigh imeachtaí coiriúla a thionscnamh nó a iarraidh go ndéanfaí iad a athoscailt sa Stát iarrthach i gcomhréir le dlí náisiúnta an Stáit sin, ar choinníoll nach mbeadh sárú ar an bprionsabal ne bis in idem i gceist leis sin.

(57)

A luaithe a aistrítear imeachtaí coiriúla i gcomhréir leis an Rialachán seo, ba cheart don údarás iarrtha a dhlí agus a nósanna imeachta náisiúnta ábhartha a chur i bhfeidhm. Níor cheart aon ní sa Rialachán seo a léirmhíniú mar ní a chuireann isteach ar aon rogha ionchúisimh dá bhforáiltear sa dlí náisiúnta.

(58)

Níor cheart aon ní sa Rialachán seo a léirmhíniú mar ní a dhéanann difear d’fhad na tréimhse teorann sa Stát iarrtha dá bhforáiltear i ndlí náisiúnta an Stáit sin.

(59)

Agus é d’aidhm éifeacht iomlán a thabhairt don aistriú imeachtaí coiriúla, níor cheart diúltú glacadh le fianaise arna haistriú ag an údarás iarrthach sna himeachtaí coiriúla comhfhreagracha sa Stát iarrtha ar an mbonn gur bailíodh an fhianaise sin i mBallstát eile, agus ar an mbonn sin amháin. Ba cheart don chúirt inniúil sa Stát iarrtha a rogha bhreithiúnach a choinneáil agus measúnú á dhéanamh aici ar an bhfianaise sin i gcomhréir leis an dlí náisiúnta, agus ba cheart daoine atá faoi dhrochamhras agus atá cúisithe a gcearta a choinneáil chun agóid a dhéanamh in aghaidh inghlacthacht na fianaise sin i gcomhréir lena gcearta cosanta faoin gCairt. I gcomhréir leis na prionsabail sin, agus córais agus traidisiúin dlí éagsúla na mBallstát dá bhforáiltear in Airteagal 67(1) den Chonradh ar Fheidhmiú an Aontais Eorpaigh (CFAE) á n-urramú, ní léirmhíneofar aon ní sa Rialachán seo mar ní a chuireann cosc ar na cúirteanna bunphrionsabail an dlí náisiúnta a chur i bhfeidhm maidir le cothroime an nós imeachta a chuireann siad i bhfeidhm ina gcórais náisiúnta, lena n-áirítear i gcórais an dlí choitinn.

(60)

Ba cheart don Stát iarrtha a dhlí náisiúnta a chur i bhfeidhm chun an phianbhreith is infheidhme maidir leis an gcion coiriúil atá i gceist a chinneadh. I gcásanna ina ndearnadh an cion coiriúil ar chríoch an Stáit iarrthaigh, ba cheart na húdaráis iarrtha a bheith in ann an phianbreith uasta dá bhforáiltear i ndlí náisiúnta an Stáit iarrthaigh a chur san áireamh agus an phianbhreith á cinneadh, tráth ar bith a rachaidh sé sin chun tairbhe don duine atá cúisithe, agus i gcomhréir le dlí náisiúnta an Stáit iarrtha. Ba cheart é sin a chur san áireamh i gcásanna ina mbeadh cur i bhfeidhm pianbhreithe níos airde sa Stát iarrtha mar thoradh ar imeachtaí coiriúla a aistriú ná an phianbhreith uasta dá bhforáiltear sa Stát iarrthach as an gcion coiriúil céanna, d’fhonn méid áirithe deimhneachta dlíthiúla agus intuarthachta de réir an dlí is infheidhme a áirithiú do na daoine atá faoi dhrochamhras nó do na daoine atá cúisithe lena mbaineann. Ba cheart an phianbhreith uasta dá bhforáiltear i ndlí náisiúnta an Stáit iarrthaigh a chur san áireamh i gcónaí i gcás ina bhfuil dlínse an Stáit iarrtha bunaithe go heisiach ar an Rialachán seo.

