(1)

Il-proċedura għar-rikonoxximent ta’ kontropartijiet ċentrali (“CCPs”) stabbiliti f’pajjiżi terzi, stipulata fl-Artikolu 25 tar-Regolament (UE) Nru 648/2012, għandha l-għan li tippermetti lis-CCPs stabbiliti u awtorizzati f’pajjiżi terzi li għandhom standards regolatorji ekwivalenti għal dawk stabbiliti f’dak ir-Regolament, li jipprovdu servizzi ta’ kklerjar lill-membri tal-ikklerjar jew liċ-ċentri tan-negozjar stabbiliti fl-Unjoni. Għalhekk, din il-proċedura ta’ rikonoxximent u d-deċiżjonijiet ta’ ekwivalenza previsti fiha jikkontribwixxu biex jintlaħaq l-għan ġenerali tar-Regolament (UE) Nru 648/2012 li jitnaqqas ir-riskju sistemiku billi jiġi estiż l-użu ta’ CCPs sikuri u sodi biex jikklerjaw il-kuntratti tad-derivattivi barra l-borża (“OTC”), inkluż fejn dawk is-CCPs ikunu stabbiliti u awtorizzati f’pajjiż terz.

(2)

Sabiex reġim legali ta’ pajjiż terz jitqies bħala ekwivalenti għar-reġim legali tal-Unjoni fir-rigward ta’ CCPs, l-eżitu sostanzjali tal-arranġamenti legali u superviżorji applikabbli ta’ dan ir-reġim għandu jkun ekwivalenti għar-rekwiżiti tal-Unjoni rigward l-objettivi regolatorji li jiksbu dawk ir-rekwiżiti. L-għan ta’ din il-valutazzjoni tal-ekwivalenza huwa għalhekk li jiġi vverifikat li l-arranġamenti legali u superviżorji tar-Repubblika tal-Poplu taċ-Ċina jiżguraw li s-CCPs stabbiliti u awtorizzati hemmhekk biex jikklerjaw derivattivi OTC fis-suq interbankarju ma jesponux lill-membri tal-ikklerjar u liċ-ċentri tan-negozjar stabbiliti fl-Unjoni għal livell ogħla ta’ riskju minn dawk li dawk il-membri tal-ikklerjar u ċ-ċentri tan-negozjar jistgħu jkunu esposti għalihom mis-CCPs awtorizzati fl-Unjoni u, konsegwentement, ma joħolqux livelli inaċċettabbli ta’ riskju sistemiku fl-Unjoni. Ir-riskji ferm aktar baxxi inerenti f’attivitajiet ta’ kklerjar imwettqa fis-suq finanzjarju li huma iżgħar mis-suq finanzjarju tal-Unjoni jenħtieġ b’hekk li jiġu kkunsidrati b’mod partikolari.

(3)

L-Artikolu 25(6), il-punti (a), (b) u (c), tar-Regolament (UE) Nru 648/2012 fih tliet kundizzjonijiet li għandhom jiġu ssodisfati sabiex jiġi ddeterminat li l-arranġamenti legali u superviżorji ta’ pajjiż terz rigward is-CCPs awtorizzati fih huma ekwivalenti għal dawk stabbiliti f’dak ir-Regolament.

(4)

Skont l-Artikolu 25(6), il-punt (a), tar-Regolament (UE) Nru 648/2012, is-CCPs awtorizzati f’pajjiż terz iridu jikkonformaw ma’ rekwiżiti legalment vinkolanti li huma ekwivalenti għar-rekwiżiti stipulati fit-Titolu IV ta’ dak ir-Regolament.

