BREITHIÚNAS NA CÚIRTE (an Deichiú Dlísheomra)

6 Márta 2025  ( * )

(Tarchur chun réamhrialú – Comhshaol – Treoir 2011/92/AE – Measúnú ar éifeachtaí tionscadal poiblí agus príobháideach áirithe ar an gcomhshaol – Airteagal 2(1) agus Airteagal 4(2) – Tionscadail faoi Iarscríbhinn II – Tionscadail forbartha uirbigh – Airteagal 4(4) agus (5) – Oibleagáidí an fhorbróra agus an údaráis inniúil i gcás ina gcinneann an Ballstát lena mbaineann an cinneadh dá bhforáiltear i míreanna 4 agus 5 a éileamh le haghaidh tionscadail den sórt sin – Barúlacha arna gcur isteach ag tríú páirtí a chur san áireamh, lena léirítear tionchar a d’fhéadfadh a bheith ag an tionscadal lena mbaineann ar speiceas ainmhíoch a chumhdaítear leis an gcosaint dhian dá bhforáiltear in Airteagal 12 de Threoir 92/43/CEE)

I gCás C‑41/24,

IARRAIDH ar réamhrialú faoi Airteagal 267 CFAE, ón Ard-Chúirt (Éire), trí bhreith an 1 Nollaig 2023, a fuarthas ag an gCúirt an 22 Eanáir 2024, sna himeachtaí

Waltham Abbey Residents Association

v

an Bord Pleanála,

Éire,

an tArd-Aighne,

idiragraí:

O’Flynn Construction Co. Unlimited Company,

tugann AN CHÚIRT (an Deichiú Dlísheomra),

agus í comhdhéanta mar seo a leanas: D. Gratsias, Uachtarán Dlísheomra, J. Passer (Rapóirtéir) agus B. Smulders, Breithiúna,

Abhcóide Ginearálta: J. Kokott,

Cláraitheoir: A. Calot Escobar,

ag féachaint don nós imeachta i scríbhinn,

tar éis breithniú a dhéanamh ar na barúlacha arna dtíolacadh thar ceann na bpáirtithe seo a leanas:

–	Waltham Abbey Residents Association, ag J. Devlin, SC, J. Kenny, BL, agus D. Healy, Aturnae,

–	An Bord Pleanála, ag B. Foley, SC, A. Carroll, BL, agus P. Reilly, Aturnae,

–	Éire, ag M. Browne, Príomh-Aturnae Stáit, S. Finnegan, K. Hoare agus A. Joyce, i gcáil Gníomhairí, le cúnamh ó D. McGrath, SC, F. Valentine, SC, agus E. O’Callaghan, BL,

–	an Coimisiún Eorpach, ag M. Noll-Ehlers agus N. Ruiz García, i gcáil Gníomhairí,

tar éis cinneadh a dhéanamh, i ndiaidh an tAbhcóide Ginearálta a éisteacht, breith a thabhairt ar an gcás gan Tuairim,

an Breithiúnas seo a leanas:

Breithiúnas

1

Baineann an iarraidh ar réamhrialú le léiriú ar Threoir 2011/92/AE ó Pharlaimint na hEorpa agus ón gComhairle an 13 Nollaig 2011 maidir le measúnú a dhéanamh ar éifeachtaí tionscadal poiblí agus príobháideach áirithe ar an gcomhshaol (IO 2012 L 26, lch. 1), arna leasú le Treoir 2014/52/AE ó Pharlaimint na hEorpa agus ón gComhairle an 16 Aibreán 2014 (IO 2014 L 124, lch. 1) (‘Treoir 2011/92’).

2	Rinneadh an iarraidh seo in imeachtaí idir Waltham Abbey Residents Association, cumann cónaitheoirí, agus an Bord Pleanála (Éire; ‘an Bord’), Éire agus an tArd-Aighne (Éire) maidir le húdarú, arna dheonú ag an mBord, do thionscadal forbartha straitéiseach do thithíocht chónaitheach a thógáil.

An dlí

Dlí an Aontais Eorpaigh

Treoir 2011/92

3	Foráiltear le haithrisí 7 go 9 de Threoir 2011/92 mar a leanas:

‘(7) Níor cheart údarú a dheonú do thionscadail phoiblí agus phríobháideacha ar dócha go mbeidh éifeachtaí suntasacha acu ar an gcomhshaol ach amháin tar éis measúnú a dhéanamh ar na héifeachtaí suntasacha ar dócha go mbeidh ag tionscadail den sórt sin ar an gcomhshaol. [...]

(8) Bíonn éifeachtaí suntasacha ag tionscadail a bhaineann le haicmí áirithe ar an gcomhshaol agus ba cheart go mbeidh na tionscadail sin, i bprionsabal, faoi réir measúnú córasach.

(9) Ní gá go mbeidh éifeachtaí suntasacha ag tionscadail a bhaineann le haicmí eile ar an gcomhshaol i ngach cás agus ba cheart go mbeidh tionscadail den sórt sin faoi réir measúnú i gcás ina measfaidh na Ballstáit gur dócha go mbeidh éifeachtaí suntasacha acu ar an gcomhshaol.’

[Aistriúchán neamhoifigiúil]

4	Foráiltear le hAirteagal 2(1) den Treoir sin mar a leanas:

‘Glacfaidh na Ballstáit na bearta uile is gá chun a áirithiú, sula dtabharfar toiliú, go mbeidh tionscadail ar dócha go mbeidh éifeachtaí suntasacha acu ar an gcomhshaol de bhua, inter alia, a gcineáil, a méide nó a suímh faoi réir ceanglais maidir le toiliú forbartha agus measúnú maidir lena n‑éifeachtaí ar an gcomhshaol. Déantar na tionscadail sin a shainmhíniú in Airteagal 4.’

[Aistriúchán neamhoifigiúil]

5	De réir Airteagal 3(1) den Treoir sin:

‘Déanfar sa mheasúnú ar an tionchar ar an gcomhshaol éifeachtaí suntasacha díreacha agus neamhdhíreacha tionscadail a aithint, a thuairisciú agus a mheasúnú ar mhodh cuí faoi threoir gach cáis aonair ar na tosca seo a leanas:

[...]

b) an bhithéagsúlacht, agus aird ar leith á tabhairt ar speicis agus ar ghnáthóga a chosnaítear faoi Threoir 92/43/CEE [ón gComhairle an 21 Bealtaine 1992 maidir le gnáthóga nádúrtha agus fána agus flóra fiáine a chaomhnú (IO 1992 L 206, lch. 7), arna leasú le Treoir 2013/17/AE ón gComhairle an 13 Bealtaine 2013 (IO 2013 L 158, lch. 193) (“Treoir 92/43”)] agus Treoir 2009/147/CE [ó Pharlaimint na hEorpa agus ón gComhairle an 30 Samhain 2009 maidir le héin fhiáine a chaomhnú (IO 2010 L 20, lch. 7)];

[...]’

[Aistriúchán neamhoifigiúil]

6	Foráiltear le hAirteagal 4 de Threoir 2011/92 mar seo a leanas:

‘1. Faoi réir Airteagal 2(4), beidh na tionscadail a liostaítear in Iarscríbhinn I faoi réir measúnú, i gcomhréir le hAirteagail 5 go 10.

2. Faoi réir Airteagal 2(4), maidir leis na tionscadail a liostaítear in Iarscríbhinn II, cinnfear na Ballstáit ar cheart go mbeidh an tionscadal faoi réir measúnú, i gcomhréir le hAirteagail 5 go 10. Déanfaidh na Ballstáit an cinneadh sin ar an mbonn seo a leanas:

a) scrúdú ar bhonn cás ar chás;

nó

b) tairseacha nó critéir arna socrú ag an mBallstát.

Féadfaidh na Ballstáit a chinneadh an dá nós imeachta dá dtagraítear i míreanna (a) agus (b) a chur i bhfeidhm.

