(1)

Ir-Regolament ta’ Implimentazzjoni tal-Kummissjoni (UE) 2019/2072 (2) jipprevedi miżuri protettivi kontra l-pesti tal-pjanti, applikabbli fit-territorju tal-Unjoni.

(2)

Id-dritt tal-Unjoni, inkluż ir-Regolament ta’ Implimentazzjoni (UE) 2019/2072, huwa applikabbli għar-Renju Unit u fir-Renju Unit matul perjodu ta’ tranżizzjoni li jintemm fil-31 ta’ Diċembru 2020, f’konformità mal-Ftehim dwar il-ħruġ tar-Renju Unit tal-Gran Brittanja u l-Irlanda ta’ Fuq mill-Unjoni Ewropea u mill-Komunità Ewropea tal-Enerġija Atomika (“il-Ftehim dwar il-Ħruġ”), u b’mod partikolari l-Artikoli 126 u l-Artikolu 127(1) tiegħu.

(3)

Skont ir-Regolament ta’ Implimentazzjoni (UE) 2019/2072, it-tuberi tal-ispeċi Solanum L., u l-ibridi tagħhom, minbarra dawk speċifikati fl-entrati 15 u 16 tal-Anness VI ta’ dak ir-Regolament (il-“pjanti speċifikati”), jistgħu jiġu introdotti fl-Unjoni mill-pajjiżi terzi elenkati fir-raba’ kolonna tal-entrata 17 ta’ dak l-Anness.

(4)

Fid-dawl tat-tmiem tal-perjodu ta’ tranżizzjoni previst fil-Ftehim dwar il-Ħruġ, ir-Renju Unit issottometta talba lill-Kummissjoni għar-rikonoxximent tiegħu bħala ħieles mill-pest speċifikat, mill-1 ta’ Jannar 2021.

(5)

Id-Direttiva tal-Kunsill 93/85/KEE (3) tipprevedi miżuri li għandhom jittieħdu fl-Istati Membri, fost l-oħrajn, kontra l-pest Clavibacter sepedonicus (Spieckermann u Kottho) Nouioui et al., li hija waħda mill-kawżi għall-marda tat-tħassir forma ta’ ċirku tal-patata.

(6)

F’konformità mal-Artikolu 2 tad-Direttiva 93/85/KEE, ir-Renju Unit wettaq stħarriġiet annwali, li r-riżultati tagħhom juru li t-territorju tiegħu kien ħieles mill-pest speċifikat f’dawn l-aħħar tliet snin. Ir-riżultati ta’ dawk l-istħarriġiet ġew innotifikati fl-2020 lill-Kummissjoni u lill-Istati Membri l-oħra.

(7)

Barra minn hekk, ma ġiet irreġistrata l-ebda interċettazzjoni tal-pest speċifikat matul il-moviment tal-pjanti speċifikati fir-Renju Unit, jew minn dak il-pajjiż lejn l-Unjoni.

(8)

Ir-Renju Unit informa lill-Kummissjoni li l-leġiżlazzjoni rispettiva tiegħu, li ttrasponiet id-Direttiva 93/85/KEE, mhux se tinbidel u se tkompli tapplika mill-1 ta’ Jannar 2021.

(9)

Għalhekk jenħtieġ li r-Renju Unit jiġi inkluż fir-raba’ kolonna tal-entrata 17 tal-Anness VI tar-Regolament ta’ Implimentazzjoni (UE) 2019/2072, mingħajr preġudizzju għall-applikazzjoni tad-dritt tal-Unjoni għar-Renju Unit u fir-Renju Unit fir-rigward tal-Irlanda ta’ Fuq f’konformità mal-Artikolu 5(4) tal-Protokoll dwar l-Irlanda/l-Irlanda ta’ Fuq għall-Ftehim dwar il-Ħruġ flimkien mal-Anness 2 ta’ dak il-Protokoll.

(10)

Sabiex jiġi żgurat li r-Renju Unit jibqa’ ħieles mill-pest speċifikat, jenħtieġ li huwa jissottometti lill-Kummissjoni, sal-28 ta’ Frar ta’ kull sena, ir-riżultati tal-istħarriġ li jikkonfermaw li Clavibacter sepedonicus (Spieckermann u Kottho) Nouioui et al. ma kienx preżenti fit-territorju tiegħu matul is-sena preċedenti.

(11)

Għalhekk jenħtieġ li r-Regolament ta’ Implimentazzjoni (UE) 2019/2072 jiġi emendat kif xieraq.

(12)

Peress li l-perjodu ta’ tranżizzjoni previst fil-Ftehim dwar il-ħruġ jintemm fil-31 ta’ Diċembru 2020, dan ir-Regolament jenħtieġ li japplika mill-1 ta’ Jannar 2021.

(13)

Il-miżuri previsti f’dan ir-Regolament huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,