(5)

Din id-Deċiżjoni tkopri r-reġim regolatorju u superviżorju applikabbli għas-CCPs li huma awtorizzati mill-Bank tal-Poplu taċ-Ċina biex jikklerjaw derivattivi OTC fis-suq interbankarju. Il-Bank tal-Poplu taċ-Ċina huwa responsabbli għall-awtorizzazzjoni u s-superviżjoni tas-CCPs li jipprovdu kklerjar ċentrali ta’ tranżazzjonijiet tad-derivattivi OTC fis-swieq interbankarji Ċiniżi. Fir-Repubblika tal-Poplu taċ-Ċina, it-tranżazzjonijiet tad-derivattivi OTC interbankarji huma definiti bħala tranżazzjonijiet bejn investituri istituzzjonali li jappartjenu għal kuntratti tad-derivattivi li ma humiex innegozjati f’borża taħt is-superviżjoni tal-Kummissjoni Regolatorja tat-Titoli taċ-Ċina (“CSRC”) (2). Is-swieq interbankarji Ċiniżi jikkonsistu prinċipalment mis-suq interbankarju tal-bonds (3), is-suq interbankarju tas-self (4) u s-suq interbankarju tal-kambju barrani (5). Is-swieq interbankarji tad-derivattivi OTC jinkludu derivattivi tar-rati tal-imgħax, derivattivi tar-rati tal-kambju, derivattivi tal-bonds, derivattivi tal-kreditu u derivattivi tal-komoditajiet. Il-kuntratti tad-derivattivi li jaqgħu taħt il-kompetenza tal-Bank tal-Poplu taċ-Ċina jikkorrispondu għal subsett tal-kuntratti tad-derivattivi koperti mid-dispożizzjonijiet applikabbli għas-CCPs stabbiliti fir-Regolament (UE) Nru 648/2012.

(6)

Ir-reġim regolatorju u superviżorju applikabbli għas-CCPs li jikklerjaw derivattivi nnegozjati f’borża ssorveljata mis-CSRC skont il-Kapitolu V tal-Liġi dwar it-Titoli tar-Repubblika tal-Poplu taċ-Ċina, il-Kapitolu II tar-Regolament dwar l-Amministrazzjoni tan-Negozjar tal-Futuri u l-Liġi dwar il-Futuri u d-Derivattivi tar-Repubblika tal-Poplu taċ-Ċina mhuwiex kopert minn din id-Deċiżjoni.

(7)

Ir-rekwiżiti legalment vinkolanti tar-Repubblika tal-Poplu taċ-Ċina għal CCPs awtorizzati mill-Bank tal-Poplu taċ-Ċina jikkonsistu fil-Liġi tar-Repubblika tal-Poplu taċ-Ċina dwar il-Bank tal-Poplu taċ-Ċina (“il-Liġi tal-Bank tal-Poplu taċ-Ċina”) (6) u regolamenti subordinati, li jistabbilixxu l-obbligi legali li s-CCPs stabbiliti u awtorizzati fir-Repubblika tal-Poplu taċ-Ċina jridu jikkonformaw magħhom. B’mod partikolari, skont l-Avviż tal-2013 dwar Kwistjonijiet rigward l-Implimentazzjoni tal-Prinċipji għall-Infrastrutturi tas-Swieq Finanzjarji tal-Uffiċċju Ġenerali tar-Repubblika tal-Poplu taċ-Ċina (7), is-CCPs awtorizzati huma meħtieġa japplikaw u jimplimentaw l-istandards internazzjonali stabbiliti skont il-Principles for Financial Market Infrastructures (“PFMIs”), maħruġa f’April 2012 mill-Kumitat dwar il-Pagamenti u l-Infrastrutturi tas-Suq u l-Organizzazzjoni Internazzjonali tal-Kummissjonijiet tat-Titoli (8).

(8)

Il-prinċipji ewlenin għas-CCPs stabbiliti fir-regoli applikabbli fir-Repubblika tal-Poplu taċ-Ċina jistabbilixxu standards ta’ livell għoli li s-CCPs iridu jikkonformaw magħhom biex ikunu awtorizzati jipprovdu servizzi tal-ikklerjar fiċ-Ċina. Skont dawk il-prinċipji, is-CCPs iridu jikkonformaw mal-PFMIs, ikollhom arranġamenti ta’ governanza li jkunu ċari u trasparenti, jippromwovu s-sikurezza u l-effiċjenza tal-infrastrutturi tas-swieq finanzjarji, u jappoġġaw l-istabbiltà tas-sistema finanzjarja usa’. Il-Bank tal-Poplu taċ-Ċina jista’ jimponi wkoll rekwiżiti speċifiċi fuq is-CCPs, b’mod partikolari fir-rigward tal-mekkaniżmi ta’ kontroll intern u s-sistemi ta’ ġestjoni tar-riskju.