3. I gcás ina ndéanfar scrúdú ar bhonn cás ar chás nó ina socrófar tairseacha nó critéir de bhun mhír 2, cuirfear na critéir roghnúcháin ábhartha a leagtar amach in Iarscríbhinn III san áireamh. Féadfaidh na Ballstáit thairseacha nó critéir a shocrú chun a chinneadh na cásanna nach gá go mbeidh tionscadail faoi réir an chinnidh faoi mhíreanna 4 agus 5 nó faoi réir measúnú ar an tionchar ar an gcomhshaol, agus/nó tairseacha nó critéir chun a chinneadh na cásanna ina ndéanfar measúnú ar an tionchar ar an gcomhshaol ar thionscadail ar aon chuma gan iad a bheith faoi réir an chinnidh faoi mhíreanna 4 agus 5.

4. I gcás ina gcinnfidh na Ballstáit cinneadh a éileamh le haghaidh na tionscadail a liostaítear in Iarscríbhinn II, cuirfidh an forbróir faisnéis ar fáil maidir le tréithe an tionscadail agus leis na héifeachtaí suntasacha ar dócha go mbeidh aige ar an gcomhshaol. Sonraítear in Iarscríbhinn II.A an liosta mionsonraithe den fhaisnéis a sholáthrófar. Cuirfear an forbróir san áireamh, i gcás inarb infheidhme, torthaí measúnuithe ábhartha eile ar na héifeachtaí ar an gcomhshaol atá ar fáil arna ndéanamh de bhun reachtaíocht an Aontais seachas an Treoir seo. Féadfaidh an forbróir tuairisc a sholáthar freisin ar aon ghné den tionscadal agus/nó na bearta atá beartaithe d’fhonn a sheachaint nó bac a chur ar éifeachtaí díobhálacha suntasacha ar an gcomhshaol d’fhéadfadh a bheith i gceist murach sin.

5. Déanfaidh an t‑údarás inniúil a chinneadh ar bhonn na faisnéise arna soláthar ag an bhforbróir i gcomhréir le mír 4 agus, i gcás inarb infheidhme, torthaí an scagtha nó na measúnuithe ar an tionchar ar an gcomhshaol arna ndéanamh de bhun reachtaíocht an Aontais seachas an Treoir seo. Cuirfear an cinneadh ar fáil don phobal agus:

a) sonrófar, i gcás ina gcinnfear go bhfuil gá le measúnú ar an tionchar ar an gcomhshaol, na príomhchúiseanna leis an gcinneadh an measúnú sin a éileamh i bhfianaise na gcritéar ábhartha a liostaítear in Iarscríbhinn III; nó

b) sonrófar, i gcás ina gcinnfear nach bhfuil gá le measúnú ar an tionchar ar an gcomhshaol, na príomhchúiseanna gan an measúnú sin a éileamh i bhfianaise na gcritéar ábhartha a liostaítear in Iarscríbhinn III, agus, ar mholadh ón bhforbróir, aon ghné den tionscadal agus/nó na bearta atá beartaithe d’fhonn a sheachaint nó bac a chur ar éifeachtaí díobhálacha suntasacha ar an gcomhshaol a d’fhéadfadh a bheith i gceist murach sin.

6. Áiritheoidh na Ballstáit go ndéanfaidh an t‑údarás inniúil a chinneadh a luaithe is féidir agus laistigh de thréimhse nach faide ná 90 lá ón dáta a chuirfidh an forbróir an fhaisnéis uile is gá de bhun mhír 4 isteach. I gcásanna eisceachtúla, mar shampla maidir le cineál, castacht, suíomh nó méid an tionscadail, féadfaidh an t‑údarás inniúil síneadh ama a chur leis an tréimhse sin chun cinneadh a dhéanamh; sa chás sin, cuirfidh an t‑údarás inniúil an forbróir ar an eolas i scríbhinn faoi na cúiseanna lena dtabharfaidh údar leis an síneadh ama agus faoin dáta a bheidh a chinneadh beartaithe.’

[Aistriúchán neamhoifigiúil]

7	Tá liosta in Iarscríbhinn II.A a ghabhann leis an Treoir sin maidir leis ‘an [bh]faisnéis a bheidh le soláthar ag an bhforbróir maidir leis na tionscadail a liostaítear in Iarscríbhinn II’. Is mar seo a leanas atá an fhoclaíocht san Iarscríbhinn sin:

‘1. Tuairisc ar an tionscadal, lena n‑áirítear, inter alia, an méid seo a leanas:

a) tuairisc ar shaintréithe fisiceacha an tionscadail ina hiomláine agus, i gcás inarb infheidhme, ar na hoibreacha scartála;

b) tuairisc ar shuíomh an tionscadail, agus aird ar leith á tabhairt d’íogaireacht comhshaoil na limistéar geografach ar dócha go ndéanfar difear dóibh.

2. Tuairisc ar na gnéithe den chomhshaol ar dócha go ndéanfaidh an tionscadal difear suntasach dóibh.

3. Tuairisc ar aon éifeacht shuntasach, i méid na faisnéise atá ar fáil maidir leis na héifeachtaí sin, ar dócha go mbeidh ag an tionscadal ar an gcomhshaol a eascraíonn as na nithe seo a leanas:

a) na hiarmhair agus na hastaíochtaí a bhfuiltear ag súil leo agus giniúint dramhaíola, i gcás inarb infheidhme;

b) úsáid acmhainní nádúrtha, go háirithe an ithir, an talamh, an t‑uisce agus an bhithéagsúlacht.

4. Cuirfear critéir Iarscríbhinn III san áireamh, i gcás inarb infheidhme, agus an fhaisnéis á bailiú i gcomhréir le míreanna 1 go 3.’

[Aistriúchán neamhoifigiúil]

8	Foráiltear le hIarscríbhinn III a ghabhann leis an Treoir sin do na ‘critéir chun a chinneadh ar cheart measúnú ar an tionchar ar an gcomhshaol a dhéanamh ar na tionscadail a liostaítear in Iarscríbhinn II’.

[Aistriúchán neamhoifigiúil]

Treoir 2014/52

9	De réir aithrisí 11 agus 29 de Threoir 2014/52:

‘(11) Ba cheart go gcabhróidh na bearta a ghlacfar chun éifeachtaí díobhálacha suntasacha ar an gcomhshaol, go háirithe ar speicis agus ar ghnáthóga a chosnaítear faoi [Threoir 92/43] agus faoi Threoir [2009/147], a sheachaint, a chosc, a laghdú agus, i gcás inar féidir, a fhritháireamh, le aon mheath ar cháilíocht an chomhshaoil agus ar aon ghlanchailliúint bithéagsúlachta a sheachaint, i gcomhréir leis na gealltanais a thug an tAontas [Eorpach] i gcomhthéacs Choinbhinsiún [na Náisiún Aontaithe maidir leis an Éagsúlacht Bhitheolaíoch, arna shíniú in Rio de Janeiro an 5 Meitheamh 1992], agus le cuspóirí agus gníomhaíochtaí Straitéis Bhithéagsúlachta an Aontais go dtí 2020 a leagtar amach sa Teachtaireacht ón gCoimisiún [chuig Parlaimint na hEorpa, chuig an gComhairle, chuig Coiste Eacnamaíoch agus Sóisialta na hEorpa agus chuig Coiste na Réigiún] an 3 Bealtaine 2011 dar teideal “Árachas saoil agus caipiteal nádúrtha dúinn – Straitéis Bhithéagsúlachta an Aontais go dtí 2020” (COM (2011) 244 final).

[...]