(61)

Ba cheart do gach Ballstát a chostais féin a sheasamh maidir le haistrithe imeachtaí coiriúla, lena n-áirítear na costais sin a bhaineann le feidhmiú na gceart nós imeachta a bhfuil an duine atá faoi dhrochamhras nó atá cúisithe ina theideal i ngach ceann de na Ballstáit lena mbaineann, i gcomhréir le dlí an Aontais agus leis an dlí náisiúnta is infheidhme. Níor cheart na Ballstáit a bheith in ann cúiteamh a éileamh ó chéile as na costais a eascraíonn as cur i bhfeidhm an Rialacháin seo. Mar sin féin, má thabhaíonn an Stát iarrthach costais mhóra nó eisceachtúla, maidir le haistriúchán na ndoiciméad sa cháschomhad atá le haistriú chuig an Stát iarrtha, ba cheart don údarás iarrtha moladh ón údarás iarrthach na costais a chomhroinnt a mheas. I gcásanna den sórt sin, ba cheart don údarás iarrthach agus don údarás iarrtha dul i gcomhairle le chéile chun teacht ar chomhaontú maidir le comhroinnt na gcostas. Go hidéalach, ba cheart na comhairliúcháin sin a dhéanamh sula n-eiseofar an iarraidh ar aistriú. Mura féidir teacht ar chomhaontú sula nglacfar an cinneadh glacadh leis an aistriú imeachtaí coiriúla, ba cheart an t-údarás iarrthach a bheith in ann cinneadh a dhéanamh an iarraidh a tharraingt siar i gcomhréir leis an Rialachán seo, nó an iarraidh a choinneáil ar bun agus an chuid de na costais a mheastar a bheith thar a bheith ard a sheasamh.

(62)

Ach úsáid a bhaint as foirm iarrata chaighdeánaithe a aistrítear go teangacha oifigiúla uile an Aontais, d’éascófaí comhar agus malartú faisnéise idir an t-údarás iarrthach agus an t-údarás iarrtha, rud a chiallódh go mbeidís in ann cinneadh a dhéanamh maidir leis an iarraidh ar an aistriú imeachtaí coiriúla ar bhealach níos tapúla agus níos éifeachtaí. Tríd an bhfoirm iarrata sin a úsáid, laghdófaí freisin na costais aistriúcháin agus chuirfí le caighdeán níos airde iarrataí.

(63)

Níor cheart a áireamh san fhoirm iarrata ach na sonraí pearsanta is gá chun cinneadh a éascú ón údarás iarrtha maidir leis an iarraidh ar an aistriú imeachtaí coiriúla. Ba cheart léiriú a bheith san fhoirm iarrata ar chatagóirí na sonraí pearsanta, mar shampla, cé acu is duine atá faoi dhrochamhras, duine atá cúisithe nó íospartach é nó í an duine lena mbaineann, chomh maith leis na réimsí sonracha a bhaineann le gach ceann de na catagóirí sin.

(64)

Chun aghaidh a thabhairt go héifeachtach ar an ngá a d’fhéadfadh a bheith le feabhas a chur ar an bhfoirm iarrata atá le húsáid chun an t-aistriú imeachtaí coiriúla a iarraidh nó chun an t-aistriú foirmeacha eile a iarraidh, ba cheart an chumhacht chun gníomhartha a ghlacadh i gcomhréir le hAirteagal 290 CFAE a tharmligean chuig an gCoimisiún maidir leis na hIarscríbhinní a ghabhann leis an Rialachán seo a leasú. Tá sé tábhachtach, go háirithe, go rachadh an Coimisiún i mbun comhairliúcháin iomchuí le linn a chuid oibre ullmhúcháin, lena n-áirítear ar leibhéal na saineolaithe, agus go ndéanfaí na comhairliúcháin sin i gcomhréir leis na prionsabail a leagtar síos i gComhaontú Idirinstitiúideach an 13 Aibreán 2016 maidir le Reachtóireacht Níos Fearr (29). Go sonrach, chun rannpháirtíocht chomhionann in ullmhú na ngníomhartha tarmligthe a áirithiú, faigheann Parlaimint na hEorpa agus an Chomhairle na doiciméid uile an tráth céanna leis na saineolaithe sna Ballstáit, agus bíonn rochtain chórasach ag a gcuid saineolaithe ar chruinnithe ghrúpaí saineolaithe an Choimisiúin a bhíonn ag déileáil le hullmhú na ngníomhartha tarmligthe.