(9)

CCPs awtorizzati huma soġġetti għal superviżjoni kontinwa mill-Bank tal-Poplu taċ-Ċina. Is-CCPs awtorizzati jridu jinnotifikaw lill-Bank tal-Poplu taċ-Ċina bi kwalunkwe emenda għar-regoli tas-CCPs u kwalunkwe kwistjoni sinifikanti, inklużi bidliet fil-firxa tan-negozju u t-tnedija ta’ servizzi ġodda, kwalunkwe bidla fil-kontroll tal-ġestjoni tar-riskju u fil-pjanijiet ta’ emerġenza, kwalunkwe emenda fl-artikoli ta’ assoċjazzjoni, fil-proċeduri interni u fil-politiki interni, u kwalunkwe fużjoni u akkwiżizzjoni. Il-Bank tal-Poplu taċ-Ċina jrid japprova kwalunkwe emenda jew kwistjoni sinifikanti bħal dawn.

(10)

Ir-rekwiżiti legalment vinkolanti fir-Repubblika tal-Poplu taċ-Ċina għas-CCPs taħt is-superviżjoni tal-Bank tal-Poplu taċ-Ċina għalhekk jinkludu struttura b’żewġ livelli. L-ewwel livell jikkonsisti fil-Liġi tal-Bank tal-Poplu taċ-Ċina u r-regolamenti subordinati tagħha, li jistabbilixxu l-istandards ta’ livell għoli, inkluża l-applikazzjoni tal-PFMIs, li s-CCPs iridu jikkonformaw magħhom. It-tieni livell jikkonsisti fir-regoli u l-proċeduri li jobbligaw CCP awtorizzata tissottometti kwalunkwe emenda għall-firxa tas-servizzi tagħha u r-regoli tan-negozju tagħha, inklużi r-regoli dwar il-ġestjoni tar-riskju u r-regoli u l-proċeduri interni, lill-Bank tal-Poplu taċ-Ċina għall-approvazzjoni.

(11)

Il-valutazzjoni ta’ jekk l-arranġamenti legali u superviżorji applikabbli għas-CCPs stabbiliti fir-Repubblika tal-Poplu taċ-Ċina taħt is-superviżjoni tal-Bank tal-Poplu taċ-Ċina humiex ekwivalenti għall-arranġamenti legali u superviżorji tal-Unjoni jenħtieġ li tqis ukoll l-eżitu tal-mitigazzjoni tar-riskju li dawk l-arranġamenti legali u superviżorji jiżguraw f’termini tal-livell ta’ riskju li l-membri tal-ikklerjar u ċ-ċentri tan-negozjar stabbiliti fl-Unjoni huma esposti għalih minħabba l-parteċipazzjoni tagħhom f’dawk l-entitajiet. L-eżitu tal-mitigazzjoni tar-riskju huwa determinat kemm mil-livell ta’ riskju inerenti fl-attivitajiet ta’ kklerjar imwettqa mis-CCP ikkonċernata, li jiddependi mid-daqs tas-suq finanzjarju li topera fih, kif ukoll minn kemm huma xierqa l-arranġamenti legali u superviżorji applikabbli għas-CCPs biex jimmitigaw dak il-livell ta’ riskju. Sabiex jinkiseb l-istess eżitu ta’ mitigazzjoni tar-riskju, huma meħtieġa rekwiżiti ta’ mitigazzjoni tar-riskju aktar stretti għas-CCPs li jeżerċitaw l-attivitajiet tagħhom fi swieq finanzjarji ikbar li għandhom livell ta’ riskju inerenti ogħla minn dawk ta’ CCPs li jeżerċitaw l-attivitajiet tagħhom fi swieq finanzjarji iżgħar li għandhom livell ta’ riskju inerenti iktar baxx.