(29) Agus cinneadh á dhéanamh ar dócha go mbeidh éifeachtaí suntasacha ag tionscadal ar an gcomhshaol, ba cheart do na húdaráis inniúla na critéir is ábhartha atá le cur san áireamh a aithint agus faisnéis a d’fhéadfadh a bheith ar fáil tar éis measúnuithe eile a cheanglaítear le reachtaíocht an Aontais a chur san áireamh chun an nós imeachta um an scagadh a chur i bhfeidhm go héifeachtach agus go trédhearcach. I ndáil leis sin, ba cheart ábhar an chinnidh maidir le scagadh a shonrú, go háirithe i gcás nach bhfuil gá le measúnú ar an tionchar ar an gcomhshaol. Ina theannta sin, is dea-chleachtas riaracháin é barúlacha ar bhonn spontáineach a d’fhéadfadh a bheith faighte ó fhoinsí eile a chur san áireamh, amhail daoine aonair nó údaráis phoiblí, cé nach bhfuil gá le comhairliúcháin fhoirmiúla ag céim an scagtha.’

[Aistriúchán neamhoifigiúil]

Treoir 92/43

10	Foráiltear le hAirteagal 6(3) de Threoir 92/43 mar a leanas:

‘Beidh aon phlean nó tionscadal nach bhfuil baint dhíreach aige le bainistíocht an tsuímh nó nach bhfuil gá leis ach ar dócha go mbeidh éifeacht shuntasach aige air, ina aonar nó in éineacht le pleananna nó tionscadail eile, faoi réir measúnú iomchuí ar a impleachtaí don suíomh i bhfianaise chuspóirí chaomhnú an tsuímh. I bhfianaise chonclúidí mheasúnú na n‑impleachtaí don suíomh agus faoi réir fhorálacha mhír 4, ní aontóidh na húdaráis náisiúnta inniúla leis an bplean nó leis an tionscadal go dtí go bhfionnfaidh siad nach ndéanfaidh sé dochar do shláine an tsuímh lena mbaineann agus, más iomchuí, tar éis tuairim a fháil ón bpobal i gcoitinne.’

[Aistriúchán neamhoifigiúil]

11	Foráiltear le hAirteagal 12(1) den Treoir sin mar a leanas:

‘Déanfaidh na Ballstáit na bearta is gá chun córas cosanta déine a bhunú do na speicis ainmhíocha a liostaítear i mír (a) d’Iarscríbhinn IV ina raon nádúrtha, lena gcuirfear toirmeasc ar an méid seo a leanas:

a) aon chineál gabhála nó maraithe d’eiseamail na speiceas sin san fhiántas;

b) cur isteach d’aon ghnó ar na speicis sin, go háirithe le linn na tréimhse pórúcháin, tógála, geimhrithe agus imirce;

c) uibheacha a scriosadh nó a thógáil d’aon ghnó ón bhfiántas;

d) meath ar láthair phórúcháin nó ar áiteanna scíthe nó iad a scriosadh.’

[Aistriúchán neamhoifigiúil]

12	I mír (a) d’Iarscríbhinn IV a ghabhann leis an Treoir sin, tagraítear d’ ‘aon speiceas’ d’ialtóg a bhaineann leis an bhfo-ord ‘Microchiroptera’.

[Aistriúchán neamhoifigiúil]

Dlí na hÉireann

Na Rialacháin um Pleanáil agus Forbairt, 2001

13	Foráiltear le hAirteagal 109 de na Rialacháin um Pleanáil agus Forbairt, 2001, sa leagan is infheidhme maidir leis an díospóid sna príomhimeachtaí, mar a leanas:

‘[...]

(2B)(a) I gcás nach mbeidh tuarascáil mheasúnaithe ar an tionchar ar an gcomhshaol ag gabháil le hiarratas ar fhorbairt faoi bhun na tairsí seasta ach go mbeidh an fhaisnéis a shonraítear i Sceideal 7A agus i mír (2A) ag gabháil leis, nó i gcás ina gcuirfidh iarratasóir an fhaisnéis sin faoi bhráid an Bhoird i gcomhréir le ceanglas faoi mhír (2)(b)(ii), déanfaidh an Bord, ar a laghad, scrúdú ar chineál, ar mhéid nó ar shuíomh an tionscadail chun críocha an scrúdaithe.

(b) Déanfaidh an Bord cinneadh i gcomhthéacs an scagtha agus

(i) i gcás ina gcinnfidh sé nár dócha go mbeidh éifeachtaí suntasacha ar an gcomhshaol mar thoradh ar an tionscadal beartaithe, go gcinnfidh sé nach mbeidh gá le measúnú ar an tionchar ar an gcomhshaol, nó

(ii) i gcás ina gcinnfidh sé gur dócha go mbeidh éifeachtaí suntasacha ar an gcomhshaol mar thoradh ar an tionscadal beartaithe, déanfaidh sé an méid seo a leanas:

(I) a chinneadh gur dócha go mbeidh tionchar den sórt sin ag an tionscadal sin, agus

(II) le fógra i scríbhinn a chuirfear in iúl don iarratasóir, a iarraidh ar an iarratasóir measúnú ar an tionchar ar an gcomhshaol a chur isteach agus na ceanglais a leagtar amach in Airteagal 112 a chomhlíonadh.

[...]

(4) (a) Cuirfidh an Bord, agus a chinneadh á dhéanamh i gcomhthéacs an scagtha faoi mhír (2B) chun a chinneadh ar dócha go mbeidh éifeachtaí suntasacha ar an gcomhshaol mar thoradh ar an bhforbairt bheartaithe, na cúinsí seo a leanas san áireamh:

(i) na critéir a leagtar amach i Sceideal 7,

(ii) an fhaisnéis arna cur isteach i gcomhréir le Sceideal 7A,

(iii) an fhaisnéis bhreise, más ann, dá dtagraítear i mír (2A)(a) agus an tuairisc, más ann, dá dtagraítear i mír (2A)(b),

(iv) torthaí, i gcás inarb ábhartha, an scagtha nó na measúnuithe ar an tionchar ar an gcomhshaol atá ar fáil arna ndéanamh de bhun reachtaíocht an Aontais seachas [Treoir 2011/92], agus

(v) éifeachtaí suntasacha ar shuíomh, ar limistéar, ar spás, ar áit nó ar ghné a mhéid is iomchuí maidir le tionscadal a bhféadfadh a bheith ar nó i seo a leanas, nó a bhféadfadh tionchar a bheith aige ar seo a leanas:

(I) suíomh Eorpach,

(II) limistéar ina ábhar d’fhógra de bhun Airteagal 16(2)(b) den Acht um Fhiadhúlra (Leasú) 2000 (Uimh. 38 de 2000),

(III) limistéar atá ainmnithe mar limistéar oidhreachta nádúrtha de bhun Airteagal 18 den Acht um Fhiadhúlra (Leasú) 2000,

(IV) talamh a bhunófar nó a aithneofar mar anaclann dúlra de réir bhrí Airteagail 15 nó 16 den Acht um Fhiadhúlra 1976 (Uimh. 39 de 1976),

(V) talamh atá ainmnithe mar thearmann do fhána agus flóra de bhun Airteagal 17 den Acht um Fhiadhúlra 1976,

(VI) limistéar, suíomh nó gné ina ndírítear ar an éiceolaíocht ar chuspóir de phlean forbartha nó de phlean forbartha limistéir áitiúil, de dhréachtphlean forbartha nó de dhréachtphlean forbartha limistéir áitiúil, nó d’athrú beartaithe ar phlean forbartha don limistéar ina mbeartófar an fhorbairt, é nó í a choimeád, a chaomhnú nó a chosaint, nó

(VII) plean nó suíomh arna chur an tAire Cultúir, Oidhreachta agus Gaeltachta san áireamh ar liosta beartaithe de limistéir oidhreachta náisiúnta atá foilsithe ar shuíomh gréasáin na Seirbhíse Páirceanna Náisiúnta agus Fiadhúlra.