(65)

Chun malartú tapa, díreach, idir-inoibritheach, iontaofa agus slán sonraí a bhaineann le cás a áirithiú, ba cheart, de ghnáth, an chumarsáid faoin Rialachán seo idir an t-údarás iarrthach agus an t-údarás iarrtha agus le rannpháirtíocht na n-údarás lárnach, i gcás inar ainmnigh Ballstát údarás lárnach, agus le Eurojust, a dhéanamh tríd an gcóras TF díláraithe de réir bhrí Rialachán (AE) 2023/2844 ó Pharlaimint na hEorpa agus ón gComhairle (30). Go háirithe, ba cheart an córas TF díláraithe a úsáid, de ghnáth, chun an fhoirm iarrata nó aon fhaisnéis agus doiciméid ábhartha eile a mhalartú, agus chun gach cumarsáid eile idir na húdaráis faoin Rialachán seo a mhalartú. I gcásanna ina mbeidh feidhm ag ceann amháin nó níos mó de na heisceachtaí dá bhforáiltear i Rialachán (AE) 2023/2844, go háirithe i gcás nach féidir nó nach iomchuí úsáid a bhaint as an gcóras TF díláraithe, ba cheart a bheith in ann modhanna eile cumarsáide a úsáid mar a shonraítear sa Rialachán sin.

(66)

Ba cheart na Ballstáit a bheith in ann úsáid a bhaint as bogearraí a d’fhorbair an Coimisiún (‘bogearraí cur chun feidhme tagartha’) seachas córas náisiúnta TF. Ba cheart na bogearraí cur chun feidhme tagartha a bheith bunaithe ar shocrú modúlach, rud a chiallaíonn go ndéantar na bogearraí a phacáistiú agus a sheachadadh ar leithligh ó chomhpháirteanna an chórais e-CODEX, a bunaíodh de bhun Rialachán (AE) 2022/850 ó Pharlaimint na hEorpa agus ón gComhairle (31), a bhfuil gá leo chun iad a nascadh leis an gcóras TF díláraithe. Leis an socrú sin, ba cheart a chur ar a gcumas do na Ballstáit an bonneagar cumarsáide breithiúnaí náisiúnta atá acu cheana a athúsáid nó a fheabhsú ar mhaithe le húsáid trasteorann.

(67)

Ba cheart don Choimisiún a bheith freagrach as na bogearraí cur chun feidhme tagartha a chruthú, a chothabháil agus a fhorbairt. Ba cheart don Choimisiún na bogearraí cur chun feidhme tagartha a dhearadh, a fhorbairt agus a chothabháil ar bhealach a mbeidh na rialaitheoirí in ann a áirithiú go gcomhlíonfar na ceanglais agus na prionsabail maidir le cosaint sonraí a leagtar síos i Rialachán (AE) 2018/1725 ó Pharlaimint na hEorpa agus ón gComhairle (32) agus i dTreoir (AE) 2016/680 ó Pharlaimint na hEorpa agus ón gComhairle (33), go háirithe na hoibleagáidí maidir le cosaint sonraí trí dhearadh agus mar réamhshocrú chomh maith le hardleibhéal cibearshlándála. Ba cheart bearta teicniúla iomchuí a bheith sna bogearraí cur chun feidhme tagartha freisin agus ba cheart dóibh na bearta eagraíochtúla is gá a chumasú chun leibhéal iomchuí slándála agus idir-inoibritheachta a áirithiú, agus é á chur san áireamh go bhféadfar catagóirí speisialta sonraí a mhalartú freisin. Ní phróiseálann an Coimisiún sonraí pearsanta i gcomhthéacs chruthú, chothabháil agus fhorbairt na mbogearraí cur chun feidhme tagartha.

(68)

Maidir leis na bogearraí cur chun feidhme tagartha a d’fhorbair an Coimisiún mar chóras cúil, ba cheart dóibh na sonraí staidrimh is gá chun críoch faireacháin a bhailiú ar bhonn ríomhchláraithe agus ba cheart na sonraí sin a tharchur chuig an gCoimisiún. I gcás ina roghnaíonn na Ballstáit córas náisiúnta TF a úsáid in ionad na mbogearraí cur chun feidhme tagartha a d’fhorbair an Coimisiún, d’fhéadfaí an córas sin a fheistiú chun na sonraí sin a bhailiú ar bhonn ríomhchláraithe agus, sa chás sin, ba cheart na sonraí sin a tharchur chuig an gCoimisiún. D’fhéadfaí gné lena bhféadfaí sonraí staidrimh ábhartha a aisghabháil a fheistiú freisin ar an nascóir e-CODEX.

