Deskrizzjoni tal-oġġetti

Klassifikazzjoni (Kodiċi NM)

Raġunijiet

(1)

(2)

(3)

Oġġett fil-forma ta’ ċinturin (wiesgħa madwar 25 cm fin-nofs tal-parti ta’ wara), magħmul minn drappijiet tessili nnitjati elastiċizzati ħafna li għandhom jintlibsu madwar in-naħa t’isfel tad-dahar (iż-żona lombari). Fin-nofs tal-parti ta’ wara taċ-ċinturin hemm strixxa vertikali meħjuta. L-istrixxa hija wiesgħa madwar 11 cm u tikkonsisti prinċipalment minn drappijiet tessili minsuġin u mhux elastiċizzati.

L-oġġett jinqafel madwar il-ġisem b’għeluq tat-tip Velcro. Biex l-oġġett jiġi ssikkat aktar madwar il-qadd u b’hekk ikun hemm aktar pressjoni, żewġ ċineg elastiċizzati ħafna huma mwaħħla man-naħa ta’ barra tal-oġġett, mal-istrixxa vertikali fuq wara. It-trufijiet ta’ dawn iċ-ċineg jistgħu jitwaħħlu fuq quddiem b’żidiet tal-Velcro.

Fuq in-naħa ta’ ġewwa fin-nofs tal-parti ta’ wara, l-oġġett għandu erba’ bwiet vertikali li fihom strixxi tal-azzar flessibbli (twal madwar 22 cm u wiesgħa madwar 2 cm). Tnejn minn dawn l-erba’ strixxi tal-azzar jistgħu jitneħħew. L-istrixxi tal-azzar jistgħu jitgħawġu faċilment bl-idejn u jitqiegħdu fil-pożizzjoni oriġinali tagħhom.

Kuxxinett tal-pressjoni fil-forma ta’ qalb (twil madwar 16 cm u wiesgħa madwar 15 cm) ta’ fowm ċellulari mgħotti bi drapp tessili minsuġ jista’ jitwaħħal ma’ strixxa tat-tip Velcro li tinsab fuq in-naħa ta’ ġewwa tal-oġġett fin-nofs tal-parti ta’ wara biex ikun hemm pressjoni fuq is-sinsla.

L-oġġett huwa prodott f’5 daqsijiet skont iċ-ċirkonferenza tal-qadd.

(Ara l-istampi) (*1)

6212 90 00

Il-klassifikazzjoni hija determinata mir-Regoli Ġenerali 1 u 6 għall-interpretazzjoni tan-Nomenklatura Magħquda, in-Nota 7(d) tat-Taqsima XI, in-Nota 1(b) tal-Kapitolu 90 u mill-kliem tal-kodiċijiet NM 6212 u 6212 90 00 .

Il-klassifikazzjoni taħt il-kodiċi NM 9021 10 10 bħala apparat ortopediku hija eskluża, peress li l-elastiċità taċ-ċinturin hija l-uniku fattur li jikkontribwixxi għall-effett ta’ appoġġ skont in-Nota 1(b) tal-Kapitolu 90. Il-kuxxinett tal-pressjoni u l-istrixxi tal-azzar flessibbli jikkontribwixxu b’mod insinifikanti għall-effett ta’ appoġġ maħsub. Il-kuxxinett tal-pressjoni jservi prinċipalment biex itaffi l-uġigħ u l-istrixxi tal-azzar flessibbli jservu wkoll biex jipprevjenu li l-oġġett jitgerbeb u b’hekk, skont is-sentenza tal-Qorti tal-Ġustizzja tas-7 ta’ Novembru 2002, Lohmann u medi Bayreuth, il-Kawżi Magħquda C-260/00 sa C-263/00, ECLI:EU:C:2002:637 (ara l-punti 48 u 50), ma jfixklux l-applikazzjoni tan-Nota 1(b) tal-Kapitolu 90.

Barra minn hekk, minħabba l-elastiċità taċ-ċinturin u l-flessibbiltà tal-istrixxi tal-azzar li lanqas biss jifilħu għas-saħħa applikata manwalment, iċ-ċinturin ma jistax jipprevjeni kompletament, u taħt iċ-ċirkostanzi kollha, il-movimenti mhux mixtieqa tas-sinsla. Il-pressjoni applikata fuq is-sinsla tillimita biss il-movimenti konxji iżda ma tipprevjenix kompletament il-movimenti speċifiċi tas-sinsla biex teskludi korrimenti oħra (in-Nota 6 tal-Kapitolu 90) kif meħtieġ mill-apparat ortopediku tal-intestatura 9021 skont it-tieni paragrafu tan-Nota addizzjonali 2 tal-Kapitolu 90.

Għalhekk l-oġġett għandu jiġi kklassifikat taħt il-kodiċi NM 6212 90 00 bħala oġġetti simili oħrajn.