7.3. Il-muniti
7.3.1. L-euro u s-cent
Sorsi oħra ta’ informazzjoni dwar l-euro
L-euro
Skont il-konklużjonijiet tal-Kunsill Europew milħuqa f’Madrid f’Diċembru tal-1995, il-munita unika hija l-“euro” (suddiviżjoni: cent; simbolu: €; kodiċi ISO: EUR).
Iż-żona tal-euro
It-terminu “iż-żona tal-euro” huwa t-terminu uffiċjali għall-grupp ta’ pajjiżi li adottaw l-euro bħala l-munita unika tagħhom. Termini oħra, bħalma huma “eurolandja” u “żona euro”, għandhom ikunu evitati.
L-euro u l-ecu
Fl-1 ta’ Jannar 1999, l-euro ħa post l-ecu bir-rata ta’ wieħed għal wieħed (ir-Regolament tal-Kunsill (KE) Nru 1103/97 (ĠU L 162, 19.6.1997, p. 1); ara wkoll ir-Regolament tal-Kunsill (KE) Nru 974/98 (ĠU L 139, 11.5.1998, p. 1)). Referenzi storiċi għall-ecu (qabel l-1999) għandhom jibqgħu fl-ecu.
Is-cent
Fil-prinċipju, it-terminu “cent” jintuża fil-lingwi uffiċjali kollha tal-UE. Madankollu, “cent” ma jimpedix l-użu komuni tal-varjanti ta’ dan it-terminu fl-Istati Membri (skont il-premessa 2 tar-Regolament (KE) Nru 974/98 tat-3 ta’ Mejju 1998).
Fil-Malti, jekk jinqala’ każ fejn jista’ jinħoloq xi dubju, jista’ jintuża t-terminu “ċenteżmu” (plural: “ċenteżmi”).
Il-forma preferuta fit-testi tal-UE hija “cent” (obbligatorja fit-testi legali kollha).