L_202501492GA.000101.fmx.xml

RIALACHÁN CUR CHUN FEIDHME (AE) 2025/1492 ÓN gCOIMISIÚN

an 14 Iúil 2025

maidir le haicmiú earraí áirithe san Ainmníocht Chomhcheangailte

TÁ AN COIMISIÚN EORPACH,

Ag féachaint don Chonradh ar Fheidhmiú an Aontais Eorpaigh,

Ag féachaint do Rialachán (AE) Uimh. 952/2013 ó Pharlaimint na hEorpa agus ón gComhairle an 9 Deireadh Fómhair 2013 lena leagtar síos Cód Custaim an Aontais (1), agus go háirithe Airteagal 57(4) agus Airteagal 58(2) de,

De bharr an mhéid seo a leanas:

(1)	Chun a áirithiú go gcuirtear an Ainmníocht Chomhcheangailte atá i gceangal le Rialachán (CEE) Uimh. 2658/87 ón gComhairle (2) i bhfeidhm go haonfhoirmeach, is gá bearta a ghlacadh maidir le haicmiú na n-earraí dá dtagraítear san Iarscríbhinn a ghabhann leis an Rialachán seo.

(2)

Le Rialachán (CEE) Uimh. 2658/87, leagadh síos na rialacha ginearálta maidir le léirmhíniú na hAinmníochta Comhcheangailte. Tá feidhm ag na rialacha sin freisin maidir le haon ainmníocht eile atá bunaithe go hiomlán uirthi nó a bhfuil cuid di bunaithe uirthi nó a chuireann aon fhoroinn bhreise léi agus a bhunaítear le forálacha sonracha de chuid an Aontais, d’fhonn bearta taraife agus bearta eile i ndáil le trádáil in earraí a chur i bhfeidhm.

(3)	De bhun na rialacha ginearálta sin, na hearraí a bhfuil tuairisc orthu i gcolún (1) den tábla a leagtar amach san Iarscríbhinn, is earraí iad ba cheart a aicmiú faoin gcód AC a luaitear i gcolún (2), de bhua na gcúiseanna a leagtar amach i gcolún (3) den tábla sin.

(4)

Maidir le faisnéis taraife cheangailteach arna heisiúint i leith na n-earraí a bhaineann leis an Rialachán seo, ar faisnéis í nach bhfuil i gcomhréir leis an Rialachán seo, is iomchuí a fhoráil go bhféadfaidh an sealbhóir an fhaisnéis sin a agairt fós, go ceann tréimhse áirithe, i gcomhréir le hAirteagal 34(9) de Rialachán (AE) Uimh. 952/2013. Is tréimhse trí mhí ba cheart a bheith sa tréimhse sin.

(5)	Na bearta dá bhforáiltear sa Rialachán seo, is bearta iad atá i gcomhréir leis an tuairim ón gCoiste um an gCód Custaim,

TAR ÉIS AN RIALACHÁN SEO A GHLACADH:

Airteagal 1

Na hearraí a bhfuil tuairisc orthu i gcolún (1) den tábla a leagtar amach san Iarscríbhinn, aicmeofar iad faoi chuimsiú na hAinmníochta Comhcheangailte faoin gcód AC a luaitear i gcolún (2) den tábla sin.

Airteagal 2

Faisnéis taraife cheangailteach nach bhfuil i gcomhréir leis an Rialachán seo, féadfar í a agairt fós i gcomhréir le hAirteagal 34(9) de Rialachán (AE) Uimh. 952/2013 go ceann tréimhse trí mhí ó dháta theacht i bhfeidhm an Rialacháin seo.

Airteagal 3

Tiocfaidh an Rialachán seo i bhfeidhm an fichiú lá tar éis lá a fhoilsithe in Iris Oifigiúil an Aontais Eorpaigh.

Beidh an Rialachán seo ina cheangal go huile agus go hiomlán agus beidh sé infheidhme go díreach i ngach Ballstát.

Arna dhéanamh sa Bhruiséil, an 14 Iúil 2025.

Thar ceann an Choimisiúin

Gerassimos THOMAS

An tArd-Stiúrthóir

Ard-Stiúrthóireacht an Chánachais agus an Aontais Custaim

(1) IO L 269, 10.10.2013, lch. 1, ELI: http://data.europa.eu/eli/reg/2013/952/oj.

(2) Rialachán (CEE) Uimh. 2658/87 ón gComhairle an 23 Iúil 1987 maidir leis an ainmníocht taraife agus staidrimh agus leis an gComhtharaif Chustaim (IO L 256, 7.9.1987, lch. 1, ELI: http://data.europa.eu/eli/reg/1987/2658/oj).