(b) Déanfar an cinneadh arna dhéanamh an Bord i gcomhthéacs an scagtha de bhun fhomhír (2B) cé acu gur dócha nó nár dócha go mbeidh éifeachtaí suntasacha ar an gcomhshaol mar thoradh ar thionscadal forbartha, de réir mar a bheidh, lena n‑áirítear na príomhchúiseanna agus na príomhchúinsí, i bhfianaise na gcritéar ábhartha a liostaítear i Sceideal 7, ar a bhfuil an cinneadh sin bunaithe, agus aon fhógra faoi fhomhír (2C)(c), a chur agus a choimeád in éineacht leis na doiciméid a bhaineann leis an iarratas ar fhorbairt.

(5) I gcás ina sonrófar sa chinneadh maidir leis an scagadh de bhun fhomhír (2B) nár dócha go mbeidh éifeachtaí suntasacha ag an bhforbairt bheartaithe ar an gcomhshaol agus gur sholáthair an t‑iarratasóir, de bhun fhomhír (2A)(b), tuairisc ar na gnéithe, más ann, den fhorbairt bheartaithe agus ar na bearta, más ann, a bheidh beartaithe d’fhonn a sheachaint nó cosc a chur ar éifeachtaí díobhálacha suntasacha ar an gcomhshaol a d’fhéadfadh a bheith i gceist murach sin, go sonrófar an Bord na gnéithe sin, más ann, agus na bearta sin, más ann, sa chinneadh sin.

[...]’

[Aistriúchán neamhoifigiúil]

14	Foráiltear le hAirteagal 299B(2) de na Rialachán sin mar a leanas:

‘(b) (i) I gcás inar sholáthair an t‑iarratasóir an fhaisnéis dá dtagraítear i mír (1)(b)(ii)(II), déanfaidh an Bord scrúdú, ar a laghad, ar chineál, ar mhéid nó ar shuíomh na forbartha chun críocha an chinnidh maidir leis an scagadh a dhéanamh.

(ii) Déanfaidh an Bord cinneadh maidir leis an scagadh agus

(I) i gcás ina gcinnfidh sé nár dócha go mbeidh éifeachtaí suntasacha ar an gcomhshaol mar thoradh ar an bhforbairt bheartaithe, cinnfidh sé nach bhfuil gá le measúnú ar an tionchar ar an gcomhshaol, nó

(II) i gcás ina gcinnfidh sé gur dócha go mbeidh éifeachtaí suntasacha mar thoradh ar an bhforbairt bheartaithe, déanfaidh sé an méid seo a leanas:

(A) a chinneadh gur dócha go mbeidh éifeachtaí den sórt sin ag an bhforbairt, agus

(B) a dhiúltú idirghníomhú leis an iarratasóir i gcomhréir le hAirteagal 8(3)(a) den Acht um Pleanáil agus Forbairt (Tithíocht agus Tionóntachtaí Cónaithe) 2016 (“Acht 2016”)).’

[Aistriúchán neamhoifigiúil]

Acht 2016

15	Is mar seo a leanas atá an fhoclaíocht in Airteagal 8(3) d’Acht 2016:

‘(a) Féadfaidh an Bord a chinneadh diúltú gníomhú le haon iarratas a dhéanfar chuige de bhun Airteagal 4(1) i gcás ina measfaidh sé go bhfuil an t‑iarratasóir ar údarú, nó an tuarascáil mheasúnaithe ar an tionchar ar an gcomhshaol nó ráiteas tionchair Natura más amhlaidh atá, neamhleor nó neamhiomlán, agus, inter alia, na rialacháin maidir le húdarú agus aon rialachán arna dhéanamh de bhun Airteagal 12 nó Airteagal 177 den Acht um Pleanáil agus Forbairt, 2000, nó aon chomhairliúchán arna dhéanamh de bhun Airteagal 6, á gcur san áireamh.

[...]’

[Aistriúchán neamhoifigiúil]

16	Foráiltear le hAirteagal 9(5) d’Acht 2016 mar a leanas:

‘I gcás nach bhfeidhmeoidh an Bord a fheidhmeanna faoi Airteagal 8(3) chun a dhiúltú gníomhú ar iarratas, ní léireofar aon ní san fhomhír sin sa chaoi go gcuirfidh cosc ar an mBord diúltú údarú a dheonú do thionscadal forbartha straitéisí do thithíocht i leith iarratas faoi Airteagal 4 i gcás ina measfaidh sé go mbeadh an cineál forbartha atá beartaithe róluath mar gheall ar chineál neamhleor nó neamhiomlán na tuarascála measúnaithe ar an tionchar ar an gcomhshaol nó ráiteas tionchair Natura a cuireadh isteach leis an iarratas ar údarú, más gá.’

An díospóid sna príomhimeachtaí agus na ceisteanna a tharchuirtear le haghaidh réamhrialú

17	Baineann an díospóid sna príomhimeachtaí le tionscadal forbartha straitéiseach chun 123 árasán agus na hoibreacha a bhaineann leo a thógáil i mBaile an Chollaigh (Éire).

18

I bhfianaise an iarratais ar údarú maidir le forbairt an tionscadail sin, rinneadh staidéar ar chrainn agus ullmhaíodh dhá thuarascáil scagtha thar ceann an fhorbróra, an chéad cheann chun críocha an mheasúnaithe ar an tionchar ar an gcomhshaol a bheidh ag an tionscadal sin dá dtagraítear i dTreoir 2011/92 (‘MTC’) agus an dara ceann chun críocha an mheasúnaithe iomchuí ar thionchar an tionscadail chéanna ar shuíomhanna arna n‑ainmniú mar limistéir chaomhantais speisialta nó mar limistéir faoi chosaint speisialta, dá bhforáiltear in Airteagal 6(3) de Threoir 92/43.

19

Ní áirítear sa chéad tuarascáil anailís shonrach ar fhána agus flóra, ní thagraítear inti do thionchar an tionscadail chéanna ar na hialtóga agus ní thagraítear don bhithéagsúlacht sa tábla measúnaithe a ghabhann léi. Sa dara tuarascáil, ní luaitear tionchar iarbhír na tuarascála sin ar na hialtóga go sonrach ach oiread, ós rud é nach n‑áirítear sa dara tuarascáil sin ach tagairt ghinearálta don fhíoras ‘go bhféadfadh suaitheadh ar fhána a bheith mar thoradh díreach ar chaillteanas gnáthóige (e.g. boscaí neadacha d’ialtóga), nó go hindíreach ar thorann, creathanna agus gníomhaíochtaí méadaithe a bhaineann le tógáil agus oibriú’. Tá an t‑aon tagairt don bhithéagsúlacht ar fáil sa dara tuarascáil sin, nach dtagraíonn ach do shuíomhanna Natura 2000 seachas d’éiceachóras an tsuímh fhorbartha féin.

20

Rinneadh an measúnú ar chrainn in aon lá amháin agus aithníodh 13 chrann ar ghá iad a leagan. I gcomhthéacs an mheasúnaithe sin, níor cuireadh san áireamh úsáid iarbhír nó fhéideartha na gcrann ag ialtóga nó ar úsáideadh an suíomh lena mbaineann ag ialtóga d’fhonn dul ar thóir foráiste nó taistil. Mar sin féin, cé go moltar i dtuarascáil scagtha MTC an fásra atá ar an suíomh sin cheana féin a chaomhnú ‘a mhéid is féidir’ agus go ndearbhaítear inti go bhfágfadh a fheabhsú trí bhearta tírdhreachtaithe nua go mbeadh tionchar dearfach ag an tionscadal atá i gceist sna príomhimeachtaí ar an mbithéagsúlacht, go leagtar roinnt crann, lena n‑áirítear roinnt cufróg agus dhá cheann de na sé dhair atá ar an suíomh sin.