(69)

Chun coinníollacha aonfhoirmeacha a áirithiú maidir le cur chun feidhme an Rialacháin seo, ba cheart cumhachtaí cur chun feidhme a thabhairt don Choimisiún chun córas TF díláraithe a bhunú. Ba cheart na cumhachtaí sin a fheidhmiú i gcomhréir le Rialachán (AE) Uimh. 182/2011 ó Pharlaimint na hEorpa agus ón gComhairle (34).

(70)

Ba cheart bunús dlí a chruthú leis an Rialachán seo chun sonraí pearsanta a mhalartú idir na Ballstáit chun na himeachtaí coiriúla a aistriú i gcomhréir le hAirteagal 8 agus Airteagal 10, pointe (a), de Threoir (AE) 2016/680. Mar sin féin, a mhéid a bhaineann le gnéithe ar bith eile maidir le sonraí pearsanta, amhail an tréimhse atá ann chun sonraí pearsanta a fhaigheann an t-údarás iarrthach a choinneáil, ba cheart próiseáil sonraí pearsanta ag an údarás iarrthach agus ag an údarás iarrtha a bheith faoi réir dhlí náisiúnta na mBallstát arna nglacadh de bhun Threoir (AE) 2016/680. Ba cheart an t-údarás iarrthach agus an t-údarás iarrtha a mheas mar rialaitheoirí i ndáil le próiseáil na sonraí pearsanta faoin Treoir sin. D’fhéadfadh na húdaráis lárnacha tacaíocht riaracháin a thabhairt don údarás iarrthach agus don údarás iarrtha agus, a mhéid atá siad ag próiseáil sonraí pearsanta thar ceann na rialaitheoirí sin, ba cheart a mheas gur próiseálaithe de chuid an rialaitheora lena mbaineann iad. Maidir le próiseáil sonraí pearsanta a dhéanann Eurojust, ba cheart feidhm a bheith ag Rialachán (AE) 2018/1725 i gcomhthéacs an Rialacháin seo gan dochar do na rialacha sonracha maidir le cosaint sonraí a leagtar síos i Rialachán (AE) 2018/1727. Níor cheart aon ní sa Rialachán seo a léirmhíniú mar ní lena leathnaítear cearta rochtana chuig córais faisnéise eile de chuid an Aontais faoi ghníomhartha dlí an Aontais lena mbunaítear na córais sin.

(71)

Ós rud é nach féidir leis na Ballstáit cuspóir an Rialacháin seo, is é sin aistriú imeachtaí coiriúla, a ghnóthú go leordhóthanach agus, de bharr a fhairsinge agus a éifeachtaí, gur fearr is féidir é a ghnóthú ar leibhéal an Aontais, féadfaidh an tAontas bearta a ghlacadh, i gcomhréir le prionsabal na coimhdeachta a leagtar amach in Airteagal 5 den Chonradh ar an Aontas Eorpach (CAE). I gcomhréir le prionsabal na comhréireachta mar a leagtar amach san Airteagal sin, ní théann an Rialachán seo thar a bhfuil riachtanach chun an cuspóir sin a ghnóthú.

(72)

I gcomhréir le hAirteagal 3 de Phrótacal Uimh. 21 maidir le seasamh na Ríochta Aontaithe agus na hÉireann i dtaca leis an limistéar saoirse, slándála agus ceartais, atá i gceangal le CAE agus le CFAE, tá fógra tugtha ag Éirinn, le litir an 13 Iúil 2023, gur mian léi a bheith rannpháirteach i nglacadh agus i gcur i bhfeidhm an Rialacháin seo.

(73)

I gcomhréir le hAirteagail 1 agus 2 de Phrótacal Uimh. 22 maidir le seasamh na Danmhairge, atá i gceangal le CAE agus le CFAE, níl an Danmhairg rannpháirteach i nglacadh an Rialacháin seo agus níl sí faoi cheangal aige ná faoi réir a chur i bhfeidhm.

(74)

Chuathas i gcomhairle leis an Maoirseoir Eorpach ar Chosaint Sonraí i gcomhréir le hAirteagal 42(1) de Rialachán (AE) 2018/1725 agus thug sé an tuairim uaidh an 22 Bealtaine 2023 (35),