(12)

Is-swieq finanzjarji li fihom is-CCPs awtorizzati fis-suq interbankarju fir-Repubblika tal-Poplu taċ-Ċina jwettqu l-attivitajiet tal-ikklerjar tagħhom huma ferm iżgħar minn dawk li fihom is-CCPs stabbiliti fl-Unjoni jwettqu l-attivitajiet tal-ikklerjar tagħhom. B’mod partikolari, matul l-aħħar 3 snin, il-valur totali tat-tranżazzjonijiet derivattivi kklerjati f’CCPs sorveljati mill-Bank tal-Poplu taċ-Ċina rrappreżenta inqas minn 1 % tal-valur totali tat-tranżazzjonijiet derivattivi kklerjati fl-Unjoni. Għalhekk, il-parteċipazzjoni f’CCPs bħal dawn tesponi lill-membri tal-ikklerjar u ċ-ċentri tan-negozjar stabbiliti fl-Unjoni għal riskji ferm iktar baxxi mill-parteċipazzjoni tagħhom f’CCPs awtorizzati fl-Unjoni.

(13)

L-arranġamenti legali u superviżorji applikabbli għas-CCPs stabbiliti fir-Repubblika tal-Poplu taċ-Ċina taħt is-superviżjoni tal-Bank tal-Poplu taċ-Ċina għalhekk jenħtieġ li jitqiesu ekwivalenti għall-arranġamenti legali u superviżorji tal-Unjoni fejn dawk l-arranġamenti legali u superviżorji jkunu xierqa biex itaffu dak il-livell aktar baxx ta’ riskju. Ir-regoli primarji applikabbli għas-CCPs awtorizzati mill-Bank tal-Poplu taċ-Ċina, inkluż l-obbligu impost fuq is-CCPs awtorizzati li japplikaw u jimplimentaw il-PFMIs, jimmitigaw il-livell aktar baxx ta’ riskju li jeżisti fis-suq ikkonċernat u jiksbu eżitu ta’ mitigazzjoni tar-riskju li huwa ekwivalenti għal dak segwit mir-Regolament (UE) Nru 648/2012.

(14)

Il-Kummissjoni għalhekk tikkonkludi li l-arranġamenti legali u superviżorji tar-Repubblika tal-Poplu taċ-Ċina jiżguraw li s-CCPs awtorizzati mill-Bank tal-Poplu taċ-Ċina jikkonformaw ma’ rekwiżiti legalment vinkolanti li huma ekwivalenti għar-rekwiżiti stabbiliti fit-Titolu IV tar-Regolament (UE) Nru 648/2012.

(15)

Skont l-Artikolu 25(6), il-punt (b), tar-Regolament (UE) Nru 648/2012, l-arranġamenti legali u superviżorji ta’ pajjiż terz fir-rigward tas-CCPs awtorizzati hemmhekk għandhom jipprevedu superviżjoni u infurzar effettivi ta’ dawk is-CCPs fuq bażi kontinwa.

(16)

Il-Bank tal-Poplu taċ-Ċina huwa responsabbli għas-superviżjoni ta’ CCP awtorizzata fis-suq interbankarju u huwa involut fil-ġestjoni ta’ kuljum tas-CCPs li jissorvelja. Il-Bank tal-Poplu taċ-Ċina għandu setgħat komprensivi biex jikkontrolla u jippenalizza CCP awtorizzata, inkluża s-setgħa li jwettaq spezzjonijiet fuq il-post u mhux fuq il-post, li jitlob lil CCP awtorizzata tagħmel korrezzjonijiet, li joħroġ twissijiet, li jikkonfiska qligħ illegali, li jimponi penali fuq CCP, u li jwissi u jimmulta lid-diretturi, l-eżekuttivi għolja tas-CCP u impjegati oħra direttament responsabbli.

(17)

Il-Kummissjoni għalhekk tikkonkludi li s-CCPs awtorizzati u ssorveljati mill-Bank tal-Poplu taċ-Ċina huma soġġetti għal superviżjoni u infurzar effettivi fuq bażi kontinwa.

(18)

Skont l-Artikolu 25(6), il-punt (c), tar-Regolament (UE) Nru 648/2012, l-arranġamenti legali u superviżorji ta’ pajjiż terz iridu jinkludu sistema ekwivalenti effettiva għar-rikonoxximent ta’ CCPs awtorizzati skont reġimi legali ta’ pajjiżi terzi (“CCPs ta’ pajjiżi terzi”).