21

An 7 Iúil 2020, chuir an t‑iarratasóir sna príomhimeachtaí barúlacha faoi bhráid an Bhoird inar sonraíodh go raibh an suíomh forbartha beartaithe suite i ndlúthghaireacht do chonaire bhitheolaíoch ar abhainn na Laoi, inar tuairiscíodh ar bhreathnuithe leis an tsúil d’ialtóga ar an suíomh céanna agus inar tugadh le fios, ar bhonn staidéar ar fhána na hialtóige a rinneadh in 2016, inter alia, go ‘[léiríodh] suirbhéanna reatha ar ialtóga sa dlúthghaireacht go bhfuil éagsúlacht speiceas difriúil d’ialtóg a úsáideann an chonair abhann agus [go raibh] tionchar cinntitheach ar na hainmhithe sin [mar thoradh] ar an mbaol go gcaillfí boscaí neadacha, go gcaillfí limistéir bheatha agus go gcuirfí isteach ar thaisteal’.

22

An 11 Meán Fómhair 2020, mhol an scrúdaitheoir go ndeonófaí an t‑údarú. Bhí an scrúdaitheoir den tuairim, go ginearálta, nár chuir an suíomh lena mbaineann gnáthóga leordhóthanacha ar fáil do fhiadhúlra nó do speicis atáthar ag iarraidh a chaomhnú, ach dhearbhaigh sé gur ghá crainn a leagan i gcomhréir le comhairle ó éiceolaí atá cáilithe go cuí chun tionchar a d’fhéadfadh a bheith ag an tionscadail atá i gceist sna príomhimeachtaí ar ialtóga a sheachaint. Ní dhearna an scrúdaitheoir scagadh MTC, ag cur as an áireamh an gá le scagadh den sórt sin tar éis réamhstaidéir.

23

Le cinneadh an 16 Meán Fómhair 2020, d’údaraigh an Bord an tionscadal gan MTC a éileamh agus gan faisnéis eile a bhailiú maidir le suíomh ialtóg. Ar bhonn a scagtha féin ar an ngá an tionscadal a chur faoi réir MTC, mheas sé ‘[gur aithníodh] agus [gur tuairiscíodh] sa tuarascáil arna cur an forbróir isteach éifeachtaí díreacha, neamhdhíreacha agus carnacha na forbartha beartaithe ar an gcomhshaol go leordhóthanach’ agus chinn sé ‘mar gheall ar chineál, ar mhéid agus ar láthair an tsuímh lena mbaineann, nach dócha go mbeadh éifeachtaí suntasacha ag an bhforbairt atá beartaithe ar an gcomhshaol’. Níor fhiafraigh an forbróir d’aon fhaisnéis bhreise tar éis don iarratasóir barúlacha a thabhairt sna príomhimeachtaí. I gcomhréir leis an moladh a rinne an scrúdaitheoir, áfach, áirítear san údarú a deonaíodh an coinníoll seo a leanas:

‘21. Caithfear crainn atá le baint den suíomh a leagan ag deireadh an tsamhraidh nó san fhómhar. Ní mór aon núis a fulaingeoidh ialtóga ar an suíomh a dhéanamh ar bhealach a chomhaontófar i scríbhinn leis an mbord pleanála atá inniúil, ar thuairim éiceolaí cáilithe.

Cúiseanna: Ar mhaithe le caomhnú an dúlra.’

24

Agus í ag éisteacht le caingean a thionscain an t‑iarratasóir sna príomhimeachtaí i gcoinne an chinnidh sin, fiafraíonn an Ard-Chúirt (Éire), arb í an chúirt a rinne an tarchur í, sa chéad áit, an gceanglaítear le Treoir 2011/92, inter alia, go mbaileoidh an forbróir an fhaisnéis ábhartha uile maidir leis na speicis nó na gnáthóga a d’fhéadfadh an tionscadal lena mbaineann difear a dhéanamh dóibh trí staidéir eolaíocha iomchuí a dhéanamh nó a bhailiú chun aon amhras a chur as an áireamh maidir leis na héifeachtaí suntasacha a d’fheadfadh a bheith ag an tionscadal ar speicis nó ar ghnáthóga den sórt sin. Thairis sin, fiafraíonn sí, maidir leis na hoibleagáidí a d’fhéadfaí a fhorchur, i gcás inarb iomchuí, ar an bhforbróir agus ar an údarás inniúil i gcás ina soláthróidh tríú páirtí faisnéis bhreise don údarás inniúil a d’fhéadfadh amhras a chruthú go hoibiachtúil maidir le héifeachtaí an tionscadail sin ar an gcomhshaol.

25

I ndáil leis sin, fiafraíonn an chúirt a rinne an tarchur cad í an tairseach atá le cur i bhfeidhm, eadhon an gcaithfidh an Bord aon amhras réasúnach a eisiamh maidir le héifeachtaí suntasacha an tionscadail sin ar an gcomhshaol nó cinneadh ‘réasúnta’ a ghlacadh go simplí ar bhonn na ndoiciméad atá ar fáil dó. De réir na cúirte sin, i gcás ina mbraithfidh cinneadh gan MTC a éileamh ar aon amhras réasúnach a eisiamh, bheadh an cinneadh gan MTC a dhéanamh sa chás seo neamhdhleathach. Os a choinne sin, bheadh tosca ann a d’fhágfadh go mbeadh cinneadh an Bhoird réasúnach dá mba rud é nach mbeadh i gceist leis an tástáil ach réasúntacht cinnidh den sórt sin seachas aon amhras a eisiamh.

26

Sa dara háit, ceistíonn an chúirt a rinne an tarchur éifeacht an amhrais, ar na gnéithe dá dtagraítear i míreanna 24 agus 25 den bhreithiúnas seo, a ardaíodh i mbarúlacha an iarratasóra sna príomhimeachtaí an 7 Iúil 2020 maidir le speicis ábhartha a chumhdaítear leis an gcosaint dhian dá bhforáiltear in Airteagal 12 de Threoir 92/43.

27	Sna himthosca sin, chinn an Ard-Chúirt bac a chur ar na himeachtaí agus na ceisteanna seo a leanas a tharchur chuig an gCúirt Bhreithiúnais le haghaidh réamhrialú:

‘1) An bhfuil sé d’éifeacht ag Airteagal 4(4) agus/nó le mír 3 d’Iarscríbhinn [II.A] a ghabhann le [Treoir 2011/92] arna léiriú i bhfianaise phrionsabal an réamhchúraim, i gcás ina bhfuil an fhaisnéis faoi Iarscríbhinn [II.A] a ghabhann leis an Treoir le tabhairt, agus i gcás ina bhfuil ábhar os comhair an údaráis inniúil go bhféadfadh tionchar a bheith ag an tionscadal ar speiceas nó ar ghnáthóg, gur cheart go bhfaigheadh an forbróir lena mbaineann gach faisnéis ábhartha maidir le speicis nó gnáthóga a bhféadfadh an tionscadal difear a dhéanamh dóibh trí shuirbhéanna eolaíocha a dhéanamh nó a fháil atá leordhóthanach chun deireadh a chur le hamhras faoi éifeachtaí suntasacha ar speicis nó ar ghnáthóga den sórt sin, agus in éagmais torthaí suirbhéanna den sórt sin, gur cheart an t‑údarás inniúil a chur ar an eolas faoi agus a cheangal air leanúint ar aghaidh ar an mbonn nach bhfuil dóthain faisnéise chun amhras a chur as an áireamh an mbeidh tionchar suntasach ag an tionscadal ar an gcomhshaol?