IARSCRÍBHINN

Tuairisc ar na hearraí

Aicmiú (Cód AC)

Cúiseanna

(1)

(2)

(3)

Earra i gcruth creasa (thart ar 25 cm ar leithead i lár an chúil), atá déanta as fabraicí teicstíle cniotáilte an-leaisteach atá le caitheamh timpeall ar íochtar an droma (an réigiún lumbach). I lár chúl an chreasa, tá stiall ingearach fuaite leis. Tá an stiall thart ar 11 cm ar leithead, agus is éard atá ann go príomha fabraicí teicstíle fite nach bhfuil leaisteach.

Dúntar an t-earra timpeall an choirp trí dhúnadh de chineál Velcro. Chun an t-earra a theannadh timpeall na coime agus chun níos mó brú a chur, ar an taobh amuigh den earra, tá dhá bhanda an-leaisteach ceangailte as an stiall ingearach ar an gcúl. Is féidir bun na mbandaí sin a ghreamú den tosach le ceangaltáin Velcro.

Ar an taobh istigh i lár an chúil tá ceithre phóca ingearacha san earra ina bhfuil stiallacha cruach solúbtha (atá thart ar 22 cm (ar fad) x 2 cm (ar leithead)). Is féidir dhá cheann de na ceithre stiall cruach sin a bhaint. Is féidir na stiallacha cruach a lúbadh go héasca de láimh agus a chasadh siar go dtí an suíomh bunaidh.

Is féidir pillín brú i gcruth croí (atá thart ar 16 cm (ar fad) x 15 cm (ar leithead)) de chúr ceallach atá clúdaithe le fabraicí teicstíle fite a cheangal as stiall ingearach de chineál Velcro atá suite ar an taobh istigh den earra i lár an chúil chun brú a chur ar an gcnámh droma.

Táirgtear an t-earra i gcúig mhéid ag brath ar imlíne na coime.

(Féach na híomhánna) (*1)

6212 90 00

Cinntear an t-aicmiú le rialacha ginearálta 1 agus 6 maidir le léirmhíniú na hAinmníochta Comhcheangailte, Nóta 7(d) a ghabhann le Roinn XI, Nóta 1(b) a ghabhann le Caibidil 90 agus le foclaíocht na gcód CN 6212 agus 6212 90 00 .

Eisiatar aicmiú faoi chód AC 9021 10 10 mar fhearais ortaipéideacha, toisc gurb é leaisteachas an chreasa an t-aon toisc amháin a chuireann leis an éifeacht tacaíochta de réir Nóta 1(b) a ghabhann le Caibidil 90. Is beag a chuireann an pillín brú agus na stiallacha cruach solúbtha leis an éifeacht tacaíochta cheaptha. Is é is príomhaidhm don phillín brú pian a mhaolú agus is é is aidhm do na stiallacha cruach solúbtha freisin cosc a chur ar an earra a chuaileáil agus, dá bhrí sin, ní chuireann sé bac ar chur i bhfeidhm Nóta 1(b) a ghabhann le Caibidil 90 de réir bhreithiúnas na Cúirte Breithiúnais an 7 Samhain 2002, Lohmann agus medi Bayreuth, Cásanna Uamtha C-260/00 go C-263/00, ECLI:EU:C:2002:637 (féach míreanna 48 agus 50).

Thairis sin, mar gheall ar leaisteachas an chreasa agus ar sholúbthacht na stiallacha cruach nach féidir leo fórsa a chuirtear de láimh a sheasamh fiú, níl an crios in ann gluaiseachtaí neamh-inmhianaithe na cnáimhe droma a chosc go hiomlán, agus i ngach gcás. Leis an mbrú a chuirtear ar an gcnámh droma, ní chuirtear teorainn ach le gluaiseachtaí comhfhiosacha ach ní chuirtear cosc iomlán ar ghluaiseachtaí sonracha na cnáimhe droma chun tuilleadh gortuithe a eisiamh (Nóta 6 a ghabhann le Caibidil 90) mar a cheanglaítear le haghaidh fearais ortaipéideacha atá faoi cheannteideal 9021 de réir an dara mír de Nóta breise 2 a ghabhann le Caibidil 90.

Dá bhrí sin, tá an t-earra le haicmiú faoi chód AC 6212 90 00 mar earraí comhchosúla eile.

radhairc den taobh amuigh

dúnta:

teannta:

radhairc den taobh istigh amuigh:

pillín brú incheangailte:

ceithre phóca ingearacha ina bhfuil stiallacha cruach solúbtha:

dhá stiall cruach inbhainte agus pillín brú ceangailte:

(*1) Is le faisnéis a thabhairt, agus lena aghaidh sin amháin, atá na híomhánna ann.