(19)

Skont l-Artikoli 4(1)(9) u 32(8) tal-Liġi dwar il-Bank tal-Poplu taċ-Ċina, il-Bank tal-Poplu taċ-Ċina huwa responsabbli għaż-żamma tal-operat normali tas-sistemi tal-ikklerjar u għandu s-setgħa li jimplimenta r-regoli u r-regolamenti dwar is-sistema tal-ikklerjar. CCPs stabbiliti barra mir-Repubblika tal-Poplu taċ-Ċina li jridu jikklerjaw strumenti finanzjarji għal banek kummerċjali stabbiliti fir-Repubblika tal-Poplu taċ-Ċina jistgħu japplikaw għal ittra ta’ ebda oġġezzjoni

(20)

Il-Kummissjoni għalhekk tikkonkludi li l-arranġamenti legali u superviżorji tar-Repubblika tal-Poplu taċ-Ċina għas-CCPs taħt is-superviżjoni tal-Bank tal-Poplu taċ-Ċina jipprevedu sistema ekwivalenti effettiva għar-rikonoxximent ta’ CCPs ta’ pajjiżi terzi.

(21)

Il-kundizzjonijiet stabbiliti fl-Artikolu 25(6), il-punti (a), (b) u (c) tar-Regolament (UE) Nru 648/2012 għalhekk jenħtieġ li jitqiesu li ġew issodisfati mill-arranġamenti legali u superviżorji tar-Repubblika tal-Poplu taċ-Ċina u jenħtieġ li jitqiesu ekwivalenti għar-rekwiżiti stabbiliti fir-Regolament (UE) Nru 648/2012. Din id-Deċiżjoni hija bbażata fuq l-arranġamenti legali u superviżorji applikabbli għas-CCPs awtorizzati biex jikklerjaw derivattivi OTC mill-Bank tal-Poplu taċ-Ċina fiż-żmien tal-adozzjoni ta’ din id-deċiżjoni. Il-Kummissjoni u l-Awtorità Ewropea tat-Titoli u s-Swieq se jkomplu jimmonitorjaw fuq bażi regolari l-evoluzzjoni tal-qafas legali u superviżorju applikabbli għas-CCPs fir-Repubblika tal-Poplu taċ-Ċina u l-issodisfar tal-kundizzjonijiet li abbażi tagħhom ittieħdet din id-Deċiżjoni.

(22)

Mill-inqas kull 3 snin, il-Kummissjoni jenħtieġ li tirrieżamina r-raġunijiet li abbażi tagħhom l-arranġamenti legali u superviżorji tar-Repubblika tal-Poplu taċ-Ċina jitqiesu ekwivalenti għall-arranġamenti legali u superviżorji tal-Unjoni, inklużi l-arranġamenti legali u superviżorji applikabbli għas-CCPs li huma taħt is-superviżjoni tal-Bank tal-Poplu taċ-Ċina. Tali rieżamijiet regolari għandhom ikunu mingħajr preġudizzju għas-setgħa tal-Kummissjoni li twettaq rieżami speċifiku fi kwalunkwe ħin fejn l-iżviluppi rilevanti jagħmluha neċessarja għall-Kummissjoni li tivvaluta mill-ġdid l-ekwivalenza ta’ dawk l-arranġamenti legali u superviżorji mal-arranġamenti legali u superviżorji tal-Unjoni. Abbażi tas-sejbiet minn dawk ir-rieżamijiet, il-Kummissjoni tista’ tiddeċiedi li temenda jew tħassar din id-Deċiżjoni fi kwalunkwe ħin, b’mod partikolari fejn l-iżviluppi regolatorji u superviżorji fir-Repubblika tal-Poplu taċ-Ċina jaffettwaw il-kundizzjonijiet li abbażi tagħhom tiġi adottata din id-Deċiżjoni.

(23)

Il-miżuri previsti f’din id-Deċiżjoni huma konformi mal-opinjoni tal-Kumitat Ewropew tat-Titoli,