2) An bhfuil sé d’éifeacht ag Airteagal 4(4) agus/nó le mír 3 d’Iarscríbhinn [II.A] a ghabhann le [Treoir 2011/92] arna léiriú i bhfianaise phrionsabal an réamhchúraim, i gcás ina bhfuil an fhaisnéis faoi Iarscríbhinn [II.A] a ghabhann leis an Treoir le tabhairt, go gceanglaítear ar an údarás inniúil amhras a chur as an áireamh maidir leis an bhféidearthacht go mbeadh éifeachtaí suntasacha [ag tionscadal] ar an gcomhshaol má bheartaíonn sé gan an tionscadal a chur faoi mheasúnú faoi Airteagail 5 go 10 den Treoir [sin], agus dá bhrí sin i gcás, le linn cinneadh faoi Airteagal 4(2) den Treoir [sin], nach bhfuil dóthain faisnéise go hoibiachtúil ag údarás inniúil chun amhras a chur as an áireamh i dtaobh an mbeidh éifeachtaí suntasacha ag an tionscadal sin ar an gcomhshaol, gur cheart go gceanglófaí go gcuirfí an tionscadal céanna faoi réir measúnú faoi Airteagail 5 go 10 den Treoir?

3) Más ‘ní hea’ an freagra ginearálta atá ar an gcéad cheist, an dtagann na hiarmhairtí a luaitear chun cinn a mhéid a bhaineann an éifeacht shuntasach fhéideartha ar an gcomhshaol le speicis a bhféadfadh an tionscadal difear a dhéanamh dóibh i gcás ina bhfuil speicis den sórt sin i dteideal cosaint dhian faoi Airteagal 12 de [Threoir 92/43], ag féachaint inter alia don tábhacht a bhaineann le speicis den sórt sin mar a aithnítear in Airteagal 3(1)(b) de [Threoir 2011/92] agus in aithris 11 a ghabhann le Treoir [2014/52]?

4) An bhfuil d’éifeacht le hAirteagal 4(4) agus/nó le mír 3 d’Iarscríbhinn [II.A] a ghabhann le [Treoir 2011/92] arna léiriú i bhfianaise phrionsabal an réamhchúraim, más rud é, tar éis don fhorbróir faisnéis a sholáthar de bhun Iarscríbhinn [II.A] den Treoir, go gcuireann páirtí eile faisnéis bhreise ar fáil don údarás inniúil atá in ann amhras a chruthú go hoibiachtúil maidir le héifeacht an tionscadail ar an gcomhshaol, go gceanglaítear ar an bhforbróir tuilleadh faisnéise a sholáthar don údarás inniúil a dhéanfadh amhras den sórt sin a chur as an áireamh nó an t‑údarás inniúil a chur ar an eolas faoi easpa faisnéise den sórt sin, nó a gceanglaítear ar an údarás inniúil féin faisnéis bhreise a fháil a chuirfeadh an t‑amhras sin as an áireamh nó mar mhalairt air sin a chinneadh go dteastaíonn an measúnú sin faoi Airteagail 5 go 10 de [Threoir 2011/92] d’éagmais dóthain faisnéise chun amhras a eisiamh i dtaobh an mbeidh tionchar suntasach ag an tionscadal sin ar an gcomhshaol?

5) Más ‘ní hea’ an freagra ginearálta atá ar an gceathrú ceist, an dtiocfaidh na hiarmhairtí a luaitear chun cinn a mhéid a bhaineann an éifeacht shuntasach fhéideartha ar an gcomhshaol le speicis a bhféadfadh an tionscadal difear a dhéanamh dóibh i gcás ina bhfuil speicis den sórt sin i dteideal cosaint [dhian] faoi Airteagal 12 de [Threoir 92/43], ag féachaint, inter alia, don tábhacht a bhaineann le speicis den sórt sin mar a aithnítear in Airteagal 3(l)(b) de [Threoir 2011/92] agus in aithris 11 a ghabhann le [Treoir 2014/52]?’

Na ceisteanna a tharchuirtear le haghaidh réamhrialú

28

Lena ceisteanna, ar cheart iad a scrúdú le chéile, fiafraíonn an chúirt a rinne an tarchur, go bunúsach, an bhfuil Airteagal 4(4) go (6) de Threoir 2011/92 le léiriú sa chaoi, i gcás, i gcomhthéacs nós imeachta um an scagadh arna dhéanamh faoin bhforáil sin, inar sholáthair tríú páirtí faisnéis don údarás inniúil a d’fhéadfadh amhras a chruthú go hoibiachtúil maidir leis na héifeachtaí suntasacha a d’fhéadfadh a bheith ag an tionscadal sin ar an gcomhshaol, go háirithe maidir le speiceas faoi chosaint faoi Threoir 92/43, nach mór don fhorbróir nó, de réir mar a bheidh, don údarás inniúil féin an fhaisnéis ábhartha uile a bhailiú chun aon amhras maidir leis na héifeachtaí sin a eisiamh agus an gcaithfidh an t‑údarás sin a chinneadh go bhfuil gá le MTC mura féidir an t‑amhras sin a chur as an áireamh.

29

Ba cheart a mheabhrú go gceanglaítear le hAirteagal 2(1) de Threoir 2011/92 nach mór tionscadail ar dócha go mbeidh éifeachtaí suntasacha acu ar an gcomhshaol, de réir bhrí Airteagal 4 den Treoir sin, arna léamh i gcomhar le hIarscríbhinní I nó II a ghabhann leis an Treoir sin, a chur faoi réir MTC sula ndeonófar údarú don fhorbairt (breithiúnas an 28 Feabhra 2018, Comune di Castelbellino, C‑117/17, EU:C:2018:129, mír 24 agus an cásdlí dá dtagraítear).

30

Sonraítear in Airteagal 4(1) de Threoir 2011/92, faoi réir Airteagal 2(4) den Treoir sin, go bhfuil na tionscadail a liostaítear in Iarscríbhinn I a ghabhann léi faoi réir measúnú, i gcomhréir le hAirteagail 5 go 10 den Treoir sin. Dá bhrí sin, meastar go bhfuil riosca ag baint leis na tionscadail sin go mbeidh éifeachtaí suntasacha acu ar an gcomhshaol.

31

Maidir leis na tionscadail a liostaítear in Iarscríbhinn II a ghabhann le Treoir 2011/92, foráiltear le hAirteagal 4(2) den Treoir sin go gcinnfidh na Ballstáit an gcaithfidh an tionscadal lena mbaineann a chur faoi réir MTC ar bhonn scrúdú cás ar chás nó ar bhonn tairseacha nó critéir arna socrú ag an mBallstát lena mbaineann nó, i gcás inarb iomchuí, ar bhonn an dá nós imeachta. Mar is léir ó léamh comhcheangailte ar an bhforáil sin agus ar aithris 9 den Treoir sin, ní gá go mbeidh éifeachtaí suntasacha ag na tionscadail sin ar an gcomhshaol i ngach cás, agus mar thoradh air sin nár cheart iad a chur faoi réir measúnaithe ach amháin i gcás go measfaidh na Ballstáit gur dócha go mbeidh éifeachtaí den sórt sin acu.

32

I ndáil leis sin, sonraítear in Airteagal 4(3) de Threoir 2011/92 go bhféadfaidh na Ballstáit tairseacha nó critéir a shocrú chun a chinneadh na cásanna nach gá tionscadail a chur faoi réir an chinnidh faoi mhíreanna 4 agus 5 den Airteagal sin nó faoi réir MTC, agus/nó tairseacha nó critéir chun a chinneadh na cásanna ina gcuirfear tionscadail, ar aon chuma, faoi réir MTC gan a chur faoi réir an chinnidh faoi mhíreanna 4 agus 5 sin.

33	Ar deireadh, i gcás ina gcinnfidh na Ballstáit cinneadh den sórt sin a éileamh, forálfar le míreanna 4 agus 5 don nós imeachta um an scagadh a bheidh le déanamh mar a leanas.

34

Ar an gcéad dul síos, soláthróidh an forbróir faisnéis maidir le saintréithe an tionscadail lena mbaineann agus na héifeachtaí suntasacha ar dócha a bheidh aige ar an gcomhshaol. Sonraítear sa liosta mionsonraithe den fhaisnéis a sholáthrófar in Iarscríbhinn II.A de Threoir 2011/92. Ní mór tuairisc ar na gnéithe den chomhshaol ar dócha go ndéanfaidh an tionscadal difear suntasach dóibh agus tuairisc ar na héifeachtaí suntasacha uile, a mhéid a bheidh an fhaisnéis maidir leis na héifeachtaí sin ar fáil, ar dócha a bheidh ag an tionscadal ar an gcomhshaol a chur san áireamh san fhaisnéis sin. Féadfaidh an forbróir tuairisc a sholáthar freisin ar aon ghnéithe den tionscadal agus/nó bearta a shamhlaítear chun éifeachtaí díobhálacha suntasacha ar an gcomhshaol a sheachaint nó a chosc.

35	Ar an dara dul síos, déanfaidh an t‑údarás inniúil a chinneadh ar bhonn na faisnéise arna soláthar ag an bhforbróir, agus na critéir roghnúcháin ábhartha a leagtar amach in Iarscríbhinn III a ghabhann le Treoir 2011/92 á gcur san áireamh.

36

Sa chomhthéacs sin, cuirfidh an forbróir san áireamh freisin, i gcás inarb iomchuí, ar thaobh amháin, torthaí na measúnuithe ábhartha eile atá ar fáil ar thionchar an tionscadail lena mbaineann ar an gcomhshaol arna ndéanamh de bhun ghníomhartha reachtacha an Aontais seachas Treoir 2011/92 agus, ar an taobh eile, cuirfidh an t‑údarás inniúil san áireamh torthaí an scagtha nó na measúnuithe ar an tionchar ar an gcomhshaol arna ndéanamh de bhun gníomhartha reachtacha den sórt sin.

37	Ar an tríú dul síos, cuirfear an cinneadh ar fáil don phobal agus sonrófar, inter alia, na príomhchúiseanna leis an gcinneadh MTC a éileamh nó gan a éileamh i bhfianaise na gcritéar ábhartha a liostaítear in Iarscríbhinn III a ghabhann le Treoir 2011/92.

38

Os a choinne sin, ní fhoráiltear go sainráite le Treoir 2011/92 d’oibleagáid dul i gcomhairle leis an bpobal le linn an nós imeachta um an scagadh sin. Sonraítear in aithris 29 de Threoir 2014/52, ina leagtar síos an cuspóir arna shaothrú le hAirteagal 4(4) go (6) de Threoir 2011/92, gur ‘dea-chleachtas riaracháin é barúlacha ar bhonn spontáineach a d’fhéadfadh a bheith faighte ó fhoinsí eile a chur san áireamh, amhail daoine aonair nó údaráis phoiblí’ agus sonraítear ‘nach bhfuil gá le comhairliúcháin fhoirmiúla ag céim an scagtha’.

[Aistriúchán neamhoifigiúil]

39	Ar an gcaoi chéanna, ní shainítear i dTreoir 2011/92 na cásanna ina bhféadfadh nó inar cheart don údarás inniúil iarraidh ar an bhforbróir faisnéis bhreise a sholáthar.

40

Dá bhrí sin, ní fhoráiltear go sainráite le Treoir 2011/92 d’oibleagáid ar an údarás inniúil, tar éis barúlacha a chur faoina bhráid ag tríú páirtí maidir leis na héifeachtaí suntasacha a d’fhéadfadh a bheith ag an tionscadal lena mbaineann ar an gcomhshaol, faisnéis bhreise a iarraidh ar an bhforbróir nó an fhaisnéis sin a bhailiú é féin.

41

Mar sin féin, de réir chásdlí na Cúirte, leanann sé ó Airteagal 2(1) de Threoir 2011/92 nach mór MTC a dhéanamh chomh luath agus a bhíonn dóchúlacht nó riosca ann go mbeidh éifeachtaí suntasacha ag an tionscadal lena mbaineann ar an gcomhshaol. I bhfianaise phrionsabal an réamhchúraim, atá ar cheann de bhunchlocha an bheartais maidir le hardleibhéal cosanta a shaothraíonn an tAontas Eorpach i réimse an chomhshaoil, nach mór Treoir 2011/92 a léiriú ina fhianaise, meastar go bhfuil riosca den sórt sin ann i gcás nach féidir a chur as an áireamh, ar bhonn fianaise oibiachtúil, gur dócha go mbeidh éifeachtaí suntasacha ag an tionscadal sin ar an gcomhshaol (féach, chuige sin, breithiúnas an 31 Bealtaine 2018, an Coimisiún v an Pholainn, C‑526/16, EU:C:2018:356, míreanna 66 agus 67 agus an cásdlí dá dtagraítear).

42

Dá bhrí sin, i gcomhthéacs an nós imeachta um an scagadh, lena bhféachtar lena chinneadh an bhfuil gá le MTC, is faoin údarás inniúil atá sé an fhaisnéis ábhartha uile atá ar fáil dó a chur san áireamh, lena n‑áirítear faisnéis arna cur isteach ar bhonn spontáineach ag tríú páirtí, i gcás ina bhfuil fianaise oibiachtúil san fhaisnéis sin lena gcuirtear ar a chumas a mheas an bhfuil riosca ann go mbeidh éifeachtaí suntasacha ag an tionscadal ar an gcomhshaol.

43

Thairis sin, i gcás, ar bhonn na faisnéise arna cur ar fáil dó ag tríú páirtí, ina measfaidh an t‑údarás inniúil nach féidir a chur as an áireamh gur dócha go mbeidh éifeachtaí suntasacha ag an tionscadal lena mbaineann ar an gcomhshaol, ní mór dó é a chur ar chumas an fhorbróra faisnéis bhreise a sholáthar dó sula gcinnfidh sé an bhfuil gá le MTC don tionscadal sin. Mar is léir ó fhoclaíocht Airteagal 4(4) agus (5) de Threoir 2011/92, tá ról suntasach ag an bhforbróir maidir le faisnéis a sholáthar lena gcuirtear ar chumas an údaráis inniúil a chinneadh a dhéanamh. Chuige sin agus, go háirithe, d’fhonn a theorannú an oibleagáid measúnú ar an tionchar ar an gcomhshaol a dhéanamh do thionscadail ar dócha go mbeidh éifeachtaí suntasacha acu ar an gcomhshaol, ní mór don údarás sin an fhaisnéis is iomláine is féidir a sholáthar.

44	Ina theannta sin, ní féidir leis an údarás inniúil teacht ar an gconclúid go bhfuil riosca ann go mbeidh éifeachtaí suntasacha ag an tionscadal ar an gcomhshaol ar an bhforas go bhfuil an fhaisnéis arna soláthar ag an bhforbróir neamhiomlán gan a iarraidh air ar dtús faisnéis bhreise a sholáthar.

45

Os a choinne sin, i gcás, d’ainneoin na fianaise arna cur isteach ag tríú páirtí, go bhféadfaidh an t‑údarás inniúil a eisiamh, ar bhonn fianaise oibiachtúil, gur dócha go mbeidh éifeachtaí suntasacha ag an tionscadal atá i gceist ar an gcomhshaol, féadfaidh an t‑údarás sin a chinneadh nach bhfuil gá le MTC, gan é a bheith de cheangal air a iarraidh ar an bhforbróir faisnéis bhreise a sholáthar dó.

46

Ba cheart a lua freisin, ar thaobh amháin, i gcomhréir le cásdlí na Cúirte, go meastar gur dócha go mbeidh éifeachtaí suntasacha ag tionscadal ar an gcomhshaol i gcás, mar gheall ar a chineál, gur dócha go n‑athróidh sé, go suntasach nó go buan, tosca comhshaoil, amhail fána agus flóra, ithir nó uisce, beag beann ar a mhéid (breithiúnas an 31 Bealtaine 2018, an Coimisiún v an Pholainn, C‑526/16, EU:C:2018:356, mír 65 agus an cásdlí dá dtagraítear).

47

Ar an taobh eile, mar a chinn an Chúirt cheana féin, tá foclaíocht Airteagal 2(1) de Threoir 2011/92, go bunúsach, cosúil le foclaíocht Airteagal 6(3) de Threoir 92/43 (féach, chuige sin, breithiúnas an 7 Meán Fómhair 2004, Waddenvereniging agus Vogelbeschermingsvereniging, C‑127/02, EU:C:2004:482, mír 42).

48

I ndáil leis sin, de réir chásdlí na Cúirte, tugtar an coinníoll a leagtar síos in Airteagal 6(3) de Threoir 92/43 le tuiscint, i gcás ina bhfuil amhras maidir le heaspa éifeachtaí suntasacha, nach mór measúnú den sórt sin a dhéanamh (féach, chuige sin, breithiúnas an 26 Bealtaine 2011, an Coimisiún v an Bheilg, C‑538/09, EU:C:2011:349, mír 41 agus an cásdlí dá dtagraítear). Chinn an Chúirt Bhreithiúnais freisin, áfach, nach mór Airteagal 6(3) a léiriú sa chaoi, más rud é, i gcás ina gcinnfidh údarás inniúil Ballstáit plean nó tionscadal a údarú ar dócha go ndéanfadh sé difear do shuíomh atá faoi chosaint faoin Treoir sin gan gá le measúnú iomchuí, de réir bhrí na forála sin, nach mór don údarás sin na cúiseanna a thabhairt go leordhóthanach lenar cuireadh ar a chumas, sular deonaíodh an t‑údarú sin, a bheith cinnte, d’ainneoin na dtuairimí contrártha agus aon amhras réasúnach a cuireadh in iúl sna tuairimí sin, gur eisíodh aon amhras réasúnach eolaíoch maidir leis an bhféidearthacht go mbeadh tionchar suntasach ag an tionscadal sin ar an suíomh sin (breithiúnas an 15 Meitheamh 2023, Eco Advocacy, C‑721/21, EU:C:2023:477, mír 43).

49

Ní mór a thabhairt le tuiscint leis, i gcomhthéacs an nós imeachta um an scagadh arna dhéanamh faoi Threoir 2011/92, go gceanglaítear ar an údarás inniúil dhá choinníoll a chomhlíonadh, i bhfianaise na mbarúlacha arna gcur faoina bhráid ag tríú páirtí, chun a iarraidh ar an bhforbróir faisnéis bhreise a sholáthar dó. Ar thaobh amháin, ní mór go mbaineann na barúlacha sin leis na héifeachtaí ‘suntasacha’ a d’fhéadfadh a bheith ag an tionscadal lena mbaineann ar an gcomhshaol. Ar an taobh eile, is gá na barúlacha sin a bheith de chineál lena gcoiscfear an chonclúid go n‑eisítear aon amhras réasúnach eolaíoch maidir leis an bhféidearthacht go mbeadh éifeachtaí suntasacha ag an tionscadal sin ar an gcomhshaol.

50

Is faoin gcúirt a rinne an tarchur a bheidh sé a chinneadh, i bhfianaise na faisnéise atá ar fáil don Bhord tráth a glacadh cinneadh an 16 Meán Fómhair 2020, lena n‑áirítear an fhaisnéis arna cur an t‑iarratasóir sna príomhimeachtaí faoina bhráid i gcomhthéacs a bharúlacha an 7 Iúil 2020, an bhféadfadh an Bord sin a bheith cinnte, d’ainneoin na faisnéise atá sna barúlacha sin, gur eisíodh aon amhras réasúnach eolaíoch maidir leis an bhféidearthacht go mbeadh éifeachtaí suntasacha ag an tionscadal atá i gceist sna príomhimeachtaí ar an gcomhshaol, go háirithe ar speicis faoi chosaint faoi Threoir 92/43.

51

I bhfianaise na mbreithnithe uile roimhe seo, is é an freagra ar na ceisteanna a tharchuirtear ná nach mór Airteagal 4(4) go (6) de Threoir 2011/92 a léiriú sa chaoi, i gcás, i gcomhthéacs an nós imeachta um an scagadh arna dhéanamh faoin bhforáil sin, inar chuir tríú páirtí fianaise oibiachtúil faoi bhráid an údaráis inniúil maidir leis na héifeachtaí suntasacha a d’fhéadfadh a bheith ag an tionscadal sin ar an gcomhshaol, go háirithe ar speiceas faoi chosaint faoi Threoir 92/43, nach mór don údarás sin a iarraidh ar an bhforbróir faisnéis bhreise a sholáthar dó agus an fhaisnéis sin a chur san áireamh sula gcinnfidh sé an bhfuil gá le MTC don tionscadal sin. Os a choinne sin, i gcás, d’ainneoin na mbarúlacha arna gcur isteach ag an tríú páirtí sin don údarás sin, go bhféadfaidh an t‑údarás inniúil a eisiamh, ar bhonn fianaise oibiachtúil, gur dócha go mbeidh éifeachtaí suntasacha ag an tionscadal sin ar an gcomhshaol, féadfaidh an t‑údarás céanna a chinneadh nach bhfuil gá le MTC, gan é a bheith de cheangal air a iarraidh ar an bhforbróir faisnéis bhreise a sholáthar dó.

Costais

52

Ós rud é, a mhéid a bhaineann sé leis na páirtithe sna príomhimeachtaí, go bhfuil na himeachtaí mar chéim sa chás os comhair na cúirte a rinne an tarchur, baineann ceist na gcostas leis an gcúirt sin. Níl na costais a tabhaíodh trí bharúlacha a chur faoi bhráid na Cúirte Breithiúnais, seachas costais na bpáirtithe sin, inghnóthaithe.

Ar na forais sin, rialaíonn an Chúirt (an Deichiú Dlísheomra) mar seo a leanas:

Maidir le hAirteagal 4(4) go (6) de Threoir 2011/92/AE ó Pharlaimint na hEorpa agus ón gComhairle an 13 Nollaig 2011 maidir le measúnú a dhéanamh ar éifeachtaí tionscadal poiblí agus príobháideach áirithe ar an gcomhshaol, arna leasú le Treoir 2014/52/AE ó Pharlaimint na hEorpa agus ón gComhairle an 16 Aibreán 2014,

ní mór léiriú a dhéanamh mar seo a leanas:

i gcás, i gcomhthéacs an nós imeachta um an scagadh arna dhéanamh faoin bhforáil sin, inar chuir tríú páirtí fianaise oibiachtúil faoi bhráid an údaráis inniúil maidir leis na héifeachtaí suntasacha a d’fhéadfadh a bheith ag an tionscadal sin ar an gcomhshaol, go háirithe ar speiceas faoi chosaint faoi Threoir 92/43/CEE ón gComhairle an 21 Bealtaine 1992 maidir le gnáthóga nádúrtha agus fána agus flóra fiáine a chaomhnú, arna leasú le Treoir 2013/17/AE ón gComhairle an 13 Bealtaine 2013, nach mór don údarás sin a iarraidh ar an bhforbróir faisnéis bhreise a sholáthar dó agus an fhaisnéis sin a chur san áireamh sula gcinnfidh sé an bhfuil gá le measúnú ar an tionchar ar an gcomhshaol don tionscadal sin. Os a choinne sin, i gcás, d’ainneoin na mbarúlacha arna gcur isteach ag an tríú páirtí sin don údarás sin, go bhféadfaidh an t‑údarás inniúil a eisiamh, ar bhonn fianaise oibiachtúil, gur dócha go mbeidh éifeachtaí suntasacha ag an tionscadal sin ar an gcomhshaol, féadfaidh an t‑údarás céanna a chinneadh nach bhfuil gá le measúnú ar an tionchar ar an gcomhshaol, gan é a bheith de cheangal air a iarraidh ar an bhforbróir faisnéis bhreise a sholáthar dó.